Lawmman Chu Thlir Reng Rawh
Lawmman Chu Thlir Reng Rawh
“Lâwmman hmu tûrin, tiam chin lam chu ka pan ṭâlh ṭâlh a ni.”—PHIL. 3:14.
1. Tirhkoh Paula hnênah eng lâwmman nge pêk tiam a nih?
TIRHKOH Paula, Tarsa khaw mi Saula tia hriat bawka chu chhûngkaw langsâr tak aṭanga lo piang chhuak a ni a. Dân lam zirtîrtu hmingthang tak Gamaliela kiangah amah thlahtute sakhaw vawn chanchin chu a zir a ni. (Tirh. 22:3) Paula chuan a hun laia hna ṭha tak nia ngaih chu a thawk thei reng a; mahse, a sakhaw vawn chu kalsanin, Kristian a lo ni a. Tichuan, a hnêna pêk tiam chatuan nunna lâwmman—Pathian vân lam Lalrama lal leh puithiam thi thei lo nihna—chu a thlîr tlat reng a ni. Chu Lalram chuan lei paradis-ah ro a rêl ang.—Mt. 6:10; Thup. 7:4; 20:6.
2, 3. Paula chuan vâna a lâwmman dawn tûr chu eng angin nge a ngaihhlut?
2 Paula chuan chu lâwmman a ngaihhlutzia chu târ langin: “Ka tâna hlâwkna tûr apiangte chu chûng chu Krista avângin chânnaah ka ruat ta a ni. A ni tak meuh mai, ka Lalpa Krista Isua hriatna ropui bîkzia avângin thil engkim pawh chânnaah ka ruat a ni; amah avângin thil zawng zawng ka chân ta vek a, chûng chu hnâwmhneah lek ka ngai a,” tiin a sawi. (Phil. 3:7, 8) Mi a tam zâwkte’n an ngaih pawimawh êm êm thil—nihna te, hausakna te, hnathawh te, hmingthanna te—chu Paula chuan mihringte tâna Jehova thiltum chungchâng thudik a hriat hnu chuan hnâwmhneah lek a ngai a ni.
3 Chuta ṭang chuan, Paula tâna thil pawimawh ber chu Jehova leh Krista hriatna hlu tak a ni a; chu chu Isua’n Pathian hnêna a ṭawngṭainaah heti hian a sawi a ni: “Hei hi chatuana nunna a ni, nang Pathian tak chauh leh i tirh Isua Krista hriat hi,” tiin. (Joh. 17:3) Paula’n chatuan nunna neih a châkzia chu Philippi 3:14-a chhinchhiah a thuziak: “Krista Isuaa Pathian chung lam koh chhan lâwmman hmu tûrin, tiam chin lam chu ka pan ṭâlh ṭâlh a ni,” tihah hian a lang chiang a ni. Ni e, Pathian Ram sawrkârna zînga mi anga vâna chatuan nunna lâwmman a dawn tûr chu a thlîr reng a ni.
Leia Chatuana Nunna
4, 5. Tûn laia Pathian duhzâwng titu mi maktaduai têlte tân eng lâwmman nge pêk a nih?
4 Pathian duhzâwng tih thlangtu zînga a tam zâwkte tâna thawh rim phu lâwmman chu Pathian siam khawvêl thara chatuana nunna hi a ni. (Sâm 37:11, 29) Isua chuan chu beiseina chianzia chu nemnghetin: “Thuhnuairawlhte chu an eng a thâwl e; lei hi an la rochung dawn si a,” a ti. (Mt. 5:5) Sâm 2:8-nain a târ lan angin, Isua ngei chu lei rochungtu tûr ber a ni a, mi 1,44,000 chu vânah ro a rêlpui ang. (Dan. 7:13, 14, 22, 27) Leia nung tak tak tûr berâm ang mite chuan ‘khawvêl siam ṭantirh ata an tâna ram buatsaih,’ Lalram lei lam pêng chu an “rochung” bawk ang. (Mt. 25:34, 46) Tin, hêng thute min tiamtu chu Pathian “dâwt sawi thei lova” a nih avângin, a rawn thleng famkim ngei dâwn a ni. (Tit. 1:1, 2) Pathian thutiamte thlen famkimna chungchângah Josua’n Israelte hnêna: “LALPA in Pathianin in chungchâng a ṭha lam a lo sawi tawh zawng zawngte kha thlâwn pakhat mah a awm lo tih chu in thinlung zawng zawng leh in rilru zawng zawngin in hria e; in chungah a lo thleng ta vek a, pakhat mah thlâwn a awm lo ve,” a tih laia a neih ang rin tlatna chu kan nei ve thei a ni.—Jos. 23:14.
5 Pathian khawvêl thara nun chu lungawi lohnaa khat tûn lai nun ang a ni lo vang a. A danglam hle dâwn a ni: indona te, dân bawhchhiatna te, retheihna te, rorêl dik lohna te, natna te, leh thihna te chu a awm dâwn si lo. Chutih hunah chuan mite chuan hrisêlna ṭha famkim an nei ang a, paradis-a siam leilungah hian an chêng ang. Chutiang nun chu kan duhthusâm ai daihin a lungâwithlâk dâwn a ni. Ni e, nî tin mai hian kan hmuingîl dâwn a ni. Lâwmman ropui a va ni tak êm!
6, 7. (a) Engtin nge Isua chuan Pathian khawvêl thara kan thil beisei theih tûr chu a entîr? (b) Engtin nge mitthite pawh bul ṭan ṭhattîr leh an nih ang?
6 Isua leia a awm lai khân, khawvêl thara lei pum puia thleng tûr thil ropui takte entîr tûrin Pathian thlarau thianghlim hmanga thiltihtheihna pêk a ni a. Entîr nân, Isua chuan kum 38 lai zeng tawh mi pakhat hnênah a kea kal tûrin a hrilh a ni. Bible chuan chu pa chu a kal theih tâk thu a sawi. (Johana 5:5-9 chhiar rawh.) Ṭum dangah Isua chuan “a pian tirh ata mitdel pakhat” a tâwk a, a tidam ta a ni. A hnua a ti Damtu zawh a nih khân, mitdel tihdam tâka chuan: “Khawvêl awm tirh ata tuman mitdel saa piang mit an tivâr leh tih an hre ngai lo. He mi hi Pathian hnêna chhuak a nih loh chuan engmah a ti thei lo vang,” tiin a chhâng a. (Joh. 9:1, 6, 7, 32, 33) Isua’n chûng zawng zawng a tih theih chhan chu Pathianin thiltihtheihna a pêk vâng a ni a. A kalna apiangah “tihdam ngai apiang a tidam” a ni.—Lk. 9:11.
7 Isua chuan dam lote leh piangsualte a tidam thei mai ni lovin, mitthite pawh a kaitho thei a ni. Entîrna pakhat atân, hmeichhe naupang kum 12 mi chu a thi a, a nu leh pate chuan nasa takin an sûn a ni. Mahse, Isua chuan: “Chêmtê, tho rawh, ka ti a che,” a ti a. Hmeichhe naupang chu a lo tho ta mai a! A nu leh pate leh chuta awm mi dangte mak tih dân tûr chu i ngaihtuah thei em? (Marka 5:38-42 chhiar rawh.) “Mi felte leh fel lote thawhlehna a awm” dâwn avângin, mi tlûklehdingâwn têlte an thawhleh hunah chuan ‘mak tih namênin mak an ti lo’ vang a, an hlim hle ang. (Tirh. 24:15; Joh. 5:28, 29) Chûngte chu chatuan thlenga nun theih beiseina neiin, bul ṭan ṭhattîr leh an ni ang.
8, 9. (a) Krista Kum Sâng Rorêl chhûngin, Adama hnên aṭanga rochun sualna chu engtin nge a awm ang? (b) Eng ṭanchhanin nge mitthite chu rorêlsak an nih ang?
8 Tholehte chuan nunna neih theihna hun remchâng an nei ang. Thlawhlehnaa lo kîr lehte chu an thih hmaa an thil tihsual ṭanchhana rorêlsak an ni lo vang. (Rom 6:7) Krista Kum Sâng Rorêl chhûng chuan tlanna hlutna chu hman a nih avângin, thuâwih Lalram khua leh tuite chu a tâwpa Adama sual sawhkhâwk zawng zawng aṭanga an fihlîm thlengin an lo ṭha famkim chho tial tial ang. (Rom 8:21) Jehova chuan “thihna chu a lem hlen ta; Lalpa PATHIAN chuan mi zawng zawng hmai ata chu mittuite a hru fai ang.” (Is. 25:8) Pathian Lehkha Thu chuan “lehkhabute an hawng” a ti bawk a, chu chuan chuta nungte hnênah hriattîrna thar pêk an ni dâwn tih a târ lang a ni. (Thup. 20:12) Lei hi paradis-a chantîr a nih rualin, “khawvêla awmte chuan felna chu an zir” dâwn a ni.—Is. 26:9.
9 Tholehte chu Adama hnên aṭanga an sual rochun ṭanchhana rorêlsak ni lovin, an duh thlanna ṭanchhana rorêlsak an ni zâwk ang. Thu Puan 20:12 chuan: “Mitthite chu lehkhabutea ziak an thiltih ang zêla rêlsakin an awm ta a,” a ti a, an thawhleh hnua an thiltih sawina a ni. Chu chu Jehova rorêl dikna, zahngaihna, leh hmangaihna entîrna ropui tak a va ni êm! Chu bâkah, he khawvêl hluia an hrehawm tawrhte chu “hriat rengin a awm tawh lo vang a, rilruah pawh a lût tawh hek lo vang.” (Is. 65:17) Mi tiphur thei tak thu tharte leh thil ṭha hlîra khat nun an nei ang a, tûn hmaa thil ṭha lote tihlungngaihin an awm tawh ngai lo vang. Chûng thil ṭha lote chu an theihnghilh tawh ang. (Thup. 21:4) Armageddon-a dam khaw chhuak “mi pui tam tak” tân pawh chutiang chu a ni bawk ang.—Thup. 7:9, 10, 14.
10. (a) Pathian khawvêl thara nun chu eng ang nge ni dâwn? (b) Lâwmman thlîr reng tûra ṭanpui tûr chein eng nge i tih theih?
10 Pathian khawvêl tharah chuan, mite chu an na tawh lo vang a, an thi tawh bawk hek lo vang. “Chu mi khuaa awm chuan ‘Ka dam lo ve,’ a ti lo vang.” (Is. 33:24) A tâwpah chuan, lei thara chêngte chu ni ropui tak dang phur taka hmang tûrin, tûk tin mai chu hrisêlna ṭha famkim nên an tho tawh ang a. Hna lungawithlâk tak leh an ṭhatna tûr duhtute nêna inkawm hlân chu an nghâkhlel hle ang. Chutiang nun chu lâwmman ropui a va ni tak êm! Isaia 33:24 leh 35:5-7-a hrilh lâwkna chu engvângin nge i Bible keuva i chhiar loh vang? Chuta tel ve-ah chuan han inchan teh. Chu chuan lâwmman chu thlîr reng tûrin a ṭanpui ang che.
Lâwmman Chântu Mi Ṭhenkhat
11. Solomona ṭha taka a lal ṭan dân sawi rawh.
11 Lâwmman chungchâng kan hriat tawh chuan, chu chu kan chân theih avângin chu mi lam chauh chu thlîr reng tûra taihmâk kan chhuah a ngai a ni. Entîr nân, Solomona chu hmân lai Israel lal a lo nih khân, Pathian hnênah A mite chunga dik taka ro a rêl theih nân inngaitlâwm takin hriatna leh hriatthiamna a dîl a ni. (1 Lalte 3:6-12 chhiar rawh.) Chuvâng chuan, “Pathianin Solomona chu finna leh hriatna nasa tak . . . a pe a,” tiin Bible chuan a sawi. “Solomona finna chuan khawchhak fate zawng zawng finna leh Aigupta mite finna zawng zawng chu a khûm vek” tak zet a ni.—1 Lal. 4:29-32.
12. Jehova’n Israel rama lal ni tûrte hnênah eng vaukhânna thu nge a pêk?
12 Amaherawhchu, Pathian Jehova chuan lal thar apiangte chu “sakawr a ngah tûr a ni lo,” tih leh “a rilru a vahbo loh nân nupui pawh a ngah tûr a ni lo,” tiin a lo vaukhân lâwk tawh a ni. (Deut. 17:14-17) Lalin sakawr a ngahna chuan a ram vênhim nân Vênghimtu Jehova chungah innghat lovin, sipai chaknaah a innghat zâwk tih a târ lang ang. Tin, nupui tam tak a neih chuan chûng zînga ṭhenkhat chu sakhaw dik lo betu an chhehvêl awmte an ni thei a, chûng nupuite chuan lal chu Jehova biakna dik ata an lâk pên theih avângin a hlauhawm a ni.
13. Engtin nge Solomona chuan a hnêna pêk chu a chân?
13 Solomona chuan chûng vaukhânna thute chu a zâwm lo va. Jehova’n lalte tih loh tûra chiang taka a sawi chu a ti ta zâwk mah a ni. Ani chuan sakawr sâng têl leh sakawr chung chuang a sâng têlin a chhêk khâwm a. (1 Lal. 4:26) Nupui 700 leh hmei 300 lai a nei bawk a, chûng zînga tam tak chu an chheh vêla awm milem betute an ni. Chûngte chuan “pathian dangte lamah a thinlung an hruai kawisak a . . . LALPA a Pathian lamah chuan a thinlung chu a lo ṭha famkim ta lo va.” Solomona chu ram dang mi a nupuite’n an zirtîr milem biakna tenawm takah a inhnamhnawih ta a ni. Chuvângin, Pathian Jehova chuan Solomona hnênah: “Ram hi ka chhuhsak ngei ngei ang che,” a ti a ni.—1 Lal. 11:1-6, 11.
14. Solomona leh Israel hnamte thuâwih lohna chuan eng nge a rah chhuah?
14 Solomona chuan Pathian dik ai a awhna chanvo hlu tak chu a theihnghilh a. Biakna dik lovah a inhnamhnawih pumhlûm ta ṭhak a ni. A tâwpah chuan, a hnam pum chuan an kal pêng ta a, B.C.E. 607-ah tihboral an nih phah ta a ni. A tâwpah Judate chuan biakna dik chu din thar leh hrâm mah se, kum zabi têl a liam hnuah Isua chu hetiang hian puang chhuak tûra tur a ni: “Pathian ram chu in hnên ata lâksak a ni ang a, a rah chhuah tûr hnam hnênah pêk a ni ang,” tiin. Chu tak chu a lo thleng a ni. Isua chuan: “En teh u, in in chu a ruaka hnutchhiah che uin a awm ta,” tiin a puang chhuak a ni. (Mt. 21:43; 23:37, 38) A rinawm loh avângin, chu hnam chuan Pathian dik aiawhtu nih theihna chanvo ropui tak chu a chân ta. C.E. 70-ah Rom sipaite chuan Jerusalem leh a biak in chu an tichhe vek a, Juda a la bâng tam takte chu sala hruai an ni ta a ni.
15. Thil pawimawh tak chântute entîrna sawi rawh.
15 Juda Iskariota chu Isua tirhkoh 12-te zînga mi a ni a. Juda chuan Isua zirtîrna ropui takte chu a hria a, Pathian thlarau thianghlim ṭanpuina nêna a thilmak tihte pawh chu a hmu bawk. Mahse, Juda chuan a thinlung a vêng ṭha lo. Isua leh tirhkoh 12-te tangka ip kawl tûra mawhphurhna pêk a ni a. Mahse, ani chu ‘rûkru a ni a, tangka ip a kawl a, a chhûnga dah chu a la ṭhîn a ni.’ (Joh. 12:6) Dâr tangka sawmthuma Isua mantîr tûra puithiam vervêkte a biak khân a duhâmna chuan a vawrtâwp a thleng a ni. (Mt. 26:14-16) Lâwmman chântu dang chu, tirhkoh Paula ṭhian lo ni tawh ṭhîn Dema hi a ni a. Dema chuan a thinlung a vêng ṭha lo. Paula chuan: “Dema chuan tûn lai khawvêl hi a ngainat avângin mi kalsan,” a ti.—2 Tim. 4:10; Thufingte 4:23 chhiar rawh.
Kan Zavai Atâna Zir Tûr Chu
16, 17. (a) Kan hmachhawn dodâlna chu eng anga thiltithei nge a nih? (b) Setana’n kan chunga a thlentîr thil engpawh tuar thei tûrin engin nge min ṭanpui thei?
16 Pathian chhiahhlawh zawng zawngte chuan Bible-a târ lan entîrnate hi ngun takin an ngaihtuah tûr a ni: “Chûng chu entîrna tûrin an chungah a lo thleng a nih kha; keini, hun tâwp lo thlennate hi, min zilhna tûrin an ziak a ni bawk,” tia hrilh kan ni si a. (1 Kor. 10:11) Tûnah hian, he khawvêl suaksual tâna a ni hnuhnûngah kan awm tawh a ni.—2 Tim. 3:1, 13.
17 Diabol-Setana, “he khawvêl pathian” hian “hun tlêm tê chauh a nei tih” a inhria a. (2 Kor. 4:4; Thup. 12:12) Ani chuan Jehova chhiahhlawhte rinawmna tihchhiat nân kawng tinrênga thlêmin, a tih theih apiang a ti ang. Setana chuan chanchin thehdarhna lam pawh tiamin, he khawvêl hi a thunun tlat a. Amaherawhchu, Jehova mite chuan a aia thiltithei zâwk daih—‘thiltihtheihna nasa tak’—chu an nei a ni. (2 Kor. 4:7) Setana’n kan chunga a thlentîr thil engpawh tuar thei tûrin Pathian hnêna mi, chu thiltihtheihna nasa tak chu kan rinchhan thei a. Chuvângin, Jehova chuan ‘a dîltute chu thlarau thianghlim a pe’ ngei dâwn tih ring tlat chunga ṭawngṭai reng tûra fuih kan ni.—Lk. 11:13.
18. He khawvêl hi engtin nge kan thlîr ang?
18 Setana kalhmang zawng zawng chu tihboral a ni thuai ang a, Kristian dikte chu an dam khawchhuak ang tih hriatna pawhin min tichak bawk a ni. “Khawvêl hi a châknate chawpin a boral mêk a ni, Pathian duhzâwng titu erawh chu kumkhuain a awm reng ang.” (1 Joh. 2:17) Chutiang a nih avângin, Pathian chhiahhlawhte tân he khawvêla thil a engemaw ber hian Jehova nêna an inlaichînna aia hlutna tluantling zâwk nei anga ngaih chu a va finthlâk dâwn lo tak êm! Setana thununna hnuaia awm he khawvêl hi lawng pil mêk ang a ni a. Pathian Jehova chuan a chhiahhlawh rinawmte tân “chhan chhuahna lawnglêng,” Kristian kohhran chu a pe a ni. Chu lawnglênga khawvêl thar lam an pan laiin, he thutiam hi an ring tlat thei a ni: “Thil ṭha lo titute chu tihboralin an awm dâwn si a: LALPA nghâktute erawh chuan ram hi an luah ang,” tih hi. (Sâm 37:9) Chuvângin, he lâwmman ropui tak hi thlîr reng ang che! (w09 3/15)
Kan Hre Chhuak Thei Em?
• Tirhkoh Paula chuan a hnêna pêk tiam lâwmman chu engtin nge a ngaih?
• Leia chatuana nung tûrte chu eng ṭanchhanin nge rorêlsak an nih ang?
• I tâna kawng finthlâk chu eng nge ni ta?
[Zirlai Atâna Zawhnate]
[Phêk 16, 17-naa milem]
Bible thuziakte i chhiar hian lâwmman hmu tûrah i inchan em?