Żomm Għajnejk fuq il-Premju
“Qed niġri lejn il-mira għall-premju.”—FLP. 3:14.
1. Liema premju ġie offrut lill-appostlu Pawlu?
L-APPOSTLU Pawlu, magħruf ukoll bħala Sawl taʼ Tarsu, kien ġej minn familja prominenti. Hu ġie mgħallem ir-reliġjon taʼ l-antenati tiegħu minn Gamaljel, għalliem tal-Liġi magħruf sew. (Atti 22:3) Pawlu kellu quddiemu dak li kien kunsidrat bħala karriera tajba; madankollu hu telaq ir-reliġjon tiegħu u sar Kristjan. Imbagħad beda jħares ’il quddiem lejn il-premju taʼ ħajja eterna li kien ġie offrut lilu—li jkun sultan u qassis immortali fis-Saltna t’Alla fis-sema. Din is-Saltna se taħkem fuq art magħmula ġenna.—Mt. 6:10; Riv. 7:4; 20:6.
2, 3. Pawlu kemm kien jgħożżu l-premju taʼ ħajja fis-sema?
2 Sabiex juri kemm kien jgħożż dan il-premju, Pawlu qal: “L-affarijiet li kienu qligħ għalija, qisthom bħala telf minħabba l-Kristu. Mhux talli hekk, imma talli jien tabilħaqq inqis ukoll kollox bħala telf minħabba l-valur imprezzabbli taʼ l-għarfien dwar Kristu Ġesù l-Mulej tiegħi. Minħabba fih aċċettajt li nitlef l-affarijiet kollha u nqishom bħala qabda skart.” (Flp. 3:7, 8) L-affarijiet li ħafna nies iqisuhom importanti—il-pożizzjoni, il-ġid, il-karriera, il-prestiġju—Pawlu kkunsidrahom bħala skart wara li tgħallem il-verità dwar l-iskop taʼ Ġeħova għall-umanità.
3 Minn dakinhar ’il quddiem, dak li verament kien jgħodd għal Pawlu kien l-għarfien prezzjuż dwar Ġeħova u Kristu, li dwaru Ġesù qal f’talba lil Alla: “Il-ħajja taʼ dejjem tfisser dan: li jieħdu għarfien dwarek, l-uniku Alla veru, u dwar Ġesù Kristu li int bgħatt.” (Ġw. 17:3) Ix-xewqa kbira li kellu Pawlu biex jikseb il-ħajja eterna tidher ċar fil-kliem tiegħu misjub f’Filippin 3:14: “Qed niġri lejn il-mira għall-premju tas-sejħa t’Alla għal hemm fuq permezz taʼ Kristu Ġesù.” Iva, għajnejh kienu ffokati fuq il-premju taʼ ħajja eterna fis-smewwiet bħala parti mill-gvern tas-Saltna t’Alla.
Ngħixu Għal Dejjem fuq l-Art
4, 5. Liema premju ġie offrut lil miljuni li llum qed jagħmlu r-rieda t’Alla?
4 Għall-maġġuranza l-kbira minn dawk li jagħżlu li jagħmlu r-rieda t’Alla, il-premju li għandna naħdmu iebes għalih huwa ħajja eterna fid-dinja l-ġdida t’Alla. (Salm 37:11, 29) Ġesù kkonferma li din it-tama hija ċerta. Hu qal: “Henjin il-ġwejdin, għax għad jirtu l-art.” (Mt. 5:5) Ġesù nnifsu huwa l-werriet prinċipali taʼ l-art tagħna, bħalma jindika Salm 2:8, u hu se jkollu 144,000 persuna jaħkmu miegħu fis-sema. (Dan. 7:13, 14, 22, 27) Dawk l-uħud bħal nagħaġ li fil-fatt se jgħixu fuq l-art se ‘jirtu’ l-qasam taʼ l-art tas-Saltna ‘mħejjija għalihom mit-tisjis tad-dinja.’ (Mt. 25:34, 46) U għandna l-garanzija li dan kollu se jseħħ għax Alla, li jwiegħdu, “ma jistax jigdeb.” (Titu 1:2) Jistaʼ jkollna l-istess fiduċja fit-twettiq tal-wegħdi t’Alla li kellu Ġożwè meta qal lill-Israelin: “Lanqas kelma waħda mill-kliem tajjeb kollu li Ġeħova Alla tagħkom qalilkom ma naqset. Kollu seħħ għalikom. Lanqas kelma waħda ma naqset.”—Ġoż. 23:14.
5 Il-ħajja fid-dinja l-ġdida t’Alla m’hijiex se tkun bħall-eżistenza taʼ llum li hi bla sodisfazzjon taʼ xejn. Se tkun differenti ħafna: ħielsa mill-gwerer, il-kriminalità, il-faqar, l-inġustizzja, il-mard, u l-mewt. Dak iż-żmien in-nies se jkollhom saħħa perfetta u se jgħixu fuq art li se tkun ġiet mibdula f’ġenna. Dik il-ħajja se tkun sodisfaċenti iktar milli qatt nistgħu nimmaġinaw. Iva, dak iż-żmien kull ġurnata se tkun verament pjaċevoli. Xi premju meraviljuż!
6, 7. (a) Ġesù kif wera x’nistgħu nistennew li se jiġri fid-dinja l-ġdida t’Alla? (b) Kif anki l-mejtin se jingħataw bidu ġdid?
6 Meta Ġesù kien fuq l-art, Alla tah il-qawwa permezz taʼ l-ispirtu qaddis tiegħu sabiex juri l-affarijiet sbieħ li se jseħħu madwar l-art kollha fid-dinja l-ġdida. Per eżempju, Ġesù qal lil wieħed raġel li kien ilu paralizzat għal 38 sena biex jimxi. Il-Bibbja tgħid li dan ir-raġel hekk għamel. (Aqra Ġwanni 5:5-9.) Darb’oħra, Ġesù ltaqaʼ maʼ “raġel agħma mit-twelid” u fejqu. Iktar tard, ir-raġel li qabel kien agħma ġie mistoqsi dwar il-Wieħed li kien fejqu, u hu wieġeb: “Mill-qedem qatt ma nstemaʼ li xi ħadd fetaħ għajnejn wieħed imwieled agħma. Kieku dan ir-raġel ma kienx ġej minn Alla, ma kien ikun jistaʼ jagħmel xejn.” (Ġw. 9:1, 6, 7, 32, 33) Ġesù setaʼ jagħmel dan kollu minħabba li Alla kien tah il-qawwa. Kulfejn mar, Ġesù “fejjaq lil dawk li kellhom bżonn xi fejqan.”—Lq. 9:11.
7 Ġesù mhux biss setaʼ jfejjaq lil morda u lil dawk li kellhom diżabilità imma setaʼ wkoll iqajjem lill-mejtin. Per eżempju, tifla taʼ 12-il sena kienet mietet, u dan ġab niket kbir lill-ġenituri tagħha. Imma Ġesù qal: “Tfajla, ngħidlek, Qum!” U hekk għamlet! Tistaʼ timmaġinaha int ir-reazzjoni tal-ġenituri u taʼ dawk li kienu hemmhekk? (Aqra Marku 5:38-42.) Fid-dinja l-ġdida t’Alla, se jkun hemm “estasi kbira taʼ ferħ” meta biljuni se jiġu rxoxtati, għax “se jkun hemm irxoxt kemm tan-nies sewwa u kemm taʼ dawk li m’humiex sewwa.” (Atti 24:15; Ġw. 5:28, 29) Dawn se jingħataw bidu ġdid fil-ħajja bil-prospett li jgħixu minn dakinhar ’il quddiem, saħansitra għal dejjem.
8, 9. (a) Matul ir-Renju Millennjali taʼ Kristu, x’se jiġri mid-dnub li ntiret mingħand Adam? (b) Fuq liema bażi se jiġu ġudikati l-mejtin?
8 Dawk li jiġu rxoxtati se jingħataw l-opportunità li jiksbu l-ħajja. Dawk li jiġu lura fl-irxoxt mhux se jiġu kundannati għad-dnubiet li kkommettew qabel ma mietu. (Rum. 6:7) Matul ir-Renju Millennjali taʼ Kristu, hekk kif ikunu qed jiġu applikati l-benefiċċji tas-sagrifiċċju tal-fidwa, is-sudditi ubbidjenti tas-Saltna bil-mod il-mod se jsiru perfetti, u eventwalment se jinħelsu kompletament mill-effetti kollha tad-dnub taʼ Adam. (Rum. 8:21) Ġeħova se “jiblaʼ l-mewt għal dejjem, u l-Mulej Sovran Ġeħova se jimsaħ id-dmugħ mill-uċuħ kollha.” (Is. 25:8) Il-Kelma t’Alla tgħid ukoll li ‘se jinfetħu rombli,’ u dan jindika li dawk li se jkunu ħajjin dak iż-żmien se jingħataw informazzjoni ġdida. (Riv. 20:12) Hekk kif l-art tiġi mibdula f’ġenna, “l-abitanti taʼ l-art produttiva jitgħallmu s-sewwa.”—Is. 26:9.
9 Dawk li se jiġu rxoxtati se jkunu ġudikati fuq dak li huma nfushom jiddeċiedu li jagħmlu u mhux fuq il-bażi tad-dnub li wirtu minn Adam. Rivelazzjoni 20:12 jgħid: “Il-mejtin ġew ġudikati fuq dak li kien miktub fir-rombli skond l-għemejjel tagħhom,” jiġifieri, l-għemejjel tagħhom wara li jiġu rxoxtati. X’eżempju meraviljuż tal-ġustizzja, il-ħniena, u l-imħabba taʼ Ġeħova! Barra minn hekk, l-affarijiet li kienu jnikktuhom fil-ħajja tagħhom tal-passat f’din id-dinja qadima ‘ma jiftakruhomx, u lanqas ma se jweġġgħulhom qalbhom.’ (Is. 65:17) Peress li jkun hemm disponibbli informazzjoni inkuraġġanti ġdida u ħajja mimlija b’affarijiet tajbin, huma qatt iktar ma se jkunu mnikktin mill-affarijiet ħżiena tal-passat. Dawk l-esperjenzi koroh tal-passat se jintesew. (Riv. 21:4) L-istess se jiġrilhom dawk tal-“folla kbira” li se jibqgħu ħajjin wara Armageddon.—Riv. 7:9, 10, 14.
10. (a) Kif se tkun il-ħajja fid-dinja l-ġdida t’Alla? (b) X’tistaʼ tagħmel biex tiġi megħjun iżżomm għajnejk fuq il-premju?
10 Fid-dinja l-ġdida t’Alla, in-nies se jkunu jistgħu jgħixu mingħajr ma jerġgħu jimirdu jew imutu. “Ħadd minn min jgħammar hemmhekk ma jgħid: ‘Jien marid.’” (Is. 33:24) Eventwalment, l-abitanti taʼ l-art il-ġdida se jqumu kull fil-għodu b’saħħa perfetta, u jħarsu ’l quddiem b’mod ħerqan għal ġurnata meraviljuża oħra. Huma jħarsu ’l quddiem lejn xogħol sodisfaċenti u sħubija m’oħrajn li jimpurtahom minnhom. Ħajja bħal din hija tabilħaqq premju meraviljuż! Bħala suġġeriment, għax ma tiftaħx il-Bibbja tiegħek u taqra l-profeziji taʼ Isaija 33:24 u 35:5-7? Ipprova immaġina lilek innifsek f’dik ix-xena. Dan se jgħinek iżżomm għajnejk fuq il-premju.
Ma Baqgħux Iżommu Għajnejhom fuq il-Premju
11. Iddeskrivi l-bidu tajjeb tar-renju taʼ Salamun.
11 Ladarba nkunu tgħallimna dwar il-premju, għandna naħdmu b’mod diliġenti biex nibqgħu nżommu għajnejna ffokati fuqu minħabba li nistgħu nitilfuh. Per eżempju, meta Salamun sar sultan taʼ Israel tal-qedem, hu b’umiltà talab lil Alla għall-abbiltà biex jifhem u għad-dixxerniment sabiex ikun jistaʼ jiġġudika lill-poplu Tiegħu b’mod korrett. (Aqra l-1 Slaten 3:6-12.) Minħabba f’hekk, il-Bibbja tgħid, “Alla baqaʼ jagħti lil Salamun ħafna għerf u abbiltà li jifhem.” Tabilħaqq, “l-għerf taʼ Salamun kien iktar vast mill-għerf tan-nies kollha taʼ l-Orjent u mill-għerf kollu taʼ l-Eġittu.”—1 Slat. 4:29-32.
12. Ġeħova liema twissija tahom lil dawk li kienu jsiru slaten f’Israel?
12 Madankollu, iktar kmieni Ġeħova kien wissa li kulmin kien se jsir sultan “m’għandux ikollu ħafna żwiemel” u li ‘m’għandux ikollu ħafna nisa, sabiex qalbu ma titwarrabx minnu.’ (Dt. 17:14-17) Jekk is-sultan kien ikollu ħafna żwiemel kien juri li hu kien jiddependi mis-setgħa militari biex jipproteġi lill-ġens minflok ma jiddependi minn Ġeħova, il-Protettur. U li jkollu ħafna nisa setaʼ jkun perikoluż minħabba li xi wħud minnhom setgħu kienu minn ġnus pagani li kienu jieħdu sehem f’qima falza, u dawk in-nisa setgħu jwarrbu lis-sultan mill-qima vera taʼ Ġeħova.
13. Salamun kif ma baqax iżomm quddiem għajnejh dak li kien ngħatalu?
13 Salamun ma tax kas dawk it-twissijiet. Minflok, hu għamel dak li Ġeħova kien qal speċifikament lis-slaten li m’għandhomx jagħmlu. Hu kiseb eluf taʼ żwiemel u rikkieba. (1 Slat. 4:26) Kellu wkoll 700 mara u 300 konkubina, li ħafna minnhom kienu mill-ġnus pagani tal-viċin. Dawn “dawrulu qalbu biex imur wara allat oħrajn; u qalbu ma baqgħetx sħiħa maʼ Ġeħova.” Salamun beda jieħu sehem fil-qima falza moqżieża tal-ġnus pagani li kienu għallmuh in-nisa barranin tiegħu. Minħabba f’hekk, Ġeħova qal li hu kien se ‘jċarrat is-saltna minn fuq’ Salamun.—1 Slat. 11:1-6, 11.
14. Id-diżubbidjenza taʼ Salamun u tal-ġens taʼ Israel fiex irriżultat?
14 Salamun ma baqax jiffoka fuq il-privileġġ prezzjuż li kellu, jiġifieri, li jirrappreżenta lill-Alla l-veru. Is-sultan sar involut kompletament fil-qima falza. Maż-żmien, il-ġens kollu sar apostata, u dan wassal biex jinqered fis-sena 607 Q.E.K. Għalkemm il-Lhud eventwalment reġgħu ġeddew il-qima vera, sekli wara, Ġesù ġie mqanqal jiddikjara: “Is-saltna t’Alla tittieħed mingħandkom u tingħata lil ġens li jagħti l-frott minnha.” Dan hu eżatt dak li ġara. Ġesù ddikjara: “Ara! Darkom mitluqa f’idejkom.” (Mt. 21:43; 23:37, 38) Minħabba l-infedeltà tiegħu, il-ġens tilef il-privileġġ kbir li jirrappreżenta lill-Alla l-veru. Fis-sena 70 E.K., l-armati Rumani qerdu lil Ġerusalemm u t-tempju tagħha, u ħafna mil-Lhud li kien fadal saru lsiera.
15. Agħti xi eżempji taʼ rġiel li ma baqgħux jiffokaw fuq dak li kien verament importanti.
15 Ġuda l-Iskarjota kien wieħed mit-12-il appostlu taʼ Ġesù. Ġuda semaʼ t-tagħlim mill-aqwa taʼ Ġesù u ra l-mirakli li wettaq bl-għajnuna taʼ l-ispirtu qaddis t’Alla. Madankollu, Ġuda ma ħarisx lil qalbu. Hu kien ġie fdat bil-kaxxa tal-flus li kien fiha l-finanzi taʼ Ġesù u tat-12-il appostlu. Imma hu “kien ħalliel u, billi kellu l-kaxxa tal-flus, kien jieħu l-flus li kienu jintefgħu fiha.” (Ġw. 12:6) Ir-regħba tiegħu laħqet il-quċċata tagħha meta kkomplotta mal-qassisin ewlenin ipokriti biex jittradixxi lil Ġesù għal 30 biċċa tal-fidda. (Mt. 26:14-16) Xi ħaddieħor li ma baqax jiffoka fuq dak li hu importanti kien Dema, li kien sieħeb l-appostlu Pawlu. Dema ma ħarisx lil qalbu. Pawlu qal: “Dema telaqni peress li ħabb din is-sistema.”—2 Tim. 4:10; aqra Proverbji 4:23.
Lezzjoni Għal Kull Wieħed Minna
16, 17. (a) Kemm hi qawwija l-oppożizzjoni li għandna kontrina? (b) X’jistaʼ jgħinna nżommu sod minkejja dak kollu li jistaʼ jaqlgħalna Satana?
16 Il-qaddejja kollha t’Alla għandhom jieħdu bis-serjetà l-eżempji misjubin fil-Bibbja, għax jintqalilna: “Issa dan kollu ġralhom b’eżempju, u nkiteb bħala twissija għalina li fuqna wasal it-tmiem tas-sistemi.” (1 Kor. 10:11) Illum, aħna qed ngħixu matul l-aħħar jiem taʼ din is-sistema mill-agħar.—2 Tim. 3:1, 13.
17 Satana x-Xitan, “l-alla taʼ din is-sistema,” jaf li “żmien qasir baqagħlu.” (2 Kor. 4:4; Riv. 12:12) Hu se jagħmel dak kollu li jistaʼ sabiex iħajjar lill-qaddejja taʼ Ġeħova jkissru l-integrità tagħhom bħala Kristjani. Satana jikkontrolla din id-dinja, inkluż il-mezzi tagħha biex ixxerred il-propaganda. Madankollu, il-poplu taʼ Ġeħova għandu xi ħaġa bil-wisq iktar qawwija—“il-qawwa iktar min-normal.” (2 Kor. 4:7) Nistgħu nistrieħu fuq din il-qawwa minn Alla biex tgħinna nżommu sod minkejja dak kollu li jistaʼ jaqlgħalna Satana. B’hekk, aħna mħeġġin nitolbu l-ħin kollu, fiduċjużi li Ġeħova se “jagħti l-ispirtu qaddis lil dawk li jitolbuh.”—Lq. 11:13.
18. Liema attitudni għandu jkollna lejn din id-dinja?
18 Aħna niġu msaħħin ukoll permezz taʼ l-għarfien li s-sistema kollha taʼ Satana dalwaqt se tinqered imma l-Kristjani veri se jibqgħu ħajjin. “Id-dinja tgħaddi u x-xewqa tagħha wkoll, imma min jagħmel ir-rieda t’Alla jibqaʼ għal dejjem.” (1 Ġw. 2:17) Meta nqisu dan kollu, kemm ma jkunx għaqli li xi ħadd mill-qaddejja t’Alla jaħseb li hemm xi ħaġa f’din is-sistema li jistaʼ jkollha valur iktar dejjiemi mir-relazzjoni tiegħu maʼ Ġeħova! Din id-dinja taħt il-ħakma taʼ Satana hija bħal vapur li qed jegħreq. Ġeħova pprovda l-kongregazzjoni Kristjana bħala “dgħajsa taʼ salvataġġ” għall-qaddejja leali tiegħu. Hekk kif qed jimxu lejn id-dinja l-ġdida, huma jistgħu jkollhom fiduċja f’din il-wegħda: “Dawk li jagħmlu l-ħażen se jitqaċċtu ’l barra, imma dawk li jittamaw f’Ġeħova se jirtu l-art.” (Salm 37:9) Għalhekk, żomm għajnejk iffokati fuq dan il-premju meraviljuż!
Tiftakar Int?
• Pawlu kif ħassu dwar il-premju li ġie offrut lilu?
• Fuq liema bażi se jiġu ġudikati dawk li se jgħixu għal dejjem fuq l-art?
• X’inhi l-iktar ħaġa għaqlija li tistaʼ tagħmel issa?
[Mistoqsijiet taʼ Studju]
[Stampa f’paġna 12, 13]
Tara int lilek innifsek tikseb il-premju meta taqra r-rakkonti tal-Bibbja?