Tsepelela Moputsong
Tsepelela Moputsong
“Ke phegelela pakaneng ya moputso.”—BAFIL. 3:14.
1. Ke moputso ofe woo o bego o holofeditšwe moapostola Paulo?
MOAPOSTOLA PAULO, yoo a tsebjago gape e le Saulo wa Tareso, o be a e-tšwa lapeng leo le tumilego. O ile a rutwa bodumeding bja bagologolo ba gagwe ke morutiši yo a tumilego wa Molao e lego Gamaliele. (Dit. 22:3) Paulo o be a e-na le seo go ka thwego ke bokamoso bjo bobotse pele ga gagwe, lega go le bjalo o ile a tlogela bodumedi bja gagwe gomme a ba Mokriste. Ka gona, o ile a lebelela pele moputsong wa go phela ka mo go sa felego woo a bego a o holofeditšwe—e lego wa go ba kgoši e sa hwego le moperisita Mmušong wa Modimo wa legodimong. Mmušo woo o tla buša lefaseng la paradeise.—Mat. 6:10; Kut. 7:4; 20:6.
2, 3. Paulo o be a tšeela godimo bjang moputso wa go phela legodimong?
2 Ge Paulo a bontšha kamoo a bego a tšeela moputso woo godimo ka gona, o ile a re: “Dilo le ge e le dife tšeo e bego e le maruo go nna, tše ke di tšere e le go loba ka baka la Kriste. Ee, ruri ke sa dutše ke tšea dilo tšohle e le go loba ka baka la mohola o phalago tšohle wa tsebo ya Kriste Jesu Morena wa-ka. Ka baka la gagwe ke amogetše go loba dilo tšohle gomme ke di tšea e le maudi.” (Bafil. 3:7, 8) Dilo tšeo batho ba bantši ba naganago gore ke tša bohlokwa—maemo, lehumo, mošomo wa boiphedišo, botumo—Paulo o ile a di lebelela e le maudi ka morago ga gore a ithute therešo mabapi le morero wa Jehofa ka batho.
3 Go tloga nakong yeo go ya pele, seo Paulo a bego a tshwenyegile kudu ka sona e be e le tsebo ya bohlokwa ya go tseba Jehofa le Kriste, mabapi le seo Jesu a se boletšego thapelong ge a be a rapela Modimo ka gore: “Se se bolela bophelo bjo bo sa felego, gore ba hwetše tsebo ka wena Modimo a nnoši wa therešo le ka yo o mo romilego, Jesu Kriste.” (Joh. 17:3) Kganyogo e tšwago pelong ya Paulo ya go hwetša bophelo bjo bo sa felego e bonagala gabotse mantšung a gagwe ao a begilwego go Bafilipi 3:14 a rego: “Ke phegelela pakaneng ya moputso wa pitšo ya godimo ya Modimo ka Kriste Jesu.” Ee, mahlo a gagwe a be a tsepeletše moputsong wa go phela ka mo go sa felego legodimong e le karolo ya pušo ya Mmušo wa Modimo.
Go Phela Lefaseng ka mo go sa Felego
4, 5. Ke moputso ofe woo o holofetšwago ba dimilione bao ba dirago thato ya Modimo lehono?
4 Bakeng sa bontši bja bao ba kgethago go dira thato ya Modimo, moputso wo ba swanetšego go o šomela ke bophelo bjo bo sa felego lefaseng le lefsa la Modimo. (Ps. 37:11, 29) Jesu o tiišitše gore kholofelo ye ke e kwagalago. O itše: “Go thaba ba moya o boleta, ka ge ba tla ja bohwa bja lefase.” (Mat. 5:5) Jesu ke yena yo a tlago go rua lefase la rena, go etša ge Psalme 2:8 e bontšha gomme o tla buša legodimong a e-na le babuši-gotee le yena ba 144 000. (Dan. 7:13, 14, 22, 27) Bao ba swanago le dinku bao ge e le gabotse ba tlago go phela mo lefaseng, ba tla ja bohwa bja ‘Mmušo wo ba o lokišeditšwego go tloga go theweng ga lefase.’ (Mat. 25:34, 46) Gomme re kgonthišeditšwe gore se se tla phethagala ka gobane Modimo yoo a holofeditšego seo a ka se ke “a aketša.” (Tito 1:2) Re ka ba le kholofelo e swanago phethagatšong ya dikholofetšo tša Modimo tše di swanago le tšeo Jošua a bilego le tšona ge a be a botša Baisiraele gore: “[Ga se] xwa hlaêla le setee sa tše botse tše Morêna Modimo wa lena a Le boletšexo ka tšôna; ka moka di tšweletše; xa xo na le setee se se hlokexilexo.”—Još. 23:14.
5 Bophelo lefaseng le lefsa la Modimo bo ka se swane le bja lehono bjo bo sa kgotsofatšego. E tla ba bjo bo fapanego kudu: go ka se be le dintwa, bosenyi, bodiidi, go hloka toka, bolwetši le lehu. Batho ka nako yeo ba tla ba le bophelo bjo bo phethagetšego gomme ba tla phela lefaseng leo le fetošitšwego gore e be paradeise. Bophelo bjoo e tla ba bjo bo kgotsofatšago kudu go feta ditoro tša rena tšeo re di ratago kudu. Ee, letšatši le lengwe le le lengwe e tla ba le le thabišago kudu. A moputso o kgahlišago gakaakang!
6, 7. (a) Jesu o bontšhitše bjang seo re ka letelago gore se direge lefaseng le lefsa la Modimo? (b) Ke bjang gaešita le bahu ba tlago go thoma dilo lefsa?
6 Ge Jesu a be a le mo lefaseng, o ile a matlafatšwa ke moya wa Modimo o mokgethwa go bontšha mohuta wa dilo tše di kgahlišago tšeo di tlago go direga lefaseng ka moka lefaseng le lefsa. Ka mohlala, Jesu o ile a botša motho yo a bego a golofetše ka nywaga e 38 gore a sepele. Beibele e bega gore motho yoo o ile a sepela. (Bala Johane 5:5-9.) Lebakeng le lengwe, Jesu o ile a gahlana le “motho yo a belegwego e le sefofu” gomme a mo fodiša. Ka morago, motho yoo e bego e le sefofu o ile a botšišwa ka Yoo a mo fodišitšego gomme a araba ka gore: “Go tloga kgale ga se gwa ka gwa kwewa gore motho le ge e le ofe o kile a bula motho yo a belegwego e le sefofu mahlo. Ge nkabe motho yo a be a sa tšwe go Modimo, o be a ka se dire selo le gatee.” (Joh. 9:1, 6, 7, 32, 33) Jesu o be a ka dira tše ka moka ka gobane o be a neilwe matla ke Modimo. Gohle moo a bego a e-ya gona, Jesu o be a “fodiša bao ba nyakago go fodišwa.”—Luka 9:11.
7 Jesu o be a sa fodiše bao ba babjago le bao ba golofetšego feela eupša gape o be a tsoša le bahu. Ka mohlala, mosetsana wa nywaga e 12 o be a hwile gomme batswadi ba gagwe ba be ba nyamile kudu. Eupša Jesu o itše: “Mosetsana, ke re go wena, Tsoga!” Gomme a tsoga! Na o ka nagana kamoo batswadi ba gagwe le batho bao ba bego ba le moo ba ilego ba ikwa ka gona? (Bala Mareka 5:38-42.) Lefaseng le lefsa la Modimo, go tla ba le ‘lethabo le legolo’ ge ba dimilione tše dikete ba tsošwa, ka gobane “go tla ba le tsogo ya ba lokilego gotee le ba sa lokago.” (Dit. 24:15; Joh. 5:28, 29) Ba ba tla newa bophelo bjo bofsa ka tebelelo ya go phela go tloga ka nako yeo go ya pele gaešita le ka mo go sa felego.
8, 9. (a) Nakong ya Pušo ya Kriste ya Nywaga e Sekete, go tla direga’ng ka sebe sa leabela seo re se abetšego go tšwa go Adama? (b) Bahu ba tla ahlolwa motheong ofe?
8 Bao ba tsošitšwego ba tla ba le sebaka sa go hwetša bophelo. Bao ba tsošitšwego ba ka se ahlolwe ka baka la dibe tšeo ba di dirilego pele ba e-hwa. (Baroma 6:7) Nakong ya Pušo ya Kriste ya nywaga e sekete, ge mehola ya sehlabelo sa Jesu sa topollo e dirišwa, balata ba Mmušo bao ba botegago ba tla phethagala gomme mafelelong ba tla hunologa ka mo go feletšego dilong ka moka tšeo di bakilwego ke sebe sa Adama. (Baroma 8:21) Jehofa “lehu ó tlo le tloša ka xo sa felexo; Mong ’a bohle Morêna ó tlo phomola mexôkxô mahlong ohle.” (Jes. 25:8) Lentšu la Modimo gape le re “mangwalo a go phuthwa a [tlo] bulwa,” a bontšha gore bao ba phelago nakong yeo ba tla newa tsebišo e mpsha. (Kut. 20:12) Ka ge lefase le tla be le fetotšwe gore e be paradeise, “ba ba axilexo mo xo lôna ba ka rutwa tokô.”—Jes. 26:9.
9 Bao ba tsošitšwego ba tla ahlolwa, e sego ka baka la sebe sa leabela go tšwa go Adama, eupša ka baka la seo bona ba kgethago go se dira. Kutollo 20:12 e re: “Bahu ba ahlolwa ka dilo tšeo di ngwadilwego mangwalong a go phuthwa go ya ka ditiro tša bona” e lego ditiro tšeo ba di dirilego ka morago ga go tsošwa. A mohlala o kgahlišago gakaakang wa toka ya Jehofa, kwelobohloko le lerato! Go oketša moo, dilo tšeo di kwešago bohloko bophelong bja bona bja pele lefaseng la kgale “di ka se hlwê di tsebywa, le mo pelong ya motho di ka se hlwê di rotoxa.” (Jes. 65:17) Ka tsebo e mpsha yeo e agago yeo ba nago le yona le bophelo bjoo bo tletšego ka dilo tše dibotse, ba ka se sa tshwenyega ka dilo tše mpe tša nako e fetilego. Ba tla lebala dilo tšeo tše mpe tše ba kilego ba lebeletšana le tšona. (Kut. 21:4) Go tla direga se se swanago ka “lešaba le legolo,” leo le phologago Haramagedone.—Kut. 7:9, 10, 14.
10. (a) Bophelo lefaseng le lefsa la Modimo bo tla ba bjang? (b) Ke’ng seo o ka se dirago go go thuša go tsepamišetša mahlo moputsong?
10 Lefaseng le lefsa la Modimo, batho ba ka se sa babja goba go hwa. “Mo xo ba ba axilexo fá xo ka se bê le e a rexo: Ke a babya!” (Jes. 33:24) Mafelelong, badudi ba lefase le lefsa ba tla tsoga mesong e mengwe le e mengwe ba phetše gabotse, ba lebeletše pele ka tetelo-kgolo letšatšing le lengwe leo le kgahlišago. Ba tla lebelela pele modirong wo o kgotsofatšago le go gwerana le batho bao ba ba kgahlegelago go tšwa pelong. Bophelo bjo bjalo ke moputso o kgahlišago e le ruri! E le tšhišinyo, ke ka baka la’ng o sa bule Beibele ya gago gomme o bale ka boporofeta bjoo bo begilwego go Jesaya 33:24 le 35:5-7? Leka go ipea boemong bjoo. Seo se tla go thuša go tsepamišetša mahlo moputsong.
Go se Tsepelele Moputsong
11. Hlalosa mathomo a mabotse a pušo ya Solomone.
11 Ge re se na go ithuta ka moputso, re swanetše go šoma ka mafolofolo gore mahlo a rena a dule a tsepeletše moputsong ka gobane o ka re lahlegela. Ka mohlala, ge Solomone a be a e-ba kgoši ya Isiraele ya bogologolo, ka boikokobetšo o ile a rapela Modimo gore a mo nee kwešišo le temogo e le gore a ka kgona go ahlola batho ba Gagwe ka mo go nepagetšego. (Bala 1 Dikxoši 3:6-12.) Ka baka la seo, Beibele e re, “Modimo a nea Salomo bohlale le tsebô e kxolo ka kudu.” Ruri “bohlale bya Salomo bya xola bya feta bohlale bya ba Bohlabêla, le mahlale ka moka a Ba-Egipita.”—1 Dikx. 4:29-32.
12. Ke temošo efe yeo Jehofa a e neilego bao e bego e tla ba dikgoši Isiraeleng?
12 Lega go le bjalo, pejana Jehofa o ile a lemoša gore motho le ge e le ofe yoo e bago kgoši “a se kê a ba le dipitsi tše ntši” le gona “a se kê a tšea basadi ba bantši, xore pelo ya xaxwe e se aroxê.” (Doit. 17:14-17) Go oketša dipitsi goba dipere tša yona go be go tla bontšha gore kgoši e bota matla a bahlabani ba yona go šireletša setšhaba go e na le go bota Jehofa, Mošireletši. Gomme go tšea basadi ba bantši go be go tla ba kotsi ka gobane ba bangwe ba bona e ka ba bao ba tšwago ditšhabeng tšeo di ba dikologilego tša baheitene tšeo di lego bodumeding bja maaka gomme basadi bao ba ka dira gore kgoši e furalele borapedi bja therešo bja Jehofa.
13. Solomone o ile a lahlegelwa bjang ke seo a ilego a se newa?
13 Solomone ga se a ela hloko ditemošo tšeo. Go e na le moo, o dirile seo Jehofa a boletšego ka go lebanya gore dikgoši di se ke tša se dira. O ile a kgoboketša dipitsi goba dipere tše diketekete le banamedi ba tšona. (1 Dikx. 4:26) Gape o ile a ba le basadi ba 700 le ba direthe ba 300, ba bantši ba bona ba be ba e-tšwa ditšhabeng tša kgaufsi tša boheitene. Ba “aroša pelo ya xaxwe ya latêla medimo e šele, pelo ya xaxwe ya se kê ya hlwa e êma le Morêna ka botlalô.” Solomone o ile a kopanela bodumeding bja maaka bjo bo šišimišago bja ditšhaba tša boheitene bjoo basadi ba gagwe bašele ba mo rutilego bjona. Ka baka leo, Jehofa o itše go Solomone “ke tlo Xo amoxa mmušô.—1 Dikx. 11:1-6, 11.
14. Go se kwe ga Solomone le ga setšhaba sa Isiraele go ile gwa feleletša ka’ng?
14 Solomone o ile a lebala gore go emela Modimo wa therešo ke tokelo ya bohlokwa. Kgoši e ile ya ineela borapeding bja maaka. Ge nako e dutše e e-ya, setšhaba ka moka se ile sa fetoga bahlanogi gomme sa feleletša ka go senywa ka 607 B.C.E. Le ge Bajuda mafelelong ba ile ba tsošološa borapedi bja therešo, nywaga-kgolo ka morago Jesu o ile a gapeletšega go bolela mantšu a: “Le tla amogwa mmušo wa Modimo wa newa setšhaba seo se tšweletšago dienywa tša wona.” Se ke seo se ilego sa direga. Jesu o boletše gore: “Bonang! Le tlogeletšwe ntlo ya lena.” (Mat. 21:43; 23:37, 38) Ka baka la go se botege ga sona, setšhaba se ile sa lahlegelwa ke tokelo ya sona e kgolo ya go emela Modimo wa therešo. Ka 70 C.E., madira a Roma a ile a senya Jerusalema le tempele ya yona gomme ba bantši ba mašaledi a Bajuda e ile ya ba makgoba.
15. Nea mehlala ya batho bao ba ilego ba palelwa ke go lebiša mahlo a bona dilong tšeo e bego e tloga e le tša bohlokwa.
15 Judase Isikariothe e be e le yo mongwe wa baapostola ba 12 ba Jesu. Judase o ile a kwa dithuto tše di kgahlišago tša Jesu gomme a bona mehlolo yeo a e dirilego ka thušo ya moya o mokgethwa wa Modimo. Lega go le bjalo, Judase ga se a ka a diša pelo ya gagwe. O be a gafetšwe go hlokomela letlole la tšhelete ya Jesu le baapostola ba 12. Eupša “e be e le lehodu e bile a swara letlole la tšhelete, gomme a fela a tšea tšhelete yeo e bego e tsenywa ka go lona.” (Joh. 12:6) O be a e-na le megabaru kudu moo e lego gore mafelelong o ile a loga maano le baperisita ba bagolo ba baikaketši go eka Jesu ka ditsekana tše 30 tša silifera. (Mat. 26:14-16) Yo mongwe yo a ilego a lahlegelwa ke pono ke Dema, yoo e bego e le modirišani wa moapostola Paulo. Dema ga se a ka a diša pelo ya gagwe. Paulo o boletše gore: “Dema o ntlogetše ka baka la go rata tshepedišo ya gona bjale ya dilo.”—2 Tim. 4:10; bala Diema 4:23.
Thuto go yo Mongwe le yo Mongwe wa Rena
16, 17. (a) Kganetšo yeo re lebanago le yona e matla gakaaka’ng? (b) Re ka thušwa ke’ng go kgotlelela selo le ge e le sefe seo Sathane a re lekago ka sona?
16 Bahlanka ka moka ba Modimo ba swanetše go tšeela godimo mehlala yeo e begilwego ka Beibeleng ka gobane re botšwa gore: “Bjale dilo tše di ile tša tšwela pele di ba wela e le mehlala, gomme di ngwaletšwe go ba temošo go rena bao re fihletšwego ke bofelo bja ditshepedišo tša dilo.” (1 Bakor. 10:11) Lehono, re phela mehleng ya bofelo bja tshepedišo ye e kgopo ya dilo.—2 Tim. 3:1, 13.
17 Sathane Diabolo, “modimo wa tshepedišo ye ya dilo,” o a tseba gore o šaletšwe ke “nako e kopana.” (2 Bakor. 4:4; Kut. 12:12) O tla dira sohle seo a ka se kgonago go goketša bahlanka ba Jehofa go senya potego ya bona bjalo ka Bakriste. Sathane o laola lefase le, go akaretša le tsela ya lona ya go phatlalatša ditaba. Lega go le bjalo, batho ba Jehofa ba na le selo se matla kudu—“matla a fetago a tlwaelegilego.” (2 Bakor. 4:7) Re ka ithekga ka matla a ao a tšwago go Modimo gore a re thuše go lebeletšana le selo le ge e le sefe seo Sathane a re lekago ka sona. Ka gona, re kgothaletšwa go rapela ka mehla, re kgodišegile gore Jehofa o tla “nea moya o mokgethwa go bao ba mo kgopelago.”—Luka 11:13.
18. Re swanetše go ba le boemo bofe bja kgopolo mabapi le lefase la gona bjale?
18 Re matlafatšwa gape ke go tseba gore tshepedišo ya Sathane ka moka kgaufsinyane e tla fedišwa eupša Bakriste ba therešo ba tla phološwa. “Lefase le a feta gomme go bjalo le ka kganyogo ya lona, eupša yo a dirago thato ya Modimo o dula a le gona ka mo go sa felego.” (1 Joh. 2:17) Ka go dumelelana le se, e ka se be ga bohlale gore yo mongwe wa bahlanka ba Modimo a nagane gore go na le selo se itšego tshepedišong ya gona bjale ya dilo seo se ka bago bohlokwa kudu go feta tswalano ya gagwe le Jehofa! Lefase le leo le lego ka tlase ga taolo ya Sathane le swana le sekepe seo se nwelelago. Jehofa o neile phuthego ya Bokriste e le bjalo ka seketswana sa tlhakodišo go bahlanka ba gagwe ba botegago. Ge ba dutše ba lebile lefaseng le lefsa, ba ka ba le kgodišego kholofetšong ye: “Ba babe ba tlo lôba; baleta-Morêna e tlo ba beng ba naxa.” (Ps. 37:9) Ka gona, tsepamišetša mahlo a gago moputsong wo o kgahlišago!
Na o a Gopola?
• Paulo o ile a ikwa bjang ka moputso woo a ilego a o newa?
• Bao ba tlago go phela ka mo go sa felego lefaseng ba tla ahlolwa motheong ofe?
• Ke’ng seo e lego gabohlale go se dira gona bjale?
[Dipotšišo tša Thuto]
[Seswantšho go letlakala 12, 13]
Na o ipona o hwetša moputso ge o bala dipego tša Beibele?