Pansiansia Yoy Imano Yo ed Tumang

“Ontundas ak a mamaarap ed kalat a nipaakar ed pakalak na tumang.”​—FIL. 3:14.

1. Anton tumang so inyopresi’d si apostol Pablo?

SI APOSTOL Pablo, a tatawagen met a Saulo na Tarso, et nanlapud prominentin pamilya. Sikatoy imbangat na bantog a managbangat na Ganggan a si Gamaliel nipaakar ed relihyon na atateng to. (Gawa 22:3) Manatalaran ed si Pablo so ipapasen na arum a prominentin propesyon, balet tinaynan toy relihyon to tan nagmaliw a Kristiano. Say pinilalek to la ed saman et say tumang a magnayon a bilay ya inyopresi’d sikato, salanti, say pagmaliw ya imortal ya ari tan saserdote diad mangatatawen a Panarian na Dios. Sayan Panarian so manguley ed paraison dalin.​—Mat. 6:10; Apo. 7:4; 20:6.

2, 3. Panon kaimportante ed si Pablo so tumang a mangatatawen a bilay?

² Impanengneng nen Pablo a talagan importante ed sikato itan a tumang diad impangikuan ton: “No anto so saray bengatla a tubo wari ed siak, imbilang ko ran kaleregan nipaakar ed Kristo. On a peteg, tan ibilang ko ra so ami’ bengatla ya onlereg nipaakar ed ontan la a karlangan na pikakabat ed Kristo Jesus a Katawan ko. A lapud sikato intepel ko so inkalereg na ganagana tan ibilang ko ra ya andi-kakanaan a dutak.” (Fil. 3:7, 8) Sanen naamtaan nen Pablo so katuaan nipaakar ed gagala nen Jehova parad katooan, impasen ton dutak so ipapasen na maslak a totoo ya importante a singa say posisyon, kayamanan, propesyon, tan inkabantog.

³ Manlapu la’d saman, say talagan importante ed si Pablo et say mablin kakabatan a manlalapud si Jehova tan ed si Kristo. Nipaakar ed satan a kakabatan, oniay impikasi nen Jesus: “Saya so mankabaliksan na bilay ya andi-anggaan, say pangaala ra na pikakabat nipaakar ed sika, say alenleneg a tuan Dios, tan ed samay sakey ya imbakim, si Jesu-Kristo.” (Juan 17:3, NW) Napatnagan tayo ed saray salita nen Pablo, ya akarekord ed Filipos 3:14, a masimoon ton pinirawat so pakadampot ed magnayon a bilay, inkuan to: “Ontundas ak a mamaarap ed kalat a nipaakar ed pakalak na tumang na atagey a panatawag na Dios dia ed Kristo Jesus.” On, akasentroy imano to ed tumang a magnayon a bilay diad katawenan bilang kabiangan na Panarian na Dios.

Pambilay ya Andi-angga Diad Dalin

4, 5. Anton tumang so iyoopresi’d minilyon a manggagaway linawa na Dios natan?

⁴ Parad saray karaklan ya amilin manggawa ed linawa na Dios, say tumang a kaukolan dan pansagpotan et say magnayon a bilay diad balon mundo na Dios. (Sal. 37:11, 29) Pinekderan nen Jesus a segurado itan ya ilalo. Inkuan to: “Mapalar iray mauyamo, ta tawiren day dalin.” (Mat. 5:5) Unong ya ipapabitar na Salmo 2:8, si Jesus so manunan manawir ed dalin, tan walaray kaiba ton 144,000 a manuley ed tawen. (Dan. 7:13, 14, 22, 27) Saray arum a karnero a manayam diad dalin so ‘manawir’ ed mangaraldalin a sakop na Panarian ya ‘imparaan ed sikara a nanlapu ed inletneg na mundo.’ (Mat. 25:34, 46) Tan garantisadon nagawa iya ta say angisipan ed saya et Dios ya “agto nayari manburi.” (Tito 1:2) Manmamatalek itayon tooren na Dios iray sipan to, a singa met ed impanmatalek nen Josue sanen inkuan to ed saray Israelita: “Anggapo so sakey a bengatla a linmiwat ed amin a maong a bengabengatla a si Jehova a Dios yo sinalita to nipaakar ed sikayo; sikara so agawa ya amin ed sikayo, anggapo so sakey a bengatla a linmiwat ed sikara.”​—Jos. 23:14.

⁵ Say bilay ed balon mundo na Dios et aliwan singa say makapadismayan bilay natan. Nidumaduman tuloy itan lapud anggapo lay bakal,  krimen, kairapan, ag-inkahustisya, sakit, tan ipapatey. Diad satan et ayadyari lay bunigas na totoo tan manayam ira’d dalin a nagmaliw lan paraiso. Satan a bilay et makapalikliket tan makapnek, a mas ni nen say iilaloan tayo. On, diad satan a panaon et peteg a makapalikliket lay kada agew. Agaylan dakep a tumang!

6, 7. (a) Panon ya impanengneng nen Jesus iray nailaloan tayon nagawa ed balon mundo na Dios? (b) Panon ya anggan saray inaatey et naikdan na balon gapoan?

⁶ Sanen wadiad dalin si Jesus, sikatoy inikdan na Dios na pakapanyari diad panamegley na masanton espiritu pian nipanengneng toy alay abig iran nagawa ed interon dalin diad balon mundo. Alimbawa, ingganggan nen Jesus ya onakar imay toon paralisado ed loob la na 38 taon. Tan ibabaga na Biblia ya akaakar imay too. (Basaen so Juan 5:5-9.) Diad sakey nin inkagawa, anengneng nen Jesus so “sakey a toon bulag nanlapud inkianak to” tan pinaabig To. Diad saginonor, sanen walaray nantepet ed datin bulag nipaakar ed samay amaabig ed sikato, oniay ebat to: “Nanlapu ed inggapo na mundo agnadnadngelan anggan kapigan a wala so sakey ya angilukas na saray mata na sakey a too a nianak a bulag. No sayan too agnanlapu ed Dios, anggapo komon so ayarian to a gawaen.” (Juan 9:1, 6, 7, 32, 33) Agawaan nen Jesus irayan amin lapud sikatoy inikdan na Dios na pakapanyari. Kanian anggan iner a laen nen Jesus, “saray nankaukolan na pananambal [et] tinambal to.”​—Luc. 9:11.

⁷ Aglabat sarag nen Jesus a tambalen iray mansasakit tan walaay deperensya’d laman, noagta sarag to met a paolien iray inaatey. Alimbawa, sanen inatey so 12 años ya ugaw, mapalaloy ermen na saray atateng to. Balet oniay inkuan nen Jesus: “Marikit, kuan ko ed sika, Onalagey ka.” Tan sikatoy inmalagey! Kasin nilitrato yo’d isip yoy reaksion na atateng to tan saray arum a wadman? (Basaen so Marcos 5:38-42.) Diad balon mundo na Dios, walay “baleg ya inkatalagnaw” odino panlikliket sano napaoli la iray binilyon, lapud “wala naani kioli ed bilay na saray matunong tan agmatunong.” (Gawa 24:15; Juan 5:28, 29) Sikaray ikdan na balon gapoan tan manlapu la’d satan et walay ilalo ran manbilay, anggad andi-angga.

8, 9. (a) Legan na Sanlibon Taon ya Uley nen Kristo, antoy nagawa ed kasalanan ya atawir ed si Adan? (b) Antoy pangibasiyan na pangukom ed saray inaatey?

⁸ Saray paolien et ikday pankanawnawan nadampot so bilay ya andi-anggaan. Ag-ira ukomen lapud saray kasalanan da antis iran inatey. (Roma 6:7) Legan na Sanlibon Taon ya Uley nen Kristo, sano ipaakseb la iray gunggona na dondon bagat, saray matulok a sakop na Panarian et kalkalnan magmaliw a perpekto, insan diad kaunoran et sigpot lan naandi so amin ya epekto na kasalanan nen Adan. (Roma 8:21) ‘Akmonen nen Jehova so patey ed ando lan ando et say Katawan a Jehova punasen to naani so saray lua ya unagus ed saray amin a lupa.’ (Isa. 25:8) Ibabaga met na Salita na Dios a walaray “libro [a] nibuskag,” sirin et walay balon impormasyon ya iter ed saray wadtan ed satan a panaon. (Apo. 20:12) Legan a magmamaliw a paraiso so dalin, “saray manaayam ed mundo aralen da so inkatunong.”​—Isa. 26:9.

⁹ Say pangibasiyan na pangukom ed saray paolien et aliwan say kasalanan ya atawir da’d si Adan, noag say mismon pilien dan gawaen. Oniay inkuan na Apocalipsis 20:12: “Naukom so saray inaatey unong ed saray bengatla a wala a nisulat ed saray libro, unong ed saray gawa ra,” salanti, saray gawaen da kayari pamaoli ed sikara. Agaylay abig iyan alimbawa na inkahustisya, panangasi, tan panangaro nen Jehova! Niarum ni, saray apalabas ya ansakit ya eksperiensya ra ed bilay diad sayan daan a mundo et ‘agla nanonotan, odino agla onla ed nonot.’ (Isa. 65:17) Lapud makapaseseg a balon impormasyon tan marakdakep a bilay, agla ra nagonigon na saray apalabas a mauges ya agawgawa. Nalingwanan da la iratan ya eksperiensya ra. (Apo. 21:4) Ontan met so nagawa ed “baleg ya ulop” a makaliktar ed Armagedon.​—Apo. 7:9, 10, 14.

10. (a) Antoy klase na bilay diad balon mundo na Dios? (b) Antoy gawaen mo pian mansiansiay imanom ed tumang?

¹⁰ Diad balon mundo na Dios, agla mansakit odino ompatey iray totoo. “Say manaayam agto naani ikuan, Mabeblay ak.” (Isa. 33:24) Diad ilabas na panaon, kada ibangon da et lalon onkakasil so laman da, tan labalabay dan gapoay balo  lamet ya agew. Panlikliketan day makapnek a kimey tan pakapilimog ed saray kakaaro ra. Satan a bilay et peteg ya alay abig a tumang! Ibukay mo pa sirin so Bibliam diad saray propesiyan walad Isaias 33:24 tan 35:5-7. Isip mon wadman ka. Makatulong itan ed sika pian mansiansiay imanom ed tumang.

Alingwanan Day Tumang

11. Deskribien so marakep a gapo na pananguley nen Solomon.

¹¹ Diad bektan naaral tayo lay nipaakar ed tumang, kaukolan tayon pansagpotan a pansiansiaey imano tayo ed satan lapud nayarin nisuawi itayo. Alimbawa, sanen nagmaliw ya ari na Israel si Solomon, sikatoy mapaabeban kinmerew ed Dios na pakatalos tan pakatebek pian dugay pangukom to ed totoo To. (Basaen so 1 Arari 3:6-12.) Tan antoy resulta? Oniay inkuan na Biblia: “Say Dios inikdan to si Solomon na kakabatan tan pakatalos a mapalalo ed karakel.” On, “say kakabatan nen Solomon tinalonaan to so kakabatan na saray amin ya anak ed bukig, tan amin a kakabatan na Ehipto.”​—1 Ara. 4:29-32.

12. Anton pasakbay so inter nen Jehova ed saramay magmaliw ya ari ed Israel?

¹² Balet, nensaman ni et impasakbay la nen Jehova ed siopaman a magmaliw ya ari ya “agto naani parakelen so saray kabayo ya onkana ed sikato labat” tan “agto met parakelen so bibii ya asawa to, pian say puso to agkomon onsian.” (Deu. 17:14-17) No parakelen na sakey ya ari iray kabayo to, ipapanengneng ton say iilaloan ton manalimbeng ed nasyon et say biskeg na militar imbes a si Jehova, say Mananalimbeng. Tan no parakelen na sakey ya ari so kaasawaan to, mapeligro itan ta nayarin arum ed sikara et nanlapud akapaliber iran paganon nasyon a mandadayew ed palson dirios, tan nayarin tangguyoren day ari ya agla mandayew ed tuan Dios a si Jehova.

13. Akin et alingwanan nen Solomon iray inter ed sikato nen Jehova?

¹³ Ag-inunor nen Solomon iratan a pasakbay.  Imbes, ginawa to iramay espisipikon imbaga nen Jehova ya agnepeg a gawaen na saray arari. Sikatoy anipon na nilibon kabayo tan managkabayo. (1 Ara. 4:26) Tan awalaan met na 700 a kaasawaan tan 300 a bibii, a maslak et nanlalapud kabangibang a pagano iran nasyon. Sinagyat na saraya so “puso to ya ontumbok ed saray dirios da; et say puso to sikato so aliwa a naskey ed Jehova a Dios to.” Akibiang si Solomon ed makapadimlan palson panagdayew na arum a nasyon ya inlagyat ed sikato na paganon kaasawaan to. Kanian say resulta et imbaga nen Jehova a “petepeteg a pignisen [To] so nanarian” ed si Solomon.​—1 Ara. 11:1-6, 11.

14. Antoy resulta na ag-intulok nen Solomon tan say nasyon na Israel?

¹⁴ Alingwanan nen Solomon a say pangirepresenta ed tuan Dios et baleg a pribilehyo. Sigpot lan akibiang so ari ed palson panagdayew. Asabi panaon, nagmaliw lan apostata so interon nasyon, a nanresulta’d impakaderal na satan nen 607 B.C.E. Anggaman nandayew lamet iray Judio ed tuan Dios, kalabas na pigaran siglo et apakiwas si Jesus a mangibaga: “Say panariay Dios naekal naani ed sikayo, tan niiter naani ed sakey a nasyon a mamapaway na saray bungabunga to.” Tan talagan ontan so agawa. Oniay imbalikas nen Jesus: “Nia! Say abung yo nataynan ed sikayo ya andi lugan.” (Mat. 21:43; 23:37, 38) Lapud ag-ira nanmatoor, naandi’d sikara so baleg a pribilehyon mangirepresenta ed tuan Dios. Nen 70 C.E., dineral na saray armada na Roma so Jerusalem tan say templo, tan dakel ed saray akeran Judio so nagmaliw ya aripen.

15. Manalambit na lalakin akalingwan ed saray talagan importante.

¹⁵ Si Judas Iscariote et sakey ed saray 12 apostol nen Jesus. Nadngel nen Judas iray makapadinayew a bangat nen Jesus tan naimatonan to ray milagron ginawa nen Jesus diad tulong na masanton espiritu na Dios. Anggaman ontan, agsinalimbengan nen Judas so puso to. Inmatalek ed sikato so supot na kuartan niganan parad si Jesus tan say 12 apostol. Balet “sikatoy matakew, tan lapud wala ed sikato so supot, inala to so impepelag diman.” (Juan 12:6) Sinmabi’d kapantokan so inka-agum to sanen akinonong ed saray mansimpisimpitan a manunan saserdote a mangitapat ed si Jesus lapu labat ed 30 piraso na pilak. (Mat. 26:14-16) Say sakey nin akalingwan et si Dimas, a kaib-iba nen apostol Pablo. Agsinalimbengan nen Dimas so puso to. Oniay inkuan nen Pablo: “Si Dimas tinaynan to ak, a nilabay to so sayan mundo a peles.”​—2 Tim. 4:10; basaen so Uliran 4:23.

Leksion Parad Balang Sakey ed Sikatayo

16, 17. (a) Kaunongan kabiskeg so onsusumpa ed sikatayo? (b) Antoy makatulong pian nalabanan tayoy antokaman ya ipasagmak nen Satanas ed sikatayo?

¹⁶ Nepeg ya ag-ibabaliwala na amin a lingkor na Dios iray alimbawan walad Biblia, lapud oniay bilin ed sikatayo: “Natan sarayan bengatla agawa ed sikara a singa uliran; tan nisulat ira a bilin ed sikatayo, ya asabian da so kasumpalan na sayan panaon.” (1 Cor. 10:11) Manbibilay itayo la natan ed saray kaunoran ya agew na kaplesan a marelmeng a sistema na bengabengatla.​—2 Tim. 3:1, 13.

¹⁷ Amta nen Satanas a Diablo, “say dios na sayan panaon,” a “daiset la so panaon to.” (2 Cor. 4:4; Apo. 12:12) Iyuupot toy anggaay nayarian to a sagyaten iray lingkor nen Jehova ya agmanmatoor bilang Kristiano. Kontrolado nen Satanas iyan mundo, pati saray uusaren na satan pian mangikayat na saray propaganda. Balet, walad saray totoo nen Jehova so mas mabiskeg nin aminpigapiga, satan et “say pakayari a mas mabiskeg nen say pakayari na too.” (2 Cor. 4:7, NW) Nailaloan tayon ontulong ed sikatayo iyan pakayari a manlalapud Dios pian nalabanan so antokaman ya ipasagmak nen Satanas ed sikatayo. Kanian, papasesegen itayo a lawas manpikasi, a  matalek itayon ‘iter nen Jehova so masanton espiritu ed saray onkerew ed sikato.’​—Luc. 11:13.

18. Antoy nepeg a pangipasen tayo ed sayan kaplesan a mundo?

¹⁸ Say sakey nin mamapaseseg ed sikatayo et say pakaamtan magano lan naandi so interon sistema nen Satanas, ingen ta makaliktar iray tuan Kristiano. “Say mundo mangangga, tan saray penel to. Sabalet so mangunor ed linawa na Dios onsiansia lawas.” (1 Juan 2:17) Lapud saya, talagan aliwan makabat no say sakey a lingkor na Dios et ipasen ton wala ni mas makana ed sayan kaplesan a sistema na bengabengatla nen say relasyon to ed si Jehova! Sayan mundon kokontrolen nen Satanas et singa onlelereg a barko. Inter nen Jehova so kongregasyon bilang “manangisalban baluto” parad saray matoor a lingkor to. Legan dan mamapaarap ed balon mundo, makapanmatalek ira ed sayan sipan: “Saray managgawa na mauges napater ira; balet saray manalagar ed Jehova tawiren da so dalin.” (Sal. 37:9) Kanian, pansiansia yoy imano yo ed sayan marakdakep a tumang!

Natandaan Mo Ta?

• Antoy impangipasen nen Pablo ed tumang ya inyopresi’d sikato?

• Antoy pangibasiyan na pangukom ed saramay manbilay ya andi-angga diad dalin?

• Antoy makabat a gawaen mo natan?

[Tepetepet Parad Panagaral]

[Litrato ed pahina 12, 13]

Sano babasaen mo ray salaysay na Biblia, kasin singam nanenengneng so inkasikan mangaawat na tumang?