Keda Fiha Bo Bista Riba e Premio

“Mi ta hasi tur esfuerso pa alkansá e meta, pa haña e premio.”​—FIL. 3:14.

1. Ki premio apòstel Pablo tabatin su dilanti?

APÒSTEL Pablo, konosí tambe komo Saulo di Tarso, a bini for di un famia prominente. Gamaliel, e famoso maestro di Lei, a instruyé den e religion di su antepasadonan. (Echo. 22:3) Ounke Pablo tabatin loke hende a konsiderá un ekselente karera su dilanti, el a bandoná su religion i bira kristian. El a kuminsá spera riba e premio di bida eterno ku tabatin su dilanti, esta, bida inmortal komo un rei i saserdote den Dios su Reino selestial. E Reino ei lo goberná riba e tera transformá den un paradeis.​—Mat. 6:10; Rev. 7:4; 20:6.

2, 3. E premio di bida selestial tabata di ki balor pa Pablo?

² Pablo a balorá e premio ei mashá. El a mustra esei ora el a bisa: “Tur kos ku tabata ganashi pa mi, e kosnan ei mi a konsiderá komo pièrdè pa kousa di Kristu. Mas ku esei, mi ta konsiderá tur kos komo pièrdè kompará ku e balor superior di konosé Kristu Hesus mi Señor, pa kende mi a sufri pièrdè di tur kos, i ta konsiderá nan komo basura.” (Fil. 3:​7, 8) Despues ku Pablo a haña sa e bèrdat tokante Yehova su propósito pa humanidat, el a konsiderá kosnan manera posishon, rikesa, karera i prestigio komo basura; kosnan ku mayoria di hende ta haña importante.

³ For di e tempu ei, loke tabata mas importante pa Pablo tabata e konosementu balioso di Yehova i Kristu. Relashoná ku e konosementu akí, Hesus a bisa den orashon na Dios: “Esaki ta bida eterno, ku nan por konosé bo, e úniko Dios berdadero, i Hesukristu, kende bo a manda.” (Juan 17:3) Pablo su deseo sinsero pa haña bida eterno ta bisto den su palabranan na Filipensenan 3:14: “Mi ta hasi tur esfuerso pa alkansá e meta, pa haña e premio di e yamada selestial di Dios den Kristu Hesus.” Sí, su bista tabata fihá riba e premio, esta bida eterno den shelu komo parti di e Reino di Dios.

Biba pa Semper Riba Tera

4, 5. Ki premio ta spera miónes di hende ku ta hasi Dios su boluntat awe?

⁴ E gran mayoria di hende ku ta skohe pa hasi Dios su boluntat ta traha duru pa haña bida eterno den Dios su mundu nobo, un premio ku ta bale la pena. (Sal. 37:​11, 29) Hesus a konfirmá ku esaki ta un speransa sigur. El a bisa: “Bendishoná ta esnan humilde, pasobra nan lo heredá e tera.” (Mat. 5:5) Manera Salmo 2:8 ta indiká, Hesus mes ta esun prinsipal pa heredá nos tera, i lo e tin 144.000 ko-gobernante den shelu. (Dan. 7:​13, 14, 22, 27) E otro karnénan ku realmente lo biba riba tera lo “heredá” e region terenal di e Reino, ‘prepará pa nan desde e fundashon di mundu.’ (Mat. 25:​34, 46) I nos tin e garantia ku esaki lo kumpli pasobra ta Dios, “kende no por gaña,” a primintí esaki. (Tito 1:2) Nos por tin e mesun konfiansa ku Josué tabatin den e kumplimentu di Yehova Dios su promesanan ora el a bisa e israelitanan: “Ni un palabra di tur e bon palabranan ku SEÑOR boso Dios a papia tokante di boso no a faya; tur a keda kumplí pa boso, ni un di nan no a faya.”​—Jos. 23:14.

⁵ Den Dios su mundu nobo, bida lo no ta desepshonante ni desalentador manera e ta awendia. Lo e ta ègt diferente, pasobra lo no tin guera, krímen, pobresa, inhustisia, malesa ni morto. E tempu ei, hende lo tin salú perfekto i lo biba riba un tera transformá den un paradeis. Nos lo tin un bida satisfasiente i agradabel ku nos no por ni imaginá aworakí. Sí, kada dia lo ta un deleite ekskisito. Esta un premio maravioso!

6, 7. (a) Kon Hesus a demostrá loke nos por spera den Dios su mundu nobo? (b) Den ki sentido asta e mortonan lo kuminsá un bida nobo?

 ⁶ Tempu ku Hesus tabata riba tera, Dios a dun’é poder mediante Su spiritu santu pa e por a demostrá kiko ta e kosnan maravioso ku lo tuma lugá rònt mundu den e sistema nobo. Por ehèmpel, Hesus a bisa un hòmber ku tabatin 38 aña paralisá pa lanta i kana. I Beibel ta informá ku e hòmber a kana. (Lesa Juan 5:​5-9.) Na un otro okashon, Hesus a topa ku “un hòmber ku tabata siegu for di su nasementu” i a kur’é. Despues, ora hende a puntra e hòmber ku anteriormente tabata siegu tokante Esun ku a kur’é, el a kontestá: “For di prinsipio di tempu nunka hende no a tende ku un hende a habri wowo di un persona ku a nase siegu. Si e hòmber akí no tabata di Dios, e lo no por a hasi nada.” (Juan 9:​1, 6, 7, 32, 33) Hesus por a hasi tur e kosnan akí pasobra Dios a dun’é poder. Unda ku Hesus a bai, ‘el a kura esnan ku mester a wòrdu kurá.’​—Luk. 9:11.

⁷ No ta hende malu i mankaron so Hesus por a kura, e por a lanta hende for di morto tambe. Por ehèmpel, tabatin un mucha muhé di 12 aña ku a muri, i e suseso akí a hasi su mayornan masha tristu. Pero Hesus a bisa: “Mucha, mi ta bisa bo, lanta!” I e mucha a lanta. Bo por imaginá bo kon e mayornan i e otro personanan ku tabata presente a sinti? (Lesa Marko 5:​38-42.) Den Dios su mundu nobo lo tin gran goso i felisidat ora míles di miónes di hende wòrdu resusitá, pasobra “lo tin un resurekshon di tantu e hustunan komo e malbadonan,” òf inhustunan. (Echo. 24:15; Juan 5:​28, 29) E personanan akí lo kuminsá un bida nobo ku e prospekto di biba for di e tempu ei padilanti, asta pa semper.

8, 9. (a) Durante Kristu su Reinado di Mil Aña, kiko lo pasa ku piká ku hende a heredá for di Adam? (b) A base di kiko “e mortonan” lo wòrdu husgá?

⁸ E personanan resusitá lo tin e oportunidat di haña bida eterno. Nan lo no ser husgá a base di e pikánan ku nan a kometé promé ku nan a muri. (Rom. 6:7) Durante Kristu su Reinado di Mil Aña, ora ku Dios apliká e benefisionan di e sakrifisio di reskate, súpditonan di e Reino lo bira perfekto gradualmente te ora nan ser librá kompletamente di tur e efektonan di piká di Adam. (Rom. 8:21) Yehova “lo traga morto pa semper, i Señor Dios [Yehova] lo seka awa di wowo for di tur kara.” (Isa. 25:8) Ademas, e Palabra di Dios ta bisa ku ròlnan òf “bukinan [lo] wòrdu habrí.” Esei ta indiká ku esnan ku ta na bida e tempu ei lo haña informashon nobo. (Rev. 20:12) Ora e tera ser transformá den paradeis, ‘e habitantenan di mundu lo siña hustisia.’​—Isa. 26:9.

⁹ E personanan resusitá lo ser husgá, no a base di nan piká heredá for di Adam, sino a base di loke nan mes skohe pa hasi. Revelashon 20:12 ta bisa: “E mortonan a wòrdu husgá for di loke tabata pará skirbí den e bukinan, segun nan obranan,” esta, loke nan a hasi despues ku nan a wòrdu resusitá. Esei ta un ekselente ehèmpel di Yehova su hustisia, miserikòrdia i amor! Es mas, e kosnan doloroso ku nan a eksperensiá den e mundu bieu akí “lo no wòrdu rekordá mas ni bin na memoria.” (Isa. 65:17) Debí ku nan lo tin informashon nobo i edifikante na nan disposishon i un bida yen di kos bon, e kosnan malu di pasado lo no molestiá nan mas. Nan lo lubidá e eksperensianan di pasado. (Rev. 21:4) Esei lo ta e kaso tambe ku e “multitut grandi” ku lo sobrebibí Armagedón.​—Rev. 7:​9, 10, 14.

10. (a) Kon bida lo ta den Dios su mundu nobo? (b) Kiko por yuda bo keda fiha bo bista riba e premio?

¹⁰ Den Dios su mundu nobo, hende lo por biba sin bira malu òf muri. “Ningun habitante lo no bisa: ‘Mi ta malu.’” (Isa. 33:24) Ku tempu, e habitantenan di e tera lo lanta tur mainta ku salú perfekto i ansioso pa eksperensiá un otro dia maravioso. Nan lo ta ansioso pa hasi trabou satisfasiente i asosiá ku otronan ku ta realmente interesá den nan. E bida ei ta realmente un premio maravioso. At’akí un sugerensia: Pakiko bo no ta tuma tempu pa lesa i meditá riba e profesianan na Isaias kapítulo  33:​24 i 35:5-7? Purba imaginá bo mes den e situashon ei. Esei lo yuda bo keda fiha bo bista riba e premio.

Nan No A Keda Fiha Nan Bista Riba e Premio

11. Deskribí e manera ekselente ku Salomon su reinado a kuminsá.

¹¹ Unabes ku nos a siña di e premio, nos tin ku traha diligentemente pa keda ku nos bista fihá riba dje, pasobra nos por pèrd’é for di bista. Por ehèmpel, ora Salomon a bira rei di antiguo Israel, humildemente el a resa pidi Dios komprondementu i disernimentu pa e por a husga Su pueblo korektamente. (Lesa 1 Reinan 3:​6-12.) Segun Beibel, e resultado di esei tabata ku “Dios a duna Salomon sabiduria i disernimentu grandi.” Sí, “e sabiduria di Salomon tabata surpasá e sabiduria di tur e hòmbernan di oriente i tur e sabiduria di Egipto.”​—1 Rei. 4:​29-32.

12. Ki spièrtamentu Yehova a duna esnan ku lo a bira rei di Israel?

¹² Sinembargo, mas promé, Yehova a spièrta ku kualke persona ku a bira rei ‘no mester a multipliká kabai pa su mes,’ ni e ‘no mester a tuma hopi esposa pa su mes, pa su kurason no desviá.’ (Deu. 17:​14-17) Si e rei a oumentá su kabainan, esei lo a demostrá ku e tabata dependé riba forsa militar pa protehá e nashon en bes di dependé riba Yehova, e Protektor. I si el a tuma hopi esposa pa su mes, esei lo tabata peligroso, pasobra algun di e esposanan akí por tabata prosedente di e nashonnan pagano rònt di nan ku tabata partisipá den adorashon falsu. I nan por a kita e rei di adorá Yehova.

13. Kon Salomon a ignorá Dios su spièrtamentunan?

¹³ Salomon no a hasi kaso di e spièrtamentunan akí. En bes di esei, el a hasi loke Yehova spesífikamente a prohibí e reinan. El a akumulá míles di kabai i koredó di kabai.  (1 Rei. 4:26) Ademas, na tur e tabatin 700 kasá i 300 konkubina; i hopi di e muhénan akí tabata prosedente di e nashonnan pagano den bisindario. E muhénan akí ‘a hasi su kurason desviá pa sigui tras di otro diosnan, i su kurason no tabata kompletamente dediká na Yehova.’ Salomon a partisipá den e adorashon falsu i repugnante di e nashonnan pagano ku su esposanan stranhero tabata praktiká. Esei a pone ku Yehova a bisa ku lo el a ‘sker e reino i kit’é for di Salomon sigur-sigur.’​—1 Rei. 11:​1-6, 11.

14. Kiko tabata e resultado di e desobedensia di (a) Salomon i (b) di e nashon di Israel?

¹⁴ Salomon no a keda fiha su bista riba e privilegio balioso ku e tabatin di por a representá e Dios berdadero. E rei a enbolbé su mes kompletamente den adorashon falsu. Ku tempu, henter e nashon a bira apóstata, i esaki a resultá den su destrukshon na aña 607 promé ku nos era. Ounke ku tempu e hudiunan a restorá adorashon berdadero, siglonan despues Hesus a sintié impulsá pa deklará: “E reino di Dios lo wòrdu kitá for di boso, i duná na un nashon ku sí ta hasié produsí fruta.” Esei ta presis loke a pasa. Hesus a deklará: “Mira, boso kas ta keda desolá pa boso!” (Mat. 21:43; 23:​37, 38) Debí ku e nashon tabata infiel, el a pèrdè e gran privilegio di por a representá e Dios berdadero. Na aña 70 di nos era, ehérsitonan romano a destruí Yerusalèm i e tèmpel, i hopi di e hudiunan ku a keda na bida a bira esklabo.

15. Duna ehèmpel di hòmbernan ku no a keda fiha nan bista riba loke tabata realmente importante.

¹⁵ Hudas Iskariot tabata un di e 12 apòstelnan di Hesus. Hudas a tende e siñansanan maravioso di Hesus i a mira e milagernan ku el a hasi ku yudansa di Dios su spiritu santu. Pero Hudas no a protehá su kurason. El a ser konfiá ku e kaha di plaka ku a kontené plaka di Hesus i e 12 apòstelnan. Pero ‘e tabata un ladron i e tabatin kustumber di kohe di loke tabata wòrdu tirá den e kaha.’ (Juan 12:6) E tabata asina golos ku finalmente el a traha un kòmplòt ku e saserdotenan prinsipal hipókrita p’e traishoná Hesus pa 30 pida plata. (Mat. 26:​14-16) Un otro persona ku no a keda ku su bista fihá tabata Demas, kende tabata un kompañero di apòstel Pablo. Demas no a protehá, òf warda, su kurason. Pablo a bisa: “Demas, kende a stima e mundu aktual akí, a bandoná mi.”​—2 Tim. 4:10; lesa Proverbionan 4:23.

Un Lès pa Nos Tur

16, 17. (a) Kon fuerte e oposishon ku nos ta konfrontá awe ta? (b) Kiko por yuda nos resistí tur loke Satanas bini kuné kontra nos?

¹⁶ Tur sirbidó di Dios mester pensa seriamente riba e ehèmpelnan ku Beibel ta presentá, pasobra e ta bisa nos: “Awor e kosnan akí a sosodé ku nan komo un ehèmpel, i nan a wòrdu skirbí komo un spièrtamentu pa nos, riba kendenan e finnan di e siglonan a bin.” (1 Kor. 10:11) Awe, nos ta bibando durante e último dianan di e sistema aktual di kosnan.​—2 Tim. 3:​1, 13.

¹⁷ Satanas e Diabel, “e dios di e mundu akí,” sa ku “ta ked’é solamente un poko tempu mas.” (2 Kor. 4:4; Rev. 12:12) Lo e hasi tur loke ta na su alkanse pa pone Yehova su sirbidónan aktua kontra nan prinsipionan kristian. Satanas tin dominio riba e mundu akí i tambe riba e mundu su medionan di plama informashon. Sinembargo, e pueblo di Yehova tin algu hopi mas poderoso—e “poder mas ayá di loke ta normal.” (2 Kor. 4:7, NW) Nos por  dependé riba e poder akí ku Dios ta duna pa yuda nos resistí tur loke Satanas bini kuné kontra nos. P’esei, Beibel ta urgi nos pa hasi orashon konstantemente ku e konfiansa ku Yehova “lo duna e spiritu santu na esnan ku pidié.”​—Luk. 11:13.

18. Kon nos mester mira e mundu aktual?

¹⁸ E echo ku nos sa ku pronto henter e sistema di Satanas lo ser destruí pero ku kristiannan berdadero lo sobrebibí tambe ta fortifiká nos. “E mundu ta pasa bai i su deseonan tambe, ma esun ku hasi e boluntat di Dios ta permanesé pa semper.” (1 Juan 2:17) En bista di esaki, lo ta un gran bobedat pa un sirbidó di Dios pensa ku den e sistema di kosnan akí tin algu ku lo por ta mas balioso i duradero ku su relashon ku Yehova. E mundu akí ku ta bou di dominio di Satanas ta meskos ku un barku ku ta senk. Pero Yehova a perkurá pa e kongregashon kristian sirbi komo un “boto di salbabida” pa su fiel sirbidónan. Segun ku nan ta bai den direkshon di e mundu nobo, nan por tin konfiansa den e promesa akí: ‘Hasidónan di maldat lo wòrdu kòrtá kitá afó; ma esnan ku spera riba Yehova lo heredá e tera.’ (Sal. 37:9) P’esei, laga nos keda fiha nos bista riba e premio maravioso akí.

Bo Ta Kòrda?

• Kiko Pablo a pensa di e premio ku e tabatin su dilanti?

• A base di kiko lo husga esnan ku lo biba pa semper riba tera?

• Kiko ta e kos sabí ku bo tin ku hasi awor?

[Preguntanan di Estudio]

[Plachi na página 12, 13]

Ora bo ta lesa relatonan bíbliko, bo ta visualisá bo mes komo un persona ku ta haña e premio?