Imëpis sinchikushun premiota chaskinapaq

“Imaycanöpapis premiuta chasquiyänampä gänanacogcunanömi nogapis Tayta Dios [...] munanganta rurar cawaycä.” (FILI. 3:14, MTCS.)

1. ¿Ima premiota chaskinampaqtaq apóstol Pablu sinchikorqan?

APOSTOL Pabluqa Tarsu markapitam karqan, Saulu nishpapis reqiyaqmi, Pëqa alli kapoqyoq y reqishqa kastapitam karqan. Yachatseqnimpis karqan, unë Moisesta Jehová qonqan Leykunapita alli yachatsikoq religioso Gamaliel shutiyoq nunam (Hech. 22:3). Pabluqa, kapoqyoq y reqishqa nuna këmanmi chänan karqan. Tsënö këkarmi, religionnimpita yarqurir cristiano tikrarerqan. Tsëpita patsëmi, Diosnintsik premio änenqanta gananampaq sinchikorqan, manana ushakäkoq kawëta tarinampaq y kë patsa huk shumaq paraíso tikrashqaman Jesuswan paqta gobernamunampaq reynö y sacerdoteno (Mat. 6:10; Apo. 7:4; 20:6).

2, 3. ¿Imanötaq apóstol Pablu rikarqan ciëlochö Jesuswan paqta gobernamunampaq kaq premiota?

² Apóstol Pabluqa rikätsimantsik chaskinampaq kaq premioqa alläpa valoryoq kanqantam, kënömi nerqan: “Puntata llapan tsecunata allapa presisaqpaq churecarpis, cananqa Jesucristuman creyicurmi mana caqpaqna churarerqö. Tsepis manam tsellatsu; puedeq Jesucristuwan jucnolla canqäqa manam ni imawan iwalantsu. Tsemi peta cuyacurcur, llapan baleqpaq churanqäcunata poqi cuentapaq churarerqö” (Fili. 3:7, 8). Jehová Dios nunakunapaq imata munanqantapis musyarerqa, cuentatam qokurerqan mundochö nunakuna kapoqyoq këta, reqishqa këta, atska qellëyoq këta alläpa presisaqtanö rikäyanqanqa ni imapaq mana väleq poqi cuenta kanqanta.

³ Tsëpita patsëmi Jehoväpita y Tsurin Jesucristupita yachakïta más tïrarqan, Jesusmi nishqa karqan: “Qamllam Dios canqui. Noqa Jesucristutam que patsaman cachamarqequi. Y ishcantsicta reqimarnintsicmi, nunacuna wiñe caweyoqna cayanqa” (Juan 17:3). Pabluqa kë ‘wiñe caweyoq’ këtam munarqan, tsënö kanqantam rikätsimantsik Filipenses 3:14, MTCS nenqanchö: “Imaycanöpapis premiuta chasquiyänampä gänanacogcunanömi nogapis Tayta Diospa ñöpanman chänäpä pay munanganta rurar cawaycä. Paypa ñöpanman chänantsicpäga Señor Jesucristum nogantsic raycur [...] wanushga”. Awmi, tsë chaskinampaq kaq, wiñe kawakïman y Jesuswan paqta gobernayämunampaq kaqmanmi yarpararqan.

Patsachö mana wanushpa kawakï

4, 5. ¿Ima premiotataq chaskiyanqa kë patsachö quedaqpaq kaq nunakuna?

⁴ Pero, wakinkaq cristianokunapa premionkunaqa kë patsachö mana wanushpa kawakïmi, awmi, tsë rasumpa premiorëkur imëka ruranqantsikqa alläpa allim (Sal. 37:11, 29). Kë premioqa rasumpam kanqa, Jesusmi nerqan: “Cushicuyanqam qollmi shonquyoqcuna, porqui pecunapam que patsaqa” (Mat. 5:5). Awmi, kikin Jesusmi kë Patsataqa herenciatanö chaskinqa tsëman gobernamunampaq Salmo 2:8 nenqannö. Hina Pëwanmi pachak chusku chunka chusku waranqa (144.000) nunakunapis gobernayämonqa kë patsaman (Dan. 7:13, 14, 22, 27). Pero wakinkaq üshakunaqa kë patsata chaskiyan tsëchö kawayänampaqmi, tsëmi Jesuspis nerqan: “Shayämi, Teytäpa benditunkuna, eredayey qamkunapaq alistashqa reynuta mundu qallananpita” (Mat. 25:34, 46, QKW). Diosqa ‘rasonpa caqllata parlacoqmi’, tsënö karmi llapan änikonqanta cumplimonqa (Titu 1:2). Tsëmi Josueno noqantsikpis Jehoväman markäkunantsik o yärakunantsik, pëmi israelïtakunata kënö nerqan: “Jehová Dios qamkunapaq allikuna parlanqanqa, llapanmi cumplikashqa y manam ni hukllëllapis mana cumplikashpaqa quedashqatsu, y manam ni ima parlanqampis pishintsu” (Jos. 23:14).

 ⁵ Kanan tiempo shumaq kawakïqa manam fäciltsu, alläpa hipakïkunam kan, pero mushoq Patsachö kawakïqa alläpa hukläyam kanqa. Manam kanqanatsu guërrakuna, suwakïkuna, ni mana alli rurëkunapis. Y ushakärenqam waktsakëpis, qeshyakunapis, y wanïpis. Nunakunapis pasëpa sänom kayanqa y Patsapis huk shumaq paraïsomanmi tikranqa. Imëpis mana yarpäkonqantsik kushikïtam tarishun. Tsëchö cada hunaq kawakïqa alläpa shumaqmi kanqa. ¡Këmi Dios qaramanqantsik rasumpa kaq premioqa!

6, 7. a) ¿Mushoq patsachö imakuna pasanampaqtaq Jesus rikätsikorqan? b) ¿Kawarimoqkunata imataq shuyaran?

⁶ Jesustaqa Teytanmi poderta qorqan kë patsachö këkar milagrokunata rurar, shamoq tiempochö imëka allikuna pasakunampaq kaqta rikätsikunampaq. Tsëtaqa Bibliam willamantsik, kima chunka puwaq (38) watana qeshyakoq nunatam kachakätserqan nishpa (lei Juan 5:5-9). Huk kutichönam yurikïnimpita wisku kakushqa nunata kachakätserqan. Tsënam nunakuna tapupäyaptin kë nuna Jesuspita kënö willakorqan: “Manam ni imepis wiyashqatsu cantsic noqallätano wiscu yuricushqa nunata pipis cachacätsishqanta. Diospita shamushqa mana carqa, manam quecunata rureta puedinmantsu” (Juan 9:1, 6, 7, 32, 33). Kë milagrokunataqa Jesus rurëta puëderqan Teytampa poderninwanmi. Mëpa ëwarpis qeshyaqkunataqa kachakätseqmi (Luc. 9:11).

⁷ Jesusqa, manam qeshyaqkunata ni wiskukunallatatsu kachakätsita puëdeq, sinöqa hasta wanushqakunatapis kawaritseqmi. Huk kutim chunka ishkë (12) watayoq warmi wambra wanurerqan, y teytankunaqa alläpa llakishqam këkäyarqan. Tsëman Jesus chärirnam wanushqa wambrata kënö nerqan: “Sharcamï” y “wamranam jinallacho sharcamur purir qallecorqan”. Yarpakurkï, ¡imaraq kushikïkuyarqan teytankuna y wakin nunakunapis wambra kawarkur purir qallëkuptin! (Lei Marcos 5:38-42.) Mushoq Patsachö nunakunaqa kushikïpita espantashqam quedariyarqan wanushqa nunakuna kawarimoqta rikarnin, awmi qellqarëkanmi “alli ruraqtapis y mana alli ruraqtapis Teyta Dios cawaritsinanpaq caqta” (Hech. 24:15; Juan 5:28, 29). Kë kawarimoqkunaqa yapëmi shumaq kawakïta qallayanqa y mana wanushpa kawakïtapis chaskiyanqam.

8, 9. a) Jesus waranqa wata gobernamuptin, ¿imaraq pasanqa hutsata y tukïläya hipakïta? b) ¿Ima librowanraq kawarimoqkunaqa jusgashqa kayanqa?

⁸ Kë kawarimoqkunaqa jusgashqa kayanqa manam puntata kawakïninkunacho hutsata rurayanqampitatsu, punta hutsankunapita jusgashqa karnenqa, yapëchi condenashqa kayanman wanuyänampaq (Rom. 6:7). Tsë waranqa wata Cristu gobernamonqanchöqa, wanonqampa valorninwanmi llapan nunata hampenqa. Tsëchömi ichikllapa ichikllapa hutsasapa kënintsik ushakanqa, limpu hutsannaq kanqantsikyaq (Rom. 8:21). Llapan Autoridadyoq Jehová Diosmi “wanïta limpu ushakäratsenqa, y [...] weqinkunata nawinkunapita pitsaraponqa” (Isa. 25:8). Hinamampis Diospa Palabranqa willamantsik mushoq librokuna kanantam, tsëqa rikätsimantsik tsë tiempochö kawaqkunapaqqa mushoq yachatsikïkuna kanantam (Apo. 20:12). Kë patsa huk shumaq patsaman tikranqanmanmi “kë Patsachö täraqkuna alli rurëllatana yachakuyanqa” (Isa. 26:9).

⁹ Tsë tiempochö nunakunaqa manam hutsasapa kayanqampitatsu jusgashqa kayanqa, sinöqa tsë mushoq patsachö imanöpis kawayanqampitam. Apocalipsis 20:12 nishqanchö, “jina ricarerqämi librucuna quichacäreqtapis. Tse librucunacho rurenincuna shimpenqanmannomi nunacuna jusgashqa cayarqan” nerqa, rikätsimantsik kawarkamur rurayanqampitaraq jusgashqa kayänantam. ¡Tsëmi rasumpa alli kaqllata ruraq, llakipäkoq y kuyakoq Diosqa! Hinamampis kanan mana alli tiempochö tukï llakikïkunapa y nanatsikïkunapa pasayanqankunaqa “qonqashqanam kanqa, y manam pipis shonqunkunachö yarpäyanqanatsu” (Isa. 65:17). Shumaq y mushoq yachatsikïkunatam chaskiyanqa y alläpa kushikïpaq kawakïmi kanqa, y manam unë kawakïninkunata yarpar llakikuyanqanatsu (Apo. 21:4). Tsënöllam kanqa Armagedón ushakë juiciota kawëkar pasaqkunapaqpis (Apo. 7:9, 10, 14).

10. a) ¿Tsë mushoq patsachö imanöraq kawakï kanqa? b) ¿Tsë premiota mana oqranëkipaq imataq yanapashunkiman?

¹⁰ Diosnintsik mushoq Patsa tikratsenqanchöqa  “manam ni pï: ‘Qeshyämi nenqanatsu’” (Isa. 33:24). Ni manam pipis wanonqanatsu. Tsëpita tiempowanqa llapampis sano mana qeshyapäkushpanam kawayanqa cada qoya o cada warëmi kushishqa sharikuyanqa tsë hunaq hutsannaq kawëman yarparar. Llapan nunapis alli amïgollam kayanqa, hina llapan trabajayanqampis waran waranmi alläpa kushikïpaq kanqa. ¡Imëka shumaqmi! ¿Imanirtaq leirinkitsu Isaías 33:24 y 35:5-7 nishqankunata? Tsëchö këkanqëkimanna yarpë. Tsëmi yanapashunki kë shumaq premiota mana oqranëkipaq.

Premionkunaman yarparëtam qonqariyarqan

11. ¿Salomón gobernar qallanqan imanötaq karqan?

¹¹ Mana wanushpa kawakï premiota chaskinapaq kaqta mushyëkarnaqa sinchikunantsikmi mana qonqëkunapaq. Pero unë tiempochö wakinqa qonqëkuyarqanmi y tsënö pasamänataqa manam permitinantsiktsu. Salomonta pasanqanta rikärishun. Rey këman chärirmi, humildadwan Diosta mañakorqan alli yachaq kënin qoykunampaq, tsënöpa Israel markata alli juzganampaq (lei 1 Reyes 3:6-12). Bibliam nimantsik: “Diosmi Salomonta qorqan alläpa yachënin y musyaq kënin”. Tsënöpam “Salomompaqa Inti [Rupay] ullunan lado markakunachö täraq nunakunapitapis más yachënin karqan, y Egipto markachö yachaqkunapitapis más yachënin karqan” (1 Rey. 4:29-32).

12. ¿Imata mana rurayänampaqtaq Jehová mandarqan Israelchö rey këman chaqkunata?

¹² Tsënö kaptimpis Jehoväqa willashqanam karqan, rey këman chaqkunaqa caballokunata mana miratsinampaq, ni atska warmiyoq mana kayänampaq, shonqunta mana alli kaqman tumakäratsinanta musyar (Deu. 17:14-17). Atska cabällokunayoq këqa tröpanllamanna markäkonqantam o yärakonqantam rikätsikunman karqan y manam Jehoväpa tsapäkïninman markäkïtaqa rikätsikunmantsu karqan. Y atska warmiyoq këqa mana allim karqan, itsa wakin warmikunaqa, mana alli dioskunata adoraq markakunapita karnin reypa shonqunta tumakäratsir Jehoväpita rakiriyanman karqan.

13. ¿Ima ruranqanwantaq Salomón rikätsikorqan mana wiyakoq kanqanta?

 ¹³ Salomonqa manam wiyakorqantsu Jehová nenqanta, ama rurayankitsu nenqan kaqtaraqmi rurarqan. Atska cabälloyoq y tröpayoq këmanmi charqan (1 Rey. 4:26). Hina qanchis chunka pachak (700) warmikunawanmi casado karqan, y kima chunka pachak (300) warmikunawanmi mana casakushpa kakorqan. Tsë warmikunam shonqunta tumakäratsipur Jehová Diosta haqiratsiyarqan, tsënöpam qallëkorqan warminkunapa mana alli kaq diosninkunata adorarnin. Tsënö kanqanrëkurmi Jehová nerqan Salomonta: “Mana cäsokonqëkirëkurmi gobernanqëki nacionta horqarishaq makikipita” (1 Rey. 11:1-6, 11).

14. ¿Imataq pasarqan Salomonta y israelïtakunata mana wiyakuyanqampita?

¹⁴ Salomonqa rey kanampaq Teyta Dios churashqantam valorarqannatsu, qonqëkorqanmi y rakcha idolo adorëmanmi ishkerqan. Tiempowannam pëpa culpanrëkur Israel marka Diospa contran tikrarerqan, tsënöpam 607 watachö (m.J.sh) kë marka ushakashqa kanampaq Jehová permiterqan. Y judïokuna yapë Dios munanqannö adorëman chäyashqa kayaptimpis, Jesus kënömi nerqan atska tiempo pasariptin: “Cananpita witsepam Templiquicunapis tsunyecar quedarenqa”. Hina tsëpitapis kënöran nirerqan: “Mana cäsucuyanqequirecurmi, Diospa mandaquininman yecuyanquitsu; peru caru marca nunacunam siqa, cäsucuyänqanrecur tse mandadunman yecuyanqa” (Mat. 21:43; 23:37, 38). Y tsënömi karqan: Jehová Diosta haqiyanqampitam, markan këta limpu oqrariyarqan. Y 70 (J.sh.) watachönam Roma tröpakuna, chipyëpa ushakätsiyarqan Jerusalenta y templontapis, y kawëkar quedaq judïokunatanam apakuyarqan esclävonkunapaq.

15. ¿Pikunataq oqrariyarqan alläpa valoryoq rurëninkunata?

¹⁵ Judas Iscariötetapis tsënöllam pasarqan. Peqa Jesuspa shumaq yachatsikïninkunatam wiyarqan, y rikarqanmi Jehová Diospa santu espïritun yanapaptin milagrokuna ruranqankunatapis. Tsënö këkarnimpis, manam shonqunta cuïdarqantsu. Jesus y qateqninkuna qellë churayänan cäjatam katserqan, y “suwa tesoreru carmi, imepis qoyanqan qelleta pacaq” y apakoq (Juan 12:6). Tsënö qellëpaq locoyäkoq karninmi judío religiösokunapita chaskipakurerqan “quima chunca (30) yulaq qelleta” Jesusta wanutsiyanampaq (Mat. 26:14-16). Hina Demas shutiyoq Pablupa yanaqimpis manam shonqunta cuïdarqantsu, ni manam valorarqantsu premio chaskinanta. Pëpaqmi Pablu kënö nerqan: “Demasmi que patsacho caqcunata cuyacurcur, dejaramar eucushqa” (2 Tim. 4:10; lei Proverbios 4:23).

Noqantsik yachakunapaq

16, 17. a) ¿Imawantaq mana allita pensatsimënintsikta tïran Diablu? b) ¿Imataq yanapamäshun Diablu tukïläya toqllata churamuptimpis vencinapaq?

¹⁶ Kë ushanan tiempochö kawëkaq cristianokunaqa alleqmi yarpakachänantsik kë unë tiempochö nunakunata pasanqanman, Bibliam llapanta willamantsik, kënömi nin: “Tsecuna pasarqan une tiempu mana alli portacoq awiluntsiccunapa mana alli portaquininta musyarir, mana tseno portacunantsicpaqmi, Y tsecunam escribirëcan Diosnintsicpa palabrancho canan tiempu nunacuna Diosnintsicta cäsucurna cawacunantsicpaq” (1 Cor. 10:11; 2 Tim. 3:1, 13).

¹⁷ ‘Que patsacho mandacoq diabluqa’ musyanmi “pocu tiempullana engañacur carinanta” (2 Cor. 4:4; Apo. 12:12). Tsëmi tukïta ruranqa cristianokunata mana alliman ishkitsinampaq y Diosta mana wiyakuyänampaq. Pëqa kë mundota makinchömi katsin, tsëwanmi nunakunata mana allita pensatsin. Pero rasumpëpa cristianokunaqa Teyta Diospa poderninwanmi venciyanqa tsë llapan mana alli pensëkunata (2 Cor. 4:7). Kë Diosnintsikpa poderninwanmi seguro këkantsik Satanás  imëka toqllata churamuptimpis vencinantsikpaq. Hinamampis musyantsikmi Jehová Diosta santu espïritunta mañakushqaqa qomanantsikta, tsëmi mana haqishpa imëpis mañakïkänantsik (Luc. 11:13).

18. ¿Imanötaq kë mana alli mundopa munëninkunata rikashwan?

¹⁸ Hina Satanaspa mana alli mundompita ichik tiempollachöna libre tikrarinantsikta musyëpis yanapamantsikmi sinchikunapaq. Awmi, “que mundoqa llapan mana alli munenincunawan ushacäreqllam; peru Diospa muneninta ruraq nunaqa wiñepam cawanqa” (1 Juan 2:17). Satanaspa makinchö këkaq mana alli mundopa ushakënin këllachöna këkanqanta musyëkarqa, upa këchi kanman Jehoväwan alli kënintsikta qonqarir, kë mundoqa imëka allikunatam qomanqa nishpa pensëqa. Kë mana alli mundoqa lamarchö barco hundikëkaqnömi, tsëmi Jehoväqa salvakunapaq huk böteta churamushqa: Congregacionmi tsë bote cuenta. Ichikllachönam Jehová kënö änikonqan cumplikärenqa: “Mana allita ruraqkunaqa ushakäyanqam, pero Jehoväman markäkoqkunaqa patsachömi täräyanqa” (Sal. 37:9). Awmi, tsë mushoq Patsaqa këllachönam, tsëmi imëpis ama qonqashuntsu Jehová Dios premiontsik qomänantsikpaq kaqta.

¿Yarpankiku?

• Diosnintsik premio änenqanta, ¿imanötaq Pablu rikarqan?

• ¿Ima librochö qellqarëkaqkunawantaq jusgashqa kayanqan Paraïsochö nunakuna?

• ¿Kanan tiempochö imanö kawakïtaq más alli kanman?

[Yachakunapaq kaqpa tapukïninkuna]

[15 kaq päginachö dibüju]

Bibliachö shumaq Paraïsopaq parlanqanta leirnin, ¿tsëchö kawëkaqnönaku karinki?