Akatinamou i Toou Manako ki Runga i te Tutaki

“Te aruaru atu nei au na te akairo, kia rauka iaku te tutaki.”​—PHILI. 3:14.

1. Eaa ra te tutaki tei orongaia atu ki te apotetoro ko Paulo?

KO TE apotetoro ko Paulo, tei kite katoaia e ko Saula o Tareso, no roto mai aia i tetai kopu tangata puapinga. Na Gamaliela te puapii rongonui i roto i te Ture, i apii iaia i roto i te akonoanga a tona ui tupuna. (Anga. 22:3) E ngai angaanga ngateitei tikai tei akatakaia na Paulo no tona oraanga; e oti akera kua akaruke aia i tana akonoanga e kua riro mai ei Kerititiano. No reira kua tatari atu rai aia i te tutaki o te oraanga e tuatau ua atu tei orongaia mai kiaia​—koia oki kia riro ei ariki e ei taunga mate kore i roto i te Patireia o te Atua i te rangi. Ka tutara taua Patireia ra ki rungao i te enua parataito.​—Mata. 6:10; Apo. 7:4; 20:6.

2, 3. Mei teaa tikai te puapinga maata o te tutaki no te oraanga i te rangi kia Paulo?

² I te akaari anga e mei teaa tikai te puapinga maata o taua tutaki ra kia Paulo, kua akakite aia e: “Ko taua au mea apinga naku ra, ko taku ïa i akariro akenei ei mea puapinga kore i te Mesia nei. Koia tikai, e mea puapinga kore te au mea ravarai nei iaku i te meitaki maata ra i to kite i taku Atu ra ia Iesu Mesia: i akaruke ei au i te au mea katoa ra, e kua riro ïa ei teita iaku.” (Phili. 3:7, 8) Ko te au mea anake ta te tangata e manako ra e e puapinga​—te taoonga, te apinga nui, te ngai angaanga, te turanga ngateitei—​e teita ua rai te reira kia Paulo i muri ake i tona kite anga i te tuatua mou no runga i to Iehova akakoroanga no te tangata nei.

³ Mei reira mai e aere ua atu, ko te mea puapinga rava atu kia Paulo koia oki ko te kite umere tikai no runga ia Iehova e ia Karaiti, ta Iesu i tuatua i roto i tana pure ki te Atua e: “Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.” (Ioa. 17:3) Te kite papuia ra to Paulo inangaro maata kia rauka te oraanga e tuatau ua atu i roto i tana au tuatua tei rekotiia i roto ia Philipi 3:14 e: “Te aruaru atu nei au na te akairo, kia rauka iaku te tutaki i ta te Atua ra kapiki anga no runga maira i te Mesia nei ia Iesu.” Ae, kua akatinamou aia i tona manako ki runga i te tutaki o te oraanga e tuatau ua atu i te rangi i roto i te kavamani o te Patireia o te Atua.

Ora Anga e Tuatau ua Atu i te Enua Nei

4, 5. Eaa te tutaki tei orongaia atu ki te mirioni ua atu e rave ra i te anoano o te Atua i teia tuatau?

⁴ No te maataanga o te aronga tei iki kia rave i te anoano o te Atua, ko te tutaki puapinga roa atu koia oki ko te oraanga e tuatau ua atu i roto i to te Atua ao ou. (Sala. 37:11, 29) Kua akataka tika mai a Iesu e e manakonakoanga papu tikai teia. Kua akakite aia e: “E ao to tei maru: e riro ia ratou te enua.” (Mata. 5:5) Ko Iesu uaorai te tangata maata te ka riro iaia to tatou enua, mei ta Salamo 2:8 e akakite maira, e e 144,000 aronga te ka tutara kapiti e ia i te rangi. (Dani. 7:13, 14, 22, 27) Te au mamoe ke atu te ka noo i te enua nei ka “riro” ia ratou te enua i raro ake i te Patireia i ‘akonoia no ratou mei te maani anga mairai i te enua nei.’ (Mata. 25:34, 46) E kua rauka ia tatou te akapapuanga e ka tupu teia no te mea na te Atua, ko tei “kore e tika kia pikikaa,” i taputou mai i te reira. (Tito 1:2) Ka rauka ia tatou kia irinaki i roto i te akatupuanga o ta te Atua au taputou mei ia Iosua rai, i tona akakite anga ki te ngati Iseraela e: “Kare rava tetai o te au mea meitaki ta to kotou Atua ta Iehova i tuatua mai ia kotou i poka; kua ope rava i te tupu ia kotou, kare rava tetai o te reira i toe.”​—Iosu. 23:14.

⁵ Kare te oraanga i roto i te ao ou o te Atua e aite ki te oraanga mareka kore o teia tuatau. Ka tuke takiri te reira: kare e tamaki, kare e kino, kare e ngere, kare e angaanga tika kore, kare e  maki, e kare e mate. Ka rauka i te tangata te oraanga meitaki rava e ka noo ratou i runga i te enua tei akariroia ei parataito. Ka riro taua tu oraanga ra ei mea mareka rava e te merengo ua, tei kore roa i manakoia ana. Ae, ka riro te au ra ravarai ei rekarekaanga maata. E tutakianga umeremere tikai!

6, 7. (a) I akapeea a Iesu i te akaari mai anga e eaa ta tatou ka tapapa atu i roto i te ao ou o te Atua? (e) Ka akapeea ra e rauka ai i tei mate tetai oraanga ou?

⁶ Ia Iesu i te enua nei, kua akamana te Atua iaia na roto i tona vaerua tapu kia akaari mai i te au mea umere te ka tupu i te enua katoa nei i roto i te ao ou. Ei akaraanga, kua akakite a Iesu ki tetai tangata e 38 ona mataiti i te maki akangoru anga, kia tu ki runga kia aere. Kua akakite mai te Pipiria e kua akapera rai taua tangata ra. (E tatau ia Ioane 5:5-9.) I roto i tetai turanga ke mai, kua aravei a Iesu “i tetai tangata matapo mei te anau anga mai” e kua akaora atura iaia. I muri mai, kua uiia ki te tangata tei matapo ana i mua ana no runga i te Tangata tei akaora iaia, e kua pau atu aia e: “Kare akerai i kitea te matapo anau nei i te ora anga i te tangata, mei te akamata anga mai o te enua nei. Naringa teianei tangata kare to te Atua ra, kare rava tana ravenga e tika.” (Ioa. 9:1, 6, 7, 32, 33) Kua rauka ia Iesu kia rave i teia au mea pouroa no te mea kua akamanaia aia e te Atua. I te au ngai ravarai tana i aere, kua “akaora akera [a Iesu] i te aronga maki.”​—Luka 9:11.

⁷ Kare ko te maki e te pirikoki anake ua tei rauka ia Iesu i te akaora, kua rauka katoa ra iaia i te akatu akaou mai i tei mate. Ei akaraanga, kua mate tetai tamaine e 12 ona mataiti, tei riro ei taitaia maata ki tona nga metua. Inara kua akakite atu a Iesu e: “E maine, ka tu ki runga.” E kua tu mai aia ki runga! Ka rauka ainei ia koe kia akamanako e mei teaa ra te manako o nga metua e etai ke atu i reira? (E tatau ia Mareko 5:38-42.) I roto i te ao ou o te Atua, ka tupu te “va maata” me akatu akaouia mai te pirioni ua atu, no te mea “e tuakaouanga to tei mate, te aronga tuatua-tika e te aronga tuatua-tika kore.” (Anga. 24:15; Ioa. 5:28, 29) Ka orongaia tetai tuatau no teia aronga kia akamata i tetai oraanga ou ma te manakonakoanga o te noo anga mei tera taime mai, e mutu kore ua atu.

8, 9. (a) I te tuatau o ta Karaiti Tutaraanga Tauatini Mataiti, eaa te ka tupu ki te ara tei iri mai mei ia Adamu? (e) Ka akavaia tei mate kia tau ki runga i teaa?

⁸ Ka orongaia tetai tuatau no te aronga tei akatu akaouia mai kia rauka te ora. Te aronga ka oki mai i roto i te tuakaouanga, kare ratou e akavaia no te au ara ta ratou i rave i mua ake ka mate ei ratou. (Roma 6:7) I te tuatau o ta Karaiti Tutaraanga Tauatini Mataiti, i te puapinga o te atinga oko e taangaangaia ra, ka tere marie ua atu te turanga meitaki o te au tangata o te Patireia tei kauraro, ki te turanga apa kore. I te openga iora, ka rangatira takiri mai ratou mei te au tu kino katoatoa o ta Adamu ara. (Roma 8:21) Na Iehova “e akakore rava i te mate e tuatau ua atu; e na te Atu ra na Iehova e orei i te roi-mata i te au mata ravarai.” (Isa. 25:8) Te na ko katoa ra te Tuatua a te Atua e ka “eeuia iora nga buka,” i te akaari mai anga e ka orongaia tetai karere ou ki taua aronga e ora ra i taua taime ra. (Apo. 20:12) I te tuatau e akariroia ra te enua ei parataito, “te apii ra to te ao nei i te tuatua-tika i reira.”​—Isa. 26:9.

⁹ Ka akavaia te aronga tei akatu akaouia mai, eiaa kia tau ki te ara tei iri mai mei ia Adamu, mari ra kia tau ki ta ratou uaorai ka iki i te rave. Te na ko ra a Apokalupo 20:12 e: “E akavaia iora taua aronga i mate ra i te au tuatua i tataia ki roto i taua nga buka ra, i ta ratou au angaanga,” koia oki, ta ratou au angaanga ka rave i muri ake i to ratou tuakaouanga. E akaraanga umeremere tikai no to Iehova tu tika, tu tangi, e te aroa! Tetai katoa, ko te au mea tumatetenga tei tupu ana i roto i to ratou oraanga i teia ao taito ‘kare oki te reira e maaraia, kare e akamanako akaouia atu.’ (Isa. 65:17) Ma te karere ou tei rauka mai ei akamaroiroi anga e te oraanga tei ki ua i te au mea memeitaki, kare rava ratou e taitaia akaou i te au mea kino o te tuatau i topa. Ka akangaropoinaia taua au tumatetenga o te tuatau i topa. (Apo. 21:4) Mei te reira katoa te “aronga maata rava,” tei ora mai mei roto ia Aramakito.​—Apo. 7:9, 10, 14.

10. (a) Mei teaa ra te tu o te oraanga i roto i te ao ou o te Atua? (e) Eaa taau ka tau kia rave ei tauturu ia koe kia akatinamou i toou manako ki runga i te tutaki?

¹⁰ I roto i to te Atua ao ou, ka rauka i te tangata kia noo ma te kore e maki e te mate. “Kare oki to  reira e karanga e, Kua maki au.” (Isa. 33:24) I te openga, i te au popongi ravarai ka ara mai te au tangata o te enua ou ki te oraanga meitaki rava, ma te akara rekareka atu anga ki tetai ra manea akaou. Ka mataora ratou i te tapapa atu anga i tetai angaanga mareka tikai e te kapiti atu anga ki te aronga e manako ua maira ia ratou. E tutaki manea tikai taua tu oraanga ra! Kore ei koe e tatau i te au totou a Isaia 33:24 e te 35:5-7 i roto i te Pipiria? E akamanako ua ana e ko koe tetai i reira. Ka tauturu tera ia koe i te akatinamou i toou manako ki runga i te tutaki.

Etai tei Ngaropoina te Tutaki

11. Akataka mai i te akamataanga meitaki o ta Solomona tutaraanga.

¹¹ Me kite ana tatou e e tutaki tetai, ka angaanga pakari tatou kia akatinamou i to tatou manako ki runga i te reira, ko te ngaropoina aea ia tatou te reira. Ei akaraanga, te riro anga a Solomona ei ariki no Iseraela i taito, kua pure akaaka aia ki te Atua no te marama e te kite kia rauka iaia i te akava i Tona iti tangata ma te tika. (E tatau ia 1 Ariki 3:6-12.) Ko tei tupu, i karanga ai te Pipiria, “Kua oronga mai te Atua i te karape, e te kite, kia Solomona, e mea maata roa.” E tika rava e, kua “maata rava atura to Solomona karape i to te aronga katoa i te itinga o te rā ra, e to Aiphiti katoa ra.”​—1 Ari. 4:29-32.

12. Eaa te akamatakiteanga ta Iehova i oronga ki te aronga te ka riro mai e au ariki no Iseraela?

¹² Kareka ra, kua akamatakite takereia mai e Iehova e ko tetai ua atu te ka riro mai ei ariki ‘auraka aia e akamaata i te oroenua nana’ e ‘auraka aia e akamaata i te vaine nana, kia kore e tatipake tona ngakau.’ (Deu. 17:14-17) Me akamaata aia i tona au oroenua te akaari maira te reira e te irinaki ra te ariki ki runga i te maroiroi o tona nuku vaeau kia paruru i te iti tangata e kare aia e irinaki ana ki runga ia Iehova, ei Paruru. E ka kino te akamaata i te vaine no te mea penei no roto mai tetai pae ia ratou i te iti tangata peikani e piri ra ki roto i te akamorianga  pikikaa takapini ia ratou, e penei ka akaariu ke taua au vaine ra i te ariki mei te akamorianga mou a Iehova.

13. I akapeea ra i ngaropoina ai ia Solomona tei orongaia kiaia?

¹³ Kare a Solomona i akarongo ana ki taua au akamatakiteanga ra. Mari ra, kua rave aia i ta Iehova tikai i akakite e auraka te au ariki kia rave. E tauatini ua atu te au oroenua e to ratou au akaoro tana i akaputuputu mai. (1 Ari. 4:26) E 700 ana vaine i akaipoipo e e 300 au vaine tavini, e manganui no roto mai i te iti tangata peikani i te pae mai. ‘Kua akaanga keia iora tona ngakau ki te au atua ke: kare akenei tona ngakau i tau kia Iehova.’ Kua piri atu a Solomona ki roto i te akamorianga pikikaa viivii a te au iti tangata peikani ta tana au vaine ke ke i apii kiaia. Tei tupu, kua akakite a Iehova e ‘ka aae aia i teianei basileia’ mei ia Solomona.​—1 Ari. 11:1-6, 11.

14. Eaa tei tupu mai no te akarongo kore o Solomona e te iti tangata o Iseraela?

¹⁴ Kua ngaropoina ia Solomona i te akatinamou ki runga i te tikaanga ngateitei tei rauka iaia ei mata no te Atua mou. Kua o takiri te ariki ki roto i te akamorianga pikikaa. I te tuatau i aereia, kua riro te iti tangata pouroa ei aronga apoteiti, tei taopenga mai ki to ratou akapouanga i te mataiti 607 M.T.N. Noatu i te openga e kua oki akaou te ngati Iuda ki te akamorianga mou, i te au anere mataiti i muri mai kua akakeuia a Iesu kia akakite e: “E apai keia te basileia o te Atua nei ia kotou, e tukuia atu ki te aronga e akaua mai i te ua ra.” Ko te reira tikai tei tupu. Kua akakite a Iesu e: “I na, kua vaio tane[a]ia to kotou nei are.” (Mata. 21:43; 23:37, 38) No tona tu akarongo mou kore, kua apai keia te tikaanga ngateitei kia riro ei mata no te Atua mou. I te mataiti 70 T.N., kua akataneaia e te au vaeau o Roma a Ierusalema e te iero, e kua riro te manganui o te au ngati Iuda tei toe mai ei au tuikaa.

15. E oronga mai i te akaraanga o nga tangata tei kore i akatinamou ki runga i te mea puapinga maata tikai.

¹⁵ Ko Iuda Ikariota tetai o te au apotetoro e 12 a Iesu. Kua rongo ana a Iuda i te au apiianga umere a Iesu e kua kite aia i te au temeio tana i rave ma te tauturu a te vaerua tapu o te Atua. Inara, kare a Iuda i tapapa ana i tona ngakau. Kua irinakiia aia kia akono i te pute moni a Iesu e te au apotetoro e 12. Inara “e keia aia, e nana i mou i te pute, e nana rai i apai i nga mea i tukuia ki roto ra.” (Ioa. 12:6) No tona tu noinoi kua parani aia ki te kau taunga nunui kia tuku ia Iesu ki roto i to ratou rima no e 30 moni ario. (Mata. 26:14-16) Ko Dema tetai kare i akatinamou ki runga i te mea puapinga maata tikai tei riro ana ei oa no te apotetoro ko Paulo. Kare a Dema i tapapa ana i tona ngakau. Kua akakite a Paulo e: “Kua akaruke mai oki a Dema iaku, kua anoano maata ki teianei ao.”​—2 Timo. 4:10; e tatau ia Maseli 4:23.

Apiianga no Tatou Ravarai

16, 17. (a) Mei teaa ra te ririnui o te patoianga ta tatou e aro atura? (e) Eaa te ka tauturu ia tatou kia akakoromaki i tetai ua atu mea ta Satani ka tuku mai ki runga ia tatou?

¹⁶ Te anoanoia ra te au tavini pouroa o te Atua kia akamanako meitaki tikai i te au akaraanga tei akanooia i roto i te Pipiria, no te mea te akakiteia maira kia tatou e: “Rokoia iora ratou e taua au mea katoa ra, ei akaraanga: e ei ako mai oki ia tatou, i te aronga i rokoia mai i te openga o te au tuatau nei, i tataiaʼi.” (1 Kori. 10:11) I teia tuatau, te noo nei tatou i roto i te tuatau openga o teia akatereanga kino o te au mea nei.​—2 Timo. 3:1, 13.

¹⁷ Kua kite te Tiaporo ko Satani, “te atua o teianei ao ra,” e “e manga tuatau poto ua tona e toe nei.” (2 Kori. 4:4; Apo. 12:12) Ka rave rai aia i tana ka rauka ei akanauru i te au tavini o Iehova kia takino i to ratou tu apa kore ei au Kerititiano. Ko Satani te akatere nei i teianei ao, tei kapiti mai i ta te reira au ravenga pikikaa. Kareka ra, tei te iti tangata o Iehova tetai mea ririnui rava atu​—“te mana maata” atu. (2 Kori. 4:7) Ka rauka ia  tatou kia irinaki ki runga i teia mana no ko mai i te Atua ei tauturu ia tatou kia akakoromaki i tetai ua atu mea ta Satani ka tuku mai ki runga ia tatou. No reira, te raurauia maira tatou kia pure putuputu ua rai, i te irinaki anga e ka ‘oronga mai a Iehova i te vaerua tapu i te aronga e pati atu.’​—Luka 11:13.

18. Mei teaa ra to tatou tu ki teianei ao?

¹⁸ Te akamaroiroi katoaia nei tatou no te mea kua kite tatou e kare e roa atu ana ka takore pouroaia to Satani akatereanga, inara ka ora mai te au Kerititiano mou. “Te ngaro ke nei teianei ao, ma ta to reira katoa e anoano nei: ko tei akono ra i to te Atua ra anoano, e tika ïa i te ora anga e tuatau ua atu.” (1 Ioa. 2:17) No runga i teia, e mea neneva tikai no tetai tavini o te Atua kia manako e e apinga tetai i roto i teia akatereanga o te au mea nei tei puapinga maata rava atu i tona pirianga kia Iehova! Te ngaro ke nei teianei ao i raro ake i te akatereanga a Satani, inara kua oronga mai a Iehova i te putuputuanga Kerititiano te ka riro ei tauturu i te paruru i tona au tavini akarongo mou. Ia ratou e akavaitata atura ki te ao ou, ka rauka ia ratou kia irinaki i teia taputou e: “Ka riro oki te aronga i rave i te kino ra i te tipu keia; ko te aronga ra i tapapa ia Iehova ra, ko ratou te ka noo i te enua.” (Sala. 37:9) No reira, kia akatinamou i toou manako ki runga i teia tutaki umere tikai!

Maara Ainei ia Koe?

• Eaa ra to Paulo manako no runga i te tutaki tei orongaia kiaia?

• Kia tau ki runga i teaa, e akavaia ai te aronga ka noo e tuatau ua atu i te enua nei?

• Eaa ra te arataa pakari noou i teianei?

[Au Uianga Apii]

[Tutu i te kapi 12, 13]

Me tatau koe i te au papaanga Pipiria te kite ra ainei koe i te tutaki tei rauka mai ia koe?