Ia E Taula‘i Atu Pea i le Taui
Ia E Taulaʻi Atu Pea i le Taui
“Ua ou tausinio i le sini, o le taui lea.”—FILI. 3:14.
1. O le ā le taui na folafola atu i le aposetolo o Paulo?
O LE aposetolo o Paulo, o lē na igoa foʻi iā Saulo o Taso, na sau o ia mai se aiga taualoa. Na aʻoaʻoina o ia i le lotu a ona augātamā e le faiaʻoga lauiloa o le Tulafono o Kamalielu. (Galu. 22:3) Na foliga mai e matuā lelei le lumanaʻi o Paulo i lana galuega, ae na ia tuua lana lotu ina ia avea o ia ma Kerisiano. Ona ia taulaʻi atu lea i le taui o le ola e faavavau lea na folafola atu iā te ia, o le avea lea ma tupu ma ositaulaga e lē mafai ona oti, i le Malo o le Atua i le lagi. O le a pule mai lenā Malo i le lalolagi parataiso.—Mata. 6:10; Faaa. 7:4; 20:6.
2, 3. O le ā le tāua iā Paulo o le taui o le ola i le lagi?
2 Ona o le tāua tele o lenā taui iā Paulo, na ia faapea mai ai: “O mea tāua uma na ou maua, ua ou lotomalie e lafoaʻi ona o Keriso. O lenei foʻi, e moni lava, ua ou lotomalie e lafoaʻi ia mea ona o le matuā tāua o le iloa o Keriso Iesu loʻu Alii. O ia foʻi, ua ou taliaina ai le lafoaʻiina o nei mea uma, ma ua ou manatu o otaota ia mea.” (Fili. 3:7, 8) E tele ina faatāua e tagata mea e pei o tulaga, le tamaoaiga, o galuega, ma tulaga aloaʻia, ae na manatu Paulo i na mea o ni otaota, ina ua ia aʻoaʻoina le upu moni i fuafuaga a Ieova mo tagata.
3 Mai i lenā taimi, na matuā tāua lava iā Paulo le iloa lelei o Ieova ma Keriso, ma o lea na taʻua ai e Iesu i lana tatalo i le Atua, e faapea: “Ina ia maua le ola e faavavau, e tatau ona latou iloa lelei oe, le Atua moni e toʻatasi, atoa ma Iesu Keriso, o lē na e auina mai.” (Ioa. 17:3) Sa faamaonia le faanaunauga o Paulo ia maua le ola e faavavau i ana upu o loo i le Filipi 3:14: “Ua ou tausinio i le sini, o le taui lea o le valaau faalelagi mai le Atua, e ala iā Keriso Iesu.” Ioe, sa taulaʻi atu pea o ia i le taui o le ola e faavavau i le lagi o se vaega o le Malo o le Atua.
Ola e Faavavau i le Lalolagi
4, 5. O le ā le taui ua folafola mai i le faitau miliona o ē o loo faia le finagalo o le Atua i aso nei?
4 O le toʻatele o ē ua filifili e fai le finagalo o le Atua, e tatau ona latou galulue malolosi ina ia maua le taui o le ola e faavavau i le lalolagi fou a le Atua. (Sala. 37:11, 29) Na faamautinoa mai e Iesu le moni o lenā faamoemoe. Na fetalai o ia: “E fiafia o ē agamalu, auā e fai mo latou tofi le lalolagi.” (Mata. 5:5) Ua tuuina atu iā Iesu le pule o lo tatou tofi o le lalolagi e pei ona taʻua i le Salamo 2:8, ma o le a pule faatasi ma ia i le lagi le 144,000. (Tani. 7:13, 14, 22, 27) O i latou e pei o ni mamoe o ē o le a ola i le lalolagi, e “fai mo latou tofi” le lalolagi o le a pulea e le Malo ‘ua saunia mo i latou talu mai le faavaeina o le lalolagi.’ (Mata. 25:34, 46) Ua faamautinoa mai iā i tatou, o le a faataunuu moni lava lenā valoaga, auā “e lē mafai ona tala pepelo” lē na faia lenā folafolaga, o le Atua lea. (Tito 1:2) E mafai foʻi ona tatou mautinoa i le faataunuuga o folafolaga a le Atua, e pei o Iosua ina ua ia faapea atu i le fanauga a Isaraelu: “E leʻi iʻuvale se upu e tasi i upu lelei uma na fetalai mai ai Ieova lo outou Atua iā te outou; ua taunuu uma iā te outou, ua lē iʻuvale se upu e tasi.”—Iosua 23:14.
5 O le a lē pei le olaga i le lalolagi fou a le Atua o o tatou aso e tumu i le lē fiafia. O le a matuā ese lava, o le a lē toe iai ni taua, solitulafono, mativa, lē faamasinotonu, faamaʻi, ma le oti. O le a lelei atoatoa le soifua mālōlōina o i latou o le a ola i le lalolagi ua toe avea ma parataiso. O le a faamalieloto lenā olaga, ma o le a sili atu i o tatou moomooga. Ioe, o le a avea aso uma ma aso matuā matagofie. O se taui matagofie tele!
6, 7. (a) Na faapefea ona faataʻitaʻia e Iesu mea o le a tutupu i le lalolagi fou a le Atua? (e) O le a faapefea ona maua e ē ua maliliu se amataga fou?
6 A o soifua Iesu i le lalolagi, sa tuuina atu e le Atua iā te ia le mana e ala i Lona agaga paia, ina ia faataʻitaʻia ai mea matagofie o le a tutupu i le lalolagi aoao i le lalolagi fou. O se faataʻitaʻiga, na fetalai atu Iesu i se tamāloa na pipili mo le 38 tausaga, ina ia savali. Ua taʻua i le Tusi Paia, sa faia faapea e le tamāloa. (Faitau le Ioane 5:5-9.) O se isi faataʻitaʻiga, sa fetaui Iesu ma se “tamāloa na fanau mai ua tauaso” ma faamālōlō iā te ia. Mulimuli ane, na fesiligia le tamāloa lea na tauaso po o ai Lē na faamālōlōina o ia, ma na ia tali e faapea: “Talu mai aso anamua, e leʻi faalogo lava i se tagata ua faapupulaina mata o se tasi na fanau mai ua tauaso. Ana lē mai le Atua lenei tagata, e leai lava se mea e mafai ona ia faia.” (Ioa. 9:1, 6, 7, 32, 33) Sa mafai ona fai e Iesu nei mea uma ona o le mana mai le Atua. O mea uma sa alu i ai Iesu, sa ia “faamālōlō i ē o mamaʻi.”—Luka 9:11.
7 E lē gata na faamālōlō e Iesu tagata mamaʻi ma pipili, ae na mafai foʻi ona ia toe faatutūina ē na feoti. O se faataʻitaʻiga, ina ua oti se teineitiiti e 12 tausaga, na matuā faanoanoa ona mātua. Ae na fetalai atu Iesu: “Loʻu afafine e, ou te fai atu iā te oe, Inā tū ia i luga!” Ona ia tū ai lea i luga! Seʻi manatu i faalogona o ona mātua ma isi na iai i lenā taimi! (Faitau le Mareko 5:38-42.) O le a “matuā olioli” tagata i le lalolagi fou a le Atua, pe a toe tutū mai le faitau piliona o tagata, auā o le a “toetutū mai tagata amiotonu ma tagata amiolētonu.” (Galu. 24:15; Ioa. 5:28, 29) O le a maua ai e i latou se amataga fou o o latou olaga, ma le faamoemoe e ola ai e faavavau.
8, 9. (a) A o faagasolo le Pulega a Keriso i le Afe Tausaga, o le ā o le a tupu i le agasala na tuufaasolo mai iā Atamu? (e) O le ā le mea o le a faavae ai le faamasinoga o ē ua maliliu?
8 O le a maua e i latou e toetutū mai le avanoa i le ola. O le a lē faamasinoina i latou e toetutū mai i a latou agasala na fai a o leʻi feoti. (Roma 6:7) A o faagasolo le Pulega a Keriso i le Afe Tausaga, o le a maua aogā o le taulaga togiola, ma o le a faasolosolo ona maua e tagatānuu o lenā Malo le tulaga lelei atoatoa, ma oo ai ina matuā saʻoloto i latou mai āuga uma o le agasala a Atamu. (Roma 8:21) “E faaumatia e [Ieova] le oti e faavavau; e soloiesea foʻi e le Alii o Ieova o loimata i mata uma lava.” (Isa. 25:8) Ua faapea mai foʻi le Afioga a le Atua o le a ‘tatala foʻi ni tusi tāʻai,’ o lona uiga o le a maua e i latou o loo ola i lenā taimi ni faamatalaga fou. (Faaa. 20:12) A o toe faafoʻisia le lalolagi i lona tulaga parataiso, “e aʻoaʻoina ē o nonofo i le atu laulau, pe a faia au faamasinoga i le lalolagi.”—Isa. 26:9.
9 O le a faavae le faamasinoina o i latou e toetutū mai i mea ua latou filifili e fai, ae lē faavae i le agasala na tuufaasolo mai iā Atamu. Ua faapea mai le Faaaliga 20:12: “Ona faamasinoina lea o ē oti i mea na tusia i tusi tāʻai, e tusa ma a latou galuega,” o lona uiga, o a latou galuega e fai pe a toetutū mai. Maʻeu se faaaʻoaʻoga mataʻina o le faamasinotonu, o le alofa mutimutivale ma le alofa o Ieova! E lē gata i lea, o le a “lē toe manatua mea na muamua, e lē alu aʻe foʻi i le loto,” mea tigā i o latou olaga i le taimi ua mavae i lenei lalolagi tuai. (Isa. 65:17) Ona o le a iai faamatalaga fou e fiafia ai, ma se olaga ua tumu i mea lelei, o le a latou lē toe faanoanoa ai ona o mea leaga na faia i le taimi ua mavae. O le a latou lē toe manatua na mea na tutupu. (Faaa. 21:4) O le tulaga foʻi lenā o le a iai le “motu o tagata e toʻatele” o ē o le a faasaoina atu iā Amaketo.—Faaa. 7:9, 10, 14.
10. (a) O le a faapeʻī le olaga i le lalolagi fou a le Atua? (e) O le ā e te faia ina ia e taulaʻi atu ai pea i le taui?
10 O le a mafai ona ola tagata i le lalolagi fou a le Atua, e aunoa ma le maʻi ma le oti. “E lē fai mai foʻi se tasi ua mau ai, Ou te maʻi.” (Isa. 33:24) O le a iʻu ina alafaʻi mai tagata uma i le lalolagi fou i taeao taʻitasi i le ola lelei atoatoa, e matuā fiafia ona ua aulia se aso fou. O le a latou sagisagi fiafia i galuega faamalieloto ma auaufaatasiga ma ē e alolofa moni iā i latou. Ioe, o se taui ofoofogia! Faamolemole, suʻe ane lau Tusi Paia i valoaga o loo i le Isaia 33:24 ma le 35:5-7. Ia mafaufau faapea o loo e iai i lenā vaaiga. O le a faigofie ai ona e taulaʻi atu pea i le taui.
E Leʻi Taulaʻi Atu i le Taui
11. Faamatala le amataga mai o le nofoaiga a Solomona.
11 O le taimi tatou te aʻoaʻoina ai e faatatau i le taui, e tāua tele ona tatou finafinau e taulaʻi atu pea i ai ina neʻi galo iā i tatou. O se faaaʻoaʻoga, ina ua fai Solomona ma tupu o Isaraelu, na ia tatalo atu i le Atua mo le poto ma le faautauta ina ia faamasino ai ma le tonu Ona tagata. (Faitau le 1 Tupu 3:6-12.) O le iʻuga, ua taʻua i le Tusi Paia, na “foaʻiina mai e le Atua iā Solomona le poto ma le loto matala e matuā tele lava.” Ioe, “ua sili lava le poto o Solomona i le poto o tagata uma i sasaʻe, ma le poto uma o Aikupito.”—1 Tu. 4:29-32.
12. O le ā le lapataʻiga na tuuina atu e Ieova i ē o le a avea ma tupu o Isaraelu?
12 Peitaʻi, na lapataʻia e Ieova so o se tagata o le a avea ma tupu, ia “aua lava neʻi faateleina e ia solofanua mona” ma “aua foʻi neʻi faatoʻateleina e ia o avā māna, neʻi liliueseina ai lona loto.” (Teu. 17:14-17) O le faateleina o ana solofanua o le a faaalia ai lona faalagolago i le malosi faafitafita e puipuia lona nuu, nai lo le faalagolago iā Ieova, o Lē puipuia i latou. O le faateleina o ana avā o le a avea lea ma lamatiaga, auā o nisi o i latou e ō mai mai nuu faapaupau ia e taatele ai tapuaʻiga sesē, ma e mafai e na avā ona faaliliu ese le tupu mai le tapuaʻiga moni iā Ieova.
13. Na faapefea ona lē toe taulaʻi Solomona i mea na foaʻi atu iā te ia?
13 E leʻi usitaia e Solomona na lapataʻiga. Peitaʻi, na ia faia le mea tonu lava lea na fetalai Ieova ia aua neʻi faia e tupu. Na ia faateleina ana solofanua ma ana tagata tiʻetiʻe solofanua i le faitau afe. (1 Tu. 4:26) Na fai foʻi ana avā e toʻa 700 ma palake e toʻa 300, ma o le toʻatele o i latou na ō mai mai nuu faapaupau. “Ona faaliliueseina lea o lona loto e ana avā e mulimuli i atua ese; na lē sao lona loto iā Ieova.” Na auai Solomona i tapuaʻiga sesē inosia a nuu faapaupau a ana avā. Na iʻu ina fetalai atu Ieova iā Solomona o le a ia “matuā saeeseina . . . le malo” mai iā te ia.—1 Tu. 11:1-6, 11.
14. O le ā le iʻuga o le lē usiusitai o Solomona ma le nuu o Isaraelu?
14 Sa leʻi toe taulaʻi atu Solomona i lona faaeaga tautele, o le fai lea ma sui o le Atua moni. Sa matuā aafia le tupu i tapuaʻiga sesē. Na mulimuli ane liliu ese le nuu atoa mai le tapuaʻiga moni, ma iʻu ai i lo latou faaumatiaga i le 607 T.L.M. E ui lava foʻi ina sa toe faafoʻisia e tagata Iutaia le tapuaʻiga moni, ae na folafola atu e Iesu i senituri mulimuli ane, e faapea: “E aveesea le malo o le Atua mai iā te outou, ae tuuina atu i se nuu e fua mai ai ona fua.” O le mea tonu lenā na tupu. Na fetalai atu Iesu: “Vaai foʻi! Ua faatafunaina lo outou fale.” (Mata. 21:43; 23:37, 38.) Ona o le lē faamaoni o le nuu, na aveesea ai lo latou faaeaga sili o le fai lea ma sui o le Atua moni. Na faaumatia e ʻautau a Roma Ierusalema ma lona malumalu i le 70 T.A., ma o le toʻatele o tagata Iutaia na totoe, na avea ma pologa.
15. Aumai ni faaaʻoaʻoga o ē na lē toe taulaʻi atu i mea e sili ona tāua.
15 O Iuta le Sekara, o se tasi o aposetolo e toʻa 12 o Iesu. Sa faalogo o ia i aʻoaʻoga mataʻina a Iesu, ma na vaai i vavega a Iesu na faia e ala i le agaga paia o le Atua. Peitaʻi, e leʻi leoleoina e Iuta lona loto. Na tuu atu e na te vaaia le pusa tupe a Iesu ma ona aposetolo e toʻa 12. Ae “o ia o se gaoi, o loo iā te ia le pusa e teu ai tupe, ma e masani ona ia avea tupe na tuu ai i totonu.” (Ioa. 12:6) Na matuā faateleina lona matapeʻapeʻa ina ua latou taupulepule ma faitaulaga sili faagutugutulua, e faalataina Iesu i tupe siliva e 30. (Mata. 26:14-16) O le isi faaaʻoaʻoga o sē na lē toe taulaʻi atu i mea tāua, o Tema, o se aumea a le aposetolo o Paulo. E leʻi leoleoina e Tema lona loto. Na taʻua e Paulo: “Ua tuulafoaʻiina aʻu e Tema ona o le naunau tele i faiga o mea a lenei lalolagi.”—2 Timo. 4:10; faitau le Faataoto 4:23.
Se Lesona mo i Tatou
16, 17. (a) O le ā le malolosi o teteega o loo tatou fesagaʻia? (e) O le ā e mafai ona fesoasoani iā i tatou e tatalia ai tofotofoga uma e faaoo mai e Satani?
16 E tatau i auauna uma a le Atua ona teulotoina faaaʻoaʻoga o loo i le Tusi Paia, auā ua faapea mai: “Na oo nei mea iā i latou e fai ma faaaʻoaʻoga, ma na tusia ina ia lapataʻia ai i tatou o loo ola i le iʻuga o faiga o mea a le lalolagi.” (1 Kori. 10:11) Ua tatou ola nei i aso e gata ai o lenei faiga o mea amioleaga.—2 Timo. 3:1, 13.
17 Ua iloa e Satani le Tiapolo, “le atua o faiga o mea a lenei lalolagi,” “ua puupuu lona taimi” o totoe. (2 Kori. 4:4; Faaa. 12:12) O le a tuu atoa le malosi o Satani e faaosooso ai auauna a Ieova ina ia lē toe faamaoni o ni Kerisiano. Ua pulea e Satani lenei lalolagi, e aofia ai ma faasalalauga taufaasesē a le lalolagi. Ae o loo iai i tagata o Ieova se fesoasoani e sili atu ona malosi, o “le mana lea e sili atu i le malosi o tagata.” (2 Kori. 4:7) E mafai ona tatou faalagolago i lenei mana mai le Atua, ina ia tatou tatalia ai so o se ituaiga tofotofoga e faaoo mai e Satani. O le mea lea ua faalaeiauina ai i tatou ina ia tatalo e lē aunoa, ma le mautinoa e “foaʻi mai e [Ieova] le agaga paia iā i latou o ē ōle atu iā te ia.”—Luka 11:13.
18. O le ā le manatu e tatau ona iā i tatou e uiga i lenei lalolagi?
18 E faalaeiauina foʻi i tatou i le iloa lea o le a toeitiiti faaumatia le faiga o mea a Satani, ae faasaoina Kerisiano moni. “E mavae atu foʻi le lalolagi faapea ma ona tuʻinanauga, a o lē e faia le finagalo o le Atua e tumau e faavavau.” (1 Ioa. 2:17) O lea la, e lē atamai mo se auauna a le Atua ona mafaufau e iai se mea mai lenei lalolagi e sili atu ona tāua nai lo le faiā ma Ieova! Ua pei lenei lalolagi lea e pulea e Satani, o se vaa o loo goto. Ua saunia e Ieova le faapotopotoga Kerisiano o se vaa faaola mo ana auauna faamaoni. A o latou taulaʻi atu i le lalolagi fou, e latou te mautinoa i le folafolaga lenei: “E faaumatia o ē fai amio leaga; a o ē faatalitali iā Ieova, o i latou lava ia e fai mo latou le nuu.” (Sala. 37:9) O lea la, ia e taulaʻi atu pea i lenei taui matagofie!
Pe E te Manatua?
• O le ā le manatu o Paulo i le taui sa folafola atu iā te ia?
• O le ā o le a faavae ai le faamasinoga o i latou o le a ola e faavavau i le lalolagi?
• O le ā le ala atamai e ao ona e uia i le taimi nei?
[Fesili mo le Suʻesuʻega]
[Ata i le itulau 12, 13]
Po o faaāta i lou mafaufau ua e mauaina le taui pe a e faitau i tala o le Tusi Paia?