Ver Ashe Sha Iyua la
Ver Ashe Sha Iyua la
“M ngu yevese zan hen ikighir i i ver la sha u zuan a iwua.”—FIL. 3:14.
1. Lu iyua i nyi i ver sha ci u apostoli Paulu?
APOSTOLI PAULU, u i yilan un kpaa ér Saulu u Tarsu la yange due hen tsombor u lun yôughyôugh. Gamaliel, ortesen atindi u za iti kpishi la yange tese Paulu kwaghaôndo u uter nav mbatsev eren la. (Aer. 22:3) Paulu yange lu a ian i ma hingir ityagheror ken kwaghaôndo u uter nav, u lu ior zegekwagh hen shighe la yum la, kpa undu kwaghaôndo la hingir Orkristu. Nahan za hemen u veren ashe sha iyua i uma u tsôron, i i ver sha ci na la; iyua shon yô, lu u va hingir tor u tsôron man pristi ken Tartor u Aôndo u sha la. Tartor la ua hemen sha tar ú ua hingir paradiso la.—Mat. 6:10; Mpa. 7:4; 20:6.
2, 3. Iwua i zuan a uma u tsôron sha la yange i gba Paulu ishima tsung nena?
2 Paulu pase er iyua la gba un ishima tsung yô, á kaa ér: “Akaa a a lum mtsera la cii, a gema hingir mo msaa sha ci u Kristu. Mimi je m nenge akaa cii hingir mo msaa sha ci u mfe u fan Kristu Yesu Terem la a hembe ica yum yô. Ka sha ci Na man m de akaa cii a saam ye, m nenge a hingir mo hôngor.” (Fil. 3:7, 8) Paulu yange va fe mimi sha kwagh u Yehova a we ishima u eren sha ci u uumace yô, a nenge iaven i vesen man inyaregh man tom kua shagba u a gbe ior kwagh yum la ér ka hôngor.
3 Hii hen shighe la je, kwagh u hemba gban Paulu ishima yô, lu u zuan a mfe u vough u Yehova man u Kristu. Yesu ôr kwagh u mfe la ken msen ér: “Man uma u tsôron yô, ka u ve̱ fa U, We Aôndo u mimi tswen, man shi Un u U tindi la, ka Yesu Kristu.” (Yoh. 17:3) Mkaanem ma Paulu a er ken Mbafilipi 3:14 la pase isharen i lu a mi tsung i zuan a uma u tsôron la wanger wanger. A kaa ér: “M ngu yevese zan hen ikighir i i ver la sha u zuan a iwua i myila u a sen sha, u Aôndo A lu yilan ken Kristu Yesu la.” Sha kpôô yô, Paulu yange ver ashe u va zuan a iwua i uma u tsôron sha, ken Tartor u Aôndo.
U Lun Uma Gbem sha Won Shin Tar
4, 5. Ka iyua i nyi i lu sha ci u ior umiliôn imôngo mba ve lu eren ishima i Aôndo nyian nee?
4 Se uumace mbagenev kpishi, mba se tsough u eren ishima i Aôndo cii, se nôngo nen kpoghuloo sha er se va zua a injar i uma u tsôron ken tar u he u Aôndo a tende zwa ér una va a mi la yô. (Ps. 37:11, 29) Yesu tese ér ishimaverenkeghen ne ia bunde ga. A kaa ér: “Saan mba ve lu a ishima i legh legh la iyol, gadia tar ua lu dyako ve je.” (Mat. 5:5) Er i er ken Pasalmi 2:8 nahan, ka Yesu iyol na je a lu or u vesen u yan dyako u tar wase ne ye. Shi iorov 144,000 vea hemen vea na sha. (Dan. 7:13, 14, 22, 27) Iyôngo igen i ia lu shin tar la di ia ‘ya dyako’ u Tartor u i ‘ver sha ci ve hii sha igbetar je la.’ (Mat. 25:34, 46) Í kaa a vese ér akaa ne cii aa er kpee je, gadia Aôndo u a tende zwa ér una er kwagh ne la “eren aie ga.” (Titu 1:2) Se kpa se fatyô u lun a vangertiôr ser Aôndo una kure uityendezwa nav, er Yosua kpa ngise lu a mi nahan. Yange kaa a Mbaiserael ér: “Ma kwagh môm sha akaa a dedoo a TER, Aôndo wen, ter sha a ven la bunde ga, a cii i kure ne a vough, ma kwagh môm bunde ga.”—Yos. 23:14.
5 Uma u se va ember ken tar u he u Aôndo la una due ior ishima er uma u hegen ne nahan ga. Hen shighe la, ityav man ifer man ican man mnzughul u nzughul a mbagenev man angev man ku cii ua kera lu ga. Ior mba vea lu hen shighe la vea gba angev mayange ga, vea lu shin tar u a gema u ua hingir paradiso la. Uma una doo hen shighe la je a hemba er se hen la. Sha kpôô yô, hanma iyange yô, a saan hanma or iyol kpishi. Nenge iyua i kpilighyol i se va zua a mi ne sha wono!
6, 7. (a) Yesu yange tese ikyav i kwagh u se ver ishima u va nengen a mi ken tar u he, u Aôndo la nena? (b) Mba a nder ve la vea hii uma u he nena?
6 Shighe u Yesu lu shin tar la, icighan jijingi u Aôndo na un agee, a er akaa a kpilighyol. Akaa a a er la tese akaa a una va er sha tar cii ken tar u he la yô. U tesen ikyav yô, Yesu yange kaa a orgen u kpe alegh anyom 38 ér a mough a zende. Bibilo kaa ér or la er vough er Yesu kaa un nahan. (Ôr Yohane 5:5-9.) Sha shighe ugen di, Yesu bugh ‘or u i mar un a ashe a pirin’ yô, ashe. Ken masejime yô, i va pine or u vande pirin ashe ne kwagh u or u nan bugh un ashe la yô, a kaa ér: “Hii sha igbetar je mba a ungwa er i bugh or u i mar nan a ashe a pirin, ashe ga. Or ne Una dugh sha Aôndo ga yô, ma A fetyô u eren ma kwagh ga.” (Yoh. 9:1, 6, 7, 32, 33) Yesu yange fatyô u eren uivande mban cii sha ci u Aôndo na un agee. Hanma ijiir i yange Yesu una za man una nenge a “mba kwagh a gbe u ma i ser ve angev yô, A war ve.”—Luka 9:11.
7 Ka mbauangev man mba kpen alegh tseegh Yesu yange bee ve angev ga, yange nder mbakpenev kpaa. U tesen ikyav yô, wanyekwase u lun anyom 12 yange sar ku nahan mbamaren nav vaa shi zungwe ku na tsung. Kpa, Yesu ze her yô, a kaa ér: “Wankwase, M ngu kaan we Mer, mough sha!” Fese nahan, wankwase la mough sha! Nenge er yange a doo mbamaren nav man mbagenev mba ve lu her la kpishi yô! (Ôr Marku 5:38-42.) Shighe u a va nder mbakpenev umiliôn imôngo ken tar u he la kpa a “saan ior iyol kpishi” (NW ), gadia a va ‘nder mba ve lu mbaperapera kua mba ve lu perapera ga la’ kpaa. (Aer. 24:15; Yoh. 5:28, 29) Mba a nder ve la vea hii uma u he, hii hen shighe la zan zan yem hemen, vea lu uma gbem sha won.
8, 9. (a) Shighe u Kristu una Hemen Anyom Dubu la, a er a isholibo i se zough a mi hen Adam la nena? (b) A ôr mbakpenev ijir nena?
8 Mba a nder ve la vea lu a ian i zuan a uma u tsôron. A ôr ve ijir sha asorabo a yange ve er cii man ve kpe la ga. (Rom. 6:7) Shighe u Kristu una Hemen Anyom Dubu la, a yar tom a nagh ku ipaa ku Kristu na la sha u yiman uumace mba ungwan imo i Aôndo, mba vea lu sha ikyev i Tartor la cii, vea za hemen u lun vough kure kure, zan zan mbamzeyol mba isholibo i Adam i ve a mi la vea kar wanger ve iyol cica cii. (Rom. 8:21) Yehova una “tim ku sha won kera; Ter Aôndo Una ese mliam sha ishiv mbi iorov cii, man shi Una hide a ilyahan sha ior Nav kera sha won cii.” (Yes. 25:8) Mkaanem ma Aôndo shi kaa ér a “bugh uruamabera,” kwagh ne tese ér a tese mba vea lu uma hen shighe la cii akaa a he. (Mpa. 20:12) Er tar cii ua lu hingir paradiso kure kure la, ‘mba ve tem shin tar cii vea lu henen perapera.’—Yes. 26:9.
9 A ôr mba a nder ve shin ku la ijir, kpa a lu sha isholibo i ve zough a mi hen Adam la ga, a lu sha akaa a ve ayol a ve ve tsough u eren la. Mpase 20:12 kaa ér: “I ôr mbakpenev ijir sha akaa a i nger ken uruamabera mbara, sha aeren a ve.” Aeren ne ka aeren a vea er shighe u a nder ve kera la. Sha kpôô yô, kwagh ne tese ér Yehova ka Aôndo u mhôôn man u dooshima man u ôron ijir sha mimi! Shi kwagh ugen yô, akaa a vihin tsung a yange ve er ken tar u tse ne cii “á kera umbur . . . [a] ga, man shi aa kera va or ken ishima kpaa ga.” (Yes. 65:17) Ior vea hen akaa a he a taver ve ishima ken tar u he la shi uma una iv a akaa a dedoo kpaa, nahan ishima ia kera za ve iyol sha akaa a vihin a yange ve tagher a mi ken ijime la ga. Mayange je, akaa la aa kera va ve ken ishima ga. (Mpa. 21:4) “Zegeikpelaior” i̱ ia war Armagedon la kpa kape kwagh u i̱ una lu vough je la.—Mpa. 7:9, 10, 14.
10. (a) Uma una lu nena ken tar u he u Aôndo laa? (b) Kanyi u er ve ia wase u u hemba veren ishima sha iyua i uma u tsôron laa?
10 Ken tar u he u Aôndo una va a mi la, or môm nana kera gba angev shin nana kpe ga. “Ma or u nan tem ker kpaa nana kera kaa er: Kwagh nyoon mo, ga.” (Yes. 33:24) Hanma sev yô, mba vea lu ken tar u he la ve nder gbang gbang, shi í maa ve iyol u nengen a sev mbu dedoo mbugen kpaa. Shi vea eren ityom i dedoo, shi vea luun imôngo a ior mba vea eren a ve doo doo tseegh. Sha kpôô yô, uma ne ka iyua i hemban cii i se va zua a mi yô! Er nan u ker ian u er akaaôron a profeti a i er ken Yesaia 33:24 man 35:5-7 la ga? U ôron a yô, nenge a iyol you ken tar u he la. Kwagh ne una wase ú u hemba veren ishima sha iyua i uma u tsôron la.
Mbagenev Mba Iyua la Kera Gba Ve Ishima Ga Yô
11. Pase er Solomon yange hii hemen na dedoo yô.
11 Shighe u se hii henen kwagh u iyua ne la je, a gba u se nôngo kpoghuloo se za hemen u veren ishima sha i, sha er se tôô ishima sha mi kera ga yô. U tesen ikyav yô, shighe u Solomon hingir tor u Iserael u tsuaa la, a hide a iyol ijime, a sôn Aôndo ér a̱ na un mkav man kwaghfan sha er una ôr ior mba Aôndo ijir sha inja yô. (Ôr 1 Utor 3:6-12.) Bibilo ôr kwagh u za hemen yô, ér, “Aôndo na Solomon kwaghfan man mkav kpishi je, kua ishima i bughun” kpaa. Sha kpôô yô, “kwaghfan u Solomon hemba kwaghfan u ior mba sha ityoughkitaregh cii, kua kwaghfan u Igipiti cii kpaa.”—1 Utor 4:29-32.
12. Yehova yange ta mba lu u vea hingir tor ken Iserael la icin ér nyi?
12 Nahan kpa, Yehova yange tan icin ér, hanma or u nana hingir tor u Iserael cii, “nana̱ de seer a seer anyinya kpishi sha ci u nan ga,” shi “nana̱ de seer a seer kasev kpishi ga, sha er ishima i nan i̱ de danen ga yô.” (Dut. 17:14-17) Yange tor nana̱ seer anyinya yô, nan tese ér nan suur sha Yehova, u lu Orkuran u Mbaiserael la ga, kpa nan suur sha tahav mbu anyinya a nan la. Shi yange gba u nana seer a seer kasev kpishi ga, sha ci u kasev mban mbagenev lu mba ken akuraior a a fa Aôndo ga, a a civir mbaaôndo mbaaiev la. Kasev mban lu mba vea fatyô u nan tor nana undun mcivir u mimi u Yehova.
13. Solomon yange gema tor u i na un la ta kera nena?
13 Solomon yange wa acin a Yehova ta la ikyo ga. Kpa gema er akaa a Yehova kaa a utor ér ve de eren ga la. Yange lu a anyinya man mbaanyinyav kpishi. (1 Utor 4:26) Shi lu a kasev 700 man kasev mba sha uikya 300, mba kpishiv ken ve lu mba ken akuraior a fanaôndoga, a a wa ndor a ve la. Kasev mban yange ve “gema un ishima, a dondo mbaaôndo mbagenev; ishima na [kera] lu sha TER, Aôndo na, vough” ga. Nahan Solomon hingir u civir mbaaôndo mbaaiev mba ndôhôr ishima, mba kasev nav mba ken akuraior a fan Aôndo ga tese un la. Sha ityôkyaa ne yô, Yehova kaa ér una ‘tsuwe tor her a na kera.’—1 Utor 11:1-6, 11.
14. Ihyembeato i Solomon man i ikyurior i Iserael la yange i̱ za a ve nena?
14 Kwagh yange kera gba Solomon sha ian i civirigh i lu a mi i lun ortom u Aôndo u mimi la ga. Nahan, Solomon hingir u civir mbaaôndo mbaaiev a ishima na cii. Shighe kar yô, ikyurior i Iserael cii hingir mba vendan Aôndo, nahan i tim i̱ ken inyom i 607 C.S.Y. (Cii man Shighe u Yesu) la. Er Mbayuda va hide a mcivir u mimi her nahan kpa, uderimbaanyomov mba karen yô, Yesu kaa a ve ér: “Á ngohol tartor u Aôndo hen a ven kera á na ikyurior i ia ume atam yô.” Man lu kwagh u er vough je ne. Yesu za hemen ér: “Nenge ase, i undu ya wou, hingir ice.” (Mat. 21:43; 23:37, 38) Er ikyurior i Iserael kera lu jighjigh ga yô, i̱ ta ian i civirigh i lun mbatomov mba Aôndo u mimi la kera. Mba ker ken inyom i 70 la yô, shoja i Mbaroma va tim Yerusalem kua tempel, asande a Mbayuda a a shi her la di hingir ikpan.
15. Ter ior mba yange kwagh kera gba ve sha iyua i uma u tsôron la ga yô.
15 Yuda Isekarioti lu môm ken mbaapostoli mba Yesu mba 12 mbara. Yange ungwa atesen a doon a Yesu la shi nenge uivande mba kpilighyol mba Yesu er sha iwasen i icighan jijingi u Aôndo la. Nahan kpa, a kôr cio u kuran ishima na ga. Yange tilin ikpanyar i Yesu man i mbaapostoli mba 12 mbara. Kpa gema “lu ormbaiv . . . , man er a tilin ikpanyar yô, a dughun kwagh u i we kimi la.” (Yoh. 12:6) Er Yuda wa hua yum yô, a zua zwa vea upristi mbatamen mba wan atseregh ér ve na un agbenger a azurfa 30 una na Yesu sha ikyev ve. (Mat. 26:14-16) Orgen u kwagh kera gba nan sha iyua i uma u tsôron la ga yô lu Dema, un lu ikyar-tom i apostoli Paulu. Dema kpa yange kura ishima na ga. Paulu ôr kwagh na ér: “Dema undum sha ci u tar u ainge ne u doo un yum yô.”—2 Tim. 4:10; ôr Anzaakaa 4:23.
Ityesen sha ci u Hanmô Wase
16, 17. (a) Ameen a se tagher a mi la taver nan je? (b) Kanyi ia wase se se wa ishima a nyityôkwagh i Satan a ve a mi u sha vese ciilii?
16 Hanma or u civir Aôndo yô, nana̱ hen sha kwagh u ior mba i er kwagh ve ken Bibilo ne, gadia i kaa a vese ér: “Akaa ne er ve, lu akav a tesen man i nger a sha u a̱ lu se ityesen, se mba mkur u ashighe a ve sha a vese ne.” (1 Kor. 10:11) Nyian ne, se mba ken mkur u ayange a bo ne.—2 Tim. 3:1, 13.
17 Satan Diabolo, u a lu “aôndo u tar u ainge ne” fa er “shighe na a kera vese ga” yô. (2 Kor. 4:4; Mpa. 12:12) Nahan ngu nôngon sha afatyô na cii ér una mee ior mba Yehova ve de u civir un sha mimi. Satan ngu hemen tar ne, kua mbamzough mba ve samber a abaver la cii. Nahan kpa, ior mba Yehova mba a kwagh u a hembe un yô, mba a “agee a hemban la.” (2 Kor. 4:7) Doo u se suur sha agee a Aôndo ne ser a̱ wase se se hendan a nyityô kwagh i Satan una va a mi u nôngon num a vese cii. Sha nahan yô, i taver se ishima ér se eren msen gbem shi se lu a vangertiôr ser Yehova una “na mba ve sen Un la Icighan Jijingi.”—Luka 11:13.
18. Doo u se nenge tar u hegen ne nena?
18 Mfe u se fe ser mba sôôn timin tar u Satan a lu hemen u ne shi Mbakristu mba mimi vea war mtim shon la kpa ka kwagh u taver se ishima. “Tar yô, ngu karen kera kua isharen i u kpaa; kpa u nan eren ishima i Aôndo yô, nan ngu lun gbem sha won.” (1 Yoh. 2:17) Er se fe kwagh ne nahan, aluer ma or u civir Aôndo nan hen ér tar ne ngu a kwagh u injaa u nan nan, u a hembe kwagh u dedoo u nana zua a mi ken ikyar i nan ye vea Yehova la yô, nan er kwagh sha kwaghfan ga. Tar u Satan a lu hemen u ne ngu er tso u a lu urun nahan. Nahan kpa, Yehova na se tiônnongo u Kristu u a lu er “tso u waren ior” nahan la ér a war mbatomov nav mba jighjigh. Er mbacivir Yehova ve lu mgbôghom a tar u he la yô, doo u vea na ityendezwa ne jighjigh, i kaa ér: “Á va tim aferaior kera; kpa mba ve veren ashe hen TER yô, ka ve vea ya dyako u tar ye.” (Ps. 37:9) Nahan yô, ver ashe sha iyua i doon tsung ne!
Baver We Kpa?
• Paulu yange nenge iyua i i ver sha ci na la nena?
• Á ôr mba vea ya dyako i tar ne la ijir sha nyi?
• Kanyi i doo u ú er hegene?
[Mbampin Mba Ngeren u Henen]
[Foto u sha peeji 13]
Ka wea ôr Bibilo nahan ú nenge er i lu nan we iyua i uma u tsôron la kpa?