Amulangisisye Bulumbu

“Nja bubindaanina kumagolelo, kuti nkajane bulumbu.”—Flp. 3:14.

1. Ino mbulumbu nzi mbwaakapegwa mwaapostolo Paulo?

IMWAAPOSTOLO Paulo, iwakali kwiitwa kuti Saulo waku Tarso, wakazwa kumukwasyi wakajisi mpuwo. Wakayiisyigwa makani aajatikizya bukombi bwabamasyaanyinakulu kumwiiyi wamulawo uuzyibidwe kapati uutegwa Gamaliyeli. (Inc. 22:3) Paulo wakali kukonzya kujana mulimo wakumubili mubotu kapati, pele walo wakazwa kucikombelo cakwe mpoonya wakaba Munakristo. Mpoonya wakali kulangisisya bulumbu mbwaakapegwa bwakuba abuumi butamani—kuyooba mwami uutafwiki alimwi amupaizi mu Bwami bwa Leza bwa Kujulu. Bwami oobu buyoolela nyika yaparadaiso.—Mt. 6:10; Ciy. 7:4; 20:6.

2, 3. Ino mbuti Paulo mbwaakabuyandisisya bulumbu bwakuyoopona kujulu?

² Ikutondezya mbwaakali kububikkila maanu bulumbu oobu, Paulo wakati: “Kufumbwa zintu izyakali kundeetela impindu, sunu ndaziyeeya kuti nzyabuyo. Ee, mbukabede! Zintu zyoonse ndaziyeeya mbuli zintu zyabuyo nkaambo kacintu eci ciinda loko kubota cakuziba Jesu Kristo Mwami wangu. Nkaambo kanguwe nkindakalekela zintu zyoonse, ndaziyeeya kuti masifwisifwi buyo.” (Flp. 3:7, 8) Izyintu bantu nzyobabona kuti zilayandika kapati—cuuno caatala, buvwubi, mulimo alimwi ampuwo—Paulo wakazibona kuti zyakali masifwisifwi naakamana kwiiya kasimpe kajatikizya makanze ngajisi Jehova kubantu.

³ Kuzwa ciindi eeco, cintu icakali kuyandika kapati kuli Paulo lwakali luzyibo lwa Jehova alimwi a Kristo, lwalo Jesu ndwaakaamba mumupailo kuli Leza kuti: “Mboobu buumi ubutamani, kuti bazibe nduwe, Leza mwini-mwini, ooli olike, ayooyo ngookatuma, nguwenya Jesu Kristo.” (Joh. 17:3) Makani aakuti Paulo wakali kuyandisisya kuba abuumi butamani alalibonya mumajwi aalembedwe kulugwalo lwa Ba-Filipi 3:14 ilwaamba kuti: “Aboobo nja bubindaanina kumagolelo, kuti nkajane bulumbu bwakujulu mbwatwiitila Leza muli-Kristo Jesu.” Inzya, wakabikkila kapati maanu kubulumbu bwakuyooba abuumi butamani kujulu kali cibeela ca Bwami bwa Leza.

Kupona Anyika Kukabe Kutamani

4, 5. Ino mbulumbu nzi ibuyoopegwa kubantu banji ibacita kuyanda kwa Leza mazuba aano?

⁴ Kujatikizya baabo ibasala kucita kuyanda kwa Leza, bulumbu mbobeelede kubelekela canguzu mbuumi butamani munyika mpya yalo Jehova njaakabamba. (Int. 37:11, 29) Jesu wakasinizya kuti bulangizi oobu mbwamasimpe. Wakaamba kuti: “Bali acoolwe abo balibombya, nkaambo bazoovuba nyika.” (Mt. 5:5) Jesu ilwakwe kumugama ngusikukona nyika mupati, mbubwenya mbokulembedwe ku Intembauzyo 2:8, alimwi uyooba abalelinyina bali 144,000 kujulu. (Dan. 7:13, 14, 22, 27) Aaba ibali mbuli mbelele ibayoopona anyika, ‘bayookona’ cibeela caanyika ‘ica Bwami ncobakabambilwa kuzwa kumalengelo aanyika.’ (Mt. 25:34, 46) Alimwi tusyomezyegwa kuti eeci ciyoozuzikizyigwa nkaambo Leza uutusyomezya ‘tabeji.’ (Tit. 1:2) Tulakonzya kuba alusyomo lwakuti Leza uyoozuzikizya zisyomezyo zyakwe mbuli loolo ndwaakajisi Joshua naakaambila bana Israyeli kuti: “Taakwe cintu niciba comwe icakawida ansi akati kazintu zibotu zyoonse Jehova Leza wanu nzyakaamba aandinywe. Zyoonse buyo zyakacitika, taakwe niciba comwe icakawida ansi.”—Jos. 23:14.

⁵ Buumi munyika mpya ya Leza tabukabi mbuli boobu mbotupona lino bwalo buzwide zyintu zityompya. Buyooyindana kapati mukuti: takukabi nkondo, zigwebenga, bucete, lunya, kuciswa, alimwi alufwu. Ciindi eeci bantu bayooba abuzumi ibulondokede alimwi bayookkala anyika yalo iibambuludwe kuba paradaiso. Buumi buyookkomanisya kapati cakunga lino  tatucikonzyi kubuyeeyela mbobuyooba. Masimpe, mazuba oonse anookkomanisya kapati. Elo kaka oobu mbulumbu butaliboteli!

6, 7. (a) Ino mbuti Jesu mbwaakatondezya nzyotukonzya kulangila kuti ziyoocitika munyika mpya ya Leza? (b) Ino mbuti abalo ibafwide mbobayoopegwa coolwe cakuba abuumi bupya?

⁶ Ciindi Jesu naakali anyika, Leza wakamupa muuya uusalala kutegwa acikonzye kutondezya bantu zyintu zibotu zyalo iziyoocitika nyika yoonse munyika mpya. Mucikozyanyo, Jesu wakaambila mwaalumi wakalebukide mubili kwamyaka iili 38 kuti aende. Bbaibbele lyaamba kuti mwaalumi ooyu wakacita oobo. (Amubale Johane 5:5-9.) Cimwi ciindi, Jesu wakayaanya “muntu [iwakali] moofu kuzwa kukuzyalwa kwakwe” mpoonya wakamuponya. Nokwakainda ciindi, muntu ooyu iwakali moofu naakabuzyigwa kuti aambe wakamuponya, wakaingula kuti: “Kuzwa kumatalikilo aanyika takunamvwidwe umwi wakajulide meso aamuntu uwakazyalwa moofu. Oyo muntu naatali kuzwa kuli-Leza, naatakonzya kucita cintu.” (Joh. 9:1, 6, 7, 32, 33) Jesu wakali kukonzya kucita zyintu eezyi nkaambo Leza wakamupa muuya uusalala. Kufwumbwa nkwaakaunka, Jesu ‘wakabaponya aabo ibakali kuyandika kuponya.’—Lk. 9:11.

⁷ Jesu tanaakali buyo kukonzya kuponya baciswa alimwi abalema, pele alimwi wakali kukonzya kubusya bantu bafwide. Mucikozyanyo, ciindi musimbi wakajisi myaka yakuzyalwa iili 12 naakafwa, bazyali bakwe bakausa kapati. Pele Jesu wakaamba kuti: “Kasimbi, buka.” Mpoonya wakabuka. Sena mulakonzya kweezyeezya mbobakalimvwa bazyali bakwe alimwi abantu bamwi buyo ibakaliko? (Amubale Marko 5:38-42.) Munyika mpya ya Leza, kuyooba ‘lukkomano kapati’ ciindi bantu banji bafwide baakubusyigwa, nkaambo “ku[yoo]ba kubuka kwabafu, akwabaluleme akwabataluleme.” (Inc. 24:15; Joh. 5:28, 29) Aaba, bayoopegwa coolwe cakuba abuumi bupya kabajisi bulangizi bwakuyoopona kuzwa ciindi eeco mane kukabe kutamani.

8, 9. (a) Mu Bulelo bwa Kristo bwa Myaka iili Cuulu, ino ncinzi ciyoocitika kucibi ncotwakakona kuli Adamu? (b) Ino bantu bafwide bayoobetekwa kweelana anzi?

⁸ Bantu ibayoobusyigwa bayoopegwa coolwe cakuba abuumi. Aabo ibayoobusyigwa tabakapegwi milandu yazibi nzyobakacita kabatanafwa. (Rom. 6:7) Mu Bulelo bwa Kristo ibwa Myaka iili Cuulu, ciindi mpindu yacituuzyo cacinunuzyo noinoobelesyegwa, ibantu bamvwida banooyabulondoka aasyoonto-syoonto, kusikila mane cibi coonse ca Adamu cikamaninine muli mbabo. (Rom. 8:21) Jehova ‘uyoolumenenena lufwu mane kukabe kutamani. Mwami Jehova uyoosindula misozi kumasyu oonse.’ (Is. 25:8) Ijwi lya Leza lyaamba kuti ‘mabbuku ayoovwununwa,’ icitondezya kuti aabo ibanoopona ciindi eeco bayooyiisyigwa makani mapya. (Ciy. 20:12) Eelyo nyika noinoobambululwa kuba paradaiso, “bantu baluwa balaiya bululami.”—Is. 26:9.

⁹ Bantu ibayoobusyigwa tabakabetekwi akaambo kazibi zyakakonwa kuli Adamu, pele bayoobetekwa kweelana azibi nzyobayoolisalila kucita. Lugwalo lwa Ciyubunuzyo 20:12 lwaamba kuti: “Bafu bakabetekwa mbuli makani aalembedwe mumabuku, mbuli milimo yabo,” nkokuti, milimo njobayoocita kuzwa ciindi baakubusyigwa. Elo kaka eeci ncitondezyo cabululami, luse alimwi aluyando ndwajisi Jehova! Izyintu zyakaindi zitakkomanisyi zyamubuumi bwamusyule munyika yakaindi “tazikooyooibalukwa limbi nikuba kuyeeyegwa.” (Is. 65:17) Akaambo kamakani mapya alimwi abuumi buzwide zyintu zibotu, tabakakatazyigwi azyintu zibyaabi zyakaindi. Zyintu zyoonse zibi izyakali kubacitikila ziyoolubwa. (Ciy. 21:4) Ciyooba mbubwenya oobu “[aku]nkamu impati yabantu,” ibayoofwutuka Amagedoni.—Ciy. 7:9, 10, 14.

10. (a) Ino buumi munyika mpya iya Leza bunooli buti? (b) Ino ncinzi cikonzya kumugwasya kuti muzumanane kulangisisya bulumbu?

¹⁰ Munyika mpya ya Leza, takukabi kuciswa nokuba kufwa. “Takukooyooba naba omwe akati kabantu banyika uuamba kuti, Ndaciswa.” (Is. 33:24) Mukuya kwaciindi, ibantu bamunyika mpya bayookonzya kubuka lyoonse cifwumo-fwumo kabajisi buzumi bulondokede, kabakkomene kukulangila buumi bwabuzuba oobo. Bayoolangila mulimo uukkomanisya, alimwi akuyanzana abantu ibajisi luyando. Elo kaka buumi oobu mbulumbu bubotu kapati! Mwakulwaizyigwa  kuti mujalule Bbaibbele lyanu kubusinsimi bulembedwe kuli Isaya 33:24 alimwi a 35:5-7. Amusoleke kulibikka mubukkale oobu. Kucita boobu kuyoomugwasya kuti muzumanane kulangisisya bulumbu.

Bamwi Ibatakalangisisya Bulumbu

11. Amupandulule mbobwakali bubotu bulelo bwa Solomoni kumatalikilo.

¹¹ Ciindi twaiya makani aajatikizya bulumbu, tweelede kusoleka canguzu kutegwa tuzumanane kububikkila maanu, buyo-buyo tulakonzya kucileka kubulangisisya. Mucikozyanyo, ciindi Solomoni naakaba mwami wa Israyeli yansiku, cakulibombya wakapaila kuli Leza, wakalomba kuti acikonzye kumvwisya alimwi akuba abupampu kutegwa kababeteka kabotu bantu ba Leza. (Amubale 1 Bami 3:6-12.) Nkakaambo kaako, Bbaibbele lyaamba kuti: “Leza wakapa Solomoni busongo abucenjezu loko loko.” Masimpe, “busongo bwa-Solomoni bwakali kwiinda busongo bwabantu boonse bakujwe abusongo boonse bwaba-Egepita.”—1 Bam. 4:29-32.

12. Ino nkucenjezya kuli buti Jehova nkwaakapede baabo ibakali kuyooba bami mu Israyeli?

¹² Nokuba boobo, kumatalikilo Jehova wakacenjezya kuti kufwumbwa uuyooba mwami, “teelede kulivuzizya imbizi” alimwi akuti “teelede kulivuzizya banakazi, kuti moyo wakwe utaleyi munzila.” (Dt. 17:14-17) Ikuvwuzya mbizi kwakali kuyootondezya kuti mwami wakali kusyoma basikalumaba bakwe kuti bakwabilile cisi muciindi cakusyoma muli Jehova Sikukwabilila. Alimwi ikuvwuzya bamakaintu kwakali kukonzya kuletela ntenda nkaambo bamwi bakali kukonzya kuti bakali kuyoozwa kuzisi zyakali kukomba mituni, alimwi bamakaintu aaba bakali kukonzya kupa mwami kuti azwe munzila yabukombi bwakasimpe ibwa Jehova.

13. Ino mbuti Solomoni mbwaatakakubikkila maanu kucenjezya nkwaakapa Leza?

¹³ Solomoni tanaakazitobela zicenjezyo eezyi.  Muciindi caboobo, wakacita nciconya Jehova ncaakaamba kuti bami tabeelede kucita. Wakaba amabbiza alimwi ankalaki zinji kapati. (1 Bam. 4:26) Wakaba abamakaintu basika ku 700 alimwi abasimamambe basika ku 300, bunji bwabo bakali kuzwa muzisi zyakali afwaafwi zyalo izyakali kukomba mituni. Aaba bamakaintu “bakapambula moyo wakwe kumizimu myeenzu, aboobo moyo wakwe teewakalulama kumeso aa-Jehova.” Solomoni wakatalika kutola lubazu mubukombi busesemya bwakubeja ibwamasi aakali kukomba mituni bwalo bamakaintu bakwe mbobakamuyiisya. Nkakaambo kaako, Jehova wakaamba kuti ‘uyoonyanga Solomoni bwami.’—1 Bam. 11:1-6, 11.

14. Ino ncinzi cakacitika akaambo kakuzanga nkwaacita Solomoni alimwi abana Israyeli?

¹⁴ Solomoni wakaleka kubikkila maanu kucoolwe cilibedelede ncaakapedwe cakwiiminina Leza. Imwami wakabikkila kapati maanu kubukombi bwakubeja. Mukuya kwaciindi, cisi coonse cakazanga, calo icakapa kuti cinyonyoonwe mu 607 B.C.E. Nokuba kuti ba Juda bakapiluka kubukombi bwakasimpe, nokwakainda myaanda yamyaka iili mboibede Jesu wakaamba kuti: “Bwami bwa-Leza buzoonyanzigwa kulindinywe, buzoopegwa musyobo umbi uuzyala micelo yabo.” Cakacitika mbubwenya oobu. Jesu wakaamba kuti: “Amulange! Iŋanda yanu yasyaala kulindinywe mbuli itongo.” (Mt. 21:43; 23:37, 38) Akaambo kakutasyomeka, cisi cakasowa coolwe cilibedelede cakwiiminina Leza wakasimpe. Mu 70 C.E., basikalumamba baku Roma bakanyonyoona munzi wa Jerusalemu atempele lyawo alimwi iba Juda banji ibakasyaala bakatolwa mubuzike.

15. Ino nzikozyanyo nzi zyabaalumi ibakaleka kubikkila maanu kuzyintu zyakali kuyandika kapati?

¹⁵ Judas Iskariote wakali omwe wabaapostolo ba Jesu bali 12. Judas wakali kuswiilila kunjiisyo zibotu zya Jesu alimwi wakaabona maleele ngaakali kucita akaambo kakugwasyigwa amuuya wa Leza uusalala. Pele Judas kunyina naakaubamba moyo wakwe. Wakapedwe mulimo wakulanganya kabbokesi mobakali kubikkila mali aa Jesu alimwi aabaapostolo bali 12. Pele walo ‘wakali mubbi, mbwali ngonguwe wakali kuyobola nkomo yamali, wakali kugwisya aabikwa mumo.’ (Joh. 12:6) Wakali mulyato cakunga limwi wakapangana abapaizi bapati kuti akaabe Jesu mpoonya bakamupe mali aansiliva aali 30. (Mt. 26:14-16) Aumwi wakapa cikozyanyo cibi ngu Dema, imulongwe wamwaapostolo Paulo. Dema tanaakaubamba moyo wakwe. Paulo wakaamba kuti: “Dema wandisowa, nkaambo kakuyanda zintu zyaansi ano.”—2 Tim. 4:10; amubale Tusimpi 4:23.

Ciiyo Kuli Aumwi Wesu

16, 17. (a) Ino kukazyigwa nkotucitikilwa kukatazya buti? (b) Ino ncinzi cikonzya kutugwasya kuzunda kufwumbwa masunko ngayootuletala Saatani?

¹⁶ Babelesi ba Leza boonse beelede kuyeeyesya kujatikizya zikozyanyo zilembedwe mu Bbaibbele, nkaambo twaambilwa kuti: “Aya makani oonse akaba kulimbabo mbuli incenjezyo, akalembwa kuti acenjezye ndiswe nitusikilwa kumamanino aaciindi.” (1 Kor. 10:11) Sunu tupona mumazuba aakumamanino aabweende bwazyintu oobu bubyaabi.—2 Tim. 3:1, 13.

¹⁷ Saatani Diabolosi, leza “waansi ano,” ulizyi kuti “ciindi ncacijisi nciniini buyo.” (2 Kor. 4:4; Ciy. 12:12) Uyoocita kufwumbwa ncakonzya kutegwa asinikizye babelesi ba Jehova kuti baleke kutobela njiisyo zya Bunakristo. Saatani ulayeendelezya nyika, kubikkilizya ambunga zibelesyegwa mukumwaya makani. Nokuba boobo, ibantu ba Jehova balijisi cintu cijisi nguzu kwiinda zyintu zyoonse—“inguzu zigambya.” (2 Kor. 4:7) Tulakonzya kusyoma kuti nguzu zizwa kuli Leza ziyootugwasya kuzunda kufwumbwa masunko ngayootuletela Saatani. Aboobo, tukulwaizyigwa kuti katupaila lyoonse, akusyoma kuti Jehova  ‘uyoobapa Muuya Uusalala aabo ibakumbila kulinguwe.’—Lk. 11:13.

18. Ino tweelede kwiibona buti nyika eeyi?

¹⁸ Alimwi tulayumizyigwa kuzyiba kuti Saatani alimwi abweende bwakwe bwazyintu ziyoonyonyoonwa pele Banakristo bakasimpe bayoofwutuka. “Nyika ilamana, azisusi zyayo, pele oyo uucita makanze aa-Taata ulakalilila kukabe kutamani.” (1 Joh. 2:17) Akaambo kaceeci, inga tiicaba cabusongo kaka ikuti mubelesi wa Leza omwe wayeeya kuti kuli cintu ciinda kubota ikwiinda cilongwe ncajisi a Jehova mubweende bwazyintu oobu! Nyika iino yeendelezyegwa aa Saatani ilamana, pele Jehova watupa mbungano ya Bunakristo yalo iikonzya kugwasya mukukwabilila babelesi bakwe ibasyomeka. Mbobali aafwaafwi akunjila munyika mpya, balakonzya kuba alusyomo mucisyomezyo cakuti: “Basizibi balanyonyooka, pele balangila Jehova mbombabo bayookona nyika.” (Int. 37:9) Aboobo, amubikkile maanu kubulumbu oobu bubotu kapati.

Sena Muciyeeyede?

• Ino Paulo wakalimvwa buti kujatikizya bulumbu mbwaakali kuyootambula?

• Ino aabo ibayoopona anyika mane kukabe kutamani bayoobetekwa kweelana anzi?

• Ino ncintu nzi cabusongo ncomweelede kucita lino?

[Mibuzyo yaciiyo]

[Cifwanikiso icili apeeji 13]

Sena muliyeeyela kutambula bulumbu ciindi nomubala makani aalembedwe mu Bbaibbele?