Ilawil a chukpachtik le siibaloʼ

«[Táan in wilik] in kʼuchul tu xuul utiaʼal in kʼamik le siibaloʼ.» (FILI. 3:14)

1. ¿Baʼax siibalil tu chʼaʼatuklaj u chukpachtik apóstol Pablo?

APÓSTOL Pablo, le kʼaj óolaʼan xan kaʼach bey Saulo tiʼ Tarsooʼ, líikʼ ichil upʼéel familia jach maʼalob yanil. Letiʼeʼ kaʼansaʼab tiʼ u religión le judíoʼob tumen Gamaliel, utúul máak jach u kʼaj óol kaʼach le Leyoʼ (Hch. 22:3). Le oʼolal ku tuklaʼaleʼ jach yaan u bin utsil kaʼach tiʼ Pablo. Baʼaleʼ letiʼeʼ tu xúumpʼattaj le religión tuʼux líikʼoʼ ka tu beetuba cristianoi. Desde teʼ kʼiinoʼob jeʼeloʼ tu chʼaʼatuklaj u chukpachtik le siibal aʼalaʼab u tsʼaʼabal tiʼ tumen Diosoʼ: u kuxtal minaʼan u xuul yéetel u beetik u reyil yéetel u sacerdotei ichil u Reino Dios, le kun gobernartik le túumben Luʼumoʼ (Mat. 6:10; Apo. 7:4; 20:6).

2, 3. ¿Bix u yilik kaʼach Pablo le kuxtal minaʼan u xuul kun yantal teʼ kaʼanoʼ?

² Le baʼax ku yaʼalik Pabloaʼ ku yeʼesikeʼ jach nojoch baʼal u yilik le siibal ku yaʼalik u tsʼáaik Diosoʼ, tu yaʼalaj: «Baʼaleʼ tuláakal le baʼaloʼob jach yaan u tojol in tiaʼal kaʼachoʼ, bejelaʼeʼ kin wilik mix baʼal u [tojoloʼob] tu yoʼolal Cristo. Maas tiʼ leloʼ, tuláakal baʼax ku páajtal u yantal teneʼ kin tukultikeʼ bey jumpʼéel baʼal minaʼan u [tojol] tu tséel le nojoch náajal yaan tiʼ teen in kʼaj óoltmail Cristo Jesús in Yuumtsiloʼ. Tu yoʼolal Cristoeʼ tsʼoʼok in satik tuláakal, sojol in tiaʼal» (Fili. 3:7, 8). Le ka tu kanaj apóstol Pablo baʼax u tukulmaj u beetik Jéeoba yoʼolal wíinikeʼ, kʼuch u naʼateʼ tuláakal le baʼax kʼaʼanan u yilaʼal jeʼex u kaʼantal u xook máak, u ayikʼaltal yéetel u yantal fama tiʼ máakoʼ, mix baʼal u beelal.

³ Desde le kʼiinoʼob jeʼeloʼ tu jach tsʼáaj u yóol u maas kʼaj óolt Jéeoba yéetel u Hijo. Jesuseʼ tu yaʼalaj xan baʼaxten jach kʼaʼanan ka beetaʼak beyoʼ: «Le kuxtal minaʼan u xuuloʼ letiʼ lelaʼ: ka u kʼaj óoltoʼob teech chéen juntúuliliʼ Jajal Dios, yéetel ka u kʼaj óoltoʼob Jesucristo le máax ta túuxtajoʼ» (Juan 17:3). Pabloeʼ jach tu tsʼíiboltaj ka yanak le kuxtal minaʼan u xuul tiʼoʼ, lelaʼ bey tu yeʼesil yoʼolal le baʼax tu yaʼalaj teʼ Filiposiloʼob 3:14: «[Táan in wilik] in kʼuchul tu xuul utiaʼal in kʼamik le siibaloʼ, lelaʼ úuchik u tʼanikoʼon Jajal Dios teʼ kaʼanoʼ tu yoʼolal Cristo Jesús». Jeʼex k-ilkoʼ, tu yilaj u chukpachtik le siibaloʼ: le u kuxtal minaʼan u xuul teʼ kaʼanoʼ yéetel u beetikuba utúul tiʼ u gobernantei tiʼ u Reino Dios.

Kuxtal minaʼan u xuul way Luʼumeʼ

4, 5. ¿Baʼax jatsʼuts siibalil ken u kʼam u millonesi máakoʼob meyajtik Dios bejlaʼeʼ?

⁴ Utiaʼal u maas yaʼabil máaxoʼob meyajtik Diosoʼ le siibal ken u kʼamoʼoboʼ letiʼe kuxtal minaʼan u xuul way Luʼumoʼ, lelaʼ upʼéel baʼax maʼ chéen kunel ka u tsʼáa u yóol máak bin tu paachiʼ (Sal. 37:11, 29). Lelaʼ jach yaan u béeytal tumen Jesuseʼ tu yaʼalaj: «Kiʼ u yóoloʼob le máaxoʼob kabal u yóol u puksiʼikʼaloʼoboʼ, tumen bíin utiaʼaltoʼob le luʼumaʼ» (Mat. 5:5). Kex tiʼ Jesús tsʼaʼan u gobernart le Luʼum jeʼex u yaʼalik Salmos 2:8, yaan uláakʼ 144,000 máakoʼob kun gobernar tu yéetel teʼ kaʼanoʼ (Dan. 7:13, 14, 22, 27). Le uláakʼ tamanoʼob kun kuxtaloʼob way Luʼumoʼ, yaan u gobernartaʼaloʼob tumen le Reino jeʼex u tukulmil Dios «le ka tu beetaj [...] yóokʼol kaaboʼ» (Mat. 25:34, 46). Dioseʼ «maʼ tu tuus», le oʼolal tuláakal baʼax u yaʼalmaj u beetikeʼ jach yaan u béeytal (Tito 1:2). Bey túunoʼ, jeʼel u páajtal k-aʼalik jach jaaj le baʼax tu yaʼalaj Josué tiʼ le israelitaʼoboʼ: «Tsʼoʼok u béeychajal tuláakal baʼax tu [yaʼalaj] Yuumtsil. Mix jumpʼéel [...] pʼáat wa maʼ béeychajiʼ» (Jos. 23:14).

⁵ Teʼ túumben yóokʼol kaaboʼ maʼ kun antal talamiloʼob jeʼex le ku yilaʼal teʼ kʼiinoʼobaʼ. Maʼ kun antal baʼateltáambaloʼob mix uláakʼ  baʼaloʼob kʼaastakiʼ. Mix máak kun muʼyajtik óotsilil, kʼojaʼanil yéetel mix máak kun kíimil. Tuláakal máak kun antal toj óolal tiʼ yéetel le Luʼumaʼ yaan u suʼutul Paraísoi. Le kiʼimak óolal kun antaloʼ jach mix utéen ilaʼak, bey túunoʼ mix máak kun náakal u yóol kuxtaliʼ. ¿Máasaʼ jach jatsʼuts le siibal ku yaʼalik u tsʼáaik Diosoʼ?

6, 7. 1) ¿Baʼaxoʼob tu beetaj Jesús ku yeʼesik baʼax kun ilbil teʼ túumben yóokʼol kaaboʼ? 2) ¿Baʼax jatsʼuts páajtalil kun antal tiʼ le máaxoʼob kun kaʼa kuxkíintbiloʼoboʼ?

⁶ Ka taal Jesús way Luʼumeʼ, tsʼaʼab kiliʼich muukʼ tiʼ tumen Jéeoba utiaʼal ka u beet jujumpʼéel tiʼ le baʼaxoʼob kun ilbil teʼ Luʼum yáanal u Reino Diosoʼ. Le Bibliaoʼ ku yaʼalikeʼ Jesuseʼ tu tsʼakaj utúul máak tsʼoʼok treintaiocho jaʼaboʼob pʼáatak paraliticoi (xokaʼak Juan 5:5-9). Uláakʼ utéeneʼ tu tsʼakaj «juntúul máak chʼóop síijik». Le ka kʼáataʼab tiʼ le máak bix tsʼaʼakikoʼ letiʼeʼ tu yaʼalaj yoʼolal Jesús: «Tiʼ bukaʼaj kʼiin káajak yóokʼol kaabeʼ mix juntéen uʼuyaʼak u tsʼaʼabal u sáasil [...] juntúul máak chʼóop síijik. Wa le máak maʼ taaljaʼan tiʼ [Diosaʼ], mix baʼal jeʼel u páajtal u beetikeʼ» (Juan 9:1, 6, 7, 32, 33). Jeʼex túun k-ilkoʼ, Jesuseʼ béeychaj u beetik milagroʼob yoʼolal le páajtalil tsʼaʼab tiʼ tumen Diosoʼ. Jeʼel tuʼuxak ka xiʼik kaʼacheʼ ku tsʼakik «le máaxoʼob kʼojaʼanoʼoboʼ» (Luc. 9:11).

⁷ Baʼaleʼ Jesuseʼ maʼ chéen páajchaj u tsʼakik le kʼojaʼanoʼob yéetel le paraliticoʼoboʼ, páajchaj xan u kaʼa kuxkíintik le kimenoʼoboʼ. Utéenjeakileʼ utúul chan x-chʼúupal yaan doce jaʼaboʼob tiʼeʼ kíimi, le oʼolal u taataʼobeʼ jach yaachaj u yóoloʼob. Baʼaleʼ ka kʼuch Jesús teʼ tuʼux yanoʼ tu yaʼalajtiʼ: «Líikʼen», le chan x-chʼúupal túunoʼ kaʼa kuxlaji. Chéen máans ta tuukul bix úuchik u kiʼimaktal u yóol u taataʼob bey xan le máaxoʼob iloʼ (xokaʼak Marcos 5:38-42). Le máaxoʼob kun antaloʼob teʼ túumben yóokʼol kaaboʼ yaan u kiʼimaktal u yóoloʼob ken u yiloʼob u líiʼsaʼal u millonesi kimenoʼob, tumen «yaan u kaʼapúut kuxtal le kimenoʼoboʼ, le utstakoʼoboʼ bey xan le kʼasaʼanoʼoboʼ» (Hch. 24:15; Juan 5:28, 29). Tiʼ tuláakloʼobeʼ yaan u yantal u páajtalil u kuxtaloʼob utiaʼal minaʼan u xuul.

8, 9. 1) ¿Baʼax kun úuchul tiʼ le kʼeban tu yáamil le mil jaʼaboʼoboʼ? 2) ¿Baʼax kun meyaj utiaʼal u juzgartaʼal le máaxoʼob kun kaʼa kuxkíintbiloʼoboʼ?

⁸ Le máaxoʼob kun kaʼa kuxkíintbiloʼoboʼ maʼ kun juzgarbiloʼob yoʼolal le baʼaxoʼob tu beetoʼob táanil tiʼ u kíimloʼoboʼ, tumen wa beyoʼ, chéen yaan u kaʼa kuxkíintaʼaloʼob utiaʼal ka xuʼulsaʼaktiʼob (Rom. 6:7). Tu yáamil le Mil Jaʼaboʼoboʼ, le máaxoʼob kun antaloʼob yáanal le Reinooʼ yaan u jach jóoʼskoʼob u yutsil le úuchik u kʼubik u kuxtal Cristooʼ. Jujumpʼíitileʼ yaan u luʼsaʼal le kʼeban yaan tu wíinkliloʼoboʼ tak ken pʼáatak jach mix upʼíit kʼeban yantiʼob (Rom. 8:21). Jéeoba, le máax yaan tuláakal páajtalil tiʼoʼ «bíin u xuʼuls jumpuliʼ le kíimiloʼ, bíin u choʼo u jaʼil u yich tuláakal máak» (Isa. 25:8). Tsʼoʼoleʼ le Bibliaoʼ ku yaʼalikeʼ yaan u jeʼekʼabtaʼal túumben libroʼob, lelaʼ u kʼáat u yaʼaleʼ le máaxoʼob kun pʼáatloʼob kuxtal way Luʼumoʼ yaan u kankoʼob baʼaloʼob túumbentak (Apo. 20:12). Jeʼex kun bin u suʼutul Paraísoi le Luʼumaʼ «wíinikoʼobeʼ, bíin u kʼaj óoltoʼob baʼax [tojil] bejil» (Isa. 26:9).

⁹ Le baʼax kun meyaj utiaʼal u juzgartaʼal le máaxoʼob kun kaʼa kuxkíintbiloʼoboʼ, maʼ letiʼe kʼeban yaan tu wíinkliloʼob kaʼachoʼ, baʼaxeʼ letiʼe baʼax ken u chʼaʼatukult u beetkoʼoboʼ. Apocalipsis 20:12 ku yaʼalik: «Le kimenoʼoboʼ pʼis óoltaʼaboʼob tu yoʼolal le baʼaxoʼob u beetmajoʼobeʼ jeʼel bix tsʼíibtaʼanil tiʼ le libroʼoboʼ», lelaʼ u kʼáat u yaʼaleʼ yaan u juzgartaʼaloʼob yoʼolal le baʼaxoʼob ken u beetoʼob le ken tsʼoʼokok u kaʼa kuxkíintaʼaloʼoboʼ. Lelaʼ ku yeʼesikeʼ Dioseʼ jach toj baʼax ku beetik, jach ku chʼaʼik óotsilil yéetel jach nojoch u yaabilaj. Tuláakal le baʼax tu muʼyajtoʼob táanil tiʼ u kíimloʼoboʼ bíin u tuʼubsoʼob, maʼ bíin u kaʼa kʼaʼajsoʼobiʼ (Isa. 65:17). Yaan u tsʼaʼabaltiʼob túumben tsolnuʼukoʼob, leloʼ yaan u beetik u kiʼimaktal u yóoloʼob, le beetikeʼ maʼ kun kʼaʼajaltiʼob le baʼax tu muʼyajtoʼoboʼ (Apo. 21:4). Lelaʼ bey xan kun úuchul tiʼ le «yaʼabkach máakoʼob» maʼ kun kíimloʼob teʼ Armagedonoʼ (Apo. 7:9, 10, 14).

10. 1) ¿Bix le kuxtal kun ilbil teʼ túumben Luʼumoʼ? 2) ¿Baʼax kun áantkech a chukpacht le siibaloʼ?

¹⁰ Teʼ túumben Luʼumoʼ, «mix juntúul kajnáal bíin u yaʼal: Kʼojaʼanen». (Isa. 33:24).  Mix máak xan kun kíimliʼ. Jeʼex kun bin u máan le kʼiinoʼoboʼ, u kajnáaliloʼob le Luʼumaʼ yaan u maas yantal toj óolal tiʼob yéetel yaan u jach tsʼíiboltik u yilkoʼob upʼéel túumben kʼiin utiaʼal u kankoʼob yaʼab baʼaloʼob. Yaan u kiʼimaktal u yóoloʼob yéetel le meyaj ken u beetoʼoboʼ yéetel yaan u biskubaʼob maʼalob yéetel u maasil. ¿Máasaʼ jach jatsʼuts le baʼaxoʼob kun ilbilaʼ? Utiaʼal maʼ u xuʼulul a tuukul tiʼobeʼ, xok Isaías 33:24 yéetel 35:5-7. Tukult bey táan a wilik u béeytaloʼobeʼ. Lelaʼ le kun áantkech a chukpacht le siibaloʼ.

Xuʼul u binoʼob tu paach le siibaloʼ

11. ¿Baʼax tu kʼáataj Salomón ka káaj u beetik u reyil?

¹¹ Jeʼex tsʼoʼok k-ilkoʼ jeʼel u páajtal u yantaltoʼon le kuxtal minaʼan u xuuloʼ, baʼaleʼ unaj k-kanáantik maʼ u xuʼulul k-bin tu paach jeʼex tu beetil jujuntúul máakoʼob úuchjeakiloʼ. Koʼox tʼaan tiʼ Salomón. Ka káaj u beetik u reyil tu kaajil Israeleʼ, letiʼeʼ tu kʼáataj yéetel kabal óolal ka tsʼaʼabak naʼatil tiʼ utiaʼal u nuʼuktik tubeel le kaajoʼ (xokaʼak 1 Reyes 3:6-12). Le Bibliaoʼ ku yaʼalikeʼ Dioseʼ «tu tsʼáaj tiʼ Salomón yaʼabkach kʼaj óolal yéetel naʼat». Le oʼolaleʼ, u naʼat Salomoneʼ «píitmáan [...] tiʼ u kʼaj óolal le egipcioʼoboʼ yéetel tiʼ le lakʼiniloʼoboʼ» (1 Rey. 4:29-32).

12. ¿Baʼax u yaʼalmaj Jéeoba maʼ unaj u beetik utúul u reyil Israeliʼ?

¹² Jéeobaeʼ u yaʼalmiliʼeʼ, le máax kun tsʼaabil u beet u reyiloʼ «maʼ unaj u yantal yaʼab u tsíiminoʼobiʼ [...]. Mix xan unaj u yantal yaʼab koʼoleloʼob tiʼ», tumen le baʼaloʼobaʼ jeʼel u náachkuntik le rey tiʼ Diosoʼ (Deu. 17:14-17). Utúul rey ku manik yaʼab tsíiminoʼobeʼ ku tsʼáaik naʼatbil maas u kʼubmaj u yóol tiʼ u soldadoʼob ken yanak baʼateloʼob ke tiʼ Jéeoba. Maʼ maʼalob xan ka yaʼabak u yatnoʼobiʼ, tumen maʼ xaaneʼ utúul tiʼ letiʼobeʼ jeʼel u taal tiʼ upʼéel kaaj tuʼux maʼatech u adorartaʼal Jéeobaeʼ, le koʼoleloʼob beyaʼ jeʼel u beetkoʼob u xuʼulul u adorartaʼal Jéeoba tumen le reyoʼ.

13. ¿Baʼaxoʼob tu beetaj Salomón ku bin tu contra baʼax ku yaʼalik Jéeoba?

 ¹³ Salomoneʼ maʼ tu yuʼubaj tʼaaniʼ, baʼaxeʼ tu beetaj le baʼax aʼalaʼan tumen Jéeoba maʼ unaj u beetaʼaloʼ. Tu manaj yaʼab tsíiminoʼob yéetel anchaj yaʼab u soldadoʼob (1 Rey. 4:26). Tsʼoʼoleʼ anchaj 700 u yatnoʼob yéetel 300 utúulal u yéet kajtaloʼob, yaʼab tiʼ letiʼobeʼ tiʼ táanxel luʼumil u taaloʼob. Salomón túuneʼ «beetaʼab u kʼéechel u puksiʼikʼal tumen u yatanoʼob utiaʼal u bin tu paach beetbil [diosoʼob], tumen maʼ jach u [kʼubmuba] kaʼach tiʼ Yuumtsil u [Diosiʼ]», le oʼolal ka máan kʼiineʼ tu xulaj u adorartik Jéeoba. Le beetik Jéeobaeʼ tu yaʼalajtiʼ: «Bíin in kaʼaj in lukʼes tiʼ teech le [reinooʼ]» (1 Rey. 11:1-6, 11).

14. ¿Baʼax úuch tiʼ Salomón yéetel tiʼ u kaajil Israel tumen xuʼul u adorarkoʼob Jéeoba?

¹⁴ Salomoneʼ pʼáat maʼ nojoch baʼal u yilik u beetik u reyil tu kaajil Israeliʼ, le oʼolal joʼopʼ u adorartik uláakʼ diosoʼob. Ka máan kʼiineʼ, u kaajil Israeleʼ joʼopʼ xan u adorartik yaanal diosoʼob, le beetik xuʼulsaʼab tu jaʼabil 607 táanil tiʼ u taal Cristo. Kex le judíoʼob tu kaʼa chʼaʼajoʼoltaj u adorarkoʼob Jéeobaoʼ, ka taal Jesús way Luʼumeʼ tu yaʼalajtiʼob: «Bíin u ka lukʼesbil tiʼ teʼex u [reino] Jajal Dios utiaʼal ka tsʼaʼabak tiʼ le máakoʼob jeʼel u kʼubikoʼob le u yich ku tiaʼalintik le [reinooʼ]». Uláakʼ utéeneʼ Jesuseʼ tu yaʼalajtiʼob: «Ileʼex túun a kajtalileʼexeʼ yaan u x-tokoy kúu[chiltal]» (Mat. 21:43; 23:37, 38). Lelaʼ bey úuchikoʼ, tumen maʼ tu yuʼuboʼob tʼaaneʼ xuʼul u kʼaʼamloʼob tumen Jéeoba bey u kaajaleʼ. Tu jaʼabil 70 teʼ yáax siglooʼ, le romanoʼoboʼ tu xuʼulsoʼob u kaajil Jerusalén yéetel le templooʼ, yéetel yaʼab tiʼ le judíoʼob maʼ kíimsaʼaboʼoboʼ palitsiltaʼaboʼob.

15. Aʼal jujuntúul máaxoʼob maʼ tu kanáantaj u puksiʼikʼaloʼobiʼ.

¹⁵ Beoraaʼ koʼox tʼaan xan tiʼ Judas Iscariote, utúul tiʼ le doce apostoloʼoboʼ. Letiʼeʼ yanchaj u jatsʼuts páajtalil u yuʼubik u kaʼansajoʼob Jesús yéetel tu yilaj le nukuch milagroʼob tu beetaj yéetel u yáantaj le kiliʼich muukʼoʼ. Baʼaleʼ maʼ tu kanáantaj u puksiʼikʼaliʼ. Tiʼ letiʼ tsʼaʼan kaʼach u kanáant le caja tuʼux ku líiʼsik taakʼin Jesús yéetel le apostoloʼoboʼ, baʼaleʼ letiʼeʼ joʼopʼ u yoklik yéetel «u jóoʼsik utiaʼalt le baʼax ku tsʼaʼabal ichi[loʼ]» (Juan 12:6). Úuchik u tsʼíiboltik u yantal yaʼab baʼaloʼob tiʼeʼ, kʼuch tak u kon Jesús tiʼ u nojchil le judíoʼob chéen tu yoʼolal treinta u taakʼinil plataoʼ (Mat. 26:14-16). Uláakʼ máax maʼ tu kanáantaj u puksiʼikʼaleʼ Demas, u yéet kʼaʼaytaj kaʼach apóstol Pablo. Letiʼeʼ tu yaʼalaj: «Demaseʼ tsʼoʼok u xúumpʼattiken tumen tu tsʼíiboltaj [...] u baʼaliloʼob le yóokʼol kaabaʼ» (2 Tim. 4:10; xokaʼak Proverbios 4:23).

Upʼéel baʼax unaj u kanik tuláakal máak

16, 17. 1) ¿Baʼax talamil ku aktáantik le máaxoʼob meyajtik Diosoʼ? 2) ¿Baʼax kun áantkoʼon utiaʼal maʼ k-lúubul tiʼ le táabsajoʼob ku tsʼáaik Satanasoʼ?

¹⁶ Tumen kuxaʼanoʼon tu tsʼook kʼiiniloʼob le kʼasaʼan yóokʼol kaabaʼ, jach kʼaʼanan ka tuukulnakoʼon tiʼ baʼax úuch tiʼ le máaxoʼob ku chʼaʼachiʼitaʼaloʼob teʼ Bibliaoʼ, ichileʼ k-xokik: «Tuláakal lelaʼ úuch tiʼ k-úuchben taataʼob ka tsʼaʼab tiʼ le Kiliʼich Tsʼíiboʼ utiaʼal jumpʼéel kaʼansaj tiʼ toʼon kuxaʼanoʼon tiʼ le u tsʼook kʼiinoʼobaʼ» (1 Cor. 10:11; 2 Tim. 3:1, 13).

¹⁷ Satanás, «u [diosil] le yóokʼol kaabaʼ», u yojel «chéen jumpʼíit kʼiin pʼaatal tiʼ» (2 Cor. 4:4; Apo. 12:12). Le oʼolaleʼ ku beetik tuláakal le ku páajtal utiaʼal u náachkuntik tiʼ Dios le máaxoʼob meyajtikoʼ. Letiʼ nuʼuktik le yóokʼol kaabaʼ, le oʼolal ku meyajtiʼ utiaʼal u beetik u tuukul máak tiʼ baʼaloʼob kʼaastak. Baʼaleʼ tiʼ u kaajal Jéeobaeʼ yaan upʼéel «nojoch páajtalil» áantik (2 Cor. 4:7). Jach k-ojleʼ le nojoch páajtalilaʼ yaan u yáantkoʼon utiaʼal maʼ k-lúubul tiʼ le táabsajoʼob ku tsʼáaik Satanasoʼ. K-ojel xaneʼ Jéeobaeʼ  ku tsʼáaik «le kiliʼich [muukʼ] tiʼ le máaxoʼob kʼáatik» tiʼoʼ, le oʼolal mantatsʼ unaj k-kʼáatiktiʼ (Luc. 11:13).

18. ¿Bix unaj k-ilik le yóokʼol kaabaʼ?

¹⁸ Ku kiʼimaktal xan k-óol k-ojéeltik maʼ kun xáantal ken xuʼulsaʼak u kʼasaʼan yóokʼol kaab Satanás. Le Bibliaoʼ ku yaʼalik: «Le yóokʼol kaaboʼ táan u bin u xuʼulul yéetel tuláakal le kʼaakʼas tsʼíibolaloʼob yaan tu yóokʼoloʼ; baʼaleʼ le máax ku beetik baʼax u káat Jajal Dioseʼ ku pʼáatal utiaʼal kʼiinoʼob minaʼan u xuul» (1 Juan 2:17). Tumen jach naatsʼ yanik u kʼiinil le xuʼulsajiloʼ, jach upuliʼ maʼ unaj k-tuklik wa maas maʼalob le baʼaxoʼob jeʼel u tsʼáaiktoʼon le kʼasaʼan yóokʼol kaab ke tiʼ le utsiloʼob k-kʼamik ikil k-meyajtik Jéeobaoʼ. Le yóokʼol kaabaʼ bey upʼéel barco jach taʼaytak u búululeʼ, baʼaleʼ Dioseʼ u tsʼaamaj le múuchʼulil utiaʼal u kanáantik le máaxoʼob meyajtikoʼ. Bejlaʼeʼ jach taʼaytak u béeytal le baʼax ku yaʼalik le Bibliaaʼ: «Le loolob máakoʼoboʼ bíin tojolchʼintaʼakoʼob, baʼaleʼ le máaxoʼob ku kʼub óolaloʼob tiʼ Yuumtsileʼ bíin utiaʼalintoʼob le luʼumaʼ» (Sal. 37:9). Jach tu jaajileʼ, bejlaʼeʼ maas naatsʼ yanil le Paraísooʼ, le oʼolaleʼ unaj k-beetik tuláakal le ku páajtal utiaʼal k-kʼamik le siibaloʼ.

¿Kʼajaʼan wa tech?

• ¿Bix u yilik kaʼach Pablo le siibal aʼalaʼab u tsʼaʼabaltiʼ tumen Diosoʼ?

• ¿Baʼax kun meyaj utiaʼal u juzgartaʼal le máaxoʼob kun kaʼa kuxkíintbiloʼoboʼ?

• ¿Baʼax maas unaj k-tsʼáaik óol k-beet bejlaʼeʼ?

[U kʼáatchiʼiloʼob le xookoʼ]

[U tsolajil le oochel teʼ táan juʼun 13]

Ken a xok le tekstoʼob ku tʼaan tiʼ le Paraísooʼ, ¿ka máansik wa ta tuukul bey táan a wilikeʼ?