Yufala i Mas Wekap We Tingting Blong Yufala i Klia Gud
Yufala i Mas Wekap We Tingting Blong Yufala i Klia Gud
“Yumi kam klosap finis long taem we ol samting blong wol ya bambae i lus. . . . Yufala i mas wekap we tingting blong yufala i klia gud, . . . nao yufala i save prea.”—1 PITA 4:7.
1. ?Wanem stamba tijing blong Jisas?
TAEM Jisas i stap long wol, stamba tijing blong hem, hemia Kingdom blong God. Jeova bambae i yusum Kingdom ya blong leftemap hae rul blong hem mo mekem nem blong hem i tabu. Jisas i tijim ol disaepol blong oli prea long God se: “Plis, yu mekem kingdom blong yu i kam. Plis yu mekem samting we yu yu wantem i kamaot long wol, olsem we i kamaot long heven.” (Mat. 4:17; 6:9, 10, NW) I no longtaem, Kingdom ya, we hem i wan gavman, bambae i finisim wol ya blong Setan mo i lidim wok blong mekem sua se ol samting we God i wantem oli kamtru long wol. Olsem Daniel i talem, Kingdom blong God “bambae hem i save flatemgud paoa blong ol narafala king [blong tede], nao bambae hem i rul oltaem gogo i no save finis.”—Dan. 2:44.
2. (a) ?Olsem wanem ol man blong Jisas oli save se Jisas i rul finis long Kingdom? (b) ?Wanem narafala samting we saen ya bambae i soemaot?
2 Long tingting blong ol man blong Jisas, Kingdom blong God we bambae i kam, hem i wan impoten samting tumas, nao oli askem se: “?Wetaem bambae ol samting ya oli kamtru? ?Mo wanem saen we bambae i soemaot we yu yu stap mo we en blong fasin blong laef blong wol ya i kam?” (Mat. 24:3, NW) From we ol man oli no save luk wetem prapa ae blong olgeta se Kraes i rul finis long Kingdom long heven, taswe bambae i gat wan saen we oli save luk long wol blong soemaot samting ya. Baebol i tokbaot wan saen we i gat defdefren haf blong hem. From samting ya, ol man blong Jisas we oli laef long taem ya bambae oli luksave se Jisas i rul finis long heven. Mo tu, saen ya i makem stat blong “ol las dei” blong rabis fasin we i stap long olgeta ples blong wol, we Baebol i tokbaot.—2 Tim. 3:1-5, 13, NW; Mat. 24:7-14.
Yumi Mas Wekap Gud Long Ol Las Dei
3. ?From wanem ol Kristin oli mas wekap gud?
3 Aposol Pita i raetem se: “Yumi kam klosap finis long taem we ol samting blong wol ya bambae i lus. From samting ya, yufala i mas wekap we tingting blong yufala i klia gud, mo yufala i mas blokem ol samting we yufala nomo i wantem, nao yufala i save prea.” (1 Pita 4:7) Ol man blong Jisas oli mas wekap gud mo lukluk gud ol samting we oli stap hapen long wol, we i soemaot se Jisas i stap rul olsem king long Kingdom blong God. Mo taem en blong rabis fasin blong wol ya i kam klosap, fasin blong olgeta blong stap wekap gud i mas kam moa impoten bitim ol taem bifo. Jisas i talem long ol disaepol blong hem se: ‘Yufala i mas lukaot gud, from we yufala i no save taem we masta blong haos bambae i kambak [blong i jajem wol blong Setan].’—Mak 13:35, 36.
4. ?Wanem samting we i defren long fasin blong ol man blong Jeova mo ol man blong Setan? (Lukluk bokis.)
4 Olgeta man long wol oli stap long paoa blong Setan, mo oli no kasem save mining blong ol samting we oli stap hapen long wol. Oli no kasem save se Kraes i stap rul olsem King long Kingdom finis. Be ol trufala disaepol blong Kraes oli stap wekap gud mo oli luksave mining blong ol samting we oli hapen long wan handred yia we i pas. Stat long 1925, ol Witnes blong Jeova oli luksave se Wol Wo Wan mo ol trabol we oli kam biaen, oli pruvum se Kraes i stap rul olsem King long Kingdom blong God long heven long 1914. From samting ya, ol las dei blong wol ya we Setan i bos long hem i stat. Plante man we oli gat fasin luksave, maet oli no kasem save from wanem ol trabol ya oli kamaot, be oli luksave se stat long Wol Wo Wan i kam kasem tede, laef long wol i jenis bigwan mo i defren olgeta long laef long wol bifo long wo.—Lukluk bokis ya “Ol Yia Blong Trabol Oli Stat.”
5. ?From wanem yumi mas gohed blong wekap gud?
5 I gat klosap wan handred yia finis we ol trabol we oli bigwan tumas oli stap gohed long olgeta ples blong wol. Hemia i pruvum se yumi stap laef naoia long ol las dei. Yumi gat smol taem nomo i stap bifo we Jeova i givim oda long Kraes blong i lidim ol strong ami blong ol enjel blong agensem wol blong Setan. (Rev. 19:11-21) Ol trufala Kristin oli kasem advaes se oli mas lukaot gud. From samting ya, i impoten we yumi gohed blong lukaot gud taem yumi wet blong luk en blong rabis wol ya. (Mat. 24:42) Yumi mas wekap gud oltaem, mo letem Kraes i lidim yumi blong yumi save finisim wan spesel wok long ful wol.
Wan Wok We i Gohed Long Ful Wol
6, 7. ?Olsem wanem wok blong talemaot Kingdom i kam bigwan moa long ol las dei?
6 Wok we ol man blong Jeova oli mekem, i wan haf blong saen we Baebol i talemaot bifo, we i soemaot se yumi stap long ol las dei blong rabis fasin blong wol ya. Jisas i tokbaot wok ya we bambae i gohed long ful wol, taem hem i tokbaot ol defdefren samting we bambae oli mas hapen long taem blong en. Long profet tok blong hem, hem i talem se: “Gud nius ya blong Kingdom, bambae ol man oli talemaot long olgeta ples long wol, blong oli witnes long hem long fes blong olgeta man, nao biaen bambae en i save kam.”—Mat. 24:14, NW.
7 Tingbaot sam samting we oli hapen we oli joen long profet tok ya blong Jisas. Long 1914, taem ol las dei oli stat, namba blong ol man we oli talemaot gud nius i smol nomo. Stat long taem ya, namba i gru i kam bigwan olgeta. I gat klosap 7,000,000 Witnes blong Jeova we oli prij long olgeta ples blong wol, mo oli stap long bitim 100,000 kongregesen. Antap long hemia, i gat 10,000,000 man we oli joen wetem ol Witnes blong Jeova blong tingbaot Memoriol blong ded blong Kraes long 2008. Hemia klosap wan milian antap long namba blong Memoriol long yia 2007.
8. ?Nating we ol enemi oli traehad blong blokem wok blong prij, from wanem wok ya i gohed strong?
8 !Hemia wan gudfala witnes long saed blong Kingdom blong God we i stap go long ol man long olgeta ples blong wol bifo we en i kam! Witnes ya i gohed nomo, nating we Setan i “rabis god blong wol ya.” (2 Kor. 4:4) Hem i yusum politik, skul mo ol bisnes blong wol, wetem ol toktok we oli mekem blong pulum ol man tru long niuspepa, radio, mo televisin. Taswe, ?from wanem wok blong talemaot gud nius i stap gohed strong moa naoia? Jeova nao i givhan long wok ya. Taswe nating we Setan i traehad blong blokem, be wok ya blong talemaot gud nius blong Kingdom i stap gohed strong.
9. Wok blong talemaot gud nius i karem frut, namba blong ol Witnes i stap kam antap oltaem, mo oli kasem plante moa save. ?From wanem hemia i olsem wan merikel?
9 I tru, wok blong talemaot gud nius blong Kingdom i karem gudfala frut. Namba blong ol Witnes blong Jeova i stap kam antap oltaem, mo oli kasem plante moa save long saed blong Jeova mo stamba tingting blong hem. Yumi save talem se hemia i olsem wan merikel. Wok blong talemaot gud nius i no save gohed sipos God i no givhan long wok ya, mo sipos hem i no lidim mo protektem ol man blong hem. (Ridim Matiu 19:26.) Yumi save sua se from we tabu spirit blong God i stap wok long hat blong ol man we oli stap wekap gud mo we oli glad blong wok, bambae wok ya blong talemaot gud nius i gohed gud gogo kasem we hem i finis, mo “biaen bambae en i save kam.” Dei ya i stap kam hareap tumas.
“Bigfala Trabol”
10. ?Olsem wanem Jisas i tokbaot bigfala trabol we i stap kam?
10 En blong rabis fasin blong wol ya bambae i kam long taem ya we Baebol i kolem “bigfala trabol.” (Rev. 7:14) Baebol i no talem long yumi se trabol ya bambae i longfala olsem wanem, be Jisas i talem se: “Bambae i gat bigfala trabol tumas, we neva man i luk olsem bifo, i stat long taem we God i mekem wol ya, i kam kasem tede. Mo bambae i no moa gat bigfala trabol olsem bakegen samtaem.” (Mat. 24:21) Tingbaot ol trabol we oli bin kamaot bifo, olsem long Wol Wo Tu, we i bin gat samwe 50 kasem 60 milian man oli ded. Be, bigfala trabol we i stap kam bambae i bigwan olgeta. Bambae hem i finis wetem faet ya Amagedon. Long taem ya nao Jeova bambae i sanem ol enjel blong hem oli kam blong spolem evri haf blong ogenaesesen blong Setan long wol.—Rev. 16:14, 16.
11, 12. ?Wanem i makem stat blong bigfala trabol?
11 Profet tok blong Baebol i no talem stret taem we fashaf blong bigfala trabol ya bambae i kamaot, be hem i talem wan bigfala samting we bambae i makem stat blong trabol ya. Hemia taem ol politik paoa oli spolem olgeta giaman skul blong wol. Profet tok blong Baebol long buk blong Revelesen japta 17 mo 18, i tokbaot ol giaman skul olsem wan woman blong rod we i mekem i nogud wetem olgeta politik paoa blong wol. Revelesen 17:16 i soemaot se i no longtaem nao, bambae ol politik paoa “oli no laekem woman ya nating, oli agensem hem. Bambae oli tekemaot olgeta samting we hem i gat, mo bambae oli livim hem i stap we i neked nomo. Mo bambae oli kakae ol mit blong bodi blong hem, nao bambae oli bonem hem long faea blong spolem hem olgeta.”
12 Long stret taem blong hem, God bambae i “putum long tingting blong olgeta [ol lida blong politik], blong oli mekem olsem we hem i wantem” blong spolem olgeta giaman skul. (Rev. 17:17) Yumi save talem se trabol ya i kamaot long God nomo. Hemia jajmen blong hem agensem ol skul we oli gat tu fes. Longtaem finis i kam oli stap tijim ol man long ol giaman tijing we oli no laenap nating wetem ol samting we God i wantem, mo oli stap kilim i ded ol man blong hem. Olgeta man long wol oli no luksave trabol we i stap kam blong spolem ol giaman skul ya. Be ol trufala man blong Jeova oli save samting ya. Long ol las dei ya, oli stap talemaot samting ya long ol man.
13. ?Wanem samting i soem se trabol blong olgeta giaman skul bambae i hapen kwiktaem nomo?
13 Bambae ol man oli sapraes tumas blong luk we ol giaman skul oli lus. Profet tok blong Baebol i soemaot we ‘ol king blong wol’ bambae oli tokbaot trabol ya se: “!O, sore we sore tumas . . . long wan aoa nomo, yu kasem panis blong yu!” (Rev. 18:9, 10, 16, 19) Taem Baebol i yusum tok ya “wan aoa,” hem i stap soem we trabol ya bambae i hapen kwiktaem nomo.
14. ?Taem ol enemi blong Jeova oli agensem ol man blong hem, God bambae i mekem wanem?
14 Yumi kasem save se afta we olgeta giaman skul oli lus, bambae Setan i agensem ol man blong Jeova, we oli wok longtaem blong talemaot ol jajmen blong Jeova. (Esik. 38:14-16) Bifo we ol enemi blong Jeova oli faet agensem ol man blong hem, bambae oli mas fesem Jeova we hem i promes finis blong lukaot gud long ol man blong hem. Jeova i talem se: “Mi talemaot we long paoa blong kros blong mi, long dei ya, graon blong kantri ya bambae i seksek we i bitim mak. . . . Nao bambae oli savegud we mi mi Hae God [“Jeova,” NW].” (Ridim Esikel 38:18-23.) Long Baebol, God i talem se “taem wan man i kilim yufala [ol trufala man blong hem], i olsem we man ya i kilim ae blong mi stret.” (Sek. 2:8) Taswe taem ol enemi blong God oli faet agensem ol man blong Jeova, Jeova bambae i mekem wan samting. Bambae hem i tekem wan aksen we i statem lashaf blong bigfala trabol, hemia Amagedon. Ol strong enjel we Kraes i lidim olgeta, bambae oli mekem jajmen blong Jeova i kamtru long wol blong Setan.
?Samting Ya i Mas Mekem Wanem Long Yumi?
15. ?Save we yumi gat long saed blong en blong wol ya we i stap kam klosap, i mas mekem wanem long yumi?
15 ?Olsem wanem save ya se en blong rabis fasin blong wol ya i stap kam hareap, i mas gat paoa long yumi? Aposol Pita i talem se: “From we olgeta samting ya oli mas lus olsemia, !yufala i mas kam wanem kaen man long ol wok blong fasin tabu mo ol wok blong fasgud long God!” (2 Pita 3:11, NW) Ol tok ya oli soem long yumi se i impoten tumas blong lukaot se fasin blong yumi i laenap wetem samting we God i wantem, mo blong mekem ol wok we oli soemaot long laef blong yumi se yumi fasgud long God. Hemia i soem we yumi lavem Jeova. Yumi mas traehad blong talemaot gud nius blong Kingdom, hemia wan wok we yumi mas mekem bifo we en i kam. Pita i raetem se: “Yumi kam klosap finis long taem we ol samting blong wol ya bambae i lus. From samting ya, yufala i mas wekap we tingting blong yufala i klia gud, . . . nao yufala i save prea.” (1 Pita 4:7) Yumi kam klosap moa long Jeova mo yumi soem lav long hem, taem yumi askem hem oltaem long prea blong yusum tabu spirit mo kongregesen blong hem long wol blong lidim yumi.
16. ?From wanem yumi mas folemgud advaes blong God?
16 Long ol hadtaem naoia, i gud yumi folem advaes we i kamaot long Tok blong God, se: “Yufala i mas lukaot gud long ol fasin blong yufala. Bambae yufala i no mekem fasin blong man we i no gat hed. Yufala i mas mekem fasin blong man we i waes. Yufala i mas yusum evri janis we yufala i kasem blong mekem ol gudfala wok, from we naoia, ol fasin nogud oli gat paoa.” (Efes. 5:15, 16) Naoia, rabis fasin i stap kam antap bitim olgeta taem bifo. Setan i stap stanemap plante samting we oli save blokem ol man blong Jeova blong oli no moa mekem wok blong hem, no blong mekem oli bisi long ol narafala samting. Yumi ol man blong God yumi save samting ya, mo yumi no wantem eni samting i blokem yumi blong yumi no moa fasgud long God. Yumi save tu long ol samting we i no longtaem bambae oli kamtru, mo yumi trastem Jeova mo ol stamba tingting blong hem.—Ridim 1 Jon 2:15-17.
17. Tokbaot filing blong olgeta we oli pastru long Amagedon taem oli luk ol dedman oli laef bakegen.
17 I no longtaem, gudfala promes we God i talem blong mekem ol dedman oli laef bakegen, bambae i kamtru. “God bambae i mekem olgeta man we oli ded oli laef bakegen, ol man we oli stret, wetem ol man we oli no stret.” (Wok 24:15) Traem luk wan strong promes ya: “!God bambae i mekem olgeta man we oli ded oli laef bakegen!” !Yumi suagud long samting ya from we Jeova i talem tok ya! Aesea 26:19 i talem promes ya i se: “Ol man blong yumi we oli ded, oli stap slip long beregraon, bambae oli laef bakegen. . . . Olgeta ya bambae oli wekap, oli glad, oli stap singsing. . . . graon i kam sofsof, i kam niuwan bakegen, long sem fasin, Hae God bambae i mekem olgeta ya oli laef bakegen.” Profet tok ya i kamtru fastaem taem God i mekem ol man blong hem bifo oli gobak long kantri blong olgeta. Samting ya i halpem yumi blong trastem se ol promes ya bambae oli kamtru fulwan long niufala wol. !Ol man we oli laef bakegen long ded bambae oli joen wetem ol famle we oli laekem olgeta tumas. !Hemia i wan taem blong bigfala glad! Yes, klosap nao wol blong Setan bambae i lus, mo niufala wol blong God i kam. !I impoten tumas we yumi wekap gud oltaem!
?Yu Yu Tingbaot?
• ?Wanem stamba tijing blong Jisas?
• ?Wok blong talemaot gud nius blong Kingdom i bigwan olsem wanem tede?
• ?From wanem i impoten blong stap wekap gud?
• ?Wanem samting long promes blong Ol Wok 24:15 we i leftemap tingting blong yu?
[Kwestin]
[Bokis blong pija long pej 16]
Ol Yia Blong Trabol Oli Stat
The Age of Turbulence: Adventures in a New World. Hemia nao stamba tok blong buk we Alan Greenspan i raetem long 2007. Hem i jeaman blong Federal Reserve Board blong Yunaeted Stet, blong klosap 20 yia. Hem i lukaot mo jekemap ol mane blong sentrol bang blong kantri ya. Masta Greenspan i makem se ol samting we oli hapen long wol bifo 1914 mo afta long yia ya i defren olgeta:
“Ol ripot we ol man oli raetem long taem ya bifo long 1914, oli soem se olgeta samting oli ron gud. Ol man oli gat moa respek long narafala man, oli gat ol niufala save blong lidim laef blong olgeta mo blong wokem ol niufala mesin. Laef blong ol man i stap kam moa gud oltaem, i luk olsem se klosap i kam stretgud olgeta. Long ol yia 1800, ol nogud fasin blong mekem man i wok slef, i finis. Mo i luk olsem we ol raf fasin oli stap go daon . . . Long ol yia 1800, ol niufala save oli kam antap long ful wol. Ol man oli wokem ol rod we tren i pas long hem, telefon, lektrik, sinema, ol trak mo ol samting we oli yusum long haos, olsem aesbokis mo mesin blong wasem klos. Yumi no save talemaot evri samting. Save blong man long saed blong meresin i kam antap, ol man oli stat blong kakae moa ol gudfala kakae we i givhan long bodi, mo oli faenem ol defdefren rod blong mekem we moa man oli save kasem klin wota. From samting ya, ol man oli laef longtaem moa . . . Olgeta man evriwan oli ting se laef bambae i kam moa gud.”
Be . . . “Wol Wo Wan i kam nao hem i spolem gudfala fasin blong laef blong ol man, mo hem i spolem respek we man i gat long narafala. I tru, Wol Wo Tu i kilim plante moa man i bitim faswan faet blong wol, be faswan faet ya nao i spolem gudfala tingting we i bin stap long wol. Mi no save fogetem olgeta samting we oli hapen long ol yia bifo Wol Wo Wan, i luk olsem we fiuja blong olgeta man long wol bambae i gud nomo, i no save gat wan samting i blokem olgeta blong oli gohed gud. Tede, tingting blong yumi long saed blong fiuja, i defren olgeta long hemia blong wan handred yia bifo, be ating i stap laenap lelebet wetem ol samting we oli rili hapen naoia. ?Olsem wanem? ?Fasin we man i fraet bitim mak, fasin blong wol blong kam hot moa, mo tingting blong ol haeman we i stap kam strong bakegen blong mekem i gud long ol man, bambae oli mekem sem samting long wol tede olsem Wol Wo Wan i bin mekem long wol bifo? I no gat wan man i suagud long saed ya.”
Masta Greenspan i tingtingbak long taem ya we hem i bin go long yunivesiti. Hem i tingbaot wan tok blong wan tija blong Ekonomiks we nem blong hem Benjamin M. Anderson (1886-1949): “Ol man we oli rimemba mo oli gat save se laef i olsem wanem bifo long Wol Wo Wan, oli tingting bak long ol hapi taem ya mo oli sore long hem. Afta long Wol Wo Wan, ol man oli no moa harem se oli sef.”—Economics and the Public Welfare.
Semfala toktok i kamaot long buk ya A World Undone, we Gerald J. Meyer i raetem long 2006. Yumi ridim se: “Plante taem ol samting we oli hapen long histri oli ‘jenisim evri samting.’ Hemia nao samting we Bigfala Faet [blong 1914-1918] i mekem. Faet ya i rili jenisim evri samting: i no ol kantri raonabaot nomo, no ol gavman nomo mo fiuja blong ol neson, be, tingting blong ol man long saed blong wol ya mo long saed blong olgeta wan, i jenis bigwan. I luk olsem se faet ya i statem wan niufala wol we i no moa sem mak nating long wol bifo.”
[Tok blong pija long pej 18]
Long Amagedon Jeova bambae i yusum ol strongfala enjel blong hem