Annan “en lespri vizilan”

“Lafen tou keksoz i pros. . . . [annan] en lespri vizilan pour ou kapab priye.”—1 PYER 4:7.

1. Lansennyman Zezi ti baze lo kwa?

LER Zezi Kri ti lo later son lansennyman ti baze lo Rwayonm Bondye. Zeova pou zistifye son drwa pour dirize konman souvren iniversel e sanktifye son non par mwayen sa Rwayonm. I pour sa rezon alor ki Zezi ti ansenny son bann disip pour priy Bondye dan sa fason: “Ki ou Renny i ganny etabli[r]; Ki ou lavolonte i ganny akonpli[r] lo later parey dan lesyel.” (Mat. 4:17; 6:9, 10) Tre byento, Rwayonm Bondye, pou met en lafen avek lemonn Satan e apre i pou fer sir ki lavolonte Bondye i ganny fer lo later antye. Parey Danyel ti predir, Rwayonm Bondye “pou kraz e met en lafen avek tou sa bann rwayonm [ki egziste ozordi], e li menm i pou dire pour en letan endefini.”—Dan. 2:44.

2. (a) Ki mannyer bann disip Zezi ti pou konnen ki Zezi ti’n vin o pouvwar dan Rwayonm Bondye? (b) Ki sa lot keksoz sa siny ti pou endike?

² Vi ki pour bann disip Zezi, i ti vreman enportan ki Rwayonm Bondye i ganny etablir, zot ti demann li “ki siny ki pou endik” son “[“prezans,” NW] ek lafen” sa sistenm? (Mat. 24:3) I ti pou annan en siny ki ti pou evidan pour bann imen lo later menm si ler Zezi ti pou vin o pouvwar dan Rwayonm Bondye, personn pa ti pou vwar avek zot lizye. Sa siny ti pou annan plizyer laspe parey ti’n ganny predir dan Lekritir. Alors, bann disip Zezi ki ti pou vivan dan sa letan ti pou kapab konnen ki Zezi ti’n konmans dirize dan lesyel. Sa ti pou osi en lendikasyon ki sa peryod letan ki Labib i apel “bann dernyen zour” sa move lemonn ki partou, ti’n konmanse.—2 Tim. 3:1-5, 13; Mat. 24:7-14.

Annan en lespri vizilan dan bann dernyen zour

3. Akoz bann Kretyen ti pou bezwen reste vizilan?

³ Zapot Pyer ti ekrir: “Lafen tou keksoz i pros. Pour sa rezon, viv en fason rezonnab avek en lespri vizilan pour ou kapab priye.” (1 Pyer 4:7) Bann disip Zezi ti pou bezwen  reste vizilan, e vey byen bann levennman mondyal pour zot kapab konnen kan ki Zezi ti pou’n vin o pouvwar dan Rwayonm Bondye. Zot ti pou montre en pli gran vizilans anmezir sa move lemonn i apros ver son lafen. Zezi ti dir avek son bann disip: “Veye alor, akoz zot pa konnen kan zot met pou arive [pour egzekit zizman lo lemonn Satan].”—Mark 13:35, 36.

4. Ki mannyer bann dimoun ki form parti lemonn Satan ek bann serviter Zeova i vwar sa bann levennman ki pe arive? (Enkli sa bwat.)

⁴ Bann dimoun an zeneral i anba dominasyon Satan, e zot pa’n veye avek bi pour konpran sinifikasyon bann levennman mondyal. Zot pa’n rekonnet ki Kris i la prezan dan en fason envizib e ki i’n vin o pouvwar dan Rwayonm Bondye. Me bann vre disip Kris in reste vizilan e zot in konpran vre sinifikasyon sa ki’n arive dan sa syek ki’n pase. Depi 1925, bann Temwen Zeova ti rekonnet ki Premye Lager Mondyal ek bann levennman ki ti swiv, ti bann laprev konvenkan ki Kris ti’n konmans dirize dan son Rwayonm dan lesyel an 1914. Alor, bann dernyen zour sa move lemonn anba dominasyon Satan ti’n konmanse. Bokou dimoun ki obzerv byen, menm si zot pa konn sinifikasyon sa bann levennman, zot rekonnet sa gran diferans ant sa letan ki’n egziste avan sa Premye Lager Mondyal ek sa letan apre lager.—Vwar sa bwat “Lepok enstabilite in konmnanse.”

5. Akoz i vreman enportan ki nou kontinyen annan en lespri vizilan?

⁵ I fer pros en syek aprezan ki bann levennman sokan ki pe arive dan lemonn antye, i montre ki nou pe viv dan bann dernyen zour. I reste en ptigin letan avan ki Zeova i donn lord Kris pour diriz bann lanz pwisan pour lager kont lemonn Satan. (Rev. 19:11-21) Bann vre Kretyen in ganny demande pour kontinyen veye. Alor, i vreman enportan ki nou kontinyen veye anmezir ki nou pe esper avek enpasyans lafen sa sistenm. (Mat. 24:42) Nou bezwen kontinyen veye, e nou bezwen akonplir en travay spesifik lo later antye anba gidans Kris.

 En travay mondyal

6, 7. Ki progre in annan dan travay predikasyon dan sa bann dernyen zour?

⁶ Travay ki bann serviter Zeova i sipoze fer, ti ganny predir parmi sa siny ki ti pou endike ki nou pe viv dan bann dernyen zour sa move lemonn. Zezi ti koz lo sa travay mondyal ler i ti nonm diferan keksoz ki ti pou arive dan letan lafen. Dan son profesi i ti osi fer resorti sa deklarasyon enportan: “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.”—Mat. 24:14.

⁷ Annou egzamin serten fe ki relye avek sa laspe dan sa profesi ki Zezi ti fer. Lakantite dimoun ki ti pe pres sa bon nouvel ti vreman ptigin ler bann dernyen zour ti konmanse an 1914. Aprezan sa sif in ogmant en kantite. I annan plis ki 7,000,000 Temwen Zeova ki pe prese lo later antye, sorti dan plis ki 100,000 kongregasyon. I ti osi annan 10,000,000 dimoun an plis ki ti zwenn avek bann Temwen Zeova pour obzerv Memoryal lanmor Kris an 2008. Sa ti en ogmantasyon remarkab plis ki lannen presedan.

8. Akoz lopozisyon pa’n kapab anpes sa travay predikasyon reisi?

⁸ Pa en gran temwannyaz pe ganny donnen lo Rwayonm Bondye dan tou nasyon avan lafen sa sistenm! Sa pe arive malgre ki Satan i “bondye . . . sa syek.” (2 Kor. 4:4) Tou sa ki annan pour fer avek politik, larelizyon, ek bann eleman komersyal dan sa lemonn ensi ki son mwayen pour transmet bann propagann, i ganny enfliyanse par li. Me alor, kwa ki fer sa travay predikasyon reisi dan en fason ekstraordiner? Sa i akoz sipor Zeova. Anfet, sa travay predikasyon Rwayonm i kontinyen ganny fer dan en fason ekstraordiner malgre zefor Satan pour aret li.

9. Akoz nou prosperite spirityel i kapab ganny apele en mirak?

⁹ Sikse dan sa travay predikasyon ensi ki logmantasyon ek prosperite pep Zeova lo plan spirityel i kapab ganny dekrir konman en mirak. I pa ti pou posib pour fer sa travay  predikasyon san sipor Bondye, ki enkli gidans ek proteksyon pour son pep. (Lir Matye 19:26.) Nou kapab asire ki lefet ki lespri sen Bondye i annan en lefe lo leker bann dimoun ki reste vizilan e ki anvi servi li, sa travay predikasyon pou kontinyen ganny fer avek sikse ziska ki i terminen “e apre sa, lafen pou arive.” Sa letan pe aprose byen vit.

“Sa gran ladetres”

10. Ki mannyer Zezi ti dekrir sa gran ladetres ki pe vini?

¹⁰ Lafen sa move sistenm pou vini dan sa letan ki nou apel “sa gran ladetres.” (Rev. 7:14, NW) Labib pa dir nou ki kantite letan i pou dire, me Zezi ti dir: “Sa pou en lepok gran [“ladetres,” NW], pli terib ki tou sa ki’n deza annan avan, depi konmansman lemonn ziska konmela, e pa pou zanmen ariv ankor.” (Mat. 24:21) Ler nou egzamin sa ladetres ki sa lemonn ti eksperyanse, parey sa Dezyenm Lager Mondyal kot apepre 50 a 60 milyon dimoun ti perdi zot lavi, sa gran ladetres pou enn ki pou vreman terib. I pou ariv lo son pik avek sa lager Armagedon. Sa i sa moman kot Zeova pou anvoy son bann lanz pwisan pour detrir tou tras lorganizasyon Satan lo later antye.—Rev. 16:14, 16.

11, 12. Ki levennman ki pou endike ki gran ladetres in konmanse?

¹¹ Profesi Labib pa donn nou en dat pour konmansman premye letap sa gran ladetres, menm si i dir nou ki levennman ekstraordiner ki pou endike kan i pou konmanse. Sa levennman i destriksyon tou fo larelizyon par bann pouvwar politik. Dan bann profesi Labib ki trouve dan Revelasyon sapit 17 ek 18, fo larelizyon i ganny konpare avek en prostitye ki’n annan relasyon imoral avek sistenm politik lo later. Revelasyon 17:16 i montre ki sa letan pou vini byento kot sa bann eleman politik “pou ay sa prostitye. Zot pou depouy li avek tou sa ki i posede e kit li touni. Zot pou devor son laser e bril li avek dife.”

¹² Kan i pou lemoman pour sa arive, Bondye pou “plas dan zot leker [sa bann dirizan politik] [son] lavolonte pour akonpli[r] son plan” pour detrir tou fo larelizyon. (Rev. 17:17) Se pour sa ki nou dir ki sa destriksyon i sorti kot Bondye. I son zizman kont bann larelizyon ipokrit, ki pandan tou sa letan in ansenny bann doktrin ki pa annakor avek lavolonte Bondye e ki’n persekit son bann serviter. Dimoun dan lemonn an zeneral pa pe ekspekte ki fo larelizyon pou ganny detrir byento. Me bann serviter fidel Zeova i konnen ki sa pou arive. Pandan sa bann dernyen zour, zot pe koz avek dimoun konsernan sa destriksyon.

13. Kwa ki endike ki lafen fo larelizyon pou ariv ase vit?

¹³ Bann dimoun pou soke ler zot pou vwar fo larelizyon ganny detrir. Konsernan sa destriksyon, profesi Labib i montre ki menm serten “lerwa later” pou dir: “Maler! Ki gran maler, . . . dan [enn erdtan] ou’n fini resevwar ou pinisyon.” (Rev. 18:8, 10, 16, 19) Labib i servi sa lekspresyon ‘enn erdtan’ pour montre ki sa levennman pou ariv ase vit.

14. Ler bann lennmi Zeova pour finalman atak son bann serviter, ki mannyer Bondye pou reazir?

¹⁴ Nou konpran ki en pe letan apre destriksyon fo larelizyon, bann serviter Zeova ki pe anons son mesaz zizman pou ganny atake. (Ezek. 38:14-16) Kan sa latak pou konmanse, bann atakan pou bezwen afront Zeova, ki’n promet ki i pou protez son pep fidel. Zeova i  dir: “Dan mon lakoler, dan mon gran lakoler, fodre ki mon koze. . . . E zot pou bezwen konnen ki mwan mon Zeova.” (Lir Ezekyel 38:18-23.) Dan son Parol, Bondye i dir “Sa ki pe tous ou [son bann serviter fidel], pe tous mon kannet lizye.” (Zeka. 2:8) Alor ler son bann lennmi pou konmans atak son bann serviter lo later antye, Zeova pou reazir. I pou azir, e sa pou anmenn nou ver sa dernyen letap dan sa gran ladetres, setadir Armagedon. Anba lord Kris, bann lanz pwisan pou egzekit zizman kont lemonn Satan.

Ki lefe sa i devret annan lo nou

15. Vi ki nou konnen ki lafen sa sistenm i pros ki lefe sa i devret annan lo nou?

¹⁵ Vi ki nou konnen ki lafen sa move lemonn pe aprose byen vit, ki lefe sa i devret annan lo nou? Zapot Pyer ti ekrir: “Parski tousala pou ganny detri[r], ki kalite lavi zot devre viv? Zot devre anmenn en lavi sen e annan respe pour Bondye [oubyen “viv en lavi ki montre devosyon pour Bondye,” NW].” (2 Pyer 3:11) Sa bann parol i met lanfaz lo sa nesesite pour vey byen, pour fer sir ki nou kondwit i an armoni avek bann prensip Bondye, e ki nou anmenn en lavi sen ki montre nou devosyon pour li, ki reflekte nou lanmour pour Zeova. Viv en lavi koumsa i enkli fer tou nou posib pour pres sa bon nouvel lo Rwayonm avan ki lafen i vini. Zapot Pyer ti osi ekrir: “Lafen tou keksoz i pros. . . . [Annan] en lespri vizilan pour ou kapab priye.” (1 Pyer 4:7) Nou apros avek Zeova e demontre nou lanmour pour li si nou toultan priye pour demann li gidans atraver son lespri sen ek son kongregasyon dan lemonn antye.

16. Akoz nou bezwen swiv byen konsey Bondye?

¹⁶ Dan sa letan kritik ki nou pe viv ladan, nou bezwen byen swiv sa konsey ki sorti dan Parol Bondye: “Fer byen atansyon ki mannyer zot viv. Pa viv konman bann dimoun inyoran, me konman bann dimoun saz. Servi byen tou bann lokazyon ki prezant devan zot, parski sa letan ki nou pe viv ladan i move.” (Efe. 5:15, 16) I annan plis mesanste ozordi ki okenn lezot letan dan listwar. Satan i envant en kantite keksoz pour anpes dimoun fer lavolonte Bondye oubyen pour senpleman distrer zot. Konman bann serviter Bondye nou konn sa tre byen, e nou pa kapab les okenn keksoz fer nou kas nou fidelite avek Bondye. Nou osi konn sa ki pou arive tre byento, e nou annan konfyans dan Zeova ek son plan.—Lir 1 Zan 2:15-17.

17. Eksplike ki mannyer bann sirvivan Armagedon pou reazir ler bann ki’n mor pou resisite.

¹⁷ Sa zoli promes ki Bondye in fer pour redonn lavi bann ki’n mor pou ganny akonplir, akoz “tou dimoun bon konman move, [pou] resisite.” (Akt 24:15) Remarke ki mannyer Labib i met lanfaz lo sa promes: ‘Tou dimoun [pou] resisite!’ Napa okenn dout konsernan sa akoz Zeova in donn son parol! Dan Izai 26:19 i promet: “Ou bann mor pou viv. . . . Leve e kriye avek lazwa, zot ki reste dan lapousyer! . . . Menm bann ki napa lafors dan lanmor, later pou donn zot nesans.” Sa bann parol ki ti ganny son premye lakonplisman ler pep Bondye dan letan pase ti retourn dan zot pei, i donn nou konfyans ki byento sa promes pou ganny son vre lakonplisman dan nouvo lemonn. Pa i pou vreman annan gran lazwa kan sa bann ki’n resisite pou rezwenn bann dimoun ki zot ti kontan! Wi, lemonn Satan i pros pour fini, e nouvo lemonn Bondye osi i vreman pros. Pa i vreman enportan pour kontinyen annan en lespri vizilan!

Eski ou rapel?

• Lansennyman Zezi ti baze lo kwa?

• Ziska ki degre travay predikasyon Rwayonm in ganny fer ozordi?

• Akoz i vreman enportan pour annan en lespri vizilan?

• Kwa ki ou trouv ankourazan dan sa promes dan Akt 24:15?

[Kestyon]

[Box/​Picture on page 16, 17]

LEPOK ENSTABILITE IN KONMANSE

Lannen 2007, Alan Greenspan ti fer sorti en liv ki annan pour tit The Age of Turbulence: Adventures in a New World. Pour preski 20-t-an, i ti tyermenn United States Federal Reserve Board, ki sirvey tou tranzaksyon sistenm banker sa pei. Greenspan i fer resorti sa diferans remarkab ki i annan ant sityasyon lemonn avan 1914 e sa ki ti arive apre:

“Dapre tou bann rapor, i paret ki lemonn avan 1914 ti pe touzour al annavan, kot sivilite ek sivilizasyon imen ti tre o nivo; i sanble ki sosyete imen ti’n kapab vin parfe. Diznevyenm syek ti’n anmenn en lafen avek lesklavaz detestab. I paret ki vyolans ti pe diminyen. . . . Pandan diznevyenm syek, dan lemonn antye ti annan bann progre dan domenn teknolozi e sa ti anmenn laparisyon semen tren, telefonn, lalimyer elektrik, sinema, loto e plizyer lekipman elektronik pour lakaz ki tro bokou pour mansyonnen. Resers medikal ensi ki amelyorasyon dan nitrisyon e distribisyon delo trete ti’n depas ekspektasyon . . . Tou dimoun dan lemonn ti krwar ki sa progre ti pou kontinyen.”

Me . . . “Premye Lager Mondyal ti pli detrir sivilite ek sivilizasyon imen ki Dezyenm Lager Mondyal ki li i ti pli destriktif lo kote fizik: sa konfli pli boner ti detrir en lide. Mon pa kapab oubliy bann lannen avan Premye Lager Mondyal kot lavenir limanite ti paret pe fer progre byen vit e san okenn limit. Ozordi nou vwar keksoz konpletman diferan konpare avek en syek pase, petet nou en pe pli anliny avek larealite. Eski terorism, lesofman later ouswa bann revolisyon politik pou fer parey avek sa lepok progre ek mondyalizasyon, ki Premye Lager Mondyal ti fer avek sa lemonn avan sa lager? Personn pa vreman konn larepons.”

Greenspan ti rapel komanter ki son profeser lo lekonomi Benjamin Anderson ti fer kan i ti ankor liniversite (1886-1949): “Bann ki annan laz pour rapel e konpran ki mannyer lemonn avan Premye Lager Mondyal ti ete i sagren ki sa lepok in fini. Sa letan ti annan en serten degre sekirite ki pa ti’n zanmen egziste oparavan.”—Economics and the Public Welfare.

Sa liv ki annan pour tit A World Undone par Gerald Meyer ki ti ganny pibliye lannen 2006 i tonm lo preski menm konklizyon. Nou lir: “I souvan ganny dir ki bann levennman istorik ‘in sanz tou keksoz.’ Pour enn fwa, sa i vre dan ka sa Gran Lager [1914-1918]. Sa lager ti vreman sanz tou keksoz: pa zis frontyer, pa zis gouvernman ek desten bann nasyon, me lafason ki bann dimoun i vwar lemonn e zot lekor depi sa letan. I konmsi nou’n konpletman separe avek sa lemonn avan, i’n kree en lemonn modern ki pa parey sa lemonn stab ki ti egziste avan li.”

[Portre lo paz 18]

Zour Armagedon, Zeova pou anvoy son bann lanz pwisan