Magbantay Kamo!
Magbantay Kamo!
“Ang katapusan sang tanan nga butang malapit na. . . . Mangin mabinantayon may kaangtanan sa mga pangamuyo.”—1 PED. 4:7.
1. Ano ang tema sang panudlo ni Jesus?
SANG yari si Jesucristo sa duta, ang tema sang iya panudlo amo ang Ginharian sang Dios. Paagi sa sini nga Ginharian, ibindikar ni Jehova ang iya pagkasoberano sa bug-os nga uniberso kag pakabalaanon ang iya ngalan. Gani, gintudluan ni Jesus ang iya mga disipulo nga mangamuyo sa Dios: “Magkari ang imo ginharian. Matuman ang imo kabubut-on sa duta, subong sang sa langit.” (Mat. 4:17; 6:9, 10) Sa indi madugay, ini nga Ginharian magalaglag sang kalibutan ni Satanas kag magadumala sa paghimo sang kabubut-on sang Dios sa bug-os nga duta. Subong sang gintagna ni Daniel, ang Ginharian sang Dios ‘magadugmok kag magapapas sining tanan nga ginharian [karon] kag ini magapadayon sa gihapon.”—Dan. 2:44.
2. (a) Paano mahibaluan sang mga sumulunod ni Jesus nga nagagahom na sia sa iya Ginharian? (b) Ano pa ang iban nga ginapakita sang tanda?
2 Bangod ang pag-abot sang Ginharian sang Dios importante gid para sa mga sumulunod ni Jesus, namangkot sila sa iya: “Ano ang mangin tanda sang imo presensia kag sang katapusan sang sistema sang mga butang?” (Mat. 24:3) Ang paggahom ni Cristo sa iya Ginharian indi makita diri sa duta, gani may ihatag nga kitaon nga tanda. Ini nga tanda may nanuhaytuhay nga bahin subong sang gintagna sa Kasulatan. Bangod sini, mahantop sang mga sumulunod ni Jesus nga nagkabuhi sa tion sang iya presensia nga nagsugod na sia sa paggahom sa langit. Mangin tanda man ini sang pagsugod sang tion nga ginatawag sa Biblia nga “katapusan nga mga adlaw” sang malaut nga sistema sang mga butang nga nagagahom sa duta.—2 Tim. 3:1-5, 13; Mat. 24:7-14.
Mangin Mabinantayon sa Katapusan nga mga Adlaw
3. Ngaa dapat magbantay ang mga Cristiano?
3 Nagsulat si apostol Pedro: “Ang katapusan sang tanan nga butang malapit na. Gani, mangin maligdong kamo sing hunahuna, kag mangin mabinantayon may kaangtanan sa mga pangamuyo.” (1 Ped. 4:7) Dapat magbantay ang mga sumulunod ni Jesus sa mga hitabo sa kalibutan nga nagapakita nga nagagahom na sia sa iya Ginharian. Kag mangin masako pa gid sila sa pagbantay samtang nagahilapit ang katapusan sang malaut nga sistema sang mga butang karon. Ginsilingan ni Jesus ang iya mga disipulo: “Magpadayon kamo sa pagbantay, kay wala kamo makahibalo kon san-o maabot ang agalon sang balay [agod laglagon ang kalibutan ni Satanas].”—Mar. 13:35, 36.
4. Ano ang kinatuhayan sang mga tawo sa kalibutan ni Satanas sa mga alagad ni Jehova? (Ilakip ang kahon.)
4 Ang kalabanan nga tawo yara sa idalom sang paggahom ni Satanas kag wala nila ginabantayan ang kahulugan sang mga hitabo sa kalibutan. Wala nila mahantop ang presensia sang paggahom ni Cristo sa iya Ginharian. Apang, ginabantayan kag ginahantop sang matuod nga mga sumulunod ni Cristo ang eksakto nga kahulugan sang mga hitabo sang nagligad nga siglo. Sugod sang 1925, nahibaluan sang mga Saksi ni Jehova nga ang Bug-os Kalibutan nga Inaway I kag ang nagsunod nga mga hitabo, mabakod nga mga ebidensia nga sang 1914 nagsugod na ang presensia ni Cristo sa iya langitnon nga Ginharian. Gani, ang katapusan nga mga adlaw sining malaut nga kalibutan ni Satanas nagsugod na. Apang madamo nga tawo ang nakatalupangod sang daku nga pagbag-o sang kahimtangan sang kalibutan antes kag pagkatapos sang Bug-os Kalibutan nga Inaway I, bisan pa wala nila mahangpan ang kahulugan sini.—Tan-awa ang kahon nga “Nagsugod ang Tion sang Kagamo.”
5. Ngaa kinahanglan nga magpadayon kita sa pagbantay?
5 Sa sulod sang halos 100 ka tuig na, ang makakulugmat nga mga hitabo sa bug-os nga kalibutan nagapamatuod nga nagakabuhi na kita sa katapusan nga mga adlaw. Diutay na lang ang nabilin nga tion kag manduan na ni Jehova si Jesus nga pangunahan ang iya hangaway nga mga anghel agod laglagon ang kalibutan ni Satanas. (Bug. 19:11-21) Ang matuod nga mga Cristiano ginasugo nga magpadayon sa pagbantay. Gani, hilingagawon gid ang paghimo sini samtang ginahulat naton ang katapusan sining sistema. (Mat. 24:42) Dapat kita magbantay, kag tapuson ang aton hilikuton sa bug-os nga kalibutan sa panuytoy ni Cristo.
Bug-os Kalibutan nga Hilikuton
6, 7. Paano nag-uswag ang pagbantala sing Ginharian sa katapusan nga mga adlaw?
6 Ang hilikuton nga dapat himuon sang mga alagad ni Jehova bahin sang kabilugan nga tagna nga nagapakita nga yari na kita sa katapusan nga mga adlaw sining malaut nga kalibutan. Ginlaragway ni Jesus ining bug-os kalibutan nga hilikuton sang gin-isaisa niya ang madamo nga butang nga matabo sa tion sang katapusan. Nalakip sa sini nga tagna ining mga pinamulong: “Ining maayong balita sang ginharian ibantala sa bug-os napuy-an nga duta subong panaksi sa tanan nga pungsod; kag nian magaabot ang katapusan.”—Mat. 24:14.
7 Binagbinaga ang pila ka katunayan may kaangtanan sa sini nga tagna ni Jesus. Sang nagsugod ang katapusan nga adlaw sang 1914, diutay gid lamang ang manugbantala sang maayong balita. Apang karon, madamo na sila. May sobra sa 7,000,000 ka Saksi ni Jehova nga nagabantala sa bug-os nga duta, kag naorganisar sila sa kapin sa 100,000 ka kongregasyon. Sang 2008 mga 10,000,000 pa ang nagtambong upod sa mga Saksi ni Jehova sa pagsaulog sang Memoryal sang kamatayon ni Cristo. Daku gid ang labaw sini sangsa nagtambong sang nagligad nga tuig.
8. Ngaa nagmadinalag-on ang aton pagbantala bisan pa may mga pagpamatok?
8 Maid-id gid ang pagpanaksi tuhoy sa Ginharian sang Dios sa tanan nga pungsod antes laglagon ining sistema! Nahimo ini tanan bisan pa si Satanas ang “dios sining sistema sang mga butang.” (2 Cor. 4:4) Ginaimpluwensiahan niya ang tanan nga pulitikal, relihioso, kag komersial nga elemento sa kalibutan kag ang mga propaganda sini. Kon amo, paano nangin madinalag-on ang pagbantala? Ginasakdag ini ni Jehova, gani nagapadayon ang pagbantala sing Ginharian bisan pa ginatinguhaan ni Satanas nga pauntaton ini.
9. Ngaa masiling nga milagro ang aton pag-uswag sa espirituwal?
9 Masiling nga milagro ang padayon nga pagdamo sang katawhan ni Jehova kag ang ila pag-uswag sa espirituwal. Kon wala ini ginasakdag sang Dios, kag kon wala niya ginatuytuyan kag ginaamligan ang iya katawhan, indi magmadinalag-on ang pagbantala. (Basaha ang Mateo 19:26.) Napat-od gid naton nga sa bulig sang balaan nga espiritu nga nagapahulag sa tagipusuon sang mga tawo nga nagabantay kag kinabubut-on nga nagaalagad, ang pagbantala matapos sing madinalag-on “kag nian magaabot ang katapusan.” Malapit na gid ini.
Ang “Dakung Kapipit-an”
10. Paano ginlaragway ni Jesus ang nagahilapit nga dakung kapipit-an?
10 Ang katapusan sining malaut nga kalibutan magadangat sa ginatawag nga “dakung kapipit-an.” (Bug. 7:14) Wala ginasugid sang Biblia kon daw ano ini kalawig, apang si Jesus nagsiling: “Nian may dakung kapipit-an, nga ang subong sini wala pa mahanabo kutob sa ginsuguran sang kalibutan tubtob karon, wala, kag indi na gid mahanabo liwat.” (Mat. 24:21) Kon binagbinagon naton ang kapipit-an ukon mga kabudlayan nga natabo na sa sining kalibutan, subong sang Bug-os Kalibutan nga Inaway II nga ginabulubanta nga nagpatay sing 50 tubtob 60 milyones, sobra pa gid ining nagahilapit nga dakung kapipit-an. Maabot ini sa talipuspusan sa inaway sang Armagedon. Sa sini nga tion, gamiton ni Jehova ang iya hangaway agod laglagon ang tanan nga bahin sang sistema ni Satanas sa duta.—Bug. 16:14, 16.
11, 12. Ano nga hitabo ang magatanda sang pagsugod sang dakung kapipit-an?
11 Wala sing may ginhatag nga petsa ang tagna sa Biblia kon san-o magasugod ang una nga bahin sang dakung kapipit-an. Pero ginasugid sini sa aton ang talalupangdon nga mga hitabo nga nagatanda sini. Magasugod ini kon laglagon na sang pulitika ang butig nga relihion. Sa mga tagna sang Biblia sa Bugna kapitulo 17 kag 18, ginpaanggid ang butig nga relihion sa makihilawason nga babayi nga nagapakighilawas sa pulitikal nga mga sistema sang duta. Ginapakita sang Bugna 17:16 nga maabot ang tion nga ining pulitikal nga mga elemento “magadumot sa makihilawason nga babayi kag magahapay kag magapahubo sa iya, kag magakaon sang iya unod kag magasunog sa iya sing bug-os sa kalayo.”
12 Kon mag-abot na ina nga tion, ‘ibutang sang Dios sa ila [pulitikal nga mga manuggahom] tagipusuon ang paghimo sang iya hunahuna,’ ang paglaglag sa butig nga relihion. (Bug. 17:17) Gani, masiling nga ini nga paglaglag halin sa Dios. Amo ini ang iya paghukom batok sa salimpapaw nga relihion nga naghingabot sa iya mga alagad kag nagtudlo sing mga doktrina nga supak sa iya kabubut-on. Wala gid ginapaabot sang kalibutan ang nagahilapit nga kalaglagan sang butig nga relihion. Apang ginapaabot ini sang matutom nga mga alagad ni Jehova. Sa sining katapusan nga mga adlaw, padayon nila ini nga ginabantala sa mga tawo.
13. Ano ang nagapakita nga magaabot sing hinali ang katapusan sang butig nga relihion?
13 Makibot gid ang mga tawo kon laglagon na ang butig nga relihion. Ginapakita sang mga tagna sa Biblia nga bisan ang pila ka “hari sang duta” magasiling tuhoy sa iya kalaglagan: “Kailo, kailo, . . . bangod sa isa ka oras nag-abot ang paghukom sa imo!” (Bug. 18:9, 10, 16, 19) Ang pagsambit sang Biblia sing “isa ka oras” nagapakita nga ini nga hitabo magaabot sing hinali.
14. Kon salakayon na sang mga kaaway ni Jehova ang iya mga alagad, ano ang iya himuon?
14 Nahangpan naton nga kon laglagon na ang butig nga relihion, hingabuton dayon ang mga alagad ni Jehova nga nagabantala sang iya mga mensahe sang paghukom. (Eze. 38:14-16) Kon magsugod na ini, ang mga manughingabot magaatubang kay Jehova, kay nagsaad sia nga amligan ang iya matutom nga katawhan. Si Jehova nagsiling: “Sa akon kaimon kag sa kalayo sang akon kasingkal nagpamolong ako. . . . Nian makilala nila nga ako amo ang GINOO.” (Basaha ang Ezequiel 38:18-23.) Ang Pulong sang Dios nagasiling: “Ang nagatandog sa inyo [iya matutom nga mga alagad] nagatandog sang tawotawo sang iya mata.” (Zac. 2:8) Gani, kon salakayon na sang mga kaaway ni Jehova ang iya mga katawhan, magahulag sia. Magapanghikot sia kag magapadulong ini sa katapusan nga bahin sang dakung kapipit-an—ang talipuspusan sini sa Armagedon. Sa pagmando ni Cristo, ang iya gamhanan nga hangaway magapadapat sang paghukom ni Jehova batok sa kalibutan ni Satanas.
Ano ang Himuon Naton?
15. Ano ang himuon naton kay nahibaluan naton nga malapit na lang ang katapusan sining kalibutan?
15 Ano ang himuon naton kay nahibaluan naton nga malapit na lang ang katapusan sining malaut nga kalibutan? Nagsulat si apostol Pedro: “Sanglit ini tanan nga butang matunaw, dapat talupangdon ninyo kon ano kamo nga sahi sang mga tawo may kaangtanan sa balaan nga paggawi kag sa mga buhat sang diosnon nga debosyon!” (2 Ped. 3:11) Ginapadaku sini nga kinahanglan naton nga magbantay sing maayo agod pat-uron nga ang aton mga buhat nahisuno sa mga ginapatuman sang Dios kag ang aton kabuhi nagalakip sing mga buhat sang diosnon nga debosyon, nga nagapakita sing gugma kay Jehova. Nalakip sa sini ang paghimo sang aton labi nga masarangan sa pagbantala sing maayong balita sang Ginharian antes mag-abot ang katapusan. Nagdugang pa gid si Pedro: “Ang katapusan sang tanan nga butang malapit na. . . . Mangin mabinantayon may kaangtanan sa mga pangamuyo.” (1 Ped. 4:7) Nagasuod kita kay Jehova kag ginapakita naton ang aton gugma sa iya kon tayuyon kita nga nagapangamuyo kag nagapangayo sing panuytoy paagi sa iya balaan nga espiritu kag sa iya bug-os kalibutan nga kongregasyon.
16. Ngaa dapat gid naton tumanon ang laygay sang Dios?
16 Sa sining makatalagam nga tion, dapat gid naton tumanon ang laygay sang Pulong sang Dios: “Padayon ninyo nga bantayi sing maayo nga ang inyo paglakat indi subong di-maalam kundi subong maalam nga mga tawo, nga ginabakal ang nagakaigo nga tion para sa inyo kaugalingon, bangod ang mga adlaw malaut.” (Efe. 5:15, 16) Grabe na gid ang kalautan karon kon ipaanggid sadto. Madamo sing padihot si Satanas agod wilihon ang mga tawo ukon pauntaton sila sa paghimo sang kabubut-on ni Jehova. Subong mga alagad sang Dios, nahibaluan naton ini kag indi naton luyag nga paluyahon sang bisan ano ang aton katutom sa iya. Nahibaluan man naton ang matabo sa dili madugay, kag nagasalig kita kay Jehova kag sa iya mga katuyuan.—Basaha ang 1 Juan 2:15-17.
17. Ilaragway ang reaksion sang mga makalampuwas sa Armagedon kon banhawon na ang mga patay.
17 Matabo gid ang dalayawon nga saad sang Dios nga banhawon ang mga patay, kay “may pagkabanhaw sang mga matarong kag mga di-matarong.” (Binu. 24:15) Talupangda nga masaligan gid ini nga saad: “May pagkabanhaw”! Indi gid ini maduhaduhaan, kay si Jehova mismo ang nagsaad sini! Ang Isaias 26:19 nagsaad: “Ang imo mga patay magakabuhi. . . . Pagmata kag mag-amba, kamo nga nagapuyo sa yab-ok. . . . Ang duta magaluad sang mga patay.” Una nga natuman ini nga saad sang ginpabalik sadto ang katawhan sang Dios sa ila dutang natawhan. Ginapasalig sini sa aton nga matuman gid ini sa bag-o nga kalibutan. Makalilipay gid kon magkitaay liwat ang mga ginbanhaw kag ang ila mga hinigugma! Huo, madali na lang ang katapusan sang kalibutan ni Satanas, kag nagahilapit na ang bag-o nga kalibutan sang Dios. Gani, kinahanglan gid nga magpabilin kita nga nagabantay!
Madumduman Mo Bala?
• Ano ang tema sang panudlo ni Jesus?
• Daw ano ka lapnag ang pagbantala sing Ginharian karon?
• Ngaa kinahanglan gid nga magpabilin kita nga nagabantay?
• Ngaa makapalig-on gid ang saad sa Binuhatan 24:15?
[Mga Pamangkot sa Pagtinuon]
[Kahon/Laragway sa pahina 16, 17]
NAGSUGOD ANG TION SANG KAGAMO
Sang 2007, si Alan Greenspan nagsulat sang libro nga The Age of Turbulence: Adventures in a New World. Sa halos 20 ka tuig, sia ang tsirman sang United States Federal Reserve Board nga amo ang nagadumala sang pagpalakat sang mga bangko sa bug-os nga pungsod. Ginpadaku ni Greenspan ang talalupangdon nga mga kinatuhayan sa kahimtangan sang kalibutan antes kag pagkatapos sang 1914:
“Suno sa tanan nga report antes sang 1914, maayo gid ang pagtamdanay sang mga tawo kag sang mga pungsod sa kalibutan kag nagauswag man ang teknolohiya kag ang kultura. Daku gid ang pag-uswag sang sosiedad gani nasiling nga daw wala na sing kulang pa. Sang ika-disinuebe nga siglo nadula na ang pagbaligya sa mga ulipon. Amat-amat naman nga natapna ang kapintas sa tawo. . . . Bangod sa pag-uswag sang teknolohiya sang ika-disinuebe nga siglo, naimbento ang mga riles, telepono, de-koryente nga suga, sinehan, salakyan, kag madamo nga kagamitan nga nagapahapos sang hilikuton sa sulod sang balay. Ginpauswag man sang medisina ang nutrisyon, kag ang pagsuplay sang matinlo nga tubig nagpalawiglawig sang kabuhi . . . Nagpati ang tanan nga magapadayon ini nga pag-uswag.”
Apang . . . “Mas daku gid ang halit sang Bug-os Kalibutan nga Inaway I sa mga tawo kag sa sibilisasyon, bisan pa mas madamo ang nagkalamatay kag nagkalaguba sang Bug-os Kalibutan nga Inaway II. Ginguba sang una nga inaway ang paglaum sang mga tawo. Indi ko gid malipatan ang mga tinuig antes sang Bug-os Kalibutan nga Inaway I sang ang pag-uswag sang mga tawo madasig kag daw wala untat. Sa karon, ang aton panan-aw tuhay gid sangsa nagligad nga siglo apang amo gid sini ang matuod nga nagakatabo. Ang epekto bala sang kahadlok, pag-init sang globo, ukon sang pagsaka liwat sa poder sang mga sumalakdag sang ordinaryo nga mga tawo, mangin pareho sa epekto sang Bug-os Kalibutan nga Inaway I sa katilingban sang tawo? Wala gid sing sigurado nga sabat sa sini.”
Nadumduman ni Greenspan nga sang nagaeskwela pa sia, nagsiling ang propesor sang Economics nga si Benjamin M. Anderson (1886-1949): “Kon dumdumon sang mga tawo nga may buot na antes sang Bug-os Kalibutan nga Inaway I ang kahimtangan sadto, ginakahidlawan gid nila ini. Ang katawhay sadto nga mga panahon wala na gid masulit pa.”—Economics and the Public Welfare.
Amo man sini ang ginsiling sa libro nga A World Undone ni G. J. Meyer nga ginbalhag sang 2006. Ini nagasiling: “Ang mga hitabo sa maragtas pirme ginasiling nga ‘nagabag-o sang tanan.’ Nangin matuod gid ini sang Dakung Inaway [1914-1918]. Ginbag-o gid sini nga inaway ang tanan: indi lamang ang mga dulunan, indi lamang ang mga gobierno kag ang nadangatan sang mga pungsod, kundi pati ang pagtamod sang mga tawo sa kalibutan kag sa ila kaugalingon halin sadto. Naghimo ini sing isa ka moderno nga kalibutan nga tuhay gid sa matawhay nga kalibutan sadto.”
[Retrato sa pahina 18]
Sa Armagedon, gamiton ni Jehova ang iya gamhanan nga hangaway nga mga anghel
