‘Hai Rroro’
‘Hai Rroro’
“Urere eware kpobi o kẹlino. . . . He roro hẹ lẹ.” —1 PITA 4:7.
1. Eme Jesu ọ jẹ mae t’ẹme kpahe?
OKENỌ Jesu Kristi ọ jọ otọakpọ, Uvie Ọghẹnẹ họ oware nọ ọ jẹ mae t’ẹme kpahe. Jihova ọ te rọ ẹkwoma Uvie na kpare esuo riẹ kpehru, o ve je ru odẹ riẹ fo. Fikiere, Jesu o wuhrẹ ilele riẹ re a lẹ se Ọghẹnẹ nọ: “Uvie ra oze, epanọ a rọ obọ odhiwu ru orọ eva ra, ru re a jọ akpọ na ru ere re.” (Mat. 4:17; 6:9, 10) Uvie yena o rẹ te raha akpọ Setan na no kẹle o vẹ jẹ ruẹ inọ a jọ otọakpọ na soso ru oreva Ọghẹnẹ. Wọhọ epanọ Daniẹl ọ ruẹaro, Uvie Ọghẹnẹ o te “whọlọ ivie [inẹnẹ] na kpobi ọ vẹte rehọ ai ze oba, ọ vẹte jọ bẹdẹ.”—Dan. 2:44.
2. (a) Ẹvẹ ilele Jesu a te rọ riẹ inọ o muhọ esu no? (b) Eme ọfa oka na o ti dhesẹ?
2 Fikinọ ẹtha Uvie Ọghẹnẹ o jọ ilele Jesu oja gaga, a nọ riẹ nọ: “Eme ọ rẹ te jọ oka ẹtha ra gbe urere akpọ na?” (Mat. 24:3) Fikinọ ahwo nọ a rrọ otọakpọ a te rọ ẹro ruẹ ẹtha Kristi hi, ọ tẹ kẹ ae oka. Oka na họ eware sa-sa nọ Ikereakere na e ta inọ e rẹ te via. Fikiere, ilele Jesu nọ e te jọ uzuazọ evaọ oke yena a rẹ te riẹ inọ o muhọ esu no evaọ obọ odhiwu. O te jẹ jọ emuhọ etoke nọ Ebaibol i se “edẹ urere” uyerakpọ muomu nana nọ eyoma o bi jo vihọ na.—2 Tim. 3:1-5, 13; Mat. 24:7-14.
He Rroro Evaọ Edẹ Urere Na
3. Fikieme u je fo re Ileleikristi a rroro?
3 Pita ukọ na o kere nọ: “Urere eware kpobi o kẹlino; fikiere wha jaja aro vi wha je he roro hẹ lẹ olẹ rai.” (1 Pita 4:7) O gwọlọ re ilele Jesu a rroro je muẹrohọ eware nọ e rrọ akpọ via enọ i dhesẹ inọ o muhọ esu no. Yọ o gwọlọ nọ a re rroro vi epaọ anwẹdẹ nọ ekuhọ uyerakpọ omuomu nana o be kẹle na. Jesu ọ ta kẹ ilele riẹ nọ: “Fikiere wha roro—keme wha riẹ okenọ Olori uwou na ọ te tha ha” re ọ raha akpọ Setan.—Mak 13:35, 36.
4. Dhesẹ ohẹriẹ nọ o rrọ udevie ahwo nọ e rrọ akpọ Setan na avọ idibo Jihova. (Je rri ẹkpẹti na.)
4 Setan họ ọnọ o bi su ima ahwo buobu nẹnẹ, yọ a wo otoriẹ eware nọ e rrọ akpọ via ha. A riẹ hẹ inọ Kristi o muhọ esuo no. Rekọ uvi ilele Jesu a bi rroro yọ a riẹ otọ eware nọ e via evaọ ikpe-udhusoi nọ e vrẹ na. Anwọ 1925, Isẹri Jihova a vuhumu inọ Ẹmo Akpọ I gbe eware nọ e via evaọ oke yena yọ imuẹro ivevẹ inọ Kristi o muhọ esu no evaọ Uvie riẹ anwọ 1914. Anwọ oke yena edẹ urere uyerakpọ muomu nọ o rrọ otọ esuo Setan i ro muhọ. Ahwo buobu nọ a re rri otọ mu, dede nọ a wo otoriẹ eware nọ e be via ha, a muẹrohọ inọ anwẹnọ Ẹmo Akpọ I o ro fi no akpọ na o nwene gaga no.—Rri ẹkpẹti na “Etoke Ẹvohẹ U Muhọ No.”
5. Fikieme o rọ roja re ma gbẹ hai rroro?
5 Anwọ enwenọ ikpe udhusoi na, eware iyoma nọ e be via evaọ akpọ na soso i dhesẹ inọ edẹ urere na ma rrọ na. Oke u totọ kpobi no nọ Jihova ọ te rọ ta kẹ Kristi re ọ rehọ egbaẹmo ikọ-odhiwu riẹ gboma te raha akpọ Setan. (Evia. 19:11-21) A ta kẹ uvi Ileleikristi inọ a hai rroro. Fikiere, o roja gaga re ma gbẹ hai ru ere nọ ma bi rẹro ekuhọ uyerakpọ nana. (Mat. 24:42) Ma re muẹrohọ otọ ẹsikpobi hrọ, yọ nọ Kristi ọ be kpọ omai na, iruo jọ e riẹ nọ ma re ru evaọ otọakpọ na soso.
Iruo nọ E Nya Akpọ Soso Duwu
6, 7. Ẹvẹ iruo usiuwoma ota Uvie na o nyaharo te no evaọ edẹ urere na?
6 Okenọ Jesu ọ t’ẹme kpahe eware nọ i ti dhesẹ oka inọ ma ruọ edẹ urere ọrọ uyerakpọ muomu nana no, ọ tẹ fodẹ iruo nọ idibo Jihova a ti ru wọhọ abọjọ oka na. Jesu o dhesẹ iruo nana nọ a te jọ akpọ soso ru na okenọ ọ t’ẹme kpahe eware sa-sa nọ e be te via evaọ oke urere na. Usu eware nọ ọ ruẹaro riẹ họ: “A rẹ te vuẹ ovuẹ usiuwoma uvie na kẹ akpọ na kpobi, re o jọ isẹi kẹ erẹwho akpọ na kpobi; kẹsena urere u te zi te.”—Mat. 24:14.
7 Roro kpahe eware jọ nọ i wo obọ kugbe eruẹaruẹ Jesu yena. Ahwo nọ i je whowho emamọ usi na a jọ kakao evaọ okenọ edẹ urere na i muhọ evaọ 1914. Rekọ enẹna a bu gaga no. Unu Isẹri Jihova nọ i bi whowho emamọ usi na evaọ akpọ na kpobi enẹna a bu vi ima ihrẹ (7,000,000) no, yọ a rrọ ikoko nọ i bu vi idu udhusoi (100,000). Amọfa nọ i kuomagbe Isẹri Jihova ru Ekareghẹhọ uwhu Kristi evaọ 2008 a bu te ima ikpe (10,000,000). Onana u bu gaga vi enọ e jariẹ evaọ ukpe 2007.
8. Fikieme ọwọsuọ ọ gbẹ be whaha ẹvi nọ ma bi wo evaọ iruo usiuwoma mai hi?
8 Oghẹrẹ nọ a be ta usiuwoma Uvie Ọghẹnẹ te evaọ erẹwho kpobi taure uyerakpọ nana u te ti t’oba o rro kẹhẹ! A bi ru onana kpobi evaọ iraro Setan, “ọghẹnẹ akpọ nana.” (2 Kọr. 4:4) Ọye ọ be kpọ isu akpọ na, egagọ riẹ, ekiọthuọ riẹ, gbe ekwakwa awhusi riẹ. Kọ eme o be lẹliẹ omai kparobọ evaọ iruo isẹri-ise na? Jihova họ ọnọ o bi fi obọ họ kẹ omai. Fikiere iruo usiuwoma ota Uvie na o be nyaharo ọvo dede nọ Setan ọ be daoma re ọ whaha iruo na.
9. Fikieme a sae rọ ta inọ ẹnyaharo abọ-ẹzi mai yọ oware igbunu?
9 A rẹ sai dhesẹ obokparọ gbe ẹvi nọ ma bi wo evaọ iruo usiuwoma ota na avọ ẹnyaharo abọ-ẹzi nọ ma bi wo wọhọ oware igbunu. Ogbẹrọ Ọghẹnẹ nọ ọ be thọ ahwo riẹ hẹ, ma rẹ sai ru iruo usiuwoma ota na ha. (Se Matiu 19:26.) O rẹ sai mu omai ẹro inọ avọ obufihọ ẹzi ọfuafo Ọghẹnẹ nọ o be jọ oma enọ i bi rroro ru iruo, ma ti ru iruo usiuwoma ota na te ekuhọ, “kẹsena urere u te zi te.” Oke yena u totọ kpobi no.
‘Uye Ulogbo Na’
10. Ẹvẹ Jesu o dhesẹ uye ulogbo nọ o be tha na?
10 Uyerakpọ muomu nana u re ti kuhọ evaọ ‘uye ulogbo na.’ (Evia. 7:14) Ebaibol e ta ha epanọ uye ulogbo na u ti kri te, rekọ Jesu ọ ta nọ: “Uye obẹbẹ ruaro o rẹ te jọ, u tioye o te jọ no emuhọ akpọ na ze ri te enẹ hẹ, ijo, o gbẹ sae jọ ofa ha.” (Mat. 24:21) Ma te roro uye nọ u te akpọ na no, wọhọ orọ Ẹmo Akpọ II na nọ ahwo nọ a whu a jo bu te oware wọhọ ima udhuvẹ gbe ikpe rite ima udhosa, uye ulogbo nọ o be tha na o te ginẹ rro gaga. Uye na o te mae ga evaọ oke ẹmo Amagẹdọn. Oke yena Jihova o ti jo siobọno egbaẹmo riẹ re a raha uyerakpọ Setan kpobi muotọ.—Evia. 16:14, 16.
11, 12. Oware vẹ u ti dhesẹ inọ uye ulogbo na u muhọ no?
11 Eruẹaruẹ Ebaibol e fodẹ hẹ ẹdẹ nọ abọ ọsosuọ ọrọ uye ulogbo na u ti ro muhọ, rekọ e fodẹ oware nọ u ti dhesẹ inọ u muhọ no. Oye họ okenọ isu na e be te raha egagọ erue no. Evaọ eruẹaruẹ Ebaibol nọ e rrọ Eviavia uzou avọ 17 gbe 18, a rehọ egagọ erue dhesẹ ogberẹ nọ o bi lele isu akpọ na bruẹnwae. Eviavia 17:16 o dhesẹ inọ oke o kẹlino nọ isu na i ti ro “mukpahe ogberẹ na; a [ve] ti fi ei họ ababọ avọ ẹbẹba, a [vẹ] te raha oma riẹ no, a vẹ rehọ erae mahe iẹ.”
12 Nọ oke yena o te te, Ọghẹnẹ o re ti “fi ẹzi na họ [isu na] eva re a ruẹse ru orọ eva riẹ” re a raha egagọ erue no. (Evia. 17:17) Fikiere ma rẹ sae ta nnọ obọ Ọghẹnẹ ọraha na o ti no ze. Enẹ Ọghẹnẹ o ti ro gu egagọ erue na ẹdhọ, enọ i bi wuhrẹ eware nọ e wọso oreva riẹ anwẹdẹ je bi kpokpo idibo riẹ. Akpọ na soso a bi rẹro ọraha nana ha. Rekọ uvi idibo Jihova a bi rẹro riẹ. Yọ evaọ edẹ urere nana kpobi, a be vuẹ ahwo kpahe ọraha na.
13. Eme u dhesẹ inọ etoke ọraha egagọ erue o ti theri hi?
13 U ti gb’ahwo unu gaga inọ a raha egagọ erue no. Eruẹaruẹ Ebaibol i dhesẹ inọ makọ “ivie akpọ na” jọ a te ta kpahe ọraha na nọ: “Odomẹ! Odomẹ! . . . Idudhe na uye ra o nwane ze ino.” (Evia. 18:9, 10, 16, 19) “Idudhe” nọ Ebaibol i ro dhesẹ ọraha na u dhesẹ inọ etoke ọraha na o ti theri hi.
14. Okenọ ewegrẹ Jihova a te wọ ohọre bru idibo riẹ ze, eme Ọghẹnẹ o bi ti ru?
14 Ma riẹ inọ a tẹ raha egagọ erue no, a be te wọ ohọre bru idibo Jihova ze, enọ i bi whowho ovuẹ ẹdhoguo riẹ. (Izik. 38:14-16) Okenọ a be te wọ ohọre bru idibo Jihova ze, kiyọ Jihova a be te họre na, keme ọ ya eyaa inọ ọ te thọ enọ e be gọe. Jihova ọ ta nọ: “Keme eva ihrieriọ gbe eva ofu ọgaga mẹ mẹ [te jọ ta ẹme] . . . A vẹ te riẹ nọ mẹ họ [Jihova, NW].” (Se Izikiẹl 38:18-23.) Ọghẹnẹ ọ jọ Ebaibol ta nọ: “Ọnọ rehọ obọ te owhẹ [koyehọ, idibo riẹ] ọ rehọ obọ te ọmọ-ẹro mẹ.” (Zek. 2:8) Fikiere okenọ ewegrẹ riẹ a te wọ ohọre bru idibo riẹ, Jihova ọ te r’abọ muoma ha. Ọ te j’owọ nọ u ti su kpohọ abọ urere ọrọ uye ulogbo na—koyehọ Amagẹdọn. Kristi ọ vẹ te rehọ ikọ-odhiwu nọ e goma thesiwa gboma, a vẹ te raha akpọ Setan no.
Oghẹrẹ nọ U re Kpomahọ Omai
15. Eme ma re ru nọ ma riẹ nnọ ekuhọ uyerakpọ nana u totọ no na?
15 Eme ma re ru nọ ma riẹ nnọ ekuhọ uyerakpọ muomu nana o kẹle gaga no na? Pita ukọ na o kere nọ: “Kinọ enana kpobi e rẹte ghinẹ raha no na, didi oghẹrẹ ahwo wha hẹ jọ eva uzuazọ ẹfuọ gbe orọ Ọghẹnẹ.” (2 Pita 3:11) Eme yena i dhesẹ inọ o roja re ma jaja aro vi jẹ ruẹ nnọ ma bi ru oware nọ Ọghẹnẹ ọ gwọlọ mi omai, gbe nnọ ma bi yeri uzuazọ ohwo Ọghẹnẹ, onọ u re dhesẹ inọ ma you Jihova. Iruo itieye na i kugbe oma nọ ma rẹ dawo evaọ ewhowho emamọ usi Uvie na taure urere na o te ti te. Pita o te je kere nọ: “Urere eware kpobi o kẹlino; . . . he roro hẹ lẹ.” (1 Pita 4:7) Ma re si kẹle Jihova je dhesẹ inọ ma you rie nọ ma tẹ be lẹ sei ẹsikpobi, yare iẹe inọ ọ rehọ ẹzi ọfuafo riẹ gbe ukoko riẹ kpọ omai.
16. Fikieme u je fo re ma yoẹme kẹ Ọghẹnẹ?
16 Evaọ oke obẹbẹ nana, u fo re ma roma kpotọ kẹ ohrẹ nọ o rrọ Ebaibol na: “Wha fiẹrohọ otọ enẹna eva onya rai, o jọ wọhọ igheghẹ hẹ rekọ iwoareghẹ, wha raha oke he, keme edẹ na i re yoyoma.” (Ẹf. 5:15, 16) Enẹna emuemu o mai bu. Setan ọ wha eware buobu ze no re ọ whaha hayo kpọ ovao ahwo no eruo oreva Jihova. Mai idibo Ọghẹnẹ ma riẹ onana, yọ ma gwọlọ kẹ oware ovo uvẹ hẹ re o whaha omai ẹmeoyo kẹ Ọghẹnẹ. Ma tẹ jẹ riẹ oware nọ o be te via kẹle na, yọ ma fi eva mai kpobi họ Jihova avọ ẹjiroro riẹ.—Se 1 Jọn 2:15-17.
17. Dhesẹ oghẹrẹ nọ o te jọ enọ e zọ evaọ Amagẹdọn oma okenọ a te kpare enọ i whu no ze.
17 Eyaa nọ Ọghẹnẹ ọ yaa inọ ọ te kpare iwhuowhu na ze o ve ti rugba, keme “ẹkparomatha enọ ikiete avọ enọ ikiete he e rẹ te jarọ.” (Iruẹru 24:15) Rri epanọ a fiẹgba họ eyaa yena te: “Ẹkparomatha . . . e rẹ te jarọ”! Avro ọ riẹ hẹ, keme Jihova họ ọnọ ọ ya eyaa na. Aizaya 26:19 o ya eyaa nọ: “Ahwo nọ i whu no a rẹ te zọ. . . . O whai enọ e be ria evaọ akpọ na, wha rọwo ze wha so ole oghọghọ! . . . Otọ o [te] rehọ enọ iwhu no na rọ ze.” Eme yena e kaki rugba okenọ emọ Izrẹl a zihe ziọ ẹkwotọ rai, onọ o kẹ omai imuẹro inọ eyaa nana o ti gine rugba evaọ akpọ ọkpokpọ na. A re gbiku oghọghọ riẹ hẹ okenọ enọ a kpare ze na a te wariẹ kuomagbe ahwo rai! Ẹhẹ, ekuhọ akpọ Setan o kẹlino, yọ akpọ ọkpokpọ Ọghẹnẹ o kẹlino re. Fikiere u wuzou gaga re ma jaja aro vi ẹsikpobi.
Kọ Whọ Kareghẹhọ?
• Eme Jesu ọ jẹ mae t’ẹme kpahe?
• Ẹvẹ a ta usiuwoma na kẹre te no nẹnẹ?
• Fikieme u je wuzou re ma hai rroro?
• Uduotahawọ vẹ who wo no eyaa nọ e rrọ Iruẹru Ikọ Na 24:15 ze?
[Enọ Uwuhrẹ]
[Ẹkpẹti/Uwoho nọ e rrọ ẹwẹ-obe avọ 16, 17]
ETOKE ẸVOHẸ U MUHỌ NO
Alan Greenspan o kere obe jọ evaọ 2007 onọ uzoẹme riẹ o rrọ The Age of Turbulence: Adventures in a New World. Evaọ enwenọ ikpe 20, ọye ọ jọ ohwo-agbara ọrọ ogbẹgwae nọ o jẹ rẹrote ẹkpa-ugho America. Greenspan ọ ta kpahe epanọ akpọ o nwene te no anwọ 1914:
“Eware nọ e via taure 1914 o te ti te i dhesẹ inọ evaọ oke yena ahwo a jẹ riẹ yeri yọ a je wo ẹnyaharo evaọ ona eware-ikuo; epanọ eware e jẹ nya o wọhọ ẹsenọ a bi ti te ẹgbagba. Evaọ etoke ikpe 1800 avọ 1900 a ro si eki erigbo nọ a jẹ tho n’otọ. O wọhọ nnọ oghẹrẹ nọ a je gboja k’ahwo vẹre u je kpotọ. . . . Ahwo a wo ẹnyaharo evaọ eware nọ a je ku, a ru idhere itreni, ifonu, ikpẹ ẹlẹtriki, isinima, imoto, gbe ekwakwa eyero uwou nọ a re kele mu hu. Ahwo a jẹ rria tọ vrẹ epaọ ọsosuọ fiki imu ekpokpọ nọ a je ru, emamọ emu nọ ahwo a jẹ re, gbe emamọ ame . . . Ahwo kpobi a roro inọ enẹ ọvo o be te jọ.”
Rekọ . . . “dede nọ Ẹmo Akpọ II ahwo a mae jọ whu, Ẹmo Akpọ I oye o mae raha ọriẹyero ahwo gbe ẹnyaharo nọ a je wo. Mẹ kareghẹhọ epanọ a ta inọ akpọ o jọ taure a te ti fi Ẹmo Akpọ I na, okenọ eware e jẹ riẹ nya ziezi kẹ ahwo-akpọ. Eriwo mai nẹnẹ u wo ohẹriẹ gaga no oghẹrẹ nọ iroro ahwo e jọ ikpe-udhusoi nọ i kpemu, rekọ enẹna o mae wọhọ nnọ ma bi riotọ mu. Kọ o sae jọnọ epanọ Ẹmo Akpọ I o raha akpọ muotọ evaọ oke yena, ere imuozọ, ẹroro nọ ọ rrọ akpọ na, hayo enọ e be họre kẹ ewoma ahwo rai a te raha ẹnyaharo nọ ma be jọ akpọ na wo nẹnẹ? Ohwo ọvo ọ rẹ sae r’obọ s’udu kẹ uyo na ha.”
Greenspan ọ kareghẹhọ ẹme jọ nọ Profẹsọ Benjamin M. Anderson (1886-1949) ọ ta evaọ okenọ ọ gbẹ jọ isukulu: “Ahwo nọ a kpako te epanọ a rẹ rọ kareghẹhọ oghẹrẹ nọ akpọ ọ jọ taure Ẹmo Akpọ I o te ti fi, a rẹ kareghẹhọ epanọ akpọ ọ were te oke yena. Ufuoma nọ o jariẹ evaọ oke yena o gbẹ riẹ nẹnẹ hẹ.”—Economics and the Public Welfare.
G. J. Meyer ọ ta ọkpọ ẹme ọvona evaọ obe riẹ nọ o kere evaọ 2006 onọ uzoẹme riẹ o rrọ A World Undone. O kere nọ: “Mẹ rẹ sae ta nnọ eware nọ e via oke anwae e lẹliẹ ‘akpọ nwene no.’ Ẹmo Ologbo nọ a fi na [1914 rite 1918] yọ oriruo jọ. Ẹmo na o gine nwene eware kpobi: orọnikọ iwhru erẹwho ọvo ho, orọnikọ egọmeti gbe ẹnyaharo erẹwho ọvo ho, rekọ oghẹrẹ nọ ahwo a bi rri akpọ gbe oma rai anwọ oke yena ze. Ẹmo na o lẹliẹ akpọ nwene gaga no oghẹrẹ nọ akpọ ọ jọ vẹre.”
[Uwoho nọ o rrọ ẹwẹ-obe avọ 18]
Eva Amagẹdọn, Jihova o ti siobọno egbaẹmo riẹ