“Komin Ekkõl”

“Jemlokin men otemjej ebaktok. Komin . . . ekkõl, bwe komin kab maroñ in jar.”​—1 PIT. 4:7, UBS.

1. Kar ta unin tel in kwalok nan eo an Jisõs?

 KAR unin tel in kwalok nan eo an Jisõs Kraist ke ear ber ion lõl ej Ailiñ eo an Anij. Ikijen Ailiñ in, Jeova enaj kamol an jime einwõt eo ej iroij potata ijoko otemjej im kokwojarjar ãt eo etan. Kin men in, Jisõs ear katakin dri kalor ro an bwe ren jar ñõn Anij: “En itok Am ailiñ. Ren kõmõnmõn ankil Am einwõt i lõñ, bareinwõt ion lõl.” (Mat. 4:​17; 6:​9, 10) Mõtõn jidrik Ailiñ in enaj bõktok jemlokõn lõl in an Setan, inem lolorjake jerbal eo ñõn kõmõnmõn ankilan Anij ibelakin lõl in. Einwõt an kar Daniel kanan kake, Ailiñ eo an Anij “enaj kejebeblok aoleben ailiñ ko jet, im enaj bed ñõn indrio.”​—Dan. 2:​44.

2. (a) Ewi wãwen an naj kar dri kalor ro an Jisõs kile bwe ear bõk maroñ eo ñõn iroij ilo Ailiñ eo? (b) Kakõle eo enaj kar bar kalikar ta?

² Kin an aurõk itok eo an Ailiñ eo an Anij iben dri kalor ro an Jisõs, rar kajitõk iben: “Ta eo kakõlõn Am naj itok im lokõn lõl?” (Mat. 24:3) Enaj kar or juõn kakõle kinke an Kraist bõk maroñ ilo Ailiñ eo, armij ro ion lõl reban loe. Kakõle in enaj kar koba jet mõtõn ko kar kanan kake ilo Baibel eo. Eñin unin dri kalor ro an Jisõs me rar mour ilo ien eo, remaroñ kar kile bwe ear jino an iroij ilõñ. Bareinwõt enaj kar kalikar jinoin ien eo Baibel eo ej naetan “ran ko eliktata” an jukjuk im ber in me ej kobrõk lõl in kin men ko renana.​—2 Tim. 3:​1-5, 13; Mat. 24:​7-​14.

Komin Ekil ilo Ran ko Eliktata

3. Etke dri Kristian ro renaj aikwij in ekil?

³ Dri jilik Piter ear je: “Jemlokin men otemjej ebaktok. Komin iroij iomi make kab ekkõl, bwe komin kab maroñ in jar.” (1 Pit. 4:7, UBS) Dri kalor ro an Jisõs renaj aikwij in ekil kin men ko rej walok ilo lõl in me ej kalikar bwe emwij an bõk maroñ eo  ñõn iroij ilo Ailiñ eo. Enaj laplok an aurõk bwe ren ekil ke jemlokõn jukjuk im ber in enana ej ebaktok. Jisõs ear jiroñ ro dri kaloran: “Komin ekil; bwe kom jaje ñat iroij in mweo ej itok [ñõn bõktok ekajet ion lõl in an Setan].”​—Mark 13:35, 36.

4. Keiri lemnok ko an armij ro rej mõtõn lõl in an Setan iben dri korijer ro an Jeova. (Kobaik box eo.)

⁴ Kinke enañin aolep armij ro rej ber iomin iroij eo an Setan, rejjab ekil kin men ko rej walok ilo lõl in. Rejjab kile bwe emwij an Jisõs bõk maroñ eo ñõn iroij ilo Ailiñ eo. Ak dri kalor ro remol an Kraist rar ekil wõt im rar kile men ko rar walok ilo buki yiõ ko remotlok. Jen 1925, Dri Kennan ro an Jeova rar kile bwe Bata eo an Lõl in Kein Kajuõn im men ko rar walok elikin, rar kamol bwe Kraist ear jino an iroij ilo Ailiñ eo ilo 1914. Kin men in, ran ko eliktata an jukjuk im ber in enana an Setan emwij air ijjino. Elõñ armij ro rej kile oktõk ko ikõtan ien eo mokta jen Bata eo an Lõl in Kein Kajuõn im ien eo elikin, meñe rejjab jela ta melelen men kein.​—Lale box eo “Ien Bwoktak ear Ijjino.”

5. Etke eaurõk bwe jen wõnmanlok im ekil wõt?

⁵ Enañin jibuki yiõ ko kiõ, wãwen ko renana rej walok ibelakin lõl in rej kamol bwe jej ber ilo ran ko eliktata. Mõtõn wõt jidrik Jeova enaj jiroñ Kraist ñõn tel jar in tõrinae in enjel ro rekajur nae lõl in an Setan. (Rev. 19:11-​21) Kar jiroñ dri Kristian ro bwe ren ekil wõt. Inem, elap an aurõk bwe jen wõnmanlok wõt im kõmõn men in ke jej lipjerjeretok jemlokõn jukjuk im ber in. (Mat. 24:42) Jej aikwij ekil wõt im ber iomin tel eo an Kraist im karerelok jerbal eo eaurõk ibelakin lõl in.

Juõn Jerbal Ibelakin Lõl

6, 7. Ilo wãwen it eo jerbal in kwalok nan kin Ailiñ eo ear laplok ilo ran kein eliktata?

⁶ Jerbal eo Jeova ear lelok ñõn dri korijer ro an bwe ren kõmõne kar kanan kake einwõt mõtõn kõkãle eo. Men in ej kalikar  bwe jej ber ilo ran ko eliktata an jukjuk im ber in enana. Jisõs ear kwalok kin jerbal in ibelakin lõl ke ear kõlajrak jet men ko renaj kar walok ilo ien jemlokõn. Ilo kanan eo an ear koba nan kein reaurõk: “Im naj kwalok gospel in an ailiñ in lõñ i aolepen lõl kin men in kennan ñõn ailiñ otemjelok: ilo ien eo e naj itok jemlokõn.”​—Mat. 24:​14.

⁷ Lemnok kin jet ian kein kamol ko kin mõtõn in ilo kanan eo an Jisõs. Oran armij ro rar kwalok kin nuuj eo emõn ear drik wõt ke ran ko eliktata rar jino ilo 1914. Kiõ oran rein emwij an laplok ñõn juõn joñõn elap. Eor elõñlok jen 7,000,000 Dri Kennan ro an Jeova rej kwalok nan ibelakin lõl, im rej burukuk ilo elõñlok jen 100,000 congregation ko. Bareinwõt 10,000,000 armij rar kobalok iben Dri Kennan ro an Jeova ilo ien Kwojkwoj in Kememej ran in Mij eo an Jisõs ilo yiõ eo 2008. Oran ro rar itok ilo ien kwojkwoj eo ear laplok jen kar yiõ eo moktalok.

8. Etke jej lo wõt tõbrõk ilo jerbal in kwalok nan meñe eor rej kajeoñ kabwijrõke?

⁸ Ej juõn menin kennan ñõn ailiñ otemjelok kin Ailiñ eo an Anij mokta jen an jukjuk im ber in jemlok! Men in ej walok meñe Setan ej “anij in lõl in.” (2 Kor. 4:4) Aolep kien, kabuñ, im mõtõn business ko an lõl in im bareinwõt menin kareelel ko, rej ber iomin iroij eo an. Inem, ta un eo unin jej lo elap tõbrõk ilo jerbal in kwalok nan? Un eo wõt ej kinke Jeova ej ber ilikõn jerbal in. Kin men in, jerbal in kwalok nan kin Ailiñ eo ej wõnmanlok wõt meñe Setan ej kajeoñ in kabwijrõke.

9. Etke jemaroñ ba bwe tõbrõk ko ilo jerbal in kwalok nan im an laplok oran armij ro an Jeova im jelalokjen eo air kin e im karõk ko an, rej einwõt juõn menin bwilõñ?

⁹ Tõbrõk ko ilo jerbal in kwalok nan im an laplok oran armij ro an Jeova im jelalokjen eo air kin e im karõk ko an, remaroñ einwõt juõn menin bwilõñ. Ijellokin jibõñ eo an Anij ekoba an tel im kejbãrok armij  ro an, jerbal in kwalok nan eban kar maroñ wõnmanlok wõt. (Riit Matu 19:26.) Jemaroñ liki bwe kin an jitõb kwojarjar eo an Anij jerbal iben armij ro rej ekil im rej mõnõnõ in korijer ñõn e, enaj or tõbrõk ilo jerbal in kwalok nan, inem “ien eo e naj itok jemlokõn.” Ien in ej mõkõjtok wõt.

“Iñtan eo Elap”

10. Ewi wãwen Jisõs ear kwalok kin wãwen an naj itok iñtan eo elap?

¹⁰ Jemlokõn jukjuk im ber in enana enaj walok ilo “iñtan eo elap.” (Rev. 7:​14) Baibel eo ejjab kwalok kin ewi aitokin an naj jemlok ien in, bõtab Jisõs ear ba: “Bwe ilo ien eo e naj elap iñtan, eo e jañin einwõt jen jinoin lõl ñõn ien in, aet, e jamin einwõt tokelik.” (Mat. 24:21) Ñe jej lemnok kin iñtan eo me lõl in ear jelmaiki einwõt ilo Bata eo an Lõl in Kein Karuo me ekar or 50 ñõn 60 million armij ro rar mij, iñtan eo elap enaj laplok an nana. Enaj jemlok ilo tõrinae in Armagedõn. Eñin ien eo Jeova enaj kõtlok bwe jar in tõrinae eo an ekajur ren kokkure aolep rolul ko ilo jukjuk im ber in an Setan.​—Rev. 16:14, 16.

11, 12. Ta eo enaj walok ñe enaj jino iñtan eo elap?

¹¹ Kanan eo ilo Baibel ejjab letok ran eo kin ñãt eo enaj jino iñtan eo elap, bõtab ej kwalok ñõn kij ta men ko rekabwilõñlõñ renaj walok ilo ien in. Iñtan eo elap enaj jinoe ñe kien ko an lõl renaj kokkure rolul in kabuñ ko rewan. Ilo kanan eo ilo Reveles̃õn japter 17 im 18, ej keiri kabuñ ko rewan ñõn juõn kõra ekijoñ me ej lũñ iben kien ko an lõl in. Reveles̃õn 17:16 ej kwalok bwe mõtõn jidrik kien ko “re naj kijirãte kõra [eo] ekijoñ, im re naj kõmõn bwe en mõke ian im kelwan, im re naj kõñ kõniekin, im naj kanuij tile ilo kijeek.”

¹² Ñe men in enaj walok, Anij enaj “likit ilo burueir [kien ko an lõl] bwe ren kõmõnmõn ankil an” ñõn kokkure aolep kabuñ ko rewan. (Rev. 17:17) Inem ilo mol jemaroñ ba bwe Anij eo ear kokkure kabuñ ko. Eñin ej ekajet eo an nae kabuñ ko retao me eto air katakin armij kin katak ko rej nae ankilan Anij im rar matõrtõr ro dri korijeran. Armij ro ilo lõl in rejjab lemnok bwe kabuñ ko rewan renaj jorran. Bõtab dri korijer ro retiljek an Jeova rej kõtmene bwe men in enaj walok. Im jen ke ear jino ran ko eliktata ñõn kiõ, rej kwalok wõt ñõn armij ro kin men in.

13. Ta eo ej kwalok bwe buñ eo an kabuñ ko rewan enaj walok ilo mõkõj?

¹³ Armij ro renaj ilbõk ñe renaj lo an kabuñ wan buñ. Kanan eo ilo Baibel ej kwalok bwe jet ian “kiñ ro an lõl” renaj ba ikijen buñ eo an: “Wo, wo, . . . bwe ilo juõn auõ ekajet yuk e ar itok.” (Rev. 18:9, 10, 16, 19) Ñe Baibel eo ej ba “juõn auõ,” men in ej kwalok bwe ien in enaj walok ilo mõkõj.

14. Ewi wãwen an naj Anij emmakit ñe dri kijirãt ro an rej jino air kokkure ro dri korijeran?

¹⁴ Jejela bwe elikin wõt an kabuñ ko rewan buñ, renaj kajeoñ in kokkure dri korijer ro an Jeova, me rej keañ kin nan in ekajet ko an. (Ezek. 38:14-​16) Ñe ien kokkure in enaj jino, dri jumae ro renaj aikwij jelmaik Jeova, eo ej kalimur bwe enaj kejbãrok armij ro an retiljek. Jeova ej ba: “Ij kwalok  ilo bwilin aõ illu. . . . Innem renaj jelã ke ña Iroij.” (Riit Ezekiel 38:18-​23.) Anij ej ba ilo Nan eo an: “Eo ej uñir kom [dri korijer ro an retiljek] ej uñir iju in meja.” (Zech. 2:8, NW) Inem ñe dri kijirãt ro rej jino air kokkure ro dri korijeran, Jeova enaj emmakit. Men in enaj tellok ñõn Armagedõn, mõtõn eo eliktata ilo iñtan eo elap. Iomin tel eo an Kraist, enjel ro rekajur renaj bõktok ekajet eo an Jeova nae lõl in an Setan.

Wãwen En kar Jelet Kij

15. Kin ar jela bwe ebak jemlokõn jukjuk im ber in, ewi wãwen men in en kar jelet kij?

¹⁵ Kin ar jela bwe ebak jemlokõn jukjuk im ber in enana, ewi wãwen men en kar jelet kij? Dri jilik Piter ear je: “Inem, bwe naj ein drein an men kein otemjej unlok, ta men eo komin wõjake ilo kõmõn wãnik im kabuñ rokwojarjar!” (2 Pit. 3:​11) Nan kein rej kalikar ar aikwij kejbãrok bwe wãwen mwilid en errã iben kien ko an Anij. Bareinwõt rej kwalok bwe jerbal eo ekwojarjar ej aikwij mõtõn mour eo ar im en kalikar ar yokwe Jeova. Wãwen kein rej koba kwalok nan kin nuuj eo emõn kin Ailiñ eo joñõn wõt ar maroñ mokta jen an itok jemlokõn. Bareinwõt Piter ear je: “Jemlokin men otemjej ebaktok. Komin . . . ekkõl, bwe komin kab maroñ in jar.” (1 Pit. 4:7, UBS) Jej druaklok ñõn Jeova im kwalok bwe jej yokwe e ilo ar niknik in jar ñõn e im kajitõk bwe en tel kij ikijen jitõb kwojarjar im rolul eo an ibelakin lõl.

16. Etke jej aikwij lukkun edrep ñõn nan in kakabilek eo an Anij?

¹⁶ Ilo ien kein rekauwatata jej aikwij lukkun edrep ñõn nan in kakabilek eo ilo Nan in Anij: “Inem komin kanuij lale ekijkan ami etetal, jab einwõt dri jaje, a einwõt dri meletlet; Im wiaik ien, bwe ran ko renana.” (Ep. 5:15, 16) Elaplok nana ilo ran kein jen kar mokta. Emwij an Setan kõmõn elõñ men ko ñõn kabwijrõk ak kamad armij ro jen air kõmõnmõn ankil an Jeova. Einwõt ro dron Jeova, jej jela men in, im jejjab kõnan kõtlok bwe jabrewõt men en kokkure tiljek eo ar ñõn Anij. Bareinwõt jejela ta eo mõtõn jidrik enaj walok, im jej likit wõt ar liki ilo Jeova im karõk ko an.​—Riit 1 Jon 2:​15-​17.

17. Kemelele kin ewi wãwen an ro renaj elã im mour ilo Armagedõn emmakit ñe ro remij renaj jerkakbiji.

¹⁷ Kalimur eo ekabwilõñlõñ an Anij bwe enaj kajeblak mour ko an ro remij enaj jejit kitien kinke “ro remõn im ro renana re naj jerkakbiji.” (Jerb. 24:15) Lale mõk joñõn an kajur kalimur in, ej ba: “Ro remõn im ro renana re naj jerkakbiji”! Jej liki bwe men in enaj walok kinke emwij an Jeova kalimur kake! Baibel eo ej kalimur: “Ro mõttam im rar mij renaj bar mour! . . . Ro otemjej rej kiki ilo lubeir renaj ruj im al kin air mõnõnõ! . . . Iroij enaj kemour ro eto air kar mij.” (Ais. 26:19, UBS) An kar Anij kajejit kitien kanan ko jet, men in ej kakajurlok liki eo ar bwe enaj bareinwõt kajejit kitien kanan in ilo lõl eo ekãl. Enaj juõn ien ekalõñliñ ñe ro rej jerkakbiji renaj bar burukuk iben ro rejitenburu ibeir! Aet, jemlokõn lõl eo an Setan ej ebak im mõtõn jidrik lõl eo ekãl an Anij enaj itok. Kin men in, ekanuij aurõk bwe jen ekil wõt!

Kwoj Kememej Ke?

• Kar ta unin tel in kwalok nan eo an Jisõs?

• Ewi joñõn an jededlok jerbal in kwalok nan kin Ailiñ eo kiõ?

• Etke eaurõk bwe jen ekil wõt?

• Ta eo ej rejañ yuk kin kalimur eo ilo Jerbal 24:15?

[Kajitõk ko ñan katak]

[Bo̦o̦k/Pija eo ilo peij 16]

IEN BWOKTAK EAR IJJINO

Ilo 2007, Alan Greenspan ear je juõn buk etan Ien Bwoktak: Men ko rej Walok ilo juõn Ebeben Ekãl. Iomin enañin 20 yiõ ko, lein ear jeban rolul eo me ej lolorjake jããn ko an Amerika. Ear kalikar oktõk ko ikõtan wãwen ko rar walok ilo lõl in mokta jen 1914 im elikin, ke ear ba:

“Bwebwenato ko an armij rej kwalok bwe mokta jen 1914, joñõn an lap an kar armij im ailiñ ko koutiej dron im kõmõn wõnmanlok ko ilo jela im kabel, ear einwõt ñe jukjuk im ber an armij enaj kar tõbar juõn mour ejokane im ainemõn. Ilo yiõ ko 1800-1899 ear bwijrõk wiakake armij bwe ren dri kamakoko. Ear driklok an armij kowaroñ.  . . Jerbal ko rekabel an armij ibelakin lõl rar wõnmanlok ilo 1800 jima ko ikijen air kõmõn train im ial in itoitak ko, telephone ko, jarom, pija in aluij ko, waan ettõr ko, im men ko kõbwebweien juõn em me rekanuij lõñ ñõn kwalok aolepeir. Tõbrõk ko rej itok jen taktõ ro kin ejmour, an lõñlok mõña ko reuõne im erreo dren in irak ko rar kõmõn bwe en aitoklok an armij mour. . . . Ikijen wõnmanlok kein armij rar lemnok bwe enaj kar eindrein manlok wõt.”

Bõtab . . . “Meñe Bata eo an Lõl Kein Karuo ear lap an kokkure armij, ear laplok an nana Bata eo an Lõl Kein Kajuõn kinke ear ien eo jinointata me ear kokkure ainemõn im jokõne ikõtan armij ro ibelakin lõl. Ijjab maroñ meloklok kin wãwen mour an armij mokta jen kar Bata eo an Lõl Kein Kajuõn, ke ejelok joñõn an armij ro kõmõn wõnmanlok ko kin mour. Lemnok eo ar kin mour ej oktõk jen kar jibuki yiõ ko remotlok im ej jejit kin men ko jej loi ilo lõl in ranin. Menin kamijak ko, an laplok an bwil mejatoto, im menin kõtõbar ko an kien, renaj ke ukot mour ko an armij ro ibelakin lõl einwõt an kar Bata eo an Lõl Kein Kajuõn kõmõne ñõn yiõ ko mokta? Ejelok juõn ejela uak eo.”

Greenspan ej kememejtok ien eo ke ear jikuul ilo college im juõn dri kaki in Economic etan Benjamin M. Anderson (1886-1949) ear ba nan kein ilo buk eo Jããn im Aikwij ko an Aolep: “Ro me reridto im rej kememej wõt im jela kin wãwen mour eo mokta jen kar Bata eo an Lõl Kein Kajuõn rej reiliklok im ememlokjen kin ien ko. Ear juõn ien ear lap jokõne me ejañin bar walok ñõn ranin.”

Jej lo ejja lemnok eo wõt ilo buk eo etan Juõn Lõl Ejorran, me G.J. Meyer ear je ilo 2006. Ej ba: “Ekkã air ba bwe men ko rar walok ilo bwebwenato rar ‘ukot men otemjej.’ Ekanuij in mol men in ikijen Bata eo an Lõl Kein Kajuõn [1914-​1918] me ear walok. Tõrinae in ear lukkun ukot men otemjej, ear jab baj kijbil wõt ailiñ ko, kien im ilju eo an ailiñ ko, ak bareinwõt lemnok eo an armij kin wãwen ko rej walok ilo lõl in im kin ir mõke. Ear oktõk ñõn mour eo jej loe ranin me ejjab einwõt kar mour eo ejokane mokta.”

[Pija eo ilo peij 18]

Ilo Armagedon, Jeova enaj kotlok jar in torinae ilo enjel ro rekajur