“Le Phakgame”
“Le Phakgame”
“Bofelo bja dilo tšohle bo batametše. . . . Le phakgame ge e le mabapi le dithapelo.”—1 PET. 4:7.
1. Sehlogo sa thuto ya Jesu e be e le sefe?
GE Jesu Kriste a be a le lefaseng, sehlogo sa thuto ya gagwe e be e le Mmušo wa Modimo. A diriša Mmušo woo, Jehofa o tla phagamiša bogoši bja gagwe bja legohle gomme a kgethagatša leina la gagwe. Ka baka leo, Jesu o ile a ruta barutiwa ba gagwe gore ge ba rapela Modimo ba re: “Mmušo wa gago a o tle. Thato ya gago a e direge le mo lefaseng bjalo ka ge e direga legodimong.” (Mat. 4:17; 6:9, 10) Go se go ye kae, Mmušo woo o tla fediša lefase la Sathane gomme wa kgonthišetša gore thato ya Modimo e a dirwa lefaseng ka bophara. Bjalo ka ge Daniele a boletše e sa le pele, Mmušo wa Modimo “o tlo phšatla mebušô e mengwê ka moka [ya mehleng yeno] wa e fediša; xe e le wôna, o tlo êma xo ya xo ile.”—Dan. 2:44.
2. (a) Balatedi ba Jesu ba be ba tla tseba bjang gore o matleng a Mmušo? (b) Ke’ng se sengwe seo pontšho e bego e tla se bontšha?
2 Ka ge go tla ga Mmušo wa Modimo go be go le bohlokwa kudu go balatedi ba Jesu, ba ile ba mmotšiša gore: “Pontšho ya go ba gona ga gago le ya bofelo bja tshepedišo ya dilo e tla ba eng?” (Mat. 24:3) Pontšho e bonagalago e be e tla newa ka gobane go ba gona ga Kriste a le matleng a Mmušo go be go ka se bonwe ke batho ba lego lefaseng. Pontšho ye e be e tla bopša ke ditiragalo tše di fapa-fapanego tšeo Mangwalo a boletšego ka tšona e sa le pele. Ka go dumelelana le seo, balatedi ba Jesu bao ba tla bego ba phela ka nako yeo ba be ba ka lemoga gore o thomile go buša legodimong. Le gona e be e tla swaya mathomo a lebaka la nako leo Beibele e rego ke ‘mehla ya bofelo’ ya tshepedišo e kgopo ya dilo yeo e bušago lefase gona bjale.—2 Tim. 3:1-5, 13; Mat. 24:7-14.
Le Phakgame mo Mehleng ya Bofelo
3. Ke ka baka la’ng Bakriste ba be ba tla swanelwa ke go phakgama?
3 Moapostola Petro o ngwadile gore: “Bofelo bja dilo tšohle bo batametše. Ka gona, hlaphogelwang monaganong, gomme le phakgame ge e le mabapi le dithapelo.” (1 Pet. 4:7) Balatedi ba Jesu ba tla swanelwa ke gore ba phakgame e bile ba phafogele ditiragalo tša lefase tšeo di bontšhago gore o gona gomme o matleng a Mmušo. Le gona go phakgama ga bona go be go tla akgofa le go feta ge bofelo bja tshepedišo ya gona bjale e kgopo ya dilo bo batamela. Jesu o boditše barutiwa ba gagwe gore: “Dulang le phakgame, gobane ga le tsebe nako yeo mong wa ntlo a tlago ka yona [go tlo phethagatša kahlolo lefaseng la Sathane].”—Mar. 13:35, 36.
4. Nea phapano magareng ga boemo bja kgopolo bja batho bao e lego karolo ya lefase la Sathane le bja bahlanka ba Jehofa. (Akaretša lepokisi.)
4 Batho ka kakaretšo ba tlase ga taolo ya Sathane gomme ga se ba phafoga ge e le mabapi le seo se bolelwago ke ditiragalo tša lefase. Ga ba lemoge go ba gona ga Kriste a le matleng a Mmušo. Eupša balatedi ba kgonthe ba Kriste ba be ba dutše ba phakgame e bile ba lemoga seo ruri se bolelwago ke seo se diregilego ngwaga-kgolong o fetilego. Ga e sa le go tloga ka 1925, Dihlatse tša Jehofa di lemogile gore Ntwa ya I ya Lefase le ditiragalo tšeo di latetšego di bontšha e le ka kgonthe gore go ba gona ga Kriste a le matleng a Mmušo wa legodimong go thomile ka 1914. Ka gona, mehla ya bofelo bja tshepedišo e kgopo ya dilo e laolwago ke Sathane e thomile. Batho ba bantši bao ba šetšago, gaešita le ge ba sa tsebe seo di se bolelago, ba lemoga phapano ya ditiragalo tša pele ga Ntwa ya I ya Lefase le tša nako ya ka morago ga yona.—Bona lepokisi le le rego “Mehla ya Khuduego e Thomile.”
5. Ke ka baka la’ng go le bohlokwa gore re tšwele pele re phakgame?
5 Mo e ka bago lebaka la ngwaga-kgolo ga bjale, ditiragalo tše di tšhošago tšeo di diregago lefaseng ka bophara di nea bohlatse bja gore re phela mehleng ya bofelo. Go šetše nako e nyenyane kudu pele Jehofa a nea Kriste taelo ya gore a ete pele madira a matla a barongwa kgahlanong le lefase la Sathane. (Kut. 19:11-21) Bakriste ba therešo ba botšwa gore ba dule ba phafogile. Ka go rialo, ke mo go akgofilego go tšwela pele re dira bjalo ge re dutše re letile bofelo bja tshepedišo ye. (Mat. 24:42) Re swanetše go dula re phafogile gomme ka tlhahlo ya Kriste, re phethe modiro o kgethegilego lefaseng ka bophara.
Modiro wa Lefase ka Bophara
6, 7. Modiro wa go bolela ka Mmušo o gatetše pele bjang mo mehleng ya bofelo?
6 Modiro woo bahlanka ba Jehofa ba swanetšego go o dira o boletšwe e sa le pele e le karolo ya pontšho e bopaganego yeo e bontšhago gore re mehleng ya bofelo bja tshepedišo e kgopo ya gona bjale ya dilo. Jesu o boletše ka modiro wo wa lefase ka bophara ge a be a lokeletša dilo tše di fapa-fapanego tšeo di bego di tla direga lebakeng la bofelo. Boporofeta bja gagwe bo ile bja akaretša mantšu a a bohlokwa, a rego: “Ditaba tše tše dibotse tša mmušo di tla bolelwa lefaseng ka moka le go agilwego go lona gore e be bohlatse go ditšhaba tšohle; ke moka bofelo bo tla tla.”—Mat. 24:14.
7 Nagana ka dilo tše dingwe tšeo di tswalanago le boporofeta bja Jesu. Palo ya batho bao ba bego ba bolela ditaba tše dibotse e be e le e nyenyane kudu ge mehla ya bofelo e be e thoma ka 1914. Gona bjale palo yeo e oketšegile kudu. Go na le Dihlatse tša Jehofa tše di fetago tše 7 000- 000 tšeo di dirago boboledi lefaseng ka bophara, tše di rulagantšwego ka diphuthego tše fetago tše 100 000. Batho ba bangwe ba 10 000 000 ba ile ba tlatša Dihlatse tša Jehofa ka 2008 ge di be di bokane gotee bakeng sa Segopotšo sa lehu la Kriste. Yeo e bile koketšego e kgolo go ba bilego gona ngwaga o fetilego.
8. Ke ka baka la’ng kganetšo e sa ka ya thibela katlego ya modiro wa rena?
8 Ruri go newa bohlatse bjo bogolo mabapi le Mmušo wa Modimo ditšhabeng ka moka pele bofelo bja tshepedišo ye ya dilo bo fihla! Seo se direga go sa šetšwe gore Sathane ke “modimo wa tshepedišo ye ya dilo.” (2 Bakor. 4:4) Ke yena a tutuetšago dikarolo ka moka tša dipolitiki, tša bodumedi le tša kgwebo tša lefase le gotee le mekero ya lona ya diphatlalatšo tša maaka. Ka gona, ke ka baka la’ng modiro wa go nea bohlatse o atlega ka tsela e kgahlišago gakaakaa? Jehofa o swanetše go ba a o thekga. Ka baka leo, modiro wa go bolela ka Mmušo o tšwela pele ka tsela e kgahlišago go sa šetšwe maiteko a Sathane a go o kgaotša.
9. Ke ka baka la’ng go ka thwe katlego ya rena ya moya ke mohlolo?
9 Katlego ya modiro wa go bolela ka Mmušo, kgolo gotee le katlego ya moya ya batho ba Jehofa di ka hlaloswa e le mohlolo. Ka ntle le thekgo ya Modimo, yeo e akaretšago tlhahlo ya gagwe le tšhireletšo yeo a e fago batho ba gagwe, modiro wa boboledi o be o ka se atlege. (Bala Mateo 19:26.) Re ka kgodišega gore ge moya o mokgethwa wa Modimo o šoma dipelong tša batho bao ba phakgamego bao ba ikemišeditšego go hlankela, modiro wo wa boboledi o tla phethwa ka katlego go fihla mafelelong, “ke moka bofelo bo tla tla.” Nako yeo e batamela ka lebelo.
‘Masetlapelo a Magolo’
10. Jesu o ile a hlalosa bjang masetlapelo a magolo a tlago?
10 Bofelo bja tshepedišo ye e kgopo bo tla tla ka seo se bitšwago ‘masetlapelo a magolo.’ (Kut. 7:14) Beibele ga e re botše gore a tlo tšea nako e kae, eupša Jesu o itše: “Ka nako yeo go tla ba le masetlapelo a magolo a sa kago a ba gona ga e sa le go tloga mathomong a lefase go ba go fihla gona bjale, aowa, le go ba gona a ka se sa ba gona gape.” (Mat. 24:21) Ge re ela hloko masetlapelo ao lefase le le šetšego le bile le ona, a bjalo ka ao a bilego gona Ntweng ya II ya lefase ge batho bao ba akanyetšwago go ba dimilione tše 50 go ya go tše 60 ba be ba lahlegelwa ke maphelo a bona, ruri masetlapelo a magolo ao a tlago e tla ba a šoro kudu. A tla fihla seremong sa ona ka Haramagedone. Yeo ke nako ya ge Jehofa a tla lokolla madira a gagwe ao a phethago kahlolo gore a fediše selo se sengwe le se sengwe sa tshepedišo ya lefase la Sathane.—Kut. 16:14, 16.
11, 12. Ke tiragalo efe yeo e swayago mathomo a masetlapelo a magolo?
11 Boporofeta bja Beibele ga bo nee letšatši-kgwedi la gore masetlapelo a magolo a tla thoma neng, eupša bo re botša ka tiragalo e sa tlwaelegago yeo e tlago go swaya mathomo a ona. Tiragalo yeo ke ya ge bodumedi bja maaka ka moka bo fedišwa ke mebušo ya dipolitiki. Boporofeteng bja Beibele bjoo bo hwetšwago go Kutollo dikgaolo 17 le 18, bodumedi bja maaka bo swantšhwa le mogweba-ka-mmele yoo a otswitšego le ditshepedišo tša lefase tša dipolitiki. Kutollo 17:16 e bontšha gore go se go ye kae go tla tla nako ya ge mebušo ya dipolitiki e “tla hloya mogweba-ka-mmele tša mo šwalalanya le go mo hlobodiša, gomme tša ja dinama tša gagwe tša mo fiša ka mo go feletšego ka mollo.”
12 Ge go fihla nako ya gore seo se direge, Modimo o tla ‘tsentšha dipelong tša babuši ba dipolitiki kgopolo ya gagwe’ ya gore ba fediše bodumedi bja maaka ka moka. (Kut. 17:17) Ka go rialo, go ka thwe phedišo ye e tšwa go Modimo. Ke kahlolo ya gagwe kgahlanong le bodumedi bja boikaketši bjoo ka nako e telele bo rutilego dithuto tšeo di sa kwanego le thato ya Modimo e bile bo tlaišitšego bahlanka ba gagwe. Lefase ka kakaretšo ga se la letela go tla ga phedišo ye ya bodumedi bja maaka. Eupša bahlanka ba botegago ba Jehofa ba e letetše. Le gona mehleng ye ya bofelo, ba be ba dutše ba botša batho ka yona.
13. Ke’ng seo se bontšhago gore bodumedi bja maaka bo tla fedišwa ka lebelo?
13 Batho ba tla makatšwa kudu ke go bona bodumedi bja maaka bo fedišitšwe. Boporofeta bja Beibele bo bontšha gore gaešita le “dikgoši [tše dingwe] tša lefase” di tla bolela mabapi le phedišo yeo gore: “Joo, joo, . . . gobane kahlolo ya gago e fihlile ka nako e tee!’” (Kut. 18:9, 10, 16, 19) Taba ya gore Beibele e dirišitše mantšu a rego “ka nako e tee” e bontšha gore tiragalo ye e tla direga ka lebelo le le ka se bapišwego.
14. Ge mafelelong manaba a Jehofa a hlasela bahlanka ba gagwe, Modimo o tla arabela bjang?
14 Re a tseba gore nako e itšego ka morago ga phedišo ya bodumedi bja maaka, go tla hlaselwa bahlanka ba Jehofa, bao ba bego ba dutše ba tsebatša melaetša ya gagwe ya kahlolo. (Hesek. 38:14-16) Ge tlhaselo yeo e thoma, bahlasedi bao ba tla swanelwa ke go lebana le Jehofa, yoo a holofetšago gore o tla šireletša batho ba gagwe bao ba botegago. Jehofa o re: “Ke bolêla kè tuka boxale wa mollô, ke re . . . [ba tla] tseba xe Morêna è le Nna.” (Bala Hesekiele 38:18-23.) Modimo o bolela ka Lentšung la gagwe gore: “Yo a kgwathišago lena [bahlanka ba gagwe ba botegago], o kgwathiša thaka ya leihlo [la-ka].” (Sak. 2:8, PK) Ka gona, ge manaba a gagwe a thoma go hlasela bahlanka ba gagwe lefaseng ka bophara, Jehofa o tla arabela. O tla gata mogato woo o lebišago karolong ya mafelelo ya masetlapelo a magolo—seremo sa ona sa Haramagedone. Ka tlhahlo ya Kriste, madira a matla a barongwa a tla phethagatša kahlolo ya Jehofa kgahlanong le lefase la Sathane.
Kamoo re Swanetšego go Kgomega ka Gona
15. Re swanetše go kgongwa bjang ke go tseba gore bofelo bja tshepedišo ye bo kgaufsi?
15 Go tseba gore bofelo bja tshepedišo ye e kgopo bo batamela ka lebelo go swanetše go re kgoma bjang? Moapostola Petro o ngwadile gore: “Ka ge dilo tše ka moka di tla tologa ka tsela yeo, gona le swanetše go ba batho ba mohuta ofe ditirong tše kgethwa tša boitshwaro le medirong ya boineelo go Modimo”! (2 Pet. 3:11) Mantšu ao a gatelela go nyakega ga gore re dule re phafogile go kgonthišetša gore boitshwaro bja rena bo dumelelana le ditaelo tša Modimo le gore re phetha mediro ya boineelo go Modimo, yeo e bonagatšago gore re rata Jehofa. Ditiro tše bjalo di akaretša go dira seo re se kgonago ge re bolela ditaba tše dibotse tša Mmušo pele bofelo bo fihla. Le gona Petro ngwadile gore: “Eupša bofelo bja dilo tšohle bo batametše. . . . Le phakgame ge e le mabapi le dithapelo.” (1 Pet. 4:7) Re batamela kgaufsi le Jehofa le go bontšha gore re a mo rata ka go dula re mo rapela, re mo kgopela gore a re hlahle ka moya wa gagwe o mokgethwa le phuthego ya gagwe ya lefase ka bophara.
16. Ke ka baka la’ng re swanetše go kgomarela keletšo ya Modimo?
16 Mo mehleng e kotsi, re swanetše go kgomarela keletšo ya Lentšu la Modimo e rego: “Dulang le phakgametše gore kamoo le sepelago ka gona ga se bjalo ka batho ba ba sa hlalefago eupša ke bjalo ka ba bohlale, le ithekele nako e swanetšego gobane mehla ke e mebe.” (Baef. 5:15, 16) Gona bjale go tletše bokgopo go feta le ge e le neng pele historing. Sathane o logile maano a mantši bakeng sa go thibela batho go dira thato ya Jehofa goba bakeng sa go fo ba šitiša. Bjalo ka bahlanka ba Modimo, re tseba se gomme ga re nyake go dumelela selo le ge e le sefe se dira gore re se sa botegela Modimo. Le gona re tseba seo se tlago go direga kgaufsinyane gomme re beile kholofelo ya rena go Jehofa le merero ya gagwe.—Bala 1 Johane 2:15-17.
17. Hlalosa kamoo baphologi ba Haramagedone ba tlago go arabela ka gona ge go tsošwa bahu.
17 Kholofetšo e botse yeo Modimo a e dirilego ya go bušetša bahu bophelong e tla phethagala, ka gobane “go tla ba le tsogo ya ba lokilego gotee le ba sa lokago.” (Dit. 24:15) Ela hloko kamoo kholofetšo yeo e gatelelwago ka gona: “Go tla ba le tsogo”! Ga go pelaelo gore se se tla direga ka gobane Jehofa ke yena yo a holofetšago! Jesaya 26:19 e nea kholofetšo e rego: “Bahu ba xaxo ba tlo phela. . . . Phafoxang! Hlalalang! Ba Le robetšexo leroleng; . . . ’me lefase le tlo nthša ba hwilexo.” Phethagalo ya pele ya mantšu ao e bile ge batho ba Modimo ba bogologolo ba be ba boela nageng ya gabo bona gomme se se re nea kgodišego ya gore boporofeta bjo bo tla phethagala ka go lebanya lefaseng le lefsa. E tla ba lethabo le legolo gakaakang ge bao ba tsošitšwego ba boelanywa le baratiwa ba bona! Ee, bofelo bja lefase la Sathane bo kgaufsi gomme lefase le lefsa la Modimo le batametše. Ruri go bohlokwa gore re dule re phakgame!
Na o a Gopola?
• Sehlogo sa thuto ya Jesu e be e le sefe?
• Modiro wa go bolela ka Mmušo o phatlaletše gakaaka’ng gona bjale?
• Ke ka baka la’ng go dula re phakgame go le bohlokwa?
• Ke’ng seo se go kgothatšago ka kholofetšo e lego go Ditiro 24:15?
[Dipotšišo tša Thuto]
[Lepokisi/Seswantšho go letlakala 16, 17]
MEHLA YA KHUDUEGO E THOMILE
Sehlogo sa puku ya 2007 ya Alan Greenspan se re The Age of Turbulence: Adventures in a New World. Ka nywaga e nyakilego go ba e 20, o bile modula-setulo wa mokgatlo wa United States Federal Reserve Board, woo o okametšego tshepedišo ka moka ya motheo ya tša panka. Greenspan o bontšha phapano e lemogegago magareng ga maemo a lefase a pele ga 1914 le a ka morago, o re:
“Go ya ka dipego ka moka tšeo di lego gona, lefase pele ga 1914 le be le bonagala le tšwela pele le bontšha dika tše di phagamego tša tlhompho le tlhabologo; moloko wa batho o be o bonagala o ka phethagala. Lekgolo la bo-19 la nywaga le be le fedišitše kgwebo e mpe ya bokgoba. Bošoro bjo bo tlontlollago batho bo be bo bonagala bo fela. . . . Dilo di be di hlangwa ka lebelo le legolo ngwaga-kgolong wa bo-19, go dirwa diporo, megala, mabone a mohlagase, mafelo a dipaesekopo, dikoloi le didirišwa tša ka ngwakong tše dintši kudu go ka balwa. Thutamahlale ya tša kalafo, go kaonefatšwa ga phepo gotee le go abja mo gogolo ga meetse a go nwa di okeditše kholofelo ya gore motho o tla phela ka nako e telele . . . Bohle ba be ba nagana gore tšwelopele ye e be e ka se šitišwe.”
Eupša . . . ”Ntwa ya I ya Lefase e ile ya šitiša tlhomphano le tlhabologo go feta Ntwa ya II ya Lefase yeo e ilego ya senya kudu: ntwa ya pele e ile ya fediša kgopolo yeo. Ga ke kgone go lebala nywaga yeo ya pele ga Ntwa ya I ya Lefase, ge tšwelopele ya batho e be e bonagala e ka se šitišwe e bile e ka se lekanyetšwe. Lehono pono ya rena e fapana ka mo go feletšego le ya ngwaga-kgolo o fetilego eupša mohlomongwe e bontšha kamoo bophelo bo lego ka gona. Na botšhošetši, go ruthela ga lefase goba dikgopolo tšeo di tsošološitšwego tša bopolitiki di ka fetoša bophelo bja gona bjale bjo bo hlabologago bja lefase ka moka go swana le ge Ntwa ya I ya Lefase e fetotše bophelo bja nakong e fetilego? Ga go motho yoo a ka arabago potšišo ye ka kgodišego.”
Ge e be e sa le morutwana, Greenspan o ile a gopola mantšu ao a a kwelego a Moprofesara wa tša Boiphedišo Benjamin M. Anderson (1886-1949) a rego: “Bao e lego ba bagolo ka mo go lekanego go gopola le go kwešiša kamoo lefase le bego le le ka gona pele ga Ntwa ya I ya Lefase ba gopola morago ka tlhologelo e kgolo. Ka nako yeo batho ba be ba ikwa ba e-na le tšhireletšego yeo e sa kago ya ba gona ka morago ga moo.”—Economics and the Public Welfare.
Go fihlelelwa phetho e swanago ka bolumong ya A World Undone, ya G. J. Meyer, yeo e gatišitšwego ka 2006. E balega ka gore: “Gantši go thwe ditiragalo tša histori di ‘fetotše dilo tšohle.’ Mabapi le Ntwa e Kgolo [1914-1918], se e bile therešo. Ntwa yeo ruri e ile ya fetoša dilo tšohle: e sego mellwane feela, e sego mebušo feela le pheletšo ya ditšhaba, eupša e ile ya fetoša le tsela yeo batho ba ilego ba lebelela lefase gotee le go itebelela ka yona ga e sa le go tloga ka nako yeo. E ile ya šia seo o ka rego ke lešoba ge nako e dutše e e-ya, ya tlogela lefase la ka morago ga ntwa le tlogelane ka mo go feletšego le tšohle tšeo di diregilego pele ga yona.”
[Seswantšho go letlakala 18]
Ka Haramagedone, Jehofa o tla lokolla madira a matla a barongwa