“Sea Alerta”

“Sea alerta tur ora bai, hasiendo orashon.”​—LUK. 21:36.

1. Kiko tabata e tema di Hesus su siñansa?

TEMPU ku Hesukristu tabata riba tera, e tema di su siñansa tabata e Reino di Dios. Mediante e Reino ei, Yehova lo vindiká su soberania universal i santifiká su nòmber. P’esei, Hesus a siña su disipelnan pa hasi orashon na Dios asin’akí: “Ku bo reino bin. Ku bo boluntat sosodé na tera meskos ku den shelu.” (Mat. 4:17; 6:​9, 10) Denter di poko, e Reino ei lo pone un fin na e mundu di Satanas, i despues lo e perkurá pa hende hasi e boluntat di Dios riba henter e tera. Manera Daniel a profetisá, e Reino di Dios “lo garna i pone un fin na tur e reinonan akí [ku ta eksistí awe], ma e mes lo dura pa semper.”​—Dan. 2:44.

2. (a) Kon e siguidónan di Hesus por a sa ku e tabata presente komo rei? (b) Kiko mas e señal lo a indiká?

² Debí ku Hesus su siguidónan tabata masha interesá den e binida di e Reino di Dios, nan a puntr’é: “Kiko lo ta e señal di bo presensia i dje konklushon dje sistema di kosnan?” (Mat. 24:3, NW) Kristu a duna nan un señal visibel ya ku su presensia den poder di Reino lo tabata invisibel pa hende riba tera. E señal ei lo a konsistí di vários rasgo ku e Skritura a profetisá. P’esei, e siguidónan di Hesus, ku tabata na bida ora el a kuminsá goberná den shelu, por a diserní su presensia. Ademas, e señal lo a indiká e komienso di e periodo ku Beibel ta yama “e último dianan” di e mal sistema di kosnan ku aktualmente ta dominá e mundu.​—2 Tim. 3:​1-5, 13; Mat. 24:​7-14.

Sea Alerta den e Último Dianan

3. Dikon kristiannan mester ta alerta?

³ Hesus a urgi su disipelnan: “Tene kuidou . . . pasobra e [fin] lo bin riba tur esnan ku ta biba riba superfisie di henter mundu. Ma sea alerta tur ora bai, hasiendo orashon.” (Luk. 21:​34-36) Hesus su siguidónan mester a keda alerta, esta, keda vigilá susesonan di mundu pa nan por a haña sa ki ora el a kuminsá goberná komo rei. I segun ku e fin di e mal sistema di  kosnan akí ta aserkando, nan mester ta mas alerta. Hesus a bisa su disipelnan: “Keda alerta, pasobra boso no sa ki ora e señor di e kas ta bin [pa ehekutá huisio riba e mundu di Satanas].”​—Mar. 13:​35, 36.

4. Kiko ta e diferensia entre hende ku ta parti di e mundu di Satanas i Yehova su sirbidónan? (Inkluí kuadro.)

⁴ Hende en general ta bou di dominio di Satanas, i nan no ta alerta pa por komprondé e nifikashon di susesonan mundial. Nan no ta diserní ku Kristu a kuminsá goberná komo rei di e Reino selestial. Pero Kristu su berdadero siguidónan sí tabata alerta i nan a diserní e berdadero nifikashon di loke a pasa durante e último shen añanan. Desde 1925, Testigunan di Yehova ta rekonosé ku Promé Guera Mundial i e susesonan ku a siguié ta duna evidensia sólido ku Kristu a kuminsá goberná den shelu na 1914. Pues, e último dianan di e mal sistema di kosnan akí bou di dominio di Satanas a kuminsá. Hopi hende ku ta bon opservadó ta rekonosé ku tin un diferensia remarkabel entre e periodo promé ku Promé Guera Mundial i e periodo despues di esei, pero nan no sa kiko esaki ta nifiká.​—Wak e kuadro “E Époka di Turbulensia A Kuminsá.”

5. Dikon ta di sumo importansia pa nos keda alerta?

⁵ Pa kasi un siglo kaba, susesonan horendo ku ta sosodé rònt mundu ta duna evidensia ku nos ta bibando den e último dianan. Falta masha poko tempu pa Yehova duna Kristu e mandato pa dirigí e poderoso ehérsito di angel kontra e mundu di Satanas. (Rev. 19:​11-21) Kristiannan berdadero a haña e spièrtamentu pa keda alerta. P’esei, ta masha importante pa nos sigui hasi esei segun ku nos ta spera ansiosamente riba e fin di e sistema akí. (Mat. 24:42) Nos tin ku keda alerta, i bou di Kristu su guia, nos tin ku hasi un trabou spesial rònt mundu.

Un Trabou Mundial

6, 7. Kon e trabou di prediká e Reino a progresá durante e último dianan?

⁶ Beibel a profetisá di e trabou ku Yehova su  sirbidónan mester hasi komo parti di e señal komponí ku ta indiká ku nos ta den e último dianan di e mal sistema di kosnan akí. Hesus a deskribí e trabou mundial akí ora el a menshoná vários kos ku lo a tuma lugá den e tempu di fin. Su profesia a inkluí e deklarashon signifikativo akí: “E evangelio akí di e reino lo wòrdu prediká den henter mundu komo un testimonio na tur nashon, i e ora ei e fin lo yega.”​—Mat. 24:14.

⁷ Konsiderá algun sifra relashoná ku e rasgo ei di Hesus su profesia. Ora ku e último dianan a kuminsá na 1914, e kantidat di hende ku tabata proklamá e bon nobo tabata masha chikitu. Desde e tempu ei padilanti, e kantidat ei a oumentá konsiderablemente. Tin mas ku 7.000.000 Testigu di Yehova—organisá den mas ku 100.000 kongregashon—ta prediká rònt mundu. Na aña 2008, tabatin un kantidat adishonal di 10.000.000 hende ku a reuní ku Testigunan di Yehova pa selebrá e Memorial di Kristu su morto. Kompará ku e aña anterior, e asistensia a oumentá konsiderablemente.

8. Dikon oposishon no por evitá ku nos trabou di prediká ta un éksito?

⁸ Manera nos por ripará, un testimonio kabal tokante e Reino di Dios ta ser duná na tur nashon promé ku e fin di e sistema akí yega. I esei ta sosodé maske Satanas ta “e dios di e mundu akí.” (2 Kor. 4:4) Komo tal, e ta influensiá tur e elementonan religioso, polítiko i komersial di e mundu akí i nan medionan di plama informashon. Pero apesar di esei, e trabou di prediká ta un éksito. Kon bin? Pasobra e tin e apoyo di Yehova. Sí, e trabou di prediká e Reino ta sigui progresá na un manera asombroso apesar di Satanas su intento pa par’é.

9. Dikon nos por deskribí nos prosperidat spiritual komo un milager?

⁹ Nos por deskribí e éksito di e trabou di prediká e Reino i e echo ku Yehova su pueblo ta sigui oumentá na kantidat i tambe den konosementu di Yehova i su propósito komo un milager. Sin Dios su apoyo—ku ta  inkluí—e manera ku e ta guia i protehá su pueblo—e trabou di prediká lo no ta posibel. (Lesa Mateo 19:26.) Nos por ta sigur ku mediante Dios su spiritu santu ku ta obra den kurason di hende alerta i dispuesto pa sirbi, e trabou di prediká akí lo alkansá un final eksitoso, “i e ora ei e fin lo yega.” E tempu ei ta aserkando rápidamente.

‘E Tribulashon Grandi’

10. Kon Hesus a deskribí e binidero tribulashon grandi?

¹⁰ E fin di e mal sistema akí lo bini den loke e Beibel ta yama ‘e tribulashon grandi.’ (Rev. 7:14) Beibel no ta bisa nos kuantu tempu e tribulashon ei lo dura, pero Hesus a bisa: ‘Lo tin un tribulashon grandi, manera nunka tabatin for di prinsipio di mundu te aworakí, i ku lo no tin nunka mas tampoko.’ (Mat. 24:21) Ora nos pensa riba e tribulashon ku e mundu akí a eksperensiá kaba, esta, e Segundo Guera Mundial, den kua un promedio di 50 pa 60 mion hende a muri, nos por konkluí ku e binidero tribulashon grandi lo ta realmente masha severo. Lo e kulminá den e guera di Armagedón. Esei ta e tempu ku Yehova lo laga su forsanan di ehekushon destruí tur rastro di Satanas su sistema terenal.​—Rev. 16:​14, 16.

11, 12. Ki suseso lo indiká ku e tribulashon grandi a kuminsá?

¹¹ Beibel no ta duna un fecha ku e promé fase di e tribulashon grandi lo kuminsá, pero e ta bisa nos sí ta ki suseso ekstraordinario lo indiká ku el a kuminsá. E suseso ei ta e destrukshon di tur religion falsu na man di podernan polítiko. E profesianan bíbliko na Revelashon kapítulo 17 i 18 ta kompará religion falsu ku un prostituta ku tin relashon inmoral ku e sistemanan polítiko di e tera. Revelashon 17:16 ta mustra ku pronto lo bini e tempu ku e elementonan polítiko akí “lo odia e prostituta i lo hasié desolá i sunú, i lo kome su karni i lo kim’é kompletamente ku kandela.”

¹² Ora e tempu yega pa esei sosodé, Dios lo “pone den [e gobernantenan polítiko su] kurason pa ehekutá su propósito,” esta, pa destruí tur religion falsu. (Rev. 17:17) Pues, nos por bisa ku e destrukshon akí ta bini di Dios. E ta su huisio kontra religion hipókrita ku pa hopi tempu kaba ta siña hende doktrinanan kontrali na Dios su boluntat i ku ta persiguí su sirbidónan. Mundu en general no ta spera e binidero destrukshon di religion falsu akí. Yehova su fiel sirbidónan sí ta sper’é. I durante e último dianan akí, nan ta konta hende tokante di dje.

13. Kiko ta indiká ku e fin di religion falsu lo tuma lugá rápidamente?

¹³ Lo ta un shòk pa e hendenan mira kon religion falsu ta ser destruí. Profesia di Beibel ta mustra asta kiko algun di “e reinan di tera” lo bisa relashoná ku e destrukshon ei. Nan lo lamentá: “Ai, ai, . . . pasobra den un solo ora bo huisio a yega.” (Rev. 18:​9, 10, 16, 19) E echo ku Beibel ta usa e palabranan “un solo ora” ta mustra ku e suseso akí lo tuma lugá rápidamente.

14. Kon Yehova lo reakshoná ora su enemigunan ataká su sirbidónan finalmente?

¹⁴ Nos ta komprondé ku algun tempu despues di e destrukshon di religion falsu lo tin un atake riba Yehova su sirbidónan, kendenan  ta proklamá su mensahenan di huisio. (Eze. 38:​14-16) Ora e atake ei kuminsá, e atakadónan lo tin ku enfrentá Yehova, kende a primintí ku lo e protehá su pueblo fiel. Yehova a bisa: ‘Den mi zelo i e ardor di mi furia mi ta deklará. I nan lo sa ku ami ta Yehova.’ (Lesa Ezekiel 38:​18-23.) Dios a deklará den su Palabra: “Esun ku mishi ku boso [su sirbidónan fiel] ta mishi ku [mi] pret’i wowo.” (Zak. 2:8) P’esei, Yehova lo reakshoná ora su enemigunan kuminsá ataká su sirbidónan rònt mundu. Lo e tuma akshon, i esaki lo hiba na e fase final i e kulminashon di e tribulashon grandi ku ta Armagedón. Bou di mando di Kristu, ehérsitonan di angel poderoso lo ehekutá Yehova su huisio kontra e mundu di Satanas.

Ki Efekto E Mester Tin Riba Nos?

15. E echo ku nos sa ku e fin di e sistema akí ta serka mester tin ki efekto riba nos?

¹⁵ E echo ku nos sa ku e fin di e mal sistema akí ta aserkando rápidamente mester tin ki efekto riba nos? Apòstel Pedro a skirbi: “Komo ku tur e kosnan akí lo wòrdu destruí di e manera akí, ki sorto di hende boso mester ta den un kondukta santu i deboto!” (2 Ped. 3:11) E palabranan ei ta enfatisá ku nos mester keda alerta pa hasi sigur ku nos kondukta ta na armonia ku Dios su rekisitonan i ku nos obranan ta reflehá nos deboshon na Yehova i nos amor p’e. E obranan ei ta inkluí nos máksimo esfuerso pa prediká e bon nobo di e Reino promé ku e fin yega. I Hesus a bisa: “Sea alerta tur ora bai, hasiendo orashon.” (Luk. 21:36) Nos ta hala serka Yehova i mustra ku nos ta stim’é dor di akudí na dje konstantemente den orashon pa pidié guia nos mediante su spiritu santu i su kongregashon mundial.

16. Dikon nos tin ku sigui Dios su konseho minusiosamente?

¹⁶ Den e tempu peligroso akí, nos tin ku sigui e siguiente konseho di e Palabra di Dios minusiosamente: “Mira bon kon boso ta kana, no manera hende bobo, ma manera hende sabí, hasiendo bon uso di boso tempu, pasobra e dianan ta malu.” (Efe. 5:​15, 16) Awendia tin mas maldat ku nunka. Satanas a inventá hopi kos pa stroba hende di hasi Yehova su boluntat òf pa simplemente distraí nan. Komo sirbidónan di Dios, nos sa esaki, i nos no ke laga nada kibra nos lealtat na Dios. Nos sa tambe kiko ta bai tuma lugá pronto, i nos ta pone nos konfiansa den Yehova i su propósito.​—Lesa 1 Juan 2:​15-17.

17. Deskribí kon e sobrebibientenan di Armagedón lo reakshoná ora e resurekshon ta tuma lugá.

¹⁷ Dios a primintí ku lo e lanta e mortonan. I e promesa maravioso akí lo kumpli sigur, pasobra “lo tin un resurekshon di tantu e hustunan komo e malbadonan,” òf inhustunan. (Echo. 24:15) Tuma nota kon enfátiko e promesa ei ta, e ta bisa: “Lo tin un resurekshon”! No tin duda tokante esaki, pasobra Yehova a duna su palabra! Isaias 26:19 ta primintí: “Bo mortonan lo biba . . . Boso ku ta drumi den stòf, spièrta i grita di goso . . . Tera lo duna lus na su mortonan.” E palabranan akí a kumpli inisialmente tempu ku Dios a restorá su pueblo di ántes na nan tera natal. Esei ta duna nos konfiansa den e kumplimentu literal ku lo tuma lugá den e mundu nobo. Lo tin un goso inmenso ora esnan resusitá reuní ku nan sernan kerí! Sí, e fin di Satanas su mundu ta yegando, i e mundu nobo di Dios ta masha serka. P’esei, ta masha importante pa nos keda alerta!

Bo Ta Kòrda?

• Kiko tabata e tema di Hesus su siñansa?

• Kon ekstenso e trabou di prediká e Reino ta awe?

• Dikon ta masha importante pa keda alerta?

• Kiko bo ta haña animante di e promesa na Echonan 24:15?

[Preguntanan di Estudio]

[Kuadro/​Plachi na página 16, 17]

E ÉPOKA DI TURBULENSIA A KUMINSÁ

E Époka di Turbulensia: Aventuranan den un Mundu Nobo ta e título di un buki na ingles di Alan Greenspan, publiká na aña 2007. Pa kasi 20 aña, e tabata presidente di e Hunta di Reserva Federal di Merka, e organisashon ku ta supervisá henter e sistema bankario sentral di e nashon ei. Greenspan ta enfatisá e diferensia remarkabel entre e situashon di mundu promé ku 1914 i esun despues di e aña ei:

“Tur e informenan tokante e periodo promé ku 1914 a indiká ku mundu tabata move irevokablemente den un bon direkshon; hende i nashonnan en general tabata trata otro ku mas rèspèt i tabatin progreso riba tereno kultural i teknológiko. E avansenan ei di sosiedat humano tabata asina sobresaliente ku a parse ku e por a alkansá perfekshon. Siglo 19 a trese un fin na e trafikashon kruel di katibu. A parse ku violensia inhumano tabata menguando. . . . Durante siglo 19, tabatin avansenan den teknologia rònt mundu; hende a inventá sistema di trein, telefòn, lus eléktriko, sine, outo i aparatonan pa kas ku ta hopi pa menshoná. Siensia médiko, mehoransa riba tereno di nutrishon, i distribushon masal di awa limpi pa bebe a oumentá e kantidat di aña ku hende lo por biba . . . Tur hende tabata pensa ku e progreso akí lo a sigui.”

Pero . . . “Promé Guera Mundial tabata masha devastador. Kompará ku Segundo Guera Mundial ku a kousa hopi mas destrukshon físiko, Promé Guera Mundial a hasi mas daño den e sentido ku e tabatin un efekto devastador riba hende su manera di trata otro i riba e progreso kultural i teknológiko . . . Mi no por lubidá kon hende tabata pensa durante e añanan promé ku Promé Guera Mundial. E tempu ei, a parse ku no tabatin nada pa stroba humanidat di sigui progresá. Loke nos ta pensa awe ta masha distinto for di un siglo pasá, pero kisas e ta kuadra mas ku e realidat. Terorismo, keintamentu di planeta tera i e echo ku hende komun tin mas poder i influensia lo tin e mesun efekto devastador riba sosiedat humano awe ku Promé Guera Mundial tabatin? Ningun hende no por kontestá e pregunta ei ku siguransa.”

Greenspan a menshoná un deklarashon ku un profèser di ekonomia, Benjamin M. Anderson (1886-1949), a hasi for di tempu ku Greenspan tabata bai universidat. E profèser a bisa: “Esnan ku tabatin sufisiente edat e tempu ei pa komprondé i ku por kòrda kon mundu tabata promé ku Promé Guera Mundial ta rekordá e periodo ei ku masha nostalgia. E tempu ei, hende tabatin un sentido di siguridat ku nunka mas a bolbe.”—Economics and the Public Welfare (Ekonomia i Bienestar Públiko).

Den su buki A World Undone (Un Mundu Ku A Ser Eliminá), publiká na 2006, G. J. Meyer a yega na un konklushon similar. E ta bisa: “Hopi bes hende ta bisa ku susesonan históriko ‘a kambia tur kos.’ Den kaso di e Gran Guera [1914-1918], esaki en bèrdat tabata asina. E guera realmente a kambia tur kos: No ta djis e fronteranan, e gobièrnunan i destino di e nashonnan a kambia; mas bien, e guera a kambia e manera ku hende tabata mira e mundu i nan mes for di e tempu ei padilanti. El a krea un mundu moderno ku no a brinda e sentido di siguridat ku tabatin promé kuné.”

[Plachi na página 18]

Yehova lo usa su poderoso ehérsito di angel na Armagedón