“A ullebongel ra rokuil tekoi a kmedang; misei . . . e mulserechakl el kirel a nglunguuch.”​—1 PETRUS 4:7.

1. Ngerang ngullisechakl er ngii a Jesus?

 A JESUS er a lengar er tia el chutem, e ngullisechakl el kirel a Rengedel a Dios. Ngoeak tia el Renged, e a Jehovah a mo mesebechakl er a llemeltel el mengedereder er a eanged me a chutem e mo mengedaol er a ngklel. Sei a uchul, me a Jesus a ullisechakl er a redisaiplo er ngii el mo meluluuch el mo er a Dios el kmo: “A rengedem le mei, ma uldesuel a rengum le meruul ra belulechad el ua chomerellel ra eanged.” (Matteus 4:17; 6:9, 10) Tia el renged a di kmedu el mo okngemedii tia el beluulechad er a Satan e mo kutmeklii a soal a Dios el ngar tia el chutem. Me ngdi ua lulemlaoch a Daniel el kmo a Rengedel a Dios a “mo okngemed a ikel bebil er a renged el rokui [el ngar er ngii er a chelechang] e sola e ngii a mo medechel el mo cherechar.”​—Daniel 2:44.

2. (a) Ngmekerang a rultirakl er a Jesus a lodengei el kmo ngmla nguu a klisiich el mengedereder er a Renged? (b) Sel olangch ngdirrek el olecholt er a ngerang?

² A Rengedel a Dios a mle klou a ultutelel el tekoi er a rengrir a ruleltirakl er a Jesus, me te uleker er ngii el kmo: “Msbedemam el kmo, a ikal tekoi ngmorngii er choingerang, e ngeral olangch a morngii kau sel mei, ma ullebongel ra taem ra belulechad?” (Matteus 24:3) Tirke el ngar tia el chutem a diak el sebechir el mesa Kristus el mla nguu a klisiich el mengedereder er a Renged a uchul, me ngmo er ngii a meues el olangch el olecholt er ngii. Ngmo er ngii a kakerous el telengtengil tia el olangch el ua lulemlaoch a Bades. Me a rultirakl er a Jesus el kiei er seikid el taem a mo sebechir el omtab el kmo ngmla omuchel el mengedereder el ngar er a eanged. Tia el olangch a dirrek el olecholt er a uchelel sel taem el losaod er ngii a Biblia el kmo “a ikel uriul sils” er tia el mekngit el blekeradel er a beluulechad.​—2 Timoteus 3:1-5, 13; Matteus 24:7-14.

Bo Mulserechakl er a Uriul el Sils

3. Ngera uchul me a Rekristiano a kirir el mo kerekikl el di mekar?

³ A apostol el Petrus a milluches el kmo: “A ullebongel ra rokuil tekoi a kmedang; misei e moterekokl a rengmiu e mulserechakl el kirel a nglunguuch.” (1 Petrus 4:7) Me a rultirakl er a Jesus a kirir el mo kerekikl el di mekar el kirel aike el tekoi el dubechang er tia el beluulechad el olecholt el kmo a Jesus a mla mo mengedereder el king. E kmal kirir el mo kerekikl el mekar er a chelecha el olekedang a ulebengelel tia el mekngit el blekeradel er a beluulechad. A Jesus a dilu er a redisaiplo er ngii el kmo: “Misei a uchul me ko mengkar​—ele ngdiak modengei el kmo a rubak ra blai ngmei er choingerang [el mo oukerrekeriil er tia el beluulechad er a Satan].”​—Markus 13:35, 36.

4. Mosaod er a klekakerous er a blekerdelir a rechad el teloi er a beluulechad er a Satan me a remesiungel a Jehovah. (Momes er a box.)

⁴ A rebetok el chad a diak el kerekikl el omtab a belkul aika el tekoi el dubechang er a beluulechad e le tir el ngar er a eungel a klisichel a Satan. Me ngdiak lomtab el kmo a Kristus a mla nguu a klisiich el mengedereder er a Renged. Engdi a rultirakl er a Kristus a di mle ulserechakl a uchul me ngmlo sebechir el omtab a mera el belkul a tekoi el dilubech er aika el mereko el dart el rak. Sera 1925 el mei, e a Resioning er a Jehovah a mlo medengei el kmo a Kot el Mekemedil a Beluulechad me aike el tekoi el dilubech er a uriul, a olecholt el kmo a Kristus a ulemuchel el mengedereder er a Renged el ngar er a eanged er a 1914. Seikid, e aika el uriul el sils er tia el mekngit el blekeradel er a Satan a ulemuchel. A rebetok el chad, el diak lodengei a belkul aikang a dirrek el mla mesa klou el klekakerous er a taem er a uchei er a Kot el Mekemedil a Beluulechad me a uriul er ngii.​—Momes er a box el “A Taem er a Klou el Uldikel a Ulemuchel.”

5. Ngera uchul me ngklou a ultutelel a deblechoel el di mekar?

 ⁵ A betok el mekngit el tekoi el ngar er ngii el meliuekl er a beluulechad er aika el mereko el dart el rak a olecholt el kmo kede kiei er a uriul el sils. Ngkmal di kmedung e a Jehovah a mo msa Kristus a klisiich el mo mengetakl er a remesisiich el urrurt er a rechanghel el mo oumekemad er a beluulechad er a Satan. (Chocholt 19:11-21) Me a remera el Kristiano a muklatk el blechoel el di mekar el mo lmuut er a ulebengelel tia el mekngit el blekeradel. (Matteus 24:42) Ngkired el di mekar me bo el sebeched el churrengelii tia el ileakl el ureor el ngar er ngii er a beluulechad el rokir el oltirakl a ulekrael er a Kristus.

A Ureor el Ngar er a Beluulechad el Rokir

6, 7. Ngmle ua ngerang a ngelsecheklel a ureor er a berkel a klumech er a Renged er aika el uriul el sils?

⁶ Ngmeldung er a ulaoch el kmo sel ureor el bo loruul er ngii a remesiungel a Jehovah a ochotii el kmo kede kiei er aike el uriul el sils er tia el mekngit el blekeradel er a beluulechad. A Jesus a milsaod er tia el ureor er a lomasech aike el kakerous el tekoi el mo duubech er a taem er a ulebongel. Nguldimukl er tia el ulochel a klou a belkul el tekoi el kmo: “Me tial evangkelio ra rengedel a Dios a mo oberk ra belulechad el rokir, el kirel locholt el bedul a bek el renged; e sola e ngmochu ullebongel.”​—Matteus 24:14.

⁷ Ka molatk a bebil el tekoi er a ulochel a Jesus. Ngdi mle mekesai a rechad el ulemerk er a ungil el chais er sera lomuchel aika el uriul el sils er a 1914. E chelechang e a ulecherengelir a rechad a kmal mla mo klou. Ngar er ngii a kuk betok er a 7,000,000 el Sioning er a Jehovah el ngar er a kuk betok er a 100,000 el ongdibel el omerk er a klumech el ngar tia el chutem. E a bekord el 10,000,000 el chad a mlo obengterir er a 2008 er a blsechel a Chedaol el Blsoil er a kodellel a Kristus. Me a ildisir a rechad el mlong a ngilsechekl er sel mlo merek el rak.

8. Ngera uchul me a ultok er a ureor er a berkel a klumech a diak el sebechel el mo mesisiich?

⁸ A Satan, alta ng “chelid er tial belulechad,” engdi ngdirk ngar er ngii a kmal klou el ureor er a ungil el chais er a Rengedel a Dios el mo er a rokui el renged er a uchei er a lemei a ulebengelel tia el mekngit el blekeradel er a beluulechad! (2 Korinth 4:4) A rokui el tekoi er a politiks me a klechelid me a siobai er tia el beluulechad me a rolel a loltobed a  cheleuid el chais a longedereder a Diabelong. Me ngngera uchul me tia el ureor a kmal ungil? E le Jehovah a omtebechel er ngii a uchul me a Satan a diak el sebechel el torebengii.

9. Ngera uchul me a ketmeklel a ureor er a berkel a klumech me a klou el ildois er a rechad el tir a medengelii a Dios me a moktek er ngii a mengasireng el tekoi?

⁹ A ungil el ketmeklel a ureor er a berkel a klumech er a Renged me a klou el ildois er a rechad el tir a medengelii a Dios me a moktek er ngii a sebeched el melekoi el kirel el kmo ngmengasireng el tekoi. A lak a ngelsuil a Dios, el omekrael e omekerreu er a rechedal, e tia el ureor er a berkel a klumech a diak el sebechel el meketmokl. (Monguiu er a Matteus 19:26.) Ngsebechel el mo ulterekokl a rengud el kmo a lsekum a chedaol el reng er a Dios a omekrael a rengrir a reklekar el chad el tir a kongei el mesiou, e tia el ureor er a berkel a klumech a mo merekui “e sola e ngmochu ullebongel.” E tia el ulebongel a kmal kmedang.

“Sel Kloul Ringel”

10. Ngmilekerang a Jesus er a losaod er a merekung el klou el ringel?

¹⁰ A ulebengelel tia el mekngit el blekeradel er a beluulechad a “kloul ringel.” (Chocholt 7:14) A Biblia a diak el ouchais el kmo ngmo ua ngera klemengetel, engdi a Jesus a dilu el kmo: “Isei e ngduubech a kloul ringel, el direkak le borngii ra uchelel a belulechad el me lmuut er chelechang, ma ka le borngii er chelechal mong.” (Matteus 24:21) Me sel dolatk aike el ringel el mla duubech er tia el beluulechad, el ua Ongeru el Mekemedil a Beluulechad el bekord el 50 el mo bedul a 60 el milliol el chad a mlad er ngii, e tia el merekung el klou el ringel a lmuut el mo meringel. E a ulebongel er ngii a mekemad er a Armageddon. Seikid el taem e a Jehovah a mo ousbech er a urrurt er ngii el mo okngemedii tia el mekngit el blekeradel er a Satan el ngar er tia el chutem.​—Chocholt 16:14, 16.

11, 12. Ngera el tekoi a olecholt er a uchelel a klou el ringel?

¹¹ A ulaoch er a Biblia alta e ngdiak el ouchais er a uchelel tia el klou el ringel, engdi ngouchais el kirel a klou el tekoi el mo er ngii el olecholt er a uchelel. Tia el tekoi a telemellel a rokui el klsuul el klechelid el okiu a reking er a beluulechad. Ngar er a ulaoch er a Biblia el ngar er a Chocholt 17 me a 18 el klou el bliongel, e a klsuul el  klechelid a lomekesiu er ngii er a tingaol el dil el mlo er a deleboes el obengterir a reking er a beluulechad. A Chocholt 17:16 a olecholt el kmo ngdi kmedung e a reking er a beluulechad a “mo ouketui er ngikal tingaol dil; me te mo rullii el mo cheloit e meau, e mo kma techel a bedengel e durur lokngemedii ra ngau.”

¹² Sel lemei seikid el taem, e a Dios a ‘remuul a rengrir [a remerreder er a beluulechad] el mo meruul a uldesuel’ el mo olekngemed a rokui el klsuul el klechelid. (Chocholt 17:17) Me ngsebechel el medung el kmo tia el tekoi a mla er a Dios el mei. Me ngkerrekerilel el omtok aika el klsuul el klechelid el meketeketang el olsisechakl a tekoi el omtok er a Dios, e dirrek el oldechelakl er a remesiungel. A rechad er a beluulechad a diak lolechesuar a merekung el telemellel a klsuul el klechelid. Engdi a reblak a rengrir el mesiungel a Jehovah a medengei el kmo ngmo er ngii me a uchul e te ouchais er a rechad el kirel el ngar er aika el uriul el sils.

13. Ngera ochotii el kmo a ulebongel er a klsuul el klechelid a di mereched el mo er ngii?

¹³ A rechad a mo mechas a rengrir sel lesa telemellel a klsuul el klechelid. A ulaoch er a Biblia a olecholt el kmo a rebebil er a re “king ra belulechad” a mo melekoi el kirel sel telemall el kmo: “Ke chebuul, ke chebuul . . . A kerrekeriil el kirem a mlei el di mle chelsel a tal sikang.” (Chocholt 18:9, 10, 16, 19) A usbechel a Biblia er tia el tekoi el “tal sikang” a olecholt el kmo tia el tellemall a kmal di mereched el mo er ngii.

14. A Dios ngmo mekerang er sel taem el recherrouel a mo oldechelakl er a remesiungel?

¹⁴ Kede medengei el kmo a telkib el taem er uriul er a telemellel a klsuul el klechelid, e a rechedal a Jehovah, el tir a omerk er a kerrekerilel, a mo modechelakl. (Esekiel 38:14-16) E seikid el taem, e tirke el oldechelakl a mo chobengelii a Jehovah, el ngii a tilbir el kmo ngmo omekerreu er a reblak a rengrir el chedal. A Jehovah a melekoi el kmo: “Ng cherresek ma ngesechel a renguk e ak uuchais el kmo . . . Te mo medengelkak el kmo, ngak a [Jehovah].” (Monguiu er a Esekiel 38:18-23.) A Dios a melekoi el ngar er a Tekingel el kmo: “Ngikel mo merutech er kemiu [el blak a rengmiu el mesiungek] a rutechii a chelsul a medak.” (Sekaria 2:8) Me a recherrouel sel bo loldechelakl er a remesiungel el ngar er a beluulechad el rokir, e a Jehovah a mo meruul a tekoi el mo uchul a orokiolel tia el klou el ringel​—el ngii a Armageddon. Ngar er a eungel a klisichel a Kristus, e a remesisiich el anghel a mo oltaut a kerrekerilel a Jehovah el mo er tia el beluulechad er a Satan.

Ngerang Rullii el Kired

15. Ngerang rullii el kired a dodengei el kmo a ulebongel er tia el mekngit el blekeradel a kmedang?

¹⁵ Ngerang rullii el kired a dodengei el kmo a ulebengelel tia el mekngit el blekeradel a di kmedung el mo er ngii? A apostol el Petrus a melluches el kmo: “Ma le uaisei el meterakl el nguemed a ikel tekoi el rokui, e ngkol uangera chedaol blekeradel ma chomeluu ra Dios el kiriu lobang.” (2 Petrus 3:11) Aike el tekoi a melisiich er kid el mo ulserechakl el di kerekikl me a blekerdeled bo loltirakl aike el soal a Dios a doruul er a chelsel a klengar er kid el olecholt er a bltkil a rengud me a omeluu el mo er ngii. A ta er aike el tekoi a berkel a ungil el chais er a Renged er a uchei er a lemei a ulebongel. A Petrus a dirrek el melluches el kmo: “A ullebongel ra rokuil tekoi a kmedang; misei e . . . mulserechakl el kirel a nglunguuch.” (1 Petrus 4:7) Kede olekeed er kid er a Jehovah e olecholt er a bltikerreng el mo er ngii sel deblechoel el meluluuch el olengit me lomekrael er kid el okiu a chedaol el reng er ngii me a cheldebechelel el ngar tia el beluulechad.

16. Ngera uchul me ngkired el mo kerekikl er a uleklatk er a Dios?

 ¹⁶ Ngar er aika el mekngit el taem, e ngkired el mo kerekikl er a uleklatk er a Tekingel a Dios el kmo: “Misei e bo le blak a rengmiu el kerekikl er chomerolliu, e lak bo blekerdelir ar diak le mellomes a rengrir, e bai bo blekerdelir ar mellomes a rengrir, e le blak a rengmiu lousbech a techall, e ngmekngit el taem er chelechang.” (Efesus 5:15, 16) A delengerenger er a chelecha el taem a lmuut el klou er a ngii di el taem er a reksi er a klechad. A Satan a mla remuul a betok el tekoi el mengesang er a rechad me ngdiak loruul er a soal a rengul a Jehovah. Kid el mesiungel a Dios a medengelii tia el tekoi me ngdiak debecherei a ngii di el ngerang me ltemellii a blakerreng er kid el mo er a Dios. Kede dirrek el medengei el kmo ngera el tekoi a kmedu el mo er ngii, me kede otuil a klaumerang er kid el ngar er a Jehovah me a moktek er ngii.​—Monguiu er a 1 Johanes 2:15-17.

17. Mosaod a uldesuir tirke el mo suobel er a Armageddon er sel taem el lebo er ngii a okiis.

¹⁷ Sel mengasireng el telbilel a Dios el mo olluut a klengar er a rulekoad a mo tmaut, e le “ngmorngii chokiis rar melemalt mar diak le melemalt.” (Rellir 24:15) Momtab el kmo tia el telbiil a kmal ulterekokl el kmo: “Ngmorngii chokiis”! Ngdiak el sebeched el oumededenger er ngii, e le Jehovah a mla meskid a tekingel! A Isaia 26:19 a tibir el kmo: “Tirkel mlad el chedad a lmuut el mo chad! . . . Tirkel ulekedurs er a debellir a mo mekiis e mo mengitakl er a deurreng. A RUBAK a mo omekngar er tirkel meketeketang er a le mad el ua nguches a lomngim er a chutem.” Aike el tekoi a mla er ngii a kot el otutel el mo er a rechedal a Dios er a irechar er sera bo lrei er a belurir, el oterekeklii a rengud el kmo a mera el otutel a mo er ngii er a beches el beluulechad. Ngmo er ngii a klou el deurreng er tirke el mo ouetkeu er a rechederir el mo mekiis er a kodall! Chochoi, a ulebongel er a beluulechad er a Satan a kmedang, me a beches el beluulechad er a Dios a di kmedung el mo er ngii. Me ngklou a ultutelel a dolemolem el di ulserechakl!

Ke Dirk Melatk?

• Ngerang ngullisechakl er ngii a Jesus?

• Ngua ngera ngelsecheklel a ureor er a berkel a klumech er a Renged er a chelechang?

• Ngera uchul me ngklou a ultutelel a deblechoel el di mekar?

• Ngera el tekoi el ngar er a Rellir ar Apostol 24:15 a kmal melisiich er kau?

[Aike el Ker er a Suobel]

[Baks/​Siasing er a 18, 19 el llel]

A TAEM ER A KLOU EL ULDIKEL A ULEMUCHEL

The Age of Turbulence: Adventures in a New World (A Taem er a Klou el Uldikel: Aike el Tekoi el Dilubech er a Chelsel a Beches el Beluulechad) a dai er a babilengel a Alan Greenspan el tilobed er a 2007. Ngmle bekord el 20 el rak, e ngika el chad a ulemtebechel er sel chelechad el okedongall el United States Federal Reserve Board el ngii a mengkar er a orretel a ureor er a rokui el bangk er a beluu er a Merikel. A Greenspan a mesaod er aike el ngodech el blekeradel er a beluulechad el mla er ngii er a uchei er a 1914 me a uriul er ngii el kmo:

“A doltirakl a rokui el chais el meldung er a uchei er seikid el taem, e a beluulechad er a uchei er a 1914 a ua di lurrael el beduluchei el kirel a ungil el klengar me a dirrek el ungil el deluill er a bek el beluu; me a klechad a ua di lulengeriakl el mo bedul a chelerrungel el blekeradel. Me ngar er aike el rak er a 1800 el mei, e ngmlo diak aike el siobai el olterau er a resibai el chad. Me a kdekudel el omeruul el mo er a rechad a ua blo lemekesai. . . . Me aike el beches el klekedall el loruul a rechad a di merrael el mo ungil, el ua ksia me a dengua me a dengki me a katsudo me a mlai me a klekedall er a blai el diak el sebechel el obasech el rokui. A tekoi er a ukeruul me a ungil el ketmeklel a kall me a ralm el di ngar er a baeb el mo er a obliil a mlo uchul a kemanget el klengar . . . A rechad a millatk el kmo a choua itia el blekeradel a mo oberk el mekelekelii a beluulechad el rokir.”

Nguaisei engdi . . . “A Kot el Mekemedil a Beluulechad a mle klou a telemellel el kirel a ungil el klengar me a dirrek el deluill er a bek el beluu er sel Ongeru el Mekemedil a Beluulechad el ngii a mlo uchul a kodellir a rebetok el chad. E le a Kot el Mekemedil a Beluulechad a tilemellii sel omelatk el kirel a ungil el klengar. Ngkmal diak el sebechek el obes er sel omelatk el kmo a klengar a di merael el mo ungil el kirel a klechad el mla er ngii er aike el rak er a uchei er a Kot el Mekemedil a Beluulechad. Chelecha el taem e a osenged el di oltirakl er aike el domes el tekoi a kmal ngodech er a osengir a rechad er a dart el rak er a mla me mong. Aika el tekoi el ua ulekdakt me a kleldelel a beluulechad me a uldasu el leko ngoldubech aike el sorir a redi chad er a beluu, ngmo tomellii a blekerdelel a klengar er a chelecha el taem el di ua omerellel a Kot el Mekemedil a Beluulechad? Ngdiak a chad el medengelii a nger er tiang.”

A Greenspan a melatk a tekingel a Professor er a tekoi er a Keizai el ngklel a Benjamin M. Anderson (1886-1949) el kmo: “A remeklou el chad el mle medengelii a blekerdelel a klengar er a uchei er a Kot el Mekemedil a Beluulechad a melatk er seikid el taem el mera el mle ungil. Ngmla er ngii a ulekerreu er seikid el taem el diak er a chelechang.”​—Economics and the Public Welfare (A Tekoi er a Keizai me a Ulekerreu el Mo er a Rechad).

A osisiu el uldasu a meldung er a babier el dai er ngii a kmo A World Undone (A Beluulechad el Mlengodech) el luluuches er ngii a G. J. Meyer, el tilobed er a 2006. Kede menguiu el kmo: “Ngar er ngii a omelekoi el kmo aike el meklou el tekoi el duubech er a chelsel a reksi er a klechad a sebechel el ‘melodech a rokui el tekoi.’ E tiang a klemerang el kirel sel Klou el Mekemad [1914-1918]. Tia el mekemad a kmal mlo uchul a omelodech er a bek el tekoi el ua oliochel er a beluu me a kabelment me aike el mo duubech el mo er aike el renged me a dirrek el osengir a rechad el kirel a beluulechad me a klengar er tir. Ngii el mekemad a milekedbechii a beluulechad el diak a ulekerreu er a chelsel el uai sel mla er ngii er a uchei.”

[Siasing er a 20 el llel]

Sel taem er a Armageddon, e a Jehovah a mo ousbech er a mesisiich el urrurt er a rechanghel er ngii