Tan na ai
Tan na ai
„A kaba fu ala sani kon krosibei. . . . Tan hori na prakseri taki a de fanowdu fu begi.”—1 PETR. 4:7.
1. San na a moro prenspari sani di Yesus ben e preiki?
DI YESUS KRESTES ben de na grontapu, dan a moro prenspari sani di a ben e preiki, na a Kownukondre fu Gado. Nanga yepi fu a Kownukondre dati, Yehovah o sori taki na en abi a reti fu tiri hemel nanga grontapu, èn a o santa a nen fu en. Dati meki Yesus ben leri den disipel fu en fu begi Gado: „Meki yu kownukondre kon. Meki yu wani pasa na grontapu soleki fa a e pasa na hemel” (Mat. 4:17; 6:9, 10). Heri esi a Kownukondre dati sa tyari wan kaba kon na a grontapu fu Satan, èn baka dati a sa sorgu taki a wani fu Gado e pasa na heri grontapu. Soleki fa Danièl ben taki na fesi, Gado Kownukondre „sa broko ala den kownukondre [fu a ten] disi na pisipisi èn a sa tyari wan kaba kon na den, èn ensrefi sa tan te ten di no skotu”.—Dan. 2:44.
2. (a) Fa den bakaman fu Yesus ben o sabi taki a ben e tiri leki Kownu fu a Kownukondre? (b) San a marki ben o sori moro fara?
2 Den bakaman fu Yesus trutru ben wani taki a Kownukondre fu Gado kon. Dati meki den aksi Yesus: „San o de a marki fu yu denoya èn fu a kaba fu a grontapu sistema disi?” (Mat. 24:3) Fu di sma na grontapu no ben o man si taki Yesus e tiri leki Kownu fu a Kownukondre, meki Yesus ben o gi den bakaman fu en wan marki. Soleki fa Bijbel e sori, dan a marki dati ben o abi fu du nanga difrenti sani di ben o pasa. Nanga yepi fu a marki dati, den bakaman fu Yesus di ben o de na libi na a ten dati, ben o man frustan taki a ben bigin tiri na ini hemel. A marki dati ben o sori tu taki a pisi ten ben bigin di Bijbel e kari „den lasti dei” fu na ogri sistema disi di de na heri grontapu now.—2 Tim. 3:1-5, 13; Mat. 24:7-14.
Tan na ai na ini den lasti dei
3. Fu san ede Kresten ben o abi fu tan na ai?
3 Na apostel Petrus ben skrifi: „A kaba fu ala sani kon krosibei. Fu dati ede un musu de nanga krin frustan, èn un musu tan hori na prakseri taki a de fanowdu fu begi” (1 Petr. 4:7). Den bakaman fu Yesus ben o abi fu tan na ai. Iya, den ben o abi fu luku sortu sani di e pasa na grontapu ben o sori taki Yesus ben bigin tiri leki Kownu fu a Kownukondre. Èn o moro a kaba fu na ogri sistema ben o kon krosibei, o moro den ben o abi fu de na ai. Yesus ben taigi den disipel fu en: „Tan na ai, bika unu no sabi o ten a masra fu na oso o kon [fu krutu a grontapu fu Satan].”—Mark. 13:35, 36.
4. Fruteri fa sma di de fu a grontapu fu Satan, de heri tra fasi leki den futuboi fu Yehovah. (Taki sosrefi fu a faki.)
4 Furu sma de na ondro a makti fu Satan, èn den no de na ai te a abi fu du nanga den sani di e pasa na grontapu. Den no sabi taki Krestes e tiri leki Kownu fu a Kownukondre. Ma den tru bakaman fu Krestes de na ai, èn den kon sabi san den sani di pasa na ini den lasti wán hondro yari wani taki. Sensi 1925, Yehovah Kotoigi kon frustan taki a Fosi Grontapufeti èn sosrefi den sani di pasa baka a ten dati, e sori krin taki Krestes bigin tiri leki Kownu na hemel, na ini 1914. Sobun, den lasti dei fu na ogri sistema disi di de na ondro a makti fu Satan, ben bigin na a ten dati. Furu sma e poti prakseri na den sani di e pasa, ma den no e frustan san den sani wani taki. Aladi dati de so, toku den sma disi kon si taki a libi na ini a pisi ten bifo a Fosi Grontapufeti, de heri tra fasi leki a libi na ini a pisi ten baka dati.—Luku a faki „A bruya pisi ten bigin”.
5. Fu san ede a de tumusi prenspari taki wi e tan na ai?
5 Pikinmoro wán hondro yari kaba, bun takru sani e pasa na heri grontapu, èn den sani dati e sori taki wi e libi na ini den lasti dei. Heri esi, Yehovah sa gi Krestes a komando fu tiri den makti legre fu den engel èn fu go feti nanga a grontapu fu Satan (Openb. 19:11-21). Tru Kresten e kisi a rai fu tan na ai. Sobun, a de tumusi prenspari taki wi e tan du dati, aladi wi e wakti a kaba fu a sistema disi (Mat. 24:42). Wi musu tan na ai, èn na ondro a tiri fu Krestes wi musu du wan spesrutu wroko na heri grontapu.
Wan wroko di e du na heri grontapu
6, 7. Fa a Kownukondre preikiwroko go na fesi na ini den lasti dei?
6 A wroko di den futuboi fu Yehovah musu du, abi fu du tu nanga a marki di ben o sori taki wi e libi na ini den lasti dei fu na ogri sistema disi. Di Yesus ben kari difrenti sani di ben o pasa na a ten fu a kaba, dan a tyari kon na krin san na a wroko disi di ben o du na heri grontapu. Na ini a profeititori fu en, a ben taki a prenspari sani disi tu: „A bun nyunsu disi fu a kownukondre o preiki gi sma na heri grontapu, so taki sma fu ala kondre kan yere dati, èn dan a kaba o kon.”—Mat. 24:14.
7 Meki wi poti prakseri na wan tu sani di abi fu du nanga a wroko disi di Yesus kari na ini a profeititori fu en. Di a pisi ten fu den lasti dei bigin na ini 1914, dan wan pikin grupu sma nomo ben e meki a bun nyunsu bekènti. Now a pikin grupu dati kon tron wan bun bigi grupu. Moro leki 7.000.000 Kotoigi fu Yehovah e preiki a bun nyunsu na heri grontapu, èn den sma disi e kon makandra na ini moro leki 100.000 gemeente. Boiti dati, 10.000.000 tra sma kon makandra nanga Yehovah Kotoigi na ini 2008, na a Memrefesa fu a dede fu Krestes. A nomru fu sma di ben de na a Memrefesa a yari dati, ben bigi srefisrefi moro leki a yari na fesi.
8. Fu san ede a preikiwroko e tan go na fesi, aladi Satan e pruberi fu gens en?
8 A no de fu taki dati sma na ala kondre e kisi kotoigi dorodoro fu Gado Kownukondre, fosi a kaba fu a sistema disi doro! Dati e pasa, aladi Satan na „a gado fu a grontapu sistema disi” (2 Kor. 4:4). Satan e tiri ala politiek organisâsi, ala kerki organisâsi, nanga bisnis organisâsi. A abi krakti sosrefi tapu ala boskopu di sma e prati nanga yepi fu radio, telefisi nanga tra sani. Sobun, fa a du kon taki a preikiwroko e go na fesi so? A musu de so taki Yehovah e horibaka gi a wroko disi. Dati meki a Kownukondre preikiwroko e go na fesi so moi, aladi Satan e pruberi fu gens en.
9. Fu san ede wi kan si en leki wan wondru taki a pipel fu Yehovah e tan abi bun bakapisi?
9 Te wi e luku fa a Kownukondre preikiwroko e go na fesi, te wi e luku fa moro nanga moro sma e tron anbegiman fu Yehovah, èn fa den e tan kisi moro sabi fu En, dan wi kan taki dati a sani disi na wan wondru. Efu Gado no ben e horibaka gi a pipel fu en, iya, efu a no ben e tiri den èn efu a no ben e kibri den, dan den no ben o man du a preikiwroko. (Leisi Mateyus 19:26.) A santa yeye fu Gado abi krakti tapu na ati fu sma di de na ai èn di de klariklari fu dini Gado. Fu di dati de so, meki wi kan abi a dyaranti taki a preikiwroko disi sa tan go na fesi te leki a kon na wan kaba. Te dati pasa, „dan a kaba o kon”. A ten dati o doro heri esi.
„A bigi banawtu”
10. Fa a bigi banawtu o de, soleki fa Yesus ben sori?
10 A kaba fu na ogri sistema disi sa kon na a ten fu „a bigi banawtu”, soleki fa Bijbel e kari en (Openb. 7:14). Bijbel no e taki o langa a pisi ten dati sa de, ma Yesus ben taki: „Bika wan bigi banawtu o de, di sensi a bigin fu grontapu teleki now no ben de ete, nôno, a no sa kon noiti moro tu” (Mat. 24:21). Te wi e prakseri a banawtu di miti a grontapu disi kaba, soleki a Di Fu Tu Grontapufeti pe sowan 50 te go miti 60 milyun sma lasi den libi, dan a no de fu taki dati a bigi banawtu di o kon sa hebi srefisrefi. A heimarki fu a pisi ten dati sa de a feti fu Armagedon. Na a ten dati, Yehovah sa lusu den hemel legre fu en fu go pori ibri pisi fu a grontapu sistema fu Satan.—Openb. 16:14, 16.
11, 12. Sortu sani o pasa na a bigin fu a bigi banawtu?
11 Bijbel profeititori no e taki sortu dei a bigi banawtu o bigin, ma a e taki sortu prenspari sani o sori taki a pisi ten dati bigin kaba. A sani di o pasa, na taki den politiek makti sa pori ala falsi bribi. Den Bijbel profeititori di skrifi na Openbaring kapitel 17 nanga 18, e agersi falsi bribi nanga wan huru-uma di du hurudu nanga den politiek sistema fu grontapu. Openbaring 17:16 e sori taki heri esi den politiek organisâsi disi „o abi bita-ati gi a huru-uma; den o teki ala san a abi èn den o libi en nanga sososkin, dan den o nyan a meti fu en skin èn den o bron en nanga faya èn noti no sa tan abra fu en”.
12 Te a ten dati doro, dan Gado sa ’meki den politiek tiriman du san a ben abi na prakseri; iya, a sa meki den du a wán sani di den ben abi na prakseri’, namku fu pori ala falsi bribi (Openb. 17:17). Sobun, wi kan taki dati na Gado o tyari a pori disi kon. Na so a o strafu den kerki di abi hoigrifasi, di langa ten kaba leri sma sani di no e kruderi nanga a wani fu Gado, èn di frufolgu den futuboi fu en. Furu sma na grontapu no sabi taki heri esi falsi anbegi sa kisi pori na a fasi disi. Ma den futuboi fu Yehovah sabi dati. Èn na ini den lasti dei disi, den e meki sma kon sabi a tori dati.
13. Sortu sani e sori taki falsi anbegi o kisi pori na ini wan syatu pisi ten?
13 Sma o skreki srefisrefi te den si taki falsi bribi kisi pori. Bijbel profeititori e sori taki srefi wan tu fu „den kownu fu grontapu” o taki: „Na wan sari, na wan sari, . . . bika na ini wán yuru nomo yu kisi krutu!” (Openb. 18:9, 10, 16, 19) Den wortu „wán yuru” e sori taki falsi anbegi o kisi pori na ini wan syatu pisi ten.
14. Te den feanti fu Yehovah e bigin du ogri nanga den futuboi fu en, dan san A sa du?
14 Wi e frustan taki wan pisi ten baka te falsi anbegi kisi pori, sma sa pruberi fu du ogri nanga den futuboi fu Yehovah di e meki den krutuboskopu fu En bekènti (Esek. 38:14-16). Te sma e bigin du dati, dan den sa kisi fu du nanga Yehovah, di e pramisi fu kibri a pipel fu en. Yehovah e taki: „Mi ben taki na ini Mi djaroesoe, en na ini da faja foe Mi hatibron. . . . En dem sa sabi dati mi de MASRA [Yehovah].” (Leisi Esekièl 38:18-23, Da Bijbel na ini Sranantongo.) Gado e taki na ini a Wortu fu en: „A sma di e fasi unu [den futuboi fu en] e fasi a popki fu mi ai” (Sak. 2:8). Sobun, te den feanti fu en e bigin du ogri nanga den futuboi fu en na heri grontapu, dan Yehovah sa handri. Na so a bigi banawtu sa doro en heimarki, èn dati na Armagedon. Na ondro a tiri fu Krestes, makti legre fu den engel sa pori a sistema fu Satan, soleki fa Yehovah wani.
Sortu krakti disi musu abi na wi tapu
15. Now di wi sabi taki a kaba fu a sistema disi de krosibei, dan sortu krakti dati musu abi na wi tapu?
15 Now di wi sabi taki a kaba fu na ogri sistema disi e doro heri esi, dan sortu krakti dati musu abi na wi tapu? Na apostel Petrus ben skrifi: „Fu di ala den sani disi o smèlter gowe na a fasi disi, meki un musu luku taki unu e tyari unsrefi na wan santa fasi èn taki unu e du sani di e sori taki unu e dini Gado na wan getrow fasi!” (2 Petr. 3:11) Den wortu dati e sori krin taki wi musu luku bun efu a fasi fa wi e tyari wisrefi e kruderi nanga den markitiki fu Gado. Wi musu sorgu tu taki wi e tan dini Yehovah na wan fasi di e sori taki wi lobi En. Fu man sori dati, dan wi musu du ala san wi man fu preiki a bun nyunsu fu a Kownukondre, fosi a kaba kon. Petrus ben skrifi tu: „A kaba fu ala sani kon krosibei. . . . Tan hori na prakseri taki a de fanowdu fu begi” (1 Petr. 4:7). Wi musu begi Yehovah doronomo fu tiri wi nanga yepi fu en santa yeye èn a gemeente fu en di de na heri grontapu. Dati sa yepi wi fu kon moro krosibei na En.
16. Fu san ede wi musu gi yesi dorodoro na a rai fu Gado?
16 Na ini na ogri ten disi, wi musu gi yesi dorodoro na a rai disi di skrifi na ini Gado Wortu: „Luku bun taki unu no e waka leki don sma, ma taki unu e waka leki koni sma; fu man du disi, un musu gebroiki ibri okasi bun, bika den dei ogri” (Ef. 5:15, 16). Na ini a ten disi, ogri lai na grontapu moro leki iniwan ten bifo. Satan e gebroiki furu difrenti triki fu kori sma fu no du a wani fu Yehovah, noso fu meki den frigiti san na den moro prenspari sani. Wi leki futuboi fu Gado sabi disi, èn wi no wani gi pasi taki wan sani tapu wi fu tan gi yesi na Gado. Wi sabi tu san o pasa heri esi, èn wi abi a frutrow na ini Yehovah èn na ini den sani di a o du.—Leisi 1 Yohanes 2:15-17.
17. Fruteri fa den sma di pasa Armagedon libilibi o firi te den dedewan e kisi wan opobaka.
17 A tumusi moi pramisi di Gado gi wi taki a sa wiki den dedewan, sa kon tru. Wi sabi dati fu di Bijbel e taki: „Gado sa gi wan opobaka na den regtfardikiwan èn na den onregtfardikiwan” (Tori. 24:15). Luku fa den wortu disi taki na wan krakti fasi: „Gado sa gi [libisma] wan opobaka”! A sani disi sa kon tru seiker, fu di Yehovah pramisi wi dati! Yesaya 26:19 e gi wi a pramisi disi: „Den dedewan fu yu sa libi. . . . Wiki èn bari fu prisiri, un sma di e tan na ini a doti! . . . A gron srefi sa lusu den dedewan di no man du notinoti, so taki den kan libi baka.” A fosi kontru fu den wortu dati, abi fu du nanga a ten di Gado meki a pipel fu en na ini owruten drai go baka na a mamakondre fu den. Dati meki wi abi a dyaranti taki den wortu disi sa kon tru dorodoro na ini a nyun grontapu di o kon. Te den wan di o kisi wan opobaka e miti den lobiwan fu den baka, dan den sa prisiri fu tru! Iya, a kaba fu a grontapu fu Satan de krosibei, èn heri esi Gado sa seti wan nyun grontapu. Dati meki a prenspari srefisrefi taki wi e tan na ai!
Yu e memre disi ete?
• San na a moro prenspari sani di Yesus ben e preiki?
• Fa sani e waka nanga a Kownukondre preikiwroko na ini a ten disi?
• Fu san ede a de tumusi prenspari taki wi e tan na ai?
• Fu san ede a pramisi na Tori fu den Apostel 24:15 e gi yu deki-ati?
[Aksi fu a tori disi]
[Faki/Prenki na tapu bladzijde 16, 17]
A BRUYA PISI TEN BIGIN
Na ini 2007, wan buku kon na doro di e taki fu a fasi fa a libi kon kenki na grontapu (The Age of Turbulence: Adventures in a New World). A man di skrifi a buku disi, na Alan Greenspan. Pikinmoro 20 yari langa, a man disi ben de amra-basi fu na organisâsi di abi a frantwortu fu ala moni fu Amerkankondre (Federal Reserve Board). Greenspan e poti prakseri na a bigi difrenti na mindri a ten bifo 1914 èn a ten baka dati. A e taki:
„Te wi e luku a fasi fa a libi ben waka na ini a ten bifo 1914, dan wi e si taki sma ben abi moro lespeki gi makandra, èn a libi ben e go na fesi. Iya, a ben gersi leki te fu kaba a libi ben o waka bun dorodoro. Na ini a 19 yarihondro, wan kaba kon na a tegu srafu-bisnis. A ben gersi leki sma ben e kon abi moro switifasi gi makandra, fu di den no ben e du so furu ogri moro. . . . Na a ten fu a di fu 19 yarihondro, sabiman meki moro nanga moro nyun sani. Wan tu fu den sani dati na den pasi pe loko e waka, a telefon, faya di e wroko nanga stroom, felem, oto, nanga bun furu tra sani di sma kan gebroiki na ini na oso fu den. Datra feni nyun fasi fa fu dresi sma, sma kon sabi fa fu meki moro gosontu nyanyan, èn bun furu sma kon abi krin watra fu dringi. Den sani disi meki taki sma ben kan fruwakti fu libi moro langa . . . Sma na heri grontapu ben e denki taki a libi ben o tan go na fesi na a fasi dati.”
Ma . . . „a Fosi Grontapufeti ben ogri moro a Di Fu Tu Grontapufeti pe wan moro bigi nomru fu sma lasi den libi. A Fosi Grontapufeti meki taki sma lasi lespeki gi makandra, èn a libi kon moro hebi. Iya, a Fosi Grontapufeti meki taki libisma lasi a prakseri di den ben abi fu seti wan moro bun grontapu. Mi no man frigiti fa sani ben de na ini den yari bifo a Fosi Grontapufeti. Na a ten dati, a ben gersi leki libisma no ben abi broko-ede, èn taki den ben kan tan go na fesi. Na ini a ten disi, libisma abi wan heri tra denki fu sani, leki wán hondro yari na fesi. Kande wi e si sani moro leki fa den de trutru. San o miti a grontapu disi pe furu kondre e wroko makandra fu meki a libi go na fesi? Te mi e luku na ogri di e pasa na grontapu, a waran di grontapu e kon waran moro nanga moro, èn a nomru fu sma di e kon bigi moro nanga moro, dan mi e aksi misrefi efu a srefi sani di pasa baka a Fosi Grontapufeti, o pasa baka na ini a ten di e kon. Nowan sma sabi seiker san o pasa.”
Greenspan ben memre wan sani di Benjamin M. Anderson ben taki. A man dati, di ben e libi fu 1886-1949, ben de Professor fu ekonomia afersi na a heiskoro pe Greenspan ben e go. A Professor dati ben taki: „Den sma di owru nofo fu memre èn fu frustan fa a libi ben de na a ten bifo a Fosi Grontapufeti, e angri baka gi a ten dati. Na a ten dati, sma ben abi a dyaranti taki sani ben o waka bun nanga den, èn noiti moro den kisi a firi dati.”—Economics and the Public Welfare.
Wan tra buku e taki wan srefi sortu sani (A World Undone). A buku dati kon na doro na ini 2006, èn a man di skrifi a buku dati na G. J. Meyer. A buku e taki: „Nofo tron sma e taki dati den sani di pasa fosi ’kenki ala sani’. Te a abi fu du nanga a Fosi Grontapufeti [1914-1918], dan wi musu agri taki den sma ben abi leti fu taki dati. Na orloku dati trutru kenki ala sani. A no kenki soso a fasi fa grontapu prati na ini difrenti kondre, èn a no kenki soso den tirimakti nanga a fasi fa sani e waka nanga den difrenti kondre. Ma a kenki a fasi fa sma e si grontapu èn fa den e si makandra. A Fosi Grontapufeti tyari wan bigi kenki kon, èn noiti moro sani ben de soleki fa den ben de fosi a feti dati.”
[Prenki na tapu bladzijde 18]
Te Armagedon doro, dan Yehovah sa lusu den makti legre fu den engel