Amupakamane
Amupakamane
“Mamanino aazintu zyoonse ali afwaafwi. . . . [Amupakamane] kukukomba.”—1 PET. 4:7.
1. Ino mutwe wamakani ngaakali kuyiisya Jesu wakali kujatikizya nzi?
CIINDI Jesu naakali anyika, mutwe wamakani ngaakali kuyiisya wakali kujatikizya Bwami bwa Leza. Kwiinda mukubelesya Bwami, Jehova uyoosinizya kweelela kwabulelo bwakwe bwakoonse-koonse alimwi akusalazya zyina lyakwe. Aboobo, Jesu wakayiisya basikwiiya bakwe kuti kabapaila kuli Leza kuti: “Abuze Bwami bwako, alucitwe luyando lwako, ansi ano mbubonya mbuli kujulu.” (Mt. 4:17; 6:9, 10) Ino-ino buyo, Bwami oobu buyoonyonyoona nyika ya Saatani, mpoonya buyooyendelezya bantu kutegwa kuyanda kwa Leza kucitwe munyika yoonse. Mbubwenya mbwaakasinsima Daniele kuti, Bwami bwa Leza “buyoopwayaula akumanisya mami aya oonse [aamumazuba aano], alimwi bwalo buyooima nji kukabe kutamani.”—Dan. 2:44.
2. (a) Ino basikutobela Jesu bakali kuyoozyiba buti kuti kubako kwakwe kali Mwami kwatalika? (b) Ino citondezyo cakali kuyootondezya kuti ncinzi cimbi cakatalika?
2 Akaambo kakuti kuboola kwa Bwami bwa Leza cakali cintu ciyandika kapati kuli basikutobela Jesu, basikumutobela aaba bakamubuzya kuti: “Ncinzi cizooba citondezyo cakuboola kwako acamamanino aaciindi?” (Mt. 24:3) Kubako kwa Kristo kali Mwami tiikwakali kuyoolibonya kubantu baanyika, aboobo citondezyo cilibonya cakali kuyoopegwa. Icitondezyo eeco cakali kuyooba azibeela ziindene-indene zyakasinsimwa mu Magwalo. Aboobo basikutobela Jesu ibanoopona ciindi eeco bakali kuyoozyiba kuti watalika kulela kujulu. Cakali kuyooba ngamatalikilo aaciindi caambwa mu Bbaibbele kuti “mazuba aakumamanino” aabweende bubyaabi bwazyintu bwalo ibweendelezya nyika lino.—2 Tim. 3:1-5, 13; Mt. 24:7-14.
Amupakamane Mumazuba Aakumamanino
3. Ino nkaambo nzi Banakristo ncobakali kuyooyandika kupakamana?
3 Imwaapostolo Petro wakalemba kuti: “Mamanino aazintu zyoonse ali afwaafwi. Amulibatamike [akupakamana] kukukomba.” (1 Pet. 4:7) Basikutobela Jesu bakeelede kupakamana akulangila zyintu zitondezya kuti Jesu wakatalika kulela kali Mwami. Alimwi cakali kuyooyandika kapati kuti bapakamane mamanino aabweende bwazyintu bubyaabi aakuswena aafwaafwi. Jesu wakaambila basikwiiya bakwe kuti: “Amulangile, nkaambo tamuzi ciindi ncayoosika mukamwini iŋanda [kuzoobeteka nyika ya Saatani].”—Mk. 13:35, 36.
4. Amwaambe kwiimpana kuliko akati kabantu bamunyika ya Saatani alimwi ababelesi ba Jehova kujatikizya mbobazilanga zyintu. (Amubikkilizye akabbokesi.)
4 Bantu banji bamunyika beendelezyegwa a Saatani, alimwi kunyina nobabikkila maanu kujatikizya ncozyaamba zyintu zicitika munyika. Tabazyi kuti Kristo wakatalika kulela kali Mwami. Pele kaindi alimwi amazuba aano, basikutobela Kristo bakasimpe balipakamene alimwi balicizyi ncozyaamba zyintu izyakacitika mumwaanda wamyaka wainda. Kuzwa mu 1925, Bakamboni ba Jehova balizyi kuti Nkondo Yanyika Yakusaanguna alimwi azyintu zyakatobela nzitondezyo zyakuti Kristo wakatalika kulela kujulu mu 1914. Aboobo, mazuba aakumamanino aabweende bwazyintu oobu ibweendelezyegwa a Saatani akatalika. Bantu banji ibabikkila kapati maanu kuzyintu zicitika nokuba kuti tabazyi cini ncozyaamba, balabona kwiindana kuliko kujatikizya mbozyakabede zyintu ciindi kaitanatalika Nkondo Yanyika Yakusaanguna alimwi aciindi cakatobela.—Amubone kabbokesi kakuti “Ciindi Camanyongwe Cakatalika.”
5. Ino nkaambo nzi ncociyandika kapati kuzumanana kupakamana?
5 Kwamyaka iitandila kumwaanda lino, zyintu zikankamanisya kapati izicitika munyika yoonse zitondezya kuti tupona mumazuba aakumamanino. Kuceede buyo ciindi cisyoonto cakuti Jehova alailile Jesu kuti ayendelezye bangelo basinguzu kuti bainyonyoone nyika ya Saatani. (Ciy. 19:11-21) Banakristo bakasimpe balaililwa kuti kabalangila. Aboobo, cilayandika kapati kuzumanana kucita oobu notulangila mamanino aabweende oobu. (Mt. 24:42) Tweelede kuzumanana kulangila, alimwi kwiinda mukusololelwa a Kristo, tweelede kubeleka mulimo omwe munyika yoonse.
Mulimo Wanyika Yoonse
6, 7. Ino mulimo wakukambauka wazwidilila buti muciindi eecino cakumamanino?
6 Mulimo ngobeelede kucita babelesi ba Jehova wakasinsimwa kuba akati kazitondezyo izitondezya kuti tupona muciindi camamanino aabwende bubyaabi bwazyintu oobu. Jesu wakaupandulula mulimo ooyu wanyika yoonse ciindi naakali kubandauka zyintu zyakali kuyoocitika kuciindi cakumamanino. Ibusinsimi mbwaakaamba bwakabikkilizya majwi aayandika kapati aakuti: “Makani mabotu aa-Bwami azookambaukwa munyika yoonse kuti abe citondezyo kumisyobo yoonse. Elyo mamanino azoosika.”—Mt. 24:14.
7 Amuyeeye twaambo tumwi itweendelana acibeela cabusinsimi bwa Jesu. Mweelwe wabantu ibakambauka makani mabotu wakali musyoonto kapati ciindi mazuba aakumamanino naakatalika mu 1914. Kwaciindi cino, mweelwe ooyu wakomena kapati. Bakamboni ba Jehova ibakambauka nyika yoonse balainda ku 7,000,000 alimwi bajanika mumbungano ziinda ku 100,000. Kuyungizya waawo, bantu ibainda ku 10,000,000 bakabungana a Bakamboni ba Jehova lya Ciibalusyo calufwu lwa Kristo mu 2008. Ooku nkuyungizyigwa kupati kwiinda mwaka wakainda.
8. Ino nkaambo nzi kukazyigwa ncokwataulesya mulimo wakukambauka?
8 Elo kaka bukambausi bujatikizya Bwami bwa Leza buli mukucitwa cakulomya kubantu bamisyobo yoonse mamanino aabweende bwazyintu kaatanasika! Eeci cilacitwa nokuba kuti Saatani “[ngo leza] waansi ano.” (2 Kor. 4:4) Mbunga zyoonse zyatwaambo twacisi, bukombi alimwi amakwebo aanyika eeyi ikubikkilizya anzila zyoonse zibelesyegwa mukumwaya makani, nguuzyeendelezya. Pele, ino ncinzi cipa kuti mulimo wakukambauka uzwidilile? Wazwidilila akaambo kakuti Jehova nguusololela. Aboobo, mulimo wakukambauka Bwami ulazumanana nokuba kuti Saatani usoleka kuulesya.
9. Ino nkaambo nzi kuzwidilila kwamulimo wakukambauka, kuzumanana kukomena kwamweelwe wabantu ba Jehova alimwi akuvwula kwaluzyibo ndobajisi kujatikizya Leza ncozikonzya kwaambwa kuti maleele?
9 Kuzwidilila kwamulimo wakukambauka Bwami, kuzumanana kukomena kwamweelwe wabantu ba Jehova alimwi aluzyibo ndobajisi kujatikizya Leza alimwi amakanze aakwe, zilakonzya kwaambwa kuti maleele. Naatali Leza uugwasyilizya mulimo wakukambauka kwiinda mubusolozi alimwi alukwabililo ndwapa bantu bakwe, mulimo ooyu nowatali kucitika. (Amubale Matayo 19:26.) Tulakonzya kusyoma kuti, kwiinda mukugwasyigwa amuuya wa Leza uusalala walo uubeleka mubantu bapakamene balo ibalisungwide kubeleka, mulimo ooyu wakukambauka uyoomanizyigwa, “elyo mamanino azoosika.” Ciindi eeci cili aafwaafwi akusika.
“Mapenzi ayo Mapati”
10. Ino mbuti Jesu mbwaakaapandulula mapenzi mapati aaboola?
10 Mamanino aabweende bwazyintu oobu bubyaabi ayoosika kuciindi ciitwa kuti “mapenzi ayo mapati.” (Ciy. 7:14) Bbaibbele talitwaambili kuti naa ciindi eeci cinooli cilamfwu buti, pele Jesu wakaamba kuti: “Kuciindi eco kuzooba mapenzi mapati aatana kubonwa kuzwa kumalengelo aanyika kusikila sunu, alimwi takoozooba limbi aali boobu pe.” (Mt. 24:21) Ikuti naa twalanga mapenzi aakacitika, alo aali mbuli yaayo aakacitika mu Nkondo Yanyika Yabili mwalo mwakafwa bantu babalilwa kutuulunzuma tuli 50 kusika ku 60, masimpe mapenzi aaboola anooli mapati kapati. Ayoomana lyankondo ya Amagedoni. Eeci nceciindi Jehova nayoozumizya nkamu yakwe yabasikunyonyoona kuti bakaakunyonyoone zibeela zyoonse zyabweende bwanyika ya Saatani.—Ciy. 16:14, 16.
11, 12. Ino ncintu nzi ciyakucitika ikutondezya kuti mapenzi mapati atalika?
11 Ibusinsimi bwamu Bbaibbele tabutwaambili buzuba cibeela cakusaanguna imapenzi mapati naayootalika, pele bulatwaambila kujatikizya cintu cikankamanisya iciyootondezya kuti atalika. Eeci cintu iciyoocitika nkunyonyoonwa kwabukombi bwakubeja boonse nkobayoocita baleli bamasi. Mubusinsimi bwamu Bbaibbele ibujanika ku Ciyubunuzyo zyaandano 17 a 18, bukombi bwakubeja bukozyanisyigwa kumwanakazi sikuvwuula walo walikucita mamambe abaleli bamasi aanyika. Lugwalo lwa Ciyubunuzyo 17:16 lutondezya kuti ciindi cili aafwaafwi akusika calo mbunga zyatwaambo twacisi ‘noziyoomusula mwanakazi sikuvwuula, kumusyaazya alike, kumusamununa, kulya mubili wakwe akumuumpa amulilo.’
12 Iciindi caakusika, Leza “[uyoo]bika mumyoyo [yabaleli bazisi] oyu muyeeyo wakulomya bukanze bwakwe” kuti bakabunyonyoone bukombi bwakubeja boonse. (Ciy. 17:17) Aboobo, lunyonyooko oolu luyooambwa kuti luzwa kuli Leza. Ndubeta Leza ndwayoocita kubukombi bwakuupaupa ameso bwalo ikwaciindi cilamfwu bwayiisya bantu njiisyo ziteendelani akuyanda kwa Jehova alimwi bwapenzya babelesi bakwe. Ibunji bwabantu munyika kunyina nobalangila kuti bukombi bwakubeja buyoonyonyoonwa. Pele babelesi ba Jehova ibasyomeka balo balangila kuti eeci ciyoocitika. Alimwi mumazuba oonse aaya aakumamanino, baambila bantu kujatikizya makani aaya.
13. Ino ncinzi citondezya kuti mamanino aabukombi bwakubeja ayoocitika muciindi cisyoonto buyo?
13 Bantu banji bayoogambwa baakubona kuti bukombi bwakubeja bwanyonyoonwa. Businsimi bwamu Bbaibbele butondezya kuti bamwi “bami baansi” bayakwaamba kuti: “Maawe! Maawe, . . . lubeteko lwako lwafwambaana kusika!” (Ciy. 18:9, 10, 16, 19) Bbaibbele libelesya bbala lyakuti “lwafwambaana” naa “muwoola lyomwe” (NW) ikutondezya kuti ciyoocitika muciindi cisyoonto buyo.
14. Ino ncinzi ncayoocita Jehova ciindi basinkondonyina baakutalika kulwana babelesi bakwe?
14 Tulizyi kuti bukombi bwakubeja bwaakumana buyo kunyonyoonwa, babelesi ba Jehova ibaambilizya milumbe yalubeta bayoolwanwa abasinkondonyina. (Ezk. 38:14-16) Eelyo babelesi ba Jehova baakutalika buyo kulwanwa, Jehova uyoobalwana basinkondonyina aaba nkaambo wakasyomezya kuti uyoobakwabilila bantu bakwe basyomeka. Jehova waamba kuti: “Nkaambo ndaamba mubbivwe lyangu amubukali bwangu bupisya. . . . Nkabela bayooziba kuti ndime Jehova.” (Amubale Ezekieli 38:18-23.) Leza ulaamba Mujwi lyakwe kuti: “Uumuguma [babelesi bakwe basyomeka] ulaguma imboni yaliso lya[ngu].” (Zek. 2:8) Aboobo, ciindi basinkondonyina baakutalika kulwana babelesi bakwe, Jehova takakkali buyo akweebelela. Uyoobalwana basinkondonyina, calo iciyooba ncecibeela camamanino camapenzi mapati—imatalikilo aa Amagedoni. Kabasololelwa a Kristo, bangelo basinguzu bayoonyonyoona nyika ya Saatani.
Mbotweelede Kujatikizyigwa
15. Ino kuzyiba kuti mamanino aabweende bwazyintu oobu alaafwaafwi kweelede kutujatikizya buti?
15 Ino mbuti kuzyiba kuti mamanino aabweende oobu bubyaabi alaafwaafwi kapati mbokweelede kutujatikizya? Imwaapostolo Petro wakalemba kuti: “Lino zintu ezi mbuziti kamaninine obo, nywebo muleelede kuba bantu bali buti mukweenda munzila iisalala amukulemeka Leza?” (2 Pet. 3:11) Majwi aaya akankaizya kaambo ncociyandika kuti katubikkila kapati maanu kukubona kuti mbotulilemeka kuleendelana azyeelelo zya Leza alimwi akuti buumi mbotupona bulabikkilizya amilimo yakulyaaba kuli Leza, ikutondezya mbotumuyanda Jehova. Milimo eeyi ibikkilizya kubeleka kusika mpotugolela mumulimo wakukambauka makani mabotu aa Bwami mamanino kaatanasika. Petro alimwi wakalemba kuti: “Lino mamanino aazintu zyoonse ali afwaafwi. . . . [Amupakamane] kukukomba.” (1 Pet. 4:7) Tubamba cilongwe a Jehova alimwi akutondezya kuti tulamuyanda kwiinda mukupaila kulinguwe lyoonse, kumulomba kuti atusololele kwiinda mukubelesya muuya wakwe uusalala alimwi ambungano yakwe yanyika yoonse.
16. Ino nkaambo nzi ncotweelede kwaatobela malailile aa Leza?
16 Muciindi eecino iciyoosya kapati, tweelede kwaatobela malailile aazwa Mujwi lya Leza aakuti: “Amucenjele loko mbumweenda. Muteendi mbuli bafubafuba, pe, amweende mbuli basimaanu. Amujatisye loko ciindi canu coonse, nkaambo kakuti mazuba aasunu mabi.” (Ef. 5:15, 16) Ibubi bwavwula kapati lino ikwiinda mbobwakabede kaindi. Saatani wabamba nzila zinji zyakuti alesye bantu kucita kuyanda kwa Jehova naa kuyanda buyo kuti abanyonganye. Mbotuli babelesi ba Leza, tulizyi alimwi tatuyandi kuzumizya cintu cili coonse kuti citulesye kusyomeka kuli Leza. Alimwi tulicizyi iciyoocitika ino-ino, aboobo tusyoma muli Jehova alimwi amakanze aakwe.—Amubale 1 Johane 2:15-17.
17. Amupandulule ncobayoocita bantu ibayoofwutuka lya Amagedoni ciindi bubuke bwaakutalika.
17 Cisyomezyo ncaakapa Leza cakuti uyoobabusya bafwide ciyoozuzikizyigwa mbokunga “ku[yoo]ba kubuka kwabafu, akwabaluleme akwabataluleme.” (Inc. 24:15) Amubone majwi aaya mbwaasinizya cisyomezyo eeci: “Ku[yoo]ba kubuka kwabafu.” Masimpe tatukonzyi kudooneka nkaambo Jehova nguwakaamba majwi aaya! Lugwalo lwa Isaya 26:19 lusyomezya kuti: “Bafu bako bayoopona. . . . Amubuke, mwiimbe, inywe nobakede mubulongo . . . Nyika iyoobusya [bafwu] bayo.” Majwi aaya akazuzikizyigwa ciindi cakusaanguna Leza naakapilusya bantu bakwe bansiku kumunzi wabo, aboobo atupa bulangizi bwakuti ayoozuzikizyigwa munyika mpya. Elo kaka kuyooba lukkomano lutaambiki ciindi aabo ibayoobusyigwa baakuswaangana abayandwa babo! Inzya, mamanino aanyika ya Saatani alaafwaafwi, alimwi nyika mpya ya Leza ilaafwaafwi kapati akusika. Aboobo cilayandika kapati kuba bantu bapakamene.
Sena Muciyeeyede?
• Ino mutwe wamakani ngaakali kuyiisya Jesu wakali kujatikizya nzi?
• Ino mulimo wakukambauka Bwami utene aali lino?
• Ino nkaambo nzi ncociyandika kapati kupakamana?
• Ino cisyomezyo cilembedwe ku Incito 24:15 cimukulwaizya buti?
[Mibuzyo yaciiyo]
Kabbokesi/[Cifwanikiso icili apeeji 16, 17]
CIINDI CAMANYONGWE CAKATALIKA
The Age of Turbulence: Adventures in a New World ngomutwe wamakani wabbuku lyakalembwa mu 2007 aba Alan Greenspan. Kwamyaka iitandila ku 20, bakali basicuuno bakabunga kaitwa kuti United States Federal Reserve Board kalo ikalanganya mabbanga aamucisi eeci. Ba Greenspan baamba lwiindano luliko akati kazyintu zyakali kucitika munyika kautanasika mwaka wa 1914 alimwi azyakatobela kuzwa mwaka ooyu, kabati:
“Kweelana azyakuluula zyoonse zijatikizya zyakali kucitika kautanasika mwaka wa 1914, bantu alimwi amasi aamunyika akali kubalemeka kapati bantunyina alimwi kwakali kuyaambele mumakani aajatikizya zilengwa alimwi anzila nzyobakali kubelesya mukucita zyintu kwiinda mukubelesya luzyibo lwasayansi; kuyaambele kwabuumi bwabantu kwakalibonya kuti kwakali kuyoozumanana kubota. Mumwaanda wamyaka wa 19, cilengwa cakusambala bantu mubuzike cakamana. Lunya lwakalibonya kuti lwakali kuyaabumana. . . . Kucizyiba kubamba zyintu zyatakaninga bambwa amuntu umbi kwiinda mukubelesya busongo bwasayansi kwakayaambele mumwaanda wamyaka wa 19 munyika yoonse, aboobo kwakabambwa zyintu zibikkilizya njanji, luwaile, magesi, cipekupeku, myootokala, alimwi azyintu ziindene-indene zyakubelesya kutegwa buumi bwamuŋanda buube-ube. Makani aabusilisi, kuyaambele mumakani aajatikizya zyakulya zijisi busani, alimwi akucikonzya kuba ameenda mabotu aakunywa kwakapa kuti bantu banji kabalangila kupona kwaciindi cilamfwu . . . Bantu boonse munyika bakali kulimvwa kuti lusumpuko oolu luyoozumanana kucitika.”
“Pele . . . Nkondo Yanyika Yakusaanguna yakalunyonyoona kapati lusumpuko oolu loonse kwiinda Nkondo Yanyika Yabili, nkaambo nkondo yakusaanguna yakanyonyoona luzyibo. Tandikonzyi kuluba mbobakali kuyeeya bantu bakali kupona Nkondo Yanyika Yakusaanguna kaitanatalika, ciindi buumi bwabantu bwakumbele nobwakali kuboneka kuti buyoozumanana kusumpuka cakufwambaana. Pele mbotuzibona zyintu lino kuliindene ambotwakali kuzibona mwaanda wamyaka wainda, lino zilibonya kuti ziyaabwiindila buya kubija. Sena milimo yazigwebenga, kupya kwanyika akaambo kakunyongana kwamuuya (global warming), naa zyintu izipa bantu kulibilika mazuba aano, ziyoonyonganya kapati bantu mbuli mboyakacita Nkondo Yanyika Yakusaanguna? Kunyina uukonzya kwaamba bwini.”
Kuzwa ciindi nobakali kucikolo cipati, ba Greenspan balaayeeya nzyobakaamba ba Benjamin M. Anderson ibakapona kuzwa mumwaka wa 1886 kusika mu 1949 balo ibakali ba Syaabupampu mumakani aamakwebo, mumajwi aakuti: “Ibantu bapati bakonzya kuyeeya mboyakabede nyika kaitanatalika Nkondo Yanyika Yakusaanguna, balabuyeeya akubulombozya bukkale bwaciindi eeciya. Bantu bakali kulimvwa kuti balikwabilidwe kapati, ilukwabililo lwalo ilutanabede kuzwa ciindi eeciya.”—Economics and the Public Welfare.
Bbuku litegwa A World Undone, ilyakalembwa aba Gerald J. Meyer, ilyakamwaigwa mu 2006 alyalo lilapandulula mbubwenya oobu. Lyaamba kuti: “Izyintu zyakacitika kaindi zyaambwa kuti zyacinca ‘zyintu zyoonse.’ Eeci ncamasimpe kujatikizya Nkondo Mpati iyakatalika mu 1914 kusikila mu 1918. Inkondo eeyi masimpe yakacinca zyintu zyoonse: Tiiyakacinca buyo migano yazisi, mfwulumende alimwi azyakali kuyoocitikila masi, pele yakacinca nzila bantu mbobaibona nyika alimwi ambobalibona bamukamwini kuzwa ciindi eeciya. Yakaleta bukkale bupya bwalo bwiindene aboobo bwakaliko kusaanguna.”
[Cifwanikiso icili apeeji 18]
Lya Amagedoni, Jehova uyootuma makamu aabangelo basinguzu