Si Jehova Maninigo na Omawon Niato na May Pagkasararo

“Omawon nindo si Jah!”—SAL. 111:1.

1, 2. Ano an kahulogan kan “Aleluya,” asin paano iyan ginamit sa Kristianong Griegong Kasuratan?

“ALELUYA!” An kagsing na iyan parateng nadadangog sa mga relihion nin Kakristianohan. May mga tawo na parateng ginagamit an ekspresyon na iyan sa aroaldaw na pakikipag-olay ninda. Minsan siring, dikit an nakakaaram kan sagradong kahulogan kaiyan, asin an estilo nin pamumuhay nin dakol na naggagamit kaiyan dai nagtataong onra sa Dios. (Tito 1:16) An sarong diksionaryo dapit sa Biblia nagpapaliwanag na an “Aleluya” sarong “termino na ginagamit kan mga kagsurat nin manlaenlaen na salmo tanganing imbitaran an gabos na umiba sa sainda sa pag-omaw ki Jehova.” Sa katunayan, sinasabi nin dakol na nag-espesyalisar sa Biblia na an “Aleluya” nangangahulogan na “‘Omawon nindo si Jah,’ [an boot sabihon] si Jehova.”

² An ekspresyon na nasa Salmo 111:1 natural sanang trinadusir sa New World Translation na “Omawon nindo si Jah!” An Griegong termino kan ekspresyon na ini minalataw nin apat na beses sa Kapahayagan 19:1-6 bilang pagselebrar kan katapusan kan falsong relihion. Kun mangyari na iyan, an tunay na mga parasamba magkakaigwa nin espesyal na dahelan na gamiton sa magalang na paagi an ekspresyon na “Aleluya.”

An Dakulang mga Gibo Nia

3. Ano an pangenot na katuyohan kan regular na pakikipagtipon niato?

³ An kompositor kan Salmo 111 nagtatao nin dakol na dahelan kun taano ta si Jehova maninigong marhay na omawon niato na may pagkasararo. An bersikulo 1 nagsasabi: “Oomawon ko si Jehova sa bilog kong puso sa dayupot na grupo nin mga matanos asin sa katiriponan.” Siring man kaiyan an saboot kan Mga Saksi ni Jehova ngonyan. An pangenot na katuyohan kan regular na pakikipagtipon niato, sa lokal na mga kongregasyon sagkod sa darakulang kombension, iyo na omawon si Jehova.

4. Paano puedeng hanapon nin mga tawo an mga gibo ni Jehova?

⁴ “Dakula an mga gibo ni Jehova, hinahanap kan gabos na naoogmang marhay dian.” (Sal. 111:2) Mangnoha an terminong “hinahanap.” Segun sa sarong reperensia, an bersikulong iyan puedeng nanonongod sa mga tawo na “odok asin may pagkadebotong hinohorophorop saka pinag-aadalan” an mga gibo nin Dios. An mga linalang ni Jehova kadakol nin makangangalas na katuyohan. Ibinugtak nia an saldang, daga, asin bulan sa kinamumugtakan kaiyan, na an gabos tama an distansia sa lambang saro, kaya an satong daga nagkakaigwa nin init asin liwanag, aldaw asin banggi, mga klima saka pag-ati patin pagtaob nin dagat.

5. Ano an ihinayag kan mga pag-oswag sa pakasabot nin tawo dapit sa uniberso?

⁵ Kadakol an nadiskobre nin mga sientista manongod sa kinamumugtakan kan daga sa satong sistema solar saka sa eksaktong orbita, kadakulaan, asin mass kan satong dakulang bulan. Huli sa pagkaareglar asin haraning koneksion sa lambang saro kan  mga bagay na ini sa kalangitan, nagigin posible an magayon asin regular na pagliwat nin mga klima sa nagkapirang parte kan daga. Siring man, dakol na an nanodan manongod sa tamang-tamang garo pagkatimpla kan mga puersa nin naturalesa sa uniberso. Huli kaini, sa artikulo na may titulong “The Designed ‘Just So’ Universe,” an sarong propesor sa mechanical engineering nagsabi: “Pasil nanggad na masabotan kun taano ta dakolon na sientista an nagbago an isip sa nakaaging 30 taon, na minaoyon na kaipuhan an dakulang marhay na paniniwala tanganing magtubod na an uniberso naglataw paagi sa pagkanorongod sana. Mas nagigin makosog an ebidensia na may madonong na kagdisenyo mientras na orog niatong nasasabotan an manongod sa satong istaran na maingat na dinisenyo.”

6. Ano an saboot nindo manongod sa pagkagibo nin Dios sa tawo?

⁶ An saro pang makangangalas sa paglalang iyo an pagkagibo sa sato nin Dios. (Sal. 139:14) Kan linalalang an mga tawo, tinawan nia sinda nin isip, hawak na kompleto sa kaipuhan na mga organo, asin abilidad saka kakayahan na magtrabaho. Halimbawa, makangangalas an itinao nin Dios na mga kakayahan na magtaram asin maghinanyog, saka magsurat patin magbasa. Dakol na tawo an igwa kan mga kakayahan na iyan. Igwa man kamo kan makangangalas na obra maestra na siring sa pagtogdok—an kakayahan na tumindog nin tanos. Iyo nanggad, nakakapukaw nin may pagkangirhat na paggalang an pagkadisenyo asin pagkabalanse kan saindong hawak, an kakayahan kaiyan na humiro asin magtrabaho, saka an kemikal na mga proseso sa laog kaiyan. Orog pa dian, an makangangalas na mga koneksion nin nerbio (nerve), na huli kaiyan nagpupunsionar an saindong isip asin mga sentido, dai nanggad mapapantayan nin ano man na nagibo nin mga sientista. Sa katunayan, nagin posible sana an mga nagibo nin tawo huli sa isip asin mga sentido na itinao sa katawohan. Dawa an sinanay asin may kakayahan na marhay na inhenyero dai makakagibo nin ano man na bagay na magayon asin kapakipakinabang siring kan makangangalas an pagkadisenyo na sampulong garo makina (lever)—an mga moro asin tanggurangan nindo. Hapoton an saimong sadiri, ‘Mahahaman daw an kahangahangang mga gibo nin arte asin pagtogdok kun dai ekspertong gagamiton an mga moro na itinao nin Dios?’

An Dakulang mga Gibo nin Dios Asin an mga Kualidad Nia

7. Taano ta maninigo niatong mansayon an Biblia na saro sa dakulang mga gibo nin Dios?

⁷ Kaiba sa dakulang mga gibo ni Jehova an iba pang makangangalas na bagay na ginibo nia para sa katawohan, na ilinaladawan sa Biblia. An libro mismong iyan sarong obra maestra asin an laog kaiyan may pagkaoroyon. Bakong arog nin iba pang libro, iyan tunay nanggad na “ipinasabong nin Dios asin kapakipakinabang para sa pagtokdo.” (2 Tim. 3:16) Halimbawa, an enot na libro kan Biblia na Genesis nagpapaliwanag kun paano hinale nin Dios an karatan sa daga kan panahon ni Noe. An ikaduwang libro na Exodo nagpapaheling kun paano hinale ni Jehova an katuyawan sa pagka-Dios nia paagi sa pagpatalingkas sa Israel sa kaoripnan sa Egipto. Posibleng marhay na nasa isip kan salmista an siring na mga pangyayari kan sia mapahirong magsabi: ‘An gibo ni Jehova dignidad asin kagayonan mismo, asin an saiyang katanosan nagdadanay sagkod lamang. Sarong girumdoman an ginibo nia para sa saiyang makangangalas na mga gibo. Si Jehova may kabootan asin maheherakon.’ (Sal. 111:3, 4) Bako daw na maoyon kamo na an mga gibo ni Jehova sa bilog na kasaysayan, kaiba an mga bagay na ginigibo nia sa bilog na buhay nindo, sarong girumdoman para sa “dignidad asin kagayonan” nia?

8, 9. (a) Sa anong mga paagi magkalaen an mga gibo nin Dios asin an dakol na gibo nin tawo? (b) Ano an nagkapira sa mga kualidad nin Dios na inaapresyar nindo?

⁸ Mangnohon na idinoon man kan salmista an pambihirang mga kualidad ni Jehova, siring baga nin katanosan, kabootan, asin pagkaherak. Aram nindo na an mga ginigibo nin makasalan na katawohan bihira nanggad na basado sa katanosan. Sa parate, iyan resulta nin kahanaban, pagkauri, asin kaabhawan. Iyan risang-risa sa mapanglaglag na mga armas na ginigibo nin mga tawo para sa mga guerrang huli sa sutsut ninda asin tanganing makaganansia. Ini nagreresulta sa grabeng kasakitan asin takot kan minilyon na inosenteng biktima. Siring man, dakol na nagibo nin tawo an nagresulta sa pagsakit kan inaaping mga dukha. An sarong halimbawa na puedeng sambiton nin dakol iyo an paggamit nin mga oripon sa pagtogdok nin mga piramid. Iyan sa pangenot nagin lolobngan kan mapalangkaw na mga Faraon. Apuera kaiyan, an dakol sa mga gibo nin katawohan sa presenteng panahon bako  sanang mapang-api kundi “nagraraot kan daga.”—Basahon an Kapahayagan 11:18.

⁹ Laen nanggad an mga gibo ni Jehova, na pirmeng basado sa kun ano an tama! Kaiba sa mga gibo nia an maheherakon na probisyon para sa kaligtasan nin makasalan na katawohan. Kan itao nin Dios an pantubos, ‘ipinaheling nia an saiyang sadiring katanosan.’ (Roma 3:25, 26) Tunay nanggad, “an saiyang katanosan nagdadanay sagkod lamang”! Kun dapit sa kabootan, iyan maheheling sa mapasensiang paagi nin pagtratar nin Dios sa makasalan na mga tawo. Kun beses, ginamit pa ngani nia an terminong “tabi” kan sinda pinapakiolayan na tumalikod sa saindang nakakadanyar na mga dalan asin gibohon an tama.—Basahon an Ezequiel 18:25.

Maimbod sa mga Panuga Nia

10. Anong halimbawa nin kaimbodan an itinao ni Jehova mapadapit sa saiyang tipan ki Abraham?

¹⁰ “Tinatawan nia nin kakanon an mga natatakot sa saiya. Sagkod sa panahon na daing talaan gigirumdomon nia an saiyang tipan.” (Sal. 111:5) Minalataw na an pinanonongdan digdi kan salmista iyo an Abrahamikong tipan. Si Jehova nanuga na bebendisyonan nia an banhi ni Abraham asin nagsabi na magigin sadiri ninda an dakulang pinto kan saindang mga kaiwal. (Gen. 22:17, 18; Sal. 105:8, 9) Sa enot na kaotoban kan mga panugang iyan, an banhi ni Abraham nagin an nasyon nin Israel. An nasyon na iyan haloy na inoripon sa Egipto, alagad “ginirumdom nin Dios an saiyang tipan ki Abraham” asin pinatalingkas sinda. (Ex. 2:24) An suminunod na mga pagtratar ni Jehova sa sainda nagpapaheling kun gurano nanggad kabuka an palad nia. Nagtao sia nin kakanon para sa saindang hawak asin espirituwal na kakanon para sa saindang isip saka puso. (Deut. 6:1-3; 8:4; Neh. 9:21) Sa suminunod na mga siglo, an nasyon na iyan sa parate minatalikod sa Dios, minsan ngani nagsugo sia nin mga propeta tanganing sadolon sinda na bumalik sa saiya. Labing 1,500 na taon pakatapos na patalingkason nin Dios sa Egipto an mga Israelita, isinugo nia sa daga an bugtong na Aki nia. Si Jesus isinikwal kan kadaklan sa mga Judio asin sinda nagtogot na gadanon sia. Dangan si Jehova nagbilog nin bagong nasyon, saro na espirituwal, an “Israel nin Dios.” Kaiba ni Cristo, an nasyon na iyan an minakompuesto sa espirituwal na banhi ni Abraham, na ihinula ni Jehova na gagamiton nia sa pagbendisyon sa katawohan.—Gal. 3:16, 29; 6:16.

11. Paano padagos na ‘ginigirumdom ni Jehova an saiyang tipan’ ki Abraham?

¹¹ Padagos na ‘ginigirumdom ni Jehova an saiyang tipan’ asin an mga bendisyon na ipinanuga nia paagi kaiyan. Ngonyan, sia nagtatao nin abundang suplay nin espirituwal na kakanon sa labing 400 na lenguahe. Siring man, padagos niang sinisimbag an mga pamibi manongod sa pisikal na mga pangangaipo niato, kaoyon kan mga tataramon na: “Itao mo samo an samong tinapay para sa aldaw na ini segun sa kaipuhan sa aldaw na ini.”—Luc. 11:3; Sal. 72:16, 17; Isa. 25:6-8.

An Makangingirhat na Kapangyarihan ni Jehova

12. Sa anong paagi itinao sa suanoy na Israel “an mana kan mga nasyon”?

¹² “An kapangyarihan kan saiyang mga gibo isinaysay nia sa saiyang banwaan, kan itao sa sainda an mana kan mga nasyon.” (Sal. 111:6) An sarong pambihirang pangyayari sa kasaysayan nin Israel na tibaad nasa isip kan salmista iyo an milagrosong pagpatalingkas sa sainda sa Egipto. Kan togotan na ni Jehova an mga Israelita na lumaog sa Dagang Panuga, nasakop ninda an mga kahadean sa sirangan asin solnopan na tampi kan Salog nin Jordan. (Basahon an Nehemias 9:22-25.) Iyo, itinao ni Jehova sa Israel “an mana kan mga nasyon.” Iyan pagpaheling nanggad kan kapangyarihan nin Dios!

13, 14. (a) Anong pagpaheling kan kapangyarihan nin Dios may koneksion sa Babilonya an tibaad nasa isip kan salmista? (b) Ano pang darakulang gibo nin pagpatalingkas an ginibo ni Jehova?

¹³ Pero, aram niatong marhay na sa ibong kan gabos na ginibo ni Jehova para sa Israel, sinda dai nagpaheling nin paggalang sa saiya ni sa sainda man na mga apoon na si Abraham, Isaac, asin Jacob. Sinda padagos na nagrebelde sagkod na gamiton nin Dios an Babilonya tanganing haleon sinda sa daga ninda, na dinara sinda bilang bihag. (2 Cron. 36:15-17; Neh. 9:28-30) Siring kan ipinaparisa nin nagkapirang nag-espesyalisar sa Biblia, kun an kompositor kan Salmo 111 nabuhay pakabalik kan Israel hale sa pagkabihag sa Babilonya, sia igwa nin dugang pang dahelan na omawon si Jehova huli sa Saiyang kaimbodan asin kapangyarihan. Ipinaheling iyan nin Dios paagi sa pagpatalingkas sa mga Judio sa Babilonya—sarong imperyo na may regulasyon  na dai magpatalingkas nin mga bihag.—Isa. 14:4, 17.

¹⁴ Pakalihis nin mga limang siglo, ginamit ni Jehova an kapangyarihan nia sa mas dakula pa nganing paagi kan an nagsosolsol na mga tawo patalingkason nia sa kaoripnan sa kasalan asin kagadanan. (Roma 5:12) An sarong resulta iyo na 144,000 katawo an magigin linahidan nin espiritu na mga parasunod ni Cristo. Kan 1919, ginamit ni Jehova an kapangyarihan nia tanganing patalingkason sa pagkabihag sa falsong relihion an dikit na natatada kan mga linahidan na ini. An mga nagigibo ninda durante kan panahon na ini kan katapusan puede sanang mangyari huli sa kapangyarihan nin Dios. Kun sinda magigin maimbod sagkod sa kagadanan, sinda makakaiba ni Jesu-Cristo sa langit tanganing mamahala sa daga para sa kapakinabangan nin nagsosolsol na mga tawo. (Kap. 2:26, 27; 5:9, 10) Mamanahon ninda an daga sa mas mahiwas nanggad na paagi kisa kan sa suanoy na Israel.—Mat. 5:5.

Daing Katapusan Asin Mapagtitiwalaan na mga Prinsipyo

15, 16. (a) Ano an kaiba sa mga gibo kan mga kamot nin Dios? (b) Anong mga pagboot an itinao nin Dios sa suanoy na Israel?

¹⁵ “An mga gibo kan saiyang mga kamot katotoohan asin paghokom; mapagtitiwalaan an gabos na pagboot na itinatao nia, marigon sagkod lamang, sagkod sa panahon na daing talaan, ginibo sa katotoohan asin katanosan.” (Sal. 111:7, 8) Kaiba sa ‘mga gibo kan mga kamot’ ni Jehova an duwang tablang gapo na dian inukit an sampulong mahalagang ley para sa Israel. (Ex. 31:18) An mga ley na ini, kaiba an gabos na iba pang regulasyon na nagin kabtang kan tipan nin Ley ni Moises, basado sa daing sagkod asin mapagtitiwalaan na mga prinsipyo.

¹⁶ Halimbawa, an saro sa mga pagboot, o ley, sa mga tablang gapo na iyan nagsabi: “Ako si Jehova na saimong Dios sarong Dios na naghahagad nin dai nababangang debosyon.” Sinasabi pa kaiyan na si Jehova nagpapaheling nin “mamomoton na kabootan sa ikasangribong kapag-arakian kun dapit sa mga namomoot sa [saiya] asin nag-ootob kan [saiyang] mga togon.” An mga tablang gapo na iyan igwa man kan dai nagbabagong mga prinsipyo na siring baga nin “igalang mo an saimong ama asin an saimong ina” asin “dai ka maghabon,” saka kan ley na nagpapaheling nin hararom na pakasabot dapit sa pagbabawal na maara sa pagsasadiri nin iba.—Ex. 20:5, 6, 12, 15, 17.

An Satong Banal Asin Makangingirhat na Parabalukat

17. Ano an mga dahelan kaidto kan mga Israelita tanganing trataron kutana na banal an ngaran nin Dios?

¹⁷ “An pagbalukat mismo isinugo nia sa saiyang banwaan. Ipinagboot nia an saiyang tipan sagkod sa panahon na daing talaan. An saiyang ngaran banal asin makangingirhat.” (Sal. 111:9) Sa giraray, tibaad  nasa isip kan salmista an kaimbodan ni Jehova sa saiyang tipan ki Abraham. Kaoyon kaiyan, dai pinabayaan ni Jehova an saiyang banwaan, enot bilang mga oripon sa suanoy na Egipto asin pakalihis nin panahon bilang mga bihag sa Babilonya. Sa duwang kamugtakan na iyan, binalukat nin Dios an banwaan nia. Dawa an duwa sanang nagibong iyan igo na tanganing trataron kutana nin Israel na banal an ngaran nin Dios.—Basahon an Exodo 20:7; Roma 2:23, 24.

18. Taano ta naniniwala ka na sarong pribilehio an pagdara kan ngaran nin Dios?

¹⁸ Totoo man iyan sa mga Kristiano ngonyan, na binalukat sa dai nang paglaom na kaoripnan sa kasalan asin kagadanan. Maninigo niatong gibohon an satong pinakamakakaya na mamuhay kaoyon kan enot na kahagadan sa modelong pamibi: “Pakangbanalon logod an saimong ngaran.” (Mat. 6:9) Siertong ikakatadom sa sato an diosnon na pagkatakot paagi sa paghorophorop sa mamuraway na ngaran na iyan. An kagsurat kan Salmo 111 igwa kan tamang pagmansay dapit sa diosnon na pagkatakot, na nagsasabi: “An pagkatakot ki Jehova iyo an kapinonan nin kadonongan. An gabos na naggigibo kaiyan [nag-ootob kan saiyang mga togon] igwa nin marahay na pakarorop.”—Sal. 111:10.

19. Ano an pag-oolayan niato sa sunod na artikulo?

¹⁹ An nakakarahay na pagkatakot sa Dios makakatabang sa sato na ikaongis an maraot. Makakatabang man iyan sa sato na arogon an pambihirang mga kualidad nin Dios siring kan ipinapaheling sa Salmo 112, na pag-oolayan niato sa  sunod na artikulo. Ipinapaheling kan salmong iyan kun paano kita magigin kualipikado na makabilang sa minilyon na ikakaogma an pag-omaw sa Dios sagkod lamang. An siring na pag-omaw maninigo nanggad na itao sa saiya. “An saiyang kaomawan nagdadanay sagkod lamang.”—Sal. 111:10.

Mga Hapot Para sa Paghorophorop

• Taano ta si Jehova maninigo na omawon niato na may pagkasararo?

• Anong mga kualidad ni Jehova an ihinahayag sa mga gibo nia?

• Paano nindo minamansay an pribilehio na pagdara kan ngaran nin Dios?

[Mga Hapot Para sa Pag-adal]

[Ritrato sa pahina 20]

An pangenot na katuyohan niato sa regular na pakikipagtipon iyo na omawon si Jehova

[Ritrato sa pahina 23]

An gabos na ley ni Jehova basado sa daing sagkod asin mapagtitiwalaan na mga prinsipyo