I Stret Nomo We Yumi Joengud Blong Presem Jeova
I Stret Nomo We Yumi Joengud Blong Presem Jeova
“Olgeta. !Yufala i presem Ja!”—SAM 111:1, NW.
1, 2. ?Tok ya “Haleluia” i minim wanem? ?Oli yusum tok ya olsem wanem long Kristin Grik haf blong Baebol?
“!HALELUIA!” Plante taem yumi harem tok ya i kamaot long ol jos blong Krisendom. Samfala oli yusum tok ya oltaem long storian blong olgeta blong mekem tok blong olgeta i hevi. Be smol man nomo oli save mining blong tabu tok ya, mo plante man we oli yusum tok ya, fasin blong laef blong olgeta i no soemaot nating se oli ona long God. (Taet. 1:16) Wan diksonari blong Baebol i eksplenem mining blong tok ya “Haleluia” se wan “wod we sam man blong raetem Ol Sam oli yusum, blong singaotem ol man oli kam joen wetem olgeta blong presem Jeova.” Plante man we oli stadi dip long Baebol oli talem se “Haleluia” i minim “‘Presem Ja,’ [hemia] Jeova.”
2 From samting ya, Baebol ya New World Translation i tanem tok blong Ol Sam 111:1 olsem: “Olgeta. !Yufala i presem Ja!” Long ol Grik hanraet blong Revelesen 19:1-6, oli bin raetem tok ya fo taem blong soemaot glad taem ol giaman skul oli lus. Yes, taem samting ya i kamtru, bambae hemia wan spesel risen blong ol man blong wosipim trufala God oli talem “Haleluia” wetem bigfala respek.
Ol Bigbigfala Wok We God i Mekem
3. ?Wanem bigfala risen blong yumi joen wanples oltaem?
3 Man we i raetem Sam 111, i talem plante risen from wanem i stret blong yumi joengud blong presem Jeova. Vas 1 i talem se: “Bambae mi mi stanap long fes blong olgeta man blong hem [Jeova], mi talem tangkiu long hem long olgeta tingting blong mi.” Ol Witnes blong Jeova tede tu oli wantem mekem olsem. Bigfala risen blong yumi joen wanples oltaem long kongregesen blong yumi mo long ol bigfala asembli, hemia blong presem Jeova.
4. ?Olsem wanem ol man oli save kasem save long ol samting we Jeova i mekem?
4 “Olgeta samting we hem i mekem oli gud tumas, mo olgeta man we oli glad long ol samting ya, oli wantem tumas blong savegud olgeta.” (Sam 111:2) Makemgud tok ya “wantem tumas blong savegud.” Wan buk we i eksplenem Baebol i talem se vas ya i stret long ol man we oli “tektaem blong stadi mo tingting dip wetem bigfala ona” long ol samting we God i mekem. Olgeta nambawan samting we Jeova i mekem, hem i mekem blong oli givhan long yumi. Hem i putum san, wol, mo mun, oli stap long stret ples blong olgeta, wan i no stap longwe no klosap tumas long narawan. Samting ya i mekem se wol i stap wom mo i gat laet, i gat tudak mo delaet, i gat koltaem mo hot taem, mo solwota i kam drae mo i kamso.
5. ?Taem man i kasem save moa long heven mo wol, hem i luksave wanem?
5 Ol saentis oli lanem plante samting long saed blong stret ples we wol blong yumi i stap long hem, long medel blong ol narafala sta. Mo tu, oli faenemaot plante samting long saed blong bigfala mun blong yumi, saes blong hem, mo olsem wanem hem i ron long fasin we i stretgud olgeta blong raonem wol blong yumi. Rod we ol sta ya oli folem mo fasin blong olgeta blong wokgud tugeta, i mekem se i gat hot taem mo koltaem evri yia, mo yumi haremgud long samting ya. Mo tu, ol saentis oli lanem plante samting long saed blong ol paoa we God i wokem long skae mo raonabaot yumi, mo nambawan fasin blong olgeta blong wok tugeta. Wan saentis we i tijim ol man blong wokem ol enjin, i raetem wan stori we nem blong hem, “Skae Mo Wol We Plan Blong Hem i Stretgud Olgeta.” Hem i talem se: “I isi blong kasem save from wanem plante saentis oli jenisim tingting blong olgeta long ol 30 yia we oli pas. Naoia oli agri se man i mas gat bigfala bilif blong ting se olgeta samting long skae mo wol oli kamaot from wan bigfala aksiden nomo. Taem yumi kasem save moa long wol ya mo ol nambawan samting blong hem, yumi mas bilif se wan Man we i gat bigfala waes mo save i mekem plan blong ol samting ya mo i wokem olgeta wetem bigfala kea.”
6. ?Wanem tingting blong yu long saed blong fasin blong God blong wokem man?
6 Wan narafala samting we i soemaot nambawan fasin blong Jeova blong mekem ol samting, hemia yumi. (Sam 139:14) Taem God i wokem man, hem i givim wan bren long hem, mo i givim wan bodi we evri haf blong hem oli wokgud, mo i mekem we man i gat save mo paoa blong wok. Tingbaot merikel ya: God i mekem se man i save toktok, lesin, rid, mo raet. Plante man oli naf blong mekem ol samting ya. Mo tu, yu yu gat wan narafala samting we i soemaot nambawan fasin blong God blong wokem ol samting, hemia bodi blong yu. Yes, plan blong bodi blong yu, olsem wanem ol haf blong hem oli wok tugeta, oli mufmuv olbaot mo mekem wok, mo fasin blong hem blong tekem kakae, tantanem, mo kasem paoa from, olgeta samting ya oli bitim tingting blong yumi. Antap long hemia, ol saentis oli no naf blong wokem samting olsem ol nev long bodi we oli joejoen long nambawan fasin, mo from samting ya bren blong yu i save mekem se yu lukluk, harem, smelem, tajem, mo testem samting. Blong talem stret, ol man oli save mekem plante bigbigfala wok nomo from we God i givim wan bren long olgeta, mo from we oli save lukluk, harem, tajem, smelem mo testem samting. Nating se man i gat hed olsem wanem blong wokem ol enjin, be hem i no naf blong mekem wan tul we i naes mo i wokgud olsem ol ten nambawan fingga blong yu. Tingbaot ol man we oli wokem ol naes pija mo haos. Nao traem askem se: ‘?Sipos oli no yusumgud ol fingga we God i givim, bambae oli naf blong wokem ol samting ya?’
Ol Bigbigfala Wok We God i Mekem Mo Ol Fasin Blong Hem
7. ?From wanem yumi mas tingbaot Baebol olsem wan long ol bigbigfala wok blong God?
7 Sam narafala bigbigfala wok blong Jeova, hemia ol samting we God i mekem blong givhan long ol man, olsem we Baebol i tokbaot. Baebol hem wan i wan bigfala wok blong Jeova. Evri haf blong hem oli joengud wetem ol narafala haf. Buk ya i defren long ol narafala buk. I tru nomo se ol tok blong Baebol, ‘God i putum long tingting blong ol man ya bifo, mo i stretgud blong tijim yumi.’ (2 Tim. 3:16) Tingbaot Jenesis, faswan buk blong Baebol. Buk ya i eksplenem olsem wanem God i spolem ol rabis fasin long taem blong Noa, blong mekem wol i kam klin bakegen. Eksodas, seken buk blong Baebol, i soemaot olsem wanem Jeova i pruvum se hem i trufala God, taem hem i mekem ol man Isrel we oli wok slef long Ijip oli kamfri. Ating man blong raetem Sam i tingbaot ol wok ya blong Jeova, nao samting ya i pusum hem blong talem se: “Olgeta samting we [God] i mekem oli stap leftemap hae nem blong hem, mo oli stap soemaot paoa blong hem we hem i King. Stret fasin blong hem bambae i stap oltaem, gogo i no save finis. Oltaem hem i stap mekem we yumi stap tingbaot ol bigbigfala wok blong hem. Hem i kaen tumas, mo hem i gat sore long man.” (Sam 111:3, 4) ?Olsem wanem? ?Yu yu agri se olgeta wok blong Jeova long taem bifo mo tede tu, oli mekem yumi tingbaot ‘haenem mo paoa blong hem’ oltaem?
8, 9. (a) ?Olsem wanem ol wok blong God oli defren olgeta long plante wok blong man? (b) ?Wanem sam fasin blong God we yu yu laekem tumas?
8 Man blong raetem Sam ya i tokbaot ol nambawan fasin blong Jeova tu, olsem stret fasin, kaen fasin, mo sore. Yu yu save finis se bighaf blong ol wok blong ol sinman oli no stanap long stret fasin. Plante taem ol man oli mekem ol wok ya from we oli griri, jalus, mo flas. Yumi luksave samting ya long ol rabis tul blong faet we ol man oli wokem, jes blong mekem faet long ol narafala kantri mo blong kasem mane. Hemia i karem trabol, ded, mo soasore long plante milian man we oli no joen nating long faet. Mo tu, plante man oli yusum ol puaman nomo blong mekem ol bigfala wok blong olgeta. Samting ya i mekem we ol puaman ya oli safa mo oli harem nogud moa. Wan eksampol blong samting ya, hemia taem oli yusum ol slef blong bildim ol piramid. Be ol piramid ya oli blong berem ol flas Fero long olgeta nomo. Mo tu, antap long fasin ya blong spolem ol man, plante wok blong man tede oli “stap spolem wol” tu.—Ridim Revelesen 11:18.
9 !Ol wok blong Jeova oli defren olgeta! !Oltaem ol wok blong hem oli stanap long stret fasin! Wan long ol wok ya we hem i mekem from we hem i sore long ol sinman, hemia taem i mekem rod blong sevem olgeta. Taem Jeova i givim Pikinini blong hem olsem wan ransom, “hem i soemaot we fasin blong hem i stret.” (Rom 3:25, 26) !Yes, “stret fasin blong hem bambae i stap oltaem, gogo i no save finis”! Mo tu, God i soemaot kaen fasin taem hem i gat longfala tingting long ol sinman. Hem i kaen long olgeta taem i plis long olgeta blong lego ol nogud rod we oli stap folem, tanraon, mo mekem samting we i stret.—Ridim Esikel 18:25.
Jeova i Holem Ol Promes Blong Hem
10. ?Wanem gudfala eksampol we Jeova i givim long saed blong promes we hem i mekem wetem Ebraham?
10 “Yumi ol man blong hem, mo neva bambae hem i fogetem promes ya we hem i mekem wetem yumi. Oltaem hem i stap givim kakae long olgeta we oli stap ona long hem.” (Sam 111:5) I luk olsem we man blong raetem Sam ya i stap tokbaot promes we Jeova i mekem wetem Ebraham. Hem i promes blong blesem ol man we oli kamaot biaen long Ebraham, i talem se olgeta bambae oli winim ol enemi blong olgeta. (Jen. 22:17, 18; Sam 105:8, 9) Promes ya i kamtru fastaem taem ol man we oli kamaot biaen long Ebraham oli kam neson blong Isrel. Neson ya i wok longtaem long Ijip olsem ol slef. Nao “[God] i tingbaot promes ya we hem i mekem wetem Ebraham,” ale hem i tekemaot olgeta long Ijip. (Eks. 2:24) Ol samting we Jeova i mekem long olgeta biaen, oli soemaot se hem i gat gladhat blong givim presen. Hem i givim kakae blong mekem bodi blong olgeta i stap strong, mo i givim ol gudfala save blong lidim tingting mo hat blong olgeta. (Dut. 6:1-3; 8:4; Neh. 9:21) Long ol handred yia biaen, plante taem neson blong Isrel i lego God, nating se Hem i sanem ol profet blong traem pulum olgeta oli kambak long hem. Bitim 1,500 yia afta we God i tekemaot ol man Isrel long Ijip, hem i sanem Pikinini blong hem, wan nomo we hem i gat, i kamdaon long wol. Bighaf blong ol man Jiu oli no wantem Jisas, mo oli letem hem i go long han blong ol man blong oli kilim hem i ded. Ale Jeova i stanemap wan niufala neson, “Isrel blong God.” Kraes wetem neson ya, oli olsem laen ya blong Ebraham, we Jeova i talem se bambae hem i yusum blong blesem olgeta man.—Gal. 3:16, 29; 6:16, NW.
11. ?Olsem wanem Jeova i ‘neva fogetem promes ya’ we hem i mekem wetem Ebraham?
11 Kam kasem tede, Jeova i ‘neva fogetem promes ya’ mo ol blesing we bambae oli kamaot from. Naoia, hem i stap givim fulap save blong Baebol long yumi long bitim 400 lanwis, hemia i olsem gudfala kakae blong yumi. Mo tu, hem i gohed blong givim kakae blong mekem bodi blong yumi i strong. Long rod ya, hem i ansa long prea ya blong yumi se: “Plis, evri dei yu givim kakae long mifala i naf blong wan dei.”—Luk 11:3; Sam 72:16, 17; Aes. 25:6-8.
Bigfala Paoa Blong Jeova
12. ?Olsem wanem God i givim “kantri ya we fastaem i ples blong ol narafala man” i go long ol man Isrel?
12 “Hem i soemaot paoa blong hem long yumi long fasin ya we hem i givim kantri ya long yumi we fastaem i ples blong ol narafala man.” (Sam 111:6) Maet wan bigfala samting we man blong raetem Sam ya i stap tingbaot, hemia merikel we Jeova i mekem blong tekemaot ol man Isrel long Ijip. Taem Jeova i letem ol man Isrel oli go long Promes Lan, hem i mekem we oli naf blong winim ol kantri long is saed mo wes saed blong Jodan Reva. (Ridim Nehemaea 9:22-25.) Yes, Jeova i givim “kantri ya we fastaem i ples blong ol narafala man,” i go long ol man Isrel. !Tru ya, God i soemaot bigfala paoa blong hem!
13, 14. (a) ?Maet man blong raetem Sam ya i stap tingbaot wanem bigfala samting we i joen wetem Babilon, we God i mekem blong soemaot paoa blong hem? (b) ?Wanem sam narafala bigbigfala wok we Jeova i mekem blong sevem ol man blong hem?
13 Jeova i mekem i gud long ol man Isrel. Be yumi save se, oli no soem respek long Jeova mo long ol olfala bubu blong olgeta, Ebraham, Aesak, mo Jekob. Oli gohed blong mekem stronghed fasin gogo God i yusum ol man Babilon blong winim olgeta mo tekem olgeta oli go kalabus. (2 Kron. 36:15-17; Neh. 9:28-30) Sam man blong stadi dip long Baebol, oli ting se man we i raetem Sam 111 i laef afta long taem ya we Isrel i kamfri long kalabus long Babilon. Sipos tingting ya i stret, man ya i gat bigfala risen moa blong presem Jeova from paoa blong hem mo fasin blong hem blong stap tru long ol man blong hem. God i soemaot ol fasin ya taem hem i tekemaot ol man Isrel long Babilon, nating se neson ya blong Babilon i gat wan loa se ol man we oli winim long faet mo oli sakem olgeta long kalabus, neva bambae oli letem olgeta oli gofri.—Aes. 14:4, 17.
14 Samwe long 500 yia biaen, Jeova i yusum paoa blong hem long fasin we i bigwan moa. Hem i mekem se ol man we oli tanem tingting blong olgeta, oli no moa stap olsem we oli slef blong sin mo ded. (Rom 5:12) Taem hem i mekem olsem, hem i openem rod blong tabu spirit i makemaot 144,000 man blong Kraes. Long yia 1919, Jeova i yusum paoa blong hem blong sevem smol grup blong ol tabu man ya we oli stap long wol, oli aot long ol giaman skul we oli holem olgeta oli kalabus. Bigfala wok we oli mekem long taem blong en i kamtru nomo from paoa blong God. Olgeta we oli stap tru long God go kasem ded, bambae oli joen wetem Jisas Kraes long heven blong rulum wol ya. Bambae oli mekem i gud tumas long ol man we oli tanem tingting blong olgeta from sin. (Rev. 2:26, 27; 5:9, 10) Bambae oli tekem wol ya i blong olgeta long wan fasin we i bigwan moa long hemia we i kamaot long ol man Isrel bifo.—Mat. 5:5, Baebol Long Bislama; futnot.
Yumi Save Trastem Ol Tok We Hem i Putum, Bambae Oli Stap Olwe
15, 16. (a) ?Wanem sam long olgeta samting we God i mekem? (b) ?Wanem sam oda we God i givim long ol man Isrel bifo?
15 “Olgeta samting we hem i mekem i soemaot we hem i stap holem promes blong hem, mo i stap jajem man long stret fasin. Olgeta tok we hem i putum, yumi save trastem olgeta. Hem i putum olgeta long fasin we i tru mo i stret, mo bambae oli stap oltaem nomo, gogo i no save finis.” (Sam 111:7, 8) Wan long “olgeta samting we [God] i mekem,” hemia tufala ston we hem i raetem ten impoten loa long tufala, blong givim long ol man Isrel. (Eks. 31:18) Ol loa ya wetem ol narafala oda we oli stap long kontrak blong Loa blong Moses, oli stanap long ol stamba trutok we yumi save trastem mo we bambae oli stap olwe.
16 Blong soemaot samting ya, tingbaot wan long ol oda, no loa, long tufala ston ya: “Mi mi Hae God [“Jeova,” NW], mi God blong yufala, mo yufala i man blong mi, nao mi mi no save letem yufala i mekem wosip long narafala god bakegen.” Hem i gohed se: “Olgeta we oli stap lavem mi mo oli stap obei long ol loa blong mi, mi mi stap lavem olgeta, wetem ol pikinini blong olgeta mo olgeta we bambae oli stap kamaot biaen long olgeta, gogo kasem plante plante taosen yia.” Long tufala ston ya, Jeova i putum ol tok we i stret blong evri man i folem, nomata se oli laef wetaem mo weples. Sam long ol tok ya hemia: “Yufala i mas ona long papa mo mama blong yufala,” mo “Bambae yufala i no mas stil.” Mo tu, i gat loa ya we i soemaot se Jeova i kasem save long tingting blong man, se: “Bambae yufala i no mas letem tingting blong yufala i stap long ol samting blong narafala man blong tekem i blong yufala.”—Eks. 20:5, 6, 12, 15, 17.
Man Blong Sevem Yumi We i Tabu Mo i Gat Olgeta Paoa
17. ?From wanem i stret blong ol man Isrel oli yusum nem blong God long fasin we i soem bigfala ona?
17 “Yumi ol man blong hem, mo hem i mekem yumi fri. Hem i mekem wan promes wetem yumi we bambae i no save finis. !Nem blong hem i tabu, mo hem i gat olgeta paoa!” (Sam 111:9) Bakegen, maet man blong raetem Sam ya i stap tingbaot fasin blong Jeova blong holemstrong long promes we hem i mekem wetem Ebraham. From samting ya, Jeova i no lego ol man blong hem, we fastaem oli wok slef long Ijip mo biaen oli go kalabus long Babilon. Long tufala taem ya, God i sevem ol man blong hem. From tufala wok ya nomo we God i mekem, i stret blong ol man Isrel oli yusum nem blong God long fasin we i soem bigfala ona, be oli no mekem olsem.—Ridim Eksodas 20:7; Rom 2:23, 24.
18. ?From wanem yu yu ting se i wan bigfala ona blong karem nem blong God?
18 Sem mak long ol trufala Kristin tede, we God i sevem olgeta long wan laef we i blong nating nomo, mo i mekem se oli no moa slef long sin mo ded. Yumi mas mekem bes blong yumi blong mekem laef blong yumi i laenap wetem faswan tok long prea we Jisas i givim olsem eksampol, se: “Nem blong yu i tabu.” (Mat. 6:9) Taem yumi tingting dip long nambawan nem ya, samting ya i mas givhan long yumi blong fraet long God. Man we i raetem Sam 111 i gat stret tingting long saed blong fasin ya blong fraet long God, i talem se: “Man we i wantem kam waes, nambawan samting blong hem i mekem, hem i mas [“fraet gud long God,” NW]. Hae God i stap givim gudfala tingting long olgeta we oli stap obei long ol tok blong hem, blong oli save skelemgud evri samting long laef blong man.”—Sam 111:10.
19. ?Bambae yumi tokbaot wanem long nekis stadi?
19 Sipos yumi fraet gud long God, hemia bambae i givhan long yumi blong no laekem nating ol rabis fasin. Mo fasin ya bambae i halpem yumi tu blong folem ol nambawan fasin blong God we Sam 112 i tokbaot. Bambae yumi tokbaot Sam ya long nekis stadi. Sam 112 i soemaot olsem wanem yumi save kam naf blong stap wetem ol milian man we bambae oli haremgud blong presem God gogo i no save finis. I stret nomo we yumi leftemap Hem olsem. “!Oltaem bambae yumi presem hem, gogo i no save finis!”—Sam 111:10.
Ol Kwestin Blong Tingting Dip
• ?From wanem i stret nomo we yumi joengud blong presem Jeova?
• ?Wanem ol fasin blong Jeova we ol wok blong hem oli soemaot?
• ?Wanem tingting blong yu long bigfala ona we yumi gat blong karem nem blong God?
[Kwestin]
[Tok blong pija long pej 20]
Bigfala risen from wanem yumi joen wanples oltaem i blong presem Jeova
[Tok blong pija long pej 23]
Olgeta loa blong Jeova oli stanap long ol tok we yumi save trastem mo we bambae oli stap olwe