Zeova i merite ganny loue par nou dan linite
Zeova i merite ganny loue par nou dan linite
“Loue Ya, zot lepep!”—PS. 111:1.
1, 2. Ki “Alelouya” i vedir e ki mannyer i ganny servi dan Lekritir Grek Kretyen?
“ALELOUYA!” Dan bann legliz Kretyen, sa mo i souvan ganny tande. Serten dimoun i servi sa lekspresyon en kantite dan zot konversasyon toulezour. Parkont, pa bokou dimoun ki konn son sinifikasyon sakre e fason viv bokou ki servi sa lekspresyon, i dezonor Bondye. (Tit 1:16) En diksyonner lo Labib i eksplike ki “diferan ekriven psonm in servi sa mo “Alelouya” pour envit tou dimoun pour zwenn ansanm avek zot pour loue Zeova.” Anfet, plizyer spesyalis Labib i fer resorti ki “Alelouya” i vedir “‘Loue Ya,’ [setadir] Zeova.”
2 I rezonnab alor ki dan New World Translation sa lekspresyon ki dan Psonm 111:1 in ganny tradwir konman: “Loue Ya, zot lepep!” An Grek, sa lekspresyon i aparet kat fwa dan Revelasyon 19:1-6 pour selebre lafen fo larelizyon. Kan sa i arive, bann vre adorater pou annan tou rezon pour servi sa lekspresyon “Alelouya” dan en fason respektab.
Son bann gran travay
3. Ki rezon prensipal nou annan pour rasanble ansanm regilyerman?
3 Konpoziter Psonm 111 i donn plizyer rezon akoz Zeova i merite ganny loue par nou tou dan linite. Verse 1 i dir: “Mon pou loue Zeova avek tou mon leker parmi bann zonm drwat ki mon pros avek e dan zot lasanble.” Temwen Zeova ozordi i santi parey. Rezon prensipal ki nou annan pour rasanble ansanm regilyerman dan bann kongregasyon lokal e dan bann gran lasanble, i pour loue Zeova.
4. Ki mannyer imen i kapab egzamin travay Zeova?
4 “Bann travay Zeova i gran, bann ki pran plezir ladan i egzamin zot.” (Ps. 111:2) Remark sa lekspresyon “egzamin zot.” Dapre en referans, sa verse i kapab aplik avek bann dimoun ki “fer bokou resers, medite e etidye o profon” lo bann travay Bondye. Bann kreasyon Zeova i bokou e lafason ki zot in ganny kree i vreman merveye. I’n plas soley, later ek lalin dan en bon pozisyon e zot tou zot travay an armoni avek kanmarad pour ki later i ganny lasaler ek lalimyer, lizour konman aswar e bann sezon ek mare.
5. Ki bann dernyen dekouvert lo liniver i revele?
5 Bann syantis in dekouver en kantite keksoz lo pozisyon later dan nou sistenm soler, ensi ki sa fason parfe ki lalin i fer letour later, son groser ek son pwa. Sa pozisyon ki sakenn i annan e lafason ki zot travay ansanm, i fer li posib pour nou ganny bann zoli sanzman regilye dan bann sezon. Deplis i annan en kantite keksoz nou aprann avek lafason ki bann lafors natirel dan liniver in ganny progranmen. Dan en lartik ki annan pour tit “The Designed ‘Just So’ Universe,” en profeser liniversite ti fer sa remark: “I ase fasil pour konpran akoz bokou syantis in sanz zot lide pandan sa dernyen 30 an e tonm dakor ki i demann bokou lafwa pour krwar ki liniver ti vin an egzistans par azar. Pli nou konpran lafason ki later in ganny byen kree, pli nou pou vwar levidans en kreater entelizan.”
6. Ki mannyer ou santi anver lafason ki Bondye in kree imen?
6 Lafason ki Bondye in kree nou i en lot gran travay kreasyon. (Ps. 139:14) Ler i ti pe kree imen, i ti donn zot en lespri, en lekor avek tou son bann lorgann neseser ek sa abilite ek kapasite pour fer serten keksoz. Par egzanp, nou annan sa abilite ekstraordiner ki Bondye in donn nou pour koze e ekoute ensi ki ekrir e lir. Bokou dimoun i annan sa bann abilite. En lot keksoz remarkab dan lafason nou lekor in ganny fer i nou abilite pour debout drwat. Vreman, bokou dimoun i admir lafason nou lekor in ganny fer, son balans ek lafason ki i fonksyonnen. An plis ki sa, konneksyon nou bann nerf ki fer nou lespri ek nou bann sans fonksyonnen i vreman ekstraordiner e i pli siperyer ki okenn keksoz ki bann syantis in kapab reisi fer. Anfet, sa ki imen in reisi fer i gras a zot lespri ek sans ki zot in gannyen. Menm bann enzenyer pli kalifye e konpetan, pa ti pou zanmen kapab fer okenn zouti sitan zoli e efikas ki nou dis ledwa. Demann ou lekor, ‘Eski bann travay enpresyonan dan lar ek konstriksyon in ganny fer san abilite sa bann ledwa ki Bondye in donn nou?’
Bann gran travay Bondye ek son bann kalite
7. Akoz nou devret vwar Labib konman en gran travay Bondye?
7 Bann gran travay Zeova i enplik lezot keksoz merveye ki i’n fer pour bann imen, zis parey i ganny dekrir dan Labib. Bann diferan liv dan Labib i an armoni avek kanmarad. Konpare avek lezot liv, i vreman “enspire par Bondye e i itil pour ansennyen.” (2 Tim. 3:16) Par egzanp, premye liv Labib, Zenez i eksplike ki mannyer Bondye ti netway later avek tou bann move keksoz ki ti pe arive dan letan Noe. Egzod, dezyenm liv, i montre ki mannyer Zeova ti demontre ki zis li tousel ki vre Bondye par delivre Izrael anba lesklavaz Lezip. I tre probab ki sa psalmis ti annan sa bann levennman antet kan i ti ganny pouse pour dir: “Bann aksyon [Zeova] i ranpli avek dinyite ek splander, e son ladrwatir i reste pour touzour. I’n fer son bann travay merveye konman en keksoz pour nou rapel. Zeova i annan konpasyon ek mizerikord.” (Ps. 111:3, 4) Eski pa ou pou dakor ki bann aksyon Zeova tou dilon listwar enkli bann keksoz ki i’n fer tou dilon ou lavi i fer ou rapel son “dinyite ek splander”?
8, 9. (a) Dan ki fason travay Bondye i diferan avek plizyer travay imen? (b) Ki serten kalite Bondye ki ou apresye?
8 Remarke osi ki sa psalmis i met lanfaz lo bann kalite remarkab Zeova, parey son ladrwatir, konpasyon ek mizerikord. Ou konnen ki i rar pour bann imen enparfe azir avek ladrwatir. Souvan zot voras, groker e orgeye. Sa i evidan atraver bann zarm vyolan ki imen i fabrike pour bann lager ki zot fer e ki benefisye zot menm finansyerman. Sa i anmenn en kantite lamizer e senm lafreyer parmi plizyer milye viktim inosan. Deplis, bokou travay ki imen in fer in ganny akonplir par abiz lo bann ki pov. En legzanp ki bokou dimoun i kapab site i itilizasyon lesklav pour konstrir bann piramid. Sa bann piramid ti prensipalman ganny servi konman latonm pour bann Faraon byen fyer. Deplis, bokou parmi bann travay ki imen i fer i pa zis anmenn labi me i osi “detri[r] later.”—Lir Revelasyon 11:18.
9 Pa sa i diferan avek travay Zeova ki touzour baze lo sa ki byen! Son travay i osi enplik sa provizyon ranpli avek mizerikord ki i’n fer pour bann imen enparfe ganny delivre. Bondye ti fer laranzman pour sa ranson pour montre son ladrwatir. (Rom. 3:25, 26) Vreman alor, “son ladrwatir i reste pour touzour!” Tandis ki son konpasyon, sa in ganny demontre atraver pasyans ki Bondye in annan dan lafason ki i tret bann imen enparfe. Parler, i ti menm dir “silvouple” pour sipliy zot pour rezet zot bann move aksyon e fer sa ki byen.—Lir Ezekyel 18:25. *
Fidel avek son promes
10. Ki legzanp fidelite Zeova in kite an rapor avek son lalyans ki i ti fer avek Abraam?
10 “I’n donn manze bann ki annan lakrent pour li. I pou rapel son lalyans pour en letan endefini.” (Ps. 111:5) I paret ki la sa psalmis ti pe refer avek sa lalyans ki ti ganny fer avek Abraam. Zeova ti promet ki i ti pou beni desandans Abraam e dir ki zot ti pou pran lavil zot bann lennmi. (Zen. 22:17, 18; Ps. 105:8, 9) Dan premye lakonplisman sa bann promes, desandans Abraam ti vin nasyon Izrael. Sa nasyon ti dan lesklavaz Lezip pour en bon pe letan, apre sa “Bondye ti rapel son lalyans avek Abraam” e i ti delivre zot. (Egz. 2:24) Lafason Zeova ti tret zot i montre ki degre zenere i ete. I ti fourni manze pour zot lekor e nouritir spirityel pour zot lespri ek leker. (Det. 6:1-3; 8:4; Nee. 9:21) Dan bann syek ki ti vini apre, sa nasyon ti souvan dezobeir Bondye, menm si i ti anvoy son bann profet pour ankouraz zot pour retournen. Plis ki 1,500-z-an apre ki i ti’n delivre bann Izraelit Lezip, Bondye ti anvoy son sel Garson byenneme lo later. Lamazorite Zwif ti rezet Zezi e les li ganny touye. Apre sa, Bondye ti form en nouvo nasyon, enn ki spirityel e sa i “Izrael Bondye.” Ansanm avek Kris, sa nasyon i form sa desandans spirityel Abraam ki Zeova ti predir i ti pou servi pour beni bann imen.—Gal. 3:16, 29; 6:16, NW.
11. Ki mannyer Zeova i kontinyen “rapel son lalyans” avek Abraam?
11 Zeova i kontinyen “rapel son lalyans” ek benediksyon ki i ti promet atraver sa lalyans. Denozour i pe fourni nouritir spirityel annabondans dan plis ki 400 langaz. Deplis, i pe kontinyen reponn bann lapriyer an rapor avek nou bann bezwen fizik e sa i anliny avek sa parol: “Donn nou sak zour nou dipen neseser.”—Lik 11:3; Ps. 72:16, 17; Iza. 25:6-8.
Pwisans ekstraordiner Zeova
12. Dan ki fason ansyen Izrael ti ganny “leritaz bann nasyon”?
12 “I’n montre son pep son pwisans dan son bann travay, par donn zot leritaz bann nasyon.” (Ps. 111:6) En levennman remarkab dan listwar Izrael ki sa psalmis ti’n kapab annan antet, ti zot delivrans mirakile Lezip. Kan Zeova ti finalman permet bann Izraelit antre dan Later Promiz, zot ti kapab ranport laviktwar lo bann Rwayonm dan les e dan was Larivyer Zourden. (Lir Neemya 9:22-25.) Wi, Zeova ti donn Izrael “leritaz bann nasyon.” Pa sa i demontre pwisans Bondye!
13, 14. (a) An rapor avek Babilonn, ki aksyon pwisan Bondye sa psalmis ti’n kapab annan antet? (b) Ki lezot gran aksyon delivrans Zeova in akonplir?
13 Parkont, nou konsyan ki malgre tou sa ki Zeova ti fer pour zot, Izrael pa ti demontre okenn respe pour li, ni pour zot bann zanset Abraam, Izaak ek Zakob. Zot ti kontinyen rebele ziska ki Zeova ti servi Babilonn pour retir zot dan zot pei e anmenn zot an egzil. (2 Kron. 36:15-17; Nee. 9:28-30) Si, parey serten spesyalis Labib i dir, konpoziter Psonm 111 ti viv apre ki bann Izraelit ti retournen sorti an egzil Babilonn, i ti sirman annan plis rezon pour li loue Zeova pour Son fidelite ek pwisans. Zeova ti demontre sa de kalite par delivre bann Zwif laba Babilonn, ki ti en lanpir ki pa ti abitye larg zot prizonnyen.—Iza. 14:4, 17.
14 Apepre senk syek pli tar, Zeova ti servi son pwisans dan en pli gran fason par delivre bann imen ki repantir dan lesklavaz pese ek lanmor. (Rom. 5:12) Sa ti donn loportinite 144,000 imen pour ganny swazir par lespri sen e vin bann disip Kris. Lannen 1919, Zeova ti servi son pwisans pour delivre en pti group Kretyen swazir ki ankor lo later anba lesklavaz fo larelizyon. Sa ki zot in akonplir pandan sa letan lafen in posib zis atraver pwisans Bondye. Apre ki zot prouv zot fidelite ziska lanmor, zot pou diriz later ansanm avek Zezi Kri dan lesyel pour ki bann imen ki repantir i kapab benefisye. (Rev. 2:26, 27; 5:9, 10) Zot pou erit later dan en pli gran lanpler ki ansyen Izrael.—Mat. 5:5.
Prensip eternel e diny konfyans
15, 16. (a) Kwa ki enplike parmi bann travay Zeova? (b) Ki lord Bondye ti donn ansyen Izrael?
15 “Travay son lanmen i vre e zis; tou bann lord ki i donnen i diny konfyans, i byen solid pour touzour, pour en letan endefini, zot vin vre e drwat.” (Ps. 111:7, 8) Parmi ‘travay lanmen Zeova’ ti annan sa de plak ros ki ti annan sa dis lalwa enportan ki ti’n ganny grave lo la pour Izrael. (Egz. 31:18) Sa bann lalwa, ansanm avek lezot regilasyon ki ti form parti lalyans Lalwa Moiz, i baze lo bann prensip eternel e diny konfyans.
16 Par egzanp, enn sa lord ouswa lalwa lo sa bann plak ti dir: “Mwan Zeova ou Bondye mon en Bondye ki demann en devosyon zis pour mwan tousel.” Deplis i dir ki Zeova i demontre “labonte leker anver milyenm zenerasyon pour bann ki kontan [li] e obeir [son] bann komannman.” Lo sa de plak ros ti osi annan bann prensip ki aplikab dan tou sityasyon ek lepok, parey “respekte ou papa ek ou manman” e “ou pa devret vole,” ensi ki sa lalwa byen profon ki defann groker keksoz lezot.—Egz. 20:5, 6, 12, 15, 17.
Nou Sover sen e efreyan
17. Ki rezon bann Izraelit ti annan pour tret non Bondye konman sen?
17 “I’n delivre son pep. I’n etablir son lalyans pour en letan endefini. Son non i sen e efreyan.” (Ps. 111:9) Ankor enn fwa, i kapab ki sa psalmis ti annan antet fidelite ki Zeova i annan anver lalyans ki i ti fer avek Abraam. Par egzanp, Zeova pa ti abandonn son pep ler zot ti lesklav Lezip e apre sa ler zot ti prizonnyen Babilonn. Dan tou le de ka, Bondye ti delivre son pep. Menm si i ti zis pour sa de lakonplisman, Izrael ti’n devret tret non Bondye konman sen.—Lir Egzod 20:7 *; Romen 2:23, 24.
18. Akoz ou santi ki port non Bondye i en privilez?
18 Pareyman i leka pour bann Kretyen ozordi ki’n ganny delivre dan lesklavaz pese ek lanmor san okenn lespwar. Nou devret fer tou nou posib pour viv an armoni avek premye demann dan sa model lapriyer: “Ki ou non sen i ganny glorifye.” (Mat. 6:9) Medit lo sa non merveye i devret fer nou devlop lakrent pour Bondye. Ekriven Psonm 111 ti konpran ki si sa lakrent pour Bondye, i ti dir: “Lakrent pour Zeova i konmansman lasazes. Tou bann ki met zot an pratik [obeir son bann komannman] pou annan en bon zizman.”—Ps. 111:10.
19. Ki nou pou egzaminen dan prosen lartik?
19 En lakrent apropriye pour Bondye pou ed nou ay sa ki move. I pou osi ed nou pour imit bann zoli kalite Bondye parey Psonm 112 pou montre, ki nou pou egzaminen dan lot lartik. Sa psonm i montre ki mannyer nou kapab kalifye pour vin parmi sa plizyer milyon dimoun ki pou kontan pour loue Bondye pour touzour. I merite ganny nou louanz. “Son louanz pou reste pour touzour.”—Ps. 111:10.
[Not anba lo paz]
^ par. 9 Ezekyel 18:25: “E zot pou kontinyen dir: ‘Bann aksyon Zeova i enzis.’ Ekoute, silvouple, O pep Izrael. Eski pa mon prop semen i zis? Eski pa zot semen i enzis?”
^ par. 17 Egzod 20:7: “Zot pa devret pran non Zeova zot Bondye konman nanryen ditou, parski Zeova pou pini sa enn ki pran son non konman nanryen ditou.”
Kestyon pour medite
• Akoz nou tou nou merit loue Zeova dan linite?
• Ki kalite Zeova ki ganny revele dan son bann travay?
• Ki mannyer ou vwar sa privilez pour port non Bondye?
[Kestyon]
[Portre lo paz 20]
Rezon prensipal ki nou annan pour rasanble ansanm regilyerman i pour loue Zeova
[Portre lo paz 23]
Tou lalwa Zeova i baze lo bann prensip eternel e diny konfyans