Jihova O Te Ọnọ Ma Re Jiri
Jihova O Te Ọnọ Ma Re Jiri
“Jiri ỌNOWO.”—OL. 111:1.
1, 2. Didi oware enọ i kere ilezi na a zizie ahwo inọ a ru, kọ ubiẹme vẹ a rọ ta ẹme nana evaọ Ikereakere Griki Ileleikristi na?
“HALILUYA!” Onana yọ ẹme nọ a rẹ jọ ichọche Kristẹndọm yo ẹsikpobi. Ahwo jọ a rẹ rehọ iẹe ta ẹme kẹdẹ kẹdẹ. Umutho ahwo jọ ọvo a riẹ uzedhe otofa ẹme na, yọ ahwo buobu nọ e be tae a bi ru eware nọ e be dha Ọghẹnẹ eva. (Tait. 1:16) Wọhọ epanọ ofeme Ebaibol jọ o ta, “Aliluya” yọ “ẹme nọ enọ i kere ilezi na a re ro zizie ahwo kpobi re a kuomagbe ai jiri Jihova.” Evaọ uzẹme, egba-eriariẹ Ebaibol buobu a ta inọ otofa “Aliluya” họ “Wha jiri Jihova.”
2 Onana o soriẹ ze nọ Ebaibol Ẹri na o rọ fa ẹme nọ ọ rrọ Olezi 111:1 na “Jiri ỌNOWO.” Ubiẹme Griki nọ a rọ fa ẹme nana o roma via isiane eva Eviavia 19:1-6 evaọ okenọ ikọ-odhiwu a jẹ ghọghọ fiki ọraha egagọ erue. Nọ oyena o te gine rugba no, uvi eg’Ọghẹnẹ a te rehọ “Aliluya” suole avọ adhẹẹ.
Iruo Igbunu Riẹ
3. Eme họ ugogo ẹjiroro nọ ma bi ro kokohọ ẹsikpobi?
3 Ọnọ o kere Olezi avọ 111 ọ fodẹ ẹjiroro buobu nọ Jihova o ro fo ọnọ ma re jiri. Owọ ọsosuọ o ta nọ: “Mẹ rẹ rehọ eva mẹ kpobi yere ỌNOWO, evaọ udevie ogbotu, enọ ikiẹrẹe.” Epọvo na Isẹri Jihova nẹnẹ a gwọlọ ru. Ugogo ẹjiroro nọ ma bi ro kokohọ ẹsikpobi evaọ obọ iwuhrẹ gbe ikokohọ họ re ma jiri Jihova.
4. Ẹvẹ ahwo-akpọ a sai ro vuhu iruo Jihova mu?
4 “Iruo ỌNOWO e rẹ ruaro, rọ kẹ enọ i vuhu rai mu.” (Ol. 111:2) Muẹrohọ eme na “enọ i vuhu rai mu.” Wọhọ epanọ obe jọ o ta, owọ Ebaibol nana o rẹ sai kie kpahe ahwo nọ i bi “roro ẹsikpobi je bi wuhrẹ” kpahe iruo Ọghẹnẹ. U wo ẹjiroro nọ Jihova ọ rọ ma oware kpobi. Ọ ma ọre na, otọakpọ, gbe ọvẹre fihọ ọvuọ oria riẹ re ma sai wo ẹroro, elo, aso gb’uvo, ezi sa-sa, gbe ame abade nọ ọ rẹ wọze je zihe.
5. Eme eware nọ ahwo-akpọ a wuhrẹ kpahe ehrugbakpọ na no u dhesẹ via?
5 Ekiotọ-eriariẹ a kiẹ eware buobu via no kpahe uzedhe oria nọ otọakpọ na o rrọ evaọ idedeghe na yọ a te je vuhumu no nnọ ọvẹre na ọ rro hrọ họ yọ o thabọ hrọ họ. Oria nọ Ọghẹnẹ ọ ma eware nana fihọ gbe oghẹrẹ nọ i bi ru iruo kugbe ohwohwo u bi ru ei lọhọ nọ ma bi ro wo ezi sa-sa. Ofariẹ, a wuhrẹ eware buobu no kpahe epanọ Ọghẹnẹ ọ nabe ruẹrẹ eware nọ ọ ma họ re e siọ enwoma ba ẹwha se ahwo-akpọ. Fikiere evaọ obe jọ nọ uzoẹme riẹ o rrọ “A Ruẹrẹ Ehrugbakpọ na Họ ‘Kpatiẹ,’” ohwo jọ nọ o kpohọ isukulu gaga o muẹrohọ nọ: “O rrọ vevẹ oware nọ egba-eriariẹ buobu a ro nwene iroro rai no evaọ ikpe 30 nọ i kpemu na, okenọ a je roro vẹre nnọ ehrugbakpọ na u mu nyaze. Epanọ ma wuhrẹ kpahe oghẹrẹ nọ a nabe ruẹrẹ otọakpọ mai na họ te, ere u re mu omai ẹro te inọ ọwena nọ o wo areghẹ gaga ọ ma riẹ.”
6. Ẹvẹ who rri oghẹrẹ nọ Ọghẹnẹ ọ ma ohwo-akpọ?
6 Iruo igbunu efa ọrọ emama họ oghẹrẹ nọ Ọghẹnẹ ọ ma omai. (Ol. 139:14) Okenọ ọ ma ohwo-akpọ, ọ ma ugboma na jẹ ma ekwakwa sa-sa fihọ oma riẹ nọ i re fi obọ họ kẹe ru eware, ọ tẹ jẹ kẹe iroro. Wọhọ oriruo, Ọghẹnẹ ọ ma ohwo-akpọ re ọ sae ta ẹme jẹ gaviezọ, ọ tẹ jẹ mae re ọ sai kere je se obe. A ma eware nana kpobi fihọ ahwo buobu oma. Yọ Ọghẹnẹ ọ ma owhẹ evaọ oghẹrẹ nọ whọ sai ro dikihẹ kpọvi. Yọ oghẹrẹ nọ oma na u bi ru iruo o vọ avọ igbunu. Yọ oghẹrẹ nọ iriẹ-oma e nya oma na wariẹ je bi ru iruo i woma gaga vi eware kpobi nọ egba-eriariẹ a ru no. Evaọ uzẹme, oware kpobi nọ ohwo-akpọ o ru, iroro gbe areghẹ nọ a kẹ riẹ ọ be sai ro ru ei. Makọ ọwena nọ ọ mae riobe jẹ mae riẹ oware eku ọ rẹ sai ru oware nọ u woma je wo iruo te iziabọ gbe iziawọ mai na ha. Nọ oma ra inọ, ‘Kọ ohwo ọ hẹ sai ku oware jọ o gbẹ rrọ iziabọ nọ Ọghẹnẹ ọ kẹ riẹ hẹ?’
Iruo Ilogbo Ọghẹnẹ gbe Ekwakwa-Aghae Riẹ
7. Fikieme ma je rri Ebaibol na wọhọ ovo jọ evaọ usu iruo ilogbo Ọghẹnẹ?
7 Eware ilogbo nọ Jihova ọ ma i kugbe eware ezi nọ o ru kẹ ahwo-akpọ, enọ Ebaibol na e t’ẹme kpahe. Ebaibol na yọ obe nọ a rẹ ruẹ obọ riẹ hẹ, onọ ebe riẹ e rọwokugbe ohwohwo. Wo ohẹriẹ no ebe efa kpobi, Ebaibol na yọ obe nọ “Ọghẹnẹ o gie ẹwolo ku” onọ o rrọ “erere rọ kẹ ewuhrẹ.” (2 Tim. 3:16) Wọhọ oriruo, obe Emuhọ o dhesẹ epanọ Ọghẹnẹ o ro si emuemu no otọakpọ na evaọ edẹ Noa. Obe Ọnyano o ta kpahe epanọ Jihova o ro dhesẹ inọ ọye họ Ọghẹnẹ okenọ o siwi emọ Izrẹl no igbo Ijipti. O wọhọ nnọ eware yena ọso-ilezi na o wo họ iroro nọ ọ ta nọ: “Iruo [Jihova] e vọ avọ oruaro gbe adhẹẹ, gbe ẹrẹreokie riẹ ọ rẹ jọ bẹdẹ bẹdẹ. ỌNOWO họ ọ rọ aruoriwo gbe ohrọ.” (Ol. 111:3, 4) Kọ whọ gbẹ rọwo inọ eware nọ Jihova o ru evaọ okenọ u kpemu, gbe enọ o ru no evaọ edẹ uzuazọ ra, i dhesẹ inọ ọ ginẹ vọ avọ “oruaro gbe adhẹẹ”?
8, 9. (a) Ohẹriẹ vẹ o rrọ udevie iruo Ọghẹnẹ avọ erọ ahwo-akpọ? (b) Eme o si owhẹ urru kpahe oghẹrẹ nọ Ọghẹnẹ ọ rrọ?
8 Muẹrohọ inọ ọso-ilezi na ọ ta nọ Jihova yọ Ọghẹnẹ ẹrẹreokie, aruoriwo, gbe ohrọ. Whọ riẹ inọ o rrọ bẹbẹ re ahwo-akpọ sebaẹgba a ru oware nọ u kiẹrẹe. Ẹsibuobu a re dhesẹ uvo-uthei, ihri-eriọ, gbe omoya. Ma rẹ sae ruẹ onana evaọ ekwakwa-ẹmo iyoma nọ ahwo-akpọ a ku no re a ro fi ẹmo gbe re a ruẹsi wo igho. Enana e wha uye gbe iguegue se ima ahwo buobu no. Ofariẹ, ahwo buobu a gboja kẹ iyogbere no re a sai wo oware nọ a gwọlọ t’obọ. Oriruo jọ nọ ahwo buobu a rẹ sae fodẹ họ erigbo nọ ahwo Ijipti a jẹ rọ bọ iwou ikpekpehru rai. Ẹjiroro nọ a jẹ rọ bọ iwou yena kpobi họ re a kie ivie omoya rai nọ a je se Fẹro fihọ. Ofariẹ, eware buobu nọ ahwo-akpọ a bi ru nẹnẹ orọnikọ a be rehọ ae kienyẹ amọfa ọvo ho rekọ e be jẹ “raha akpọ na.”—Se Eviavia 11:18.
9 Enana i wo ohẹriẹ gaga no iruo Jihova, enọ e rẹ wha erere ze ẹsikpobi. Usu iruo riẹ họ ọruẹrẹfihotọ nọ o ti ro siwi ahwo-akpọ uzioraha. Ọghẹnẹ ọ rehọ ẹkwoma ẹtanigbo na dhesẹ “ẹrẹreokie” riẹ.” (Rom 3:25, 26) Evaọ uzẹme, “ẹrẹreokie riẹ ọ rẹ jọ bẹdẹ bẹdẹ”! Yọ Ọghẹnẹ o dhesẹ aruoriwo riẹ no evaọ edhere ithihakọ nọ o bi ro yeri kugbe ahwo-akpọ sebaẹgba. Eva ẹsejọ, ọ rẹ tubẹ r’unu kpotọ ta ẹme kẹ ae re a siobọno emuemu rai re a ru oware nọ u woma.—Se Izikiẹl 18:25.
O re Ru Eyaa Riẹ Gba
10. Didi oriruo Jihova o fihọ otọ kpahe ekoko eyaa evaọ ọvọ nọ ọ re kugbe Abraham?
10 “Ọ ruẹrẹ emu kpahe kẹ enọ e rọ ozọ riẹ ẹdhẹ; kẹse kẹse ọ be kareghẹhọ ọvọ riẹ.” (Ol. 111:5) O wọhọ nọ ọvọ Abraham na ọso-ilezi na ọ be ta kpahe na. Jihova ọ ya eyaa inọ ọ te ghale ubi Abraham, ọ tẹ jẹ ta nnọ a ti wo unuighẹ ewegrẹ rai. (Emu. 22:17, 18; Ol. 105:8, 9) Evaọ orugba ọsosuọ ọrọ eyaa yena, ubi Abraham o zihe ruọ orẹwho Izrẹl. Orẹwho yena o jọ igbo ikpe buobu evaọ Ijipti, rekọ “Ọghẹnẹ ọ tẹ kareghẹhọ ọvọ riẹ nọ avọ Abraham” a re, o te siwi ai. (Ọny. 2:24) Oghẹrẹ nọ Jihova o ro yeri kugbe ai uwhremu na u dhesẹ epanọ o woma te. Ọ kẹ rai emuore gbe evuẹ nọ i re fi obọ họ kẹ ae koko izi riẹ. (Izie. 6:1-3; 8:4; Neh. 9:21) Ikpe buobu e vrẹ no, ẹsibuobu orẹwho na o kiemuku Ọghẹnẹ, dede nọ o vi eruẹaro bru rai re a ruẹsi zihe ze. Nọ Ọghẹnẹ o siwi emọ Izrẹl no igbo Ijipti no, o te vi ọmọ ọvo riẹ ziọ otọakpọ nọ ikpe odu ọvo gbe egba isoi (1,500) e vrẹ no. Ahwo Ju buobu a siọ Jesu a te si uwhu kpei. Jihova ọ tẹ rehọ orẹwho ọkpokpọ mu, orọ abọ-ẹzi, ‘Izrẹl Ọghẹnẹ.’ Orẹwho yena kugbe Kristi họ ubi abọ-ẹzi ọrọ Abraham, onọ Jihova ọ ruẹaro nnọ ọ te rọ ghale ahwo-akpọ na.—Gal. 3:16, 29; 6:16.
11. Ẹvẹ Jihova ọ gbẹ be rọ “kareghẹhọ ọvọ riẹ” kugbe Abraham?
11 Jihova ọ gbẹ be “kareghẹhọ ọvọ riẹ” gbe eghale nọ i ti noi ze. Nẹnẹ, ọ be rehọ emuore abọ-ẹzi kẹ evaọ evẹrẹ nọ i bu vi egba ene (400). Ofariẹ, ọ gbẹ be kiyo elẹ nọ ma be lẹ kpahe ẹgwọlọ abọ-iwo mai, rọwokugbe ayare nana: “[Rehọ] emu inẹnẹ kẹ omai nẹnẹ.”—Luk 11:3; Ol. 72:16, 17; Aiz. 25:6-8.
Ogaga Ulogbo Jihova
12. Oghẹrẹ vẹ a rọ kẹ emọ Izrẹl “ukuoriọ erẹwho na”?
12 “O dhesẹ ogaga iruo riẹ kẹ ahwo riẹ, epanọ ọ rọ rehọ ukuoriọ erẹwho na kpobi kẹ ae.” (Ol. 111:6) Ẹsejọhọ iruo igbunu jọ nọ emọ Izrẹl a rọ ẹro ruẹ nọ ọso-ilezi na o wo họ iroro na họ edhere igbunu nọ a ro siwi ai no Ijipti. Uwhremu na nọ Jihova ọ kẹ emọ Izrẹl uvẹ re a ruọ Ẹkwotọ Eyaa na, a fi erẹwho buobu kparobọ evaọ t’abọ t’abọ Ethẹ Jọdan na. (Se Nehemaya 9:22-25.) Ẹhẹ, Jihova ọ kẹ Izrẹl “ukuoriọ erẹwho na.” Ọghẹnẹ o gine dhesẹ ogaga riẹ via!
13, 14. (a) Odhesẹvia ogaga Ọghẹnẹ vẹ evaọ obọ Babilọn o rẹ sae jọnọ ọso-ilezi na o wo họ iroro? (b) Iruo igbunu esiwo efa vẹ Jihova o ru no?
13 Ma riẹ inọ ghelọ eware kpobi nọ Jihova o ru kẹ emọ Izrẹl, a kẹ riẹ adhẹẹ hẹ, yọ a lele ọkpọvio esẹ rai hi, Abraham, Aiziki, gbe Jekọp. A ghẹmeeyo bẹsenọ Ọghẹnẹ ọ rọ kẹ Babilọn uvẹ mu ai kpohọ igbo. (2 Irv. 36:15-17; Neh. 9:28-30) Wọhọ epanọ egba-eriariẹ Ebaibol a ta, o tẹ ginẹ rọnọ ọnọ o kere Olezi avọ 111 na ọ jọ akpọ evaọ okenọ emọ Izrẹl a zihe no igbo Babilọn ze no, kiyọ onana yọ ẹjiroro ọfa nọ o re ro jiri Jihova kẹ ekoko eyaa riẹ gbe ogaga riẹ. Ọghẹnẹ o dhesẹ onana via nọ o siwi ahwo Ju no Babilọn, orẹwho nọ ahwo kpobi a riẹ inọ o re siobọno erigbo ho.—Aiz. 14:4, 17.
14 Nọ oware wọhọ ikpe egba isoi (500) e ruọ emu no, Jihova ọ tẹ jẹ rehọ ogaga riẹ ru iruo evaọ edhere nọ o tubẹ jẹ rro viere re o siwi ahwo-akpọ no igbo uzioraha gbe uwhu. (Rom 5:12) Oware jọ nọ u no rie ze họ uvẹ u rovie fihọ kẹ ahwo idu udhuhrẹ gbe ene (144,000) re a jọ ilele Jesu nọ a rọ ẹzi wholo. Evaọ 1914, Jihova ọ rehọ ogaga riẹ siwi okiọkotọ enọ a rọ ẹzi wholo na no igbo egagọ erue. Fiki ogaga Ọghẹnẹ a be sai ro wo obokparọ evaọ iruo nọ a bi ru evaọ edẹ urere nana. Nọ a tẹ gọ t’urere, a ti lele Jesu Kristi su otọakpọ na no obọ odhiwu ze, avọ irere nọ i ti te ahwo evezi. (Evia. 2:26, 27; 5:9, 10) A ti wo otọakpọ na wọhọ ukuoriọ vi epanọ emọ Izrẹl a rehọ e riẹ reuku.—Mat. 5:5.
Ehri-Izi nọ E rẹ jọ Bẹdẹ, nọ A re Fievahọ
15, 16. (a) Usu eware vẹ e rrọ iruo abọ Ọghẹnẹ? (b) Izi vẹ Ọghẹnẹ ọ rọ kẹ emọ Izrẹl?
15 “Iruo abọ riẹ e gbobọ kiẹrẹe; ijaje riẹ kpobi i fo evaifihọ, o fi rai họ re a koko ai ri bẹdẹ, eva orọwọ gbe ẹrẹreokie.” (Ol. 111:7, 8) Usu “iruo abọ” Jihova jọ họ ekpala-itho ivẹ enọ o kere izi ikpe fihọ kẹ emọ Izrẹl. (Ọny. 31:18) Izi nana, avọ ijaje efa enọ i zihe ruọ ọvọ Uzi Mosis na, a rehọ e rai no ehri-izi nọ e rẹ jọ bẹdẹ bẹdẹ ze, enọ a re fievahọ.
16 Wọhọ oriruo, uzi jọ evaọ usu rai o ta nọ: “Mẹ họ ỌNOWO na Ọghẹnẹ ra mẹ Ọghẹnẹ ọre-ihri.” O tẹ jẹ ta nnọ Jihova ọ rẹ ‘re ohrọ enọ i you rie je koko izi riẹ.’ Ehri-izi efa nọ e rẹ hiẹ hẹ nọ e rrọ ekpala-itho na họ, whọ rẹ “rehọ adhẹ kẹ ọsẹ avọ oni ra” gbe nnọ “who tho uji hi,” avọ uzi nọ o vọ avọ areghẹ na, onọ o ta nnọ ma re siuru eware amọfa ha.—Ọny. 20:5, 6, 12, 15, 17.
Osiwi Mai nọ Ọ Rrọ Ọrẹri avọ Idudu
17. Ẹjiroro vẹ emọ Izrẹl a hae rọ rehọ adhẹẹ kẹ odẹ Ọghẹnẹ?
17 “O vi usiwo se ahwo riẹ; ọ tẹ rehọ ọvọ riẹ ro jeuzi ri bẹdẹ. Odẹ riẹ ọrẹri avọ idudu!” (Ol. 111:9) Ẹsejọhọ oware nọ ọso-ilezi na ọ wariẹ jọ etenẹ wo họ iroro họ epanọ Jihova o ro ru ọvọ nọ ọ re kugbe Abraham gba. Rọwo kugbe onana, Jihova o vu ahwo riẹ wa ha evaọ okenọ a jọ igbo obọ Ijipti gbe obọ Babilọn. Evaọ etoke ivẹ yena, Ọghẹnẹ o siwi ahwo riẹ. O tẹ make rọnọ isiava yena ọvo o siwi rai, emọ Izrẹl a hae rehọ adhẹẹ kẹ odẹ Ọghẹnẹ.—Se Ọnyano 20:7; Ahwo Rom 2:23, 24.
18. Fikieme whọ jẹ sae ta nnọ odẹ Ọghẹnẹ nọ a rọ riẹ owhẹ na yọ uvẹ-ọghọ?
18 Ere ọvona o rrọ kẹ uvi Ileleikristi nẹnẹ, enọ a siwi no igbo uzioraha gbe uwhu no. Ma rẹ daoma gaga re ma ru lele ayare ọsosuọ nọ ọ rrọ olẹ oriruo na: “Odẹ ra ojọ ọrẹri.” (Mat. 6:9) Eroro kpahe odẹ ẹri riẹ na o rẹ lẹliẹ omai wo ozodhẹ Ọghẹnẹ. Ọnọ o kere Olezi avọ 111 ọ riẹ oware nọ ozodhẹ Ọghẹnẹ o ginẹ rrọ keme ọ ta nọ: “Ozọodhẹ kẹ ỌNOWO họ emuhọ areghẹ; uvi ovuhumuo kẹ ahwo kpobi nọ a bi ru ei,” koyehọ enọ i bi koko ijaje riẹ.—Ol. 111:10.
19. Eme ma te ta kpahe evaọ uzoẹme nọ o rrọ aro na?
19 Uvi ozodhẹ Ọghẹnẹ u re fi obọ họ kẹ omai mukpahe oware nọ u yoma. U ti je fi obọ họ kẹ omai raro kele Ọghẹnẹ wọhọ epanọ Olezi avọ 112 o dhesẹ, onọ ma te ta kpahe evaọ uzoẹme nọ o rrọ aro na. Olezi yena o dhesẹ inọ ma rẹ sae jọ usu ima ahwo buobu nọ i ti jiri Ọghẹnẹ bẹdẹ bẹdẹ. O gine te kẹ ujiro nana. “Ujiro riẹ o rẹ jọ bẹdẹ bẹdẹ!”—Ol. 111:10.
Enọ nọ A re Roro Kpahe
• Fikieme u je fo re mai kpobi ma jiri Jihova?
• Eme eware nọ Jihova ọ ma i dhesẹ kpahe iẹe?
• Ẹvẹ who rri odẹ Ọghẹnẹ nọ a ro se owhẹ na?
[Enọ Uwuhrẹ]
[Uwoho nọ o rrọ ẹwẹ-obe avọ 20]
Ugogo ẹjiroro nọ ma bi ro kokohọ họ re ma jiri Jihova
[Uwoho nọ o rrọ ẹwẹ-obe avọ 23]
A rehọ izi Jihova kpobi no ehri-izi nọ e rẹ jọ bẹdẹ, nọ a re fievahọ ze