Jehova ataasiussuseqarluta unnersiutigisariaqarparput

“Halleluja.” — TUSSIAAT 111:1.

1, 2. “Halleluja” qanoq isumaqarpa, Kristumiullu Allagaataanni Grækerisuuni qanoq atorneqarpa?

“HALLELUJA!” Oqaaseq taanna kristumiuunerartut oqaluffiini tusarneqarajuppoq. Sumiiffiit ilaanni oqaaseq taanna ulluinnarni oqalunnermi pikkunarsaatitut atorneqartarpoq. Ikittuinnaalli oqaatsip upperisarsiornikkut isumavia nalunngilaat, oqaatsimillu atuisartut ilarpassui Guutimut ataqqinaataanngitsumik inooriaaseqarput. (Titusi 1:16) Biibilimi oqaatsinik qinerlerfissiami nassuiarneqarpoq “halleluja” oqaasiusoq “tussiaasiortut arlallit atortagaat kikkut tamaasa Jehovamik unnersiutiginneqataaqqullugit”. Ilisimatoorpassuit naapertorlugit “halleluja” ima isumaqavippoq: “‘Unnersiutigisiuk Jah’, [tassa] Jehova.”

² Paasinarpoq aamma Biibili-mi Dronningimit Margrethemit atortussanngortitami quppernermi 1425-mi oqaaseq “Halleluja” ‘Jah(ve) unnersiutigiuk’-mik isumaqartutut nassuiarneqarmat. Oqaatsip tamatuma grækerisuua Saqqummersitat 19:1-6-imi upperisarsiornerup eqqunngitsup piuneerunneqarneranut tunngatillugu sisamariarluni atorneqarpoq. Taanna piuneerunneqarpat ilumoortumik pallorfiginnittut oqaatsip “halleluja”-p ataqqinnippaluttumik atornissaanut immikkut ittumik pissutissaqassapput.

Suliai alutornangaartut

3. Ilagiinni ataatsimeersuarnernilu katersuuttarnitsinnut suna pingaarnertut siunertaava?

³ Tussiaat 111-mik allattup uagut ataasiussuseqarluta Jehovamik unnersiutiginnittariaqarnitsinnut pissutissarpassuit allaatigai. Versi 1-imi ima allassimavoq: “[Jehova] qutsavigissavara uummatikkut iluunngarlunga peqqusersuitsut akornanni katersorsimasunilu.” Ullumikkut Jehovap Nalunaajaasui aamma taamatut misigipput. Ilagiinni najukkatsinniittuni ataatsimeersuarnernilu aalajangersimasumik katersuuttarnitsinnut siunertaasoq pingaarneq tassaavoq Jehovamik unnersiutiginninnissaq.

4. Suut misissoqqissaarsinnaavavut?

⁴ “Angeqaat [Jehovap] suliarisai, siunertarisaanullu naleqqulluartuullutik [taakkuninnga nuannaarutiginnittunit tamanit misissoqqissaarneqarlutik, NV].” (Tussiaat 111:2) Qinerlerfissiat ilaat naapertorlugu versi taanna inunnut Guutip suliaanik “ilumoorlutik iterngalu tikillugu misissueqqissaartartunut eqqarsaatiginneqqissaartartunullu” tunngatinneqarsinnaavoq. Jehovap pinngortitarsuani taassuma nuanningaartumik siunertaqarneranut uppernarsaatissarpassuaqarpoq. Seqineq, nunarsuaq qaammallu inississimavai taakkualu imminnut atassuteqarnerat aalajangersimallugu nunarsuaq kiammik qaamanermillu pilersorneqarsinnaaniassammat, aamma unnuaq ullorlu nikittaattarput, ukiup allanngorarneri takussaasarput, aamma ulittarlunilu tinittarpoq.

5. Inuit qilammik nunarsuarmillu paasinninnerulersimanerat sunik takussutissartaqarpa?

⁵ Ilisimatuut nunarsuup seqineqarfimmi inissisimaffia pillugu ilisimasarpassuaqaannanngillat, aammali qaammatip annertussusia, angissusia  ingerlavialu — nunarsuatsinnut tulluuteqqissaartut — pillugit ilisimasarpassuaqarput. Pinngortitat silaannarsuarmiittut taakku inissisimaffiat taakkualu imminnut atassuteqarnerat pissutaallutik ukiup pissusii kusanaqisumik aalajangersimasumillu allanngorartarput. Ullumikkut aamma qilammi nunarsuarmilu pinngortitat nukiisa pingaarutillit oqimaaqatigiilluinnarnerat pillugu ilisimasaqarluartoqarpoq. Allaaserisami “The Designed ‘Just So’ Universe”-mik (Qilak nunarsuarlu ilusilersukkat ‘tulluarsarluakkallu’-mik) qulequtalimmi maskiinat qanoq sananeqartarneranni professori ima allappoq: “Ilisimatoorpassuit ukiuni 30-ni kingullerni isummaminnik sooq allannguisimanersut paasinarpoq. Taakku nassuerutigaat qilaap nunarsuullu pilersimanerat nalaatsornikkut pisimasutut nassuiarneqarsinnaasorisinnaajumallugu upperluarnissaq pisariaqartoq. Nunarsuup najukkatta qanoq aaqqissuulluagaatigineranik paasinninnerujartortilluta silassorissuusumik ilusilersuisoqarsimaneranut uppernarsaatit uppernarnerujartortarput.”

6. Guutip inummik pinngortitsisimanera qanoq isumaqarfigaajuk?

⁶ Jehovap pinngortitsisinnaassusianut takussutissaq alutornartoq suli alla tassaavoq uagut qanoq pinngortinneqarsimanerput. (Tussiaat 139:14) Guutip inuk pinngortikkamiuk qarasalerpaa, pisariaqartunik tamanik atortulimmik timilerlugu suliaqarsinnaassusilerlugulu. Assersuutigalugu eqqarsaatigeriaruk Guutip uagutsinnik oqalussinnaassusiliillunilu tusaasinnaassusiliillunilu atuarsinnaassusiliillunilu allassinnaassusiliisimanera tupinnartuliaasoq. Amerlanersavut taakkuninnga piginnaassuseqarput. Illit timit, makitalluni ingerlasinnaasutut pinngortitaasoq, aamma torrallataavoq. Timivit ilusilersorneqarnera oqimaaqatigiinneralu, sananeqaataa aalasinnaassusialu mianerinningaalissutigaavut. Aammattaaq sianiutit ataqatigiinnerat tupinnartoq qaratsannik misigissutinnillu atorsinnaanngortitsisut ilisimatuut suliarisimasaannit tamanit nallerneqarsimanngilaq. Aap, inuit suliaqarsinnaalersimapput aatsaat Guutimit qarasalerneqarlutillu misigissutilerneqarsimagamik. Ingeniøriluunniit ilinniarluarsimanerpaallunilu pikkorinnerpaaq tigutsisitut qulitut — inussatsitut — ilusilersorluakkatut torrallataatigalutillu atorluarsinnaatigisunik sanasinnaanngilaq. Imminut ima aperigit: ‘Illut eqqumiitsuliallu alutornartut inuit sanaavi inussat Guutip pinngortitai eqaatsumik atornagit piulersinnaasimassagaluarpat?’

Guutip suliai alutornangaartut pissusiilu

7. Sooq Biibili Jehovap suliaasa alutornangaartut ilaattut isigisariaqarparput?

⁷ Soorlu Biibilimi oqaluttuarineqartoq, Jehovap suliaanut alutornangaartunut ilaapput inuiaat iluaqutissaannut iliuuserisimasai nuanningaartut. Aap, Biibili aamma torrallataavoq maluginiarnarlunilu ataqatigiilluartoq. Atuakkatut allatut innani ‘Guutimit isumassarsiarititaavoq iluaqutaallunilu ajoqersuinermut’. (2 Timotheusi 3:16, NV) Mosesimik allakkani siullerni Guutip nunarsuaq Noap nalaani qanoq ajussuseerutsinneraa nassuiarneqarpoq. Mosesimik allakkat aappaanni Jehovap Israelikkut Egyptenimi inussiaanerannit aniguisinnerisigut ersersippaa kinarpiaq Guutiunersoq. Pisimasut tamakku tussiaasiortup eqqarsaatigisimagunarpai ima allakkami: “[Jehovap] pinngortitaa alutornangaarlunilu takoranningaarpoq, iluarsusialu [naapertuilluassusialu, NV] naassaanngitsumik atassaaq. Sulissutigereerpaa tupinnartuliami eqqaamaneqarnissaat, saammaavoq nallittuillunilu [Jehova].” (Tussiaat 111:3, 4) Jehovap oqaluttuarisaanerup ingerlanerani suliarisimasai — illit inuuninni iliuuserisimasai ilanngullugit — taassuma ataqqinangaarsusianik ‘alutornangaassusianillu’ uagutsinnut eqqaasitsissutaapput, ilaa?

8, 9. (a) Guutip suliai inuppassuit suliaannit qanoq allaaneruppat? (b) Guutip pissusiisa ilaannik illit pingaartitannik eqqaasaqarit.

⁸ Maluginiaruk tussiaasiortup aamma erseqqissarai Jehovap pissusii nuannersut, soorlu naapertuilluarnera, saammaasuunera nallittuisuuneralu. Nalunngilarput naapertuilluarneq inuit ajortillit iliuusiinut ilaannikkuinnaq pissutaasartoq. Iliuusii amerlanertigut piumatunermik, sinnganermik makitanermillu pissuteqartarput. Tamanna inuit sorsunnerminni atugassamittut aningaasatigullu iluanaarnissaq siunertaralugu sakkussialiaannit ajorluinnartunit erserpoq. Sorsunnerit taakku pisuussuteqanngitsunut millionilinnut naalliuutaangaarlutillu sioorassutaangaarsimapput. Aammattaaq inuit suliarpassuisa ilaat inunnut naqisimaneqareerlutillu piitsooreersunut ajoqutaasumik suliarineqarsimapput. Assersuutigalugu inuppassuit nalugunanngilaat inussiat pyramideliornermi atorneqartut. Sanaartukkat taakkua pingaartumik faraonut pingaarniartunut ilivertut atorneqartarput. Ullumikkut inunnit  suliarineqartartut ilarpassui nanertuutaaginnanngillat; aamma ‘nunarsuarmik aserueqataapput’. — Atuaruk Saqqummersitat 11:18.

⁹ Jehovap suliarisartagaanut naapertuilluarnermik tunngaveqartuaannartunut tunngatillugu allaalluinnarpoq. Taassuma suliaanut ilaavoq inuiaat ajortillit annaanniarlugit naakkinnilluni aaqqissuussimasaa. Guutip ‘naapertuilluartuunini takutippaa’ (NV) utertitsissummik pilersitsinermigut. (Romamiut 3:25, 26) Aap, ‘naapertuilluassusia naassaanngitsumik atassaaq’! Aamma Guutip saammaasuunera erserpoq inunnik ajortilinnik naammagittarfiginnittarneratigut. Ilaannikkut allaat Israelikkut kiinneraarfigisarpai ilungersorluni kajumissaaraangamigit ajoqutaasumik pissuseqarunnaaqqullugit naapertuilluartumillu iliuleqqullugit. — Atuaruk Ezekieli 18:25.

Jehova aalajaatsuuvoq

10. Jehova Aaperaamut angeruseq eqqarsaatigalugu qanoq ililluni aalajaannikkut maligassiuisimava?

¹⁰ “Mianerinnitsini nerlertarpai angerutsilu naassaanngitsumik eqqaamallugu.” (Tussiaat 111:5) Tussiaasiortup matumani pigunarpaa Aaperaamut angeruseq. Jehova neriorsuisimavoq Aaperaap kinguaassaa pilluaqqujumaarlugu oqarsimallunilu taakkua akeqqamik isaaffii tiguassagaat. (1 Mosesi 22:17, 18; Tussiaat 105:8, 9) Neriorsuutit taakku eqquuteqqaarput Aaperaap kinguaassaa tassaalermat inuiaqatigiit Israelikkut. Israelikkut Egyptenimi sivisuumik inussiaapput, ‘Guutilli Aaperaamut angerutigisani eqqaavaa’ aniguisillugillu. (2 Mosesi 2:24) Jehovap qanoq kamagittartiginera tamatuma kingorna taakkuninnga pinneriaasiani erserpoq. Nerisassaqartippai aammattaarlu isumamikkut uummatimikkullu anersaakkut inuussutissaqarnissaat isumagalugu. (5 Mosesi 6:1-3; 8:4; Nehemia 9:21) Ukiuni hundredelinni tulliuttuni Israelikkut Guutimik tunussisarput, naak taanna imminut uternissamik kajumissaarniarlutik pruffiitinik aallartitsisaraluartoq. Israelikkut Egyptenimit aniguisitaanerannit ukiut 1500-t qaangiutereersut Guutip ernituani nunarsuarmut aallartippaa. Juutilli amerlanersaasa Jiisusi ajattorpaat toqutaatillugulu. Taava Jehova inuiaqatigiinnik nutaanik, ‘Israelimik Guutip pigisaanik’, inuiaqatigiinnik anersaakkut ittunik, pilersitsivoq. Inuiaqatigiit taakku Kristusi peqatigalugu tassaapput Aaperaamit anersaakkut kinguaarineqartut. Aaperaallu kinguaassaa aqqutigalugu Jehovap inuiannik pilluaqqusiumaarnini siulittuutigaa. — Galatiamiut 3:16, 29; 6:16.

11. Jehovap qanoq ililluni ersersippaa Aaperaamut ‘angerutsini eqqaamajuarlugu’?

¹¹ Jehovap ‘angerutsini’ pilluaqqussutillu angeruseq tamanna aqqutigalugu neriorsuutigisimasani ‘eqqaamajuarpai’. Ullumikkut anersaakkut inuussutissanik naammangaartunik oqaatsinut 400-nit amerlanerusunut nutserneqarsimasunik pilersuisarpoq. Aamma qinnutit timitta pisariaqartitaannut tunngasut akiuartarpai, ilaatigut qinnutit imaattut: “Inuussutissatsinnik ullut tamaasa tunisartigut.” — Lukasi 11:3; Tussiaat 72:16, 17; Esaja 25:6-8.

Jehovap pissaanera angingaartoq

12. Itsaq Israelikkut qanoq ilillutik “inuiaat nunaataat” pivaat?

¹² “Suliani angingaartut innuttaminut nalunaajaatigai inuiaat nunaataat taakkununnga tunniukkamigit.” (Tussiaat 111:6) Tussiaasiortup matumani immaqa eqqarsaatigisimassavaa tupinnartuliornikkut Egyptenimit aniguisitaaneq, Israelikkut oqaluttuarisaaneranni pisimasoq imaannaanngitsoq. Jehovallu Israelikkut naggataatigut nunamut neriorsuutigisamut isertimmatik, taakkua naalagaaffinnik kuussuup Jordanip kangiatungaaniittunik kitaatungaaniittunillu tiguaasinnaapput. (Atuaruk Nehemia 9:22-25). Aap, Jehovap Israelikkut ‘inuiaat nunaataannik’ tunivai. Tamanna Guutip pissaaneranut takussutissaavoq asseqanngilluinnartoq!

13, 14. (a) Babylonimut tunngatillugu Guutip pissaaneranut takussutissaq suna tussiaasiortup eqqarsaatigisimasinnaavaa? (b) Suliat nuanningaartut allat suut aniguisitaanermik kinguneqartut Jehovap suliarai?

¹³ Nalunngilarpulli Israelikkut, Jehova taakkua iluaqutissaannut iliuuserpassuaqaraluartoq, taassuminnga siuaasaminnillu Aaperaamik, Iisaamik Jaakumillu ataqqinninngitsut. Pikitsitsiuarput, Guutip Babyloni atorlugu taakkuninnga nunaminnit qimaatitsinissaa tikillugu. (2 Nalunaarsuutit 36:15-17; Nehemia 9:28-30) Tussiaasiortoq Tussiaat 111-mik allattoq ilisimatuut ilaasa isumaqarnerattut Israelikkut Babylonimi aallarussaaqqanerminnit uternerata kingorna inuusimaguni, Jehovap ilumoorfiginninnera pissaaneralu pillugit taassuminnga unnersiutiginninnissamut suli pissutissaqarnerusimassaaq. Guutip pissusini taakku ersersippai juutit Babylonimit — naalagaaffissuarmit tigusanik iperagaatitsineq ajortutut tusaamasaasumit — aniguisinnerisigut. — Esaja 14:4, 17.

 ¹⁴ Ukiut 500-t missiliorlugit tamatuma kingorna Jehovap pissaanini suli tupinnarnerusumik atorpaa. Inuit allamik isumataarumasut ajortimit toqumillu aniguisippai. (Romamiut 5:12) Taamaalillutik aamma inuit 144.000-it anersaamik tanitatut Kristusimut ajoqersuganngornissamut periarfissaqalerput. 1919-imi Jehovap pissaanini tanitat taakku ilaannik kinguleruttunik upperisarsiornermit eqqunngitsumit aniguisitsinermut atorpaa. Taakku naggatissap nalaani naammassisimasaat taamaallaat Guutip pissaaneranik pissuteqarsinnaapput. Toqumut allaat aalajaareerlutik Jiisusi Kristusi qilammit ‘nunamut kunngioqatigissavaat’ (1936) inuit allamik isumataarsimasut iluaqutissaannut. (Saqqummersitat 2:26, 27; 5:9, 10) Taakku itsaq Israelikkut kingornussinerannit annerungaartumik nunarsuaq kingornutissavaat. — Matthæusi 5:5.

Najoqqutassiat atuuttuartut tutsuiginartullu

15, 16. (a) Jehovap suliaanut suut ilaappat? (b) Guuti itsaq Israelikkunnut sunik peqqussuteqarpa?

¹⁵ “Suliai ilumoorsutsimit innarluissutsimillu pisuupput, peqqussutai tamarmik tatiginarlutik, aalajaallutik naassaanngitsumik, peqqussutigineqarlutik ilumoorsutsimi peqqusersuissutsimilu.” (Tussiaat 111:7, 8) Jehovap ‘suliaanut’ ilaapput allaffissiat marluk qulinik pingaarutilinnik Israelikkunnut inatsisitallit. (2 Mosesi 31:18) Inatsisit taakku allaffissianut kigartorneqarsimasut, aalajangersakkallu Mosesip inatsisaanut ilaalersut allat tamarmik, najoqqutassianik atuuttuartunik tutsuiginartunillu tunngaveqarput.

¹⁶ Peqqussutit, imaluunniit inatsisit, allaffissianut taakkununnga allanneqarsimasut ilaat imaappoq: “Uanga, Jehova Guutit, [Guutiuvunga] tunniusimalluinnarfigineqarnissaminik piumasarinnittoq.” (NV) Inatsimmi tamatumani aamma allassimavoq Jehovap ‘imminik asannittut peqqussutiminillu malinnittut ajunngitsuliorfigiumaarai kinguaariissoqatigiinni ataatsimik tuusintilinni’. Allaffissiani aamma allassimapput najoqqutassiat atuuttuartut, soorlu “ataatallu anaanallu ataqqikkit”, “tillissanngilatit” aamma allap pigisaanik pileriginninnginnissamik peqqussut; peqqussut Pinngortitsisup inuup pissusia pillugu paasisimasaqangaarneranik ersersitsisoq. — 2 Mosesi 20:5, 6, 12, 15, 17.

Utertitsiserput illernarlunilu mianernangaartoq

17. Israelikkut Guutip aqqanik illernartutut isiginninnissaminnut sunik pissutissaqarpat?

¹⁷ “Innuttani aniguisissimavai angerutsilu aalajangerlugu ittuinnartussaatillugu. Illernarlunilu annilaarnangaarpoq aqqa.” (Tussiaat 111:9) Matumani tussiaasiortup immaqa Jehovap Aaperaamut neriorsuutiminut angerusiusumut ilumoorfiginninnera eqqarsaatigeqqissimavaa. Neriorsuummut tamatumunnga naapertuuttumik Jehovap innuttani  imminiiginnanngilai, itsaq Egyptenimi inussiaammata aamma kingusinnerusukkut Babylonimi aallarussaaqqammata. Pisimasuni taakkunani marlunni innuttani aniguisippai. Pisimasuni taakkunani marlunni Guutip naammassisai pissutigiinnarlugit, Israelikkut Guutip aqqanik illernartutut isiginninnerminnik ersersitsisimasariaqaraluarput. — Atuaruk 2 Mosesi 20:7; Romamiut 2:23, 24.

18. Sooq illit Guutip aqqanik taaguuteqarneq immikkut pisinnaatitaaffittut isigaajuk?

¹⁸ Ullumikkut kristumiunut tunngatillugu aamma taamaappoq. Ajortimut toqumullu inussiaanermit aniguisitaasimapput; taamatut aniguisitaanissaminnik neriuuteqarsimanngikkaluarput. Qinnummi najoqqutassaasumi qinnutigineqartoq siulleq una naapertorlugu inuuniarluta sapinngisarput tamaat iliuuseqartariaqarpugut: “Aqqit illernartitaali.” (Matthæusi 6:9) Atermik nersortariaqartumik tamatuminnga eqqarsaatiginneqqissaarneq Guutimik mianerinningaalissutigisariaqarparput. Tussiaat 111-mik allattup Guutimik mianerinninnermut eqqortumik isiginnittaaseqarnini ersersippaa ima allakkami: “[Jehovamik] mianerinninneq tassa ilisimassuseqarnermut aallarniutaasoq, taamaaliortoq [inatsisaanik maleruaasoq] kinaluunniit silatoorsuanngorumaarpoq.” — Tussiaat 111:10.

19. Allaaserisaq tulliuttoq sumut tunngassava?

¹⁹ Iluaqutaasumik Guutimik mianerinninneq ajortumik uumiginninnissamut iluaqutigissavarput. Aamma Guutip pissusiinik ajunngitsunik ilaarsinissamut iluaqutigissavarput. Tamanna Tussiaat 112-imi, allaaserisami tulliuttumi sammisassatsinni, ersersinneqarpoq. Tussiaat 112-imi ersersinneqarpoq inunnut millionilinnut, naassaanngitsumik Guutimik unnersiutiginninnermik nuannaarutiginnikkumaartunut, ilaanissamut qanoq ililluta piukkunnarsarsinnaasugut. Soorunami unnersiutigineqartariaqarpoq. “[Jehova] unnersiutigineqassaaq naassaanngitsumik.” — Tussiaat 111:10.

Apeqqutit eqqarsaatigilluagassat

• Sooq Jehova ataasiussuseqarluta unnersiutigisariaqarparput?

• Jehovap pissusii sorliit suliaani erserpat?

• Guutip aqqanik taaguuteqarnermik immikkut pisinnaatitaaffik qanoq isigaajuk?

[Atuaqqissaarnermi apeqqutit]

[Qupp. 20-mi assiliartaq]

Ilagiinni aalajangersimasumik katersuuttarnitsinnut siunertaasoq pingaarneq tassaavoq Jehovamik unnersiutiginninnissaq

[Qupp. 23-mi assiliartaq]

Jehovap inatsisai tamarmik najoqqutassianik atuuttuartunik tutsuiginartunillu tunngaveqarput