Twatela Kumuhameka Yehova
Twatela Kumuhameka Yehova
‘Muhamekenu Ya, enu antu.’—MASAMU 111:1.
1, 2. Indi nhoshelu yakwila nawu “Aleluya” yalumbulukadi, nawa ayizatisha ñahi muNyikanda yawakwaKristu yachiGriki?
“ALELUYA!” Iyi nhoshelu avula kuyizatisha muyipompelu yaKristendomu. Antu amakwawu avula kuzatisha iyi nhoshelu mumpanji jawu. Hela chochu, antu antesha hohu diwu eluka chalumbuluka iyi nhoshelu yajila, ilaña yililu yawantu amavulu ayizatishaña yamusawulaña Nzambi. (Titusa 1:16) Nhoshelu yakwila nawu “Aleluya,” ayilumbulula mumukanda wumu nawu “hiizu dazatishiluwu ansoneki amasamu ashiyashana kulonda kuleja antu ejima adibombi nawu hakumuhameka Yehova.” Kafwampi, antu amavulu adiza jaBayibolu ashimuna nawu “Aleluya” yalumbuluka nawu “Muhamekenu Ya [dikwila nawu] Yehova.”
2 Nhoshelu yakwila nawu “Aleluya” yekala haMasamu 111:1 muNew World Translation ayizatisha nawu ‘Muhamekenu Ya, enu antu!’ Nhoshelu yachiGriki yakwila nawu Aleluya yamwekanaña mapampa kawana haChimwekeshu 19:1-6 yamwekesha muzañalu hamuloña wakukuma kwansakililu yakutwamba. Neyi nsakililu yakutwamba yinakumi dehi, akwakudifukula alala akahosha nawu “Aleluya” munjila yakalemesha.
Nyidimu Yindi Yamaneni
3. Muloñanyi waweni wutwapompelaña hamu mpinji yejima?
3 Nsoneki waMasamu 111 washimuna nyiloña yayivulu yitwatelela kumuhameka Yehova chikupu. Vasi 1 yahosha nawu: ‘Nukumusakilila Yehova namuchima wami wejima, nihampuña yawantu oloka nimuchipompelu.’ A Yinsahu jaYehova makonu, niwena dichiyatiyañawu. Muloña waweni wutwapompelaña hamu mpinji yejima, muyipompelu yetu nihakupompa kwamaneni, wekala wakumuhameka Yehova.
4. Indi antu anateli kutala ñahi chachiwahi nyidimu yaYehova?
4 ‘Nyidimu yaYehova yamaneni, ayitalaña chachiwahi kudi antu ejima atiyilañamu kuwaha.’ (Masamu 111:2) Talenu nhoshelu yakwila nawu “ayitalaña chachiwahi.” Kwesekeja namukanda wumu, iyi vasi yinateli kutalisha hadi antu elishaña nyidimu yaNzambi kwikala “yuma yakutoñojokahu chikupu nikudiza.” Yileñaleña yaYehova yenzala nankeñelu yayiwahi. Waleña itañwa, iseki nikakweji, jejima jizatileña hamu, kulonda heseki hekali iyena nichejeji, wufuku nimwaana, niyilaaka.
5. Indi muntu chinakuyilaku hambidi mukutiyishisha yuma yamukuleña kwejima kunamwekeshidi?
5 Asayantisiti awana chuma chakuhayamisha nankashi kutalisha heluña hekalila iseki musolar system yetu hamu tuhu nikutoha kwakakweji. Iluña hekala iyi yuma yamwiwulu nimunjila mujazatilaña hamu chaleñelaña kuhimpa-himpa kwayilaaka yekalaku kumaluña amakwawu hamaseki. Cheñi nawa, yuma yayivulu anayidizi kutalisha hanjila yaleñawu chiwahi ñovu yayuma yamukuleña kwejima. Muchibaba chinakwila nawu “The Designed ‘Just So’ Universe,” nkuluñaña wadiza jakutuñatuña makina wahosheli nindi: “Chaswayi kwiluka muloña waletesha asayantisiti amavulu kuhimpa yitoñojoka yawu hayaaka 30 yinahituhu, nakwiteja nawu chakeñekaña kwikala nachikuhwelelu chikupu hakwiteja nawu iseki denjili chakuluwukila hohu. Kwekala nyiloña yayivulu yatuleñelaña kwiteja nawu kwekala nleñi wukweti maana chikupu neyi twiluka nankashi heseki detu daleñawu chiwahi.”
6. Mwatiyaña ñahi kutalisha hanjila mwaleñeleliyi Nzambi antu?
6 Chatuleñawu himudimu wukwawu weneni wakuleña kwaNzambi. (Masamu 139:14) Hakuleña antu, Nzambi wayinkeli yitoñojoka, mujimba wukweti yidi yejima yakeñekaña kulonda kuzataña chachiwahi, niwuswa wakuzata nyidimu. Chakutalilahu, wuswa watwinkayi Nzambi wakuhosha nikutiya, niwuswa wakusoneka nikutaña hichihayamisha. Antu amavulu akweti wuswa weniwu. Cheñi ayileña chiwahi chikupu—mujimba wenu wukweti ñovu yakwimana. Chawuleñawu mujimba wenu niwuswa wakwenda nikuzata, kuzatisha yakudya kulonda yileti ñovu mumujimba, hichuma chakuhayamisha hama. Nyijila yenu chiyanuñañana hichuma chikwawu chakuhayamisha chaleteshaña yitoñojoka kuzatika nikwiluka yuma yabadika yuma yidi yejima yatuñawu asayantisiti. Kafwampi, yuma yakoñawu antu ayitweshaña hamuloña wayitoñojoka yayinkawu antu. Hela tuhu injiniya wadiza chikupu nawa wakuluka yitembi hanatweshi kutuña chuma chidi chejima chachiwahi nawa chikweti mudimu neyi madimbanu ninyinu ikumuku. Dihulenu nenu, ‘Komana nyidimu yayiwahi yakuleñaleña nikutuña adi kutwesha kuyizata chakubula kuzatisha chiwahi nyinu yatwinkayi Nzambi?’
Nyidimu yaNzambi Yamaneni niYililu Yindi
7. Muloñadi chitwatela kumona Bayibolu neyi mudimu weneni waNzambi?
7 Nyidimu yaYehova yamaneni yashilahu yuma yikwawu yayiwahi yakoñelayi muchidi wamuntu, neyi chayilumbululawu muBayibolu. Mukanda weniwu wanuñañana chiwahi. Kwambukaku nanyikanda yikwawu, chalala ‘awonena dehi kudi Nzambi; wawaha kuleja nachu.’ (2 Timotewu 3:16) Chakutalilahu, mukanda wakusambila wamuBayibolu, Kutachika, walumbulula chafumishiliyi Nzambi iseki datama mumafuku aNowa. Mukanda wamuchiyedi, Kwidika, wamwekesha Yehova chayiñishiliyi wuNzambi windi hakupulwisha aIsarela muwuduñu muEjipitu. Ñimbi yamasamu chakubula nikujinoka wadiñi nakutoñojoka yuma yamuchidiwu hampinji yahosheliyi nindi: ‘Mudimu [waYehova] walema wawanta, kuloña kwindi kwahaya nyaka. Yena nayanukishi antu nyidimu yindi yakuhayamisha; Yehova watoñaña, wenzala wushona.’ (Masamu 111:3, 4) Chalala mwatela kwiteja nenu mudimu waYehova kufuma tuhu kunyaka, kubombelahu niyuma yelayi muchihandilu chenu, hichanukishu ‘chakulema niwanta’ windi.
8, 9. (a) Mujinjilanyi mwaambukila nyidimu yaNzambi nanyidimu yawantu amavulu? (b) Yililwinyi yikwawu yaNzambi yiwatiyaña kuwaha?
8 Ilukenu nenu ñimbi yamasamu wakonkomwena cheñi yililu yaYehova yayiwahi, yidi neyi kuloña, luwi niwushona. Mweluka nenu nyidimu yawantu akwanshidi kakavulu hiyekala yaloñaku. Kakavulu yamwekeshaña ichima, lwisu nikudinka wanta. Yuma yeniyi yamwekenaña muyitwa yafwana yatuñañawu antu kulonda kuzuña nachu majita nikuhetelamu. Yumiyi yaletaña makabi asweja niwoma kuyihita yawantu abula nyiloña. Cheñi, nyidimu yawantu yayivulu yinaleteshi makabi kudi atuzweñi ayandishañawu. Antu amavulu anateli kutena chakutalilahu chakuzatisha anduñu hakutuña jipiramidi. Jipiramidi jeniji kakavulu adiñi nakujiikilamu aFwaro adiña adivwimba. Kubombelahu, nyidimu yawantu amavulu yamakonu hiyinakukabisha hohu antuku ilaña ‘yinakukisañana iseki.’—Tañenu Chimwekeshu 11:18.
9 Nyidimu yaYehova yambukaku chikupu, mpinji yejima yashindamena hakuloña hohu. Nyidimu yindi yabombelamu kumwekesha luwi hakuhana chuma chakukuula nachu antu akwanshidi. Hakuhana ifutu danyiloña, Nzambi ‘wamwekesheli kuloña kwindi.’ (Aroma 3:25, 26) Chalala, “kuloña kwindi kwahaya nyaka.” Nzambi wamwekesha luwi kuhitila mukuzata nawantu akwanshidi mukuwunda. Mpinji jikwawu wayitiyilileña luwi nakuyilembelela kulonda aleki njila jawu jatama nakwila chaloña.—Tañenu Ezekeli 18:25.
Yehova Washikijaña Yikaninu Yindi
10. Chakutalilahwinyi chakashinshi chemikiliyi Yehova kutalisha hachitiyañenu chatiyañeniyi naAbarahama?
10 ‘Nayidiishi ana amwakama, wakaanuka haya nyaka chitiyañenu chindi.’ (Masamu 111:5) Chinakumwekana neyi ñimbi yamasamu wateneni chitiyañenu chaAbarahama. Yehova wakanini kukiswila anyana kaAbarahama nakuhosha nindi akaheta nyisumba yawayilumbu jawu. (Kutachika 22:17, 18; Masamu 105:8, 9) Hakushikijewa kwatachi kwayikaninu yeniyi, mbutu yaAbarahama yekalili munza waIsarela. Munza weniwu wadiñi muwuduñu muEjipitu hadi yaaka yayivulu, ilaña ‘Nzambi waanukili chatiyañeniyi naAbarahama’ nawa wayipulwishili. (Kwidika 2:24) Njila yakameneniyi Yehova munza weniwu yamwekeshaña nawu himukwakuhana. Wayinkeleña yakudya ninsañu yakuyikwashaku kulondela nshimbi jindi. (Kuhituluka 6:1-3; 8:4; Nehemiya 9:21) Chimwahitili yaaka yayivulu, aIsarela adikañileña naNzambi kakavulu, hela chakwila watemesheli atuprofwetu kulonda ayikonkomweni afunti kudi yena. Chelili munahiti dehi yaaka kubadika ha 1,500 kufuma hampinji yalubwiliyi aIsarela muEjipitu, Nzambi watemesheli Mwanindi wasemuka nkawindi hanu hamaseki. A Yudeya amavulu amukaanini Yesu nawa etejeli nawu amujahi. Dichi, Yehova watuñili munza wawuha, munza wakuspiritu, “aIsarela ambala aNzambi.” Iwu munza kushilahu niYesu atuña mbutu yachifwikija yaAbarahama, yateneniyi Nzambi nindi wakayizatisha hakukiswila muchidi wamuntu.—Aŋalija 3:16, 29; 6:16.
11. Indi Yehova ‘waanukaña ñahi chitiyañenu chindi’ chatiyañeniyi naAbarahama?
11 Yehova ‘waanukaña chitiyañenu chindi’ ninkisu yakaniniyi kuhitila muchitiyañenu chenichi. Makonu, nakuloñesha yakudya yakuspiritu yayivulu mumadimi akubadika ha 400. Cheñi wakulaña kulomba kutwalombaña kutalisha hakukankila kwetu kwakumujimba, kwesekeja namazu akwila nawu: “Twinkaña hefuku hefuku kudya kwetu kutunakeñi.”—Luka 11:3; Masamu 72:16, 17; Isaya 25:6-8.
Ñovu yaYehova Yakuhayamisha
12. Munjilanyi mwamwinkeleluwu Isarela wakushankulu ‘wuswana wanyunza’?
12 ‘Nayimwekesheli antu indi ñovu yanyidimu yindi, nachina chanayinkiyi wuswana wanyunza.’ (Masamu 111:6) Chuma chadimena munsañu yanyaka yawaIsarela chatoñojokeleñayi ñimbi yamasamu chadiñi kupuluka kwayipulwishiluwu muchihayamisha muEjipitu. Chelili Yehova yayiteji aIsarela kwiñila Mwituña daChikaninu, atwesheli kushinda mawanta adiñi kumusela nikumujika waKaloña Yodana. (Tañenu Nehemiya 9:22-25) Eña, Yehova wamwinkeli Isarela ‘wuswana wanyunza.’ Chalala Nzambi wamwekesheli ñovu jindi.
13, 14. (a) Ñovwinyi yamwekesheliyi Nzambi kutalisha hadi Babiloni hamwaha yatoñojokeleñayi ñimbi yamasamu? (b) Nyidimwinyi yikwawu yamaneni yakupulwisha yashikijayi Yehova?
13 Hela chochu, tweluka chikupu netu hichikweti muloña nayuma yejima yayikoñeleleliyi Yehovaku, aIsarela hiyamulemesheli Nzambi chili ankakulula jawu Abarahama, Isaka niYakobaku. Atwalekeluhu kudikaña sampu nichazatishiliyi Nzambi akwaBabiloni kulonda kuyifumisha mwituña dawu nakuyitwala muwuduñu. (2 Kushindulula 36:15-17; Nehemiya 9:28-30) Kwesekeja nachatoñojokañawu antu amakwawu adiza jaBayibolu, neyi nsoneki yaMasamu 111 wadiñaku mumpinji yafuminuwu aIsarela muwuduñu muBabiloni, wadiñi namuloña washikila wakumuhamekela Yehova hakashinshi Kindi niñovu. Nzambi wamwekesheli kashinshi kindi niñovu kuhitila mukupulwisha aYudeya muBabiloni—wanta wadiña nanshimbi yakubula kulubula anduñu.—Isaya 14:4, 17.
14 Chimwahitili nkulakaji jayaaka jitanu, Yehova wazatishili ñovu jindi munjila yabadika chikupu hakulubula antu abalumukili munyichima kufuma muwuduñu wanshidi nikufwa. (Aroma 5:12) Ichi chaletesheli antu 144,000 kwikala atumbanji twaKristu awayishewa naspiritu. Mu 1919, Yehova wazatishili ñovu jindi hakupulwisha ashalahu antesha anawa awayishewa muwuduñu wansakililu yakutwamba. Nzambi nakuyikwasha kushikija mudimu wawu munanu mafuku akukuminina nañovu jindi. Neyi atwalekahu kwikala ashinshika kushika nikukufwa, akayulilaña mwiwulu hamu naYesu Kristu kulonda antu abalumuka munyichima akahetelumu hanu hamaseki. (Chimwekeshu 2:26, 27; 5:9, 10) Akaswana chikupu iseki kubadika chaswanini Isarela wakushankulu.—Matewu 5:5.
Nshimbi Jindi Jalala Jahaya Nyaka
15, 16. (a) Yumanyi yekala munyidimu yamakasa aNzambi? (b) Nshimbinyi yaheniyi Nzambi kudi Isarela wakushankulu?
15 ‘Nyidimu yakumakasindi hinsañu yalala chikupu niwuñaji; mwafumbañayi mwejima mwakolaña ngu, Akoleshamu dehi mwahaya nyaka nanyaka, anakoñumu mwalala chikupu nawa mwoloka.’ (Masamu 111:7, 8) Hakachi ‘kanyidimu yamakasa aYehova’ hadiña nimalola awubasa ayedi hasonekeluwu nshimbi jalema ikumi jawaIsarela. (Kwidika 31:18) Nshimbi jeniji, kubombelahu ninshimbi jikwawu jejima jekalili muchitiyañenu chaNshimbi jamwinkeluwu Mosi, jashindamena hanshimbi jalala jahaya nyaka.
16 Chakutalilahu, nshimbi yimu yasonekeluwu hamalola awubasa yahosheleña nawu: “Ami Yehova Nzambi yeyi niNzambi wamukawu.” Yahosha cheñi nawu Yehova ‘watiyilaña luwi makombakaji awantu amukeña, ahembaña nshimbi [jindi].’ Hanawa malola awubasa ayedi hadiñi cheñi nshimbi yalema nikulelu yidi neyi “lemeshaku tata yeyi namama yeyi,” ninshimbi yakwila nawu “kwiya, chinjila” kubombelahu ninshimbi yahosheleña hakubula kwikala nalwisu lwachuma chamuntu wacheñi.—Kwidika 20:5, 6, 12, 15, 17.
Nkuli Yetu Wajila, Atiyañawu Woma
17. Nyiloñanyi yadiñawu nayu aIsarela yakujilika ijina daNzambi?
17 ‘Natemeshi nakuyikuula antu indi; nakoleshi chahaya nyaka chitiyañenu chindi; ijina dindi diyi Wajila diyi atiyañawu woma.’ (Masamu 111:9) Cheñi, ñimbi yamasamu hadaha watoñojokeleña hakashinshi kaYehova kutalisha hachitiyañenu chindi chamukaniniyi Abarahama. Hamuloña wanichi, Yehova hayuumbili antu jindi katachi hadiñuwu anduñu muEjipitu wakushankulu nawa nkumininaku hadiñuwu ankoli muBabilonuku. Munsañu jejima jiyedi, Nzambi wakuulili antu indi. Hela chakwila kwadiñi hohu kushikijewa kuyedi, Isarela wateleleli kujilika ijina daNzambi.—Tañenu Kwidika 20:7; Aroma 2:23, 24.
18. Muloñadi chimwatoñojokelaña nenu kuzatisha ijina daNzambi hikukooleka?
18 Chumichi chakeñekaña nikudi akwaKristu akuulawu muwuduñu wanshidi nikufwa makonu. Twatela kuzata nañovu chikupu kulonda kushakama nakwesekeja nakulomba kwekala mukulomba kwakutalilahu kwakwila nawu: “Ijina deyi dijili.” (Matewu 6:9) Kutoñojokaña chikupu hanidi ijina dalema chatela kutuleñela kumwakama Nzambi. Nsoneki yamasamu 111 watoñojokeleña mwoloka kutalisha hakumwakama Nzambi, hakushimuna nindi: ‘Kutachika kwiluka maana yowu kumwakama Yehova; elukaña chachiwahi wowu elañamu [ovwahilaña nshimbi jindi].’—Masamu 111:10.
19. Chumanyi chitukashinshikahu muchibaba chinahiñuhu?
19 Kumwakama Nzambi kukatukwasha kuhela yuma yatama. Kukatukwasha cheñi kwimbujola yililu yayiwahi yaNzambi yekala muMasamu 112, yitukashinshikahu muchibaba chinahiñuhu. Isamu denidi damwekesha chitunateli kushikahu kwikala hakachi kayihita yawantu akadiluñisha hakumuhameka Nzambi haya nyaka nanyaka. Yehova watelela kumuhameka. ‘Kumushimeka yena chashikaña kunyaka yahaya nyaka.’—Masamu 111:10.
Malwihu aKutoñojokahu
• Muloñadi chitwatela kumuhamekela Yehova?
• Yililwinyi yaYehova yamwekeshawu munyidimu yindi?
• Mwamonaña ñahi kukooleka kwakuzatisha ijina daNzambi?
[Malwihu aKuzatisha haKudiza]
[Mwevulu wudi hefu 20]
Nkeñelu yetu yakupompa mpinji yejima hikumuhameka Yehova
[Mwevulu wudi hefu 23]
Nshimbi jaYehova jejima jalala nawa jahaya nyaka