D lagem taab n pẽg a Zeova
D lagem taab n pẽg a Zeova
“Bɩ y pẽg Zusoabã!”—YƖƖL 111:1.
1, 2. “Alleluya” võor yaa bõe, la Biiblã babg ning b sẽn gʋls ne gɛrkã pʋgẽ b tũnuga ne-a n na n wilg bõe?
“ALLELUYA!” Nebã nong n yeta woto egiliiz rãmbẽ wã. Kẽer me nong n yeta woto b goam pʋgẽ. La neb nins sẽn mi gom-kãngã võorã sõor paoodame. Bãmb sʋkã neb wʋsg manesem paoogda Wẽnnaam. (Tɩt 1:16) Sebr a yembr wilgame tɩ “yɩɩl gʋlsdbã wʋsg ra tũnugda ne gom-bi-kãngã n boond nebã fãa tɩ b naag bãmb n pẽg a Zeova.” Bãngdb wʋsg sɩd wilgame tɩ “Alleluya” rat n yeelame tɩ “ ‘Pẽg a Yah’ bɩ a Zeova.” La moorã Biiblã pʋgẽ b ningame tɩ “bɩ y pẽg Zusoabã.”
2 Rẽ n kɩt tɩ Traduction du monde nouveau wã yet Yɩɩl Sõamyã 111:1 pʋgẽ tɩ “pẽg-y a Yah!” Wilgr 19:1-6 pʋgẽ, b ra kɩdemda sũ-noogo, ziri tũudmã sãang yĩnga. La be d yãta “Alleluya” wã sẽn yaa gɛrk gom-bilã naoor a naase. B sã n wa sãam ziri tũudmã, wẽn-tũudb hakɩkã na n yeelame tɩ “Alleluya!” n sɩd pẽg Wẽnnaam.
A Zeova tʋʋm-kãsemsã
3. Bõe yĩng la d sẽn tigimd taab wakat fãa wã?
3 Yɩɩll 111 wã gʋlsdã wilga bʋʋm wʋsg sẽn kɩt tɩ d tog n lagem taab n pẽg a Zeova. Pipi verse wã yeta woto: “Mam na n pʋʋsa Zusoabã bark ne m sũur fãa nin-tɩrs lageng ne b tiging pʋgẽ.” Rũndã-rũndã, a Zeova Kaset rãmbã me rat n maanda woto. Sẽn yɩɩd fãa, d sẽn tigimd taab wakat fãa d tigimsã pʋsẽ la d tigis-kãsemsã sasa wã yaa sẽn na yɩl n pẽg a Zeova.
4. Bõe zug la ninsaalbã tõe n tagse?
4 “[A Zeova] tʋʋmã yaa kãsemse, neb nins fãa sẽn nong bãmbã baoodame n dat n bãng bãmba.” (Yɩɩl 111:2) Bũmb nins fãa a Zeova sẽn naanã pa zaalem yĩng ye. Ninsaalbã tõe n tagsa rẽ fãa zugu. A ninga wĩndgã, tẽngã, la kiuugã tɩ b be zĩig sẽn zemsẽ, tɩ kɩt tɩ tẽngã tõe n paam tʋʋlem la vẽenem, tɩ yʋng la wĩndga, sẽoog la sɩpaolg me beẽ.
5. Dũniyã wɛɛngẽ, bõe la ninsaalbã bãng masã?
5 Bãngdbã bãnga bũmb wʋsg tẽngã wɛɛngẽ, la b bãng kiuugã bedrem, a zɩslem, la a sẽn tũud sor ningã. Tẽngã, kiuugã la wĩntoogã sẽn zãr ne taab to-to wã zemsame, tɩ kɩt tɩ sẽoog ne sɩpaolg beẽ. Sẽn paase, b bãnga bũmb a taab me Wẽnnaam sẽn naanã zugu. Rẽ wɛɛngẽ, bãngd a ye yeela woto: “Yaa nana tɩ d bãng bũmb ning sẽn kɩt tɩ bãngdb wʋsg bas b sẽn da tagsd to-to yʋʋm 30 sẽn loogã. B sak n deegame masã tɩ dũniyã pa wa yaar ye. Woto wilgda vẽeneg tɩ naand sẽn tar yam n naan tẽngã sẽn be rasãndã n kõ tõndo.”
6. Wẽnnaam sẽn naan tõnd to-to wã wɛɛngẽ, yãmb tagsg yaa wãna?
6 Wẽnnaam sẽn naan tõnd to-to wã me naaga a tʋʋm-kãsemsã sʋka. (Yɩɩl 139:14) A kõo ninsaal yam, la bũmb nins fãa sẽn yaa tɩlae ne a yĩngã wala sũuri, fulfuudu, la a kõ-a tõog me t’a tõe n maan bũmb wʋsgo. Wala makre, ninsaal tõe n gomame, n kelge, n gʋlse, la a karme. Woto fãa yaa yel-solemde. La neb wʋsg tõe n maana rẽ fãa. Wẽnnaam naana tõnd tɩ d tõe n yals tɩrg me. Tõnd yĩngã sẽn yaa to-to wã, la bũmb nins sẽn maand a pʋgẽ wã yaa yel-solemde. Sẽn yɩɩd rẽ menga, bũmb ning sẽn kɩt tɩ d tõe n tagse, la d tõe n wʋm zabdem, noogo, yũugu, la yɛl a taabã yɩɩda bũmb nins bãngdbã sẽn tõog n maanã zĩig sẽn zãre. La yaa yamã Wẽnnaam sẽn kõ ninsaalbã n kɩt tɩ b tõog n maan b sẽn maanã fãa. Bãng-bɛdã rãmb meng pa tõe n maan bũmb sẽn yaa neer la tar yõod wa tõnd nug-biis piigã ye. Sok-y y meng woto: ‘Rẽ yĩnga Wẽnnaam sã n da pa kõ ninsaal nug-biisi, a ra na tõog n me roog bɩ n gʋl bũmb sɩda?’
A Zeova tʋʋm-kãsemsã, la a sẽn yaa a soabã
7. Bõe yĩng tɩ d tõe n yeel tɩ Biiblã me naaga a Zeova tʋʋm-kãsemsã sʋka?
7 Bũmb nins a Zeova sẽn maan n kõ ninsaalbã tɩ be yamleoog tɩ b bilgd rẽ Biiblã pʋgẽ wã naaga a tʋʋm-kãsemsã sʋka. Biiblã meng zoe yaa bõn-kãseng a Zeova sẽn maane. A pa wa sɛb a taabã ye. Biiblã “yaa Wẽnnaam n kõ tõndo: la a bee bark zãmsg yĩnga.” (2 Tɩm. 3:16) Wala makre, Sɩngr sebrã wilgda Wẽnnaam sẽn sãam nin-wẽnsã tẽngã zug a Nowe wakatẽ wã to-to. Yikr sebrã sẽn yaa Biiblã sebr a yiib-n-soabã wilgda a Zeova sẽn fãag Israɛll nebã Ezipt yembdã pʋgẽ n wilg tɩ yẽ yaa Wẽnnaam sẽn ka to wã. Yɩɩl gʋlsdã ra tẽra rẽ yelle, a sẽn wa n yet woto wã: “[A Zeova] tʋʋmã tara waoogr ne naam, la bãmb tɩrlmã paada wakat fãa. Bãmb maana tẽegr bãmb tʋʋm-kãsemsã yĩnga. Zusoabã yaa bark kõat la nimbãan-zoeta.” (Yɩɩl 111:3, 4) A Zeova sẽn maan bũmb nins hal pĩnd n tãag masã wã kɩtame t’a sɩd tog ne pẽgr la waoogre!
8, 9. a) Bõe yĩng tɩ Wẽnnaam tʋʋmã ne ninsaalbã rẽnd pa wõnd taaba? b) Bõe la yãmb nong Wẽnnaam nengẽ?
8 D bãng tɩ yɩɩl-gʋlsdã goma a Zeova tɩrlmã, a nimbãan-zoeerã, la a sẽn yaa kõtã yell me. Yãmb miime tɩ ninsaalb sẽn pa zems zãngã tʋʋm pa nong n yaa tɩrg ye. B tʋʋmã mi n wilgdame tɩ b yaa yã-be-rãmba, sũ-ki-rãmb la wuk-n-mens rãmba. Bũmb sẽn wilgd rẽ yaa b sẽn maand zab-teedã ligd yĩngã, la b wat ne zabã tɩ kɩt tɩ zu-loees la rabeem tar neb milyõ rãmb toog sẽn kae ne zabã. Tʋʋm wʋsg ninsaalbã sẽn tõog n maanã tũu ne naong rãmbã maasem. Wala makre Ezipti, yaa yembsã la b kɩt tɩ b me Faraõ rãmb bɩ nanambsã kũ-rãmb bĩngr zĩis b sẽn boond tɩ pɩramiid rãmbã. Sẽn paase, ninsaalbã sẽn maand bũmb nins rũndã-rũndã wã wʋsg namsda nebã la “sãamd dũniyã.”—Karm-y Wilgri 11:18.
9 A Zeova tʋʋmã pa wa ninsaalbã rẽnd ye. A tʋʋmã fãa yaa tɩrse! Bũmb ning a sẽn maan n na n fãag ninsaalbã sẽn yaa yel-wẽn-maandbã naaga a tʋʋm-kãensã sʋka. Wẽnnaam sẽn kõ rondã, a ‘wilgame t’a yaa tɩrlem soaba.’ (Rom 3:25, 26) Vẽenega, a “tɩrlmã paada wakat fãa.” Wẽnnaam sẽn pa yãg n sɩbg ninsaalbã sẽn yaa yel-wẽn-maandbã wilgdame t’a yaa nimbãan-zoɛta. Sasa ning menga, a kota ninsaalbã sẽn yaa yel-wẽn-maandbã tɩ b bas b yel-wẽnã la b maan sẽn yaa tɩrga.—Karm-y Ezekɩɛll 18:25.
A Zeova pidsda a kãabgo
10. Mak-sõng bʋg la a Zeova kõ-yã, kaool ning a sẽn maan ne a Abrahaamã pʋgẽ?
10 “Bãmb kõta b zoɛtba rɩɩbo, bãmb tẽegda b kãabga wakat fãa.” (Yɩɩl 111:5) Zĩ-kãngã, wõnda wa yaa kaool ning Wẽnnaam sẽn maan ne a Abrahaamã yell la yɩɩl-gʋlsdã gomda. A Zeova kãabame t’a na n ninga a Abrahaam yagensã barka, la tɩ b na n tõoga b bɛɛbã n deeg b tẽnsã. (Sɩng. 22:17, 18; Yɩɩl 105:8, 9) Kãabgã pipi pidsgã pʋgẽ, a Abrahaam yagensã sɩd wa n lebga tẽn-tõre, sẽn yaa Israɛlle. Israɛll nebã zĩnda yembd pʋgẽ Ezipt n kaoose, la “Wẽnnaam tẽega [a] sẽn da kãab a Abrahaam” bũmb ningã, n fãag-ba. (Yik. 2:24) A Zeova sẽn tall manesem ning ne-bã wilgame t’a sɩd yaa kõta. A kõ-b-la rɩɩb la a wilg-b b sẽn tõe n tũ a noyã to-to. (Tõo. 6:1-3; 8:4; Neh. 9:21) Yʋʋm wʋsg pʋgẽ, b basa Wẽnnaam tũubu, la baa ne Wẽnnaam sẽn tʋm a no-rɛɛsdbã tɩ b keoog-bã, b kell n pa sak ye. Sẽn yɩɩd yʋʋm 1500 Israɛll nebã sẽn yi Eziptã poore, Wẽnnaam tʋma a Bi-riblã tẽngã zugu. Zʋɩf rãmbã wʋsg zãgsa a Zezi, la b sak meng tɩ b kʋ-a. Rẽ poore, a Zeova yãka bu-paalga, b sẽn boond tɩ “Israɛll sẽn yaa Wẽnnaam dẽndã.” Yaa bu-kãng nebã, ne Kiristã n yaa a Abrahaam yagensã, a Zeova sẽn pĩnd n togs t’a na n tũnuga ne-b n ning ãdem-biisã barkã.—Gal. 3:16, 29; 6:16.
11. Wãn to la a Zeova wilgd t’a ket n tẽra kaool ning a sẽn maan ne a Abrahaamã?
11 A Zeova ket n tẽra a kaoolã la bark nins kaoolã sẽn na n wa ne wã. Rũndã-rũndã, a Zeova kɩtame tɩ b yiisd sɛb ne buud goam sẽn yɩɩd 400 n na n sõng tõnd tɩ d tũ a noyã. Sẽn paase, a ket n kelgda tõnd pʋʋsg n kõt-d rɩɩbo. Rẽ zemsa ne gom-kãensã: “Bɩ y kõ tõnd dɩɩb daar fãa tɩ seke.”—Luk 11:3; Yɩɩl 72:16, 17; Ezai 25:6-8.
A Zeova pãn-kãsengã
12. Wãn to la Wẽnnaam kõ Israɛll nebã ‘buud a taabã soolem tɩ b sooge’?
12 “Bãmb wilga b neba b tʋʋmã pãnga bãmb sẽn kõ bãmb buud a taabã soolem tɩ b soogã yĩnga.” (Yɩɩl 111:6) Tõe tɩ bũmb sẽn zĩnd Israɛll nebã vɩɩm pʋgẽ tɩ yɩɩl-gʋlsdã ra tẽr a yell n yɩɩd yaa a Zeova sẽn maan yel-solemd n yiis a nin-buiidã Ezipt yembdã pʋgẽ wã. A Zeova sẽn wa n kɩt tɩ Israɛll nebã kẽ kãabg tẽngẽ wã, b tõog n zab n deega tẽns sẽn da be Zʋrdẽ kʋɩlgã poor la a taoore. (Karm-y Nehemi 9:22-25.) A Zeova sɩd kõo Israɛll nebã ‘buud a taabã soolem tɩ b sooge.’ Woto wilgdame tɩ Wẽnnaam sɩd tara pãnga.
13, 14. a) Wẽnnaam tʋʋm-kãsemsã sʋka, tõe tɩ yaa bʋg yell la yɩɩl-gʋlsdã ra tagsd sã n yaa ne Babilon wɛɛngẽ? b) Tʋʋm-kãseng bʋg sẽn na n kɩt tɩ ãdem-biisã paam fãagr la a Zeova tʋm-yã?
13 D miime tɩ baa ne bũmb nins fãa a Zeova sẽn maan n kõ Israɛll nebã, b pa waoog a Zeova, la b pa waoog a Abrahaam, a Izaak la a Zakoob sẽn yaa b yaab rãmbã me ye. B kell n zãgsa a Zeova, hal tɩ Babilon nebã wa tall-b n kẽng yembdo. (2 Kib. 36:15-17; Neh. 9:28-30) Bãngdb kẽer tagsdame tɩ Yɩɩll 111 gʋlsdã vɩɩmda Israɛll nebã sẽn yi Babilon n lebg n wa wã poore. Sã n yaa woto, dẽnd a leb n tara bʋʋm n na n pẽg a Zeova a sẽn yaa kɩs-sɩd la pãng soabã yĩnga. Babilon nebã ra pa sakd n bas b yembs abada. La Wẽnnaam sẽn fãag Zʋɩf rãmbã, a wilgame t’a sɩd yaa kɩs-sɩd la pãng soaba.—Ezai 14:4, 17.
14 Sẽn zems yʋʋm kobs-nu loogr poore, a Zeova leb n tũnuga ne a pãngã n tʋm tʋʋm-kãsenga. Yaa a sẽn maan bũmb ning n na n fãag ninsaalb nins sẽn na n tek yam n kos sugrã ne yel-wãnã la kũumã. (Rom 5:12) Woto kɩtame tɩ neb 144 000 lebg Kiristã karen-biis sẽn paam vʋʋsem sõngã zaeebo. Yʋʋmd 1919 wã, a Zeova tũnuga ne a pãngã n yiis nin-kãensã kellã ziri tũudmã yembd pʋgẽ. Yaa ne a Zeova pãngã la b tõog n maan bũmb nins b sẽn maan rũndã-rũndã sẽn yaa saabã wakatã. B sã n kell n sak a Zezi n tãag b kũum, b na n tɩ naag-a-la saasẽ n dɩ naam tẽngã zugu, neb nins sẽn na n tek yam n kos sugrã nafr yĩnga. (Wil. 2:26, 27; 5:9, 10) Sẽn paam-b vʋʋsem sõng zaeebã sẽn na n soog tẽngã gillã yĩngã, b rẽndã yɩɩda Israɛll nebã rẽnd zĩig sẽn zãre.—Mat. 5:5.
A noyã zemsa ne bas-yardo, la b pa toeemd ye
15, 16. a) Bõe me n naag Wẽnnaam nus-tʋʋmã sʋka? b) No-bʋs la Wẽnnaam ra kõ Israɛll nebã?
15 “Sɩd ne tɩrlem yaa bãmb nus-tʋʋma. Bãmb noyã fãa bee sɩda. Bãmb yaa kãn-kãe wakat fãa, la b ratame tɩ neba sak bãmb ne sɩd la tɩrlem.” (Yɩɩl 111:7, 8) Kug-wals a yiibã a Zeova sẽn gʋls noy piigã b zug n kõ Israɛll nebã naaga ‘a nus-tʋʋmã.’ (Yik. 31:18) Yaa no-kãens la noy a taabã fãa sẽn naag taab la b sẽn boond t’a Moiiz Tõogã, la fãa yita Wẽnnaam nengẽ, la zemsa ne bas-yardo.
16 Wala makre, kug-walsã zugu, noor a yembr yeta woto: “Mam yaa Wẽnnaam sẽn yaa sũ-kiir soaba.” A Zeova paasa woto: “Mam maanda neb nins sẽn nong maam n sakd mam tõodã yagensã neer hal tɩ ta zãmaan tusri.” Kug-walsã zugu, b yeelame me tɩ f “waoog f ba ne f ma,” la tɩ f “ra zu ye.” B leb n gɩdga f to bũmb tʋlgre. No-kãensã tara yõod wakat fãa.—Yik. 20:5, 6, 12, 15, 17.
D fãagdã seka zoeese
17. Bõe yĩng tɩ Israɛll nebã ra segd n waoog a Zeova yʋʋrã?
17 “Bãmb tʋma fãagr n kõ b nebã n lugl kãabg wakat fãa yĩnga. Bãmb yʋʋr yaa sõngo, a sekda zoeese.” (Yɩɩl 111:9) Ka me, tõe tɩ yɩɩl-gʋlsdã ra tagsda a Zeova sẽn pids kaool ning a sẽn maan ne a Abrahaamã yelle. Sɩd me, a Zeova pa bas a nin-buiidã Ezipt la Babilon yembdã pʋgẽ ye. A sẽn fãag Israɛll nebã naoor a yiibã zoe n seka b na waoog a yʋʋrã.—Karm-y Yikri 20:7; Rom dãmba 2:23, 24.
18. Bõe yĩng tɩ y tagsdẽ tɩ y sẽn tar Wẽnnaam yʋʋrã yaa zu-zẽkre?
18 Rũndã-rũndã kiris-nebã tara bʋʋm n na n waoog a Zeova yʋʋrã, bala a fãag-b-la yel-wẽnã la kũumã yembd pʋgẽ. D segd n maana d sẽn tõe fãa tɩ d sẽn maandã fãa zems ne pʋʋsg ning a Zezi sẽn wilg a karen-biisã sɩngrẽ goamã. A sɩngda woto: “Tɩ yãmb yʋʋr yɩ ne waoogre.” (Mat. 6:9) D sã n bʋgsd yʋ-kãseng kãngã zugu, segd n kɩtame tɩ d zoe Wẽnnaam. Yɩɩll 111 gʋlsdã wilga wẽn-zoeer hakɩkã sẽn dat n yɛɛlga. A yeela woto: “Zusoaba zoees yaa yam sɩngre. Neb nins fãa sẽn [tũud a noyã] tara yam sõma.”—Yɩɩl 111:10.
19. Bõe la d na n yã sõsg ning sẽn pʋgdã pʋgẽ?
19 Wẽn-zoeer hakɩkã na n sõnga tõnd tɩ d kisg wẽnga. Na n le sõnga tõnd tɩ d rɩk Wẽnnaam togs-n-taar wa b sẽn wilg Yɩɩll 112 pʋgẽ wã. D na n vaeesa rẽ sõsg ning sẽn pʋgdã pʋgẽ. Yɩɩll 112 wã wilgda d sẽn tõe n maan bũmb ning n paam n naag neb milyõ rãmb nins sẽn na n wa pẽg Wẽnnaam wakat fãa wã. A sɩd segda ne pẽgre. “Bãmb pẽgr na n kaoosa wakat fãa.”—Yɩɩl 111:10.
Y na n leokame tɩ bõe?
• Bõe yĩng tɩ d tog n lagem taab n pẽg a Zeova?
• A Zeova tʋʋmã wilgda bõe a zugu?
• Yãmb tagsg yaa wãn ne y sẽn tar Wẽnnaam yʋʋrã?
[Zãmsgã sogsgã]
[Foto, seb-neng 20]
D sẽn tigimd taab wakat fãa wã yaa sẽn na yɩl n pẽg a Zeova
[Foto, seb-neng 23]
A Zeova noyã fãa zemsa ne bas-yardo