Jehofa o Swanelwa ke Gore re mo Tumiše re le Gotee
Jehofa o Swanelwa ke Gore re mo Tumiše re le Gotee
“Tumišang Jah!”—PS. 111:1, NW.
1, 2. “Haleluya” e ra go re’ng gomme e dirišwa bjang Mangwalong a Bakriste a Segerika?
“HALELUYA!” Polelwana ye e tlwaelegile go kwewa dikerekeng tša bojakane. Batho ba bangwe ba phetha dipoledišano tša bona tša letšatši le letšatši ka polelwana ye. Lega go le bjalo, ke ba sego kae bao ba tsebago bokgethwa bja seo e se bolelago gomme tsela ya go phela ya bontši bja bao ba e dirišago e hlompholla Modimo. (Tito 1:16) Pukuntšu e nngwe ya Beibele e hlalosa gore: “Haleluya, ke lentšu leo le dirišwago ke bangwadi ba fapa-fapanego ba dipsalme go laletša bohle gore ba ba tlatše ge ba reta Jehofa.” Ge e le gabotse, diithuti tše dintši tša Beibele di bolela gore “Haleluya” e ra gore “‘Retang Jah,’ [ke gore] Jehofa.”
2 Ka mo go kwagalago, go New World Translation polelwana e hwetšwago go Psalme 111:1 e fetolelwa ka gore “Tumišang Jah!” Phetolelo ya Segerika ya polelwana ye e tšwelela ka makga a mane go Kutollo 19:1-16 ge go ketekwa go fedišwa ga bodumedi bja maaka. Ge seo se direga, barapedi ba therešo ba tla ba le lebaka le le kgethegilego la go diriša polelwana ya “Haleluya” ka tsela ya tlhompho.
Mediro ya Gagwe e Megolo
3. Morero wa rena o mogolo wa go bokana gotee ka mehla ke ofe?
3 Mohlami wa Psalme 111 o nea mabaka a mantši ao a dirago gore Jehofa a swanelwe gakaakaa ke gore re mo tumiše re le gotee. Temana 1 e re: “A nke ke leboxê Morêna ka pelo ka moka kè le mo pitšong ya ba ba lokilexo, kè le phuthexong.” Dihlatse tša Jehofa lehono di ikwa ka tsela e swanago. Morero wa rena o mogolo wa go bokana ka mehla, diphuthegong tša gabo rena le dikopanong tše dikgolo, ke go tumiša Jehofa.
4. Batho ba ka nyaka mediro ya Jehofa bjang?
4 “Medirô ya Morêna ké e mexolo, e nyakwa ke bohle ba ba e rataxo.” (Ps. 111:2) Ela hloko polelwana e rego “nyakwa.” Go ya ka nyakišišo e nngwe, temana ye e ka šoma go batho bao “ba naganišišago ka mo go tseneletšego le go ithuta” ka mediro ya Modimo. Tlholo ya Jehofa e tletše ka merero e mebotse. O beile letšatši, lefase le ngwedi mafelong a swanetšego, dilo tše ka moka di dirišana gabotse e le gore lefase la rena le ka ba le borutho le seetša, bošego le mosegare, dihla le maphoto a lewatle.
5. Go kwešiša ga motho legohle ka mo go tšwelago pele go utolotše’ng?
5 Bo-rathutamahlale ba lemogile dilo tše dintši mabapi le mo lefase le emego gona tshepedišong ya rena ya setšatši (solar system) gotee le modikologo o phethagetšego, tekanyo le bogolo bja ngwedi wa rena o mogolo. Go rulaganywa le go tswalana ga tlholo ye ya legodimo go dira gore go kgonege go ba le diphetogo tše dibotse tša dihla le tša ka mehla. Le gona, go lemogilwe mo gontši mabapi le go hlangwa ka kelohloko ga matla a tlhago legohleng. Ka baka leo, tabeng yeo e nago le sehlogo se se rego “Legohle le le Hlamilwego ‘ka Mokgwa Woo,’” moprofesara yo e lego moentšeneare wa molokiši o boletše gore: “Go tloga go le bonolo go kwešiša lebaka leo ka lona bo-rathutamahlale ba bantši ba fetošitšego dikgopolo nywageng e 30 e fetilego, ba dumelelana ka gore go nyakega tumelo e kgolo go dumela gore legohle ke selo seo se fetago kgole go fo tšwelela ga dilo ka kotsi. Bohlatse bja gore go na le mohlami yo bohlale bo tia kudu ge re tšwela pele re kwešiša lefase la rena leo le hlamilwego ka kelohloko.”
6. O ikwa bjang mabapi le tsela yeo Modimo a bopilego motho ka yona?
6 Modiro o mongwe o mogolo wa tlholo ke tsela yeo Jehofa a re bopilego ka yona. (Ps. 139:14) Ge a be a bopa batho, o ba neile monagano, mmele wo o nago le ditho ka moka tše di nyakegago le bokgoni le tsebo ya go kgona go šoma. Ka mohlala, go na le mohlolo wa go bolela le go theetša gotee le wa go ngwala le go bala wo o diregilego bokgoning bjo Modimo a bo neilego batho. Batho ba bantši ba na le bokgoni bjoo. Le gona o bopegile ka tsela e makatšago kudu—go kgona go ema ka go otlologa. Ee, tsela yeo mmele wa gago o hlamilwego le go leka-lekana ka yona, go šoma ga wona le dikhemikhale tše di lego go wona, e a makatša. Go feta moo, go tswalana mo go makatšago ga megalatšhika mo go thušago monagano wa gago le dikwi tša gago go šoma di feta kgole seo bo-rathutamahlale ba se hweditšego. Ge e le gabotse, seo batho ba kgonago go se fihlelela ba se kgona ka baka la monagano le dikwi tšeo motho a filwego tšona. Gaešita le moentšeneare yo a tlwaeditšwego kudu le yo a nago le bokgoni o be a ka se kgone go hlama selo le ge e le sefe se sebotse le seo se šomišegago go swana le didirišwa tše di hlamilwego wa go makatša—menwana ya gago. Ipotšiše, ‘Na mediro e kgahlišago ya bokgabo le ya kago e be e ka dirwa ge nkabe go be go sa dirišwe ka bokgoni menwana yeo re e neilwego ke Modimo?’
Mediro e Megolo ya Modimo le Dika tša Gagwe
7. Ke ka baka la’ng re swanetše go lebelela Beibele e le e mengwe ya mediro ya Modimo e megolo?
7 Mediro ya Jehofa e megolo e akaretša dilo tše dingwe tše dibotse tšeo a di diretšego batho, go etša ge go hlalositšwe ka Beibeleng. Puku yeo ka boyona e dumelelana ka tsela e makatšago kudu. Go fapana le puku le ge e le efe e nngwe, ruri e “buduletšwe ke Modimo gomme [e] hola ka go ruta.” (2 Tim. 3:16) Ka mohlala, puku ya pele ya Beibele e lego Genesi, e hlalosa kamoo Modimo a ilego a tloša bokgopo ka gona lefaseng mehleng ya Noa. Puku ya bobedi e lego Ekisodo, e bontšha kamoo Jehofa a ilego a bontšha go ba ga gagwe Modimo ka go phološa Baisiraele bokgobeng kua Egipita. Mohlomongwe mopsalme o be a naganne ka ditiragalo tšeo ge a be a tutueletšega go bolela gore: “Tše [Jehofa] a di diraxo ké bothakxa le borêna; xo loka xa xaxwe xo tiile xo ya xo ile. Ó beile seeletši ka mehlôlô y’axwe Yêna Morêna yo mabobo le yo thlômôxêlô.” (Ps. 111:3, 4) Na ga o dumele gore modiro wa Jehofa go theoša le histori, go akaretša le dilo tšeo di diregilego mehleng ya bophelo bja gago, ke segopotšo sa “bothakxa le borêna” bja gagwe?
8, 9. (a) Mediro ya Modimo e fapana bjang le mediro e mentši ya batho? (b) Ke dika dife tše dingwe tša Modimo tšeo di go kgahlago?
8 Le gona ela hloko gore mopsalme o gatelela dika tše dibotse tša Jehofa, tše bjalo ka toko, botho le kgaugelo. Le wena o a tseba gore ke ka sewelo mediro ya batho ba sebe e dirwago motheong wa toko. Gantši e bontšha megabaru, lehufa le boikgodišo. Seo se bonagala dibetšeng tšeo batho ba di tšweletšago bakeng sa go fenya dintweng tšeo ba di hlohlago le go holega go tša boiphedišo. Tše di baka manyami ao a sa letelwago le bohloko go bahlaselwa ba dimilione bao ba se nago molato. Gape, mediro e mentši yeo batho ba kgonnego go e dira e bile ka baka la ge ba ile ba gatelela badiidi. Mohlala wo ba bantši ba ka o tšweletšago ke wa go dirišwa ga makgoba gore a age diphiramiti. Diphiramiti tšeo di šomišitšwe kudu e le mafelo a go bolokela bo-Farao bao ba ikgogomošago. Go oketša moo, mediro e mentši ya batho ba mehleng yeno e a gatelela e bile e ‘senya lefase.’—Bala Kutollo 11:18.
9 Ruri e tloga e fapane le mediro ya Jehofa, yeo ka mehla e theilwego go seo se lokilego! Mediro ya gagwe e akaretša tokišetšo e bontšhago kgaugelo ya go phološa batho ba sebe. Ka go nea topollo, Modimo o be a ‘bontšha toko.’ (Baroma 3:25, 26) Ka kgonthe, “xo loka xa xaxwe xo tiile xo ya xo ile”! Botho bjona bo bontšhitšwe ka tsela ya go se fele pelo yeo ka yona Modimo a dirišanego le batho ba sebe. Ka dinako tše dingwe, o ile a ba a diriša polelwana e rego “hle” ge a be a ba lopa gore ba tlogele ditsela tša bona tše mpe gomme ba dire se se nepagetšego.—Bala Hesekiele 18:25, PK.
O Botegela Dikholofetšo tša Gagwe
10. Jehofa o beile mohlala ofe wa potego mabapi le kgwerano ya gagwe le Aborahama?
10 “Ba ba mmoifaxo ó ba nea dijô; kxwêranô ya xaxwe a ka se e lebale neng le neng.” (Ps. 111:5) Go bonagala eka mopsalme mo o be a bolela ka kgwerano ya Aborahama. Jehofa o holofeditše gore o tla šegofatša peu ya Aborahama gomme a bolela gore e tla ba beng ba dikgoro tša manaba a yona. (Gen. 22:17, 18; Ps. 105:8, 9) Phethagatšong ya mathomo ya dikholofetšo tšeo, peu ya Aborahama e bile setšhaba sa Isiraele. Setšhaba seo se bile makgoba ka nako e telele kua Egipita, eupša “Modimo ó xopotše kxwêranô ye a e dirilexo le Aborahama” gomme a se phološa. (Ek. 2:24) Tsela yeo Jehofa a ilego a ba swara ka yona ka morago e bontšha kamoo a neago ka seatla se se bulegilego ka gona. O ba neile dijo tša nama bakeng sa mebele ya bona le dijo tša moya bakeng sa menagano le dipelo tša bona. (Doit. 6:1-3; 8:4; Neh. 9:21) Nywaga-kgolong yeo e latetšego ka morago, setšhaba se se be se sa kwe Modimo gantši, gaešita le ge a be a romela baporofeta gore ba se kgothaletše go boela go yena. Nywaga e fetago 1 500 ka morago ga ge a phološitše Baisiraele Egipita, Modimo o ile a romela Morwa wa gagwe yo a tswetšwego a nnoši gore a tle lefaseng. Bontši bja Bajuda ba ile ba gana Jesu gomme ba dumela gore a bolawe. Ke moka Jehofa o ile a bopa setšhaba se sefsa, sa moya, “Isiraele wa Modimo.” Setšhaba seo se le gotee le Kriste se bopa peu ya moya ya Aborahama, yeo Jehofa a boletšego ka yona e sa le pele gore o tla e dirišetša go šegofatša batho.—Bagal. 3:16, 29; 6:16.
11. Jehofa o tšwela pele bjang a ‘gopola kgwerano ya gagwe’ le Aborahama?
11 Jehofa o tšwela pele a ‘gopola kgwerano ya gagwe’ le dikholofetšo tšeo a di holofeditšego ka yona. Lehono, o nea motlalo wa dijo tša moya ka maleme a fetago a 400. Le gona, o tšwela pele a araba dithapelo tša mabapi le dinyakwa tša rena tša nama, ka go dumelelana le mantšu a rego: “Re nee senkgwa sa rena sa letšatši go ya ka senyakwa sa letšatši le.”—Luka 11:3; Ps. 72:16, 17; Jes. 25:6-8.
Matla a Magolo a Jehofa
12. Ke ka tsela efe Isiraele ya bogologolo e ilego ya newa “naxa ya ba-ntlê”?
12 “Matla a ’tirô tša xaxwe ó a utolletše ’thšaba sa xaxwe, mola à se nea naxa ya ba-ntlê.” (Ps. 111:6) Tiragalo e nngwe ye e kgahlišago historing ya Baisiraele yeo mopsalme mohlomongwe a bego a naganne ka yona e be e le go phološwa ga bona Egipita ka mohlolo. Ge mafelelong Jehofa a be a dumelela Baisiraele go tsena Nageng ya Kholofetšo, ba ile ba kgona go fenya mebušo ya ka thoko ya bohlabela le bodikela ya Noka ya Jorodane. (Bala Nehemia 9:22-25.) Ee, Jehofa o ile a nea Isiraele “naxa ya ba-ntlê.” A pontšho e kgolo gakaakang ya matla a Modimo!
13, 14. (a) Ke ponagatšo efe ya matla a Modimo mabapi le Babilona yeo mopsalme a bego a naganne ka yona? (b) Ke ditiro dife tše dikgolo tše di oketšegilego tša go phološa tšeo Jehofa a di bontšhitšego?
13 Lega go le bjalo, re lemoga gore go sa šetšwe seo Jehofa a ilego a ba direla sona, Baisiraele ga se ba ka ba mmontšha tlhompho goba go hlompha bagologolo ba bona e lego Aborahama, Isaka le Jakobo. Ba ile ba tšwela pele ba rabela go fihlela ge Modimo a dumelela Babilona e ba tloša, e ba iša bothopša. (2 Kor. 36:15-17; Neh. 9:28-30) Ge e ba mohlami wa Psalme 111 a phetše ka morago ga ge Isiraele e boile bothopša Babilona, go etša ge diithuti tše dingwe tša Beibele di bontšha, o be a sa dutše a e-na le mabaka a oketšegilego a go tumiša Jehofa ka baka la potego le matla a Gagwe. Modimo o bontšhitše se ka go phološa Bajuda go tšwa Babilona—mmušo wo o sa lokollego mathopša.—Jes. 14:4, 17.
14 Nywaga-kgolo e ka bago e mehlano ka morago, Jehofa o ile a diriša matla a gagwe ka tsela e matla kudu ka go phološa batho ba ba itsholago bothopšeng bja sebe le lehu. (Baroma 5:12) A mangwe a mafelelo e bile gore batho ba 144- 000 ba ile ba bulegelwa ke tsela ya gore e be balatedi ba Kriste bao ba tloditšwego ka moya. Ka 1919, Jehofa o ile a diriša matla a gagwe go phološa mašaledi a a manyenyane a batlotšwa bothopšeng bja bodumedi bja maaka. Seo ba se fihleletšego mehleng ye ya mafelelo se kgonega feela ka matla a Modimo. Ka go botega go fihla lehung, ba tla buša lefase gotee le Jesu Kriste ba le legodimong gore go holege batho ba ba sokologilego. (Kut. 2:26, 27; 5:9, 10) Ba tla ja bohwa bja lefase ka tekanyo e kgolo go feta kamoo Baisiraele ba bogologolo ba ilego ba bo thabela ka gona.—Mat. 5:5.
Melao ya Motheo e Botegago ya ka mo go sa Felego
15, 16. (a) Ke’ng seo se akaretšwago go e mengwe ya mediro ya diatla tša Modimo? (b) Modimo o neile Baisiraele ba bogologolo ditaelo dife?
15 “Medirô ya ’atla tša xaxwe ké therešô le xo loka; ’taêlô tša xaxo ké tše di bôtêxaxo. Ké tše di tiilexo tša mehla e sa felexo; di dirwa ka pôtêxô le xo ila sebe.” (Ps. 111:7, 8) Gare ga “medirô ya ’atla tša [Jehofa]” go be go e-na le mafsika a mabedi ao a bego a ngwadilwe melao ya bohlokwa bakeng sa Isiraele. (Ek. 31:18) Melao ye, gotee le ditaelo tše dingwe ka moka tšeo e tlilego ya ba karolo ya kgwerano ya Molao wa Moše di theilwe melaong ya motheo e botegago le ya ka mo go sa felego.
16 Ka mohlala, taelo e nngwe ya molao yeo e bego e le mafsikeng e be e re: “Nna Morêna Modimo wa xaxo ke Modimo yo [“a nyakago boineelo bjo bo feletšego,” NW].” E tšwela pele go bontšha gore Jehofa “ba ba hlôkômêlaxo melaô [ya gagwe o] ba dira ka botho xo iša melokong e sekete.” Diphaphathi tša mafsika di be di hupere gape le melao ya motheo e bjalo ka o rego “xodiša tat’axo le mm’axo” le “o se kê wa utswa,” gotee le molao o kwagalago kudu wo o lego kgahlanong le go duma dilo tša ba bangwe.—Ek. 20:5, 6, 12, 15, 17.
Mophološi wa Rena yo Mokgethwa le yo a Šiišago
17. Baisiraele ba be ba swanetše go swara leina la Modimo e le le lekgethwa ka baka la mabaka afe?
17 “Sethšaba sa xaxwe ó se rometše topollô; kxwêranô ya xaxwe ó e beetše mehla e sa felexo; leina la xaxwe ké le lekxêthwa le le šiišaxo.” (Ps. 111:9) Gape, mopsalme a ka ba a be a naganne ka go botegela ga Jehofa kholofetšo ya gagwe ya kgwerano ya Aborahama. Ka go dumelelana le seo, Jehofa ga se a ka a lahla batho ba gagwe mathomong e le makgoba a Egipita gomme ka morago e le mathopša kua Babilona. Maemong ka bobedi, Modimo o ile a phološa batho ba gagwe. Gaešita le ditiragalong tšeo tše pedi feela, Baisiraele ba be ba swanetše go swara leina la Modimo e le le lekgethwa.—Bala Ekisodo 20:7; Baroma 2:23, 24.
18. Ke ka baka la’ng o nagana gore go bitšwa ka leina la Modimo ke tokelo?
18 Go bjalo le ka Bakriste lehono, bao ba lokolotšwego bokgobeng bja sebe le lehu bjo go bjona go se nago kholofelo. Re swanetše go dira sohle seo re ka se kgonago go phela ka go dumelelana le kgopelo ya pele thapelong ya mohlala e rego: “Leina la gago a le kgethagatšwe.” (Mat. 6:9) Go naganišiša ka leina leo la letago go swanetše go dira gore re boife Modimo. Mongwadi wa Psalme 111 o be a e-na le pono e nepagetšego mabapi le go boifa Modimo ge a be a bolela gore: “Xo boifa Morêna ké mathômô a bohlale; tsebô e botse ké ya bohle ba diraxo byalo [bao ba bolokago ditaelo tša gagwe].”—Ps. 111:10.
19. Ke’ng seo re tlago go se ahla-ahla sehlogong se se latelago?
19 Go boifa Modimo ka mo go swanetšego go tla re thuša go hloya se sebe. Go tla re thuša gape gore re ekiše dika tše dibotse tša Modimo go etša ge go bontšhitšwe go Psalme 112, yeo re tlago go e ahla-ahla sehlogong se se latelago. Psalme yeo e bontšha kamoo re ka swanelegago ka gona go ba gare ga batho ba dimilione bao ba tla thabelago go tumiša Modimo ka mo go sa felego. O swanelwa ke seo se fetago seo kgole. “Thêtô ya xaxwe e tiile ka xo sa felexo.”—Ps. 111:10.
Dipotšišo Bakeng sa go Naganišiša
• Ke ka baka la’ng Jehofa a swanelwa ke gore re mo tumiše re le gotee?
• Ke dika dife tša Jehofa tšeo di bonagalago medirong ya gaglwe?
• O lebelela bjang tokelo ya go bitšwa ka leina la Modimo?
[Dipotšišo tša Thuto]
[Seswantšho go letlakala 20]
Morero wa rena o mogolo wa go bokana ka mehla ke go tumiša Jehofa
[Seswantšho go letlakala 23]
Melao ya Jehofa ka moka e theilwe melaong ya motheo ya ka mo go sa felego le e botegago