Kanepegan nen Jehova so Panangidayew Tayon Amin

“Idayew yo si Jehova.”​—SAL. 111:1.

1, 2. Anto so ipapaseseg ed totoo na saramay nansulat ed nanduruman salmo, tan panon itan a nausar ed Kristianon Griegon Kasulatan?

“ALELUYA!” Kaslakan lan narerengel iyan ikekelyaw diad saray simbaan na Kakristianoan. Walaray totoon ginawa da la iyan ekspresyon. Balet, daiset labat so makaamta ed sagradon kabaliksan na satan, tan say kabibilay na dakel ed saramay mangibabalikas ed satan et agmamapagalang ed Dios. (Tito 1:16) Unong ed sakey a diksionaryo na Biblia, “Say Aleluya [odino Hallelujah] et inusar na saramay nansulat ed nanduruman salmo pian pasesegen so amin a mikasakey ed sikaran mangidayew ed si Jehova.” Diad tua, pigaran iskolar ed Biblia so mangibabagan say “Aleluya” odino “Hallelujah” et mankabaliksan a “‘Dayewen si Jah,’ [salanti,] si Jehova.”

² Kanian diad Pangasinan a Biblia a PBS, sayan salita a naromog ed Salmo 111:1 et impatalos ya “Idayew yo si Jehova.” Diad Griego, sayan balikas et amipat a nausar ed Apocalipsis 19:1-6 diad impangikelyaw na liket ed inkagbay palson relihyon. Sano nagawa la itan, saray tuan managdayew et nawalaan na nikadkaduman rason pian ibalikas so “Aleluya” ed mapagalang a paraan.

Saray Makapadinayew a Gawa To

3. Anto so manunan gagala na regular a pantitipon tayo?

³ Say nansulat ed Salmo 111 et angiter na dakel a rason no akin a kanepegan nen Jehova so panangidayew tayon amin. Oniay ibabaga na bersikulo 1: “Misalamat ak ed Jehova ed sankabukel a pusok, dia ed duypo na maptek tan ed muyongan.” Ontan met so nalilikna na saray Tasi nen Jehova natan. Say manunan gagala na regular a pantitipon tayo, diad kongregasyon tan diad angkakabaleg iran kombension, et pian idayew si Jehova.

4. Panon a ‘naanap’ na totoo iray gawa nen Jehova?

⁴ “Saray gawagawa nen Jehova angkabaleg ira a gawa, aanapen na amin a wala so pankalike’to ed sikara.” (Sal. 111:2) Imanoen pay balikas ya “aanapen.” Unong ed sakey a reperensya, sayan bersikulo et nayarin onaplika ed saray totoon “masimoon tan seryoso dan dadalepdepen tan aaralen” iray gawa na Dios. Saray palsa nen Jehova et daakan ed alay-abig iran gagala. Inlira to so agew, dalin, tan bulan ed mauk-uksoy a paraan, pian say planeta tayo et nawalaan na petang tan liwawa, labi tan agew, saray tiempo, kati tan etab.

5. Anto so ombibitar legan ya onaaralem so pakatalos na too nipaakar ed uniberso?

⁵ Dakdakel so adiskobre na saray sientista nipaakar ed posisyon na dalin diad solar system, ontan met ed dugarugan kabaleg, kabelat, tan tetelekan na baleg a bulan tayo. Lapud inkauksoy tan pansisiglaotan na planetan dalin, agew, tan bulan, balibali tan regular so pansasalat na saray tiempo. Ontan met, dakel lay naaralan nipaakar ed susto-suston  inkabalanse na saray natural a puersa ed uniberso. Kanian, diad artikulon apauloan na “The Designed ‘Just So’ Universe (Susto-suston Inkadesinyo na Uniberso),” et oniay naobserbaan na sakey a propesor na mechanical engineering: “Magmainomay a natalosan no akin ya anguman so panagnonot na amayamay a sientista diad apalabas a 30 taon, ya onaabobon la ran agaylay irap a panisiaan a say inkiwala na uniberso et nibanbana labat. Legan ya onaaralem so pakatalos tayo ed maal-alwar ya inkagawa na planetan dalin, mas ondarakel so rason tayo pian manisian walay sakey a marundunong a desinyador.”

6. Antoy naliliknam ed paraan na impanggawa na Dios ed too?

⁶ Say sakey nin makapadinayew ed impamalsa et say paraan na impanggawa na Dios ed sikatayo. (Sal. 139:14) Sanen pinalsa na Dios so too, sikatoy inikdan to na isip, laman a kompleto ed organo, tan say abilidad a makapankimey. Singa bilang, makapakelaw so inter na Dios ya abilidad a pakapansalita tan pakadngel, pati say pakapansulat tan pakapambasa. Dakel so toon walaan na ontan ya abilidad. Alay abig so inkagawa na laman mo, a sarag moy onalagey a maptek. Ontan met makapadinayew so inkadesinyo na laman mo, say abilidad ton onggalaw tan mankimey, pati say kemikal a proseso to, a singa say panguusar toy naakan pian makapamawalay enerhiya. Sakey ni, agbalot naparaan na antokaman ya agawaan na saray sientista so makapakelkelaw a pankokonektaan na nerbyo a mamapagana ed utek tan saray pakalikna tayo. Diad tua, anggapoy nagawaan na too no agnaikdan na isip tan pakalikna. Anggan say sanka-maabilidaran tan atali-tali lan enhinyero et agmakapamawala na bengatlan singa karakep tan inkamausar na saray gamet tayo a makapadindinayew so inkadesinyo to. Tepetan mo pay inkasika, ‘Nagawaan kasi iray makapadindinayew a produkto na art tan saray istruktura no aliwan diad marundunong ya impangusar ed saray liman inter na Dios?’

Saray Makapadindinayew a Gawa tan Kalidad na Dios

7. Akin et nepeg tayon moriaen so Biblia bilang sakey ed saray makapadindinayew a gawa na Dios?

⁷ Kaiba’d saray makapadindinayew a gawa nen Jehova et saray alay-abig a ginawa to parad katooan, ya indeskribe ed Biblia. Mismon say Biblia et sakey lan obra maestra lapud pantutunosan na saray lugan to. Aliwan singa arum a libro, satan et “impuyan na Dios [tan] maabig a pakaaralan.” (2 Tim. 3:16) Singa bilang, say unonan libro na Biblia a Genesis so mangipapaliwawa no panon ya inekal na Dios so kaugsan diad dalin nen panaon nen Noe. Say komaduan libro ya Exodo et mangipapanengneng ya inyalangon nen Jehova so inka-Dios to diad impangiliktar to’d saray Israelita manlapud impangaripen na saray Ehipsio. Mapatnag a sankanonot iratan na salmista sanen sikatoy apakiwas a mangikuan: “Say gawa [nen Jehova] gagalangen tan katageyan, tan say inkatunong to maando lawas. Sikato ginawa to so saray makapakelkelaw a gawagawa to a nodnonoten. Si Jehova mapalangkap tan napno na panangabagey.” (Sal. 111:3, 4) Agta onabobon ka a saray kimey nen Jehova diad interon awaran, kaiba la ray ginawa to’d panaon a pambibilayan mo, et sakey a pakanodnonotan na ‘kagalangan tan katagyan’ to?

8, 9. (a) Diad antoran paraan a midumaan so gawa na Dios ed maslak a gawa na katooan? (b) Antoran kalidad na Dios so aapresyaen mo?

⁸ Imanoen ya indanet met na salmista iray alay-abig a kalidad nen Jehova, a singa say inkatunong, kaabigay linawa, tan inkamapangasi. Antam a maslak ed saray gawa na makasalanan a katooan et resulta na inkaagum, ibeg, tan inkamapaatagey, tan matalag so lapud inkatunong. Sankapatnagan itan ed saray makapataktakot ya armas a papawalaen na saray totoo pian usaren ed saray guerran isusugsog da tan pian onaligwas so ekonomya ra. Saraya et mangitatarok na sobran irap tan kebbiew ed minilyon ya inosentin biktima. Ontan met, dakel a gawa na katooan so nanresulta’d paniirap na saray nalalames a duruka. Say sakey ya alimbawa a nayarin pamilyar ed dakel et say impangusar ed saray aripen pian ipaalagey iramay piramid a manunan uusaren bilang ponponan na saray matangsit a Faraon. Niarum ni, maslak a gawa na katooan natan et aglabat mamapairap noagta ‘mamabagbag met ed dalin.’​—Basaen so Apocalipsis 11:18.

⁹ Talagan misunian itan ed saray gawa nen  Jehova, a lawas akabase ed no antoy duga tan matunong! Kalaktip ed saray gawa to so mapangasin probisyon parad kiliktar na makasalanan a katooan. Diad impangitarya toy dondon, say Dios so ‘angipatnag na inkatunong to.’ (Roma 3:25, 26) On, “say inkatunong to maando lawas”! No nipaakar ed kaabigay linawa, nipatnag itan diad maan-anos ya impideneng na Dios ed makasalanan a katooan. Wala ni ingey pankanawnawa a sikatoy akikasi ed sikaran umanen day mauges iran kagagawa ra tan gawaen day duga.​—Basaen so Ezequiel 18:25.

Matoor ed Sipasipan To

10. Anton ehemplo na katooran so impanengneng nen Jehova nipaakar ed sipan to ed kinen Abraham?

¹⁰ “Sikato angiter na tagano [ed] saray ontakot ed sikato. Sikato mannonot lawas ed sipan to.” (Sal. 111:5) Mapatnag a say tutukoyen dia na salmista et say Abrahamikon sipanan. Insipan nen Jehova a bendisyonan toy bini nen Abraham tan inkuan Ton kayarianen da so wangalan na saray kakabusol da. (Gen. 22:17, 18; Sal. 105:8, 9) Sarayan sipan et primeron asumpal sanen say bini nen Abraham et nagmaliw a nasyon na Israel. Sayan nasyon et abayag ya inaripen na Ehipto, balet “say Dios ninonot to so sipan to ed kinen Abraham” tan inliktar to ra. (Exo. 2:24) Ipapanengneng na sinmaginonor iran paraan na impantrato nen Jehova ed sikara a talagan sikatoy mabunlok. Intaryaan to ra na materyal tan espiritual a tagano pian onkasil ira ed pisikal tan natumbok da iray estandarte to. (Deu. 6:1-3; 8:4; Neh. 9:21) Diad tinmutumbok iran siglo, mabetbet ya agda uunoren so Dios, anggaman sikatoy angibaki na saray propeta pian pasesegen iran ompawil. Masulok a 1,500 a taon kayari ton inliktar iray Israelita manlapud Ehipto, imbaki na Dios so bogbogtong ya Anak to diad dalin. Balet, si Jesus so impulisay na maslak ed saray Judio tan inabuloyan dan napapatey. Insan angiletneg si Jehova na balon nasyon, sakey ya espiritual, salanti, say “Israel na Dios.” Sayan nasyon so kaiba nen Kristo a manugyop ed espiritual a bini nen Abraham, ya impasakbay nen Jehova ya usaren to ed pamendisyon na katooan.​—Gal. 3:16, 29; 6:16.

11. Panon a siansia nin ‘sankanonot nen Jehova so sipan to’ ed kinen Abraham?

¹¹ Siansia nin ‘sankanonot nen Jehova so sipan to’ tan saray bendisyon ya itarok na satan. Diad panaon tayo, sikatoy mangitatarya na agnasabaan a suplay na espiritual a tagano ed masulok a 400 a lenguahe. Ontan met, mantutultuloy ton eebatan iray pikakasi tayo nipaakar ed materyal a pankaukolan tayo, bilang pitunosan ed saray balikas ya: “Iter mo ed sikami komon ya agew-agew so kanen mi ya inagew-agew.”​—Luc. 11:3; Sal. 72:16, 17; Isa. 25:6-8.

Say Makapadindinayew a Pakapanyari nen Jehova

12. Panon ya inter ed kadaanan ya Israel so “tawir na saray nasyon”?

¹² “Sikato impanengneng to ed katooan to so kaksilan [odino pakapanyari] na saray gawagawa to, pian niiter to ed sikara so tawir na saray nasyon.” (Sal. 111:6) Say sakey a nikadkaduman inkagawa ed awaran na Israel a nayarin walad nonot na salmista et samay mamilagron inkiliktar da ed Ehipto. Sanen inabuloyan la nen Jehova ya onloob iray Israelita ed Insipan a Dalin, asakop da iray panarian diad banda’d bukig tan sagur na Ilog Jordan. (Basaen so Nehemias 9:22-25.) On, inter nen Jehova ed Israel so “tawir na saray nasyon.” Agaylan panangipatnag na pakapanyari Dios!

13, 14. (a) No nipaakar ed Babilonia, anton panangipatnag ed pakapanyari na Dios so nayarin walad nonot na salmista? (b) Anto ni ran makapadindinayew a gawa na panangiliktar so ginawa nen Jehova?

¹³ Balet, anggaman dakdakel lay agawaan nen Jehova parad Israel, amta tayon agda met lanlamang inikdan na respeto so Dios, ni saray inmunan atateng dan si Abraham, Isaac, tan si Jacob. Nantultuloy iran nanrebelde anggad inusar na Dios so Babilonia pian paekalen ira ed dalin da tan nadakep ira. (2 Awa. 36:15-17; Neh. 9:28-30) Unong ed pigaran iskolar na Biblia, no samay nansulat ed Salmo 111 et nambilay sanen akapawil lay Israel manlapud impakautibo ra’d Babilonia, wala ni kaaruman a rason to pian idayew si Jehova lapud inkamatoor tan pakapanyari To. Impanengneng nen Jehova iratan a kalidad diad  impangiliktar to’d saray Judio manlapud Babilonia, sakey ya empiryon walaan na ley ya ag-ibulos iray kautibo to.​—Isa. 14:4, 17.

¹⁴ Manga limaran siglo ed saginonor, inusar nen Jehova so pakapanyari to ed mas matalonggaring nin paraan diad impangiliktar to’d saray katooan manlapud inkaaripen da’d kasalanan tan ipapatey. (Roma 5:12) Sakey ed saray resulta et alukasan so dalan pian saray 144,000 a katooan et magmaliw a nilanaan na espiritun papatumbok nen Kristo. Nen 1919, inusar nen Jehova so pakapanyari to pian ibulos so pigaran nakdaan na sarayan alanaan manlapud impakautibo ra ed palson relihyon. Saray kimey da legan na sayan panaon na anggaan et agda nagawaan no aliwan lapud pakapanyari na Dios. Sano manmatoor ira anggad patey, kaiba ira nen Jesu-Kristo a manuley ed tawen tan magmaliw dan sakop so dalin parad pakagunggonaan na magbabawin katooan. (Apo. 2:26, 27; 5:9, 10) Kanian tawiren da so dalin diad mas matalonggaring a paraan, no ikompara ed kadaanan ya Israel.​—Mat. 5:5.

Agnanaumas, Napanmatalkan Iran Prinsipyo

15, 16. (a) Antoray kaiba ed saray gawa na limay Dios? (b) Antoran ganggan so inter na Dios ed kadaanan ya Israel?

¹⁵ “Saray gawagawa na limalima to katuaan tan panangitunong ira; amin na saray ganggan to malet [odino napanmatalkan] ira; Mansiansia ra lawas lan lawas, agawa ra ed katuaan tan kaptekan.” (Sal. 111:7, 8) Kaiba’d saray ‘gawa na limalima nen Jehova’ et say duaran piraso na bato ya akaukitan na samploran importantin ganggan ed Israel. (Exo. 31:18) Sarayan ganggan, laktip lay amin a totontonen a nagmaliw a kabiangan na Ganggan a sipanan, et akabase ed agnanaumas tan napanmatalkan iran prinsipyo.

¹⁶ Singa bilang, oniay inkuan na sakey a ganggan ya akaukit ed saraman a bato: “Siak si Jehova a Dios mo a sakey ak a maimon a Dios.” Inyarum ni na satan a si Jehova et mangipatnag na “panangasi dia ed [“komasanlibon henerasyon,” NW] ed saray mangaro ed [sikato], tan mangunor na saray ganggan [to].” Akasulat met ed saraman a bato iray agnanaumas a prinsipyo a singa say “galangen mo so amam tan inam” tan “agka mantakew,” ontan met ed samay ganggan sumpad siaagum a panibeg ed kayarian na arum, a pakapatnagay aralem a pakatalos.​—Exo. 20:5, 6, 12, 15, 17.

Mananondon a Masanto tan Makanepegay Takot

17. Antoray rason na saray Israelita pian tratoen a masanto so ngaran na Dios?

¹⁷ “Sikato angipawit na karondon ed saray katooan to. Ginanggan to so sipan to a mansiansia lawas. Masanto tan [“makanepegay takot,” NW] so ngaran to.” (Sal. 111:9) Nayarin say sankanonot  lamet dia na salmista et say inkamatoor nen Jehova ed samay sipan to’d kinen Abraham. Mitunosan ed satan, agpinaulyan nen Jehova so totoo to, unona diad inkaaripen da’d Ehipto insan diad saginonor et diad inkibantak da’d Babilonia. Diad parehon pankanawnawa et dinondon na Dios so totoo to. Anggano sarayan dua labat komon so ninodnonot da, et magenap lan rason pian tratoen dan masanto so ngaran na Dios.​—Basaen so Exodo 20:7; Roma 2:23, 24.

18. Akin ya ipapasen mon pribilehyo so pangakbibit ed ngaran na Dios?

¹⁸ Say ngaran na Dios et nepeg met a tratoen a masanto na saray tuan Kristiano natan, a dinondon ed andiay ilalon inkaaripen ed kasalanan tan ipapatey. Nepeg tayon gawaen so anggaay nayarian tayon manbilay unong ed samay unonan kerew a walad modelon pikakasi: “Nagalang komon so ngaran mo.” (Mat. 6:9) Say pandalepdep ed satan a maglorian ngaran et nepeg ya ontulong ed sikatayon nawalaan na takot ed Dios. Duga so panmoria na samay nansulat ed Salmo 111 nipaakar ed takot ed Dios, ya inkuan to: “Say katatakot ed Jehova sikato so sengeg na kakabatan. Sakey a maong a pakatalos so wala ed saray amin a mangunor na saray ganggan [to].”​—Sal. 111:10.

19. Anto so pantongtongan tayo ed onsublay ya artikulo?

¹⁹ Say takot ed Dios et ontulong ed sikatayon gulaen so mauges. Ontulong met itan pian naalig tayo iray alay-abig a kalidad to unong ya ipapanengneng na Salmo 112, a pantongtongan tayo’d onsublay ya artikulo. Ipapabitar na satan a salmo no panon itayon onkualipika pian magmaliw a kabiangan na saramay minilyon a manggayaga ed magnayon a pangidayew ed Dios. On, talagan kanepegan to itan. “Say dayew to maando lawas.”​—Sal. 111:10.

Saray Tepet a Dalepdepen

• Akin et kanepegan nen Jehova so panangidayew tayon amin?

• Antoray kalidad nen Jehova a nipabitar ed saray gawa to?

• Panoy pangipapasen mo ed pribilehyon pangakbibit ed ngaran na Dios?

[Tepetepet Parad Panagaral]

[Litrato ed pahina 20]

Say manunan gagala na regular a pantitipon tayo et pian idayew si Jehova

[Litrato ed pahina 23]

Amin a ganggan nen Jehova et akabase ed agnanaumas tan napanmatalkan iran prinsipyo