Jehovätaqa llapantsikmi alabanantsik
Jehovätaqa llapantsikmi alabanantsik
“¡Alabayë Jähta!” (SAL. 111:1.)
1, 2. ¿Ima ninantaq “aleluya” hebreu idiömachö? b) ¿Imapaq parlartaq Escrituras Griegas nishqanqa “aleluya” palabrata churan?
“¡ALELUYA!” Kë palabrataqa wiyantsik tukïläya iglesiakunachömi. Wakinqa hasta cada hunaq parlakïninkunachöpis “Aleluya” niyanmi, tsënö nirpis wakinqa manam musyayantsu alläpa sagrado kanqanta ni ima ninan kanqantapis. Y wakinqa “Aleluya” nirnimpis kawakïninkunachöqa Diosta mana respetayanqantam rikätsikuyan (Titu 1:16). Bibliapita más musyanapaq huk diccionariom kënö nin: “Kë palabra ‘aleluya’ nishqanwanqa Bibliata qellqaqkunaqa invitayan nunakuna pëkunawan paqta Diosta alabayänampaqmi”. Y Bibliata estudiaq nunakunanam niyan kë “aleluya” palabraqa, “alabayë Jähta” o alabayë Jehoväta ninan kanqanta.
2 Tsëmi Salmo 111:1 nishqanchöqa Traducción del Nuevo Mundo nishqan Bibliaqa rikätsimantsik “¡Alabayë Jähta!” nishpa. Hinamampis Griegu idiömachö Bibliata qellqayanqanchöqa Apocalipsis 19:1-6 nishqanchöqa chusku kutim yurin kë “Aleluya” palabra, mana alli religionkuna ushakäriptin cantayanqampaq parlar. Tsë mana alli religión ushakäriptinmi Diospa sirveqninkuna kushikïwan sinchipa cantayanqa “¡Aleluya!” nishpa.
Jehová Diospa rurëninkuna
3. ¿Imarëkurtaq seguido ëllukantsik o qorikantsik?
3 Salmo 111 nishqanta qellqaq salmistaqa rikätsimantsik Jehová Dioslla alabashqa kanantam. Versículo 1 nishqanmi kënö nin: “Llapan shonqüwanmi Jehoväta alabashaq. Atska nunapa chöpinchömi Teyta Diosta gracias nishaq”. Kanan tiempochöpis Jehoväpa testïgonkunaqa salmista nenqannömi rurantsik. Awmi, Jehová Diosta alabanapaqmi ëllukantsik o qorikantsik reunionkunachö y asambleakunachöpis.
4. ¿Imanötaq Jehová kamanqankunapita más musyashwan?
4 “Jehová ruranqanqa alläpa shumaqmi. Tsëkunata kuyaq kaqkunam ashiyan y kushikuyan” (Sal. 111:2). ¿Tantearqonkiku “tsëkunata kuyaq kaqkunam ashiyan” nenqanta? Huk libro willakonqannöpis, kë versïculoqa parlan Diosnintsik kamanqankuna imanöpis kanqanta musyëta munar tsëkunaman yarpakachaq kaqkunapaqmi. Jehová kamanqankunataqa manam yupëtapis puëdentsiktsu, pero tsë llapanqa yanapamantsik kawanapaqmi. Pëqa preciso sitionmanmi patsätsishqa Killata, Patsata, Intita o Rupaytapis, kë Patsachö täraqkunata shumaq qoñütsinampaq y aktsipänampaq, tsënöpa paqaspis hunaqpis kanampaq. Hina tamya tiempo, wëta tiempo, cosecha tiempo y usya tiempo kanampaqpis shumaqmi llapanta patsätsishqa Diosnintsikqa.
5. ¿Diosnintsik kamanqankunata estudiaq nunakuna imapitataq cuentata qokuyashqa?
5 Cientïficokunaqa allipam yachakuyashqa, kë Patsa mana kaqllachö këkar Inti [Rupay] kuchumpa hiruroq tumanampaq shumaq kamakätsishqa kanqanqa alläpa preciso kawanapaq kanqanta. Hina Killa imanö kanqan y tamäñompis alläpa preciso kanqantam yachakuyashqa. Kënö shumaq patsätsishqa kanqampitaraqmi, tamya tiempo, wëta tiempo, cosecha tiempo y usya tiempopis kan. Hinamampis cada hunaqmi más yachakuntsik ciëlochö llapan ruranqankuna mana kaqchö këkar imanö takyakonqantapis. Hina ciëlochö Diosnintsik llapan kamanqampaq parlarninmi huk ingeniero profesor kënö nerqan: “Kananqa fácil-llanam musyarintsik kë kima chunka watakuna pasakonqanchöqa cientïficokuna imanöpa hukta hukta niyanqanta, y pëkunaqa cuentatam qokuyashqa kë imëkakunapis kikinllapita kamakashqa kanqanman creiyanampaqqa atska fëtaraq wanayanqanta. Kë täranqantsik patsa imanö kanqantapis más musyarninmi, creintsik kë llapampis huk kamaq kaptinraq kanqanta”.
6. ¿Imataq ninki Diosnintsik alläpa shumaqta nunata ruranqampita?
6 Hina Jehová Diospa huk shumaq kamanqanqa nunam kantsik (Sal. 139:14). Nunata kamarninqa juicionmi qorqan imatapis alli pensanampaq, y llapan cuerpontapis shumaqmi rurarqan alli funcionanampaq, tsë llapanwan imëkata ruranampaq. Hina parlanantsikpaq, wiyanantsikpaq, y leita y qellqëtapis yachakïta puëdenantsikpaqpis shumaq qarënintsikmi Diosnintsikqa qomashqantsik. Casi llapan nunakunam tsëkunata rurëta puëdeyan. Hina Jehová yachaq kanqantaqa rikantsik, cuerpontsikcho llapan tulluntsikkuna derecho y shëkar purinantsikpaq kamakätsishqa kanqanchömi. Shumaq takyakunampaq, kuyïkachänampaq, y imanö rurashqa kanqan y kallpata tarinapaq mikïraq yanapamanqantsikmi alläpa kushikïpaq, ¡këtaqa Diosmi rurashqa! Cuerpontsikchöqa nerviokunam kan peqantsik o umantsik pensanqanta cuerpontsik ruranampaq, tsëraqmi yanapamantsik rikänapaq, muskinapaq, mishkeqta o pochqoqta tanteanapaq, y imatapis yatar tanteanapaq, këwanqa, cientïficokuna imëkata rurayanqampis manam igualantsu. Kënö kanapaq Jehová ruramashqantsik kaptinmi nunakuna imëkatapis rurayashqa. Manam ni más alli kaq ingenierokunapis makichö dëdokunatanö imëkata rurëta puëdeqtaqa rurakätsiyanmantsu. Tapukuri, ¿nunaqa ruranmantsuraq tukï rikoq mäkinakunata Diosnintsik dëdoyoqta mana kamamashqantsik kaptenqa?
Alläpa shumaqmi Jehová imanö kanqan y rurëninkunapis
7. ¿Imanirtaq Jehová Diospa alläpa shumaq qarëninmi nintsik Palabran Bibliapaq?
7 Hina Palabran Bibliapis huk shumaq qarëmi llapan nunakunapaq. Y manam ni mëqan libronkunapis contranakuntsu llapampis shumaq patsätsishqam y Diosnintsikpa munënin rurakänanllapaqmi parlan. Nunakuna qellqayanqan librokunapita alläpa hukläyam “porqui Teyta Diospa palabranqa quiquinpitam shamun, y allim yachatsicunantsicpaq” (2 Tim. 3:16). Más musyarinapaq, qallanan kaq Génesis librochömi willamantsik, kë Patsa limpio quedanampaq Noëpa tiemponchö mana alli nunakunata Diosnintsik ushakätsenqanta. Qateqnin kaq Éxodo nishqan librochönam willamantsik, Egiptochö markan esclavo këkaqta Diosnintsik horqamonqanta, y tsënöpa Pëlla llapan puëdeq Kamakoq Yaya kanqanta rikätsikonqanta. Salmistaqa këkunamanchi yarparëkarqan kënö cantanqanta qellqanampaq: “Rurashqankunaqa alläpa shumaqmi, alli rurëninqa manam ushakantsu. Pëqa llapantapis Pëman yarpänapaqmi kamashqa. Jehoväqa llakipäkoq y kuyapäkoqmi” (Sal. 111:3, 4). Awmi, Jehová qallanampita patsë kamanqanqa rikätsimantsik y yarpätsimantsik pëlla respetashqa y alabashqa kanantam.
8, 9. a) ¿Imanirtaq nunakuna rurayanqampita Jehová ruranqanqa alläpa hukläya? b) ¿Jehová Diospa imanö kënintaq qamtaqa más gustashunki?
8 Hina salmistaqa rikätsimantsik Jehová Diospa alli këninta, qarakoq këninta y llakipäkoq kënintam. Alleqmi musyantsik nunaqa codicioso karnin imatapis kikimpa munëninllata ruranqanta. Tsëtaqa rikantsik nunamayinkunata wanutsiyänampaq tukïläya armakunata rurar ricoyayänampaq rantikuyanqanchömi. Y musyanqantsiknöpis tsë guerrakunaqa alläpa llakikïta y hipakïtam apamushqa inocente nunakunapaq. Hina waktsa nunakunata esclävotanö trabajatsirmi imëkatapis rurayashqa. Maslla tantearkunapaq, unë tiempo Egipto markachöqa waktsa nunakunatam esclävotanö trabajatsiyarqan hatusaq nïchokunata ruratsir, tsëman mandakoq faraonkuna wanuptin pampayänampaq. Kanan tiempopis nunapa wakin rurëninkunaqa pasëpa mana allillam, manam nuna mayinllatatsu hipatsin, sinöqa hasta kë patsatapis rakchatarninmi limpu ushakätsikïkäyan (lei Apocalipsis 11:18).
9 ¡Pero Jehová Dios ruranqanqa alläpa hukläyam! Pëqa imatapis kuyakïwanmi ruran. Huk shumaq rurëninqa Tsurinta noqantsikrëkur wanunampaq kachamonqanmi. Këwanmi rikätsikorqan alli y kuyakoq kanqanta (Rom. 3:25, 26). Awmi, Pëpa alli rurëninqa manam imëpis ushakanqatsu. Hina Jehová Diosqa alli këninta rikätsikushqa shumaq y kuyëpa hutsasapa nunakunata rikarninmi. Markan mana alli rurëkunaman ishkiriptimpis rogarqanmi tsë mana alli rurëta haqirirnin alli kaqta rurayänampaq (lei Ezequiel 18:25).
Jehoväqa änikonqankunata cumplinmi
10. ¿Imanötaq Abrahanwan contrato ruranqanta Jehová cumplerqan?
10 “Pëqa sirveqninkunata mikïninkuna imëpis qoshqam. Contrato ruranqantaqa imëyaqpis yarparëkanqallam” (Sal. 111:5). Kënö qellqanampaqqa salmista itsa yarpëkarqan Jehová Dios Abrahanwan contrato ruranqampaq. Jehovämi änishqa karqan Abrahanta llapan kastan bendecishqa kanampaq y chikeqninkunata ushakäratsir tsë markachö tärayänampaq (Gén. 22:17, 18; Sal. 105:8, 9). Kë contrato rurayanqanqa cumplikar qallëkorqan Abrahanpa kastan mirar Israel markaman tikrariptinmi. Israelïtakunaqa atska watapam Egipto markachö esclavo kayarqan, tsënö këkäyaptinmi “Diosqa Abrahanwan, contrato rurashqanta” qonqarqantsu, tsëmi horqamorqan (Éxo. 2:24). Horqaramurnin shumaq cuidanqanmi rikätsikorqan markanta kuyanqanta, y manam pachankunallatsu ni hanankunallatsu qorqan, sinöqa Pë munanqannö adorayänampaqpis yachatserqanmi (Deu. 6:1-3; 8:4; Neh. 9:21). Y tiempowannam Israelqa rakikärerqan Diosnintsikpita, tsënö këkäyaptinmi kutin kutin Jehová profëtankunata mandarqan mana alli rurëninkunata israelïtakuna haqiyänampaq. Y waranqa pitsqa pachak (1500) watakunanöna pasarishqanchönam Jehová kachamorqan hapallan kuyë tsurinta kë patsaman, pero judïokunaqa manam chaskiyarqantsu y despreciarmi wanutsiyänanta haqiyarqan. Judiokuna tsënö portakuyanqampitam Diosnintsikqa huk mushoq Israel markata patsakätserqan, pero kë markaqa ciëlota ewaqpaq kaqmi karqan. Jesuswan paqtam kë mushoq Israel markaqa Abrahanpa kastampita kayan y pëkunawan llapan nunakunata bendicinampaqmi änikorqan (Gál. 3:16, 29; 6:16).
11. ¿Imanötaq kananyaq yarpëkanlla Jehová Abrahanwan contrato ruranqanta?
11 Jehoväqa Abrahanwan contrato ruranqanta y bendicionkunata kë Patsapaq apamunampaq änikonqantapis yarparëkanllam. Kananqa espiritual kaq mikï yarqëkämun chusku pachak (400) idiömakunapitapis maschömi. Hinamampis, pachankuna y hanankunapis bendecïkanllam serviqninkunata, kënö mañakuyanqanta wiyar: ‘Miquïlläcuna cada junaq qoycalläyämë’ (Luc. 11:3; Sal. 72:16, 17; Isa. 25:6-8).
Jehová Diospa puëdeq kënin
12. ¿Imanötaq Jehová Dios qorqan markan israelta änenqan herencian?
12 “Markantam rikätsishqa puëdeq këninwan rurashqankunata, nacionkunapa markanta herenciatanö qornin” (Sal. 111:6). Itsa salmistaqa yarpëkarqan Egiptopita Jehová Israel markanta horqamonqanman. Israel marka Jehová änenqan markakunaman yëkuyänampaq mandariptinmi Jordan kë lädompa y wak lädompa yëkur ushakätsiyarqan atska markakunata (lei Nehemías 9:22-25). Tsënöpam Jehoväqa “nacionkunapa” herencianta qorqan markan Israelta. ¡Këchömi rikantsik Jehoväpa poderninta!
13, 14. a) ¿Dios imata ruranqanmantaq salmista yarpëkarqan? b) ¿Imakunapitataq más Jehová librashqa markanta?
13 Pero musyanqantsiknöpis pëkunapaqrëkur Jehová tukïta rurëkaptinmi judïokunaqa respetayarqantsu Jehoväta ni Abrahanta, ni Isaacta, ni Jacobta. Mana wiyakoqmi kayaq tsëmi imëpis mana allikunaman ishkikïkäyaq, tsënöpam Babilonia marka Israelta ushakätsinampaq Jehová permiterqan (2 Cró. 36:15-17; Neh. 9:28-30). Kë Salmos 111 qellqaq nuna tsë witsanchö kawashqa këkarqa, rasuntachi Jehoväta alabarqan kë judiokunata Babiloniachö esclavo këkaqta horqaramuptin. Babiloniaqa puëdeq marka karmi imëpis esclavonkuna ewkuyänantaqa haqeqtsu, pero Jehoväqa horqarqanmi (Isa. 14:4, 17).
14 Pitsqa pachak (500) watakunanöna pasariptinnam, Jehová Dios rikätsikorqan poderninta y kuyakoq këninta nunakunata hutsapita y wanïpita salvarnin (Rom. 5:12). Tsënöpam pachak chusku chunka chusku waranqa (144.000) nunakunata santo espïritunwan Jehová akrarqan. Hina 1919 watachömi wallkaqlla ciëlopa ewaqpaq kaq akrashqa cristianokunata, Jehová librarqan mana alli religionpita. Kananyaq imëka rurayanqankunata rikanqantsikmi yarpätsimantsik Jehoväpa kallpanllawan llapanta rurayanqanta. Y pëkunaqa wanuyanqanyaq Jehoväta servirirninmi ciëlota ewkuyanqa, y tsëpita patsëmi Jesuswan paqta gobernayämonqa Patsachö quedaq nunakunata (Apo. 2:26, 27; 5:9, 10). Punta Israel marka herenciata chaskiyanqampitapis más alli kaq herenciatam pëkunaqa chaskiyanqa (Mat. 5:5).
Diospa mandakïninqa alli kaqmi manam imëpis ushakanqatsu
15, 16. a) ¿Imakunatataq Diosnintsik makinwan rurarqan? b) ¿Ima leyninkunataq qorqan Jehová Israel markanta?
15 “Pë makinwan rurashqanqa rasumpam, y confiakïpaqmi. Llapan mandakïninkunapis confiakunapaqmi. Tsë mandakonqankunaqa imëpis manam ushakanqatsu, rasumpa kaqllam y alli kaqllam” (Sal. 111:7, 8). Pë makinwan rurashqanqa karqan ishkë palta rumikunam, y tsëchömi qellqarëkarqan chunka leyninkuna markan Israelpaq (Éxo. 31:18). Kë chunka Leykuna y wakin kaqkunapis alläpa confiakïpaqmi, y manam ni imëpis ushakanqatsu.
16 Yarpärinapaq, tsë palta rumichö qellqarëkaq huk mandakïninmi kënö nikarqan: “Noqa Jehová Diosnikiqa, noqallata adorayämanëkitam shuyarä”. Tsëpitanam kënö nerqan: “Noqaqa imëyaqpis kuyakïwanmi rikä kuyamaqnïkunata y mandakushqäkunata wiyamaqnïkunatapis”. Hina tsë palta rumichöqa qellqarëkarqanmi wambrakuna teytankunata y mamankunata respetayänampaq, mana suwakuyänampaq, y nuna mayinkunapa imankunatapis munapar mana codiciayänampaq, tsëwanmi Jehová rikätsikorqan nunakunata alläpa kuyanqanta (Éxo. 20:5, 6, 12, 15, 17).
Salvakoq Jehová Diosnintsikqa santom y respetëpaqmi
17. ¿Imata Jehová ruranqanwantaq israelïtakuna musyayänan karqan Diospa shutin santo y respetëpaq kanqanta?
17 “Pëqa nunankunatam librashqa. Conträtonqa imëyaqpis këkanqallam. Pëpa shutinqa santom y respetëpaqmi” (Sal. 111:9). Këta qellqanampaqqa itsa salmista yarpëkarqan Jehová Abrahanwan conträtota ruranqampaq. Diosnintsikqa manam Egiptochö markan esclavo kakunanta, ni Babiloniachö preso kakunanta haqerqantsu, tsënöpam rikätsikorqan markanta kuyanqanta. Awmi, esclavo këkäyaptinmi markan Israeltaqa horqamorqan. Kë ishkë kuti salbanqanwanqa yachakuyänanmi karqan Jehoväpa shutin santo y respetëpaq kanqanta, pero manam tsëtatsu rurayarqan judïokunaqa (lei Éxodo 20:7 y Romanos 2:23, 24).
18. ¿Jehová Diospa shutimpa reqiyäshonqëkita valoryoqtaku rikanki?
18 Kanan tiempo cristianokunatapis Jehová Diosnintsikqa hutsapa y wanïpa esclavon këkashqam libramarqontsik. Tsëmi padrenuestro mañakïchö “jutillequi allapa respetuwan alabashqa catsun” nishpa mañakonqantsiknö kawëta tïranantsik (Mat. 6:9). Tsë shuti ima ninan kanqanmampis alleq yarpakacharqa alläpam respetashun. Salmo 111 nishqanta qellqaqqa tsë shutimanmi alleq yarpakacharqan, tsëmi kënö nerqa: “Jehová Diosta mantsëqa alli yachëpa qallananmi. [Mandakushqankunata] wiyakoqkunaqa alli yachëyoqmi kayan” (Sal. 111:10).
19. ¿Imapitaraq yachakushun qateqnin kaq tëmacho?
19 Jehová Diospa shonqunta llakitsita mantsëqa yanapamäshunmi mana alli rurëkunata chikinapaq. Hina yanapamäshunmi Salmo 112 nenqannö Jehová Dios imanö kanqantapis qatinapaq, kë nenqantaqa qateqnin tëmachömi yachakushun. Kë salmoqa willamantsik, kë alli shonquyoq nunakuna imëyaqpis Jehová Diosta alabayänantam. Diosnintsikqa tsënö alabashqam kanan. Salmista nenqannöpis “alabashqa këninqa manam ni imëpis ushakanqatsu” (Sal. 111:10).
Yarpakachänapaq tapukïkuna
• ¿Imanirtaq Jehová chaskinman nunakunapa alabanzanta?
• ¿Jehová imanö kanqantataq rikantsik llapan kamanqankunachö?
• ¿Jehová Diospa shutimpa reqiyäshonqëkita valoryoqtaku rikanki?
[Yachakunapaq kaqpa tapukïninkuna]
[24 kaq päginachö dibüju]
Jehová Diosta alabanantsikrëkurmi llapantsik ëllukantsik o qorikantsik
[27 kaq päginachö dibüju]
Diospa mandakïninqa alli kaqmi manam imëpis ushakanqatsu