Tau kia Akapaapaa Tatou ia Iehova ma te Rotai
Tau kia Akapaapaa Tatou ia Iehova ma te Rotai
“Alelu Ia.”—SALA. 111:1.
1, 2. Eaa ra te aiteanga o te tuatua “Alelu Ia,” e akapeea te reira i te taangaangaia anga i roto i te au Tuatua Tapu Kerititiano Ereni?
“ALELU IA!” Ko tera akatenianga, e akarongo matau uaia ana te reira i roto i te au are pure o Kerititome. Tetai aronga, e taangaanga putuputu ana ratou i taua tuatua ra ei akareka i ta ratou pukapukaanga i te au ra. Inara, e iti ua tei kite tikai i to te reira aiteanga tapu, e ko te tu oraanga o te manganui e tuatua ra i te reira, kare e akangateitei ana i te Atua. (Tito 1:16) Ko te tuatua “Alelu Ia,” te akamarama maira tetai tikitinari o te Pipiria e e “tuatua te reira e taangaangaia ana e te aronga tata o te au taramo tukeke, i te pati i te katoatoa kia piri mai kia ratou i te akapaapaa anga ia Iehova.” E tika ra e, e maata te aronga kite o te Pipiria e akakite maira e ko te aiteanga o te tuatua “Alelu Ia” e “‘Akapaapaa kotou ia Ia,’ [koia oki] ia Iehova.”
2 Te marama uaia ra i reira, e i roto i te New World Translation, ko te tuatua te ka kiteaia i roto ia Salamo 111:1 kua uriia “E akapaapaa ia Iehova, e kotou e te au tangata!” Ka kiteaia te urianga Ereni no teia tuatua e a taime i roto ia Apokalupo 19:1-6, ei pereperekavanaanga no te openga o te akonoanga pikikaa. Me tupu teia, e tumuanga tau tikai to te aronga akamori mou kia taangaanga i te tuatua “Alelu Ia” na roto i te tu ngateitei.
Tana Au Angaanga Maata
3. Eaa te akakoroanga maata e uipa putuputu mai ei tatou ki te ngai okotai?
3 E manganui te au tumu e oronga maira te tangata tei tata ia Salamo 111, i tau ei kia akapaapaa tatou ia Iehova ma te rotai. Te na ko maira te irava 1 e: “Ka akameitaki au ia Iehova ma te ngakau katoa, i roto i te kapitianga o te aronga tiratiratu, e te uipa anga ra.” Mei te reira katoa te manako o te Au Kite o Iehova i teia tuatau. Te akakoroanga maata e uipa putuputu mai ei tatou ki te ngai okotai, i roto i ta tatou putuputuanga e te au uruoaanga maata, koia oki kia akapaapaa ia Iehova.
4. Akapeea e rauka ai te tangata kia kimi i ta Iehova au angaanga?
4 “E angaanga maata ta Iehova; e mea kimiia e te aronga e mataora i te reira ra.” (Sala. 111:2) Ka akara ana i te tuatua “mea kimiia.” Kia tau ki tetai tataanga, ka tau teia irava no te au tangata tei akariro i te angaanga a te Atua “ei tumu no te eumiumianga e te apiianga ngakau tae.” Kua ki ua ta Iehova au mea i anga, i te akakoroanga umeremere rava. Kua akanoo aia i te ra, te enua e te marama ki to ratou ngai, tei tau meitaki to tetai pirianga ki tetai, ei oronga mai i te maana e te marama, te po e te ao, te au tuatau e te aerenga o te tai no to tatou enua.
5. Eaa ra ta te marama maata tei rauka i te tangata no runga i te ao katoa nei i akaari mai?
5 E maata ua atu tei kiteaia mai e te au taineti no runga i te ngai e vai ra te enua i rotopu i te au paraneta takapini i te ra, pera katoa te tu e te maatamaata o to tatou marama, e te takapini ra te reira i
te enua na roto i te tu ka puapingaia te enua. Na te akanoonooanga e te pirianga o teia au mea o te mareva i rauka ai te tauianga o te au tuatau ruperupe tukeke. E maata katoa tei kiteaia mai no runga i te tu tau tikai o te maani angaia mai te au tu natura i te ao katoa e pini ua ake. No reira, i roto i tetai atikara, te ingoa “Te Ao Katoa ‘Tei Tau Tikai’ Te Angaia Mai Anga,” kua akakite tetai poropeta no te angaanga maani e te akataka matini e: “Mama ua i te marama atu i te tumu i taui ei te au taineti e manganui i to ratou manako i te au mataiti e 30 i topa, te ariki anga e ka anoanoia te akarongo maata e rauka ai kia irinaki e e mea tupu ua mai teia ao katoa. Me maata atu to tatou marama no runga i to tatou enua tei angaia mai, e maata ua atu te au tumu kia irinaki e, e anga kite karape tetai.”6. Eaa ra toou manako no runga i te mataara i anga mai ei te Atua i te tangata?
6 Tetai akakiteanga maata no te au mea tei angaia, koia oki ko te mataara i anga mai ei te Atua ia tatou. (Sala. 139:14) I te anga mai anga i te tangata, kua oronga aia i tetai manako no ratou, i tetai kopapa e te au mero katoatoa tei anoanoia, e te au tareni e te tu kite kia angaanga. Ei akaraanga, te temeio e o maira te au tareni i orongaia mai e te Atua kia tuatua e kia akarongo, pera katoa kia tata e kia tatau. Kua tu anake te tangata e manganui i taua au tareni ra. Kua rauka katoa ia koe te kopapa umeremere tikai kia tu tika ua ki runga. Ae, e mea vavaria tikai te tu i maaniia ai toou kopapa, te angaanga ta te reira e rave ana, te angaanga a te kemikara i roto i te kopapa mei te tu i taangaangaia ai te kai ei maroiroi no te kopapa. Tei ngata atu i te reira, koia oki ko te tukatianga o te au uaua ei tauturu kia rauka i toou manako e toou au mero no te tongi, no te akarongo, no te amiri e te vai atura, kia rave i ta ratou angaanga. Kare rava a te au taineti angaanga i rauka i te rave i aite mai ki teia. Ko te tika ra, naringa kare te manako e te au mero no te akarongo, te tongi e te vai atura i orongaia mai ki te tangata, kare ta ratou au angaanga e puapingaia. E kare katoa e rauka i tetai enitinia tei tereni meitakiia, e tei tukatau roa atu kia maani i tetai apinga mei te au mangamanga rima rai te manea e te puapinga, tei angaia mai na roto i te tu umere tikai. E ui kia koe uaorai e, ‘Ka rauka ainei te rave i te au angaanga umere o te ati e te maani anga i te au apinga naringa kare te au mangamanga rima tei orongaia mai e te Atua i taangaangaia na roto i te tu karape?’
Ta te Atua Au Angaanga Maata e Tona Au Tu
7. Eaa tatou ka karanga ai e ko te Pipiria tetai o ta te Atua au angaanga maata?
7 Ta Iehova au angaanga maata te kapiti maira te reira i te au mea memeitaki tana i rave no te tangata, mei tei akatakaia mai i roto i te Pipiria. Ko te Pipiria uaorai, e angaanga maata te reira na Iehova e te rotai ra tona au tuanga pouroa ki tetai e tetai. Kare te reira i aite ki tetai ua atu puka no te mea “e mea akauruia mai e te Atua.” (2 Timo. 3:16) Ei akaraanga, te akamarama maira a Genese, te puka mua o te Pipiria, e i akapeea te Atua i te tama anga i te kino mei runga i te enua i te tuatau ia Noa. Te akaari maira a Exodo, te rua o te puka e i akapeea a Iehova i te akatano anga i te akaapaanga no runga i tona taoonga Atua na roto i te akaora mai anga ia Iseraela mei te tuikaa i Aiphiti. Kare e kore e te manako ra te tata taramo i taua au tupuanga ra i akakeuia ai aia kia tuatua e: “E angaanga meitaki [ta Iehova] e te kakā, ka tu oki tana tuatua-tika e rimua. Kua akariro oki aia i tana au angaanga taka ke ei manako anga; e takinga-meitaki maata e te aroa to Iehova.” (Sala. 111:3, 4) Kare ainei koe e akatika e ko ta Iehova angaanga i roto i te tuatua enua, tei kapiti mai i te au mea tei raveia i roto i toou oraanga, e akamaaraanga te reira i tona ‘meitaki e te kakā’?
8, 9. (a) I roto i teea au mataara i tuke takiri ei ta te Atua au angaanga mei te au angaanga e manganui a te tangata? (e) Eaa tetai au tu o te Atua taau e mareka ra?
8 E akara ana e te akaketaketa katoa maira te tata taramo i to Iehova tu takake rava, mei te tuatua tika, te takinga meitaki, e te aroa. Kua kite oki koe e kare e akatumu putuputuia ana te au angaanga ara ua a te tangata ki runga i te tuatua tika. Maata anga i te taime e tupu mai ana te reira no te tu noinoi, te tu morimori, e te tu nengonengo. Te taka ua ra te reira i roto i te au apinga tamaki kikino ta te tangata e maani ra no te au tamaki ta ratou i akatupu e kia puapingaia i te pae moni. Kua apai mai teia i te taitaia e te rikarika maata ki te mirioni ua atu o te aronga meitaki ua. Tetai katoa, e maata te au angaanga a te tangata tei akatupu mai i te kino ki te aronga putaua tei takinokinoia. Penei ko tetai akaraanga ka inangaro te maataanga i te akamanako koia oki, te taangaanga anga i te au tuikaa Apokalupo 11:18.
i te patu anga i te au pyramid. Te akakoroanga tikai o te reira, koia oki ei ngai tanumanga no te au Pharao akatietie. Tetai katoa, kare anake ua te manganui anga o te angaanga a te tangata i teia tuatau i riro ei takinokinoanga mari katoa ra kua riro ei “mate” no “to te ao” nei.—E tatau ia9 E tuke takiri ta Iehova au angaanga tei akatumu uaia rai ki runga i te mea tika! Te kapiti maira tana au angaanga i te ravenga aroa ua kia ora te tangata ara nei. I te oronga mai anga i te ravenga oko, te ‘akakite maira te Atua i tana tuatua-tika.’ (Roma 3:25, 26) E tika rava e, “ka tu oki tana tuatua-tika e rimua”! E no runga i tona takinga meitaki, kua akaariia mai ana te reira na roto i to te Atua tu akakoromaki i te tangata ara nei. Tetai au taime, e tuatua ana aia e “e akarongo mai ana” me pati akatenga aia kia ratou kia ariu ke mai mei to ratou arataa kino e kia rave i te mea tika.—E tatau ia Ezekiela 18:25.
Tiratiratu ki Tana Au Taputou
10. Eaa te akaraanga no te tu akarongo mou ta Iehova i akanoo no runga i tana koreromotu kia Aberahama?
10 “Kua oronga mai aia i te kai ki te aronga i mataku iaia ra; ka manako tamou rai aia i tana ra koreromotu.” (Sala. 111:5) I te akaraanga te tuatua ra te tata taramo i konei i te koreromotu a Aberahama. Kua taputou a Iehova e ka akameitaki aia i te uanga a Aberahama e kua akakite mai e ka rauka ia ratou te ngutupa oire o to ratou au enemi. (Gene. 22:17, 18; Sala. 105:8, 9) I roto i te akatupuanga mua o taua au taputou ra, kua riro mai te uanga o Aberahama ei iti tangata no Iseraela. Kua roa taua iti tangata i te akatuikaaia anga i Aiphiti, inara i reira “kua maara i te Atua i tana koreromotu ia Aberahama” e kua akaora maira ia ratou. (Exo. 2:24) Te akaari maira te mataara i akono ei a Iehova ia ratou e mei teaa tikai tona tu oronga ua. Kua oronga aia i te kai ei utuutu ia ratou i te pae kopapa e kua oronga i te apiianga ei tauturu ia ratou i te aru i tona au turanga. (Deu. 6:1-3; 8:4; Nehe. 9:21) I te au anere mataiti tei aru mai kua ariu ke ua rai te iti tangata mei te Atua, noatu kua tono aia i te au peroveta kia raurau ia ratou kia oki mai kiaia. Tere atu i te 1,500 mataiti i muri ake i tona akaora mai anga i te ngati Iseraela mei Aiphiti, kua tono mai te Atua i tana Tamaiti anau tai ki te enua nei. Kua kopae te manganuianga o te ngati Iuda ia Iesu e kua akatika aia kia tamate ratou iaia. I reira kua akatupu mai a Iehova i tetai iti tangata ou, e iti tangata pae vaerua, ko “te Iseraela o te Atua.” Kapiti mai kia Karaiti, kua riro mai taua iti tangata ra ei uanga pae vaerua no Aberahama, ta Iehova i totou e ka akariro aia ia ratou ei akameitaki i te tangata nei.—Gala. 3:16, 29; 6:16.
11. Akapeea ra a Iehova i te ‘manako tamou ua anga i tana koreromotu’ kia Aberahama?
11 Kua “manako tamou rai [Iehova] i tana ra koreromotu” e te au akameitakianga tei taputouia mai na roto i te reira. I teia tuatau e maata ua atu tana kai pae vaerua e oronga maira i roto i te au reo tei tere atu i te 400. Tetai katoa, te ariu ua maira rai aia ki te au pure no runga i to tatou au anoano i te pae kopapa, tei tau ki te au tuatua e: “O mai i te kai e tau ia matou i tera rā i tera rā.”—Luka 11:3; Sala. 72:16, 17; Isa. 25:6-8.
To Iehova Mana Vavaria
12. Na roto i teea mataara i orongaia ai ki to Iseraela “te tuanga a te au etene”?
12 “Kua akakite mai aia ki tona ra au tangata i tana ra ravenga mana, i te oronga anga mai i te tuanga a te au etene na ratou.” (Sala. 111:6) Penei ko tetai tupuanga takake rava i roto i te tuatua enua o Iseraela ta te tata taramo e manako ra koia oki i te akaora temeioia mai anga ratou mei Aiphiti. I te akatika anga a Iehova i te ngati Iseraela kia tomo ki roto i te Enua Taputouia, kua rauka ia ratou kia akavi i te au patireia i te tua itinga e i te tua opunga o te Kauvai Ioridana. (E tatau ia Nehemia 9:22-25.) Ae, kua oronga a Iehova i “te tuanga a te au etene” na to Iseraela. E akaarianga umere tikai i to te Atua mana!
13, 14. (a) Eaa ra te akaarianga o to te Atua mana i te piri atu anga kia Babulonia ta te tata taramo e manako ra? (e) Eaa tetai au akaoraanga maata atu ta Iehova i rave?
13 Inara, kua kite meitaki ua tatou, e noatu te au mea pouroa ta Iehova i rave no ratou, kare rai a Iseraela i akangateitei ana iaia e kare katoa i akangateitei i to ratou ui tupuna ko Aberahama, ko Isaaka, e ia Iakoba. Kua meameaau ua atu rai ratou e tae ua atu ki te tuku mai anga a Iehova ia Babulonia kia akaatea ia ratou mei to ratou enua, te akatuitarere anga ia ratou. (2 Para. 36:15-17; Nehe. 9:28-30) Mei te mea e kua tau ta tetai aronga apiipii Pipiria e akakite ra e te ora ra rai te tangata i tataia ai te Salamo 111 i muri ake i te oki atu anga to Iseraela mei te tuitarere anga i Babulonia, e tumuanga tau ke katoa atu tona kia akapaapaa ia Iehova no Tona tiratiratu e te mana. Kua akaari mai te Atua i tona tiratiratu e te mana na te akaora anga i te ngati Iuda mei Babulonia—e ture ta teia patireia eiaa kia tuku i tana au tuikaa kia aere.—Isa. 14:4, 17.
14 Mei tetai rima anere mataiti i muri mai, kua taangaanga a Iehova i tona mana na roto i tetai mataara maata atu i te akaora anga i te au tangata tei tataraara mei te turanga tuikaa o te ara e te mate. (Roma 5:12) Tetai mea tei tupu mai koia oki kua akatueraia te mataara no te 144,000 tangata kia riro mai ei au pipi akatainuia na Karaiti. I te mataiti 1919, kua taangaanga a Iehova i tona mana ei akaora mai i tetai toenga iti ua o teia aronga akatainuia mei te tuikaaanga i roto i te akonoanga pikikaa. Te au mea tei rauka ia ratou i te rave i roto i teia tuatau openga ka tau rai kia karangaia e na te mana o te Atua. I te akapapuanga i to ratou akarongo mou e tae ua atu ki te mate, ka tutara kapiti ratou e Iesu Karaiti mei runga mai i te rangi, ki rungao i te enua kia puapingaia te au tangata tei tataraara. (Apo. 2:26, 27; 5:9, 10) Ka riro ia ratou te enua na roto i tetai mataara mekameka roa atu i ta to Iseraela i taito.—Mata. 5:5.
Au Kaveinga Mutu Kore, Tau kia Irinakiia
15, 16. (a) Eaa te kapitiia maira ki roto i te au angaanga a to te Atua rima? (e) Eaa te au akauenga ta te Atua i oronga ki to Iseraela i taito?
15 “Ko te tuatua-mou e te tuatua-tau, ko te au angaanga ïa a tona rima; e ko tana au ikuiku anga, e mea mou anake ïa: Ka mou rai te reira e tuatau ua atu; No te mea i raveia ma te tuatua-mou e te tiratiratu.” (Sala. 111:7, 8) Tei kapitiia mai ki roto i ‘te au angaanga a to Iehova rima’ koia oki ko nga papa toka e rua i tataia ai te au ture ngauru puapinga no Iseraela. (Exo. 31:18) Teia au ture, kapiti mai i te au ture katoatoa tei riro mai ei tuanga no te Ture koreromotu a Mose, kua akatumuia te reira ki runga i te au kaveinga mutu kore, tei tau kia irinakiia.
16 Ei akaraanga, ko tetai au akauenga, me kore au ture, i runga i taua nga papa ra te akakite ra e: “E Atua vareae oki au ko te Atua noou nei ko Iehova.” Te akakite katoa ra te reira e ‘te aroa ra a Iehova i te aronga i inangaro mai iaia, e tei akono i tana au akauenga, e tausani ua atu.’ Tei roto katoa i nga papa toka te au kaveinga puapinga mei te “akangateitei atu i to metua tane, e to metua vaine,” “auraka rava koe e keia,” pera katoa te ture pakari e akaata maira i te marama oonu no runga i te kopae anga i te morimori apinga a etai ke.—Exo. 20:5, 6, 12, 15, 17.
To Tatou Akaora Tapu, e te Matakuia
17. Eaa te nga tumu no te ngati Iseraela kia akatapu i te ingoa o te Atua?
17 “Kua akau mai aia i te ora no tona ra au tangata; kua akaue aia i tana ra koreromotu kia mou e tuatau ua atu: e ingoa tapu oki e te matakuia tona.” (Sala. 111:9) Penei te manako akaou ra te tata taramo i to Iehova tu tiratiratu ki tana koreromotu i taputou kia Aberahama. Tei tupu mai no te reira, kare a Iehova i akaruke ana i tona iti tangata, i te akamataanga ei au tuikaa i Aiphiti i taito e i muri mai ei au tuikaa i Babulonia. I roto i nga mea e rua kua akaora mai a Iehova i tona iti tangata. E maata ua atu te au tumu no Iseraela kia akatapu i te ingoa o te Atua. Inara noatu rai e ko teia nga tupuanga ua te tumu, ka anoanoia rai ratou kia akatapu i te ingoa o te Atua.—E tatau ia Exodo 20:7; Roma 2:23, 24.
18. Eaa koe i manako ei e e tikaanga ngateitei tikai kia apai i te ingoa o te Atua?
18 Te tika katoa ra te reira no te au Kerititiano i teia tuatau, tei akaoraia mai mei te tuikaaanga o te ara e te mate ma te kore e manakonakoanga. E mea tau kia akarotai tatou i to tatou oraanga ma te ngakau tae ki te patianga mua i roto i te pure akaraanga e na ko ra e: “Kia tapu toou ingoa.” (Mata. 6:9) Ka riro te akamanakonako anga no runga i taua ingoa kaka ra i te akatupu i te tu mataku Atua ki roto ia tatou. Kua rauka i te tangata tei tata ia Salamo 111 te manako tano tikai no runga i te tu mataku Atua, i te akakite anga e: “Ko te akamataanga o te pakari ra, koia te mataku ia Iehova ra: e kite maata to te aronga ravarai i akono i te reira [tei akono i tana au akauenga].”—Sala. 111:10.
19. Eaa ta tatou ka akamanako i roto i te atikara ka aru mai?
19 Ka riro te mataku akangateitei i te Atua ei tauturu ia tatou kia rikarika i te kino. Ka tauturu katoa te reira ia tatou kia aru i tona au tu memeitaki mei tei akaariia mai i roto ia Salamo 112, ta tatou ka akamanako i roto i te atikara ka aru mai. Te akaari maira taua taramo ra e ka akapeea tatou e tau ei kia o atu ki roto i te mirioni ua atu te ka rekareka i te akapaapaa i te Atua e tuatau ua atu. E maata rava atu tei tau Iaia. “E tika te akapaapaa iaia i te vai marie anga” koia oki e tuatau ua atu—Sala. 111:10.
Au Uianga Akamanako Anga
• Eaa i tau ei kia akapaapaa tatou ia Iehova ma te rotai?
• Eaa to Iehova au tu e akaariia maira i roto i tana au angaanga?
• Mei teaa ra toou manako no runga i te tikaanga ngateitei o te apai anga i te ingoa o te Atua?
[Au Uianga Apii]
[Tutu i te kapi 20]
To tatou akakoroanga maata i uipa putuputu mai ei ki te ngai okotai koia oki kia akapaapaa ia Iehova
[Tutu i te kapi 23]
Pouroa ta Iehova au ture kua akatumuia te reira ki runga i te au kaveinga mutu kore, tei tau kia irinakiia