Ua Tatau iā Ieova Ona Tatou Vivii Atu i ai ma le Autasi
Ua Tatau iā Ieova Ona Tatou Vivii Atu i ai ma le Autasi
“Ia outou vivii atu iā Ioa.”—SALA. 111:1.
1, 2. O le ā le uiga o le upu “Aleluia,” ma o faapefea ona faaaogā i Tusitusiga Kerisiano Eleni?
“ALELUIA!” E masani ona faalogoina lenā alaga i lotu ua faapea mai o Kerisiano. O nisi tagata e latou te taʻua soo lava le faaupuga lenei i talanoaga i aso fai soo. Peitaʻi, e toʻaitiiti lava i latou e iloaina le uiga paia o lenei faaupuga, ma e lē o viiaina le Atua i olaga o le toʻatele o i latou o loo faaaogāina lenei faaupuga. (Tito 1:16) Ua faamatalaina e se lomifefiloi o le Tusi Paia le upu “Aleluia,” o se “upu na faaaogā e tusitala o salamo eseese e valaaulia ai tagata uma ina ia auai faatasi ma i latou i le viiaina o Ieova.” O le mea moni, e toʻatele tagata faitofā o le Tusi Paia ua faapea mai o le upu “Aleluia,” o lona uiga “‘Ia vivii iā Ioa,’ [o ia lenā] o Ieova.”
2 E manino mai, o loo faaupu i le Tusi Paia faa-Samoa le faaupuga o loo i le Salamo 111:1 e faapea, “Ia outou vivii atu iā Ioa.” E faafā ona aliaʻi mai lenei ituaiga faaupuga Eleni i le Faaaliga 19:1-6, e fesootaʻi atu i le faailogaina o le iʻuga o lotu sesē. Pe a tupu lenā tulaga, o le a iai i tagata tapuaʻi moni se māfuaaga faapitoa e faaaogā ai i se auala faaaloalo le faaupuga “Aleluia.”
O Ana Galuega Ofoofogia
3. O le ā le māfuaaga autū e tatou te faapotopoto ai e lē aunoa?
3 Ua taʻua e le tusitala o le Salamo e 111 le tele o māfuaaga ua tatau ai iā Ieova ona tatou vivii atu i ai ma le autasi. Ua faapea mai le fuaiupu 1: “Ou te vivii atu iā Ieova ma le loto atoa i le saofaʻiga a ē amiotonu, atoa ma le faapotopotoga.” O le lagona foʻi lenā o Molimau a Ieova i aso nei. O le māfuaaga autū e tatou te faapotopoto ai e lē aunoa i a tatou faapotopotoga ma tauaofiaga tetele, ina ia vivii atu iā Ieova.
4. E faapefea ona saʻilia e tagata galuega a Ieova?
4 “O mea ua faia e Ieova, o mea tetele lava ia, o loo saʻilia e i latou uma lava o ē fiafia i ai.” (Sala. 111:2) Seʻi mātau le faaupuga “o loo saʻilia.” E tusa ai ma se tasi tusi, e mafai ona faatatau atu le mau i tagata o loo avea galuega a le Atua ma “taulaʻiga o a latou iloiloga ma suʻesuʻega maelega.” E anoanoaʻi fuafuaga matagofie o foafoaga a Ieova. Ua ia faatulagaina le lā, le lalolagi, ma le masina i o latou tulaga, e fesootaʻi lelei ai le tasi i le isi, ina ia maua ai le māfanafana ma le malamalama i lo tatou lalolagi, le pō ma le ao, o tau ma tai.
5. O le ā ua faaalia mai ona o le faaauilumaina o le malamalama o tagata i le vateatea?
5 Ua iloa e saienitisi le tele o mea e faatatau i le tulaga o le lalolagi i le faataamilosaga o paneta i le lā, faapea ma le talafeagai lelei o le faataamilosaga, le lapoʻa, ma le telē o le masina. O le auala ua faatulaga ai ma le auala o loo galulue faatasi ai nei mea i le vateatea, ua mafai ai ona maua i taimi uma suiga matagofie o tau e pei ona iai. E lē gata i lea, e tele foʻi mea ua aʻoaʻoina e faatatau i le faatonutonuina lelei o malosiaga faalenatura i le vanimonimo. O le māfuaaga lea na faaalia ai e se polofesa i le inisiniaina o mea tau masini, i se mataupu a faa-Samoa le ulutala e faapea, “Ua Matuā Saʻo Lelei le Foafoaga o le Vateatea o Loo Iai,” e faapea: “E faigofie lava ona malamalama i le māfuaaga na suia ai mafaufau o le toʻatele o saienitisi i tausaga e 30 ua mavae, e ala i le ioe e faapea e manaʻomia se faatuatua malosi ina ia talitonu ai o le vateatea o se mea na teʻi lava ua iai. O le tele o lo tatou malamalama e faatatau i lo tatou lalolagi, o le atili faamaonia ai foʻi lea e iai sē atamai na foafoaina le lalolagi.”
6. O le ā sou lagona e faatatau i le auala na faia ai e le Atua le tagata?
6 O se isi galuega silisili o le foafoaga, o le auala na faia ai e le Atua i tatou. (Sala. 139:14) Ina ua ia foafoaina tagata, sa ia tuuina iā i latou se mafaufau, se tino o loo iai uma totoga e tatau ona faagaoioia lelei ai, faatasi ai ma le tomai ma le malosi e mafai ai ona faatino galuega. O se faaaʻoaʻoga, o le vavega o loo iai i tomai na tuuina mai e le Atua e tautala ma faalogo ai, faapea foʻi le tomai e tusitusi ma faitau ai. E toʻatele tagata o loo iai na tomai. O loo iai foʻi iā te oe se galuega e sili ona lelei ma matagofie—o se fausaga o le tino ua mafai ai ona e tūsaʻo. Ma o se mea e ofo tele ai pe a manatu i le auala ua faia ai o tatou tino, o lo tatou tomai e gaoioi ai ma fai galuega, ma le faagasologa o vailaau o o tatou tino. E lē gata i lea, o le mataʻina o fesootaʻiga o neula lea e mafai ai ona galulue faatasi lou mafaufau ma ou lagona, e matuā sili mamao atu i so o se mea ua faia e tagata saienitisi. O le mea moni, ua mafai ona fai e tagata mea ona o le mafaufau ma lagona ua tuuina i ai. E oo lava foʻi i se inisinia ua aʻoaʻoina ma agavaa, e lē mafai ona ia gaosia se mea e matagofie ma aogā e pei o ou tamatamaʻilima e sefulu. Ia fesili ifo iā te oe lava, ‘Pe mafai ona fai galuega tusiata ma faugāfale mataʻina, e aunoa ma le faaaogāina ma le tomai o tamatamaʻilima na tuuina mai e le Atua?’
O Galuega Ofoofogia a le Atua ma Ona Uiga
7. Aiseā e ao ai ona tatou manatu i le Tusi Paia o se tasi o galuega silisili a le Atua?
7 E aofia ai i galuega ofoofogia a Ieova isi mea matagofie ua ia faia mo tagata, e pei ona faamatalaina i le Tusi Paia. O lenā tusi o se tusi e autasi uma ona vaega. I le lē pei o se isi lava tusi, e moni lava o le Tusi Paia “e mai le Agaga o le Atua, ma e aogā e aʻoaʻo ai.” (2 Timo. 3:16) O se faaaʻoaʻoga, o loo faamatalaina i le uluaʻi tusi o le Tusi Paia, o le Kenese, le auala na tafiesea ai e le Atua le lalolagi amioleaga i aso o Noa. O loo taʻua i le tusi lona lua, o le Esoto, le auala na faamaonia ai e Ieova o ia o le Atua moni, e ala i le laveaʻiina o tagata Isaraelu mai le nofo pologa i Aikupito. Atonu o mea na sa mafaufau i ai le faisalamo ina ua uunaʻia o ia e faapea mai: “O mea e viia ma le matagofie o galuega [a Ieova] ia, e tumau foʻi lana amiotonu e faavavau. Ua fai ma faamanatuga ona vavega; o loo alofa fua mai ma alofa mutimuti vale mai Ieova.” (Sala. 111:3, 4) Pe e te lē ioe o galuega a Ieova i le gasologa o le talafaasolopito, e aofia ai ma mea ua faia talu ona e soifua mai, o se faamanatuga lea o ana galuega e ‘viia ma matagofie’?
8, 9. (a) O ā auala e ese ai gaoioiga a le Atua ma le tele o gaoioiga a tagata? (e) O ā nisi o uiga o le Atua e te talisapaia?
8 Ia mātau, o loo faamamafa foʻi e le faisalamo uiga matagofie o Ieova, e pei o le amiotonu, alofa fua, ma le alofa mutimutivale. O loo e silafia e seāseā ona faavae i le amiotonu ia gaoioiga a tagata agasala. O le tele o taimi e faavae a latou gaoioiga i le matapeʻapeʻa, matauʻa, ma le faamaualuga. O loo faamaonia lenā i auupega sauā ua gaosia e tagata mo taua ua latou faatupuina, ma ina ia maua ai tupe. O nei tulaga ua aumaia ai le anoanoaʻi o mafatiaga ma mea mataʻutia i le faitau miliona o tagata ua afāina fua. E lē gata i lea, o le tele o mea ua fai e tagata ua iʻu ai ina mafatia nai tagata e lē tagolima. O se faataʻitaʻiga e ono mafaufau i ai le toʻatele, o le faaaogā lea o pologa e latou te fauina maa faamanatu. Ma o na maa faamanatu, o le tele lava o tuugamau o Farao faamaualuluga. I le ma lea, o le tele o galuega a tagata i aso nei e lē gata ua mafatia ai, ae ua ‘faaleagaina ai foʻi le laueleele.’—Faitau le Faaaliga 11:18.
9 Ua matuā ese mai ai lava i gaoioiga a Ieova, lea e faavae i taimi uma i le mea saʻo! E aofia ai i ana gaoioiga le sauniuniga alofa mo le faaolataga o tagata agasala. E ala i le saunia o le togiola, na “faaalia ai [e le Atua] lana lava amiotonu.” (Roma 3:25, 26) Ioe, “e tumau foʻi lana amiotonu e faavavau”! Ae ua faaalia le alofa fua e ala i le feutagaʻi ma le onosai ma tagata agasala. O nisi taimi sa ia feutagaʻi ai ma i latou i se auala agalelei, ina ua ia talosaga atu iā i latou e liliu ese mai i o latou ala leaga ma fai le mea saʻo.—Faitau le Esekielu 18:25.
E Faamaoni Ieova i Ana Folafolaga
10. O le ā le faaaʻoaʻoga o le faamaoni na faataatia e Ieova e tusa ai o le la feagaiga ma Aperaamo?
10 “Ua foaʻiina mai e ia le mea e ʻai i ē matataʻu iā te ia; e manatua e ia lana feagaiga e faavavau.” (Sala. 111:5) E foliga mai sa faasino atu le faisalamo i inei i le feagaiga faa-Aperaamo. Sa folafola e Ieova o le a ia faamanuia i le fanau a Aperaamo ma fetalai e faapea, o le a latou maua faitotoʻa o ē ita iā i latou. (Kene. 22:17, 18; Sala. 105:8, 9) I le uluaʻi faataunuuga o na folafolaga, na avea ai le nuu o Isaraelu ma fanau a Aperaamo. Sa umi o nofo pologa lenā nuu i Aikupito, ae na “manatua . . e le Atua lana feagaiga na na faia ma Aperaamo,” ma laveaʻi iā i latou. (Eso. 2:24) Ua faaalia ai le agalelei o Ieova i le auala na ia feutagaʻi ai ma i latou. Sa ia saunia meaʻai mo o latou tino ma meaʻai faaleagaga mo o latou mafaufau ma loto. (Teu. 6:1-3; 8:4; Nee. 9:21) I senituri mulimuli ane, sa fai ma liliu ese le nuu mai le Atua, e ui na ia auina atu perofeta e faalaeiau i latou e toe foʻi mai. E silia ma le 1,500 tausaga talu le laveaʻiga o tagata Isaraelu mai Aikupito, ae auina mai loa e le Atua lona Alo pele e toʻatasi i le lalolagi. O le toʻatele o tagata Iutaia na latou teena Iesu ma tuu atu o ia e fasiotia. Ona faavaeina lea e Ieova o se nuu fou, o se nuu faaleagaga, o “le Isaraelu a le Atua.” Ua faia aʻe e lenā nuu faatasi ma Iesu, le fanau faaleagaga a Aperaamo lea na folafola mai e Ieova o le a ia faaaogāina e ala mai ai le manuia o tagata.—Kala. 3:16, 29; 6:16.
11. Ua faapefea ona faaauau ona ‘manatua e Ieova lana feagaiga’ ma Aperaamo?
11 O loo faaauau pea ona ‘manatua e Ieova lana feagaiga’ ma faamanuiaga na ia folafola e ala mai i lenā feagaiga. I aso nei, o loo ia saunia le anoanoaʻi o meaʻai faaleagaga i le silia i le 400 gagana. E lē gata i lea, o loo faaauau ona ia tali mai i tatalo mo o tatou manaʻoga faaletino, i le ōgatusa ai ma upu e faapea: “Ia foaʻi mai i le aso nei a matou meaʻai e tatau mo le aso.”—Luka 11:3; Sala. 72:16, 17; Isa. 25:6-8.
Le Mātaʻutia o le Mana o Ieova
12. O le ā le auala na avatu ai iā Isaraelu anamua “le tofi o nuu ese”?
12 “Ua na faaali atu le mana o ana galuega i lona nuu, ina ua avatu iā i latou le tofi o nuu ese.” (Sala. 111:6) O se tasi o mea mataʻina na tupu i taimi o Isaraelu atonu sa mafaufau i ai le faisalamo, o le laveaʻiga faavavega lea o i latou mai Aikupito. Ina ua tuu atu e Ieova le fanauga a Isaraelu e ulu atu i le Nuu o le Folafolaga, sa mafai ona latou faatoʻilalo nuu i le itu i sasaʻe ma sisifo o le vaitafe o Ioritana. (Faitau le Neemia 9:22-25.) Ioe, na avatu e Ieova iā Isaraelu “le tofi o nuu ese.” Maʻeu se faaaliga o le mana o le Atua!
13, 14. (a) O le ā le faaaliga o le mana o le Atua e fesootaʻi iā Papelonia, atonu sa mafaufau i ai le faisalamo? (e) O ā isi galuega mataʻutia o le laveaʻiga ua faia e Ieova?
13 Peitaʻi, ua tatou iloa lelei e faapea, e ui lava i mea uma na faia e Ieova mo i latou, ae sa leʻi faaalia e Isaraelu le faaaloalo mo ia po o o latou augātamā o Aperaamo, Isaako, ma Iakopo. Sa faaauau pea ona latou fouvale seʻia oo ina faaaogā e le Atua Papelonia e aveesea i latou, ma ave faaaunuua i Papelonia. (2 No. 36:15-17; Nee. 9:28-30) Pe afai sa ola le tusitala o le Salamo e 111 i le taimi ina ua mavae ona toe foʻi mai tagata Isaraelu sa faaaunuua i Papelonia, e pei ona manatu ai nisi tagata faitofā o le Tusi Paia, ua tele lava la māfuaaga e na te viia ai Ieova i Lona faamaoni ma lona mana. Sa faaalia e le Atua lona faamaoni ma le mana e ala i le laveaʻia o tagata Iutaia mai Papelonia—o se malo sa iai la latou āiāiga e lē faasaʻolotoina tagata e faaaunuua.—Isa. 14:4, 17.
14 Pe tusa o le lima senituri mulimuli ane, na faaaogā ai e Ieova lona mana i se auala e sili mamao atu, e ala i le laveaʻia o tagata salamō mai le nofo pologa i le agasala ma le oti. (Roma 5:12) O se tasi o iʻuga na iʻu i ai, o le tatalaina ai lea o le avanoa mo tagata e 144,000 e avea ma soo faauuagagaina o Keriso. I le 1919, na faaaogā ai e Ieova lona mana e laveaʻi ai se vaega totoe toʻaitiiti o nei soo faauuagagaina, mai le tulaga saisaitia i lotu sesē. Ua māfua ona mafai ona latou ausia mea i lenei taimi o le iʻuga, ona o le fesoasoani o le mana o le Atua. Ona o le faamaonia o lo latou faamaoni seʻia oo i le oti, o le a latou pule faatasi ai ma Iesu mai le lagi i luga o le lalolagi, mo le lelei o tagata ua salamō. (Faaa. 2:26, 27; 5:9, 10) O le a fai ma o latou tofi le lalolagi, i se auala e sili mamao atu nai lo le mea sa iai Isaraelu anamua.—Mata. 5:5.
O Mataupu Silisili e Tumau ma Maufaatuatuaina
15, 16. (a) O le ā e aofia ai i galuega a aao o le Atua? (e) O ā faatonuga na tuuina atu e le Atua iā Isaraelu anamua?
15 “O galuega a ona aao e moni ia ma le tonu; e faamaoni ana feʻau uma lava. E faatumauina ia mea e faavavau faavavau lava; ua faia i le faamaoni ma le tonu.” (Sala. 111:7, 8) Sa aofia ai i ‘galuega a aao o Ieova,’ papamaa e lua lea na tusia ai tulafono tāua e sefulu mo tagata Isaraelu. (Eso. 31:18) O nei tulafono faatasi ai ma isi uma tuutuuga lea na avea ma vaega o le feagaiga o le Tulafono a Mose, e faavae mai i mataupu silisili e tumau ma maufaatuatuaina.
16 O se faaaʻoaʻoga, na taʻua i se tasi o faatonuga po o tulafono na tusia i na papamaa, e faapea: “O aʻu o Ieova lou Atua, o le Atua fuā.” O loo taʻua ai foʻi e faapea e ‘alofa Ieova i afe o tupulaga o ē alolofa iā te ia, ma tausi i ana poloaʻiga.’ Sa tusia ai foʻi i papamaa ia mataupu silisili e faavavau ona aogā e pei o le, “ia e āva i lou tamā ma lou tinā” ma le “aua e te gaoi,” faapea le tulafono o loo manino ona faasā ai le losilosi fua i mea a isi.—Eso. 20:5, 6, 12, 15, 17.
O lo Tatou Togiola e Paia ma Mātaʻutia
17. O ā māfuaaga sa tatau ai i tagata Isaraelu ona faapaʻiaina le suafa o le Atua?
17 “Na ia avatu le togiola mo lona nuu; na poloaʻi i lana feagaiga ia faavavau lava; e paia ma le mātaʻutia lona suafa.” (Sala. 111:9) Atonu sa toe mafaufau le faisalamo i le faamaoni o Ieova i lana feagaiga ma Aperaamo. I le ōgatusa ai ma lenā feagaiga, e leʻi tuulafoaʻia e Ieova ona tagata, e lē gata ina ua fai ma pologa i Aikupito, ae ina ua faaaunuua foʻi i Papelonia. I na tulaga uma, sa faasaʻolotoina e le Atua ona tagata. E tusa lava pe na o le pau na o mea na faataunuuina e Ieova, ae na tatau lava i tagata Isaraelu ona faapaʻiaina le suafa o le Atua.—Faitau le Esoto 20:7; Roma 2:23, 24.
18. Aiseā e te manatu ai o se faaeaga le tauaveina o le suafa o le Atua?
18 E faapena foʻi Kerisiano i aso nei, o ē ua laveaʻiina mai le nofo pologa i le agasala ma le oti. E ao ona tatou faia le mea aupito i sili tatou te mafai ina ia ola e tusa ai ma le uluaʻi talosaga i le tatalo faaaʻoaʻo, e faapea: “Ia faapaiaina lou suafa.” (Mata. 6:9) O le manatunatu loloto i lenā suafa mamalu, e ao ona tāmau ai iā i tatou le mataʻu i le Atua. Sa iai i le tusitala o le Salamo e 111 le vaaiga saʻo i le mataʻu faale-Atua, e ala i le faapea mai: “O le mataʻu iā Ieova, o le amataga lea o le poto; ua i ai le mafaufau lelei iā te i latou uma o ē fai ia mea [tausia ana poloaʻiga].”—Sala 111:10.
19. O le ā o le a tatou iloiloina i le mataupu o sosoo mai?
19 O le a fesoasoani iā i tatou le mataʻu tatau i le Atua, ina ia ʻinoʻino ai i mea leaga. O le a fesoasoani foʻi iā i tatou ina ia faaaʻoaʻo ai i uiga matagofie o le Atua, e pei ona faaalia mai i le Salamo e 112 lea o le a tatou iloiloina i le mataupu o sosoo mai. O loo faaalia mai ai i lenā salamo le auala e tatou te agavaa ai, ina ia iai faatasi ma le faitau miliona o tagata o ē o le a olioli i le viiaina o Ie Atua e faavavau. E ao i tagata uma ona vivii atu iā te ia. “E tumau lona viiga e faavavau lava.”—Sala. 111:10.
Fesili e Manatunatu Loloto i Ai
• Aiseā ua tatau ai iā Ieova ona tatou vivii atu i ai ma le autasi?
• O ā uiga o Ieova ua faaalia mai i ana galuega?
• O le ā sou manatu i le faaeaga o le tauaveina o le suafa o le Atua?
[Fesili mo le Suʻesuʻega]
[Ata i le itulau 20]
O le māfuaaga autū e tatou te faapotopoto ai e lē aunoa i faapotopotoga, ina ia vivii atu iā Ieova
[Ata i le itulau 23]
O tulafono uma a Ieova e faavae mai i mataupu silisili e tumau ma maufaatuatuaina