Yehova Kuma U Se Wuese Un Ken Mkohol
Yehova Kuma U Se Wuese Un Ken Mkohol
“Wuese nen Yehova!” —PS. 111:1, NW.
1, 2. Inja i ishember i “Haleluya” la ér nyi, man i yar tom a i̱ ken Ruamabera u Mbakristu u ken Zwa Grika la nena?
“HALELUYA!” Mba hembe ungwan ishember ne ken ayou a aduaa a Mbakristu Mbaaiev. Mbagenev di ka ve soo u teren ishember ne ken kwaghôron ve. Nahan kpa, ka ior kpuaa tseegh ve fe ér inja i ishember ne ka icighan kwagh ye, shi uma u ior kpishi mba ve yaren tom a i kpa ne Aôndo icivir ga. (Titu 1:16) Dikishenali igen i̱ pasen asember a ken Bibilo kaa ér, ishember i “Haleluya” la ka “ishember i ior kposo kposo mba yange ve nger pasalmi ve yar tom a mi u lôhôn hanma or ér nana kohol ve u wuese Yehova yô.” Mbatimen sha akaa a ken Bibilo kpishi kaa ér inja i ishember i “Hale luya” la ér “ ‘Wuese nen Ter,’ [ka] Yehova je la.”
2 Nahan kpa, Bibilo i New World Translation gema ishember i “Haleluya,” i i ter ken Bibilo i ken zwa Tiv ken Pasalmi 111:1 la ér, “Wuese nen Yehova!” I yar tom a ishember i ken zwa Grika, i i lu kwagh môm a ishember i “wuese nen Yehova” la kwa nyiin ken Mpase 19:1-6, u ember mtim u kwaghaôndo u aiegh. Shighe u a tim kwaghaôndo u aiegh kera la, mbacivir Aôndo mba mimi vea hemba lun a ityôkyaa i injaa i yaren tom a ishember i “Haleluya” ne sha gbenda u civirigh.
Ityom Na i Kpilighyol
3. Se mba kombo imôngo hanma shighe sha ci u nyi?
3 Orngeren Pasalmi 111 ôr atôakyaa kpishi a a ne ve i doo u se wuese Yehova ken mkohol yô. Ivur i sha môm la kaa ér: ‘Me wuese TER a ishima yam cii, ken nongo u mbaperapera kua ken mkohol kpaa.’ Kape Mbashiada mba Yehova kpa ve eren nyian je la. Ityôkyaa i vesen i se kombo imôngo ken atôônanongo a ase man sha mbamkohol mba vesen hanma shighe yô, ka u wuese Yehova.
4. Uumace vea time sha ityom i Yehova nena, man doo u kwagh ne una bende a vese nena?
4 ‘Ityom i TER kehe je, ka kwagh u timen sha mi hen mba i doo ve ishima cii yô.’ (Ps. 111:2) Hen ase sha ishember i “timen sha mi” ne. Takerada ugen kaa ér ivur ne ôr kwagh u “uumace mba ve henen sha ityom i Aôndo shi ve gbidi kwar sha mi kpoghuloo” la. Hanma kwagh u Yehova a gbe yô, a gba un a washima u dedoo. A ver iyange man tar man uwer sha inja vough, mô hemba ngun ikyua shin ica a ugen ga; a ver akaa ne sha inja sha inja sha er tar wase ua tsee akuma akuma shi ua zuan a iwanger man ime man sev man ashighe kposo kposo, shi agôndoamnger kpa aa moughon shin zegemnger sha inja sha inja yô.
5. Uumace vea time sha ityom i Yehova nena?
5 Mbatôvonkwaghfan u sangen yeke seer henen akaa a he sha gbenda u i ver tar ken ukpo mba ningir iyange la, shi ve seer zuan a mfe sha mningir u uwer u ningir tar sha inja la kua indi man myohom ma u kpaa. Gbenda u i ver uwer man tar sha inja shi ve eren tom ken mzough la ka u wase u van a ashighe kposo kposo. Shi i seer zuan a mfe sha kwagh u ityahav mbi sha gbaaôndo mbigenev mbi mbi lu sha, se nengen a mi ga, mbi mbi wasen akaa a shin tar la. Profesôr ugen u a lu a mfe u sangen yeke tsough tsough yô ôr ken takerada ugen, u a lu a itinekwagh ér, “The Designed ‘Just So’ Universe,” la ér: “Taver se u fan er i hii ve mbatôvonkwaghfan u sangen yeke kpishi ve gem ishima ken anyom 30 a a kar ken ijime la ga, ve hide ve kaa ér saa or nana lu a jighjigh u nan taveraa ve nana lumun ér akaa a a lu sha won cii ne gba duen abu ga ye. Sha ci u er se lu seer fan kwagh u tar wase u i gbe u sha inja ne yô, se mba hemban zuan a atôakyaa kpishi a nan jighjigh ér ka or u lun a mfe tsough tsough nan gbe tar ne ye.”
6. Ú nenge gbenda u Aôndo a er or la nena?
6 Kwagh u kpilighyol ugen u Aôndo a er yô, ka gbenda u a gbe se la. (Ps. 139:14) Aôndo yange gba or na nan mhen man iyol kua alegh agen, á aa wase iyol u eren tom tsembelee yô, shi a na or agee man mfe u eren tom kpaa. U tesen ikyav yô, mfe u Aôndo a ne or u lamen shi ungwan kwagh shi ngeren kwagh shi ôron takerada la ka ivande. Ior kpishi mba a akaa ne cii. Shi Aôndo gba u sha gbenda u ú fatyô u tilen sha jighilii yô. Gbenda u Aôndo a er se la kpilighyol, a na se mfe u zenden shi eren tom, shi a er se sha gbenda u se ya kwagh una sough se ken iyol sha er se zua a agee a eren tom yô. Sha kpôô yô, gbenda u i er se la kpilighyol kpen kpen. Gbenda u igbila i eren tom ve í wasen we u henen kwagh shi í wasen ashe man ato man ahenga man zwa kua akaa agen u eren tom tsembelee la hemba nyityôkwagh i mbatôvonkwaghfan u sangen yeke ve er cii. Sha mimi yô, ka mhen man alegh a iyolough a injaa a i gbe uumace a mi la a wasen ve u eren akaa ye. A alegh a iyolough a injaa ne shio yô, injinia u nan hembe lun a mfe sha won cii kpa man nan fetyô u eren kwagh u doon man u injaa er ahôaveegh ase a pue la nahan ga. Nahan pine ase iyol you wer, ‘Aa ave a injaa a Aôndo a ne se ne shio yô, ma se fetyô u gban akaa a injaa shi eren akaa a injaa kpa?’
Ityom i Kpilighyol i Aôndo man Aeren a Na
7. Bibilo ka môm ken ityom i kpilighyol i Aôndo a er nena?
7 Akaa a kpilighyol agen a Yehova a er yô, wa akaa a vesen agen a a er sha ci u uumace la ker, er se nenge i pase ken Bibilo nahan. Bibilo ka takerada u doon u Yehova a er yô, ityakerada i i lu ker kposo kposo la cii ôr kwagh môm. Icighanruamabera cii “ka Aôndo A ne i nger ye.” (2 Tim. 3:16) U tesen ikyav yô, Genese u a lu takerada u hiihii u Bibilo la pase er Aôndo yange tim mbaaferev sha shighe u Noa la yô. Ekesodu u a lu takerada u sha uhar u ken Bibilo la di ôr er Yehova yange due a Mbaiserael ken kpan kera ken tar u Igipiti, sha u tesen er un lu Aôndo tswen yô. Orpasalmi kpa yange fa kwagh ne, ka nahan man ôr mkaanem man ye, ér: ‘Tom [u Yehova] ka u icivirigh man u engem kpishi kpaa, perapera Na kpaa ngu gbem sha won. A er ityom Na i kpilighyol er á umbur i yô; TER ngu a mrumun u sha mhôôn man mhôônom ma zungwen kpaa.’ (Ps. 111:3, 4) Ú hen wer, ityom i kpilighyol i Yehova a er, hii sha igbetar zan zan hegen, kua akaa a a er shighe u ú lu uma ne cii, ka akaa a nan un ‘icivir man iengem’ ga he?
8, 9. (a) Aeren a Aôndo kaha kposo a uumace nena? (b) Ka aeren a Aôndo a nyi a doo u we?
8 Orpasalmi shi ôr kwagh u aeren a doon a Yehova, er perapera man mrumun u sha mhôôn man mhôônom ma zungwen nahan. Ka i taver uumace mba ve yen ne kpishi u eren aeren a perapera. Ashighe kpishi, uumace ka ve er kwagh sha hua man sha iyuhwe man sha iyolmoron kpaa. Se nenge ikyav i kwagh ne ken ikyav mbi tswamev mbi ior ve lu varen sha u nôngon inium shi zuan a inyaregh la. Akaa ne gbihi uumace umiliôn imôngo ken ican. Shi ityom i uumace ve eren kpishi ka i na mbagenev ve hingir u yan ican. Mbagenev kpishi vea tese ikyav i̱ imba ieren ne sha ikpan i yange i yar tom a í sha u maan agungu a hôron ityough ken Igipiti la. Yange i maa agundu ne lu iwar i iin Ufarao mba Igipiti ker. Nyian kpa, ior kpishi mba nzughul a mbagenev tseegh ga, mba ‘vihin tar’ ne kpaa.—Ôr Mpase 11:18.
9 Aeren a uumace kaha kposo a a Yehova, sha ci u Yehova eren kwagh u vough hanma shighe cii. Môm ken akaa a Yehova a er sha ci u se uumace mbaasorabo ne yô, ka gbenda u a bugh se u zuan a myom sha mhôônom nam ma zungwen la. Ipaa i Aôndo a ne sha ci wase la “tese perapera Na.” (Rom. 3:25, 26) Sha kpôô yô, “perapera [u Aôndo] . . . ngu gbem sha won.” Shi se nenge a mrumun u sha mhôôn u Aôndo sha gbenda u a er kwagh a uumace mbaasorabo la. Ashighe agen Aôndo yange una zamber a Mbaiserael ér ve undu igbenda ve ibo, ve hide ve eren kwagh u vough yô, a lam a ve sha imo i kundu kundu, a kaa a ve ér “Ungwa nen ase.”—Ôr Esekiel 18:25.
Yehova Kur Uityendezwa Nav
10. Ka ikyav i ieren i mimi i nyi Yehova a ver se sha kwagh u ikyur i̱ ya vea Aberaham laa?
10 ‘A na mba ve cie Un la kwaghyan; Una zer umbur ikyuryan Na gbem.’ (Ps. 111:5) Ka inja er ikyuryan i orpasalmi a ter heen ne ka ikyur i Aôndo yange ya vea Aberaham la nahan. Yehova yange tôndo zwa ér una ver vor u Aberaham doo doo shi kaa ér vea ngohol hundagar u mbaihyomov vev. (Gen. 22:17, 18; Ps. 105:8, 9) Uityendezwa mban yange ve hii kuren shighe u vor la hingir ikyurior i Iserael la. Er ikyurior ne i hingir ikpan ken Igipiti ica i gba nahan kpa “Aôndo umbur ikyuryan Na a Aberaham,” nahan yima ve. (Eks. 2:24) Gbenda u Yehova er kwagh a ve la tese ér ngu Aôndo u tangen iyol ga. Aôndo yange koso ve, shi ôr ve akaa a vea er ve vea kura atindi a na yô. (Dut. 6:1-3; 8:4; Neh. 9:21) Nahan kpa, ken uderimbaanyomov mba ken hemen mbara cii, kwagh kera gba ikyurior ne a atindi a Aôndo ga; er Aôndo tindi uprofeti nav ér ve wase ve, ve hide hen a na nahan kpa, ve soo ga. Aôndo yange due a Mbaiserael ken Igipiti, anyom nga karen ka hembe er 1,500 nahan yô, a tindi Wan na u môm môm la shin tar. Nahan kpa, Mbayuda kpishi ngohol Yesu ga, ve gema ve na zwa ér i wua un. Kwagh ne na yô, Yehova hide tsua Iserael u ken jijingi, ka “Iserael u Aôndo” je la. Ikyurior ne kua Kristu cii ve hingir vor u ken jijingi u Aberaham, ú Yehova tôndozwa ér una ver akuraior cii sha ikyev i ú la.—Gal. 3:16, 29; 6:16.
11. Yehova ngu “umbur ikyuryan Na” vea Aberaham nyian nena?
11 Aôndo ngu “umbur ikyuryan Na” vea Aberaham kua averen a a tende zwa ér ikyuryan la ia va a mi la. Ngu nan se kwaghyan u ken jijingi nyian mgbeghaa ken ijô i hemban 400. Shi ongo mbamsen asev mba se sen ser a kure mbamgbe asev, er i er ken mkaanem man nahan la. Ma kaa ér: “Na se kwaghyan wase u a lu sha ci u ayange ayange la.”—Luka 11:3; Ps. 72:16, 17; Yes. 25:6-8.
Agee a Kpilighyol a Yehova
12. Aôndo yange na Mbaiserael “dyako u atôatyev” nena?
12 ‘A tese ior Nav agee a ityom Na, sha er A ne ve dyako u atôatyev yô.’ (Ps. 111:6) Kwagh u kpilighyol u Aôndo yange er sha ci u Mbaiserael, u alaghga orpasalmi lu a mi ken ishima ve ôr mkaanem ma ma lu sha heen ne yô, lu myem u Aôndo yima ve due a ve ken Igipiti sha ivande la. Yehova yange hemen ve, nyôr a ve ken Tar u Ityendezwa shi na ve agee ve hemba ityartor i i lu sha ityoughkitaregh man shin ityôtar, yande Yordan la. (Ôr Nehemia 9:22-25.) Yehova yange na Mbaiserael “dyako u atôatyev.” Nenge imba agee a Aôndo ne sha wono!
13, 14. (a) Ka agee a Aôndo yange tese sha kwagh u Babilon a nyi alaghga orpasalmi lu ôron kwagh u a? (b) Ka akaa a ageegh agen a nyi Aôndo yange er sha u yiman ior nava?
13 Er Yehova er akaa kpishi sha ci u Mbaiserael nahan kpa, ve na Un man uter vev mba tsev, er Aberaham man Isaka man Yakob nahan icivir ga. Kpa ve za hemen u taver Aôndo ityough zan zan a va na Mbababilon ian ve kôr ve, ve yem a ve uikyangen. (2 Kron. 36:15-17; Neh. 9:28-30) Mbatimen sha akaa a ken Bibilo mbagenev kaa ér or u ngeren Pasalmi 111 la yange una lu uma sha shighe u Mbaiserael due ken uikyangen ken Babilon, ve hide ken tar ve la yô, ma hemba zuan a atôakyaa a wuese Yehova sha er a lu Aôndo u mimi man u ageegh yô. Aôndo yange tese agee a na shighe u due a Mbayuda ken Babilon kera la, sha ci u Babilon lu tartor u u soon u nan mbakwarev ian ér ve hide ken tar ve ga yô.—Yes. 14:4, 17.
14 Uderimbaanyomov yange mba karen er utaan nahan yô, Yehova tese agee a na sha gbenda u hemban kpilighyol cii; yange yima mba ve gema ishima sha asorabo a ve la sha ikyev i isholibo man ku kera. (Rom. 5:12) Kwagh u injaa môm u yange due ken kwagh ne yô, lu gbenda u i bugh sha er iorov 144,000 vea hingir mbadondon Kristu mba i shigh ve mkurem la. Mba ker ken inyom i 1919 la yô, Yehova shi tese agee a na sha u duen a asande a mba i shigh ve mkurem la ken ikyangenev mbi kwaghaôndo u aiegh kera. Akaa a ve lu eren ken ayange a masejime ne kpa tese agee a Aôndo. Aluer ve civir Aôndo sha mimi zan zan ku ve yô, vea za tema tor a Yesu Kristu sha, vea hemen tar sha ci u mkpeyol u uumace mba ve gem asema la. (Mpa. 2:26, 27; 5:9, 10) Vea ya dyako u tar u u hembe kehen a dyako u Mbaiserael mba tsuaa mbara yange ve ya la.—Mat. 5:5.
Akaawan a Tsôron, a i Doo u Se Suur sha mi Yô
15, 16. (a) Ityom i sha ave a Aôndo wa nyi man nyi kere? (b) Ka atindiakaa a nyi Aôndo yange na Mbaiserael mba tsuaa mbara?
15 ‘Ityom i sha ave Na ka i mimi man i vough kpaa; uiniezwa Nav cii ka mba dông, ve taver gbem, mayange á kera bee ga, i er ve sha mimi man perapera kpaa.’ (Ps. 111:7, 8) “Ityom i sha ave [a Yehova]” la kua ikpande i awen ihiar, i yange nger atindi a pue sha mi sha ci u Mbaiserael la kpaa. (Eks. 31:18) Atindi ne man atindiakaa agen a yange i kohol a ijiir i môm ve a hingir Tindi u Mose u ikyuryan la cii har sha akaawan a tsôron, a i doo u se suur sha mi yô.
16 U tesen ikyav yô, tindi môm ken atindi a sha ikpande awen la kaa ér: “M ngu Aôndo u gban iwuhe.” Shi tindi shon za hemen ér, mba Yehova a ‘doo ve ishima man ve we atindi a na ikyo yô, eren a udubu vev imôngo dedoo.’ Atindiakaa agen a yange i nger sha ikpande awen la kaa ér “civir teru man ngôu” shi “de iin ga,” shi atindi la pase wanger wanger er i doo u tômon kwagh u orgen ga yô.—Eks. 20:5, 6, 12, 15, 17.
Icighan Oryiman Wase u Kwagh Na a Cieryol La
17. Ka atôakyaa a nyi Mbaiserael yange ve lu a mi a tseghan iti i Aôndo?
17 ‘A tindi ior Nav a mpaa; A ver ikyuryan Na er i̱ lu gbem; iti Na ka i tseghan man i cier iyol kpaa.’ (Ps. 111:9) Kwagh u alaghga orpasalmi lu a mi ken ishima ve ôr kwagh ne yô, lu mkur u Yehova kure ikyuryan na aa Aberaham la. Sha nahan yô, shighe u ior mba Yehova lu ikpan ken Igipiti u tsuaa la man shighe u ve hingir mbakwarev ken Babilon la cii Yehova ta ve kera ga kpa yima ve sha ashighe ne cii. Akaa a ahar ne tseegh kpa yange ma na Mbaiserael ma ve tsegha iti i Aôndo.—Ôr Ekesodu 20:7; Mbaromanu 2:23, 24.
18. U nenge wer u pasen ior kwagh u iti i Aôndo ka kwagh u civirigh nena?
18 Nyian kpa Orkristu u i yem nan sha ikyev i isholibo man ku cii gba u nana tsegha iti i Yehova. Nahan doo u se nôngo sha afatyô wase cii se eren sha kwagh u hiihii u ka se sôn ken msen u Ter Wase ser: “I̱ tsegha iti You” la. (Mat. 6:9) Aluer se mba gbidyen kwar sha icighanti u Yehova yô, kwagh ne una wase se u cian un. Orngeren Pasalmi 111 la yange nenge mcie u cian Aôndo sha gbenda u vough, a kaa ér: ‘Mcie u cian Aôndo ka mhii u kwaghfan je la, mbaeren sha mi cii [mba ve kor atindi a na] yô, mba a mkav u dedoo; iwuese Na ngi gbem sha won.’ —Ps. 111:10.
19. Ka nyi se time sha mi ken kwaghngeren u a dondo laa?
19 Aluer se mba cian Aôndo sha mimi yô, kwagh ne una wase se se kôr kwaghbo ihyom. Shi una wase se se dondo aeren a dedoo a Aôndo a i er ken Pasalmi 112 la. Se time sha aeren ne ken kwaghngeren u a dondo la. Vegher u Pasalmi la ugen tese se kwagh u se er ve se lu imôngo vea ior umiliôn imôngo mba vea wuese Aôndo gbem sha won la yô. Sha kpôô yô, Yehova kuma iwuese. ‘Iwuese Na ngi gbem sha won.’—Ps. 111:10.
Mbampin mba Henen sha Kwagh
• Doo u se wuese Yehova ken mzough sha ci u nyi?
• Ityom i sha ave a Yehova ngi pasen aeren a na a nyi?
• U nenge ian i civirigh i pasen ior iti i Aôndo la nena?
[Mbampin Mba Ngeren u Henen]
[Foto u sha peeji 20]
Se mba kombo imôngo hanma shighe ser se wuese Yehova
[Foto u sha peeji 23]
Atindi a Yehova cii har sha akaawan a a lu gbem sha won, shi a kom u suur sha mi yô