Tweelede Kumutembaula Jehova Calukamantano
Tweelede Kumutembaula Jehova Calukamantano
“Amutembaule Jehova!”—INT. 111:1.
1, 2. Ino bbala lyakuti “Aleluya” lyaamba nzi, alimwi ino mbuti mbolibelesyegwa mu Magwalo aa Banakristo aa Chigiliki?
“ALELUYA!” Kanji-kanji bbala eeli lilamvwika muzikombelo zya Bunakristo Bwanyika. Bamwi balalibelesya mumibandi yabo yabuzuba abuzuba. Nokuba boobo, mbasyoonto buyo ibazyi bupanduluzi bwalyo alimwi banji ibalibelesya bapona buumi butamukkomanisyi Leza. (Tit. 1:16) Bbuku limwi lipandulula mabala aamu Bbaibbele lyaamba kuti bbala lyakuti “Aleluya, ndibbala lyakabelesyegwa abalembi bantembauzyo ziindene-indene ikutamba bantu boonse kuti babasangane mukutembaula Jehova.” Masimpe ngakuti, basikwiiya zyamu Bbaibbele banji baamba kuti ibbala lyakuti “Aleluya” lyaamba kuti “Amutembaule Jehova.”
2 Nkekaambo kaako, mu Bbaibbele lyamu Chitonga, majwi aali kulugwalo lwa Intembauzyo 111:1 aamba kuti: “Amutembaule Jehova!” Majwi aa Chigiliki ngamunya aaya ajanika ziindi zyone kulugwalo lwa Ciyubunuzyo 19:1-6 mukusekelela kunyonyoonwa kwabukombi bwakubeja. Eeci caakucitika, bakombi bakasimpe bayoocikonzya kubelesya bbala lyakuti “Aleluya” munzila yabulemu.
Milimo Yakwe Mipati
3. Ino nkaambo nzi kapati ncotubunganina ciindi coonse?
3 Imulembi wa Intembauzyo 111 upa twaambo tunji twalo itupa kuti Jehova ayelele kapati kuti tumutembaule calukamantano. Kapango 1 kaamba kuti: “Noolumba Jehova amoyo wangu woonse, munkuta yabaluleme amumbungano.” Bakamboni ba Jehova mazuba aano mbobalimvwa abalo oobu. Kaambo kapati ncotubunganina aantoomwe kumiswaangano yambungano alimwi amipati, nkutembaula Jehova.
4. Ino mbuti bantu mbobakonzya kulingaula milimo ya Jehova?
4 “Milimo ya-Jehova mipati! Ilalingulwa-lingulwa kuliboonse baibotelwa.” (Int. 111:2) Amubone majwi aakuti “ilalingulwa-lingulwa.” Kweelana abbuku limwi, kapango aaka kalakonzya kwaamba bantu “ibaiya kapati alimwi akuzinzibala kuyeeya” milimo ya Leza. Zilenge zya Jehova zijisi makanze aataliboteli. Wakabikka zuba, nyika alimwi amwezi mubusena bwazyo, zyoonse buyo kazili mubusena bweelede kutegwa nyika kaikasaala kabotu, kaijisi mumuni, kakuli masiku asikati, alimwi aziindi zyamwaka.
5. Ino kuyaambele mukumvwisya mbobupangidwe bubumbo nkwaacita muntu kuyubununa nzi?
5 Basayaansi bajana kuti nyika ikkede mubusena bweelede kapati mububumbo alimwi bupati bwamwezi amboulema cipa kuti kauzinguluka nyika munzila iigwasya. Bubambe bwazyintu zyamujulu eezyi alimwi ambozibelekela aantoomwe kupa kuti kube kucinca-cinca kutaliboteli kwaziindi zyamwaka. Alimwi, nzinji zyintu zyayiigwa kujatikizya mbozipangidwe zilengwaleza mububumbo. Aboobo, mucibalo cijisi mutwe wakuti: “The Designed ‘Just So’ Universe,” syaazibwene mumakani aasayaansi wakaamba kuti: “Ncuuba-uba kumvwisya kaambo basayaansi banji ncobacinca mizeezo mumyaka iili 30 yainda, kuzumina kuti kuyandika lusyomo kapati ikusyoma kuti bubumbo taakwe nobwakatalika buyo bwalikke. Kuli twaambo tunji tupa kusyoma kuti kuli muntu musongo iwakapanga zyintu ciindi notubona kabotu-kabotu nyika mboyakapangwa.”
6. Ino mulimvwa buti kujatikizya Leza mbwaakalenga muntu, alimwi ino nkaambo nzi?
6 Milimo aimbi mipati yakulenga njeeyo iijatikizya mbwaakatulenga Leza. (Int. 139:14) Ciindi naakali kulenga bantu, wakabapa mizeezo, mubili uuli azizo zyoonse ziyandika alimwi anguzu zyakucikonzya kubeleka. Mucikozyanyo, kuli nguzu zikankamanisya nzyaakabapa Leza zyakucikonzya kukanana akuswiilila, kulemba akubala. Bantu banji balizijisi nguzu eezyi. Alimwi mwakapangwa munzila iikankamanisya, nkokuti mubili wanu ulakonzya kwiimikila kakunyina kuwa. Mboupangidwe mubili, ikucikonzya kubeleka milimo alimwi ambougaya zyakulya kutegwa zibeleke mumubili, kulakankamanisya kapati. Kunze lyaboobo, insinga mbozijatene akupa kuti mizeezo yanu ikonzye kubeleka ncintu basayaansi ncobatakonzyi kucita. Kayi bantu nzyobakonzya kucita bazicita buyo akaambo kamizeezo njaakabapa Leza. Naba syaazibwene mumakani aasayaansi takonzyi kupanga cintu cibotu icijisi zibelesyo mbuli minwe yesu iili kkumi. Amulibuzye kuti: ‘Sena zyintu zyakupanga-panga alimwi amayake mabotu kapati naakapangwa kakunyina minwe njaakatupa Leza?’
Milimo ya Leza Mipati Alimwi Abube Bwakwe
7. Ino nkaambo nzi Bbaibbele ncotweelede kulibona kuti ndimwi lyamilimo mipati ya Leza?
7 Milimo mipati ya Jehova ibikkilizya zyintu azimbi zitaliboteli nzyaakacitila bantu, kweelana ambozyaambwa mu Bbaibbele. Bbaibbele kuligama mmulimo mupati wa Jehova alimwi mabbuku aali mumo aleendelana kapati munzila iigambya. Masimpe, mukwiimpana amabbuku aambi, ‘lyakazwa kuli Leza alimwi lilagwasya kukuyiisya.’ (2 Tim. 3:16) Mucikozyanyo, bbuku lyakusaanguna mu Bbaibbele, lya Matalikilo, lipandulula Leza mbwaakagwisya bubi anyika kuciindi ca Nowa. Ibbuku lyabili, ilya Kulonga, litondezya Jehova mbwaakasinizya kuti ngu Leza kwiinda mukunununa bana Israyeli kuzwa mubuzike mu Egepita. Kulibonya kuti sintembauzyo wakali kuyeeya twaambo ootu naakaamba kuti: “Kucita kwakwe [Jehova] nkwabulemu loko, bululami bwakwe bulijisi lyoonse. Wacita ciibalusyo camilimo yakwe iigambya, Jehova ngusibuuya, ngusiluzyalo.” (Int. 111:3, 4) Sena tamuzumini kuti milimo ya Jehova kuzwa kaindi, kubikkilizya ayamazuba aano nciibalusyo ‘kubulemu bwakwe’?
8, 9. (a) Ino muunzila nzi milimo ya Leza mboyiindene amilimo yabantu? (b) Ino mbube nzi bumwi mbwajisi Leza mbomukkomanina kapati?
8 Amubone kuti sintembauzyo alimwi ukankaizya bube bubotu bwa Jehova oobu bubikkilizya bululami, buuya, aluzyalo. Mulizyi kuti milimo yabantu batalondokede kanji-kanji tiiyeeme abululami pe. Ziindi zinji icitwa akaambo kabulyatu, munyono alimwi akulisumpula. Eeci cilalibonya muzilwanyo nzyobapanga kutegwa kababelesya munkondo nzyobatalisya alimwi akuti bajane mpindu mumakani aamakwebo. Kucita boobu kwaleta mapenzi aataambiki kutuulunzuma twabantu banyina mulandu. Alimwi, milimo yabantu yaleta mapenzi kubantu badyaaminidwe. Cikozyanyo comwe bantu banji ncobakonzya kwaamba ncakubelesya bazike mukuyaka maanda amwi mapati aamu Egepita. Maanda aaya akabelesyegwa kuba zyuumbwe zyabaleli basikulisumpula bamu Egepita. Kunze lyaboobo, milimo yabantu yamazuba aano taili yakudyaaminina buyo bantunyina, pele alimwi ‘inyonyoona nyika.’—Amubale Ciyubunuzyo 11:18.
9 Eeyi milimo iliindene kapati kumilimo ya Jehova, yalo ciindi coonse iyeeme abululami. Milimo yakwe ibikkilizya bubambe bwaluzyalo ibwakufwutula bantu basizibi. Kwiinda mukupa cinunuzyo, Leza wakali ‘kutondezya bululami bwakwe.’ (Rom. 3:25, 26) Masimpe, “bululami bwakwe bulijisi lyoonse.” Kujatikizya buuya, Leza wabutondezya kwiinda mukukkazyika moyo nkwaacita nayendelezya bantu basizibi. Wakabacitila cabuuya naakabakombelezya kuti beempwe akuleka kucita zibi.—Amubale Ezekieli 18:25.
Jehova Ulasyomeka Kuzisyomezyo Zyakwe
10. Ino ncikozyanyo nzi cakusyomeka Jehova ncaakapa kujatikizya cizuminano cakwe a Abrahamu?
10 “Basikumulemeka ulabaabila zilyo; ulayeeya cizuminano cakwe lyoonse.” (Int. 111:5) Kuboneka kuti sintembauzyo aawa waamba cizuminano ca Abrahamu. Jehova wakasyomezya kuti uyoolulongezya lunyungu lwa Abrahamu akwaamba kuti bayoovwuba mulyango wabasinkondonyina. (Matl. 22:17, 18; Int. 105:8, 9) Mukuzuzikizyigwa kwakusaanguna kwazisyomezyo eezyi, lunyungu lwa Abrahamu lwakazooba cisi ca Israyeli. Cisi eeci cakali ku Egepita mubuzike kwaciindi cilamfwu, pele “Leza [wakaibaluka] cizuminano cakwe ncaakatangana a-Abrahamu” mpoonya wakabanununa. (Kul. 2:24) Jehova wakeendelezya bantu bakwe munzila iitondezya kuti mmwaabi. Wakabapa zyakulya zyakumubili kutegwa zibagwasye kuba abuumi bubotu alimwi akubapa malailile alo aakali kubagwasya kutobela zyeelelo zyakwe. (Dt. 6:1-3; 8:4; Neh. 9:21) Mumyaanda yamyaka yakatobela, cisi eeci kanji-kanji tiicakali kumuswiilila Leza nokuba kuti wakali kutuma basinsimi kuyoobaambila kuti beempwe. Nokwakainda myaka yiinda ku 1,500 kuzwa ciindi naakabanununa bana Israyeli kuzwa ku Egepita, Leza wakatuma Mwanaakwe simuzyalwa alikke kuboola anyika. Iba Juda banji bakamukaka Jesu akuzumizya kuti ajaigwe. Mpoonya Jehova wakapanga cisi cipya icacikozyanyo, “bana ba-Israyeli ba-Leza.” Aantoomwe a Kristo, cisi eeci ndolunyungu lwacikozyanyo ilwa Abrahamu, Jehova ndwaakasinsima kuti ndwayoobelesya ikulongezya bantu.—Gal. 3:16, 29; 6:16.
11. Ino mbuti Jehova mbwaazumanana ‘kwiibaluka cizuminano’ cakwe a Abrahamu?
11 Jehova ulazumanana ‘kwiibaluka cizuminano cakwe’ azilongezyo nzyaakasyomezya kwiinda muli ncico. Mazuba aano, ulaabila cakulya cakumuuya cinji mumyaambo yiinda ku 400. Alimwi, ulazumanana kuswiilila kumipailo yesu iijatikizya ziyandika zyakumubili, kweelana amajwi aakuti: “Utupe zilyo zitweelede mazuba amazuba.”—Lk. 11:3; Int. 72:16, 17; Is. 25:6-8.
Nguzu zya Jehova Zigambya
12. Ino muunzila nzi bana Israyeli bansiku mbobakapegwa “lukono lwabamasi”?
12 “Bantu bakwe wababonya inguzu zyamilimo yakwe kukubapa lukono lwabamasi.” (Int. 111:6) Cintu comwe cipati cakacitika mu Israyeli ncayelede kuti ncaakali kuyeeya sintembauzyo nkunununwa kwabana Israyeli munzila yamaleele kuzwa ku Egepita. Ciindi Jehova naakabazumizya bana Israyeli kunjila mu Nyika Yakasyomezyegwa, bakacikonzya kuzunda mami aakali kujwe alimwi akumbo kwa Mulonga wa Jordano. (Amubale Nehemiya 9:22-25.) Masimpe, Jehova wakapa bana Israyeli “lukono lwabamasi.” Elo kaka nguzu zya Leza zyakalibonya!
13, 14. (a) Ino ncitondezyo nzi canguzu zya Leza kujatikizya Babuloni ncayelede kuti ncaakali kuyeeya sintembauzyo? (b) Ino mmilimo nzi mipati yakunununa bantu njaazuzikizya Jehova?
13 Nokuba boobo, tulizyi kabotu kuti nokuba kuti Jehova wakabacitila zyintu zili boobu, bana Israyeli kunyina nobakamulemeka walo naa bamasyaanyinakulu aaba, Abrahamu, Izaka alimwi a Jakobo. Bakazumanana kuzanga mane Leza wakabelesya bana Babuloni ikubagwisya munyika yabo, ikubatola mubuzike. (2 Mak. 36:15-17; Neh. 9:28-30) Ikuti mulembi wa Intembauzyo 111 wakapona ciindi bana Israyeli kabazwide kale mubuzike ku Babuloni kweelana ambobaamba basikwiiya makani aamu Bbaibbele bamwi, nkokuti wakajisi twaambo tunji twakumutembaula Jehova akaambo kakusyomeka alimwi anguzu zyakwe. Leza wakatondezya kusyomeka alimwi anguzu kwiinda mukunununa ba Juda kuzwa ku Babuloni—ibwami bwakajisi mulawo wakutaangununa baange.—Is. 14:4, 17.
14 Nokwakainda myaanda yamyaka yosanwe, Jehova wakabelesya nguzu zyakwe munzila mpati kwiinda mukunununa bantu kuzwa kucibi akulufwu. (Rom. 5:12) Eeci cakajalula nzila yakuti bantu ibali 144,000 babe basikutobela Kristo bananikidwe amuuya. Mu 1919, Jehova wakabelesya nguzu zyakwe kunununa basyeede kubananike aaba kuzwa mubuzike kubukombi bwakubeja. Zyoonse nzyobazuzikizya kuciindi cakumamanino ecino zilakonzya kwaambwa buyo kuti zyacitika akaambo kanguzu zya Leza. Ikuti bazumanana kusyomeka kusikila kulufwu, bayoolela nyika aantoomwe a Jesu Kristo kujulu kutegwa bantu beempwa bagwasyigwe. (Ciy. 2:26, 27; 5:9, 10) Bayookona nyika munzila mpati kwiinda mbobakakona bana Israyeli.—Mt. 5:5.
Njiisyo Zitamani Alimwi Zisyomeka
15, 16. (a) Ino nzyintu nzi zibikkilizyidwe akati kamilimo yamaanza aa Leza? (b) Ino mmalailile nzi Leza ngaakapa bana Israyeli bansiku?
15 “Milimo yamaanza aakwe njalusyomo abululami; milazyo yakwe yoonse ilasyomeka. Iliimvwi nji mane kukabe kutamani, yacitwa alusinizyo abululami.” (Int. 111:7, 8) Zibikkilizyidwe akati “[ka]milimo yamaanza aa” Jehova akali mabwe obile aakalembedwe milawo iili kkumi iyakali kuyandika kubana Israyeli. (Kul. 31:18) Milawo eeyi, aantoomwe amilawo iimbi yalo yakazooba akati ka Milawo ya Musa, iyeeme anjiisyo zitamani alimwi zisyomeka.
16 Mucikozyanyo, omwe akati kamalailile, naa milawo iyakali amabwe aayo, wakali wakuti: “Ndime Jehova Leza wako, ndi Leza sibuzuba.” Mulawo ooyu ulazumanana kwaamba kuti Jehova ulabafwida “luzyalo bantu bali zyuulu akati kabaabo ba[mu]yanda akulondola milazyo” yakwe. Mabwe aaya alimwi ajisi njiisyo zigwasya kapati ciindi coonse kubikkilizya awakuti “lemeka uso abanyoko” awakuti “utabbi,” alimwi amulawo uugwasya kumvwisya ncocitayandiki kunyomenena zyintu zyabantu bambi.—Kul. 20:5, 6, 12, 15, 17.
Munununi Wesu Uusalala Alimwi Uuyoosya
17. Ino ntwaambo nzi ntobakajisi bana Israyeli twakubona zyina lya Leza kuti lilasalala?
17 “Wakatumina bantu bakwe lununuko, watanga cizuminano cakwe cakutamana. Izina lyakwe lilasalala, lilayoosya.” (Int. 111:9) Alimwi, sintembauzyo weelede kuti wakali kuyeeya kusyomeka kwa Jehova kucizuminano cakwe a Abrahamu. Akaambo kaceeci, Jehova kunyina naakabalekelezya bantu bakwe mubuzike, kusaanguna ku Egepita mpoonya aku Babuloni. Muziindi zyoonse zyobile eezyi, Leza wakabanununa bantu bakwe. Eeyi milimo yobile buyo ya Leza yakeelede kupa bana Israyeli twaambo twakubona zyina lya Leza kuti lilasalala.—Amubale Kulonga 20:7; Ba-Roma 2:23, 24.
18. Ino nkaambo nzi ncomulimvwa kuti kwiitwa azyina lya Leza ncoolwe cipati?
18 Ncimwi buyo aku Banakristo mazuba aano balo ibanununwa kuzwa mubuzike bwacibi abwalufwu. Tweelede kupona kweelana amajwi aakulomba mataanzi aali mumupailo wacikozyanyo aakuti: “Alilemekwe izina lyako.” (Mt. 6:9) Kuzinzibala kuyeeya zyina eeli lilemekwa kapati kweelede kutupa kumuyoowa Leza. Mulembi wa Intembauzyo 111 kuyoowa Leza wakali kukubona munzila yeelede naakati: “Kulemeka Jehova matalikilo aabusongo; boonse bacita obo [kubamba milawo yakwe] bali amaanu mabotu.”—Int. 111:10.
19. Ino ncinzi ncotuyoolanga-langa mucibalo citobela?
19 Kuyoowa Leza ikuli kabotu kuyootugwasya kusula bubi. Alimwi kuyootugwasya kwiiya bube bwa Leza butaliboteli kweelana ambokutondezyedwe ku Intembauzyo 112, yalo njotuyoolanga-langa mucibalo citobela. Intembauzyo eeyi itondezya mbotukonzya kweelela kuba akati katuulunzuma twabantu ibayootembaula Jehova kukabe kutamani. Uleelede kutembaulwa. “Kutembaulwa kwakwe kuliimvwi nji cakutamana.”—Int. 111:10.
Mibuzyo Yakuzinzibala Kuyeeya
• Ino nkaambo nzi toonse ncotweelede kumutembaula Jehova?
• Ino mbube nzi bwa Jehova ibutondezyedwe mumilimo yakwe?
• Ino nkaambo nzi ncomulimvwa kuti kwiitwa azyina lya Leza ncoolwe cipati?
[Mibuzyo yaciiyo]
[Cifwanikiso icili apeeji 20]
Makanze eesu mapati ncotubunganina aantoomwe nkutembaula Jehova
[Cifwanikiso icili apeeji 23]
Milawo ya Jehova yoonse iyeeme anjiisyo zitamani alimwi zisyomeka