Nuuni Ubbay Yihoowa Galatiyoogee Bessiyaaba

“GODAA galatite!”—MAZAMURE 111:1.

1, 2. “Haleeluuyaa” giyoogee woygiyoogee? Kiristtaane Giriike Geeshsha Maxaafaa Xuufetun he qaalaa ayba ogiyan goˈettidonaa?

“HALEELUUYAA!” Daro woosa keettatun banttana Kiristtaane giyaageeti he qaalaa goˈettishin siyiyoogee meeze gididaba. Issi issi asay galla galla haasayiyo wode ha qaalaa goˈettees. Guutta asay he qaalay boncho gidiyoogaa erees; shin he qaalaa goˈettiya daroti deˈiyo deˈoy Xoossaa bonchissennaagaa. (Tiitu 1:16) Issi Geeshsha Maxaafaa dikishineeree, Haleeluuyaa giya qaalaa, “daro mazamuriyaa xaafidaageeti banttanaara asay issippe Yihoowa galatana mala ubbaa shoobbanau goˈettido qaala” giidi qonccissees. Geeshsha Maxaafaa eranchatuppe daroti, “Haleeluuyaa” giyoogee “‘Yaah galatite’ giyoogaa; [hegee] Yihoowa” malaatiyoogaa qonccissoosona.

²Ooratta Alamiyaa birshettan Mazamure 111:1n deˈiya qaalay “Inttenoo, Yaah sabbite” geetettiis. Worddo haymaanootiyaa xayuwaabaa yootiya Ajjuutaa 19:1-6n ha qaalay Giriikettuwan oyddu sohuwan deˈees. Hegee hanettiyo wode, tumu Kiristtaaneti “Haleeluuyaa” giya qaalaa boncho ogiyan goˈettiyo dumma gaasoy deˈana.

A Gita Oosota

3. Nuuni ubbatoo issippe shiiqiyo waanna halchoy aybee?

³Mazamure 111 giigissidaagee nuuni Yihoowa issippe hegaadan galatana bessiyoy aybissakko daro gaasuwaa yootees. Paydo 1y: “Suureti shiiqiyo yaa7an taani ta polo wozanaappe GODAA galatana” yaagees. Yihoowa Markkatussi ha wodiyan hegaadan siyettees. Nuuni gubaaˈe shiiqotuuninne gita shiiqotun ubbatoo issippe shiiqiyo waanna halchoy, Yihoowa galatanaassa.

4. Asaa naati Yihoowa oosota waatidi qoppana danddayiyoonaa?

⁴“GODAA oosoti ai keena gitee! Etan ufaittiyaageeti ubbai eta qoppanau bessees.” (Mazamure 111:2) “Qoppanau” giya qaalaa akeeka. Issi xuufee yootiyoogaadan, he xiqisee Xoossaa oosota “wozanappe wotti denttidi qoppiyaanne xannaˈiya” asa malaatana danddayees. Yihoowa meretati keehippe daronne maalaalissiya halchuwan giigidosona. I awa ayfiyaa, saˈaanne aginaa giigissiis; ubbaukka issoy issuwaara suure gidida gaytotettay deˈees; yaatiyo gishshau, saˈay hooˈoynne pooˈoy, qammaynne gallassay wodetinne haattaa beetay deˈiyoogaa gidana danddayiis.

5. Salo gufanttuwaabaanne saˈa micettaabaa asay loyttidi akeekiyoogan aybi qonccidee?

⁵ Saynttistteti awa ayfiyaa yuushuwan saˈay deˈiyo sohuwaa, nu aginay ba sohuwaappe deshennan yuuyiyoogaa, a yesuwaanne i ay keenaa  deexxiyaakko darobaa akeekidosona. Gita meretatu giddon deˈiya gaytotettaynne eti bantta sohuwan deˈiyoogee, loˈˈonne ubbatoo laamettiya wodeti deˈanaadan oottiis. Salo gufanttuwaaninne saˈa micettan deˈiya mereta wolqqati giigido loˈˈo ogiyaakka xeelliyaagan darobay qoncciis. “Loˈˈo Ogiyan Giigida Yuniverssiyaa” giya xuufiyan mekanikal injjeneeriyaa profeeseree kaallidi deˈiyaagaadan giis: “Daro saynttistteti aadhida 30⁠u layttatun bantta qofaa laammidoy aybissakko akeekanau metenna. Salo gufanttoynne saˈa micettay merettennan coo yiis giidi maayanau wolqqaama ammanuwaa koshshees. Nuuni deˈiyo biittaabaa xeelliyaagan daro akeekaa demmiyoogee medhida eranchay deˈiyoogaa qonccissees.”

6. Xoossay asaa medhido ogiyaa xeelliyaagan neeyyo aybi siyettii?

⁶ Meretaara gayttidaagan hara gita oosoy Xoossay nuna medhido hanotaa. (Mazamure 139:14) I asa medhiyo wode, guuggee, kumetta bollaa kifiletinne oottana danddayiyo abbeenne hanotay deˈanaadan oottiis. Leemisuwau, Xoossay immido maalaalissiya imotatuppe haasayiyoonne siyiyo, qassi xaafiyoonne nabbabiyo abbee deˈees. Daro asau he abbee deˈees. Neeni merettido ogeekka maalaalissiyaagaa—sitti gaada eqqana danddayiyo abbee neeyyo deˈees. Ne bollay giigidonne ne bollaa miizaanaa naagana danddayiyo hanotay, bollay kaattaa gaaccidi wolqqau laammiyo hanotay maalaalissiyaagaa. Hegaappekka aadhidi, ne guuggeenne ne bessi bollati oottanaadan nerveti issoy issuwaara gayttido maalaalissiya hanotay saynttistteti oottido aybiiraanne laggeyiyooba gidenna. Asaa naatuyyo guuggeenne bessi bollati imettibeennaba gidiyaakko, eti bantta oottidobaa oottana danddayennaagee qoncce. Daro eray deˈiyoonne keehippe loohida injjineeriyaakka gidin, loˈˈiyaanne goˈˈiya ogiyan giigida ne tammu biradhetu mala medhana danddayenna. Ne huuphiyaa hagaadan oycha, ‘Asi oottido garamissiya misileenne keexxido keettay Xoossay immido biradheta hiillan goˈettennan oosettana danddayiyaabee?’

Xoossaa Gita Oosotanne A Eeshshata

7. Geeshsha Maxaafaa, Xoossaa gita oosotuppe issuwaadan xeellana koshshiyoy aybissee?

⁷ Geeshsha Maxaafan qonccidaagaadan, Yihoowa gita oosoy i asaa naatuyyo oottido hara maalaalissiyabatakka gujjees. Geeshsha Maxaafay maalaalissiya Yihoowa ooso; qassi a giddon deˈiya qofay issoy issuwaara moggees. Hara ay maxaafaappekka dumma ogiyan, an tumuppe ‘Xoossaa ayyaanay deˈeesinne tamaarissanau maaddees.’ (2 Ximootiyoosa 3:16) Leemisuwau, Geeshsha Maxaafan koyro maxaafay, Doomettaabay, Xoossay Nohe wode saˈaappe iitatettaa waatidi xayssidaakko yootees. Naaˈantto maxaafay, Kessaabay, Israaˈeelata Gibxxe aylletettaappe kessido wode, Yihooway ba Xoossatettaa waatidi qonccissidaakko yootees. Mazamuraawee kaallidi deˈiyaagaa giidoy hegaa mala hanotaa qoppidi gidennan aggenna: “[GODAA] oosoti bonchchuwaaninne anggan kumidaageeta. A xillotettaikka merinaassi de7⁠ees. I ba maalaalissiya oosoti hassayettanaadan oottiis. GODAI qarettiyaagaanne maariyaagaa.” (Mazamure 111:3, 4) Ne deˈo layttan oosettidaageeta gujjin, taarike wode ubban Yihooway oottidobati a ‘bonchuwaanne a anggaa’ hassayanaadan oottiyoogaa maayikkii?

8, 9. (a) Xoossaa oosoy asay oottido daro oosuwaappe dummatiyoy ayba ogiyaanee? (b) Nena ufayssiya, Xoossaa eeshshatuppe amaridaageeti awugeetee?

⁸ Ha mazamuraawee maalaalissiya Yihoowa eeshshata, giishin xillotettaa, qaretaanne maarotettaa milatiyaageeta loytti qonccissidoogaakka hassaya. Nagarancha gidida asaa naatu oosoy xillotettan baasettiyoy issi issitoo xalla gidiyoogaa eraasa. Eta oosoy darotoo baasettidoy yaaretiyoogaana, qanaatiyoogaananne otorettiyoogaana. Asaa naati olay aakkanaadan oottanaunne banttau goˈˈaa demmanau medhiyo hanttaara ola miishshay hegaa qonccissees. Hegee miilooniyan qoodettiya saro asaa bolli wolqqaama tuggaynne hirggay gakkanaadan oottees. Asaa naati oottido darobay hiyyeesata huqqunnidi etan goˈettiyoogan beettidaba. Hegau daroti leemisodan yootiyoy piraamidiyaa oottanau aylleta goˈettidoogaa. Hegee darotoo otorettiya Gibxxe Kawoti moogettiyo soho gididi goˈˈiis. Hegaa  bollan, ha wodiyan asay oottiyo darobay asay huqqunnettanaadan oottiyaagaa xalla gidennan ‘saˈaa xayssiyaagaa.’—Ajjuutaa 11:18 nabbaba.

⁹ Hegee ubbatoo likke gidida Yihoowa oosotuppe ay keena dummatiyaabee! A oosoti nagarancha gidida asaa naatu atotettau maarotettaa giigissotakka gujjiyaageeta. Xoossay wozuwaa giigissiyoogan ‘ba xillotettaa bessiis.’ (Roome 3:25, 26) ‘A xillotettay merinaassi deˈees’! Xoossay nagarancha gidida asaa naatuura gayttidaagan danddayan oottidoban a qaretay qoncciis. Issi issitoo, asaa naati bantta iita oosuwaa aggidi loˈˈobaa oottanaadan kehatettan woossiis.—Hizqqeela 18:25 nabbaba.

Ba Gelido Qaalaa Poliyoogan Ammanettiyaagaa

10. Yihooway Abrahaameera maacettido maachaa xeelliyaagan ammanettiyoogan ayba leemiso gidiyaabaa oottidee?

¹⁰“Baayyo yayyiyaageetuyyo qumaa i immees; i ba maachchaa merinaukka qoppees.” (Mazamure 111:5) Mazamuraawee ha sohuwan yootidoy Yihooway Abrahaameera maacettido maachaa milatees. Yihooway Abrahaama zareta anjjanaunne eti bantta morkketu biittaa laattanaagaa qaalaa geliis. (Doomettaabaa 22:17, 18; Mazamure 105:8, 9) He qaalaa koyro poluwaa maaraadan, Abrahaama zareti Israaˈeele dere gididosona. He deree daro wodiyau Gibxxen aylle gidiis; shin ‘Xoossay Abrahaameera maacetto maachaa hassayidi’ eta yaappe kessiis. (Kessaabaa 2:24) Yihooway eta oyqqido hanotay i ay keena qarettiyaakko bessees. I eta bollau koshshiya qumaanne ba baaso maarata kaallanaadan ayyaanaa qumaa immiis. (Zaarettido Wogaa 6:1-3; 8:4; Nahimiyaa 9:21) Hegaappe kaallidi deˈiya wodetun, he deree Xoossaappe darotoo haakkidaba gidikkonne, eti baakko simmanaadan hananabaa yootiyaageeti eta zoranaadan kiittiis. Israaˈeeleta Gibxxeppe kessoosappe 1,500⁠u layttappe dariya wodee aadhi simmin, Xoossay ba mexi issi Naˈaa saˈaa kiittiis. Ayhudatuppe daroti Yesuusa ixxidosonanne hayqqanaadan aattidi immidosona. Hegaappe Yihooway ooratta deree, ayyaana dere gidida “Xoossaa Israaˈeelee” deˈanaadan oottiis. He deree Kiristtoosaara gididi, Yihooway asaa naata anjjanaassi goˈettanau kaseti yootido Abrahaama zare gidiis.—Galaatiyaa 3:16, 29; 6:16, NW.

11. Yihooway Abrahaameera ‘maacettido maachaa hassayiyoy’ ayba ogiyaanee?

¹¹ Yihooway ubbatoo ba ‘maachaa hassayeesinne’ hegaa baggaara ehaanau qaalaa gelido anjjuwaakka hassayees. Ha wodiyan i 400⁠ppe dariya qaalan gidi palahiya ayyaanaa qumay giiganaadan oottiiddi deˈees. Nuuni nu bollau koshshiya qumaa demmanau: “Hachchi hachchi koshshiya qumaa nuuyyo hachchi imma” yaagidi woossiyo woosaakka ubbatoo zaarees.—Luqaasa 11:3; Mazamure 72:16, 17; Isiyaasa 25:6-8.

Maalaalissiya Yihoowa Wolqqaa

12. Beni Israaˈeeletuyyo ‘allagatu biittay imettidoy’ ayba ogiyaanee?

¹²“Allagatu biittaa immiyoogan ba oosuwaa wolqqaa ba asaa bessiis.” (Mazamure 111:6) Mazamuraawee qoppido, Israaˈeele taarikiyan polettida garamissiyaabay eti maalaalissiya ogiyan Gibxxeppe kiyidoogaa gidana danddayees. Wurssettan, Yihooway Israaˈeeleti Hidootan Naagiyo Biittaa laattanaadan oottin, eti Yorddaanoosa SHaafaappe arggonne arshsho baggan deˈiya kawotettata xoonana danddayidosona. (Nahimiyaa 9:22-25 nabbaba.) Ee, Yihooway Israaˈeeletuyyo ‘allagatu biittaa immiis.’ Hegee Xoossaa wolqqaa keehippe qonccissiyaaba!

13, 14. (a) Mazamuraawee qoppidoba gidana danddayiya, Baabilooneera gayttidaagan Xoossaa wolqqaa qonccissiyay aybee? (b) Yihooway keehi gita gidida ogiyan naxa kessiyoogan polido harabay aybee?

¹³ Yihooway etau hegaa ubbaa oottidaba gidikkonne, Israaˈeelati a bonchibeennaagaanne bantta mayzza aawata Abrahaama, Yisaaqanne Yaaqoobakka bonchibeennaagaa akeekoos. Xoossay Baabilooneta goˈettidi Israaˈeeleta biittaappe kessidi, eti omoodettanaadan oottana gakkanaassi makkaliyoogaa aggibookkona. (2 Odiya 36:15-17; Nahimiyaa 9:28-30) Geeshsha Maxaafaa issi issi eranchati giyoogaadan, Mazamure 111 giigissidaagee deˈidoy Israaˈeeleti Baabiloone omooduwaappe simmido wode gidikko, Yihooway ammanettiyo gishshaunne a wolqqaa gishshau a  galatiyo daro gaasoy deˈees. Omooddidoogeeta omooduwaappe yeddiyo wogi baynna Baabiloonetu kushiyaappe Ayhudata kessiyoogan Xoossay hegaa bessiis.—Isiyaasa 14:4, 17.

¹⁴ Ichashu xeetu layttappe guyyiyan, bantta nagaraappe simmana koyiya asaa naata nagaraanne hayquwaa aylletettaappe kessanau, Yihooway ba wolqqaa hegaappekka dariya ogiyan goˈettiis. (Roome 5:12) Hegee 144,000⁠u asati Kiristtoosa kaalliya ayyaanan tiyettidaageeta gidanaadan ogiyaa dooyiis. Yihooway ba wolqqaa goˈettidi, 1919n tiyettidaageetuppe attida guuttata worddo haymaanootiyaa omooduwaappe kessiis. Ha wurssetta wodiyan eti oottiyoobay Xoossaa wolqqa xallan oosettana danddayiyaaba. Eti hayqqana gakkanaashin ammanettiyaageeta gidiyoogaa qonccissidi, nagaraappe simmana koyiya asaa naatu goˈˈau, Yesuus Kiristtoosaara saluwan uttidi saˈaa haariyoogan shaahettoosona. (Ajjuutaa 2:26, 27; 5:9, 10) Beni Israaˈeeletugaappe keehi aadhiya ogiyan eti saˈaa laattana.—Maatiyoosa 5:5.

Merinau Dˈiya, Ammanettiyo Baaso Siraatata

15, 16. (a) Xoossaa kushiyaa oosota geetettidaageetun aybi deˈii? (b) Beni Israaˈeeletuyyo Xoossay ayba higge immidee?

¹⁵“A kushiyaa oosoti tumanne likke; A wogatikka ubbai ammanettiyaageeta. Etinne meri merinau eqqidi de7⁠iyaageeta; tumatettaaninne suuretettan imettidaageeta.” (Mazamure 111:7, 8) “[Yihoowa] kushiyaa oosoti” Israaˈeeletuyyo imettida, masettida naaˈˈu shuchan xaafettida keehippe koshshiya tammu higgeta gujjoosona. (Kessaabaa 31:18) Ha higgeti, hara wogata ubbaa gujjin, Muuse Higgiyaa maachaa shaaho gididosona; eti merinau deˈiya, ammanettiyo baaso siraatata.

¹⁶ Leemisuwau, he masettida shuchan deˈiya wogatuppe, woykko higgetuppe issoy: “Taani, GODAI ne Xoossai qanaatiya Xoossaa” yaagees. He higgee Yihooway: “[Bana] siiqiyaanne [ba] azazuwaa naagiya sha7atussi siiquwaa bessiya Xoossaa” gidiyoogaakka gujjidi yootees. He masettida shuchan awudenne goˈˈiya, “ne aawaanne ne aayyiyo bonchcha” yaagiya, “Wuuqqoppa” yaagiyaanne haratubaa amottenna mala diggiya, ciimma akeekaa oyqqida baaso siraatati deˈoosona.—Kessaabaa 20:5, 6, 12, 15, 17.

Geeshshaa, Hoola Giyoogaanne Woziyaagaa

17. Israaˈeeleti Xoossaa sunttaa bonchana koshshiyo ayba gaasoti deˈiyoonaa?

¹⁷“I ba asaa wozidi kessiis; i ba maachchaa etaara merinau wottiis. A sunttai geeshshanne, “Hoola!” giissiyaagaa.” (Mazamure 111:9) Mazamuraawee haˈˈikka, Yihooway Abrahaamayyo qaalaa gelido maachau ammanettiyaagaa  gidiyoogaa qoppidaba milatees. Hegaappe denddidaagan, Yihooway ba asay koyro, beni Gibxxen aylle gididi deˈanaadaaninne guyyeppe Baabiloonen omooduwan deˈanaadan aggibeenna. Ha naaˈˈu hanotankka, Xoossay ba asaa wozidi kessiis. Etau oosettidabay ha naaˈˈu hanotatu xalla gidiyaakkokka, Israaˈeeleti Xoossaa sunttaa bonchana koshshees shin.—Kessaabaa 20:7; Roome 2:23, 24 nabbaba.

18. Xoossaa sunttan xeegettiyoogee gita maata gaada neeni qoppiyoy aybissee?

¹⁸ Hidooti baynna hanotan nagaraunne hayquwau aylle gidiyoogaappe wozettida, ha wodiyan deˈiya Kiristtaanetu hanotaykka hegaara issi mala. Yesuusi tamaarissido leemiso gidiya woosan koyro oychido, “Ne geeshsha sunttai anjjetto” giyaagaara nu deˈoy moggiyaagaa gidanaadan baaxetana koshshees. (Maatiyoosa 6:9) He boncho sunttan wotti dentti qoppiyoogee Xoossau yayyanaadan nuna denttettana koshshees. Mazamure 111 xaafidaagee, Xoossau suure yayyiyaagaa gidiyoogaa: “Eratettau koiroi GODAAYYO yayyiyoogaa; a wogaa oottiyaageetuyyo lo77⁠o akeekai de7⁠ees” yaagidi yootiis.—Mazamure 111:10.

19. Kaalliya huuphe yohuwan ay beˈanau deˈiyoo?

¹⁹ Xoossau bessiya ogiyan yayyiyoogee nuuni iitabaa ixxanaadan maaddees. Hegee nuuni kaalliya huuphe yohuwan beˈanaagaadan, Mazamure 112n qonccida Xoossaa loˈˈo eeshshatakka kaallanaadan maaddees. He mazamuree Xoossaa merinau galatiya miilooniyan qoodettiyaageetuura gidanau, nuuni waanidi gidaa kunttna danddayiyaakko qonccissees. Yihoowayyo hegaa mala galatay bessiyaaba. “GODAI merinau galatetto!”—Mazamure 111:10.

Wotti Denttidi Qoppanau Maaddiya Oyshata

• Nuuni ubbay Yihoowa galatana bessiyoy aybissee?

• Yihoowa oosotun qonccida a eeshshati awugeetee?

• Xoossaa sunttan xeegettiyoogaa aybidan xeellay?

[Oyshata]

[Sinttaa 18n deʼiya misiliyaa]

Nuuni ubaatoo shiiqiyo halchoy Yihoowa galatanaassa

[Sinttaa 21n deʼiya misiliyaa]

Yihoowa higgeti ubbay baasettidoy merinau deˈiya, ammanettiyo baaso siraataana