Aski jaqinakax wiñayaw Diosar yupaychapxani

“Aski jaqix aytatapunïniwa. [...] Jan tukuskiriwa.” (SAL. 112:6, 9.)

1. 1) ¿Dios nayraqatan sum sarnaqirinakax kuns suyasipki? 2) ¿Kunsa jisktʼasiñasa?

 KHITINAKATIX Dios nayraqatan sum sarnaqapki ukanakax wiñayaw Diosar jachʼañchapxani. Ukat Jehová Diosan luratanakap uñjasax kunjam Diosas ukwa jukʼamp yatxatapxani, ukatwa Jupar taqi chuym jachʼañchapxarakini. Uka urunakanxa, taqi kunas chiqapäxaniwa sasaw Salmo 112 jaljan sum uñachtʼayi. Ukampis akham jisktʼasiñasawa: “¿Kunjamatsa qullan Dios Awkisax aski jaqit jucharar jaqinakar uñjpachïstu?” sasa. Chiqansa, inaw jan pantjasiñatakix chʼamachasisksna, kunjamatsa pantjasikipuntanwa, awisax jan walinak kun lurtanxa (Rom. 3:23; Sant. 3:2).

2. ¿Kuna pä milagronaksa Jehová Diosax munasiñat luratayna?

² Jehová Diosax munasiñatwa jucharar jaqinakar askit uñjistu. ¿Kunsa ukatakix luräna? Nayraqatxa, Jupamp chik jakasiri wali munat Yuqapan jakäwipwa Marian purakapar uchatayna, ukhamata jan juchan jaqjama yuriñapataki (Luc. 1:30-35). Ukat kunapachatï uñisirinakapax jiwayapkäna ukhaxa, yaqha milagro luratayna. Mä ajayjam alaxpachan jakañapatakiw munat Yuqapar jaktayatayna (1 Ped. 3:18).

3. ¿Kunatsa Diosax Yuqapar jan tukuskir jakäw taqi chuyma churäna?

³ Ukat Jehová Diosax janiw Jesusarux aliqaki jaktaykänti, jan ukasti jan tukuskir jakäw churäna, mä arunxa, janipuniw khitis Jesusar jiwaykaspati (Heb. 7:15-17, 28). Chiqansa, taqi chuymaw Jehová Diosax uk luratayna, kuna laykutix sinti jan walinakansa janipuniw Jesusax Jupat jithiqtkänti. Maysa tuqitxa,  ukhamatwa Supayan kʼarïtap qhanstayarakïna. Jaqinakax janiw munasiñat luqtapktamti, jan ukasti, munañanakap jikxatañ laykukiw luqtapxtamxa sasaw Supayax Jehová Diosar qallasitayna (Pro. 27:11, NM).

4. 1) ¿Kunsa Jesusax alaxpachankxasax jiwas layku luräna, ukat Jehová Diosax kamachänsa? 2) Kuntï Jehová Diosampi Jesusampix juma layku lurapki ukxa, ¿kunjamsa uñjta?

⁴ Ukat alaxpachar sarxäna ukhaxa, kuntï “pachpa wilapa” wartasiwayasax jikxatawaykäna ukampiw ‘Dios nayraqatan jiwasat arxatasistu’. Ukat iyaw sasaw wali munasir Dios Awkisax kuntï Jesusax jiwatapampi jikxatkäna ukxa katuqasïna. Ukhamasti, Jesusax “jakañap luqtasiwayi uka tuqiw juchanakasax perdonatäxi”. Ukhamatwa mä ‘qʼuma chuymampi jakkir Diosar luqtasktanxa’. Chiqansa, kunjamtï Salmo 112 qalltan siski ukhamwa jiwasax saraktanxa: “¡Tatitux jachʼañchatäpan!” sasa (Heb. 9:12-14, 24; 1 Juan 2:2).

5. 1) Diosan suma uñjatäskakiñatakixa, ¿kun lurañas wakisi? 2) ¿Kuna tuqinakatsa Salmo 111 ukat Salmo 112 qillqatanakax mayakïkaspas ukhamaxa?

⁵ ¿Dios nayraqatan suma uñjatäskakiñatakix kun lurañas wakisispa? Jesucriston wila wartasitapar iyawsañasawa. Ukat niyakixay Jehová Diosax wal munaschistuxa, sapürupuniw Jupar wal yuspärañasa (Juan 3:16). Ukatxa, Bibliat sum yatiqasin ukarjam sarnaqañatak wal chʼamachasiñasarakiwa. Ukatwa Salmo 112 jaljax Diosar qʼuma chuymampi luqtañ tuqit parli. Chiqansa, wali suma iwxanakaw uka qillqatan utji, ukat Salmo 111 jaljampix mayakïkaspas ukhamawa. Ukat paypach jaljanakaw “¡Tatitux jachʼañchatäpan!” sasin qalltaraki. Ukat uka arunakxaruxa 22 filanakaw nayra Hebreo qillqatanakan utji, ukat sapa filasti janiw may maya qalltkiti, jan ukasti hebreo arut apstʼat 22 letranakampiw qallti. *

Kusisiña

6. ¿Salmo 112 jaljan parlki uka jaqix kuna bendicionanaksa katuqi?

⁶ “Tatitur axsartir jaqix kusisiñaniwa, arsutanakapar munasir jaqix kusisiñaniwa. Aski jaqin allchhinakapax akapachan qullanäpxaniwa, [wawanakapasti] uraqin munañanïpxaniwa.” (Sal. 112:1, 2.) Amuytʼañäni, aka qillqatanxa mä sapa ‘jaqitak’ nayraqat parli, ukampis paya jiskʼa tʼaqa tukuyañatakix waljanit parlxi. Ukhamasti, Salmo 112 qillqatax walja jaqitsa parlkaspa ukhamawa. Ukat apóstol Pablox Diosan amuytʼayatarakiw Salmo 112:9 jiskʼa tʼaqatxa nayra cristianonakar parlatayna. Ukanxa kunsa Diosax jupanak layku luratayna ukanakatwa parli (2 Corintios 9:8, 9 liytʼasiñapawa). Ukhamasti Salmo 112 jaljax wali askiwa, ukanwa kunja kusisitas aka qhipa urunakan cristianjamax jakassna ukanaksa parlaraki.

7. ¿Kunatsa Diosan luqtirinakapax Jupar axsartʼapxañapa, ukat kunjamsa Diosan kamachinakap uñjapxañapa?

⁷ Kunjamtï Salmo 112:1 jiskʼa tʼaqan parlkixa, chiqpach cristianonakax wali kusisitaw  ‘Diosar axsartʼasax’ jikxatasipxi. Chiqansa, Diosar jan chuym ustʼayañ munasaw Supayan apnaqat akapachar wal saykatapxi. Jupanakax Diosan Arupat yatxatañ ‘wal munapxaraki’, kamachinakapsa phuqapxarakiwa. Ukat taqi chuymaw Diosan Apnaqäwipat yatiyiris taqi chiqar sarapxaraki. Kunayman jaqinakaruw Jesusan arkirinakapar tukuyapxi ukat jan wali jaqinakarux Diosan taripañ urupat yatiyasipkaraki (Eze. 3:17, 18; Mat. 28:19, 20).

8. 1) Taqi chuym luqtasaxa, ¿kunjamsa Diosan markapax jikxatasi? 2) ¿Kunsa jutïrin katuqapxani?

⁸ Jichhürunakanxa, walpun Diosan markapax jilxattawayi, niyaw paqallq millonäxapxi, ¿kunatsa? Kuna laykutix Diosan kamachinakapwa phuqapxi. Ukat wali chʼaman markäkaspas ukhamawa, janiw khitis janiw ukhamäkiti siskaspati (Juan 10:16; Apo. 7:9, 14). Ukat kunapachatï Diosax taqi amtanakap phuqani ukhaxa, walja bendicionanakwa katuqapxani. Ukatxa Diosaw jachʼa tʼaqhisiñ urunakanx markapar jarkʼaqani, ukhamata mä ‘machaq uraqi’ uttʼayapxañapataki. Ukanxa, ‘taqi kunas chiqapapunïniwa’. Ukat Armagedón qhipatxa, jukʼamp suma askinakwa uñjapxani. Kunapachatï jiwat familiaranakapax jaktanipxani ukhaxa, wali sumwa katuqapxani. ¡Kunja sumakïkani! Chiqansa, Diosan kamachinakap ‘munirinakax’ wali sumwa jakasipxani, ukat Adanat katuqktan uka juchas jukʼat jukʼatwa chhaqtxarakini, mä arunxa, ‘Diosan wawanakapjamaw qhispiyat jakasipxani’ (2 Ped. 3:13; Rom. 8:21).

Yänakas sum apnaqapxañäni

9, 10. Chiqpach cristianonakax Diosat sum yatxatasaxa, ¿kuns lurapxi, ukat luratanakapax kunatsa wiñayatakïni?

⁹ “Walja yänakaw utapan utjani, jaqir khuyaptʼayañapasti jan tukuskirïniwa. Khuyapayasiñan aski jaqix, chʼamakan qhantir qhanjamaw kʼajti.” (Sal. 112:3, 4.) Bibliax qillqaskäna uka urunakanxa, Diosan yaqhip luqtirinakapax  wali qamirïpxänwa. Ukampis khitinakatix Dios nayraqatan sum sarnaqapki ukanakaw Diosatakix qamirïpxi. Chiqansa, inas pisinkirinakax jiskʼachat uñjasipxchi, kunjamtï Jesusan urunakapan pisinkirinakax yaqhachat uñjasipkäna ukhama, ukampis khitinakatï jan walja yänakanïpki ukanakaw Diosar alkatañ yatipxi (Luc 4:18; 7:22; Juan 7:49). Ukampis qamirinakas pisinkirinakas Diosar sum uñtʼasax sumwa Jupampi apassna (Mat. 6:20; 1 Tim. 6:18, 19; Santiago 2:5 liytʼasiñapawa).

¹⁰ Alaxpachar sarir cristianonakasa aka Uraqin jakañ suyirinakas janiw Diosat yatxatasax jupanakatakiki imasipkiti. Jan ukasti Supayan apnaqat aka chʼamak urunakan “qhantir qhanjamaw kʼaj[tapxi]”. ¿Kunjamsa? Diosan arunakapat jaqinakar yatiyasaw qhantʼir qhanjam kʼajtapxi. Ukat inas uñisirinakax jarkʼasipxchispa, ukampis janipuniw Diosan Apnaqäwipat suma yatiyäwinakxa saytʼayapkaspati. Jan ukasti kuntï yatiyasax jikxatapki ukax “jan tukuskirïniwa”. Ukat yantʼanakansa Diosar taqi chuym luqtasipkakini ukhaxa, wiñay jakañwa katuqapxani.

11, 12. ¿Kunjamsa Diosan luqtirinakapax yänakapampi yanaptʼapxi?

¹¹ Maysa tuqitxa, alaxpachar saririnakasa jan ukax “walja jaqinakjam” uñtʼatäpki ukanakas wali sumwa yänakapampix yanaptʼasipki. Salmo 112:9 jiskʼa tʼaqax akham siwa: “Jan kunan jaqinakaruw churäwinak waxtʼi” sasa. Ukhamaw jichhürunakan chiqa cristianonakax jilat kullakanakaparusa yaqhanakarus yanaptʼapxaraki. Ukat kunapachatï chijir puriñanakax utjki ukhaxa, jankʼakiw qullqimp yanaptʼapxi. Kunjamtï Jesusax siskänxa, ukanak lurasaw kusisit jikxatasipxi (Hechos 20:35; 2 Corintios 9:7 liytʼasiñapawa).

¹² Amtañäni, aka revistax 172 arunakan apsuñatakix walja qullqiw munasi ukat yaqhip chiqanakanxa, jaqix janiw qullqinïpkiti. Ukat janiw ukakïkiti, uqaranakatakisa juykhunakatakis aka revistax wakichasirakiwa.

Khuyaptʼayasiri ukat chiqapar taqi kun lurir jaqinaka

13. ¿Khitis taqinit sipansa wali khuyapayasirixa, ukat jiwasax kunjamatsa jupat yatiqassna?

¹³ “Aski jaqix khuyapayasiñ chuymamp maytʼiriwa.” (Sal. 112:5.) Chiqpachansa, janiw taqinis chiqpach khuyaptʼayasiñ laykux yaqhanakar churapkiti. Yaqhipax suma jaqïtwa sañatakikiw yaqhanakar kuns churapxi, ukat yaqhipax wali michʼasisaw kunsa waxtʼasiñ yatipxaraki. Jïsa, kunapachatï maynix ukham amuyunakampi kuns churistu ukhaxa, janikiw sum jikxatasktanti. Ukampis kunapachatï maynix munasiñat kuns churistu jan ukax yanaptʼistu ukhaxa, wali sum jikxatastanxa. Ukat Jehová Diosax taqinit sipansa wali suma waxtʼasiriwa, wali kusisiñampiw kuns churistu (1 Tim. 1:11, NM; Sant. 1:5, 17). Ukat Jesusax Awkipjam wali khuyapayasirirakiwa (Mar. 1:40-42). Ukhamasti, jiwasatï Jehová Dios nayraqatan suma uñjatäñ munstan ukhaxa, khuyaptʼayasirïñasarakiwa. Ukat jaqi masisarus wali munasiñampiw Diosan arunakapat yatichañasa.

14. ¿Kunjamatsa ‘chiqa chuymampi lurañanakas apnaqsna’?

¹⁴ “Chiqap chuymampiw [‘lurañanakap’, NM] apnaqi.” (Sal. 112:5.) Kunjamtï Biblian siskixa, Amuyasiri Chiqapa Uywatax Diosan chiqa kamachinakaparjamaw kuntï Uywiripataki lurañapäki ukxa phuqaski (Lucas 12:42-44 liytʼasiñapawa). Ukhamatwa tamanakan sum uñjapxañapatakix irpir chuymaninakarux Diosan Arupat wali sum yatichasiraki. Awisax jan walinakaw tamanak taypin utjaspa, ukhamasti ukanak uñjapxañapatakiw irpir chuymaninakar wakichasi. Ukat janiw ukakïkiti, sucursalanakansa misioneronakan utanakapansa jan ukax tamanakansa taqi kunas chiqaparuw lurasi, ukatakiw Amuyasiri Chiqapa Uywatax wal yanaptʼi. Chiqansa, janiw irpir chuymaninakakix taqi kunsa chiqapar lurapxañapäkiti, jan ukasti, sapa mayniw chiqapar sarnaqañasa, qullqi tuqitsa janiw mayninakampi jan walir puriñasäkiti (Miqueas 6:8, 11 liytʼasiñapawa).

 Aski jaqinakax kunsa katuqapxani

15, 16. 1) ¿Kunjamsa aski jaqinakax jan walinakar saykatapxi? 2) ¿Kun lurañsa Diosan luqtirinakapax jan jaytapki?

¹⁵ “Aski jaqix janipuniw kunapachas aynachtʼkaniti. Aski jaqix aytatapunïniwa. Jan wali yatiyäwinakarux janiw axsarkiti, chuymapax Tatitunkasax wali thurtʼatawa. Chuymapax chʼamañchatawa, janiw axsarkiti, timasirinakaparux sawkasiñampikiw uñti.” (Sal. 112:6-8.) Amuytʼañäni, janiw kunas nayrjamäxiti, jichhax jan walinakakiw kawkins istʼasiski: chʼaxwäwinaka, jiwarayasiñanaka, machʼanaka, usunaka, ukanakakiw kawkinsa istʼasiski, ukat samanas umas qʼañuchatäxarakiwa. Chiqansa, Diosatakjam aski sarnaqirinakax janiw uka jan walinakat jaltapkaspati, ukampis janirakiw ukanak uñjasakix aynachtʼapkarakiti. Jïsa, niyakixay Diosan munañaparjam mä suma Uraqin niya jakasipxchinixa, chuymanakapax “wali thurtʼatawa”, “janiw axsarkiti”. Ukat kuna jan walin uñjasisas janiw llakimpikix atipayasipkiti, jan ukasti mayninakat sipansa nayraruw Jehová Diosan yanaptʼatax sartapxi. Jupaw jan walinakar saykatapxañapatakix ‘chʼamañchi’ (Fili. 4:13).

¹⁶ Maysa tuqitxa, aski jaqinakax uñisita kʼarintata ukhamaw uñjasipxaraki, ukampis janiw aynachtʼapkiti. Jan ukasti, kuntï Diosax lurapxañap munki uk lurañatakiw wal chʼamachasipxi, jan qarjasisaw Diosan Apnqäwipat istʼañ munirinakar taqi chuyma yatiyasipki. Ukat aka qhipa urunaka niya tukuskipanxa jukʼamp uñisitaw uñjasipxani, niyaw Supayax jupanakar tukjañataki sartani. Ukhamasti, ukhaw kunjamsa uka uñisirix tukusini uk uñjapxani. ¡Kunjamtï Diosax sutip jachʼañchkani uk uñjañax wali muspharkañäniwa! (Eze. 38:18, 22, 23.)

“Jan khitin kamskañaw pʼiqip wayta[pxani]”

17. ¿Kunatsa aski jaqinakax pʼiqi waytapxani?

¹⁷ Kunapachatï Supayax jistʼantatäni ukat jupan apnaqat aka jan wali urunakas tukusxani ukhaxa, wali kusisitaw Jehová Diosan luqtirinakapax Jupar yupaychapxani. Ukhamaw Dios nayraqatan chiqapar sarnaqirinakax wiñay jakasipxani. Janiw phinqʼachatas ni aynachtʼayatas uñjasxapxaniti, kuna laykutix Jehová Diosax akham siwa: “Jan khitin kamskañaw pʼiqip waytaraki[ni]” sasa (Sal. 112:9). Kunapachatï Jehová Diosax taqi uñisirinakapar tukjani ukhaxa, wali kusisiñampiw yupaychapxani.

18. Salmo 112 jaljan tukuy arunakapaxa, ¿kunjamsa phuqasini?

¹⁸ “Ñanqha lurir jaqisti jupar uñjasax qʼapisiwa, jan kamächirjamäxasax laka chʼakhanakap tʼurusi. Ñanqha jaqinakan inampstʼañ chuymapax aynachtʼaniwa.” (Sal. 112:10.) Jïsa, niyaw Jehová Diosan uñisirinakapax aynachtʼapxani. Amtanakapasa uñisiñanakapas ‘jachʼa tʼaqhisïwi’ urunakanwa tukusini (Mat. 24:21).

19. ¿Kuna tuqitsa jan payachasiñasäki?

¹⁹ ¿Kunjamtï Jehová Diosax taqi jan walinak tukjkani ukanak uñjañataki jumax qhispïtati? Jan ukax usuntasinsa chuymankipstasins jiwxäta ukhaxa, ¿aski jaqinakamp chikati jaktanïta? (Hech. 24:15.) Chiqansa, kunjamtï Salmo 112 jaljan aski “jaqit” parlkixa, jumatix Jesusan luqtasïwipar atinisiskakïta ukat Jehová Diosan munañaparjam sarnaqaskakïta ukhaxa, Dios nayraqatan aski jaqit uñtʼatäyätawa (Efesios 5:1, 2 liytʼasiñapawa). Jehová Diosax janipuniw aski jaqinakatxa armaskaniti, luratanakapsa amtasipuniniwa. Wiñay wiñayaw wali munasiñampi sum uñjani (Sal. 112:3, 6, 9).

[Qhanañchäwi]

Amuytʼasiñasataki

• ¿Kunatsa “¡Aleluya!” sañax wakisini?

• ¿Kun uñjasas chiqpach cristianonakax aka urunakan kusisipxi?

• ¿Kunjam chuymampi churirirus Jehová Diosax munasi?

[Jisktʼanaka]

[25 janan fotopa]

Dios nayraqatan askit uñjatäñatakix Jesusan wila wartasitapar iyawsañasawa

[26 janan fotonakapa]

Taqi chuym churktan uka qullqxa, kunapachatï chijir puriñanakax utjki ukhaw ukampix yanaptʼasi, ukampiw Bibliat apstʼat qillqatanakas lurasiraki