Ang mga Matarong Magadayeg sa Diyos Hangtod sa Kahangtoran

“Ang matarong pagahandomon . . . Ang iyang pagkamatarong nagapadayon hangtod sa kahangtoran.”—SAL. 112:6, 9.

1. (a) Unsang malipayong kaugmaon ang nagpaabot sa mga tawong giisip sa Diyos nga matarong? (b) Unsang pangutana ang gipatungha?

 USA gayod ka maayong kaugmaon ang nagpaabot sa tanang tawo nga giisip sa Diyos nga matarong! Sila magmalipayon sa walay kataposan sa pagkat-on ug dugang bahin sa talagsaong mga hiyas ni Jehova. Ang ilang kasingkasing matugob gayod sa pagdayeg samtang magkadako ang ilang kahibalo bahin sa kalalangan sa Diyos. Ang usa sa pangunang mga kinahanglanon aron matagamtam kanang maong mahimayaong kaugmaon mao ang “pagkamatarong,” nga gipasiugda sa Salmo 112. Apan sa unsang paagi ang balaan ug matarong nga Diyos, si Jehova, magaisip sa makasasalang mga tawo nga matarong? Bisag maningkamot kita pag-ayo sa pagbuhat kon unsay matarong, kita makahimo gihapog sayop, nga usahay seryoso pa gani.—Roma 3:23; Sant. 3:2.

2. Unsa ang duha ka milagro nga gihimo ni Jehova tungod sa iyang gugma?

² Si Jehova mahigugmaong nagtagana ug hingpit nga solusyon. Sa unsang paagi? Una, pinaagi sa milagrosong pagbalhin sa kinabuhi sa iyang minahal nga Anak diha sa tagoangkan sa usa ka ulay aron kini ipanganak ingong hingpit nga tawo. (Luc. 1:30-35) Dayon, human patya si Jesus sa iyang mga kaaway, si Jehova naghimo ug laing talagsaong  milagro. Ang Diyos nagbanhaw kang Jesus ingong mahimayaong espiritung linalang.—1 Ped. 3:18.

3. Nganong nalipay ang Diyos sa pagganti sa iyang Anak ug langitnong kinabuhi?

³ Si Jehova nagganti kang Jesus ug usa ka matang sa kinabuhi nga wala mabatoni sa iyang anak sa iyang una-tawhanong paglungtad—imortal nga kinabuhi didto sa langit. (Heb. 7:15-17, 28) Si Jehova nalipay sa pagbuhat niini tungod kay si Jesus nagpabiling matinumanon bisan sa grabeng mga pagsulay. Sa ingon, si Jesus naghatag sa iyang Amahan sa labing maayo, o bug-os, nga tubag sa bakak nga pangangkon ni Satanas nga ang tawo nag-alagad sa Diyos tungod sa hakog nga mga motibo ug dili tungod sa tiunay nga gugma.—Prov. 27:11.

4. (a) Sa iyang pagbalik sa langit, unsay gihimo ni Jesus alang kanato, ug sa unsang paagi si Jehova misanong? (b) Unsay imong pagbati sa gihimo ni Jehova ug ni Jesus alang kanimo?

⁴ Mas dako pa ang gihimo ni Jesus didto sa langit. Siya ‘miatubang sa persona sa Diyos alang kanato’ uban ang bili sa “iyang kaugalingong dugo.” Malulotong gidawat sa atong mahigugmaong langitnong Amahan ang bililhong halad ni Jesus ingong “halad pasig-uli alang sa atong mga sala.” Busa, uban ang ‘mahinlo nga tanlag,’ kita makahatag ug “sagradong pag-alagad ngadto sa buhi nga Diyos.” Kini mohatag gayod kanatog rason nga mouyon sa pangbukas nga mga pulong sa Salmo 112, “Dayega ninyo si Jah”!—Heb. 9:12-14, 24; 1 Juan 2:2.

5. (a) Unsay angay natong buhaton aron mahuptan ang matarong nga baroganan atubangan sa Diyos? (b) Giunsa paghan-ay ang Salmo 111 ug Salmo 112?

⁵ Aron atong mahuptan ang matarong nga baroganan atubangan sa Diyos, kinahanglang padayon kitang magpasundayag ug pagtuo sa giula nga dugo ni Jesus. Angay natong pasalamatan si Jehova sa adlaw-adlaw tungod sa iyang dakong gugma kanato. (Juan 3:16) Kinahanglang tun-an usab nato kanunay ang Pulong sa Diyos ug himoon ang atong maarangan nga magkinabuhi uyon sa mensahe niini. Ang Salmo 112 naundan ug maayong tambag alang sa tanan nga gustong maghupot ug mahinlong tanlag atubangan sa Diyos. Kining salmoha adunay koneksiyon sa Salmo 111. Kining duha ka salmo nagsugod pinaagi sa ekspresyong “Dayega ninyo si Jah!” o “Aleluya!” ug gisundan sa 22 ka linya, nga ang matag usa niana nagsugod pinaagi sa usa sa 22 ka letra sa Hebreohanong alpabeto. a

Usa ka Hinungdan sa Kalipay

6. Sa unsang paagi gipanalanginan ang mahinadlokon-sa-Diyos nga “tawo” nga gihisgotan sa Salmo 112?

⁶ “Malipayon ang tawo nga nahadlok kang Jehova, nga sa iyang mga sugo siya nahimuot sa hilabihan. Ang iyang kaliwat mahimong gamhanan sa yuta. Kon bahin sa kaliwatan sa mga matul-id, kini panalanginan.” (Sal. 112:1, 2) Matikdi nga sa sinugdan ang salmista naghisgot bahin sa usa lamang ka “tawo,” apan diha sa ulahing bahin sa bersikulo 2 iyang gigamit ang plural nga ekspresyong “mga matul-id.” Kini nagpakita nga ang Salmo 112 mahimong nagtumong sa usa ka grupo nga gilangkoban sa daghang indibiduwal. Makaiikag, si apostol Pablo giinspirar sa pagpadapat sa Salmo 112:9 ngadto sa mga Kristohanon sa unang siglo. (Basaha ang 2 Corinto 9:8, 9.) Kining salmoha nagpakita gayod kon sa unsang paagi  magmalipayon ang mga sumusunod ni Kristo sa yuta karon!

7. Nganong ang mga alagad sa Diyos angayng magbaton ug hustong matang sa kahadlok kaniya, ug unsay angay nimong tinamdan sa mga sugo sa Diyos?

⁷ Ingon sa gipakita sa Salmo 112:1, ang matuod nga mga Kristohanon magmalipayon gayod samtang sila magalakaw “nga nahadlok kang Jehova.” Ang kahadlok nga dili makapahimuot sa Diyos makatabang kanila sa pagsukol sa espiritu sa kalibotan ni Satanas. Sila “nahimuot sa hilabihan” sa pagtuon sa Pulong sa Diyos ug sa pagsugot sa iyang mga sugo. Kana naglakip sa sugo nga pagsangyaw sa maayong balita sa Gingharian sa tibuok yuta. Sila naningkamot sa paghimog mga tinun-an sa mga tawo sa tanang kanasoran samtang nagpasidaan sa mga daotan bahin sa pag-abot sa adlaw sa paghukom sa Diyos.—Ezeq. 3:17, 18; Mat. 28:19, 20.

8. (a) Sa unsang paagi ang matinumanong katawhan sa Diyos karon gipanalanginan tungod sa ilang kasibot? (b) Unsang mga panalangin ang nagpaabot niadtong adunay yutan-ong paglaom?

⁸ Tungod kay ilang gisugot ang maong mga sugo, kapig pito ka milyon na karon ang mga alagad sa Diyos dinhi sa yuta. Kinsay makapangulipas nga ang iyang katawhan nahimong “gamhanan sa yuta”? (Juan 10:16; Pin. 7:9, 14) Sila “panalanginan” pa gayod sa dihang ipatuman na sa Diyos ang iyang katuyoan! Ingong grupo, kadtong adunay yutan-ong paglaom maluwas sa nagsingabot nga “dakong kasakitan,” ug sila ang molangkob sa “usa ka bag-ong yuta” diin “magpuyo ang pagkamatarong.” Sa ngadtongadto, ang mga makalabang-buhi sa Armagedon “panalanginan” pa ug dugang. Ilang abiabihon ang milyonmilyon nga pagabanhawon. Makalilipay gayod kini nga palaaboton! Sa ulahi, kadtong “nahimuot sa hilabihan” sa kasugoan sa Diyos mahimong hingpit ug ilang matagamtam sa walay kataposan ang “mahimayaong kagawasan sa mga anak sa Diyos.”—2 Ped. 3:13; Roma 8:21.

Maalamong Paggamit sa Bahandi

9, 10. Sa unsang paagi ang matuod nga mga Kristohanon naggamit sa ilang espirituwal nga bahandi, ug sa unsang paagi ang ilang pagkamatarong magpadayon hangtod sa kahangtoran?

⁹ “Mga bililhong butang ug bahandi anaa sa  iyang balay; ug ang iyang pagkamatarong nagapadayon hangtod sa kahangtoran. Siya midan-ag sa kangitngitan ingon nga kahayag alang sa mga matul-id. Siya mapuangoron ug maluluy-on ug matarong.” (Sal. 112:3, 4) Sa panahon sa Bibliya, ang pipila ka alagad sa Diyos nakabaton ug daghang bahandi. Ug sa laing diwa, kadtong giuyonan sa Diyos nahimo gayong dato, bisag dili sa materyal nga paagi. Sa pagkatinuod, ang kadaghanan niadtong mapaubsanong nagpasakop sa Diyos lagmit mga tawong kabos ug gilantaw nga ubos, sama sa adlaw ni Jesus. (Luc. 4:18; 7:22; Juan 7:49) Apan, adunahan man o kabos ang usa sa materyal nga paagi, posible nga mahimo siyang dato sa espirituwal.—Mat. 6:20; 1 Tim. 6:18, 19; basaha ang Santiago 2:5.

¹⁰ Ang dinihogang mga Kristohanon ug ang ilang mga kauban nagpaambit sa ilang espirituwal nga bahandi ngadto sa uban. Gani, sila “midan-ag” diha sa mangitngit nga kalibotan ni Satanas “ingon nga kahayag alang sa mga matul-id.” Sila nagbuhat niana pinaagi sa pagtabang sa uban nga makabenepisyo gikan sa espirituwal nga bahandi sa kaalam ug kahibalo sa Diyos. Ang mga magsusupak misulay sa pagpahunong sa buluhatong pagsangyaw sa Gingharian, apan sila napakyas. Ang bunga niining maong matarong nga buhat ‘magpadayon hangtod sa kahangtoran.’ Pinaagi sa pagpabiling matarong ilalom sa pagsulay, ang mga alagad sa Diyos makalaom nga sila makatagamtam ug kinabuhi nga ‘magpadayon hangtod sa kahangtoran.’

11, 12. Unsa ang pipila ka paagi nga ang katawhan sa Diyos naggamit sa ilang materyal nga mga butang?

¹¹ Ang katawhan sa Diyos, ang dinihogan nga ulipon ug kadtong naglangkob sa “dakong panon,” napamatud-ang manggihatagon sa materyal nga mga butang. Nag-ingon ang Salmo 112:9: “Siya kaylap nga nanagtag; siya nanghatag sa mga kabos.” Ang matuod nga mga Kristohanon karon kasagarang nagatabang sa ilang mga isigka-Kristohanon nga nagkalisodlisod ug bisan sa ilang mga silingan nga nanginahanglan. Ilang gigamit usab ang ilang mga kahinguhaan sa pagtabang sa mga biktima sa katalagman. Sumala sa giingon ni Jesus, makahatag usab kana ug kalipay.—Basaha ang Buhat 20:35; 2 Corinto 9:7.

¹² Dugang pa, hunahunaa ang nagasto sa pagpatik niining magasina diha sa 172 ka pinulongan, nga kadaghanan niana gilitok sa mga tawong kabos. Tagda usab ang kamatuoran nga kining magasina mabatonan na karon diha sa lainlaing senyas nga pinulongan alang sa mga amang, maingon man diha sa Braille alang sa mga buta.

Mapuangoron ug Matarong

13. Kinsa ang labing maayong mga panig-ingnan sa paghatag nga mapuangoron, ug sa unsang paagi atong masundog ang ilang panig-ingnan?

¹³ “Ang tawo nga mapuangoron maoy maayo ug nagapahulam.” (Sal. 112:5) Lagmit imong namatikdan nga dili tanang tawo nga nagatabang sa uban maoy tinuod nga mapuangoron. Ang uban mohatag aron sa pagpagawal sa ilang kahimtang o tungod kay napugos lang. Dili ka gayod ganahang modawat ug tabang gikan sa usa nga mopabati kanimong ubos o nagpabug-at lang. Sa kasukwahi, makapahupay gayod ang pagdawat ug tabang gikan sa usa ka tawong mapuangoron. Si Jehova maoy usa ka maayo kaayong panig-ingnan sa usa ka mapuangoron, malipayong Maghahatag. (1 Tim. 1:11; Sant. 1:5, 17) Bug-os nga gisundog ni Jesu-Kristo ang pagkamapuangoron sa iyang Amahan. (Mar. 1:40-42) Busa, aron ang Diyos mag-isip kanato nga matarong, kita kinahanglang mohatag nga malipayon ug mapuangoron, ilabina sa dihang kita mosangyaw sa atong mga silingan.

14. Unsa ang pipila ka paagi nga ang ‘atong mga kalihokan mapalig-on uban ang hustisya’?

¹⁴ “Ang iyang mga kalihokan ginapalig-on niya uban ang hustisya.” (Sal. 112:5) Ingon sa gitagna, ang matinumanong piniyalan nga matang nag-atiman sa mga kabtangan sa Agalon sa paagi nga kaharmonya sa hustisya ni Jehova. (Basaha ang Lucas 12:42-44.) Kini mabanaag diha sa Kasulatanhong giya nga gihatag ngadto sa mga ansiyano, nga makaatiman usahay ug seryosong mga kaso diha sa kongregasyon. Madayag usab ang hustisya diha sa gibase-sa-Bibliya nga mga direksiyon nga gihatag sa ulipon nga matang kon sa unsang paagi magalihok ang tanang kongregasyon, puy-anan sa mga misyonaryo, ug mga puy-anang Bethel. Dili lamang mga ansiyano ang angayng magpasundayag ug hustisya kondili ang ubang mga igsoon usab samtang sila makiglabot sa ilang mga igsoon ug sa mga dili-magtutuo, lakip na sa mga butang nga may kalabotan sa negosyo.—Basaha ang Miqueas 6:8, 11.

 Mga Panalangin sa mga Matarong

15, 16. (a) Unsa ang epekto sa daotang mga balita sa kalibotan nganha sa mga matarong? (b) Unsa ang determinadong buhaton sa mga alagad sa Diyos?

¹⁵ “Kay bisan kanus-a siya dili gayod matarog. Ang matarong pagahandomon hangtod sa panahong walay tino. Siya dili mahadlok bisan sa daotang balita. Ang iyang kasingkasing malig-on, nga masaligon kang Jehova. Ang iyang kasingkasing dili matarog; dili siya mahadlok, hangtod nga motan-aw siya sa iyang mga kaaway.” (Sal. 112:6-8) Wala pa sukad mahitabo nga adunay daghan kaayong daotang mga balita, nga naglakip sa mga gubat, terorismo, bag-ong mga sakit ug karaang mga sakit nga midagsang pag-usab, krimen, kakabos, ug polusyon. Kadtong mga tawong giisip sa Diyos nga matarong dili makalikay sa mga epekto niini, apan ang kahadlok wala makapaluya kanila. Hinunoa, ang ilang kasingkasing “malig-on” ug “dili matarog” samtang sila masaligong nagalantaw sa umaabot, nga nahibalo nga haduol na ang matarong nga bag-ong kalibotan sa Diyos. Kon may mahitabong katalagman, sila mas makalahutay niana tungod kay sila nagsalig sa tabang ni Jehova. Dili gayod niya tugotan nga ang iyang mga matarong “matarog”—siya maghatag kanilag tabang ug kusog aron makalahutay.—Filip. 4:13.

¹⁶ Kinahanglang sagubangon usab sa mga matarong ang pagdumot ug kabakakan nga gipakaylap sa mga magsusupak, apan dili gayod kana makapahunong kanila sa pagsangyaw. Hinunoa, ang mga alagad sa Diyos magpabiling lig-on ug dili matarog diha sa buluhaton nga gihatag ni Jehova kanila—ang pagsangyaw sa maayong balita sa Gingharian ug ang pagtudlo sa mga tawong modawat niana. Dayag nga mas mograbe pa ang pagsupak nga maagoman sa mga matarong samtang magkaduol ang kataposan. Kana mosangko sa tibuok-kalibotang pag-atake ni Satanas nga Yawa diha sa iyang papel ingong Gog sa Magog. Dayon, sa kataposan, kita ‘motan-aw sa atong mga kaaway’ samtang sila makaagom sa bug-os nga kaparotan. Makapalipay gayong kasinatian ang pagkakita nga bug-os mabalaan ang ngalan ni Jehova!—Ezeq. 38:18, 22, 23.

“Pagabayawon Uban ang Himaya”

17. Sa unsang paagi ang matarong “pagabayawon uban ang himaya”?

¹⁷ Makalilipay gayod ang hiniusang pagdayeg kang Jehova, nga wala nay pagsupak gikan sa Yawa ug sa iyang kalibotan! Ang tanan nga naghupot ug matarong nga baroganan atubangan sa Diyos malipayong magadayeg kaniya hangtod sa hangtod. Sila dili mapukan, tungod kay si Jehova misaad usab nga ang “sungay” sa matarong “pagabayawon uban ang himaya.” (Sal. 112:9) Ang matarong nga mga alagad ni Jehova igatuboy nga madaogon samtang ilang makita ang tanang kaaway sa Diyos nga mapukan.

18. Sa unsang paagi matuman ang paniklop nga mga pulong sa Salmo 112?

¹⁸ “Ang daotan makakita ug tinong mabalaka. Magpakagot siya sa iyang mga ngipon ug tinong matunaw. Ang tinguha sa mga daotan mahanaw.” (Sal. 112:10) Ang tanan nga padayong nagsupak sa katawhan sa Diyos sa dili madugay “matunaw” sa ilang kasina ug kapungot. Ang ilang tinguha sa pagpahunong sa atong buluhaton mahanaw uban kanila sa nagsingabot nga “dakong kasakitan.”—Mat. 24:21.

19. Sa unsa kita makasalig?

¹⁹ Mahilakip ka ba unya sa malipayon nga mga makalabang-buhi nianang dakong kadaogan? O kon tungod sa sakit o katigulangon ikaw matulog sa kamatayon sa dili pa matapos ang kalibotan ni Satanas, mahilakip ka ba sa “mga matarong” nga pagabanhawon? (Buh. 24:15) Mahimong oo ang tubag niana kon padayon kang magpasundayag ug pagtuo sa halad lukat ni Jesus ug magsundog kang Jehova, sama sa gihimo niadtong gihawasan sa matarong nga “tawo” diha sa Salmo 112. (Basaha ang Efeso 5:1, 2.) Tinoon gayod ni Jehova nga ang maong mga matarong “pagahandomon,” ug ang ilang matarong nga mga buhat dili malimtan. Sila hinumdoman ug higugmaon ni Jehova hangtod sa kahangtoran.—Sal. 112:3, 6, 9.

[Footnote]

Mga Pangutana nga Palandongon

• Unsa ang pipila ka rason nga kita moingong “Aleluya”?

• Unsa nga kaugmaran sa modernong panahon ang nakapalipay gayod sa matuod nga mga Kristohanon?

• Unsang matanga sa maghahatag ang gihigugma ni Jehova?

[Mga Pangutana sa Pagtuon]

[Hulagway sa panid 25]

Aron mahuptan ang matarong nga baroganan atubangan sa Diyos, kita kinahanglang magpasundayag ug pagtuo sa giula nga dugo ni Jesus

[Mga hulagway sa panid 26]

Ang kinasingkasing nga mga donasyon makatabang sa mga biktima sa katalagman ug sa pagpakaylap sa mga basahon sa Bibliya