Ikiẹrẹe A Ti Jiri Ọghẹnẹ Bẹdẹ Bẹdẹ
Ikiẹrẹe A Ti Jiri Ọghẹnẹ Bẹdẹ Bẹdẹ
‘A rẹ kareghẹhọ ohwo okiẹrẹe . . . ẹrẹreokie riẹ ọ rẹ jọ bẹdẹ bẹdẹ.’—OL. 112:6, 9.
1. (a) Didi eghale e rrọ obaro kẹ enọ i kiẹrẹe evaọ aro Ọghẹnẹ? (b) Didi onọ o roma via?
EGHALE nọ i ti te ahwo kpobi nọ i kiẹrẹe evaọ aro Ọghẹnẹ, a re gbiku rai hi! O te were ai re a gbe wuhrẹ kpahe ekwakwa-aghae Jihova bẹdẹ bẹdẹ. A te ruẹ ẹjiroro buobu nọ a re ro jiri Ọghẹnẹ nọ a bi wuhrẹ kpahe iruo emama riẹ na. Re eware nana kpobi e sae lọhọ, o gwọlọ “ẹrẹreokie,” onọ a fiẹgba họ evaọ Olezi avọ 112. Rekọ ẹvẹ ahwo-akpọ erahaizi a sai ro kiẹrẹe evaọ aro Jihova Ọghẹnẹ, ọnọ ọ rrọ ọrẹri je kiẹrẹe na? Ma tẹ make daoma kẹhẹ re ma ru oware nọ u kiete, ma re ruthọ, ẹsejọ ma rẹ tubẹ raha uzi.—Rom 3:23; Jem. 3:2.
2. Eware igbunu ivẹ vẹ uyoyou o wọ Jihova ru?
2 Re ahwo-akpọ a sai kiẹrẹe evaọ aro Jihova, o ru obọdẹ ọruẹrẹfihotọ jọ. Oghẹrẹ ọruẹrẹfihotọ vẹ o ru? Orọ ọsosuọ, o kpeze uzuazọ Ọmọ oyoyou riẹ nọ ọ rrọ obọ odhiwu fihọ edhede ọmọtẹ nọ ọ riẹ ọzae he, re a sai yẹe gbagba. (Luk 1:30-35) Rekọ okenọ ewegrẹ a kpe Jesu no, Jihova o te ru oware igbunu ọfa. Ọghẹnẹ ọ kpare Jesu ziọ uzuazọ, ọ tẹ kẹe ugboma ẹzi.—1 Pita 3:18.
3. Fikieme o rọ were Ọghẹnẹ re ọ rehọ uzuazọ sebaewhuo kẹ Ọmọ riẹ?
3 Oware jọ nọ Jesu o wo ho taure ọ tẹ te ziọ otọakpọ, Jihova ọ rehọ e riẹ kẹe—uzuazọ sebaewhuo evaọ obọ odhiwu. (Hib. 7:15-17, 28) Jihova ọ rọ evawere ru onana keme Jesu o kru ẹgbakiete riẹ evaọ otọ odawọ ogaga. Enẹ Jesu o ro fi oriruo nọ o mai woma kpobi h’otọ, onọ Ọsẹ riẹ o re ro seha kẹ Setan inọ ọrue o gu okenọ ọ ta nnọ ahwo-akpọ a rẹ sae rọ eva efuafo gọe he.—Itẹ 27:11.
4. (a) Okenọ Jesu o zihe kpobọ odhiwu no, eme o ru fiki mai, kọ eme Jihova o ru? (b) Ẹvẹ who rri oware nọ Jihova avọ Jesu a ru kẹ owhẹ?
4 Jesu o ru oware ofa evaọ obọ odhiwu. Ọ rehọ erere ‘azẹ obọ riẹ’ rọ “oma via eva obọ aro Ọghẹnẹ fiki mai.” Ọsẹ oyoyou obọ odhiwu mai o mi idheidhe eghaghae Jesu na re e jọ “okiofu izieraha mai.” Fiki onana, ma rẹ sae rehọ ‘eva efuafo’ “gọ Ọghẹnẹ uzuazọ” na. Ma rẹ sae rọ fiki onana wariẹ eme ọ Olezi avọ 112 na, “Jiri ỌNOWO”!—Hib. 9:12-14, 24; 1 Jọn 2:2.
5. (a) Eme ma re ru re ma ruẹsi wo emamọ edikihẹ evaọ aro Ọghẹnẹ? (b) Oghẹrẹ vẹ a ruẹrẹ Olezi avọ 111 gbe 112 họ?
5 Re ma sai wo emamọ edikihẹ evaọ aro Ọghẹnẹ, ma re fi ẹrọwọ họ azẹ Jesu ẹsikpobi. Ma re yere Jihova kẹdẹ kẹdẹ nọ o ro you omai tenẹ. (Jọn 3:16) Ma re je se Ebaibol na jẹ daoma fi eware nọ ma bi wuhrẹ h’iruo. Olezi avọ 112 o wo uvi ohrẹ rọ kẹ ahwo kpobi nọ e gwọlọ wo iroro efuafo evaọ aro Ọghẹnẹ. Olezi nana avọ Olezi avọ 111 e jẹhọ ohwohwo. Olezi avọ 111 gbe 112 i muhọ inọ “Jiri ỌNOWO,” yọ evaọ Ebaibol ọsosuọ nọ a rọ ẹvẹrẹ Hibru kere, ilezi ivẹ nana ọvuọvo o wo ihie-ẹme 22, yọ a rehọ ubiẹme Hibru jọ mu uhie-ẹme kpobi họ. *
Oware nọ O rẹ Wha Evawere Ze
6. Edhere vẹ a rọ ghale ohwo nọ a jọ Olezi avọ 112 ta ẹme te na?
6 “Oghale u te ọnọ ọ be dhẹozọ ỌNOWO, ọnọ ọ rẹ jọ evaọ izi riẹ ghọghọ! Iruọmọ riẹ i re ti vihọ eva otọ na; oge okiẹrẹe o re ti wo oghale.” (Ol. 112:1, 2) Ọso-ilezi na o mu ẹme na họ epaọ ẹsenọ ọ be ta kpahe omọvo, evaọ owọ avọ 2 o te muhọ ẹta epaọ ẹsenọ ọ be ta kpahe ahwo buobu. Onana u dhesẹ inọ Olezi avọ 112 o ta ẹme kpahe ẹko ahwo ọvo. Pọl ukọ na ọ rehọ Olezi 112:9 rọ ta ẹme kpahe Ileleikristi ikpe-udhusoi ọsosuọ. (Se 2 Ahwo Kọrint 9:8, 9.) Olezi nana o dhesẹ inọ ilele Jesu nọ e rrọ otọakpọ nẹnẹ a rẹ sae wereva.
7. Fikieme u je fo re idibo Ọghẹnẹ a dhozọ riẹ, kọ ẹvẹ u fo nọ who re rri ijaje Ọghẹnẹ?
7 Wọhọ epanọ Olezi 112:1 o dhesẹ, uvi Ileleikristi nana a be wereva gaga nọ a be “dhẹozọ ỌNOWO” na. Uvi ozodhẹ nana o bi fi obọ họ kẹ ae whaha ẹzi akpọ Setan. A rẹ “ghọghọ” nọ a te bi wuhrẹ Ebaibol na je koko ijaje Ọghẹnẹ. Usu ijaje yena họ ewhowho emamọ usi Uvie na evaọ otọakpọ na soso. A be daoma ru ilele ahwo erẹwho kpobi, yọ a be vẹvẹ irumuomu na unu kpahe ẹdẹ ẹdhoguo Ọghẹnẹ nọ o be tha na.—Izik. 3:17, 18; Mat. 28:19, 20.
8. (a) Didi oghale u te ahwo Ọghẹnẹ no nẹnẹ fiki ọwhọ rai? (b) Eghale vẹ e rrọ obaro kẹ enọ i wo ẹruore otọakpọ?
8 Fikinọ a be kezọ kẹ ujaje yena, idibo Ọghẹnẹ evaọ otọakpọ nẹnẹ a bu te oware wọhọ ima ihrẹ no. Ono ọ rẹ vro inọ ahwo riẹ a ‘vihọ no evaọ otọakpọ na’? (Jọn 10:16; Evia. 7:9, 14) Yọ a re gbiku “oghale” nọ a ti wo ho nọ Ọghẹnẹ o te ru ẹjiroro riẹ gba no! A ti siwi enọ i wo ẹruore ẹria otọakpọ na evaọ ‘uye ulogbo’ nọ o be tha na, ahwo nana a ve ti ru ‘akpọ ọkpokpọ nọ ẹrẹreokie ọ te ria’ via. Uwhremu na, enọ e zọ evaọ ẹmo Amagẹdọn ‘a ve ti wo eghale’ efa. A te ruẹrẹ oma kpahe re a dede ima ahwo nọ e kparoma ze. Ẹruore riẹ u gbunu kẹhẹ! Enọ e be jọ ijaje Ọghẹnẹ “ghọghọ” a ve ti te ẹgbagba jẹ reawere “uvẹ oruaro emọ Ọghẹnẹ.”—2 Pita 3:13; Rom 8:21.
Rehọ Efe Ra Ru Iruo Ziezi
9, 10. Ẹvẹ Ileleikristi uzẹme a rehọ efe abọ-ẹzi rai ru iruo no, kọ ẹvẹ emamọ iruo nana o te rọ jọ bẹdẹ bẹdẹ?
9 “Efe obuobu ọ rọ eva uwou riẹ; ẹrẹreokie riẹ ọ rẹ jọ bẹdẹ bẹdẹ. Elo o re lo kẹ ọnọ o kiẹrẹe eva ebi; ỌNOWO ọ vọ avọ aruoriwo, gbe ehrọ, gbe ẹrẹreokie.” (Ol. 112:3, 4) Evaọ oke emọ Izrẹl, idibo Ọghẹnẹ jọ a jọ edafe. Yọ evaọ oghẹrẹ ọfa jọ, ahwo nọ Ọghẹnẹ ọ jẹrehọ a gine fe o tẹ make rọnọ a jọ edafe he. Uzẹme riẹ họ enọ e roma rai kpotọ kẹ Ọghẹnẹ a rẹ sae jọ iyogbere a ve je rri rai vo, wọhọ epanọ o jọ evaọ oke Jesu na. (Luk 4:18; 7:22; Jọn 7:49) Rekọ o tẹ make rọnọ ohwo o fe efe abọ-iwo hayo o fe he, ọ rẹ sai fe evaọ abọ-ẹzi.—Mat. 6:20; 1 Tim. 6:18, 19; se Jemis 2:5.
10 Ileleikristi nọ a rọ ẹzi wholo na avọ egbẹnya rai, a be rọ efe abọ-ẹzi rai gbogbọ họ. Ukpoye, a be jọ akpọ ebi ọrọ Setan ‘lo kẹ enọ i kiẹrẹe.’ A bi ru ere ẹkwoma obọ nọ a bi fihọ kẹ amọfa re a wo erere no areghẹ gbe eriariẹ Ọghẹnẹ ze, enọ e rrọ efe abọ-ẹzi. Otu ọwọsuọ a daoma bẹ no re a whaha iruo usiuwoma ota Uvie na. Ukpoye, erere nọ o ti no emamọ iruo nana ze ‘ọ rẹ te jọ bẹdẹ bẹdẹ.’ A tẹ ruabọhọ emamọ iruo nana, u re mu idibo Ọghẹnẹ ẹro inọ a te rria “bẹdẹ bẹdẹ.”
11, 12. Idhere jọ vẹ idibo Ọghẹnẹ a be rọ rehọ efe rai ru iruo?
11 Idibo Ọghẹnẹ, te utu ọrigbo nọ a rọ ẹzi wholo na gbe enọ i ru “otu obuobu” na via a be rehọ efe abọ-iwo rai gbogbọ gbe he. Olezi 112:9 o ta nọ: “Ọ ghale ọvọvẹ, ọ rehọ kẹ iyogbere.” Uvi Ileleikristi nẹnẹ a re ru azọhọ ro fi obọ họ kẹ ibe Ileleikristi rai gbe erivẹ enọ e rrọ uye. A rẹ jẹ zọhọ eware nọ a rẹ rọ dhogbo evaọ oke okpẹtu. Wọhọ epanọ Jesu ọ ta, onana o rẹ wha evawere ze.—Se Iruẹru Ikọ Na 20:35; 2 Ahwo Kọrint 9:7.
12 Ofariẹ, roro kpahe igho nọ a be raha ro kere emagazini nana evaọ evẹrẹ ẹgba ọvo, udhosa gbe ikpegbivẹ (172), yọ ibuobu enọ e be jẹ evẹrẹ nana iyogbere. Jẹ kareghẹhọ nnọ a bi ru emagazini nana fihọ ividio fiki enọ i diezọ, yọ a bi je ru ei fihọ oghẹrẹ nọ enọ i tuaro a sai ro sei.
Ọghọ gbe Oruọzewọ
13. Amono họ iriruo nọ e mai woma ọrọ ọghọ-oruo, kọ ẹvẹ ma sae rọ raro kele oriruo rai?
13 “U re woma kẹ ohwo nọ o re ru ọghọ je siobọno kẹ ahwo.” (Ol. 112:5) Ẹsejọhọ who muẹrohọ no inọ ahwo jọ nọ a re ru amọfa ọghọ a re ru ei nevaze he. Ejọ a re ru ọghọ ro dhesẹ oma, hayo a re ru ei avọ ẹgo. O rẹ were owhẹ hẹ re ohwo nọ o bi rri owhẹ kuẹku hayo ọnọ ọ rehọ owhẹ wọhọ ohwa kẹe ọ kẹ owhẹ okẹ. Wo ohẹriẹ, o rẹ were owhẹ nọ ohwo nọ o re gine ru ọghọ nevaze ọ tẹ kẹ owhẹ okẹ. Jihova họ uvi oriruo ọrọ ohwo nọ ọ rẹ rọ evawere kokẹ. (1 Tim. 1:11; Jem. 1:5, 17) Jesu Kristi ọ rehọ aro kele emamọ oriruo Ọsẹ riẹ. (Mak 1:40-42) Fikiere, re ma kiẹrẹe evaọ aro Ọghẹnẹ, ma rẹ rọ evawere kẹ okẹ nevaze, maero evaọ usiuwoma ota nọ ma te bi fi obọ họ kẹ ahwo re a riẹ Jihova.
14. Idhere jọ vẹ ma rẹ rọ “rehọ oruọzewọ ru eware”?
14 “Ọ rẹ rehọ oruọzewọ ru eware riẹ.” (Ol. 112:5) Wọhọ epanọ a ruẹaro riẹ, utu odibo oruọzewọ na a be rọ ababọ ọriẹwẹ rẹrote ekwakwa Olori na wọhọ epanọ Jihova ọ gwọlọ. (Se Luk 12:42-44.) Onana u dhesẹ oma via evaọ ọkpọvio nọ a rọ kẹ ekpako no Ikereakere ze, enọ i re guẹdhọ ohwo nọ ọ raha uzi ulogbo evaọ ukoko na. Ababọ ọriẹwẹ nọ utu ọrigbo na a bi ro ru eware u bi je dhesẹ oma via evaọ ọkpọvio nọ a be kẹ no Ebaibol ze kpahe epanọ eware e rẹ nya evaọ ikoko kpobi, iwou imishọnare, gbe iviuwou Ebẹtẹle. Orọnikọ ekpako na ọvo a re dhesẹ oruọzewọ họ rekọ te Ileleikristi efa evaọ oghẹrẹ nọ a bi yeri kugbe ohwohwo je kugbe enọ e rrọ ukoko ho, makọ evaọ oware nọ o kpomahọ ugho.—Se Maeka 6:8, 11.
Eghale nọ E Rrọ kẹ Enọ I Kiẹrẹe
15, 16. (a) Oghẹrẹ vẹ ikiẹrẹe na a be rehọ eware iyoma nọ e rrọ akpọ na via? (b) Eme idibo Ọghẹnẹ a gba riẹ mu nnọ a re ru?
15 “A rẹ sai nuhu ohwo okiẹrẹe he; a rẹ kareghẹhọ iẹe bẹdẹ bẹdẹ. Ọ rẹ dhẹozọ usi uyoma ha; udu riẹ u mudhe kẹ ẹruọrọsuọ ỌNOWO. Udu riẹ u dikihẹ ẹtọvo, ọ rẹ dhẹozọ họ, bẹsenọ ọ rẹ ruẹ ẹgwọlọ riẹ eva obọ ewegrẹ riẹ.” (Ol. 112:6-8) Anwẹnọ a rọ ma akpọ na, usi uyoma u ri bu tenẹ hẹ, usi wọhọ emo, ozighi ọkparesuọ, eyao ekpokpọ gbe erọ anwae nọ i bi zihe ze, ethube, uvuhu, gbe enua. Ahwo nọ a kiẹrẹe evaọ aro Ọghẹnẹ a bi yo ekpehre usi nana, rekọ ozọ epanọ obaro o te jọ u bi mu ai hi. Ukpoye, idu rai i “mudhe” je “dikihẹ ẹtọvo” nọ a be rọ ududu rri kpobaro na, keme a riẹ inọ akpọ ọkpokpọ Ọghẹnẹ o kẹlino. Okpẹtu o tẹ roma via, a wo udu nọ a re ro thihakọ keme a rẹroso Jihova kẹ obufihọ. Ọ rẹ kuvẹ hẹ re udu u “nuhu” ikiẹrẹe—o re fi obọ họ kẹ ae jẹ kẹ ae ẹgba nọ a re ro thihakọ.—Fil. 4:13.
16 Idibo Ọghẹnẹ a thihakọ omukpahọ gbe erue nọ otu ọwọsuọ a vaha no, rekọ onana o be whaha uvi Ileleikristi ẹta usiuwoma na vievie he. Idibo Ọghẹnẹ a gbẹ be rọ ajọwha ruabọhọ iruo nọ Jihova ọ kẹ rai—ewhowho emamọ usi Uvie na gbe eruo ilele ọrọ enọ e gaviezọ kpobi. Ababọ avro, a te gbẹ wọso enọ i kiẹrẹe na nọ urere na u bi sikẹle na. Ọwọsuọ na o te mae ga evaọ okenọ Setan Ẹdhọ na, ọnọ a dhesẹ wọhọ Gọg obọ Magọg, ọ be te họre ae evaọ akpọ na soso. Kọ oke yena ma ti ro ‘rri ewegrẹ mai’ nọ a te rọ raha ae muotọ. O ti woma kẹhẹ re ma ruẹ epanọ a ti ro ru odẹ Jihova fo riẹriẹriẹ.—Izik. 38:18, 22, 23.
‘A te Kpare Ae Kpehru Eva Oruaro’
17. Oghẹrẹ vẹ a te rọ kpare enọ i kiẹrẹe “kpehru eva oruaro”?
17 O te were kẹhẹ re ma kuomagbe jiri Jihova, ababọ ọwọsuọ nọ o bi no obọ Ẹdhọ avọ akpọ riẹ ze! Nọ oware nọ ahwo nọ a kiẹrẹe evaọ aro Ọghẹnẹ a te reawere riẹ bẹdẹ bẹdẹ. A te raha ae muotọ họ keme Jihova ọ ya eyaa inọ ọ te kpare “ọgba” ahwo riẹ nọ a kiẹrẹe “kpehru eva oruaro.” (Ol. 112:9) A te kpare ahwo Jihova nọ a kiẹrẹe kpehru nọ a be te ruẹ ọraha enọ e be wọso esuo Jihova na.
18. Ẹvẹ eme nọ i ku Olezi avọ 112 họ i ti ro rugba?
18 “Ohwo omuomu ọ rue riẹ eva e vẹ dha e; ọ vẹ reakọ nya vrẹ; ẹgwọlọ ohwo omuomu ọ vẹ te jọ ofofe.” (Ol. 112:10) Enọ e gbẹ be wọso idibo Ọghẹnẹ nẹnẹ a te “nya vrẹ” kẹle evaọ ihrieriọ gbe omukpahọ rai. Te ai te isiuru nọ a rọ gwọlọ nnọ iruo mai e raha a ti gbe whu evaọ ‘uye ulogbo’ nọ o be tha na.—Mat. 24:21.
19. Imuẹro vẹ ma rẹ sai wo?
19 Kọ whọ te jọ usu enọ e te zọ evaọ oke obokparọ yena? Hayo kọ who te whu fiki ẹyao hayo owho taure akpọ Setan o te ti kuhọ, kọ whọ te jọ usu “enọ ikiete” nọ a te kpare ze na? (Iruẹru 24:15) Uyo na o rẹ sae jọ Ee otẹrọnọ who gbe bi fi ẹrọwọ họ idhe ẹtanigbo Jesu jẹ raro kele Jihova, wọhọ “ohwo” okiẹrẹe nọ a dhesẹ evaọ Olezi avọ 112 na. (Se Ahwo Ẹfẹsọs 5:1, 2.) Jihova ọ te ruẹ nnọ a “kareghẹhọ” ahwo otiọye na gbe iruo ezi rai. Jihova ọ te kareghẹhọ ae je you rai bẹdẹ bẹdẹ.—Ol. 112:3, 6, 9.
[Oruvẹ-obotọ]
^ edhe-ẹme 5 Oghẹrẹ nọ a ruẹrẹ ilezi ivẹ nana họ gbe eme nọ e rrọ eva rai i dhesẹ inọ e ginẹ jẹhọ ohwohwo. Ma tẹ rehọ Olezi 111:3, 4 wawo Olezi 112:3, 4, ma rẹ ruẹ nnọ a jọ ilezi ivẹ nana ta kpahe ekwakwa-aghae Ọghẹnẹ evona.
Enọ nọ A re Roro Kpahe
• Ẹjiroro jọ vẹ ma re ro bo nọ “Jiri ỌNOWO”?
• Eware jọ vẹ e be via nẹnẹ nọ o be wha evawere se Ileleikristi uzẹme?
• Oghẹrẹ ọkokẹ vẹ Jihova ọ gwọlọ?
[Enọ Uwuhrẹ]
[Uwoho nọ o rrọ ẹwẹ-obe avọ 25]
Re ma sai kiẹrẹe evaọ aro Ọghẹnẹ, ma re fi ẹrọwọ họ azẹ Jesu
[Uwoho nọ o rrọ ẹwẹ-obe avọ 26]
Azọhọ unevaze nọ a rehọ emamọ eva ru e rẹ sai fi obọ họ evaọ ogbodhẹ, gbe ekere ebe mai