Naapertuilluartut Guuti naassaanngitsumik unnersiutigissavaat

‘Iluartoq [naapertuilluartoq, NV] eqqaamaneqartuassaaq. Iluarsusia [Naapertuilluassusia, NV] naassaanngitsumik atassaaq.’ — TUSSIAAT 112:6, 9.

1. (a) Guutip isaani naapertuilluartut tamarmik pilluarnartoq suna siunissaraat? (b) Suut apeqqutaalerpat?

GUUTIP isaani naapertuilluartut tamarmik nuanningaartumik siunissaqarput! Jehovap pissusii nuannersut pillugit ilinniarnerunertik naassaanngitsumik nuannaarutigisinnaassavaat. Jehovap pinngortitarsua pillugu paasisaqarnerujartortillutik qamannga pisumik Jehovamik unnersiutiginnerusungaassapput. Siunissap nuanningaartup tamatuma misigisinnaanissaanut pingaaruteqartut ilagaat ‘naapertuilluassuseq’, Tussiaat 112-imi pingaartinneqangaartoq. Guutilli illernarlunilu naapertuilluartup qanoq ililluni inuit ajortillit naapertuilluartutut isigisinnaavai? Eqqortumik iliorniarluta qanorluunniit ilungersortigigaluaraangatta kukkusarpugut, ilaannikkut allaat kukkorujussuartarpugut. — Romamiut 3:23; Jaaku 3:2.

2. Jehovap asannilluni tupinnartuliaanik marlunnik eqqaasaqarit.

² Jehovap tamatumunnga pitsaalluinnartumik aaqqiissutissaqarnissaa asannilluni isumagisimavaa. Qanoq ililluni? Siullermik, ernermi qilammiusup asasami inuunera niviarsiap nunamiusup illiaanut tupinnartuliornikkut nuuppaa. Taamaalilluni Jiisusi inuttut naammalluinnartutut  inunngorsinnaanngorpoq. (Lukasi 1:30-35) Jiisusi taassumunnga akeraasunit toqutaareermat Jehova asseqanngilluinnartumik allamik tupinnartuliorpoq. Jiisusi anersaatut pissarsuartut inuunermut makitippaa. — 1 Petrusi 3:18.

3. Sooq Guutip qilammi inuunermik ernerminut akissarsisitsinini nuannaarutigaa?

³ Jehovap Jiisusi inuttut inunngunngikkallarmat piginngisaanik akissarsisippaa — tassa qilammi toqujuilluni inuunermik. (Hebræerit 7:15-17, 28) Jehovap taamaaliornini nuannaarutigaa Jiisusi ilungersunartumik misilinneqarnermini assuarnaalluinnartuarmat. Taanna taamaalilluni Saatanip sallulluni inunnik namminissarsiornermik pissuteqartumik, Jehovamik asanninnermik ataavartussamik pissuteqarnani, Guutimut kiffartorneraaneranut akissutaavoq pitsaanerpaaq, aap naammalluinnartoq. — Ussatit 27:11.

4. (a) Jiisusi qilammut uterami uagut pilluta sua, Jehovallu tamanna qanoq periarfigaa? (b) Jehovap Jiisusillu illit pillutit iliuuserisimasaat qanoq isumaqarfigaagit?

⁴ Jiisusi ‘nammineq aammi’ nalinganik nassataqarluni qilammukarpoq “Guutip kiinaata saanut sassarumalluni iluaqutissatsinnik”. Jiisusip pilliutaa naleqangaartoq Ataatatta qilammiusup asannittup ‘ajortivut pillugit pilliutitut saammaannartitsissutitut’ kajumilluni akueraa. “Nalunngeqatiginnissuserput” taamaalilluni ‘eqqiarneqarpoq’, taamaattumillu ‘Guutimut uumasumut kiffartorsinnaavugut’. Tamanna oqaatsit Tussiaat 112-imi allassimasut uteqqinnissaannut ilumut pissutissaalluarpoq: “Halleluja.” — Hebræerit 9:12-14, 24; 1 Johannesi 2:2.

5. (a) Guutip isaani naapertuilluartuujuarumalluta susariaqarpugut? (b) Tussiaat 111 aamma 112 qanoq aaqqissuunneqarsimappat?

⁵ Guutip isaani naapertuilluartuujuassagutta Jiisusip aavanut kuisamut uppernerput ersersittuartariaqarparput. Ullut tamaviisa Jehova qutsavigisariaqarparput ‘taama asatigimmatigut’. (Johannesi 3:16) Aamma Guutip oqaasianik atuaqqissaartuartariaqarpugut tassanilu tusarliunneqartut naapertorlugit inuuniarluta sapinngisatsinnik iliortuartariaqarluta. Tussiaat 112-imi Guutimut ilerasuuteqanngittuarusuttunut tamanut pitsaasunik siunnersuuteqarpoq. Tussiaat taanna Tussiaat 111-mut tapertaavoq. Tussiaatit taakku marluk ima aallarnerneqarput: “Halleluja!” Taava taakku hebræerisut allassimaqqaarfiini tulliullutik allassimapput titarnerit 22-t, tamarmik immikkut Hebræerit alfabetianni naqinnerit 22-usut ilaannik aallarnerneqartut. *

Pilluarnissamut tunngaviusoq

6. Guutimik mianerinnittoq Tussiaat 112-imi oqaluttuarineqartoq qanoq pilluaqquneqarpa?

⁶ “Pilluarpoq [Jehovamik] mianerinnittoq inassutaanullu asanningaartoq [kajumilluartoq, 1990]. Kinguaassai nunami pissarsuussapput, peqqusersuitsup kinguaavi pilluaqqusaassapput.” (Tussiaat 112:1, 2) Oqaaseq “peqqusersuitsup” versi 2-mi atorneqartoq allassimaqqaarfinni hebræerisuuni qasseersiutaavoq. Taamaammat Tussiaat 112-imi inuit eqimattat pineqarunarput. Tamatumunnga tunngatillugu soqutiginarpoq Paulusip isumassarsisitaalluni Tussiaat 112:9 ukiuni hundredelinni siullerni ilagiinnut kristumiunut tunngatillugu atormagu. (Atuaruk 2 Korinthimiut 9:8, 9). Tussiaammi tamatumani ersersinneqarluarpoq Kristusimut ajoqersukkat ullumikkut aamma qanoq ilillutik pilluarsinnaasut.

7. Guutip kiffaasa iluaqutaasumik taassuminnga mianerinninnissaat sooq pingaaruteqarpa, aamma Guutip peqqussutai qanoq isigisariaqarpaat?

 ⁷ Soorlu Tussiaat 112:1-imit ersertoq kristumiut ilumoortut taakku, ‘Jehovamik mianerinnittut’, pilluangaarput. Taassuma iluarinngisaanik iliorumanani iluaqutaasumik mianersorneq anersaamik Saatanip silarsuaanik sunniisumik akiuinissamut iluaqutigisarpaat. Guutip oqaasianik atuaqqissaarnissamut taassumalu peqqussutaanik maleruaanissamut ‘kajumilluarput’. Aamma Guutip naalagaaffianik nunarsuarmi tamarmi oqaluussissutiginninnissamik peqqussut eqqarsaatigalugu taamaapput. Inunnik inuiannit tamaneersunik ajoqersuganngortitsiortorniarput tamannalu ilutigalugu guutiitsut ullup Guutip eqqartuussiffissaata nalliukkumaarnera pillugu mianersoqqullugit. — Ezekieli 3:17, 18; Matthæusi 28:19, 20.

8. (a) Guutip innuttai tunniusimasut aallussilluarnertik pillugu ullumikkut qanoq akissarsisinneqarsimappat? (b) Nunarsuarmi inuunissamik neriugisallit tamarmik sumik siunissaqarpat?

⁸ Guutip kiffaasa peqqussutinik maleruaanerat pissutaarpiarluni, maanna taakku 7 millioninit amerlanerupput. Miserratigineqarsinnaanngilaq Guutip innuttaasa ‘nunami pissarsuanngorsimanerat’. (Johannesi 10:16; Saqqummersitat 7:9, 14) Guutillu siunertani naammassippagu taakku ‘pilluaqqusaaqqissapput’. Nunarsuarmi inuunissamik neriugisallit ataatsimut isigalugit ‘annikilliornartussarsuarmit’ aniguisinneqassapput tassaassallutillu “[nuna] nutaaq iluassutsip najugarisassai”. Harmagedonimi aniguisut piffissap ingerlanerani suli pilluaqquneqarnerussapput. Taakku inunnik millionilinnik makititaasimasunik tikilluaqqusinissaminnut piareersimassapput. Siunissap pissanganassusia! Naggataatigut ‘inassutaanut kajumilluartut’ inuttut naammalluinnartunngoriartuaassapput, ‘kiffaanngissuserlu Guutip qitornaasa naalannarsiffissami pisassaat’ naassaanngitsumik nuannaarutigisinnaassavaat. — 2 Petrusi 3:13; Romamiut 8:21.

Pisuussutinik silatusaartumik atuineq

9, 10. Kristumiut ilumoortut anersaakkut pisuussutitik qanoq atorsimavaat, taakkualu naapertuilluassusiata naassaanngitsumik atanissaa qanoq paasisariaqarpa?

⁹ “Pigissaarlunilu pisuussuteqassaaq illumini, naassaanngitsumillu atassaaq iluarsusia [naapertuilluassusia, NV]. Taartumi qaammaqqutitut  qinngorsimassaaq peqqusersuitsunut, saammaalluni naakkinnillunilu iluartuullunilu [naapertuilluartuullunilu, NV].” (Tussiaat 112:3, 4) Biibilip nalaani Guutip kiffaasa ilaasa nunap piisigut pisuussutitik ilisimaneqaatigaat. Guutimit pilluaqqusaasut aamma pisuunngortarput pigisatigut pisuujunngikkaluarlutik. Ilumoorpoq Guutimut maniguunniarlutik aalajangertut amerlanersaat piitsuummata allanillu nikagineqartarmata, soorlu Jiisusip nalaani taamaassimasoq. (Lukasi 4:18; 7:22; Johannesi 7:49) Qanorli pigisaqartigineq pigisakitsiginerlu apeqqutaanani, anersaakkut pisuujusoqarsinnaavoq. — Matthæusi 6:20; 1 Timotheusi 6:18, 19; atuaruk Jaaku 2:5.

¹⁰ Kristumiut tanitat ikiortaasalu anersaakkut pisuussutitik nammineq pigiinnarniarneq ajorpaat. Saatanilli silarsuaani ‘taartumi qaammaqqutitut qinngorsimapput peqqusersuitsunut’. Taamaaliortarput allat ilisimassusermik naleqangaartumik Guutilu pillugu ilisimasaqarnermik iluaqutiginninnissaannut ikiorlugit. Akerlilersuisut Guutip naalagaaffianik oqaluussissutiginninnermik unitsitsiniarsarisimapput, iluatsinngitsumilli. Tamatuminnga suliaqarnerup inerititaa ‘naassaanngitsumik atassaaq’. Guutip kiffai naapertuilluarnerup aqqutaani pinertusaaramik naassaanngitsumik inuunissartik, ‘naassaanngitsumik atanissartik’, qularutiginngilluinnarsinnaavaat.

11, 12. Guutip kiffaasa pigisatik ilaatigut qanoq atortarpaat?

¹¹ Guutip innuttai, inussiaqatigiit tanitat ‘amerlangaartullu’, nunap piinut tunngatillugu assut tunisiumatuujusimapput. Tussiaat 112:9-mi ima allassimavoq: “Agguaasarpoq, piitsunut tunisivoq.” Kristumiut ilumoortut uppeqatitik eqqaamiutilluunniit annikillioraangata pigisatigut ikiuigajupput. Aamma aningaasaatitik ajunaarnersuarnut tunngatillugu ikiuiniarnernut atortarpaat. Tamannattaaq nuannaarutaasarpoq, soorlu Jiisusi taamaassaneraasimasoq. — Atuaruk Apustilit Suliaat 20:35; 2 Korinthimiut 9:7.

¹² Aamma eqqarsaatigikkit atuagassiamik matuminnga oqaatsinut 172-inut saqqummersitsinermi aningaasartuutigineqartartut. Atuagassiaq aamma tappiitsunit atuarneqarsinnaanngorlugu saqqummersinneqartarpoq, aamma ussersorluni oqaatsit assigiinngitsut atorlugit immiussatut pineqarsinnaavoq.

Tunisiumatullunilu naapertuilluartoq

13. Tunisiumatuneq eqqarsaatigalugu kikkut maligassaalluarnerpaappat, taakkualu maligassiaat qanoq malissinnaavavut?

¹³ “Pilluarpoq erligisaqarani atukkiisartoq.” (Tussiaat 112:5) Qularnanngitsumik maluginiarsimassavat inuit allanik ikiuisut ilumoorlutik tunisiumatujuaannanngitsut. Ilaat piumanngikkaluarlutik nikaginnippalullutillu ikiuisarput. Ajoqutaasutut pingaaruteqanngitsutulluunniit misigititsisumit ikiorneqarneq nuannerneq ajorpoq. Ilumoorlunili tunisiumatuumit ikiorneqarneq allatorluinnaq misiginartarpoq. Jehova tukkorluni kajumittumillu tunisineq eqqarsaatigalugu maligassiuilluarnerpaavoq. (1 Timotheusi 1:11; Jaaku 1:5, 17) Aamma Jiisusip Kristusip Ataatami maligassiaa naammalluinnartumik malippaa. (Markusi 1:40-42) Taamaattumik Guutip isaani naapertuilluartuujumalluta tukkorluta kajumillutalu tunisisarpugut, ingammik oqaluussinermi inoqativut Jehovamik ilisarisimannilernissaannut ikiornissaannik neqeroorfigigaangatsigit.

14. Ilaatigut qanoq ‘suliassavut naapertuilluartumik suliarisinnaavavut’?

¹⁴ “Suliassani naapertuilluartumik suliarisarpai.” (Tussiaat 112:5, NV) Siulittuutigineqartutut inussiaqatigiinnut aalajaatsunut ilaasortaasut naalakkamik soqutigisai Jehovap naapertuilluassusianut naapertuuttumik isumagisarpaat. (Atuaruk Lukasi 12:42-44). Tamanna ersertarpoq utoqqaanertat, ilagiinni ingasattumik ajortulianut tunngasunik ilaannikkut suliaqartariaqartartut, siunnersuutaanni Biibilimik tunngaveqartuni. Aamma inussiaqatigiit naapertuilluartumik iliuuseqarfiginnittarnerat ilagiit, ajoqersuiartortitat angerlarsimaffii Betelillu qanoq ingerlanneqartassanerannik siunnersuutaannit erserpoq. Naapertuilluartuunissarli utoqqaanertanuinnaq piumasaqaataanngilaq. Kristumiunut tamanut atuuppoq, taakkua imminnut attaveqaqatigiinneranni allamillu upperisalinnut attaveqarneranni, aamma niuernerup tungaatigut. — Atuaruk Mika 6:8, 11.

Naapertuilluartunut pilluaqqussutit

15, 16. (a) Silarsuarmi nutaarsiassat nuanniitsut Guutip isaani naapertuilluartuusunut qanoq sunniuttarpat? (b) Guutip kiffaasa suna suliariuarniarlugu aalajangiusimavaat?

¹⁵ “Patajalinngisaannassagami. Iluartormi [Naapertuilluartoq, NV] eqqaamaneqartuassaaq.  Ajunaarnermik nalunaarut annilaarutiginngilaa, uummataat eqqissisimalluinnarpoq [Jehova] tatigalugu. Aalajaappoq ersigisaqarnanilu, takussavaa akeqqami ajorsartitaanerat.” (Tussiaat 112:6-8) Nutaarsiassat nuanniitsut oqaluttuarisaanermi maanna aatsaat taama amerlatigaat. Tassa sorsunnerit, pinerliiniarnerit, nappaatit nutaat, nappaatitoqqat atuuteqqilersut, pinerluttuliornerit, piitsuussuseq mingutsitsinerlu aseroriartortitsisoq pillugit nutaarsiassat. Guutip isaani naapertuilluartuusut nutaarsiassat nuanniitsut taakku sunnertissutiginngitsoorsinnaanngilaat, susinnaajunnaassutiginerli ajorpaat. Uummataat ‘eqqissisimalluinnarlutillu’ ‘aalajaapput’. Siunissaq isumalluarfigaat nalunnginnamikku Guutip silarsuassaa nutaaq naapertuilluartoq qanillisoq. Ajunaarnernit eqqugaanitik naammagalugit atorsinnaalluarnerusarpaat Jehovap ikiuinissaa qularutiginnginnamikku. Taassuma naapertuilluartutut isigisani ‘patajatinngisaannassavai’. Ikiussavai pinertusaarnissaannullu nakussatsillugit. — Filippimiut 4:13.

¹⁶ Guutip isaani naapertuilluartuusut aamma akerlilersortiminnit uumissorneqarnertik taakkualu salluliuutaat naammagiinnartariaqarpaat, tamakkuali oqaluussiunnaassutiginngisaannassavaat. Guutip kiffaasa Jehovap imminnut suliassiissutigisaa — Guutip naalagaaffia pillugu nutaarsiassamik nuannersumik oqaluussissutiginninneq tusarliussamullu ajunngitsumik periartunik ajoqersuganngortitsiortorneq — aalajaalluinnarlutik suliariuarpaat. Naggatissaq qanilliartortillugu naapertuilluartut akerlilersuisoqaleraluttuinnarnera malugissagunarpaat. Naapertuilluartunik uumissuinerup ajornerpaaffissaa nalliutissaaq Saatani Diaavulu, Gogitut Magogimeersutut, silarsuaq tamakkerlugu taakkuninnga saassussippat. Naggataatigut taakku ‘akeqqamik’ ajugaaffigineqarluinnarlutik ‘ajorsartitaanerat’ takussavaat. Jehovap aqqata illernarsisilluinnarneqarnera misigalugu qanoq puiunaatsigissava! — Ezekieli 38:18, 22, 23.

“Massisimavoq alutornartumik”

17. Naapertuilluartup ‘alutornartumik massitinneqarnissaa’ qanoq paasisariaqarpa?

¹⁷ Ataasiussuseqarluni Diaavulumillu taassumalu silarsuaanit akerlilersorneqarnani Jehovamik unnersiutiginnissinnaaneq nuannaarutaangaassaaq. Guutimut naapertuilluartumik attaveqartuartut tamarmik tamanna naassaanngitsumik nuannaarutigisinnaassavaat. Ajorsarnaviaratillu kanngunarsarneqarnavianngillat, Jehovami neriorsuivoq naapertuilluartutut isigisani ‘alutornartumik massissasoq’. (Tussiaat 112:9) Naapertuilluartoq nuannaangaassaaq Jehovap kisimi oqartussaassusianik akerlilersuisut tamarmik ajorsartinneqarnerat takuguniuk.

18. Oqaatsit Tussiaat 112-imi naggasiutigineqartut qanoq eqquutissappat?

¹⁸ “Iluaatsoq tamanna takullugulu isumatsassaaq, qorsaqqortarluni aqullaarlunilu. Iluaatsut qanoq iliorniarneri iluatsittussaanngillat.” (Tussiaat 112:10) Guutip innuttaanik akerlilersuiuartut sinnganerminni uumissuinerminnilu qanittukkut ‘aqullaassapput’, imaluunniit nungunneqassapput. Taakku Guutip kiffaasa suliaata unitsinneqarnissaanik kissaataat taakkulu namminneq ‘naalliunnartoqangaarnissami’ “iluatsittussaanngillat”, imaluunniit suujunnaassapput. — Matthæusi 24:21.

19. Suna qularutiginngilluinnarsinnaavarput?

¹⁹ Ajugaanissarsuarmi tamatumani aniguisunut ilaassavit? Imaluunniit — Saatanip silarsuaata naggatissaa sioqqullugu napparsimalissagaluaruit utoqqalillutilluunniit toqussagaluaruit — naapertuilluartut makititaasut ilagissavaatsit? (Apustilit Suliaat 24:15) Inuttut naapertuilluartutut Tussiaat 112-imi eqqartorneqartut pinerattut Jiisusip utertitsissutitut pilliutaa upperiuarukku Jehovallu maligassiaa malittuarukku apeqqutinut taakkununnga akissut aappiusinnaavoq. (Atuaruk Efesosimiut 5:1, 2). Jehovap inuit taakku taakkualu naapertuilluartuliaat ‘eqqaamajuassavai’ inuunermillu naassaanngitsumik tunissallugit. Jehovap naassaanngitsumut eqqaamallugillu asassavai. — Tussiaat 112:3, 6, 9. (w09 03/15-E)

[Quppernerup ataani ilanngussaq]

Apeqqutit eqqarsaatigilluagassat

• “Halleluja”-rluta Guutimik unnersiutiginninnissamut sunik pissutissaqarpugut?

• Ullumikkut ineriartorneq suna kristumiut ilumoortut nuannaarutigaat?

• Tunisisartut qanoq isiginnittaasillit Jehovap asavai?

[Atuaqqissaarnermi apeqqutit]

[Qupp. 25-mi assiliartaq]

Guutip isaani naapertuilluartuujuarumalluta Jiisusip aavanik kuisamik upperinninnerput ersersittariaqarparput

[Qupp. 26-mi assiliartat]

Kajumilluni tunissutigineqartut ikiuiniarnernut Biibililersaarutinillu siaruarterinermut iluaqutaasinnaapput