Boloke Bakatendelanga Leza Nyeke
Boloke Bakatendelanga Leza Nyeke
“Moloke ukavulukibwanga. . . . Boloke bwandi bulādila monka nyeke.” —MIT. 112:6, 9.
1. (a) Lelo i nsangaji’ka itengele boba bamonwa na Leza bu boloke? (b) Lelo i kipangujo’ka kipangulwa?
BOBA bonso bamwenwe na Leza bu boloke badi na lukulupilo lwa kutendelwa mu mafuku a kumeso! Bakekalanga nyeke na nsangaji ya kuyukila’ko bivule pa ngikadila milumbuluke ya Yehova. Mityima yabo ikayula mitendelo pobakayukila’ko bivule pa mingilo ya Leza ya bupangi. Mitōto 112 ilombola patōkelela’mba “boloke” i kisakibwa kikatampe ku boba bakatanwa mu ino ntumbo ya ku meso. Ino, lelo bikokejika namani Yehova, Leza ujila ne moloke kumona bantu ba bubi bu boloke? Nansha tulonge bukomo’ka bwa kulonga byoloke, tuloñanga bilubo, kyaba kimo ne bilubo bikatampe.—Loma 3:23; Yak. 3:2.
2. Lelo i bingelengele’ka bibidi byālongele Yehova pa buswe bwandi?
2 Yehova, pa buswe bwandi, i mulete’ko malondololo mafike’po. Namani? Dibajinji, na kulonga kingelengele kya kutalula būmi bwa wandi Mwana muswedibwe mūlu webutundulwila mu ndá ya mwana-mukaji mujike pa kusaka’mba abutulwe bu muntu mubwaninine. (Luka 1:30-35) Ebiya, kupwa Yesu kwipaibwa na balwana nandi, Yehova wālongele kingelengele kikwabo kya kutulumuka. Leza wāsangwile Yesu bu kipangwa kya ntumbo kya ku mushipiditu.—1 Pet. 3:18.
3. Mwanda waka Leza wāsangedile kupala wandi Mwana mpalo ya būmi bwa momwa mūlu?
3 Yehova wāpadile Yesu mpalo imo yakādipo nayo kumeso kwa kwiya’ye pano panshi—būmi bwampikwa kufula momwa mūlu. (Bah. 7:15-17, 28) Yehova wāsangele kumupa ino mpalo mwanda Yesu wālamine bululame bubwaninine mu matompo makatampe. Mu uno muswelo, Yesu wāletele kilondololwa kilumbuluke kudi Shandi, kadi kibwaninine, kya kujingulula bubela bwa Satana bwa amba bantu bengidilanga Leza mwanda wa kamweno kabo, ke pa mwandapo wa kumulamata na buswe.—Nk. 27:11.
4. (a) Le pa kujokela mūlu, Yesu wētulongele bika, ne Yehova nandi wālonga’po namani? (b) Lelo umwene namani bikulongele Yehova ne Yesu?
4 Yesu wālongele bivule momwa mūlu. Wāikele “kwitumwekela ponka pano bātwe pa mpala ya Leza” na bulēme bwa “mashi a aye mwine.” Tata wetu wa buswe udi mūlu wāitabije na kanye kya bulēme kyāpene Yesu bu “kipwanino kya myanda yetu.” O mwanda, shi ‘twibakendwe mityima ya mundamunda,’ tubwanya kwingila “mīngilo [ikola] ya Leza wa būmi.” Bine, tudi na bubinga bukatampe bwa kwitabija binenwa bibajinji bya Mitōto 112, amba “Tendelai Yehova”!—Bah. 9:12-14, 24; 1 Yoa. 2:2.
5. (a) Le i bika byotufwaninwe kulonga pa kulama boloke kumeso a Leza (b) Le Mitōto 111 i mukwatañane namani na Mitōto 112?
5 Shi tusaka kulama boloke kumeso a Leza, tufwaninwe kwikala na lwitabijo mu mashi āmwangile Yesu. Ketufwaninwepo kupityija difuku nansha dimo kwampikwa kufwija’ko Yehova mwanda witusenswe bikata. (Yoa. 3:16) Kadi tufwaninwe kwifunda nyeke Kinenwa kya Leza ne kulonga bukomo bwa kwikala na būmi bukwatañene na byokinena. Mu Mitōto 112 mudi madingi mayampe ku bonso basaka kulama mutyima wa mundamunda utōka kumeso a Leza. Uno mutōto i mukwatañane na Mitōto 111. Yonso ibidi ishilula na binenwa bya amba: “Tendelai Yehova”! nansha “Aleluya!” Kadi mu ludimi lubajinjibajinji lwa Kihebelu, ino mitōto yonso ibidi, umo ne umo udi na milongo 22, mulongo umo ne umo ushilula na disomo dimo dya masomo 22 a alufabe wa Kihebelu monka moelondela. *
Nsulo ya Nsangaji
6. Lelo “muntu” wakaminwe Leza utelelwe mu Mitōto 112 weselwanga namani?
6 “Tendelai Yehova, keye wa katōkwe kandi, shandi! yewa muntu wakaminwe Yehova, ne kusangala pakatampe pene mu bijila byandi. Lukunwa lwandi lukēkalanga lukatampe panopanshi; lukongo lwa boloke lukēselwanga dyese.” (Mit. 112:1, 2) Yuka’mba mulembi wa mitōto utela dibajinji “muntu” umo, kupwa mu kipindi kya mfulo kya vese 2 ke bavule, amba “boloke”. Kino kilombola’mba Mitōto 112 wisambila pa bantu bavule. Pa uno mwanda, mutumibwa Polo, na bukomo bwa mushipiditu sandu, wāingidije bishima bya Mitōto 112:9 paādi wisambila pa Bene Kidishitu ba mu myaka katwa kabajinji. (Tanga 2 Kodinda 9:8, 9.) Bine, uno mutōto ulombola biyampe nsangaji ikokeja kwikala na balondi ba Kidishitu badi pano pa ntanda dyalelo!
7. Mwanda waka bengidi ba Leza bafwaninwe kumwakamwa mu muswelo mwendele’mo, ne i muswelo’ka ofwaninwe kumona misoñanya ya Leza?
7 Enka na mokilombwedilwe mu Mitōto 112:1, bano Bene Kidishitu ba bine badi na katōkwe kakatampe pobanangila mu ‘kwakamwa Yehova.’ Kuno kwakamwa kwendele’mo kwa kutyina kumufityija mutyima kwibakwashanga bakomene mushipiditu wa ntanda ya Satana. ‘Basangalanga pakatampe pene’ mu kwifunda Kinenwa kya Leza ne kukōkela misoñanya yandi. Kino kitala ne musoñanya wa kusapula myanda miyampe ya Bulopwe pano pa ntanda ponso. Baloñanga bantu ba mu mizo yonso ke bana ba bwanga ne kudyumuna babi mwanda wa difuku dya butyibi bwa Leza disa kwiya.—Ezek. 3:17, 18; Mat. 28:19, 20.
8. (a) Le dyalelo bantu ba Leza bēpane i beselwe namani pangala pa bupyasakane bwabo? (b) Le i madyese’ka atengele boba badi na lukulupilo lwa kukekala na būmi pano pa ntanda?
8 Bengidi ba Leza byobakōkele ino misoñanya, pano kebadi kintu kya midiyo isamba-ibidi. Le i ani ubwanya kutuna’mba bantu bandi ke muzopo ‘mukatampe pano pa ntanda’? (Yoa. 10:16; Kus. 7:9, 14) Ne bine, ‘bakeselwanga dyese’ pendelela Leza kufikidija mpango yandi! Kibumbo kya boba bakulupile kukekala na būmi pano panshi kikalamibwanga ku “malwa makatampe” ne kwikala ke ‘ntanda mipya,’ mwine “mwikalanga boloke.” Kupwa, boba bakapanda ku Amakedona ‘bakeselwanga dyese’ dikwabo. Bakatundailanga midiyo ya bakasangulwa. Luno i lukulupilo lusangajapo kashā! Bityebitye, boba ‘basangela pakatampe pene’ misoñanya ya Leza bakekala ke bantu babwaninine ne kusangela nyeke kyepelo kya bu “byana bya bene bya ntumbo bwa bāna ba Leza.”—2 Pet. 3:13; Loma 8:21.
Mwa Kwingidijija Bupeta Biyampe
9, 10. Lelo Bene Kidishitu ba bine bengidijanga namani bupeta bwabo bwa ku mushipiditu, ne boloke bwabo bukalādilanga monka nyeke muswelo’ka?
9 “Bintu bivule bya bupeta bidi mwandi mu njibo; kadi boloke bwandi bulādila monka nyeke. Kudi boloke kutalukanga kitōkeji mu fukutu; i wabuntu, muyūle lusalusa, moloke.” (Mit. 112:3, 4) Mu myaka yāsonekelwe Bible, bengidi ba Leza bamobamo bādi bayukene bu bampeta. Kadi mu muneneno mukwabo, boba betabijibwe na Leza bine bekalanga bampeta, nansha shi ke bupeta bwa ku ngitupo. Na bubine, bavule batoñanga kwityepeja kumeso a Leza i balanda ne bapunikwe, na mwādi mwikadile Yesu. (Luka 4:18; 7:22; Yoa. 7:49) Inoko, muntu ekale na bintu bya ku ngitu bivule nansha bityetye, ubwanya kwikala mpeta ku mushipiditu.—Mat. 6:20; 1 Tem. 6:18, 19; tanga Yakoba 2:5.
10 Bene Kidishitu bashingwe-māni ne bapwani nabo kebadipo na mwino wa kwaba bupeta bwabo bwa ku mushipiditu. Ino, nansha ke mu ino ntanda ya Satana ya fukutu, kobadi “kutalukanga kitōkeji” kya kumunikila boloke. Bamunikanga na kukwasha bakwabo bamwene mu bupeta bwa ku mushipiditu bwa tunangu ne buyuki bwa Leza. Balwana batompanga kwimika mwingilo wa kusapula Bulopwe ino i bakomenwe. Inoko, bipa bya uno mwingilo moloke ‘bikalādilanga monka nyeke.’ Bengidi ba Leza pobōminina mu boloke, bakulupile amba bakekala’ko lonso, ke ‘kulādila monka nyeke’ kadi.
11, 12. Le bantu ba Leza bengidijanga bya bupeta byabo bya ku ngitu mu miswelo’ka imoimo?
11 Bantu ba Leza, bashingwe-māni ne boba ba “kibumbo kikatampe,” i bamweke amba badi na buntu bwa kupāna bya bupeta byabo. Mitōto 112:9 inena’mba: “Wakalañanya, balanda webape; boloke bwandi bulādila monka nyeke.” Dyalelo Bene Kidishitu ba bine bapānanga divule byabuntu bya ku ngitu ku banababo Bene Kidishitu ne ku bantu bakwabo bafudilwe. Kadi bengidijanga bupeta bwabo mwanda wa kukwatakanya mikongo ya bukwashi mu bitatyi bya bimpengele. Enka na mwanene’kyo Yesu, ino nayo i nsulo ya nsangaji.—Tanga Bilongwa 20:35; 2 Kodinda 9:7.
12 Kutentekela’po, langa’po bidi lupeto lwelwa pa kutambija dino dipepala mu ndimi 172, bavule mu besamba’yo i balanda. Langulukila ne pa muswelo odilupwilwe mu ndimi mishileshile ya batumama, ne mu bilembwa bya bampofu (Braille).
Wa Buntu Kadi Moloke
13. Le i bāni betushidile kimfwa kilumbuluke kya buntu bwa kupāna, ne tukebeula namani?
13 “I biyampe ku yewa muntu ulonga byabuntu ne kwapulwa.” (Mit. 112:5) Nobe wimumone amba, bantu bamo bakwashanga bakwabo kebekalangapo nyeke na buntu. Kudi bapānanga mwanda wa kwitumbika, bakwabo nabo mwanda wa kutūkija bakwabo bulēme. Kebisangajangapo kukwashibwa na muntu wa kibengo nansha yewa ukumona bu muntu umudīla bintu pa mutwe ne bu kiselwa kilēma. Inoko, bikalanga bisangaja kukwashibwa na muntu wa buntu. Ku buntu, Yehova i kimfwa kya kutendelwa, Kyaba bulale. (1 Tem. 1:11; Yak. 1:5, 17) Yesu Kidishitu wāiwile mu muswelo mubwaninine kimfwa kya buntu bwa Shandi. (Mako 1:40-42) O mwanda, pa kusaka’mba tumonwe na Leza bu boloke, tupānei na mutyima wa nsangaji ne buntu, kutabukidila kitatyi kyotukwasha bakwetu ku mushipiditu mu mwingilo wa budimi.
14. Le i mu miswelo’ka imoimo motubwanya ‘kulumbulula myanda yetu mu kidye’ nansha na boloke?
14 “Mwanda wandi ukalumbuluka mu kidye.” (Mit. 112:5) Enka na mokyālailwe kala, kabumbo ka Kalama wa bine kalamanga bintu bya Mfumwandi mungya boloke bwa Yehova. (Tanga Luka 12:42-44.) Boloke bumwekanga ne mu bulombodi bwa mu Bisonekwa bupelwe bakulumpe, bapwijanga dimodimo myanda ya bubi bukatampe mu kipwilo. Kadi kutyiba mambo na boloke kumwekanga mu bwendeji bwimanine mu Bible buletanga kabumbo ka umpika pa bitala mwa kwingidila bipwilo, mobo a bamishonele ne Mabetele. Ke enkapo bakulumpe bafwaninwe kulonda boloke, ino i ne Bene Kidishitu bonso mu byonso byobalongela bakwabo ne bakubulwa kwitabija bene, kubadila’mo ne myanda ya busunga mine.—Tanga Mika 6:8, 11.
Madyese a Boloke
15, 16. (a) Lelo boloke bamonanga namani myanda mibi ya ino ntanda? (b) Le bengidi ba Leza i basumininwe kulonga nyeke bika?
15 “Ke-muntu kakajinapo nansha patyetye; moloke ukavulukibwanga nyeke na nyeke. Kakakwatyilwangapo moyo wa myanda mibi; mutyima utele ponka; ukulupile Yehova. Mutyima wandi wakankamikwa, kakakwatwapo moyo, poso’mba amone kyasaka pa bakinkwa nandi.” (Mit. 112:6-8) Ke kwaikelepo kashā mu mānga kitatyi kya myanda mibi na kino, kimfwa myanda ya mavita, butumbula, mbá mipya ne ya kala ikijokelajokela, butapani, bulanda, ne konakanya ntanda. Boba bamonwa na Leza bu boloke kebadipo mwa kwepela ino myanda mibi, inoko keibwanyapo kwibazakaja. Ino, mityima yabo ‘itele ponka’ kadi ‘ikankamikwa’ pobatengele na kikulupiji būmi bwa kumeso, bayukile amba ntanda impya myoloke ya Leza ibafwena pabwipi. Shi batanwe na kimpengele, badi na bukomo bwa kūminina’kyo mwanda bakulupile Yehova wa kwibakwasha. Kakalekapo boloke ‘bajina’ nansha patyetye—wibakwasha ne kwibapa bukomo bwa kūminina.—Fid. 4:13.
16 Kadi boloke ba Leza bomininanga mushikwa ne bubela bwibabepela balwana, ino bino i bikomenwe kumuma byakanwa bya Bene Kidishitu kadi kebikabwanyapo nansha dimo. Abo bengidi ba Leza bemanije nyeke kujina mpika mu mwingilo wibapele Yehova wa kusapula myanda miyampe ya Bulopwe ne kulonga bonso betabija ke bana ba bwanga. I bine, boloke bakatanwa na kulondwalondwa kwa malwa pano penda pafwena mfulo. Uno mushikwa ukanana pano pa ntanda ponso pobakatambwa na Satana Dyabola, bu Koka wa Makoka. Kupwa, ‘tukamonanga bakinkwa netu’ pobakafwijibwa bumvu ne kutukijibwa. Bine, ukekala mwanda mukatampe pa kumona dijina dya Yehova ditumbijibwa!—Ezek. 38:18, 22, 23.
‘Ukazunzulwa ne Bulēme’
17. Le moloke ‘ukazunzulwa ne bulēme’ namani?
17 Bine kukekala nsangaji mikatampe pa kutendela Yehova umbumo, kwampikwa kujikakanibwa na Dyabola ne bandi bantu! Ino nsangaji ikekalanga nyeke na boba balamine boloke kumeso a Leza. Kebakedibwapo nansha kufwijibwa bumvu, ke-pantu Yehova i mulaye amba “lusengo” lwa moloke wandi “lukazunzulwa ne buleme.” (Mit. 112:9) Moloke wa Yehova ukela nsadi ya bushindañani pakamona kuponejibwa kwa bakinkwa bonsololo ba bubikadi bwa Yehova.
18. Le binenwa bya ku mfulo bya Mitōto 112 bikafikidilanga namani?
18 “Mubi ukekimona, ne kufītwa ku mutyima; ukēshenkanya meno ne kujimankana ponka; kisaka babi kikonakanibwanga.” (Mit. 112:10) Panopano ponka bonso bendelela na kulwa bantu ba Leza kebasa “kujimankana” pa mwanda wa kwabila ne mushikwa wabo. Kusaka kobasaka kufudija mwingilo wetu kukonakanibwanga pamo ne abo bene ku “kyamalwa kibūke” kisa kwiya.—Mat. 24:21.
19. Le tubwanya kwikala na lukulupilo’ka?
19 Le ukabadilwa mu boba bantu ba katokwe bakapanda ku buno bushindañani bukatampe? Nansha shi ufwe mwanda wa misongo nansha bununu kumeso kwa mfulo ya ntanda ya Satana, le ukabadilwanga mu “boloke” bakasangulwa? (Bil. 24:15) Ubwanya kukabadilwa’mo shi wendelele na kulombola lwitabijo mu kitapwa kya kikūlwa kya Yesu ne kwiula Yehova, pamo bwa boba belekejibwe na “muntu” moloke utelelwe mu Mitōto 112. (Tanga Efisesa 5:1, 2.) Yehova ukata mutyima bano bantu bekale ‘kukavulukibwa’ kutyina kuvulaminibwa nansha dimo ne mingilo yabo mine. Yehova ukebavulukanga ne kwibaswa nyeke ne nyekeke.—Mit. 112:3, 6, 9.
[Kunshi kwa dyani]
^ Kwilunga kudi pa ino Mitōto ibidi i kumweke mu mupungilo wayo ne mu bine bidi’mo. “Muntu” wakaminwe Leza utelelwe mu Mitōto 112 i mulonde ngikadila ya Leza itelelwe patōka mu Mitōto 111, enka na mobimwekela pa kudingakanya Mitōto 111:3, 4 na Mitōto 112:3, 4.
Bipangujo bya Kulangulukila’po
• Le i bubinga’ka bumobumo botudi nabo bwa kunenena “Aleluya”?
• Lelo i kwendelela’ka kwa mu ano mafuku kusangaja kabumbo ka umpika?
• Lelo Yehova usenswe muntu upāna muswelo’ka?
[Bipangujo bya Kifundwa]
[Kifwatulo pa paje 25]
Shi tusaka kulama boloke kumeso a Leza, tufwaninwe kwikala na lwitabijo mu mashi āmwangile Yesu
[Kifwatulo pa paje 26]
Byabuntu bipānwa na mutyima tō bingidijibwanga pa kukwasha bantu, kulupula mabuku esambila pa Bible ne kwiabanya ku bantu