Aloña Akamuhamekaña Nzambi Haya Nyaka

‘Waloña akamwanukaña . . . Kuloña kwindi kwahaya nyaka.’—MASAMU 112:6, 9.

1. (a) Chumanyi chatalilañawu antu amonañayi Nzambi nindi aloña? (b) Lwihwinyi lwehulañawu?

 ANTU ejima amonañayi Nzambi nindi aloña atalilaña yuma yayiwahi chikupu kumbidi. Akazañalala haya nyaka nakudiza yuma yayivulu kutalisha hayililu yaYehova yayiwahi. Nyichima yawu yikasweja kushimeka hampinji yakadizañawu yuma yayivulu yaleñayi Nzambi. Chuma cheneni chakeñekaña hakudiluñisha iyi nkisu yayiwahi kumbidi ‘hikuloña’ kuyakonkomwenawu haMasamu 112. Indi Yehova, Nzambi wajila nawa waloña nateli kumona ñahi antu akwanshidi nindi aloña? Hela chakwila tukuzata nañovu yetu kulonda twili yuma yaloña, twaluwañeshaña, mpinji jikwawu twavulumunaña ninyiloña yamaneni.—Aroma 3:23; Yakoba 3:2.

2. Yihayamishanyi yiyedi yakoñeliyi Yehova hamuloña wakukeña?

² Mukukeña, Yehova watuloñeshela njila yakuletesha akwanshidi kwikala aloña. Welili ñahi mwenimu? Tachi, kuhitila mukutuntulula muchihayamisha wumi waMwanindi wamwiwulu wakeñayi nakuwisha mwivumu damujiki kulonda kuvwalika chakubula nshidi. (Luka 1:30-35) Kuhiñahu, chelili ayilumbu jaYesu  amujahi, Yehova wakoñeli chihayamisha chikwawu chabadika kulema. Nzambi wamusañwili Yesu kuwumi wawuwahi namujimba wakuspiritu.—1 Petulu 3:18.

3. Muloñadi Nzambi chatiyililiyi kuwaha kumufweta Mwanindi wumi wamwiwulu?

³ Yehova wamufweteli Yesu chuma chabuliliyi henohu wuchidi mwiwulu—Wumi wakanoñaña mwiwulu. (Aheberu 7:15-17, 28) Yehova watiyili kuwaha kwila mwenimu muloña Yesu washinshikili nihampinji yakweseka kwasweja. Dichi Yesu waletesheli Tata yindi kumwakula chachiwahi Satana kutalisha hamakudi ahosheliyi nindi antu amukalakelaña Nzambi hamuloña walwisu bayi neyi hamuloña wakukeña kwakwenuku.—Yishimu 27:11.

4. (a) Chumanyi chatukoñeleliyi Yesu hampinji yafuntiliyi mwiwulu, nawa Yehova weliluhu hodi? (b) Watiyaña ñahi hachuma chinakwililiyi Yehova niYesu?

⁴ Yesu wakoñeli yuma yayivulu mwiwulu. ‘Watumwekeneni kumesu aNzambi’ nakulema ‘kwamashi indi yomweni.’ Tata yetu wamwiwulu wukweti kukeña wetejeli mulambu walema waheniyi Yesu neyi ‘ifutu danshidi jetu.’ Dichi dinu hakwikala, ‘nayinleji yitooka’ tunateli ‘kumukalakela Nzambi wamumi mudimu wajila.’ Ichi chatuleñelaña kusombolola mazu akutachikilahu ekala haMasamu 112, akwila nawu ‘Muhamekenu Ya, enu antu.’—Aheberu 9:12-14, 24; 1 Yowanu 2:2.

5. (a) Chumanyi chitwatela kwila hakwila nawu twikali aloña kumesu aNzambi? (b) Munjilanyi mwasonekelawu Masamu 111 niMasamu 112?

⁵ Hakwila nawu twikali aloña kumesu aNzambi, twatela kutwalekahu kukuhwelela mumashi aYesu apwekeli. Twatela kumuhamekaña Yehova mafuku ejima muloña watukeña nankashi. (Yowanu 3:16) Twatela cheñi kudizaña Izu daNzambi nikuzata nañovu kulonda tuzatisheña yuma yitunakudiza. Isamu 112 dekala nakufumba kwakuwahi kwatela kukwasha ejima anakukeña kwikala nachinleji chitooka kumesu aNzambi. Idi isamu dendelaña hamu Nesamu 111. Masamu ejima ayedi atachika namazu akwila nawu “Aleluya” hela ‘Muhamekenu Ya, enu antu’ nawa kwesekeja nedimi dadeni dachiHeberu halondela nyifunda 22 nawa mufunda wejima watachika nansona yimu yajinsona 22 yaalufwabeti yachiHeberu. *

Hashindamena Muzañalu

6. Indi “muntu” wamwakama Nzambi washimunawu muMasamu 112 wakooleka ñahi?

⁶ ‘Muntu wamwakamaña Yehova, watiyaña mwalejeliyi kuwaha nankashi, nakooleki. Anyanindi akekala alema hanu hamaseki; ikiñu dawantu oloka akakooleka.’ (Masamu 112:1,  2) Ilukenu nenu ñimbi yamasamu watachika kutena “muntu” wumu, kuhiñahu hakutena antu amavulu nindi “oloka” hakumana kwavasi 2. Ichi chamwekesha nawu Masamu 112 yatena izanvu dawantu amavulu. Hakuhakwilaku ichi chikuma, kapostolu Pawulu amoneneni kuzatisha mazu ekala haMasamu 112:9 kudi akwaKristu amuyaaka nkulakaji yakusambila. (Tañenu 2 Akorinda 9:8, 9.) Idi isamu  damwekesha chiwahi chazañalalañawu atumbanji twaKristu makonu.

7. Muloñadi ambuña aNzambi chatelelawu kumwakama Nzambi, nawa mwatiyaña ñahi hanshimbi jaNzambi?

⁷ Neyi chamwekeshawu haMasamu 112:1, awa akwaKristu alala azañalalaña chikupu ‘hakumwakama Yehova.’ Kumwakama Nzambi kwayikwashaña kudikaña nayililu yamukaayi kaSatana. ‘Atiyaña kuwaha’ kudiza Izu daNzambi nikwovwahila nshimbi jindi. Iyi nshimbi yabombelamu kushimwina nsañu yayiwahi yaWanta mukaayi kejima. Afwilaña kwilisha atumbanji munyunza yejima hampinji yoyimu nikuyibabesha antu atama kutalisha hefuku dawunsompeshi waNzambi dinakwinza.—Ezekeli 3:17, 18; Matewu 28:19, 20.

8. (a) Indi antu jaNzambi adihana makonu anayikiswili ñahi hakuzata nañovu? (b) Nkiswinyi yatalilañawu antu akweti chikuhwelelu chakushakama hamaseki?

⁸ Hamuloña wakwovwahila iyi nshimbi, ambuña aNzambi ahamaseki makonu anashiki dehi yihita yitanu nayiyedi. Antu ejima anakwiteja nawu ambuña aNzambi anekali “alema hanu hamaseki.” (Yowanu 10:16; Chimwekeshu 7:9, 14) Nawa “akakooleka” hampinji yakashikijayi Nzambi nkeñelu yindi. Antu akweti chikuhwelelu chakushakama hamaseki akayikiña hampinji ‘yayihuñu yeneni’ yinakwinza hamu neyi izaza kulonda akatuñi “iseki dadiha, mwakekala kuloña.” Mukuhita kwamafuku, antu akapuluka haAmagedoni ‘akayikiswila’ chikupu. Akadiloñesha kutambwila antu amavulu akasañulawu. Tunakutalila yuma yayiwahi nankashi. Nkumininaku, antu ‘atiyaña kuwaha nankashi’ nshimbi jaNzambi akekala awanina nakudiluñisha chahaya nyaka “waana wawanyana kaNzambi wowu waana walema.”—2 Petulu 3:13; Aroma 8:21.

Kuzatisha Maheta Chachiwahi

9, 10. Indi akwaKristu alala azatishaña ñahi maheta awu akuspiritu, nawa kuloña kwawu kukatwalekahu ñahi haya nyaka?

⁹ ‘Mwitala dindi mudi maheta, mudi yuma yayivulu; kuloña kwindi kwahaya nyaka. Muntu woloka wamonaña mumwidima himukucha  to-o; yena watoñaña akwawu, wenzala wushona, waloña.’ (Masamu 112:3, 4) Kushankulu ambuña aNzambi amakwawu ayilukilili kumaheta. Munjila yikwawu, antu atiyañayi Nzambi kuwaha ahetaña, hela chakwila hiyahetaña maheta akumujimbaku. Walala wudi ñane, antu adizoza kumesu aNzambi anateli kwikala atuzweñi nawa asawulañawu, neyi chamusawileñawu Yesu. (Luka 4:18; 7:22; Yowanu 7:49) Hela chakwila muntu wukweti maheta amavulu hela antesha, chaswayi kuheta kuspiritu.—Matewu 6:20; 1 Timotewu 6:18, 19; tañenu Yakoba 2:5.

¹⁰ AkwaKristu awayishewa, hamu nawalunda nawu, alejañaku antu acheñi mahetawu akuspiritu. Cheñi nawa ‘anakutoñeka’ mukaayi kaSatana mudi mwidima ‘neyi chejeji kudi antu aloña.’ Elaña mwenimu kulonda kukwashaku amakwawu kuheta maana amawahi aNzambi. Akwakudimbulula aneseki kukañesha mudimu wakushimwina Wanta ilaña anakañanyi. Hela chochu, mukabu waniwu mudimu ‘waloña wakekala wahaya nyaka.’ Ambuña aNzambi anateli kukuhwelela kushakama “haya nyaka” neyi atwalekahu kwikala aloña hampinji yakweseka.

11, 12. Njilanyi jikwawu mwazatishilañawu antu jaNzambi mahetawu?

¹¹ Antu jaNzambi, izanvu danduñu dawayishewa ‘niezaza deneni’ ahanaña yuma yahetawu. Masamu 112:9 yahosha nawu: ‘Namwañamwañi yuma yindi, nayinki atuzweñi.’ AkwaKristu alala makonu kakavulu ahanaña yawaana kudi akwawu akwaKristu nikudi antuñinawu anakankili. Azatishaña cheñi mahetawu hakukwasha adi mukukala. Neyi chashimwiniyi Yesu nindi akakwashanaña, chumichi chaletaña muzañalu hama.—Tañenu Yililu 20:35; 2 Akorinda 9:7.

¹² Kubombelahu, toñojokenu hamali azatishañawu hakwila nawu apulinti ayinu magazini mumadimi 172, antu amavulu ahoshaña madimi wenawa hiyatuzweñi. Toñojokenu cheñi hachikuma chikwawu, ayinu magazini ayisonekaña mumadimi amboka-mboka awatumama, nimunsona jawamputamesu.

Watoñaña Akwawu Nawa waWuñaji

13. Hiyanyi emika chakutalilahu chachiwahi chakuhana namuzañalu, nawa tunateli kwimbujola ñahi chakutalilahu chawu?

¹³ ‘Muntu watoñaña akwawu, wasondamishaña akwawu.’ (Masamu 112:5) Chakadi nikujina mwamona dehi nenu kakavulu antu akwashanaña hiyatoñaña akwawuku. Amakwawu ahanaña kulonda ayimoni nawu aheta chikupu kabadika akwawu hela kuhana muloña wakuhila. Hichawahaña kutambwila wukwashu kudi antu amuchidiwuku. Kwambukaku, chawahaña kutambwila wukwashu kudi muntu watoñaña akwawu. Yehova diyi chakutalilahu chabadika, Mukwakuhana namuzañalu nawa watoñaña. (1 Timotewu 1:11; Yakoba 1:5, 17) Yesu Kristu wembujoleli chikupu chakutalilahu chaTata yindi chakutoña. (Maku 1:40-42) Dichi, hakwila atumoni kudi Nzambi nindi twaloña twahanaña namuzañalu sweje-e neyi tunakukwasha antu kumwiluka Yehova.

14. Jinjilanyi jikwawu mutwatela ‘kukoña mwaloña hohu’?

¹⁴ ‘Wakakoñaña mwaloña hohu.’ (Masamu 112:5) Neyi chashimwinuwu dehi, izanvu dakalama washinshika dakamenaña yuma yaMwanta, kwesekeja nawuñaji waYehova. (Tañenu Luka 12:42-44.) Ichi chamwekenaña munshimbi yamuNsona yayinkawu aeluda, akamenaña nyiloña yamaneni muchipompelu mpinji jikwawu. Njila yikwawu mwazatilaña izanvu danduñu chachiwahi yamwekenaña cheñi muwunlomboli washindamena haBayibolu washimuna chatela kuzatika yuma muyipompelu, kumatala awamishonali, nihajiBeteli. Wuñaji hiwakeñekaña hohu kudi aeludaku, ilaña nikudi akwaKristu amakwawu hakudikunda nawakwawu, antu abula kwitiya, kushilahu nimunsañu yakulanda nakulandulula.—Tañenu Mika 6:8, 11.

Nkisu Yikatambwilawu Aloña

15, 16. (a) Indi nsañu yatama yamukaayi yaleteshaña antu aloña kwilahu hodi? (b) Indi ambuña aNzambi afuukulahu kutwalekahu kwila chumanyi?

¹⁵ ‘Hiyamba kamuswijaku; waloña akamwanukaña kunyaka yejima. Hakaakama  nsañu jatamaku; muchima windi washimata dehi hamu mbe nakumukuhwelela Yehova. Muchima windi awukolesha dehi mbe, hakatiya nawa womaku, nichakamonayi chatoñweleliyi akwankunyi nindi.’ (Masamu 112:6-8) Makonu nsañu yatama yinasweji chikupu kubadika chiyadiña, yuma yidi neyi njita, kujahañana nanyitenda nzumbu, nyisoñu yayiha ninyisoñu yayikulu yinakutwalekahu, wubanji, wuzweñi, niyuma yafwana yinakukisañana mpepela. Antu amonañayi Nzambi nindi aloña niwena amonaña kukala kweniku, hela chochu hiyatiyaña woma yuma yikamwekana kumbiduku. Ilaña, nyichima yawu ‘yashimata dehi mbe-e’ nawa ‘ayikolesha dehi mbe-e’ hampinji yinakutalilawu yuma yakumbidi nachikuhwelelu, muloña eluka nawu ituña dadiha daNzambi daloña keña dishiki. Neyi kumwekana kukala omikaña, muloña ashindamena hadi Yehova nawu wukuyikwasha. Hetejaña antu jindi aloña ‘kuswijewaku’ wayikwashaña nikuyikolesha kulonda omiki.—Afwilipi 4:13.

¹⁶ Antu jaNzambi aloña adiwulaña cheñi kuhela kwayihelawu ninsañu yayitwambilañawu kudi ayilumbu jawu, nawa yumiyi hiyamba kakañesha akwaKristu kushimwinaku. Ilaña, ambuña aNzambi atwalekañahu kushimata mbe-e nikukola mumudimu wayinkayi Yehova, wakushimwina nsañu yayiwahi yaWanta nikwilisha antu ejima akutiyilila kwikala atumbanji. Chakadi nikujina, aloña akamona ikañesha dasweja neyi kukuma hikukuswila mukamwihi. Ikañesha denidi dikasweja hampinji yakalukukayi Satana Diyabolu kaayi kejima, hakakalakalayi neyi Gogi waMagogi. Nkumininaku, twamba ‘kamona akwankunyi netu’ chakayijilumunawu chikupu. Twakamona chakajilikawu ijina daYehova chikupu.—Ezekeli 38:18, 22, 23.

‘Amutuumbakesha naKulema’

17. Indi antu aloña ‘akayituumbakesha ñahi nakulema’?

¹⁷ Twakadiluñisha kumuhameka Yehova, chakadi ikañesha dafumaña kudi Diyabolu nikaayi kindi. Ejima akutwalekahu kwikala aloña kumesu aNzambi akamuhameka Yehova chahaya nyaka. Hiyamba kayishindaku, muloña Yehova wayikana cheñi nindi “luseñu” lwawantu jindi aloña ‘akalwituumbakesha nakulema.’ (Masamu 112:9) Ambuña aYehova aloña akazañalala chikupu hakumona ayilumbu jawanta waYehova ejima anayijilumuni.

18. Indi mazu akukumishaku aMasamu 112 akashikijewa ñahi?

¹⁸ ‘Muntu watama wakachimona, wakatiya chikela; wakadisumona kumaji, wakanowa, yakeñawu antu atama yakakisika.’ (Masamu 112:10) Ejima adikañaña nawantu jaNzambi keña ‘anowi’ hamuloña walwisu ninkunyi yawu. Kufwila kwawu kwakulekesha mudimu wakushimwina kwakajiya hampinji ‘yayihuñu yeneni’ yinakwinza.—Matewu 24:21.

19. Chumanyi chitwatela kukuhwelela?

¹⁹ Komana mukekala hakachi kawantu amuzañalu akapuluka iku kushinda kweneni? Indi neyi mufwa hamuloña wayikatu hela wushinakaji henohu kukuma kwakaayi kaSatana kanda kushiki, komana mwakekala hakachi ‘kawantu aloña’ akasañulawu? (Yililu 24:15) Munateli kwakula nenu eña, neyi mutwalekahu kukuhwelela mumulambu wefutu danyiloña daYesu, nikwimbujola Yehova, neyi chelaña antu emenañaku “muntu” waloña walumbululawu haMasamu 112. (Tañenu Aefwesesa 5:1, 2.) Yehova ‘wakanuka’ antu aloña nawa hamba kayivulamenaku, hela nyidimu yawu yaloña hakayidiwulaku. Akayanukaña nikuyikeña kudi Yehova haya nyaka nanyaka.—Masamu 112:3, 6, 9.

[Tumazu twaheshina]

Malwihu Akutoñojokahu

• Yumanyi yikwawu yikatuletesha kuhosha netu “Aleluya”?

• Yumanyi yamakonu yaleteshaña akwaKristu alala kuzañalala?

• Mukwakuhana wamuchidinyi wakeñañayi Yehova?

[Malwihu aKuzatisha haKudiza]

[Mwevulu wudi hefu 25]

Hakwila nawu twikali aloña kumesu aNzambi, twatela kukuhwelela mumashi aYesu apwekeli

[Nyevulu yidi hefu 26]

Yawaana yakudikeñela yinateli kukwasha anakankili nikupulinta nyikanda yashindamena haBayibolu