Mi Fel Chuan Kumkhuain Pathian A Fak Ang

“Mi fel chu kumkhuaa hriat rengin a awm ang . . . A felna chu kumkhuaa awm tûr a ni.”—SAM 112:6, 9.

1. (a) Pathianin mi fel anga a ruat zawng zawngte chu eng hmabâk hlimawm takin nge hmuak? (b) Eng zawhna nge lo chhuak?

PATHIANIN mi fel anga a ruat zawng zawngte neih hmabâk chu a va ropui êm! Anni chuan Jehova mize mawi takte zir belh chu chatuanin an hlimpui ang. Pathian kut chhuak thil siamte an zir belh hian, an thinlung chu amah faknain a khat tlat a. Chutiang hmabâk ropui chan theih nâna pawimawh ber chu Sâm 112-in a târ lan “felna” hi a ni. Mahse, engtin nge Pathian thianghlim leh fel, Jehova chuan sual nei mihringte chu mi fel anga a ngaih theih? Thil dik tih chu eng ang pawhin tum ṭhîn mah ila, thil kan tisual ṭhîn a, a châng phei chuan thil sual pawi tak kan ti palh ṭhîn si a.—Rom 3:23; Jak. 3:2.

2. Hmangaihna avânga Jehova thilmak tih pahnihte chu eng nge ni?

² Pathian Jehova chuan a hmangaihna avângin mi sualte fel anga ngaih theih dân tûr ruahmanna a siam a ni. Engtin nge a siam? A hmasa berin, vâna a Fapa duh tak nunna chu mihring ṭha famkim anga a lo pian theih nân Mari chhûlah sawnin thilmak a ti a ni. (Lk. 1:30-35) Tichuan, Isua chu a hmêlmate’n an tihhlum hnuah, Pathian Jehova chuan thilmak langsâr tak dang pakhat a ti leh a. Isua chu thlarau thil siam ropui takah a kaitho leh a ni.—1 Pet. 3:18.

3. Engvângin nge lâwmman atâna a Fapa hnêna vân nunna pêk chu Pathian rîlremzâwng tak a nih?

³ Pathian Jehova chuan a Fapa hnênah leia a lo kal hmaa a neih loh thil pakhat—vâna tihboral theih loh nunna—chu lâwmmanah a pe a ni. (Heb. 7:15-17, 28) Isua’n fiahna nasa tak hnuaia a rinawmna a vawn reng avângin chutianga lâwmman pêk chu Jehova rîlremzâwng tak a ni a. Chutiang chuan, Isua chuan a Pa hnênah ‘Mihringte’n Pathian an biak chhan chu mahni hma an sial vâng a ni a, hmangaihna nghet tak vâng a ni lo,’ tia Setana dâwt sawi chhân lêtna ṭha ber leh famkim ber chu a pe a ni.—Thuf. 27:11.

4. (a) Vâna a kîr leh chuan, Isua’n kan tân eng nge a tih a, Pathian Jehova chuan engtin nge a chhân lêt? (b) I tâna Pathian Jehova leh Isua thiltih chu engtin nge i ngaih?

⁴ Vânah chuan Isua’n thil dang tam tak a tihbelh a. “Ama thisen” ngei hlutna chu kengin “Pathian hmaah” a va inlan a ni. Hmangaihna nei kan Pa vâna mi chuan Isua inthawina hlu tak chu ngilnei takin “kan sualte thupha chawina” angah a lo pawmsak a. Chuvângin, ‘chhia leh ṭha hriatna thiang’ neiin “Pathian nung rawng [kan] bâwl” thei a ni. Chu chu Sâm 112 inṭanna thu, “LALPA chu fak rawh u,” tih pawm chhan tûr a va ni êm!—Heb. 9:12-14, 24; 1 Joh. 2:2.

5. (a) Pathian ngaiha mi fel ni reng tûr chuan eng nge kan tih ngei ngai? (b) Sâm 111 leh Sâm 112 chu eng anga rem nge a nih?

⁵ Pathian ngaiha mi fel ni reng tûr chuan, Isua thisen chhuakah rinna kan lantîr tûr a ni. Jehova min hmangaihna nasa tak avânga lâwmthu sawi lovin ni khat tê pawh kan liamtîr tûr a ni lo. (Joh. 3:16) Tin, Pathian Thu kan zir fo bâkah, a thute mila nun chu kan tum hrâm hrâm tûr a ni bawk. Sâm 112-ah chuan Pathian hmaa chhia leh ṭha hriatna thiang tak nei duh zawng zawngte tâna thurâwn ṭha tak a chuang a ni. He fakna hla hi Sâm 111 nên a inzawm a. A pahnihin, “LALPA chu fak rawh u,” a nih loh leh “Halleluia” tih thuin a inṭan ve ve  a ni. Atîra ziak Hebrai ṭawngah chuan tlar 22-in a zui ve ve a, a vaiin Hebrai hawrawp 22-te zînga pakhat zêlin a inṭan vek bawk a ni. *

Engthâwl Chhan Tûr

6. Sâm 112-a târ lan Pathian ṭih “mi” chu engtin nge malsâwm a nih?

⁶ “LALPA ṭih mi chu a eng a thâwl e, a thupêkahte nasa taka lâwm mi chu. A thlahte chu leiah hian chak takin an awm ang a: mi dik takte chhuan chu malsâwmin an awm ang.” (Sâm 112:1, 2) Fakna hla phuahtu chuan mi pakhat sawina “mi” tih thu mal a hman zawhah, châng 2-na tâwpna lamah “mi dik takte” tiin a tam sawina a hmang tih chhinchhiah ang che. Hei hian Sâm 112 hi mi tam taka din, mihring awmkhâwm ho khat sawina a ni thei tih a sihhmuh a ni. Chu mi nemngheh nân, Sâm 112:9-na thu chu kum zabi khatnaa Kristiante chungchânga hmang tûrin tirhkoh Paula chu thlarauva thâwk khumin a awm a ni. (2 Korinth 9:8, 9 chhiar rawh.) He fakna hla hian tûn laia leia awm Krista hnungzuitute engthâwl theihzia a va târ lang chiang tak êm!

7. Engvângin nge Pathian chhiahhlawhte chuan amah ṭihna ṭha an neih a ngaih a, Pathian thupêkte chu engtin nge i ngaih ang?

⁷ Sâm 112:1-a târ lan angin, hêng Kristian dikte hian ‘LALPA ṭiha’ an awm hian engthâwlna nasa tak an nei a ni. He Pathian tihlâwm loh hlauhna, a nih loh leh Pathian ṭihna ṭha hian Setana khawvêl thlarau do tûrin anni chu a ṭanpui a. Anni chuan Pathian Thu zir leh a thupêkte zawm chu ‘nasa takin an lâwmpui’ a ni. A thupêkte zîngah chuan leilung zawng zawnga Ram chanchin ṭha hril tûra thupêk pawh a tel a. Anni chuan mi suaksualte hnênah lo thleng tûr an chung thu rêlna, Pathian rorêlna nî chungchâng an vaukhân rualin, hnam tina mite zirtîra siam an tum tlat a ni.—Ezek. 3:17, 18; Mt. 28:19, 20.

8. (a) Tûn laia Pathian tâna ṭhahnemngai takte chu eng anga lâwmman pêk nge an nih? (b) Lei lam beiseina neite chu eng malsâwmnain nge hmuak?

⁸ Chutiang thupêkte an zawm avângin, khawvêl pumah hian Pathian chhiahhlawh maktaduai sarih vêl an awm tawh a ni. A mite chu “leiah hian chak takin an awm” tih tuin nge hnial thei ang? (Joh. 10:16; Thup. 7:9, 14) Pathianin a thiltum a han tihhlawhtlin chuan ‘malsâwm’ an va la ni dâwn êm! Lei lam beiseina neite chu ‘a chhûnga felna awm,’ “lei thar” din tûrin, lo thleng tûr “hrehawm nasa tak” ata a huhovin an dam khaw chhuak ang. Tichuan, Armageddon-a dam khawchhuakte chu nasa lehzuala “malsâwmin an awm ang.” Anni chuan thihna ata lo tho leh mi maktaduai têlte chu an lo hmuak ang. Beisei tûr phûrawm tak a va ni êm! A tâwpah chuan, Pathian thupêka ‘nasa taka lâwmna nei mite’ chu mihring ṭha famkim an lo ni ang a, chatuanin “Pathian fate zalênna ropuiah chuan an lût dâwn” a ni.—2 Pet. 3:13; Rom 8:21.

Hausakna Fing Taka Hman

9, 10. Engtin nge Kristian dikte chuan thlarau lama an hausakna chu an hman a, engtin nge an felna chu kumkhuain a awm ang?

⁹ “A inah chuan sum leh hausakna a awm a; a felna chu kumkhuaa awm tûr a ni. Mi dik tân chuan thimah chuan êng a lo chhuak ṭhîn a: ani chu mi khawngaih thei tak, lainatnaa khat, fel tak a ni.” (Sâm 112:3, 4) Bible hun lai chuan, Pathian chhiahhlawh ṭhenkhat chu an hausak avânga hriat hlawh an ni a. Tin, awmze dang neiin, Pathian lawm hlawhte chu sum leh pai lamah ni kher lo mah se, an hausa tak zet a ni. A nihna takah chuan, Pathian hmaa inphah hniam thlangtu a tam zâwkte chu Isua dam lai ang bawka rethei leh mite hmuhsit an ni hlawm thei a. (Lk. 4:18; 7:22; Joh. 7:49) Mahse, mi chu sum leh pai lamah a hausa emaw, a rethei emaw pawh ni se, thlarau lamah a hausa hle thei a ni.—Mt. 6:20; 1 Tim. 6:18, 19; Jakoba 2:5 chhiar rawh.

¹⁰ Hriak thih Kristiante chuan an ṭhian lei lam beiseina neite rualin, thlarau lama an  hausakna chu an tân chauh an kawl mai lo. Setana khawvêl thimah hian anni chu ‘mi dikte tâna êng ang maiin an êng chhuak’ zâwk a ni. Pathian finna leh hriatna hlu tak hlâwkpui tûra mi dangte ṭanpuiin, an êng chhuak a. Dodâltute chuan Lalram thuhrilhna chu tihtâwp an tum a, mahse an hlawhchham a ni. Tihtâwp theih ahnêkin, he felna thiltih rah chhuah hi “kumkhuaa awm tûr” a ni a. Pathian chhiahhlawhte chuan fiahna hnuaia fel taka awm tlatin, chatuana nun, “kumkhuaa awm” tiamna chu an nei thei a ni.

11, 12. Pathian mite’n an thil neihte an hman dân kawng ṭhenkhat chu engte nge ni?

¹¹ Hriak thih bâwih pâwlte leh “mipui tam tak” hmanga din Pathian mite chu sum leh pai lam thilah an thilphal hle a. Sâm 112:9 chuan heti hian a sawi: “A sem darh a, pachhiate a pe a,” tiin. Tûn laia Kristian dikte chuan ṭanpui ngai an Kristian unaute mai ni lo, an ṭhenawmte thleng pawhin an tisa lam mamawhah an ṭanpui fo va. Leilung chhiatna a thlen hunah pawh hian, chhawmdâwlna hna chu bungruate thawhin an ṭanpui a ni. Isua lo sawi tawh ang ngeiin, chutianga ṭanpuina chu hlimna hnâr a ni bawk.—Tirhkohte 20:35; 2 Korinth 9:7 chhiar rawh.

¹² Chu bâkah, he magazine hi ṭawng chi hrang 172-a tihchhuah nâna sum leh pai sên so zât hi han ngaihtuah teh. Hêng zînga ṭawng tam takte hi mi rethei tê tête ṭawng hman a ni hlawm a ni. He magazine hi beng ngawngte hman sign language chi hrang hrang leh mitdelte tâna Mitdel Hawrawpa chhuah a ni pawh hi ngaihtuah bawk teh.

Mi Khawngaih Thei leh Dik

13. Khawngaihna nêna pêk chhuahna kawngah tute’n nge entawn tûr ṭha ber siam a, engtin nge anni chu kan entawn theih ang?

¹³ “Mi khawngaiha pûktîr ṭhîn mi chu ṭhatin a vûr ṭhîn a.” (Sâm 112:5) Mi dangte ṭanpuitu chu mi khawngaih thei a ni reng bîk lo tih i hmuh ngei a rinawm. Ṭhenkhat chuan mi dangte aia neinung zâwk anga lan nân emaw, hreh chung chung emawin an pe a ni. Hniam zâwka inhriatna emaw, mi tâna ninawm leh phurrit anga inhriatna emaw min neihtîrtu hnên aṭanga ṭanpuina dawn chu thil nuam a ni lo. Mi khawngaih thei tak hnên aṭanga ṭanpuina dawn erawh chu thil nuam tak a ni thung. Pathian Jehova chu khawngaihna nêna hlim taka Petu entawn tûr langsâr tak a ni. (Jak. 1:5, 17) Isua Krista chuan a Pa khawngaihna lantîr dân ang tak chuan a lantîr ve a ni. (Mk. 1:40-42) Chutiang chuan, a bîk takin thlawhhma rawngbâwlnaa kan ṭhenawmte hnêna thlarau lam ṭanpuina kan pêk hunah hian Pathianin mi fel anga min ruat theih nân hlim takin leh mite khawngaihna nei chungin kan pe chhuak a ni.

14. ‘Fel taka kan khawsak’ theih dân kawng ṭhenkhat chu engte nge ni?

¹⁴ “Ani chu fel takin a khawsa ang.” (Sâm 112:5) Hrilh lâwk tawh angin, sum enkawltu pâwl chuan Jehova felna, a nih loh leh dikna milin an Pu ber thil neihte chu an enkawl a ni. (Luka 12:42-44 chhiar rawh.) Hei hi kohhran chhûnga thil sual pawi tak titute chungchâng ngaihtuahtu upate hnêna Pathian Lehkha Thu anga kaihhruaina pêkah a lang a. Bâwih pâwlin engkim dik taka a tihzia chu kohhrante, missionary awmna inte, leh Bethel inte enkawl dân tûr Bible ṭanchhan kaihhruaina a pêkah pawh hian a lang bawk a ni. Dikna chu upate chauh ni lovin, Kristian dangte pawhin an neih a ngai bawk a; sumdâwnna thil pawh tiamin an indâwr tawnnaah leh ring lotute nêna an indâwrnaah an neih a ngai a ni.—Mika 6:8, 11 chhiar rawh.

Mi Felte Tâna Malsâwmna

15, 16. (a) Khawvêla chanchin ṭha lote hian mi felte chungah eng nghawng nge a neih? (b) Pathian chhiahhlawhte chuan eng nge tihchhunzawm zêl an tum tlat?

¹⁵ “Engtikah mah a nghîng dâwn si lo va; mi fel chu kumkhuaa hriat rengin a awm ang. Chanchin ṭha lo takte a hlau lo vang: LALPA ringin a thinlung chu a nghet a ni. A thinlung chu a nghet a, a hlau lo vang, amah dotute chunga a thu duhsâm thleng chu a  hmuh hma loh zawng.” (Sâm 112:6-8) Hêng indona te, firfiaka chêtna te, kan hriat thar natna leh kan hriat tawh ṭhin natna lo awm leh ṭhîn te, dân bawhchhiatna te, retheihna te, leh chhiatna thlentu tui leh boruak bawlhhlawhna te pawh tiamin chanchin ṭha lo chu tûn ang tluk rêngin kan la hre tam ngai lo. Pathianin mi fela a ruatte chuan chutiang thil ṭha lote chu an tâwk a; amaherawhchu, chûng thilte an hlauhna chuan engmah tithei lovin a siam lo. Chutih ahnêkin, Pathian khawvêl thar a hnai tih hre reng chunga hma lam hun huaisen taka thlîrin, an thinlungte chu “a nghet” sauh zâwk a ni. Leilung chhiatnate a lo thleng a nih pawhin, Jehova ṭanpuina an rinchhan tlat avângin an tuar chhuak thei zâwk a. Jehova chuan a mi fel chu ‘a nghîn’ a phal ngai lo—tuar chhuah nâna mamawh ṭanpuina leh chakna a pe zâwk a ni.—Phil. 4:13.

¹⁶ Pathian mi felte chuan dodâltute thehdarh huatna thu leh dâwt thute an hmachhawn a ngai bawk a; mahse, chûng chuan Kristian dikte chu a ngawihtîr thei lo va, a ngawihtîr ngai hek lo vang. Pathian chhiahhlawhte chu Pathian Jehova hna pêk—Lalram chanchin ṭha hrilhna leh a dawng duhte zirtîra siamna hna—chu nghet tak leh tihchêt rual lohvin an thawk chhunzawm zêl zâwk a ni. Tâwpna a hnaih rualin mi fel chuan dodâlna a tâwk nasa lehzual dâwn tih chu rinhlelh rual a ni lo. Chutiang huatna chu Diabol-Setana’n Magoga rama Goga dinhmun chelha khawvêl pum puia betu dikte a beih hunah a vâwrtâwp a thleng ang. A tâwp a tâwpah chuan, ‘min dotute’ mualpho taka an tlâwm lai chu kan hmu tawh ang. Jehova hming tihthianghlimna pumhlûm hmuh chu thiltawn namai lo a va ni dâwn êm!—Ezek. 38:18, 22, 23.

‘Chawimawinaa Chawimawi’

17. Engtin nge mi felte chu “chawimawinaa chawimawiin” an awm ang?

¹⁷ Min dodâltu Diabola leh a khawvêl a awm tawh lohna huna inlungrual taka Pathian Jehova fak chu a va hlimawm dâwn êm! Pathian hmaa fel taka awm rengte chuan chutiang hlimna chu chatuanin an nei ang. Pathian Jehova chuan a mi felte “kî” chu “chawimawinaa chawimawiin a awm ang,” tia a tiam avângin, mualpho takin an tlâwm ngai lo vang. (Sâm 112:9) Jehova lalchungnunna dodâltu zawng zawngte tlâwmna an hmuh hunah chuan, A mi felte chuan hnehna hla do an chham tawh ang.

18. Engtin nge Sâm 112 tihtâwpna thu chu a lo thlen famkim ang?

¹⁸ “Mi suaksual chuan chu chu an hmu ang a, a thinur ang; a ha a ṭhial ang a, a tuiral ang: mi suaksualte duhzâwng chu a boral ang.” (Sâm 112:10) Pathian mite dodâl chhunzawm zêltu zawng zawngte chu an thîkna leh huatna avângin an “tuiral” thuai ang. Kan rawngbâwlna tihtâwp an duhna chu “hrehawm nasa tak” lo awm tûrah chuan an boralpui ang.—Mt. 24:21.

19. Eng nge kan rinngheh tlat theih?

¹⁹ Chu hnehna ropui taka dam khawchhuakte zîngah chuan i tel ve ang em? A nih loh leh, Setana khawvêl a tâwp hmain natna emaw, kum upatna emaw avângin lo boral ta la, kaihthawh tûr “mi felte” zîngah chuan i tel ang em? (Tirh. 24:15) Isua tlanna inthawina i rin zêl a, Sâm 112-a “mi” fel anga sawite anga Jehova i entawn bawk chuan, chûng zîngah chuan i tel thei ang. (Ephesi 5:1, 2 chhiar rawh.) Jehova chuan chutiang mite chu theihnghilh lova “hriat rengin” a awmtîr ang a, an felna thiltihte chu hmuh hmaih a ni lo vang. Pathian Jehova chuan anni chu kumkhaw tlaitluanin a hmangaih ang a, a hre reng bawk ang.—Sâm 112:3, 6, 9. (w09 3/15)

[Footnote]

Chhût Ngun Tûr Zawhnate

• “Halleluia” tia kan au chhuah chhan tûr ṭhenkhat chu engte nge ni?

• Tûn laia hmasâwnna a eng ber hian nge Kristian dikte chu tihlim êm êm?

• Eng anga petu nge Jehova chuan a hmangaih?

[Zirlai Atâna Zawhnate]