Allita ruraqkunaqa imëyaqpis Jehovätam alabayanqa

“Alli nunaqa imëyaqpis yarpashqam kanqa, [...] Alli rurëninqa imëyaqpis tsarakonqam.” (SAL. 112:6, 9.)

1. a) ¿Diosnintsikpa rikënimpaq alli ruraq nunataqa imataq shuyaran? b) ¿Ima tapukïtataq rurakuntsik?

¡DIOSPA rikënimpaq alli ruraq nunakunataqa kushikïpaq kawakïmi shuyaran! Mana wanushpa kawëkarqa, imëyaqpis Jehová Diospa alli kënintaqa rikëkäyanqallam, y llapan kamanqankunata alleq reqirninmi alläpa kushikïwan alabayanqa. Salmo 112 nishqanchömi rikätsimantsik shamoq tiempochö tsënö kanampaqqa, allillata rurë alläpa preciso kanqanta. Tsënö kaptenqa itsa tapukuntsik, ¿imanötaq Jehová hutsasapa këkashqapis allita ruraq nunatano rikämashwan? Alleqmi musyantsik allillata rurëta munëkarpis mana allita ruranqantsikta, höranäqa pasëpa hutsatam rurarintsik (Rom. 3:23; Sant. 3:2).

2. ¿Ima ishkë milagrokunatataq rurarerqan Jehová kuyakoq këninwan?

 ² Jehová Diosqa kuyakoq këninwanmi, hutsasapa nunakunata alli ruraqtanö rikämänapaq huk yanapakïta churamushqa. ¿Imanötaq rurashqa? Puntataqa, milagrösamentem huk judía shipashpa pachanman churëkamorqan Tsurimpa kawëninta, tsënöpa hutsannaq nuna yurinampaq (Luc. 1:30-35). Y chikeqninkuna Jesusta wanuratsiyaptinnam Jehoväqa huk milagro masta rurarerqan, kawariratsimorqan huk poderoso espïritutanö (1 Ped. 3:18).

3. ¿Imanöpataq Jehoväqa mana ushakäkoq kawëta qorqan Wambranta?

³ Nunanö manaraq yurirnin kawënimpitapis más alli kaq kawëtam Jehová qorqan Tsurin Jesusta, manana imëpis ushakaq o imapis mana ushakätseq kawëta (Heb. 7:15-17, 28). Tsënö kawëtaqa Teyta Dios qorqan Wambran llapanchö Pëman markäkushqa kaptinmi. Llapanchö Teytanman confiakurninmi rikätsikorqan, nunakunaqa imatapis munarllam Diosta odorayan nishpa Satanás nenqanqa rasumpa mana kanqanta (Pro. 27:11).

4. a) ¿Imatataq Jesus rurashqa noqantsikpaq ciëlota kutirir, y Jehoväqa chaskerqanku? b) ¿Imataq ninki Jehoväwan Jesus qamrëkur llapan rurayämonqampita?

⁴ Tsënö karmi Jesusqa ‘sielucho quecaq quiquin Diospa nopanman yecushqa biennintsic Diosta mañacamunanpaq’ yawarnin ramanqampa chaninwan. Y Jehová Diosqa hutsantsikrëkur Tsurin Jesucristu wanonqanwanmi perdonamarqontsik. Tsënöpam noqantsikqa Diosnintsikllatana alli shonquwan y alli concienciawan servita puëdentsik. Tsëkunata ruramonqanta musyarmi Salmo 112 nenqannöpis “¡Alabayë Jähta!” nintsik (Heb. 9:12-14, 24; 1 Juan 2:2).

5. a) ¿Imatataq rurashwan Diosnintsikpa rikënimpaq imëpis alli ruraq këkänapaq? b) ¿Ima ordenchötaq qellqarëkäyan 111 y 112 nishqan Salmokuna?

⁵ Imëpis Diosnintsikpa rikënimpaq allillata rurëkänapaqqa, noqantsikrëkur Jesus yawarninta ramanqanmanmi fëta churanantsik. Cada hunaqmi Teyta Diosta agradecikunantsik kuyamanqantsikpita (Juan 3:16). Bibliapita yachakïnintsiktaqa manam ni imëpis haqinantsiktsu, y consëjonkunata wiyakurmi shumaq kawakïta tïranantsik. Salmo 112 nishqanchömi shumaq consëjokuna kan Diosnintsikpa rikënimpaq alli concienciayoq këta munaqkunapaq. Hina salmo 111 nishqanchö consëjokunawampis paqtanmi. Kë ishkan salmokunaqa qallan “Alabayë Jähta” o “Aleluya” nirmi. Tsënö nirirninmi, qateqnin ishkë chunka ishkë lineakunaqa, ishkë chunka ishkë hebreu letrakunawan qallan. *

Kushikunapaq rurë

6. ¿Ima bendicionkunatataq chaskin Salmo 112 nenqannö kawaq nunakunaqa?

⁶ “Alläpam kushikun Teyta Diosta respetaq nunaqa, kushikunmi Dios mandanqanta wiyakurnin. LLapan kastampis patsachö sinchim kanqa. Allillata ruraq nunakunapa kastankunaqa bendecishqam kanqa” (Sal. 112:1, 2). Kë versículo qallananchöqa huk nunallapaqmi parlan, pero ishkë kaq versïculopa ushananchöqa “allillata ruraq nunakunapa” kastankuna ninmi, këqa rikätsimantsik atskaqpaqna  parlanqantam. Tsëmi apóstol Pablupis punta cristianokunata willaparnin Salmo 112:9 nishqampita parlarqan (lei 2 Corintios 9:8, 9). ¡Tsë Salmos nenqannöllam kanan tiempo cristianokunapis kushishqa kawakïta puëdeyan!

7. ¿Imanötaq rikätsikuyan rasumpëpa cristianokuna Jehová Diosta respetayanqanta?

⁷ Salmo 112:1 nishqannöpis rasumpëpa cristianokunaqa alläpam kushikuyan, Jehová Diosta respetarnin. Teyta Diosnintsikta respetarninmi mana alli rurëkunawan llakitsita mantsayan. Pëkunaqa alläpam kushikuyan Palabranta leirnin, hinantin patsachö Jehoväpita yachatsikurnin, tsënöpa nunakuna Jehoväta serviyänampaq, y mana wiyakoq nunakunatapis willayanmi, Jehoväpa piñakïnin hunaq këllachöna kanqanta (Eze. 3:17, 18; Mat. 28:19, 20).

8. a) ¿Ima bendicionkunatataq chaskiyashqa kanan tiempo cristiänokuna Diosnintsikta wiyakuyanqampita? b) ¿Ima bendicionkunataraq chaskiyanqa Patsachö quedaqpaq nunakuna?

⁸ Jehová Diosta sirveqninkuna casokuyanqanrëkurmi kanan kë patsachö qanchis millönespitapis masna kantsik. ¿Pitaq manam tsënötsu ninman mëtsikatana rikëkar? (Juan 10:16; Apo. 7:9, 14.) ¡Mëtsika bendicionkunataraq chaskiyanqa Diosnintsik llapan änikonqanta cumpliramuptin! Kë Patsachö kawaqpaq kaqkunataqa ‘imeca nacaquicunapitapis’ Diosnintsik tsapëkonqam, y pëkunaqa mushoq patsachömi allikunata rurarllana kawayanqa. Diosnintsik mana allikunata ushakäratsimuptin kawëkar pasaqkunaqa atska bendicionkunatam chaskiyanqa, hina pëkunaqa alläpam kushikuyanqa mëtsika wanushqakuna kawarimoqta chaskirnin. ¡Këman yarpëqa alläpa kushikïpaqmi! Y tiempo pasaptinnam más kushikïta tariyanqan, Diospa Palabranta wiyakuyanqampita hutsannaq këman chärirnin, tsëmi hutsapita librashqa imëyaqpis Diospa wambrannö kawakuyanqa (2 Ped. 3:13; Rom. 8:21).

Llapan kapamanqantsik allikaqllapaq katsun

9, 10. ¿Kikinkunallapaqtsuraq Diospita yachakuyanqanta katsikuyashqa cristiänokuna? ¿Y alli rurëninkunaqa imëyaqraq tsarakonqam?

⁹ “Pëpa wayinchöqa imëka riquëzakunam kan, allita ruranqanqa manam ni imë ushakantsu. Ampichöpis allita ruraqkunapaqqa imëka aktsi cuentam. Kuyakoqmi, llakipäkoqmi, allillata ruraqmi” (Sal. 112:3, 4). Unë tiempochö wakin cristianokunaqa kapoqyoqmi kayarqan. Pero Diosnintsikwan alli pasakïcho kawakoqkunaqa, waktsa këkarnimpis, Diosnintsikpa rikënimpaqqa rïcom kayan. Rasumpëpaqa, Diosnintsikta sirveq nunakunaqa casi llapanmi alläpa kapoqyoqtsu kayan, tsërëkurmi despreciashqa kayan Jesuspa tiemponchöno (Luc. 4:18; 7:22; Juan 7:49). Waktsa karnin o kapoqyoq karnimpis Jehoväpa kaqchöqa llapantsikmi rico këta puëdentsik (Mat. 6:20; 1 Tim. 6:18, 19; lei Santiagu 2:5).

¹⁰ Ciëlota ewaqpaq kaq akrashqa cristianokunaqa manam kikinkunallapaqtsu pakarätsikuyan Diosnintsikpita yachakuyanqanta, ni kë Patsachö quedaqpaq kaq cristianokunapis. Tsëpa rantenqa paqaschö “imëka aktsi cuentam” nunakunata yanapëkäyan. ¿Imanötaq yanapëkäyan? Tsëtaqa rurayan nunamayinkunata Diospita yachatsirninmi. Y kë yachatsikikäyanqanqa imëyaqpis tsarakonqam, chikikuna tukïnöpa ushakätsita munëkäyaptimpis. Imëka mana allikunata pasarnimpis Jehová Diosman markäkurnin allillata rurëkarnenqa mana wanushpa kawakïtam chaskiyanqa.

11, 12. ¿Jehová Diosta sirveq nunakunaqa imanötaq imëkankunawampis yanapakuyan?

¹¹ Diospa sirveqninkunaqa ciëlopaq kaq y Patsapaq kaqpis imëkankunawammi alläpam yanapakuyashqa. Salmo 112:9 nishqanchömi kënö nimantsik: “Imëka kaponqantapis waktsakunatam qoshqa”. Rasumpëpa kaq cristianokunaqa kanan tiempontsikchöpis imëkankunawanmi yanapayan cristiano mayinkunata y necesidadyoq vecïnonkunatapis. Hina imëkankunawampis yanapakuyanmi wakin markakunachö desgraciakuna pasakuptimpis. Y Jesus nenqannöpis kë yanapakuyanqanqa alläpam kushitsin (lei Hechos 20:35 y 2 Corintios 9:7).

¹² Hina yarpärishun kë revista pachak qanchis chunka ishkë (172) idiömakunachö yarqëkämonqanta, kë rurëqa alläpa chaniyoqmi, y kë revistata chaskeqkunaqa wakinqa alläpa waktsam kayan. Hina kë revistaqa yarqamun mana  wiyaqkunapaq y mana parlaqkunapaqwanmi, tsënöllam hina mana rikaqkunapaqpis, tsëtam braille nishpa reqintsik.

Alli nunaqa yanapakoqmi

13. ¿Pikunapitataq yachakushwan kushishqa y shonqupita patsë yanapakoq këta?

¹³ “Alli nunaqa kuyapäkoqmi. Alli nunaqa yanapakoqmi” (Sal. 112:5). Kanan tiempoqa rikantsikmi wakinqa imawan yanapakurpis manam shonqupita patsëtsu imatapis rurayan, sinöqa kapoqyoq kayanqanta rikätsikuyänanrëkur o mana munëkarmi imatapis rurayan. Rasumpaqa, pipis mana munëkar o piñakïkar yanapamashqaqa manam kushishqatsu chaskikuntsik y penqakuntsikmi. ¡Pero shonqupita patsë kushishqa yanapëkamashqaqa alläpam kushikuntsik! Tsënö këtaqa kikin Jehovächömi rikantsik, pëqa imëkatapis kushishqam qomantsik (1 Tim. 1:11; Sant. 1:5, 17). Y Jesuspis Teytannö kuyakoq y llakipäkoq kanqantam rikätsikorqan (Mar. 1:40-42). Noqantsikpis Diosnintsikpa rikënimpaq alli nuna këta munarqa, yanapakunantsik kushishqa y shonqupita patsëmi y këtaqa rikätsikushun nuna mayintsikta kushishqa yachatseq ëwarninmi.

14. ¿Imanötaq yachepa rikashwan imëkantsikkunatapis?

¹⁴ “Imëkankunatapis yachëpam rikan” (Sal. 112:5). Mäkoq mäkoq cumplido sirveqqa alli mayural karmi Jehová nenqanta wiyakun, tsëmi Jesucristupa imëkankunatapis yachëpa rikan (lei Lucas 12:42-44). Y këtaqa rikantsik congregacionchö alli yachatsikoq kayänampaq ancianokuna yachatsikïta chaskiyanqanchömi, pëkunaqa tukï hutsaman ishkiriyaptimpis yanaparmi altsayan. Hina mäkoq mäkoq cumplido sirveq yachëpa ruraq kanqanqa rikakun congregacionkuna alli kanampaq, misionerokuna täräyanqan wayikuna y Betel wayikuna alli funcionanampaq shumaq rikanqanchömi. Hina manam congregacionta pushaqkunallatsu yachëpa rurayänan, llapantsikmi imëkatapis yachëpa ruranantsik, hasta mana cristiano mayintsikkunawampis, y negociokunachöpis (lei Miqueas 6:8, 11).

 Allita ruraqkunapaq bendicionkuna

15, 16. a) ¿Imanötaq cristiänokuna rikäyan imëka mana alli pasakonqankunata? b) ¿Ima rurëta mana haqiyänampaqtaq Jehoväpa sirveqninkuna decidiyashqa?

¹⁵ “Allita ruraqtaqa manam imëpis ishkitsiyanqatsu. Alli nunaqa imëyaqpis yarpashqam kanqa. Mana alli pasakonqankunata wiyarnimpis manam mantsakonqatsu. Shonqumpita patsëmi imëpis Jehoväman confiakun. Mana mantsakoq y sinchi shonqum. Manam mantsakonqatsu, chikeqninkuna ushakaqtapis rikanqam” (Sal. 112:6-8). Mana alli noticiakunaqa tiempontsikchönö manam imëpis kashqatsu. Guerra, terrorismo, mana reqishqa qeshyakuna, suwakïkuna, waktsayëkuna y tukïnöpa kë patsata rakchatäkikäyanqantaqa wiyëkantsikllam. Awmi, alli ruraq nunakunaqa manam këkunapitaqa safakïta puëdentsu, pero tsënö karpis manam mantsakar tsëllaman yarparäkuyantsu. ‘Mana mantsakoq y sinchi shonquyoqmi kayan’ y ‘manam imëpis ishkenqatsu’. Shamoq tiempotapis kushishqam shuyaräyan, musyayanmi Jehová Dios mushoq patsata ichikllachöna apamunanta. Imëka sasa o aja tiempopa pasarnimpis, alleqmi tsarakuyan Jehoväman markäkurnin. Pëqa manam imëpis ishkiyänanta haqenqatsu y mana allikunapa pasayaptimpis sinchi kayänampaqmi yanapëkonqa (Isa. 12:2).

¹⁶ Alli ruraq nunakunaqa chikeqninkunapa ulikïninta o llullakïnintapis aguantayanmi, tsënö kaptimpis Jehová Diospita yachatsikuyanqantaqa manam imëpis haqiyanqatsu. Tsënö rurëkäyaptimpis masran sinchikuyashqa Jehová Diosnintsik mandanqanta cumplirnin, nuna mayinkunata yachatsirnin Jehoväpa markanman yëkurnin serviyänampaq. Jehová Diospa piñakïnin hunaq más këllachöna kanqanmanmi nunakuna más chikimäshun, y këqa masran kanqa Gog de Magog o Diablu, Jehová Diospa markanta ushakätsita munar tukïta rurar qallëkuptin. Tsëchömi sïqa rikäkurishun chikimaqnintsik Diablupa yanapaqninkunapa ushakëninta. ¡Imëka kushikïpaqraq kanqa Jehová Dios shutinta santoyätsenqanta rikëqa! (Eze. 38:18, 22, 23.)

Alli reqishqa y respetashqam kanqa

17. ¿Imanötaq alli reqishqa y respetashqa kayanqa llapan alli ruraqkuna?

¹⁷ Imëkaraq kushikushun, Satanás y yanapaqninkuna ushakäriyaptin, Jehová Diosnintsikta llapantsik junto mana pï michashqa alabarnin. Tsë mana ushakaq kushikïtaqa chaskishun Jehoväman fiel kaqkunallam. Manam chikimaqnintsik bencimäshuntsu, Jehovämi markampaq kënö nin: “Alli reqishqa y respetashqam kanqa” (Sal. 112:9). Chikeqninkunata chipyëpa ushakäratsiptenqa kushishqa y sinchipam Jehová Diosta alabayanqa.

18. ¿Salmo 112 nenqan imanöraq cumplikärenqa?

¹⁸ “Mana allita ruraq nunaqa, alli ruraqta rikarmi piñakonqa. Kirunkunatapis uchonqam y kallpampis ushakärenqam. Mana alli ruraq nunapa munëninqa pasëpam ushakanqa” (Sal. 112:10). Ichik tiempollachönam Jehová Diospa markanta chikeqkunaqa chipyëpa ushakäyanqa. Mallaqäkoq kënin, chikikoq kënin y Diosnintsikpita yachatsikushqa michäkïninkunapis ushakärenqam ‘jipaqui’ tiempo chämuptin (Mat. 24:21).

19. ¿Imakunamantaq pasëpa markäkunantsik o yärakunantsik?

¹⁹ ¿Kawëkartsuraq pasarinki tsë llapanta rikärinëkipaq? O tsë tiempo manaraq chämuptin qeshyawan o awkinyëpa wanukurnenqa, ¿alli ruraq kaqkuna shärimoqpaq kaq grupochötsuraq këkanki? (Hech. 24:15.) Jesucristupa wanïninman fënikita churarnin y Jehová Dios nenqanta wiyakurnenqa Salmos 112 nenqanchö alli ruraq nunakunanömi kanki (lei Efesios 5:1, 2, NM). Jehoväqa manam ni imëpis sirveqninkunata, ni allita rurayanqankunataqa qonqanqatsu. Pëqa imëyaqpis yarparëkanqam y imëpis kuyëkanqallam (Sal. 112:3, 6, 9).

[Päginapa ura kuchunchö willakï]

Yarpakachänapaq tapukïkuna

• ¿Imanirtaq “¡Aleluya!” nishpa Jehoväta alabashwan?

• ¿Kanan tiempontsikchö ima pasakonqankunataq mäkoq mäkoq cumplido sirveqta kushitsin?

• ¿Imanö yanapakoqtataq Jehová kuyan?

[Yachakunapaq kaqpa tapukïninkuna]

[29 kaq päginachö dibüju]

Alli ruraqtanö Diosnintsik imëpis rikëkämanapaqqa, noqantsikrëkur Jesus wanonqanmanmi markäkunantsik

[31 kaq päginachö dibüjukuna]

Jehoväpakaqchö tukïta rurayämunampaqmi yanapakun shonqunkunapita patsë imëkantsikkunawampis yanapakonqantsikqa