Allin ruraqkunaqa Diostam wiñaypaq alabanqaku

“Allin ruraq runaqa wiñaypaqmi yuyarisqa kanqa [. . .]. Allin rurasqanqa wiña-wiñaypaqmi kanqa.” (SAL. 112:6, 9.)

1. a) ¿Ima sumaq suyakuytaq kachkan Diospa qawasqanman hina allin ruraqkunapaq? b) ¿Ima tapukuymi kan?

¡MAYNA sumaq suyakuymi kachkan Diospa qawasqanman hina allin ruraqkunapaqqa! Wiña-wiñaypaqmi Jehová Diospa sumaq kayninkunata qawanqaku hinaspam rurasqankunamanta astawan yachaspanku tukuy sonqonkumanta kusikuywan alabanqaku. Chayna suyakuyniyoq kanapaqqa Salmo 112 capitulopa nisqanman hinam allin ruraq kananchik. Ichaqa, ¿imaynatataq Jehová Diosqa chuya hinaspa allin ruraq kachkaspan allin ruraqta hina qawawanchikman pantaq kachkaptinchikpas? Allin ruraq kananchikpaq anchata kallpanchakuspapas hinallam imapipas pantanchik, wakinpiqa llumpaytaraqmi (Rom. 3:23; Sant. 3:2).

2. ¿Ima iskay milagrokunatam Jehová Dios rurarqa kuyakuq kasqanrayku?

² Kuyakuq kaspanmi Jehová Diosqa allin ruraqta hina qawawananchikpaq kaykunata rurarun: puntataqa, hanaq pachapi kaq Churin mana huchayoq nacenanpaqmi milagrota rurarqa, chaymi huk doncella wiksayakurqa (Luc. 1:30-35). Chaymantapas, enemigonkuna Jesusta wañurachiptinkum Diosqa huk milagrotawan rurarqa, Churintam espiritu cuerpoyoqta kawsarichirqa (1 Ped. 3:18).

3. ¿Imanasqataq Churinman hanaq pachapi kawsakunanpaq premiota qospa Diosqa kusikurqa?

 ³ Jehová Diosqa Jesustam bendecirqa mana wañuchiy atina kawsakuyta qospan, manaraq nacechkaspanqa manam chayna suyakuyniyoqchu karqa (Heb. 7:15-17, 28). Jehová Diosqa kusikurqam chaynata bendecispan, Churinqa kasukurqam sasa aguantana pruebakunapi kaspanpas. Chaywanmi Jesusqa qawachirqa Satanaspa nisqan llulla kasqanta, payqa ninmi runakunaqa Diostam servinku imatapas chaskisqankuraykulla manam kuyasqankuraykuchu nispa (Pro. 27:11).

4. a) Hanaq pachaman Jesus kutispan, ¿imatam ñoqanchikpaq rurarqa, hinaspa imaynatam Diosqa qawarqa chay rurasqanta? b) ¿Imaynataq tarikunki Jehová Diospa chaynataq Jesuspa rurasqankuwan?

⁴ Chaymantapas, hanaq pachaman rispanmi Jesusqa ‘kikinpa yawarllanwan’ yaykurqa ‘Diospa qayllanman [. . .] favorninchikpi rimananpaq’. Kuyakuq Diosninchikñataqmi huchanchikrayku Jesuspa wañusqanta chaskirqa. Chayraykum ‘kawsaq Dios serviyta’ atichwan chuya concienciayoq. Kayqa kallpanchawanchikmi Salmo 112, NM capitulopa qallariyninpi nisqanman hina ‘Jehová Diosta alabananchikpaq’ (Heb. 9:12-14, 24; 1 Juan 2:2).

5. a) ¿Imatam rurananchik Diospa qawasqanman hina allin ruraq kasqanchikta mana chinkarachinapaq? b) ¿Imayna qellqasqam kachkan Salmo 111 hinaspa 112 capitulokuna? (Kay paginapa tukuyninpi nisqanman hina rimarimuy.)

⁵ Allin ruraqta Jehová Dios qawawananchikpaqqa, rantinchikpi Jesuspa wañusqanpim hinalla iñinanchik. Sapa punchawmi mana qonqaspa ancha kuyawasqanchikmanta Jehová Diosta agradecekunanchik (Juan 3:16). Chaymantapas, Bibliatam estudiananchik hinaspam kallpanchakunanchik yachachisqanman hina kawsanapaq. Salmo 112 capitulopim sumaq consejokuna kachkan Diospa qawasqanman hina allin concienciayoq kay munaqkunapaq. Kay capitulopa nisqanqa tupanmi Salmo 111 capitulopa nisqanwan. Diospa Palabranta hebreo rimaypi chayllaraq qellqakusqanpiqa iskaynin capitulopa qallariyninpim nin: “¡Jehová Diostayá alabaychik!”, nispa. *

Kusikunapaqmi

6. ¿Ima bendicionkunatam chaskin Salmo 112 capitulopa nisqanpi runaqa?

⁶ “¡Mayna kusisqam Tayta Dios respetaq runaqa! ¡Mayna kusisqam kamachikuyninkunapi kusikuq runaqa! Paypaqa mirayninpas kay pachapim sinchi atiyniyoq kanqaku. Mana pantaq runa[kuna]pa mirayninqa bendecisqam kanqaku.” (Sal. 112:1, 2.) Qawasqanchikman hina, kay Salmo qellqaqqa qallariyninpim riman chullalla runamanta, 2 versiculopa tukuyninpim ichaqa achka ‘runakunamanta’ rimachkan. Chaymi nichwan, yaqachusmi Salmo 112 capituloqa rimachkan huñulla tarikuq achka runakunamanta nispa. Apostol Pablom chuya espiritu yanapaptin nirqa punta pachak wata cristianokunapi Salmo 112:9 cumplikusqanta (leey 2 Corintios 9:8, 9). ¡Mayna allintam kay Salmo qellqaqa qawachin kunan tiempopi cristianokuna imaynata kusisqa kanankumanta!

7. ¿Imanasqataq Diosta serviqkunaqa payta respetananchik, hinaspa imaynatam qawananchik kamachikuyninkunata?

 ⁷ Salmo 112:1 nisqanpi hinam cheqap cristianokunaqa ‘Diosta respetanku’, chayraykum kusisqa kanku. Diosta kusichiyta munasqankum paykunata yanapan mana allin kaqkunata mana ruranankupaq. Paykunaqa anchatam ‘kusikunku’ Bibliata estudiaspanku hinaspa Diospa kamachisqanta kasukuspankupas. Huknin kamachikuyninqa Munaychakuyninmanta enteron Pachapi willakuymi. Chaymi, Jesuspa qatiqnin kanankupaq enteron Allpapi runakunata yachachiypi kallpanchakuspankupas, mana allin ruraq runakunaman willanku Diospa piñakuynin hichpallapiña kasqanta (Eze. 3:17, 18; Mat. 28:19, 20).

8. a) ¿Imaynatam Diosqa bendecichkan serviqninkunapa tukuy sonqowan predicasqankuta? b) ¿Ima bendicionkunatam chaskinqaku kay pachapi kawsakuy suyaqkunaqa?

⁸ Jehová Diospa serviqninkuna chay kamachikuykunata kasukusqankuraykum kunanqa 7 millon masninña enteron pachapi kachkanku. Manam pipas neganmanchu Diospa serviqninkuna ‘kay pachapi sinchi atiyniyoq kasqankutaqa’ (Juan 10:16; Apo. 7:9, 14). ¡Mayna bendicionkunataraqchá chaskinqaku Diospa munaynin rurakuptinqa! Diospa llaqtanqa ‘llumpa-llumpay ñakariy punchawkunapim’ amparasqa kanqa hinaspam “mosoq allpata” dueñoyanqaku, chaypiqa ‘tukuy imapas allin arregloman hina rurasqam kanqa’. Armagedonta kawsaqlla pasaqkunaqa “bendecisqam kanqaku”, astawanqa millonninpi kawsarimuqkunata kusikuywan chaskispanku. ¡Mayna sumaq suyakuymi chayqa! Hinaptinmi, Diospa “kamachikuyninkunapi kusikuq” runakunaqa hamuq tiempopi manaña pantaq kanqaku hinaspam Diospa churinkuna hina wiñaypaq libre kanqaku (2 Ped. 3:13; Rom. 8:21).

Kapuqninchikta yachaywan servichikusun

9, 10. Cheqap cristianokuna, ¿imatam ruranku Diosmanta yachasqankuwan, hinaspa imaynataq allin rurasqankuqa ‘wiñaypaq’ kanqa?

⁹ “Payqa wasinpipas qori-qollqeyoqmi kachkan. Payqa wasinpipas kapuqniyoqmi kachkan. Payqa wiñaypaqmi allinta rurachkan. Chay runaqa  tutayaypim kanchay hina. Mana pantaqkunapaqmi kanchay hina. Chay runaqa kuyapayakuqmi. Chay runaqa llakipayakuqmi. Payqa allinkunata ruraqmi.” (Sal. 112:3, 4.) Diosta ñawpaq tiempopi serviqkunamanta wakinqa apum karqaku. Kunanpas Diospa favorecesqankunaqa wakcha kaspanpas apum kanmanku. Cheqaptaqa yaqa llapallankum wakcha kanku, wakinpiqa chayraykum despreciasqa kanku Jesuspa tiemponpi hina (Luc. 4:18; 7:22; Juan 7:49). Kapuqniyoq otaq wakcha kaspapas llapallanchikmi Diosmanta yachasqanchikpiqa apu kachwan (Mat. 6:20; 1 Tim. 6:18, 19; leey Santiago 2:5).

¹⁰ Hanaq pachaman riy suyaqkuna hinaspa kay pachapi kawsakuyta suyaqkunapas manam kikillankupaqchu munanku Diosmanta yachasqankutaqa. Aswanmi ‘mana pantaqkunapaq kanchay hina’ kanku Satanaspa munaychakusqan tutayaypi. ¿Imaynata? Chaynaqa kanku Diospa yachachikuyninmanta runamasinkuman willaspankum. Predicacionta harkay munaqkunapa rurasqankuqa yanqapaqmi kanqa, ichaqa cristianokunapa predicasqankum wiñaypaq allin kanqa. Sasachakuykuna kaptinpas Diosta serviqkuna hinalla allinta ruraspankuqa, segurom kanmanku ‘wiñaypaq’ kawsanankumanta.

11, 12. ¿Imaynatam cristianokunaqa kapuqninkuta servichikunku?

¹¹ Hanaq pachaman riy suyaqkuna hinaspa kay pachapi kawsakuy suyaqkunapas kapuqninkuta qokuykuqmi kanku. Salmo 112:9 nin: “Wakchakunamanmi imallantapas aypuykarin”, nispa. Cheqap cristianokunaqa kapuqninkuwanmi yanapanku iñiqmasinkuta hinaspa necesitaq vecinonkutapas. Chaynataq kapuqninkutam qonku ima desgraciapas pasaruptin yanapanankupaq. Jesuspa nisqanman hinaqa, chay rurasqankuwanpas kusisqam kanku (leey Hechos 20:35 hinaspa 2 Corintios 9:7).

¹² Piensarisunchiktaq 172 rimaykunapi kay revista qellqasqa kananpaq gastakusqanpipas, wakin idioma rimaqkunaqa wakcham kanku. Manataqmi qonqananchikchu, kay revistaqa mana uyarikuqkunapaq hinaspa mana rikukuqkunapaqpas rurakusqanta.

Qokuykuqkuna hinaspa allin ruraqkuna

13. ¿Pikunataq ejemplonchik qokuykuq kananchikpaq, hinaspa imaynatam paykunata qatipakuchwan?

¹³ “Allin runaqa kuyapayakuqmi. Allin runaqa prestakuykuqmi.” (Sal. 112:5.) Wakin runakunaqa manam qokuykuq otaq llakipayakuq kaspankuchu runamasinmanqa imatapas qoykun. Wakinkuqa qonku kapuqniyoq kasqankuta runakuna qawanallanpaqmi, wakinñataq qonku mana munastin. Manam kusichiwanchikchu despreciawaspanchik otaq piñakustin pipapas qowasqanchikqa. Ichaqa, ¡mayna allinmi kuyapayakuq runapa yanapakuyninta chaskiyqa! Qokuykuq kaypiqa Jehová Diosmi ejemplonchik, payqa kusisqam imatapas qoykuwanchik (Sant. 1:5, 17). Jesucristopas allintapunim Taytanta qatipakurqa (Mar. 1:40-42). Jehová Diospa qawasqanman hina allin runa kayta munaspaqa, kusikuywan hinaspa sonqomantam qonanchik aswanqa runamasinchikkunata Diosmanta yachachispa.

14. ¿Imaynatam allin ruraq kasqanchikta qawachichwan?

¹⁴ “Negocionpipas [otaq ima rurasqanpipas] concienciayoqmi.” (Sal. 112:5.) Bibliapa willakusqanman hinam confianza mayordomoqa Jehová Diospa kamachikuyninta kasukun Patronninpa kapuqninkunata nanachikuspan (leey Lucas 12:42-44). Chayna kasqanmi qawakun ancianokunata yachachisqankupi, wakinpiqa paykunam congregacionpi kaqkuna hatun huchata ruraruptinku atiendenanku. Sirvientepa allin rurasqanqa qawakuntaqmi Bibliapa nisqanman hina yachachisqankupipas, chaynapi congregacionkunapi, misionerokunapaq wasikunapi hinaspa Betel wasikunapi imapas allin rurakunanpaq. Manam ancianokunallachu allintaqa rurananku aswanqa llapallanchikmi, iñiqmasinchikwan hinaspa mana iñiq runakunawan tarikuspa chaynataq negociopipas (leey Miqueas 6:8, 11).

Allin ruraqkunapaq bendicionkuna

15, 16. a) ¿Imaynam kanku allin ruraq runakuna mana allin noticiakunata uyarispanku? b) ¿Imata ruranankupaqmi Diosta serviqkuna hinalla kallpanchakunku?

¹⁵ “Allin ruraq runaqa wiñaypaq mana urmaqmi  kanqa. Allin ruraq runaqa wiñaypaqmi yuyarisqa kanqa. Mana allin noticiamantaqa manam manchakunchu. Tayta Diospi confiakusqanraykum mana imapas qokunchu. Qaqa hina sayaspa mana manchakuqmi kanqa. Enemigonkuna vencechikusqantam qawanqa.” (Sal. 112:6-8.) Ima tiempomantapas kunanmi achka mana allin noticiakunata uyarinchik. Sapa kutim uyarinchik guerramanta, wañuchiqkunamanta, chayllaraq rikurimuq hinaspa ñawpaqmantaraq kaq mana hampiy atina onqoykunamanta, suwakunamanta, wakchayaymanta hinaspa kay Pacha qachachasqa kasqanmantapas. Diosman sonqo kaqkunapas sasachakunkum kay noticiakunapa nisqanman hina tukuy mana allinkuna pasasqanwanqa, ichaqa manam hukmanyankuchu hamuq tiempomantaqa. Paykunaqa ‘qaqa hina sayaspam mana manchakunkuchu’. Confianzawanmi hamuq tiempota suyanku, yachankum Diospa prometesqan mosoq pacha hichpallapiña kasqanta. Ima desgraciapi kaspankupas Diospi confiasqankuraykum mana iñiq runakuna hinaqa mana llumpaytaqa hukmanyankuchu. Jehová Diosqa ‘manam urmanankuta’ saqenchu, aswanmi kallpanchan sasachakuykunata aguantanankupaq (Fili. 4:13, NM).

¹⁶ Chaymantapas, allin ruraqkunaqa aguantanankum enemigonkupa cheqnisqankuta hinaspa paykunamanta llullakuna rimasqankutapas, ichaqa enemigonkuqa manam haykapipas harkayta atinqachu hinalla predicanankutaqa. Chaymi Diosta serviqkunaqa Paypa Munaychakuyninmanta allin noticiata mana samaykuspa hinalla willakunku hinaspa Jesuspa qatiqnin kanankupaq allin sonqoyoq runakunatapas yachachinku. Puchukay tiempo chayamunankamaqa astawanchá Jehová Diospa llaqtanpa contranpi churakunqaku, chaynam kanqa cristianokunata chinkarachiyta munaspan Gogwan sutichasqa Diablo tukuyninpi hatarinankama. Hinaptinmi ‘enemigonchikkunapa vencechikusqanta qawasunchik’. ¡Mayna kusikunapaqchá kanqa Jehová Diospa sutin chuyanchasqanta qawayqa! (Eze. 38:18, 22, 23.)

‘Allin reqsisqam kanqa’

17. ¿Imaynatam allin ruraq runakuna ‘allin reqsisqa kanqaku’?

¹⁷ Satanas hinaspa munaychakusqan kaqkuna manaña kaptinqa, ¡mayna kusisqam kasun Jehová Diosta huk sonqolla yupaychaspanchikqa! Chayna kusikuywanmi wiñaypaq bendecisqa kanqaku Diospa qawasqanman hina allinta ruraspa takyaqkunaqa. Manam allin ruraqkunataqa pipas vencenqachu, Jehová Diosmi kaynata prometen: “Allin reqsisqa kaspanmi respetasqa kanqa”, nispa (Sal. 112:9). Llapallan enemigonkunata Jehová Dios chinkachiptinmi kusikuymanta qaparinqaku.

18. ¿Imaynatam Salmo 112 capitulopa tukuyninpi nisqan cumplikunqa?

¹⁸ “Mana allin ruraq runaqa payta qawaspanmi piñapayanqa. Kachupakusparaq qawaptinmi kallpanpas chinkarirunqa. Mana allin ruraq runapa munasqanqa pasaypaqtam chinkarunqa.” (Sal. 112:10.) Diospa llaqtanta cheqniqkunapa ‘kallpan chinkarunanpaq’ punchawmi hichpaykamuchkanña. Cheqnikusqan hinaspa predicasqanchikta harkakunankupaq rurasqankupas ‘llumpa-llumpay ñakariy punchawkunapim’ chinkanqa (Mat. 24:21).

19. ¿Imamantataq seguro kachwan?

¹⁹ ¿Chaypichu kanki mana allin ruraq runakunata Jehová Diospa puchukachisqanta qawanaykipaq? Chay punchaw manaraq chayamuchkaptin onqosqa otaq yuyaqña kasqaykirayku wañukuspaykiqa, ¿allin ruraq runakunawan kuskachu kawsarimunki? (Hech. 24:15.) Chayna kananpaqqa rantinchikpi Jesuspa wañusqanpim hinalla iñinayki, hinaspapas Jehová Diostam qatipakunayki Salmo 112 nisqanpi allin ruraq ‘runa’ hina (leey Efesios 5:1, 2). Jehová Diosqa serviqninkunataqa manam qonqanqachu nitaq allinkuna rurasqankutapas, Payqa wiña-wiñaypaqmi yuyanqa (Sal. 112:3, 6, 9).

[Willakuy]

Yuyaymananapaq tapuykuna

• ¿Ima razonkunam kachkan ‘Jehová Diosta alabanapaq’?

• ¿Imakunapa rurakusqanmi cheqap cristianokunata kusichiwanchik?

• ¿Imayna qoqtam Jehová Diosqa kuyan?

[Kay yachachikuypa tapukuyninkuna]

[25 kaq paginapi dibujo]

Jehová Diospa qawasqanman hina allin ruraq hinalla kananchikpaqqa, Jesuspa wañusqanpim iñinanchik

[26 kaq paginapi dibujokuna]

Sonqomanta qosqanchikmi yanapakun desgraciakuna pasaptin hinaspa Bibliamanta qellqakuna rurakunanpaqpas