Ka Akapaapaa te Aronga Tuatua Tika i te Atua e Tuatau ua Atu

“Ka manakoia te aronga tuatua-tika . . . e tika tana tuatua-tika i te vai marie anga.”​—SALA. 112:6, 9.

1. (a) Eaa te tuatau mataora e tapapa maira i te aronga pouroa ta te Atua e manako ra e e aronga tuatua tika? (e) Eaa te uianga tei uiia mai?

E TUATAU umere roa te tapapa maira i te au tangata pouroa ta te Atua e manako ra e e tuatua tika! Ka rekareka ua rai ratou i te maata o ta ratou e kite maira no runga i to Iehova au tu manea. Ka ki ua to ratou ngakau i te akapaapaa, i to ratou kite e maata ua maira no runga i ta te Atua au angaanga i anga mai. Tetai umuumuanga maata e rauka ai kia kite i taua tuatau kaka ra koia oki ko te turanga “tuatua-tika,” tei akaketaketaia mai i roto ia Salamo 112. Peea ra te Atua tapu e te tuatua tika ko Iehova, i manako mai ei i te tangata ara nei ei aronga tuatua tika? Noatu ta tatou tauta pakari kia rave i te mea tika, ka tarevake rai tatou, i tetai au taime e au tarevake kino tikai.​—Roma 3:23; Iako. 3:2.

2. Eaa nga temeio e rua ta Iehova i rave ma te aroa ua?

² Ma te aroa ua kua oronga mai a Iehova i tetai ravenga takake rava. Akapeea ra aia i te rave anga i te reira? Mea mua, na roto i te rave anga i tetai temeio, kua tuku mai aia i te oraanga o tana Tamaiti akaperepere i te rangi, ki roto i te vairanga tamariki o tetai paretenia kia anauia mai iaia ei tangata apa kore. (Luka 1:30-35) E oti, i muri ake i te tamate anga te au enemi o Iesu iaia, kua rave akaou a Iehova i tetai temeio takake rava. Kua akatu akaou mai te Atua ia Iesu mei te mate ki tetai oraanga kaka ei mea ora vaerua.​—1 Pete. 3:18.

3. Eaa te tumu i mareka rava ai te Atua i te oronga i te tutaki o te oraanga i te rangi no tana Tamaiti?

³ Kua tutaki a Iehova ia Iesu ki tetai mea kare i rauka ana i tana Tamaiti i mua ake ka riro mai ei aia ei tangata​—e oraanga mate kore i te rangi.  (Ebe. 7:15-17, 28) Kua mareka rava a Iehova i te rave i teia no te mea kua vai akarongo mou ua a Iesu i roto i te au timataanga. No reira kua rauka ia Iesu i te oronga i te pauanga meitaki rava, ae tetai pauanga apa kore na tona Metua, ki te pikikaa a Satani e e akakoroanga noinoi ua to te tangata i tavini ei i te Atua e kare no te inangaro mou tikai.​—Mase. 27:11.

4. (a) I tona oki atu anga ki te rangi, eaa ta Iesu i rave no tatou, e eaa ta Iehova i rave? (e) Eaa ra toou manako no runga i ta Iehova e i ta Iesu i rave noou?

⁴ E maata roa atu ta Iesu i rave i te rangi. Kua “akakite aia iaia uaorai ki mua i te aroaro o te Atua no tatou” ma te puapinga o ‘tona uaorai toto.’ Kua ariki takinga meitaki ua mai to tatou Metua aroa i te rangi i ta Iesu atinga akaperepere maataia ei “tarangaara i ta tatou nei ara.” No reira, ka rauka ia tatou kia “akamori i te Atua ora” ma te ‘mā o te akava-ngakau.’ E tumuanga tau tikai teia no tatou kia akatika ki te au tuatua mua a Salamo 112 e, “Alelu Ia”!​—Ebe. 9:12-14, 24; 1 Ioa. 2:2.

5. (a) Eaa te ka anoanoia tatou kia rave e rauka ai ia tatou te akamou marie i tetai turanga tuatua tika i mua i te Atua? (e) Na roto i teea au mataara i turuturu ei a Salamo 111 ia Salamo 112? (Akara katoa i te tataanga i raro.)

⁵ E rauka ai ia tatou kia tamou marie i tetai turanga tuatua tika i mua i te Atua, ka anoanoia tatou kia tuku ua rai i to tatou akarongo i roto i te toto o Iesu tei akamaringiia. E mea tau kia akameitaki tatou ia Iehova i te au ra ravarai no tona aroa maata ia tatou. (Ioa. 3:16) Ka anoano katoaia tatou kia apii ua atu rai i te Tuatua a te Atua e kia akarotai i to tatou oraanga ki ta te reira karere, ma te ngakau tae. E akoanga manea tikai tei roto ia Salamo 112 no te aronga pouroa tei inangaro kia rauka ua rai te akava ngakau ma i mua i te aroaro o te Atua. Te turuturu nei teia taramo ia Salamo 111. Te akamata ra nga mea e rua ki te akatenianga e kia “Akapaapaa kotou ia Iehova!” me kore “Alelu Ia!” *

Tumu no te Mataora

6. I akapeea ra te “tangata” mataku Atua tei akatakaia mai i roto ia Salamo 112, te akameitakiia anga?

⁶ “E ao to te tangata i mataku ia Iehova, tei rekareka maata i tana ra au akauenga. E mana oki tona uanga i te enua nei; e meitaki oki te uki a te aronga tiratiratu ra.” (Sala. 112:1, 2) Ka akara ana e kua na mua te tata taramo i te taiku mai i tetai “tangata” okotai e oti i reira kua taui aia ki te “aronga tiratiratu” i te tuanga openga o te irava 2. Te akakite maira teia e e pupu tangata katoa ta te Salamo 112 e tuatua ra. Ei turu i teia manako, kua akauruia te apotetoro ko Paulo kia taangaanga ia Salamo 112:9 i roto i te piri anga atu ki te au Kerititiano i te anere mataiti mua. (E tatau ia 2 Korinetia 9:8, 9.) Kua akatutu meitaki mai teia taramo e peea tikai te au pipi a Karaiti i runga nei i te enua i teia tuatau i mataora ai!

7. Eaa i anoanoia ai kia rauka i te au tavini o te Atua te mataku akangateitei nona, e mei teaa ra toou manako no runga i ta te Atua akauenga?

⁷ Mei tei akakiteia mai i roto ia Salamo 112:1, te kite nei teia au Kerititiano mou i te mataora maata ia ratou e aaere ra ma te “mataku ia Iehova.” Ka riro teia tu mataku akangateitei no te akamareka kore anga iaia, ei tauturu ia ratou kia patoi i te au tu o to Satani ao. E mea “rekareka maata” na ratou i te apii i te Tuatua a te Atua e te akono i tana au akauenga. Te kapiti  maira te reira i te tutu aere anga i te tuatua meitaki o te Patireia ki te ao katoa nei. Te tauta pakari nei ratou i te akariro i te au tangata o te pa enua ravarai ei au pipi, ia ratou e akamatakite aere ra i te aronga rave kino no runga i te aerenga mai o te ra akavaanga a te Atua.​—Eze. 3:17, 18; Mata. 28:19, 20.

8. (a) I akapeea ra to te Atua iti tangata akamori iaia i teia tuatau i te tutakiia anga no to ratou tu toto mapu? (e) Eaa ra te au akameitakianga e tapapa maira i te aronga e manakonakoanga to ratou i te enua nei?

⁸ No te mea kua akarongo ratou i taua au akauenga ra, i teianei mei tetai itu mirioni au tavini o te Atua i te ao nei i teia tuatau. Koai ia te ka rauka kia akakore e kua “mana oki” tona iti tangata “i te enua nei”? (Ioa. 10:16; Apo. 7:9, 14) E ka akameitakiia ratou i te tuatau e akatupu ei te Atua i tona akakoroanga! Ei pupu tangata, ka akaoraia mai te aronga e manakonakoanga to ratou i te enua nei mei roto i te “mate maata” i te akanoo anga i tetai “enua ou . . . i te vai tika anga o te tuatua-tika.” I te tuatau ka aereia ka ‘akameitaki’ maata roaia atu te aronga ka ora mai mei roto ia Aramakito. Ka papa ua ratou i te turou mai i te mirioni ua atu o te aronga tei akatuia mai. E manakonakoanga rekareka tikai! I te openga, ko te aronga tei “rekareka maata” i te au akauenga a te Atua ka taeria ia ratou te turanga apa kore e ka rekareka maata ratou i “te rangatira meitaki o te tamariki a te Atua” e tuatau ua atu.​—2 Pete. 3:13; Roma 8:21.

Taangaanga Meitaki i te Au Apinga Nui

9, 10. I akapeea te au Kerititiano mou i te taangaanga anga i ta ratou au apinga nui, e ka akapeea ra to ratou turanga tuatua tika i te vai marie anga e tuatau ua atu?

⁹ “E apinga nui tei tona are, e te taongaia: e tika oki tana tuatua-tika i te vai marie anga. Ei te poiri nei e iti mai ei te mārama ki te aronga tiratiratu; te takinga-meitaki, e te aroa, e te tuatua-tika.” (Sala. 112:3, 4) I te au tuatau o te Pipiria, kua rongonui tetai au tavini o te Atua no to ratou au apinga nui. E i roto i tetai tu, kua apinga nuiia te aronga ta te Atua i ariki, noatu kare i roto i te tu o te apinga pae materia. Ko te tika ra, te maataanga o te aronga tei iki kia taakaaka ia ratou uaorai ki mua i te aroaro o te Atua penei e putaua e te akavaavaaia, mei te tuatau rai o Iesu. (Luka 4:18; 7:22; Ioa. 7:49) Inara noatu e maata me kore e iti ua ta tetai i te pae materia, ka rauka rai kia  apinga nui i te pae vaerua.​—Mata. 6:20; 1 Timo. 6:18, 19; e tatau ia Iakobo 2:5.

¹⁰ Kare te au Kerititiano akatainuia, e to ratou au taeake, e tapu ua ana i to ratou au apinga nui kia ratou uaorai. Mari ra kua “iti mai” ratou i roto i to Satani ao poiri ei “mārama ki te aronga tiratiratu.” Kua rave ratou i te reira na te tauturu anga i etai ke kia puapingaia mei te au apinga puapinga pae vaerua o te pakari e te kite i te Atua. Kua titau ana te aronga patoi i te arai i te angaanga tutu aere anga i te Patireia kare ra i puapingaia. Mari ra, kua ‘vai marie’ rai te ua o teia angaanga tuatua tika. Na te akakoromaki anga i roto i te arataa tuatua tika, ka rauka i te au tavini o te Atua te akapapuanga o te oraanga tinamou, koia oki te “vai marie anga” e tuatau ua atu.

11, 12. Eaa ra tetai au mataara e taangaanga ana te iti tangata o te Atua i ta ratou au apinga materia?

¹¹ Kua rauka i te iti tangata o te Atua, te pupu tavini akatainuia e te “aronga maata rava,” i te akapapu mai i to ratou tu oronga aroa ua i te au apinga materia. Te akakite ra a Salamo 112:9 e: “Kua tua marie aia, kua oronga aia ki te aronga ao.” E oronga putuputu ana te au Kerititiano mou i teia tuatau i te au apinga materia no to ratou au taeake Kerititiano e ki te au tangata tupu katoa tei rokoia e te ngere. E taangaanga katoa ana ratou i to ratou au apinga materia ei turuturu i te au kamupeini tauturu i te au tuatau tumatetenga. Mei ta Iesu i akaari mai, e tumuanga tau katoa rai te reira no te mataora.​—E tatau ia Angaanga 20:35; 2 Korinetia 9:7.

¹² Tetai, e akamanako ana i te moni e pou ana i te nenei anga i teia makatini i roto i te au reo e 172, te maataanga i teia au reo e aronga putaua te tuatua ana i te reira. E akamanako katoa ana, e ka rauka mai teia tianara i roto i te au reo tukeke o te aronga turi, pera katoa i roto i te reo o te aronga matapo.

Takinga Meitaki e te Tika

13. Koai ma tei akanoo i te akaraanga meitaki rava atu no te oronga anga ma te takinga meitaki, e ka akapeea tatou me aru i ta raua akaraanga?

¹³ “E takinga-meitaki to te tangata meitaki e te oronga.” (Sala. 112:5) Kare e ekoko, e kua kite koe e kare te tangata e oronga ua ana i te tauturu ki etai ke ma te takinga meitaki. E oronga ana tetai aronga na roto i te tu akavaavaa me kore kare tikai e tae ana to ratou ngakau i te oronga. Kare te tauturu a te aronga e akavaavaa maira ia koe i te mea pumaana. I tetai tua ra, e mea mareka tikai te tauturu a te tangata takinga meitaki. Ko Iehova te akaraanga takake rava atu o Tei Oronga ua mai ma te takinga meitaki. (1 Timo. 1:11; Iako. 1:5, 17) Kua akaata apa kore ua mai a Iesu Karaiti i te akaraanga takinga meitaki a tona Metua. (Mare. 1:40-42) No reira, no te Atua kia manako mai ia tatou ei aronga tuatua tika, ka anoanoia tatou kia oronga ma te maoraora e te takinga meitaki, i roto tikai i te angaanga orometua, i te oronga anga i te tauturu pae vaerua ki to tatou tangata tupu.

14. Eaa tetai au mataara ka rauka ia tatou kia ‘rave i ta tatou au peu ma te akono’?

¹⁴ “E rave aia i tana au peu ra ma te akono.” (Sala. 112:5) Mei tei totouia, na te pupu o te akaaere pikikaa kore e akono ana i te au apinga a te Pu kia rotai ki to Iehova tu akono. (E tatau ia Luka 12:42-44.) Te akaataia maira te reira i roto i te aratakianga Tuatua Tapu i orongaia mai ki te aronga pakari, na ratou i tetai au taime e akono ana i te aronga tei rave i te au ara kino i roto i te putuputuanga. Te kitea katoaia ra te mataara tika i te rave anga i teia au mea nei, i roto i te aratakianga akatumuia ki roto i te Pipiria ta te pupu tavini i oronga mai, no runga i te tu e akaaereia ana te au putuputuanga katoatoa, te au ngutuare mitinari, e te au ngutuare Betela. Te umuumu katoaia ra te tu akono kare anake ua mei te aronga pakari, mari katoa ra, mei etai atu au Kerititiano i roto i ta ratou e rave ra ki etai ke e ki te aronga irinaki kore, tei kapiti mai i te au mea o te pitiniti.​—E tatau ia Mika 6:8, 11.

Au Akameitakianga no te Aronga Tuatua Tika

15, 16. (a) Eaa te au mea ta te nuti kino o teianei ao ka akatupu ki runga i te aronga tuatua tika? (e) Eaa ta te au tavini o te Atua e akakoro ra kia rave mou ua atu rai?

¹⁵ “Kare oki aia e ngaueue e tuatau ua atu; ka manakoia te aronga tuatua-tika e tuatau ua atu. Kare aia e mataku i te rongo kino ra; kua mou tona ngakau i te irinaki anga ia Iehova. Kua akatinamouia tona ngakau kare e mataku, e kite  ua atu aia i te inga anga o tona au enemi.” (Sala. 112:6-8) Kare rava i kiteaia ana te maata o te nuti kino i roto i te tuatua enua i mua ana, tei kapiti mai i te au mea mei te tamaki, te tamataku, te au maki ou e te tupu akaou anga o te au maki taito, te apa i te ture, te ngere, e te reva taero e akatupu nei i te kino. Te takino nei teia nuti kino i te aronga ta te Atua e manako ra ei aronga tuatua tika, inara kare ratou e mataku ana i te ka tupu i te tuatau ki mua. Mari ra, “kua mou” to ratou ngakau e kua “akatinamouia” te reira ia ratou e akara ra ki te tuatau ki mua ma te irinaki, no te mea kua kite ratou e te vaitata ua mai nei te ao tuatua tika o te Atua. Me tupu ake te tumatetenga, ka rauka ua ia ratou i te akakoromaki i te reira turanga no te mea te irinaki ra ratou ki runga ia Iehova no tana turuturuanga. Kare rava aia e akatika i tona aronga tuatua tika kia “ngaueue”​—ka oronga aia i te tauturu e te maroiroi kia akakoromaki.​—Phili. 4:13.

¹⁶ Te anoano katoaia ra to te Atua aronga tuatua tika kia akakoromaki i te makitakita e te pikikaa e akatotoa aereia ra e te aronga patoi, inara kua puapinga kore teia i te akamuteki i te au Kerititiano mou e ka puapinga kore ua atu rai. Mari ra, kua vai ngaueue kore atu rai te au tavini o te Atua e te tinamou i roto i te angaanga ta Iehova i oronga kia ratou​—te tutu aere i te tuatua meitaki o te Patireia e te akariro anga i te aronga pouroa tei ariu mai ei pipi. Kare e ekoko e, ka maata atu rai te patoianga ta te aronga tuatua tika ka kite, i te openga e vaitata maira. Ka taeria te ririnuianga o taua tu makitakita ra i roto i tamakianga a te Tiaporo ko Satani i te ao katoa nei, i roto i tona turanga ei Goga e Magoga. Te openga iora i reira, ka ‘kite tatou i to tatou au enemi’ ia ratou e akapou takiriia ra. E tupuanga umeremere tikai kia kite te akatapu takiriia anga te ingoa o Iehova!​—Eze. 38:18, 22, 23.

‘Akateiteiia ma te Paapaa’

17. Ka akapeea ra te aronga tuatua tika me ‘akateiteiia ma te paapaa’?

¹⁷ Kare e aiteia te rekareka kia akapaapaa ia Iehova ma te rotai, ma te kore e patoianga mei te Tiaporo e tona ao! Pouroa te aronga tei tamou marie i to ratou turanga tuatua tika ki mua i te Atua ka akapaapaa ratou ia Iehova ma te rekareka e tuatau ua atu. Kare ratou e tupou ki raro ma te akama, no te mea te taputou katoa maira a Iehova e ko te “tara” o tona aronga tuatua tika ‘ka akateiteiia ma te paapaa.’ (Sala. 112:9) Ka pereperekavana to Iehova aronga tuatua tika ma te upokotu me kite ratou i te inga anga o te au enemi pouroa o to Iehova tikaanga ngateitei kia tutara.

18. Ka akapeea ra te au tuatua openga o Salamo 112 me akatupuia?

¹⁸ “Ka kite te tangata kino ma te aue, ka pakati aia i tona nio e ngaro atura: te irinaki anga o te aronga kino ra, ka pou ïa.” (Sala. 112:10) Pouroa te aronga tei patoi ua atu rai i te iti tangata o te Atua, kare roa atu ana ka ‘ngaro ua atu’ i roto i to ratou vareae e te makitakita. To ratou anoano kia kite i te openga o ta ratou angaanga, ka takoreia te reira e ratou katoa atu i roto i te “mate maata” e vaitata maira.​—Mata. 24:21.

19. Eaa te ka rauka ia tatou kia irinaki?

¹⁹ Ko koe ainei tetai o te aronga mataora te ka ora mai mei taua upokotuanga mekameka ra? Mei te mea e ka rokoia ake koe e te maki me kore ka ruaine koe i mua ake i te openga o to Satani ao, ko koe ainei tetai o “te aronga tuatua-tika” te ka akatuakaouia mai? (Anga. 24:15) Penei e ae te pauanga me tuku ua rai koe i te akarongo i roto i te atinga oko a Iesu e me aru ia Iehova, mei te aronga rai e akatutuia maira e te “tangata” tuatua tika i roto ia Salamo 112. (E tatau ia Ephesia 5:1, 2.) Ka akapapu meitaki a Iehova e kare te ‘manakoanga’ no taua aronga ra e akangaropoinaia, e kare katoa ta ratou angaanga tuatua tika e ngaropoina. Ka akamaara a Iehova ia ratou e ka aroa ua rai ia ratou e tuatau, e e mutu kore ua atu.​—Sala. 112:3, 6, 9.

[Tataanga Rikiriki i Raro]

Au Uianga Akamanako Anga

• Eaa tetai au tumu no tatou kia kapiki e “Alelu Ia”?

• Eaa te au angaanga o teia tuatau e akamataora ra i te au Kerititiano mou?

• Eaa te tu o te tangata oronga ta Iehova e inangaro maira?

[Au Uianga Apii]

[Tutu i te kapi 25]

E rauka ai te akono marie i te tu tuatua tika ki mua i te Atua, kia akaari tatou i te akarongo i roto i to Iesu toto akamaringiia

[Au Tutu i te kapi 26]

Te au apinga tei oronga puareinga uaia, ka tauturu te reira i te angaanga oronga tauturu, e te akatotoa anga i te au puka Pipiria