O le a Faavavau Ona Viia le Atua e Ē Amiotonu
O le a Faavavau Ona Viia le Atua e Ē Amiotonu
“E manatua le tagata amiotonu . . . e tumau lana amiotonu e faavavau.”—SALA. 112:6, 9.
1. (a) O le ā le lumanaʻi fiafia ua saunia mai mo ē uma e amiotonu i le silafaga a le Atua? (e) O le ā le fesili ua lāgā?
MAʻEU se lumanaʻi matagofie ua saunia mai mo tagata uma lava e amiotonu i le silafaga a le Atua! O le a faavavau ona latou fiafia e aʻoaʻoina atili e faatatau i uiga matagofie o Ieova. O le a faatumulia o latou loto i le olioli a o latou aʻoaʻoina atili e faatatau i galuega o le foafoaga a le Atua. O se tasi o mea autū e manaʻomia ina ia tofo ai i lenā lumanaʻi matagofie, o le “amiotonu,” lea e faamamafa mai i le Salamo e 112. Ae faapefea iā Ieova, o le Atua paia ma amiotonu, ona silasila i tagata agasala o ni ē amiotonu? E tusa po o le ā lo tatou taumafai malosi e fai le mea saʻo, ae e tatou te faia lava mea sesē, ma o nisi taimi o ni sesē matuiā.—Roma 3:23; Iako. 3:2.
2. O ā vavega e lua na faia e Ieova ona o le alofa?
2 Ua saunia ma le alofa e Ieova se vaifofō e atoatoa ona lelei. E faapefea? Muamua, e ala i le faaliliuina faavavega o le soifua o lona Alo pele i le lagi, i le manava o se taupou, ma mafai ai ona ia fanau mai o se tagata lelei atoatoa. (Luka 1:30-35) Ma ina ua uma ona fasiotia Iesu e ona fili, sa toe faia e Ieova se isi vavega mataʻina. Sa toe faatūina e le Atua Iesu o se foafoaga agaga.—1 Pete. 3:18.
3. Aiseā na finagalo malie ai le Atua e tauia lona Alo i le ola i le lagi?
3 Na tauia e Ieova Iesu i se mea sa leʻi mauaina e lona Alo a o leʻi afio mai i le lalolagi—o le ola e lē mafai ona oti i le lagi. (Epe. 7:15-17, 28) Sa finagalo malie Ieova e faia faapea ona na tumau ma le faamaoni Iesu i tofotofoga e sili ona faigatā. Ma na saunia ai e Iesu le tali sili ona lelei ma atoatoa mo lona Tamā, i le pepelo a Satani e faapea e māfua ona auauna tagata i le Atua, ona o uunaʻiga manatu faapito ae e lē ona o le alofa e lē maluelue.—Faata. 27:11.
4. (a) O le ā na faia e Iesu mo i tatou ina ua toe afio i le lagi, ma na faapefea ona tali mai i ai Ieova? (e) O le ā sou lagona e faatatau i mea ua faia e Ieova ma Iesu mo oe?
4 Sa iai nisi mea na faia e Iesu i le lagi. Sa ‘tulaʻi o ia i luma o le Atua mo i tatou’ faatasi ai ma le tau tāua o “lona lava toto.” Sa talia fiafia e lo tatou Tamā o i le lagi le taulaga tāua a Iesu, e avea ma “taulaga o le leleiga ma le Atua mo a tatou agasala.” O lea la, ua mafai ona tatou tuuina atu “le auaunaga paia i le Atua soifua” ma se ‘lotofuatiaifo mamā.’ O le māfuaaga lea e tatou te ioe ai i upu amata o le Salamo e 112 e faapea, “Ia outou vivii atu iā Ioa.”—Epe. 9:12-14, 24; 1 Ioa. 2:2.
5. (a) O le ā e ao ona tatou fai ina ia tausisia ai se tulaga amiotonu ma le Atua? (e) Ua faapefea ona faatulaga le Salamo e 111 ma le Salamo e 112?
5 Ina ia tausisia se tulaga amiotonu ma le Atua, e ao ona tatou faatuatua i le toto maligi o Iesu. E tatau ona tatou faafetaia Ieova i aso uma ona o lona alofa tele mai mo i tatou. (Ioa. 3:16) E manaʻomia foʻi ona faaauau ona tatou suʻesuʻeina le Afioga a le Atua, ma fai le mea tatou te mafaia ina ia ola ai e tusa ma le feʻau ua taʻu mai i le Tusi Paia. O loo iai i le Salamo e 112 fautuaga aogā mo i latou uma e mananaʻo e faatumauina se loto fuatiaifo mamā i luma o le Atua. E fesootaʻi lenei salamo ma le Salamo e 111. O loo amata uma nei salamo e lua i le alaga “Ia outou vivii atu iā Ioa” po o le “Aleluia,” ona mulimuli mai ai lea o laina e 22, ma o laina taʻitasi o loo amata i se mataʻitusi o mataʻitusi e 22 o le pi faitau i le uluaʻi gagana Eperu. *
Le Faavae mo le Mauaina o le Fiafia
6. E faapefea ona manuia le “tagata” e mataʻu i le Atua lea e taʻua i le Salamo e 112?
6 “Amuia le tagata o lē mataʻu iā Ieova, o loo o fiafia tele i ana poloaʻiga. E malolosi lana fanau i le nuu; e manuia le tupulaga o ē amiotonu.” (Sala. 112:1, 2) Seʻi mātau foʻi, o loo muamua ona taʻua e le faisalamo le “tagata” e toʻatasi, ona sui lea i le numera tele o “ē amiotonu” i le vaega mulimuli o le fuaiupu e 2. O lona uiga la e mafai ona faasino atu le Salamo e 112 i se aofaʻiga toʻatele o tagata ua faia aʻe i ni tagata taʻitoʻatasi se toʻatele. Ae o le mea e mataʻina ai, sa faagaeeina le aposetolo o Paulo e faatatauina le Salamo 112:9 e fesootaʻi atu ma Kerisiano i le uluaʻi senituri. (Faitau le 2 Korinito 9:8, 9.) Ua talafeagai ai ona faaāta mai e lenei salamo le auala e maua ai e soo o Keriso i le lalolagi i aso nei le fiafia.
7. Aiseā e manaʻomia ai i auauna a le Atua ona iai se mataʻu tatau iā te ia, ma o le ā sou lagona e tatau ona iai i poloaʻiga a le Atua?
7 E pei ona faaalia mai i le Salamo 112:1, e maua e nei Kerisiano moni le fiafiaga sili pe a latou savavali ma le “mataʻu iā Ieova.” O lenei mataʻu tatau ina ia aua neʻi faia se mea e lē fiafia ai Ieova, ua fesoasoani iā i latou ina ia teena ai le agaga o le lalolagi a Satani. E latou te “fiafia tele” e suʻesuʻe le Afioga a le Atua ma usiusitai i ana poloaʻiga. E aofia ai le faatonuga ia talaʻi le tala lelei o le Malo i le lalolagi aoao. E latou te taumafai e ō atu e fai tagata o nuu uma lava ma soo, a o lapataʻia tagata amioleaga i le oo mai o le aso o le faamasinoga a le Atua.—Eseki. 3:17, 18; Mata. 28:19, 20.
8. (a) Ua faapefea ona tauia le maelega o tagata faamaoni o le Atua i aso nei? (e) O ā faamanuiaga i le lumanaʻi o le a maua e i latou o ē faamoemoe i le lalolagi?
8 Ona o le usitaia o na poloaʻiga, ua oo atu ai le faitau aofaʻi o auauna a le Atua i le lalolagi i aso nei, i le tusa o le fitu miliona. O ai e na te faafitia le mea moni e faapea ua avea ona tagata ma ‘ē malolosi i le nuu’? (Ioa. 10:16; Faaa. 7:9, 14) E mautinoa o le a latou “manuia” pe a faataunuu e le Atua ana fuafuaga. O le a faasaoina i le taimi o le “puapuaga tele,” se vaega o tagata o ē faamoemoe i le lalolagi, ina ia faia aʻe ai “le lalolagi fou” lea “e mau ai le amiotonu.” Mulimuli ane, o le a “manuia” atili i latou e faasaoina mai iā Amaketo. O le a latou iai i inā e faafeiloaʻi le faitau miliona o i latou e toetutū mai. Maʻeu se faamoemoe e faafiafiaina ai! Mulimuli ane, o i latou e “fiafia tele” i poloaʻiga a le Atua, o le a oo i le lelei atoatoa faaletagata ma olioli ai e faavavau i “le saʻolotoga mamalu o le fanau a le Atua.”—2 Pete. 3:13; Roma 8:21.
Faaaogā Tatau le Tamaoaiga
9, 10. Ua faapefea ona faaaogā e Kerisiano moni lo latou tamaoaiga faaleagaga, ma o le a faapefea ona tumau e faavavau la latou amiotonu?
9 “E i lona fale le oloa ma mea e tele; e tumau foʻi lana amiotonu e faavavau. E alu aʻe le malamalama i le pōuliuli mo ē ua amiotonu; o ia o le alofa fua, ma lē alofa mutimuti vale, ma lē amiotonu.” (Sala. 112:3, 4) I taimi o le Tusi Paia, sa lauiloa nisi o auauna a le Atua i lo latou tamaoaiga faaletino. Ae i le isi itu, e avea moni lava i latou e finagalo malie i ai le Atua, o ni ē tamaoaiga, e tusa lava pe lē tamaoaiga i le itu faaletino. O le mea moni, i le tulaga saʻo lava ia atonu e matitiva i latou ua filifili e faamaulalo i luma o le Atua, ma e manatu faatauvaa i ai tagata, e pei lava ona iai i aso o Iesu. (Luka 4:18; 7:22; Ioa. 7:49) Peitaʻi, e tusa pe itiiti pe tele ni meafaitino a se tasi, ae e mafai lava ona tamaoaiga i le itu faaleagaga.—Mata. 6:20; 1 Timo. 6:18, 19; faitau le Iakopo 2:5.
10 E lē o taofiofi mamau e Kerisiano faauuina ma a latou aumea lo latou tamaoaiga faaleagaga iā i latou lava. Nai lo lea, ua “alu aʻe” lo latou tamaoaiga faaleagaga i le lalolagi pōuliuli a Satani, e fai ma “malamalama . . . mo ē ua amiotonu.” Ua latou faia faapea e ala i le fesoasoani atu i isi ina ia latou maua aogā mai i ʻoa faaleagaga o le poto ma le malamalama o le Atua. O loo taumafai tagata tetee e taofi le galuega talaʻi o le Malo, peitaʻi e lē o taulau. Nai lo lea, o le a ‘tumau e faavavau’ le fua o lenei galuega amiotonu. Ona o le tumau i se ala amiotonu, ua faamautinoa ai i auauna a le Atua le ‘tumau e faavavau.’
11, 12. O ā nisi o auala o loo faaaogā ai e tagata o le Atua a latou mea faitino?
11 O tagata o le Atua, e lē gata i le vasega o le pologa faauuina ae faapea foʻi ma i latou o loo faia aʻe ai le “motu o tagata e toʻatele,” ua faamaonia lo latou limafoaʻi i a latou meafaitino. Ua taʻua i le Salamo 112:9 e faapea: “Ua faasalalauina e ia ana mea, ua avatua e ia i ē matitiva.” E masani ona foaʻi e Kerisiano moni i aso nei ni meaalofa faaletino, i uso Kerisiano ma tuaoi o loo manaʻomia se fesoasoani. E latou te faaaogā foʻi a latou alāmanuia faaletino e lagolagoina ai galuega fesoasoani i taimi o mala. Ma e pei ona faaalia e Iesu, o le a avea lenā ma puna o le fiafia.—Faitau le Galuega 20:35; 2 Korinito 9:7.
12 E lē gata i lea, seʻi manatu i tupe o loo faaalu e lomia ai lenei mekasini i gagana e 172, ma o le tele lava o na gagana o gagana a tagata e matitiva. Ae ia aua neʻi galo o lea foʻi ua mafai ona maua lenei mekasini i gagana eseese e faaaogā ai taga, lea e faaaogā e tagata logonoa, faapea foʻi lomiga mo ē tauaso.
Alofa Fua ma Tonu
13. O ai na la faataatia le faaaʻoaʻoga sili o le foaʻi ma le alofa fua, ma e faapefea ona tatou faataʻitaʻi i le la faaaʻoaʻoga?
13 “E manuia le tagata ua alofa fua, ma tuuina atu ana mea i ē nonō mai.” (Sala. 112:5) Atonu ua e mātauina e lē o taimi uma e alofa fua ai i latou o ē fesoasoani atu i isi. O nisi e foaʻi atu ona o se agaga fia faaalialia vale. E tatou te lē fiafia pe a maua se fesoasoani mai se tasi e manatu faapea o oe e maulalo pe faapea foʻi ua fai oe ma faasoesa po o se avega mamafa. Ae i sona faaeseesega, e maʻeu le faafouina pe a maua se fesoasoani mai se tasi e alofa fua. O Ieova o ia o le faaaʻoaʻoga silisili o le alofa fua ma Lē e foaʻi ma le fiafia. (1 Timo. 1:11; Iako. 1:5, 17) Sa atoatoa ona faaatagia mai e Iesu Keriso le faaaʻoaʻoga a lona Tamā o le alofa fua. (Mare. 1:40-42) O lea la, ina ia amiotonu i le silafaga a le Atua, ia tatou foaʻi atu ma le lotofiafia ma le alofa fua, aemaise lava i le talaʻiga pe a ofo atu fesoasoani faaleagaga i o tatou tuaoi.
14. O ā nisi o auala e mafai ona tatou ‘tausia ai a tatou mea ma le faautauta tonu’?
14 “Na te tausia ana mea ma le faautauta tonu.” (Sala. 112:5) E pei ona valoia mai, e tausia e le vasega o le auauna pule e faamaoni ia mea a le Matai e tusa ai ma le faamasinotonu o Ieova. (Faitau le Luka 12:42-44.) O loo atagia mai lenei tulaga i taʻiala faale-Tusi Paia ua tuuina mai i toeaina, lea e latou te taulimaina i nisi taimi mataupu o agasala matuiā i le faapotopotoga. Ua faamaonia foʻi le tonu o le auala e feagai ai ma ia tulaga, i taʻiala faale-Tusi Paia ua saunia e le vasega o le pologa i le auala e tatau ona faagaoioia uma ai faapotopotoga, fale o misionare, ma aiga Peteli. E lē gata e manaʻomia ona faamasinotonu toeaina, ae e tatau foʻi i isi Kerisiano ona faamasinotonu i a latou feutagaʻiga o le tasi i le isi, faapea ma tagata lē talitonu, e aofia ai ma mataupu faapisinisi.—Faitau le Mika 6:8, 11.
Faamanuiaga mo Ē Amiotonu
15, 16. (a) O le ā le aafiaga o tala leaga po o tala vale a le lalolagi i ē amiotonu? (e) O ā mea ua maumauaʻi pea auauna a le Atua e fai?
15 “E moni, e lē faagaeetia o ia e faavavau; e manatua le tagata amiotonu e faavavau. E lē mataʻu o ia i le tala leaga; ua mau lona loto, o loo faalagolago iā Ieova. Ua mausalī lona loto, e lē fefe lava ia, seʻia iloa atu e ia le taui o ē ita iā te ia.” (Sala. 112:6-8) E leʻi iai se taimi muamua i le talafaasolopito ua faalogoina ai le tele o tala leaga po o tala vale, e aofia ai mea e pei o taua, faiga faatupu faalavelave, o faamaʻi fou ma faamaʻi sa iai muamua a ua toe oo mai, o soligatulafono, mativa, ma le polusione ua faaleagaina ai mea. E lē mafai e i latou e amiotonu i le silafaga a le Atua ona sao mai i aafiaga o nei tala vale, ae e latou te lē popole ai pe fefefe i le lumanaʻi. Nai lo lea, ua “mau” o latou loto ma “mausalī” a o latou faatalitali atu ma le mautinoa i le lumanaʻi, i le iloaina lea ua lata mai le lalolagi fou amiotonu a le Atua. Pe afai ae tutupu mala, e sili atu ona latou gafatia lenā tulaga ona e latou te faamoemoe i le fesoasoani a Ieova. E na te lē tuua ona tagata amiotonu ia “faagaeetia,” ae e na te aumai le fesoasoani ma le malosi ina ia tumau ai.—Fili. 4:13.
16 E ao foʻi i tagata amiotonu o le Atua ona onosaia faamatalaga e fai mai ona o le feita, ma pepelo o loo faasalalau e tagata tetee, peitaʻi e lē o taofia ai Kerisiano ma o le a lē taofia ai lava i latou mai le talaʻi atu pea. Nai lo lea, ua faaauau pea ona tutumau ma lē faagaeetia auauna a le Atua i le galuega ua tuuina mai e Ieova iā i latou—ia talaʻi le tala lelei o le Malo ma fai ma soo i latou uma e tali mai. E mautinoa o le a faateteleina omiga e oo i ē amiotonu a o lata tele mai le iʻuga. O le a oo atu le tumutumuga o na faiga ʻinoʻino i le osofaʻiga a Satani le Tiapolo i le lalolagi aoao, i le avea ai o ia ma Koku o Makoku. Mulimuli ane o le a tatou ‘iloa atu ē ita mai iā i tatou,’ a o faatoʻilaloina i se tulaga faalumaina. E maʻeu se mea o le a oo i ai, i le vaaia lea ua faapaiaina atoatoa le suafa o Ieova.—Eseki. 38:18, 22, 23.
‘Faamaualugaina ma Mamalu’
17. O le a faapefea ona ‘faamaualugaina ma le mamalu’ ē amiotonu?
17 Maʻeu le fiafia o le a i ai i le autasi i le viiaina o Ieova, e aunoa ma ni teteega mai le Tiapolo ma lana lalolagi! O i latou uma e tausisia se tulaga amiotonu ma le Atua, o le a faavavau ona latou viiaina ma le olioli Ieova. O le a lē toʻilalo i latou i le taʻuvaleaina ma le faalumaina, auā ua folafola mai foʻi e Ieova e faapea, o le a ‘faamaualugaina ma le mamalu’ le “nifo” o ona tagata amiotonu. (Sala. 112:9) O le a alalaga fiafia tagata amiotonu o Ieova i le manumalo, a o vāai atu i le faatoʻilaloina o fili uma o le pule silisili ese a Ieova.
18. O le a faapefea ona faataunuuina upu faaiʻu a le Salamo e 112?
18 “E iloa atu ai e le tagata amio leaga, ona ita ai lea o ia; e lilivau ona nifo, e liu suāvai lava ia; e faaumatia le manaʻo o ē amio leaga.” (Sala. 112:10) O i latou uma e faaauau ona tetee i tagata o le Atua, o le a lē o toe umi ona “liu suāvai” lea i lo latou matauʻa ma le ita. Pe a oo mai le “puapuaga tele,” o le a faaumatia i latou ma mavae atu ai ma lo latou manaʻo ia faaiʻuina la tatou galuega.—Mata. 24:21.
19. O le ā le mautinoa e mafai ona iā i tatou?
19 Po o le a e iai faatasi ma ē fiafia o le a faasaoina mai i lenā manumalo uigaese? Ia pe afai foʻi e te maliu a o leʻi oo mai le iʻuga o le lalolagi a Satani, ona o maʻi ma le tulaga matua, po o le a e iai ea faatasi ma “tagata amiotonu” o le a toetutū mai? (Galu. 24:15) E mafai ona e tali mai ioe pe afai e faaauau pea ona e faatuatua i le taulaga togiola a Iesu ma faaaʻoaʻo iā Ieova, e pei ona faia e i latou ua faaāta mai e le “tagata” amiotonu lea e faamatalaina i le Salamo e 112. (Faitau le Efeso 5:1, 2.) O le a faamautinoa e Ieova e “manatua” pea na tagata amiotonu, ma o le a lē faagaloina foʻi a latou gaoioiga amiotonu. O le a manatua ma alofagia e Ieova i latou e faavavau faavavau lava.—Sala. 112:3, 6, 9.
[Faaopoopoga i lalo]
^ pala. 5 E faamaonia le tutusa o nei salamo i o la faatulagaga ma mea o loo tusia ai. Ua faataʻitaʻia mai e le “tagata” e mataʻu i le Atua lea e taʻua i le Salamo e 112, uiga o le Atua lea na matuā viiviia mai i le Salamo e 111, e pei ona faamaonia e ala i le faatusatusa o le Salamo 111:3, 4 ma le Salamo 112:3, 4.
Fesili e Manatunatu Loloto i Ai
• O ā nisi māfuaaga e ao ai ona tatou alalaga atu “Aleluia”?
• O ā faatelega i aso nei ua matuā faafiafiaina ai Kerisiano moni?
• O le ā le ituaiga tagata foaʻi e fiafia i ai le Atua?
[Fesili mo le Suʻesuʻega]
[Ata i le itulau 25]
Ina ia tausisia se tulaga amiotonu ma le Atua, e ao ona tatou faatuatua i le toto maligi o Iesu
[Ata i le itulau 26]
O meaalofa ua foaʻiina ma le lotomalie ua fesoasoani i galuega laveaʻi, ma le faalauiloaina atu o lomiga faale-Tusi Paia