Den regtfardikiwan sa prèise Gado fu têgo

„Dem sa membre dem regtvaardiki soema foe teego . . . Hem gerechtigheid [noso regtfardikifasi] tan foe teego.”​—PS. 112:6, 9.

1. (a) Sortu tumusi moi ten e wakti ala den wan di Gado e si leki regtfardikisma? (b) Sortu aksi e opo kon?

A NO de fu taki dati wan trutru moi ten e wakti den wan di Gado e si leki regtfardikisma! Fu ala ten den sma disi sa abi a prisiri fu leri sabi den tumusi moi fasi fu Yehovah moro bun. Den ati sa furu nanga warderi te den sa kon frustan den wroko fu Gado moro nanga moro. A moro prenspari sani di libisma musu abi fu man libi na ini a tumusi moi ten dati, na ’regtfardikifasi’, èn Psalm 112 e poti prakseri na a tori dati. Ma fa a kan taki a santa èn regtfardiki Gado, Yehovah, e si sondu libisma leki regtfardikisma? Awansi fa wi e pruberi fu du san reti, toku wi e meki fowtu, èn son leisi wi e meki seryusu fowtu.​—Rom. 3:23; Yak. 3:2.

2. San na den tu wondru di Yehovah du fu di a lobi libisma?

² Fu di Yehovah lobi libisma, meki a sorgu taki wan fasi de fa a kan si den leki regtfardikisma. Fa a du dati? A fosi sani di a du, na taki a poti a libi fu en hemel Manpikin di a lobi so te, na ini a muru fu wan nyunwenke. A sani disi ben de wan wondru. Na so a manpikin disi ben kan gebore leki wan libisma di no abi sondu  (Luk. 1:30-35). Baka dati, di den feanti fu Yesus kiri en, dan Yehovah du ete wan tumusi moi wondru. Gado gi Yesus wan opobaka leki wan yeye di abi bigi glori.​—1 Petr. 3:18.

3. Fu san ede Gado ben prisiri fu blesi en Manpikin nanga libi na hemel?

³ Yehovah blesi en Manpikin Yesus nanga wan sani di a no ben abi fosi a tron wan libisma. A gi Yesus a grani fu libi na hemel leki wan yeye di no man dede noiti moro (Hebr. 7:15-17, 28). Yehovah ben prisiri fu du dati, fu di Yesus ben tan gi yesi na en, aladi a ben e kisi bun hebi tesi. Na so Yesus ben gi Yehovah a moro bun okasi fu sori taki a sani di Satan ben taki, no tru. Satan ben taki dati libisma no e dini Gado fu di den lobi en nanga den heri ati, ma na fu di den e suku wini gi densrefi.​—Odo 27:11.

4. (a) San Yesus du gi wi di a drai go baka na hemel, èn san Yehovah du? (b) Fa yu feni den sani di Yesus nanga Yehovah du gi yu?

⁴ Ma Yesus du moro sani di a go na hemel. A „go na fesi Gado gi a bun fu wi” èn a gi en a waarde fu „en eigi brudu”. Na wan switi fasi, wi lobi-ati Tata teki a tumusi warti presenti fu Yesus, leki „wan ofrandi di e tapu den sondu fu wi”. Dati meki wi kan du „santa diniwroko gi a libi Gado”, èn wi kan du dati nanga wan ’konsensi di kon krin’. A sani disi e gi wi bun reide fu agri nanga den wortu na a bigin fu Psalm 112, pe skrifi „Prijse MASRA [Yehovah]”!​—Hebr. 9:12-14, 24; 1 Yoh. 2:2.

5. (a) San wi musu du efu wi wani taki Gado e tan si wi leki regtfardikisma? (b) Fa Psalm 111 nanga 112 e kruderi nanga makandra? (Luku a futuwortu.)

⁵ Efu wi wani taki Gado tan si wi leki regtfardikisma, dan wi musu tan sori bribi na ini a brudu fu Yesus. Nowan enkri dei musu pasa sondro taki wi e taigi Yehovah tangi fu di a lobi wi so te (Yoh. 3:16). Boiti dati, wi musu tan studeri Gado Wortu, èn wi musu meki ala muiti fu du san wi e leri na ini a Wortu disi. Psalm 112 abi bun rai gi ala sma di wani tan abi wan krin konsensi na fesi Gado. A psalm disi e kruderi nanga Psalm 111. Ala den tu psalm disi e bigin nanga den wortu „Prijse MASRA!”, noso „Haleluya!” *

Wi abi reide fu de koloku

6. Sortu blesi a „man” di abi frede gi Gado e kisi, soleki fa Psalm 112 e sori?

⁶ „Blesi foe da man disi de frede MASRA [Yehovah], disi abi foeroe prisiri na ini Hem komanderi. Hem siri sa abi makti na tapoe grontapoe; da speri foe dem opregti soema sa kisi blesi” (Ps. 112:1, 2). Luku taki a psalm skrifiman e taki fosi fu wan „man”, èn baka dati, a e taki fu „opregti soema” na a lasti pisi fu vers 2. A sani disi e sori taki Psalm 112 kan abi fu du nanga wan bigi grupu sma. A moi fu sabi taki a santa yeye ben meki na apostel Paulus sori taki Psalm 112:9 abi fu du nanga den Kresten na ini a fosi yarihondro. (Leisi 2 Korentesma 9:8, 9.) A psalm disi e sori heri bun fa den bakaman fu Krestes na grontapu kan de koloku na ini a ten disi!

7. Fu san ede den futuboi fu Gado musu abi a yoisti frede gi en? Fa yu musu si den komando fu Gado?

⁷ Soleki fa Psalm 112 e sori, dan den tru  Kresten disi de koloku trutru aladi den e „frede MASRA [Yehovah]”. Fu di den abi a yoisti frede disi fu no du wan sani di Gado no feni bun, meki den man kakafutu gi a yeye fu a grontapu fu Satan. Den „abi furu prisiri” fu di den e studeri Gado Wortu èn fu di den e gi yesi na den komando fu en. Wan fu den komando dati na a wan di den kisi fu preiki a bun nyunsu fu Gado Kownukondre na heri grontapu. Den e pruberi fu meki disipel fu sma fu ala kondre, aladi den e warskow ogrisma taki a krutudei fu Gado de krosibei.​—Esek. 3:17, 18; Mat. 28:19, 20.

8. (a)  Fa Gado blesi a pipel fu en di e anbegi en fayafaya na ini a ten disi? (b) Sortu tra blesi e wakti den wan di abi a howpu fu libi na grontapu?

⁸ Na ini a ten disi, den futuboi fu Gado na grontapu e gi yesi na den komando dati. Dati meki a nomru fu den doro sowan seibi milyun. Wi alamala musu agri taki a pipel fu Gado kon „abi makti na tapu grontapu”, a no so? (Yoh. 10:16; Openb. 7:9, 14) Èn den sa kisi bigi „blesi” tu te Gado sa du san a abi na prakseri! A grupu fu den wan di abi a howpu fu libi na grontapu, sa pasa a „bigi banawtu” libilibi, èn den sa tron „wan nyun grontapu” pe „regtfardikifasi sa de”. Baka wan pisi ten, den sma di pasa Armagedon libilibi, sa ’kisi moro blesi’ srefi. Den sa de srekasreka fu gi wan switikon na milyunmilyun sma di o kisi wan opobaka. Dati na wan tumusi moi howpu di den sma disi abi! Te fu kaba, den sma di „abi furu prisiri” na ini den komando fu Gado, sa tron sma di no abi sondu. Boiti dati, den o „tron pikin fu Gado èn den o kisi kefalek bigi fri” fu têgo.​—2 Petr. 3:13; Rom. 8:21.

Den e gebroiki den gudu fu den na wan koni fasi

9, 10. Fa tru Kresten gebroiki a koni nanga a sabi di den abi, èn fa a regtfardikifasi fu den sa tan fu têgo?

⁹ „Foeroe goedoe sa de na ini hem oso; en Hem gerechtigheid [noso regtfardikifasi] de tan foe teego. Da leti opo na ini da doengroe gi dem opregti soema; A de foeroe nanga gnade nanga sari-hati, en A de regtvaardiki” (Ps. 112:3, 4). Soleki fa Bijbel e sori, dan sonwan fu den futuboi fu Gado  ben de gudusma. Èn te yu e luku en bun, dan den wan di Gado feni bun e tron gudusma trutru, awansi den no sa abi furu moni. Fu taki en leti, nofo tron den wan di e saka densrefi na Gado ondro, na sma di pôti èn di trawan e wisiwasi, soleki fa a ben de na ini a ten fu Yesus (Luk. 4:18; 7:22; Yoh. 7:49). Ma awansi wan sma gudu noso pôti, toku a kan de wan gudusma na yeye fasi, fu di a abi koni nanga sabi fu Gado.​—Mat. 6:20; 1 Tim. 6:18, 19; leisi Yakobus 2:5.

¹⁰ Salfu Kresten nanga den tra Kresten brada nanga sisa fu den, no e hori a koni nanga a sabi di den abi fu Gado, gi densrefi. Na presi fu dati, den de leki ’leti di opo gi den opregtisma’ di de na ini a dungru grontapu fu Satan. Den e yepi trawan fu kisi wini fu a warti koni nanga a sabi di den abi fu Gado. Na so den e skèin a leti fu den. Gensman pruberi fu tapu a preikiwroko, ma den no abi bun bakapisi. Na presi fu dati, den bakapisi fu a regtfardiki wroko disi sa „tan foe teego”. Te den futuboi fu Gado e tan regtfardiki, aladi den e kisi tesi, dan den kan abi a dyaranti fu „tan foe teego”,fu di den sa kisi têgo libi.

11, 12. San na wan tu fasi fa a pipel fu Gado e gebroiki den gudu fu den?

¹¹ A pipel fu Gado, namku a salfu grupu nanga den wan di de fu a „bigi ipi”, sori taki den de klariklari fu prati den gudu fu den nanga trawan. Psalm 112:9 e taki: „A ben panja [sani], a ben gi na dem potiwan.” Tru Kresten na ini a ten disi, nofo tron e gi moni nanga tra sani na den Kresten brada nanga sisa fu den, èn den e gi den sani disi sosrefi na den birtisma fu den di abi yepi fanowdu. Den e gebroiki den gudu fu den tu, fu yepi sma di de na nowtu fu di rampu miti den. Soleki fa Yesus ben taki, sma sa de koloku tu te den e du den sortu sani disi.​—Leisi Tori fu den Apostel 20:35; 2 Korentesma 9:7.

¹² Prakseri sosrefi a moni di de fanowdu fu tyari a tijdschrift disi kon na doro na ini 172 tongo. Furu fu den tongo disi na tongo di moro furu pôtisma e taki. Èn prakseri tu taki a tijdschrift disi e kon na doro na ini difrenti sortu Dofusma-tongo, èn sosrefi na ini Braille, den letter di brenisma e leisi nanga den finga.

Den abi switifasi èn den e handri na wan reti fasi

13. Suma gi wi a moro bun eksempre fa fu gi trawan sani na wan switi fasi? Fa wi kan teki na eksempre fu den?

¹³ „Wan boen man sori boen gi trawan, en a leni [trawan]” (Ps. 112:5). A no de fu taki dati yu si taki sma di e yepi trawan no abi switifasi ala ten. Son sma di e gi trawan sani, e gi den sma disi a firi taki den bun moro den, èn den no e gi sani nanga den heri ati. A no switi fu kisi yepi fu den sortu sma dati. Ma a switi srefisrefi fu kisi yepi fu wan sma di abi switifasi. Yehovah na a moro bun eksempre fu wan Sma di abi switifasi èn di lobi fu gi trawan sani (1 Tim. 1:11; Yak. 1:5, 17). Yesus Krestes ben e sori switifasi soifri leki en Papa (Mark. 1:40-42). Sobun, efu wi wani taki Gado si wi leki regtfardikisma, dan wi musu prisiri fu gi trawan sani na wan switi fasi. Wi musu prisiri spesrutu fu du a preikiwroko, pe wi kan yepi den birtisma fu wi fu kon leri sabi Gado.

14. San na wan tu fu den fasi fa wi kan ’tiri wi wroko na wan reti fasi’?

¹⁴ „A de tiri hem wroko [na wan reti fasi]” (Ps. 112:5). Soleki fa Bijbel ben taki na fesi, a salfu-grupu, noso a getrow futuboi, e luku ala den sani di a Masra fu en abi, èn den e hori densrefi na den regtfardiki markitiki fu Yehovah. (Leisi Lukas 12:42-44.) Wi kan si dati te wi e luku a rai di Bijbel e gi owruman di ten na ten musu krutu afersi fu sma di du seryusu sondu na ini a gemeente. Wi kan si tu taki a srafu-grupu e handri na wan reti fasi, te wi e luku a Bijbel rai di den e gi fu sori fa sani musu waka na ini ala gemeente, na ini den zendeling-oso, èn na ini den Bethel-oso. A no owruman wawan musu handri na wan reti fasi, ma ala tra Kresten musu handri na wan reti fasi nanga makandra, èn nanga sma di no de na bribi. Den musu du dati tu na ini bisnis afersi.​—Leisi Mika 6:8, 11.

Den regtfardikiwan e kisi blesi

15, 16. (a) Sortu krakti a takru nyunsu fu grontapu abi tapu regtfardikisma? (b) San den futuboi fu Gado o tan du nanga wan fasti overtoigi?

¹⁵ „Foe troe, dem no sa bewegi hem [noso  meki a degedege] foe teego; dem sa membre dem regtvaardiki soema foe teego. A no sa frede foe ogri njoensoe; hem hati de faste; en a vertrouw na tapoe MASRA [Yehovah]. Hem hati tan faste; a no sa frede, te leki a si san a wani pasa nanga hem feanti” (Ps. 112:6-8). Noiti ete so furu takru nyunsu ben de fu yere. Doronomo wi e yere nyunsu fu orloku, fu ogri-ati sani di sma e du fu gens tirimakti, fu nyun siki nanga owru siki di e opo kon baka, fu ogridu, fu pôtifasi, èn fu a pori di sma e pori grontapu. Den wan di Gado e si leki regtfardikisma, no kan wai pasi gi den takru sani disi di e pasa. Ma toku den no e frede gi a ten di e kon. Na presi fu dati, na ati fu den „de faste”, èn a no e ’degedege’. Boiti dati, den abi na overtoigi taki a regtfardiki nyun grontapu fu Gado de krosibei. Efu trutru wan rampu e pasa, dan a sa moro makriki gi den sma disi fu horidoro, fu di den abi a frutrow taki Yehovah sa yepi den. Noiti a e gi pasi taki den regtfardiki futuboi fu en e ’degedege’, ma a e yepi den èn a e gi den a krakti fu horidoro.​—Fil. 4:13.

¹⁶ Den wan di Gado e si leki regtfardikiwan, e kisi fu du tu nanga gensman di abi bita-ati gi den, èn di e fruteri wan lo lei fu den. Ma den gensman disi no ben man tapu tru Kresten fu preiki a bun nyunsu, èn noiti den no o man du dati. Na presi fu dati, den futuboi fu Gado e tan du a wroko di Yehovah gi den, èn den e du dati nanga wan fasti overtoigi. Iya, den e tan preiki a bun nyunsu fu a Kownukondre, èn den e tan meki disipel na heri grontapu. A no de fu taki dati den regtfardikiwan sa kisi moro nanga moro gens aladi a kaba e kon krosibei. A bita-ati di sma abi gi den sa doro en heimarki te Satan Didibri, noso Gog fu Magog, e bigin du ogri nanga den futuboi fu Gado na heri grontapu. Èn te fu kaba, wi sa ’si fa den feanti fu wi’ e kisi pori dorodoro. A sa moi srefisrefi fu si fa a nen fu Yehovah e kon santa dorodoro!​—Esek. 38:18, 22, 23.

’Den sa gi en biginen’

17. Fa den regtfardikiwan sa kisi „bigi nem”?

¹⁷ A sa de wan prisiri trutru fu prèise Yehovah leki wán man, sondro taki wi e kisi gens fu Didibri nanga a grontapu fu en! Ala den wan di e sorgu taki Gado e tan si den leki regtfardikisma, sa ondrofeni a prisiri dati. Den no sa lasi a strei, fu di Yehovah e pramisi tu taki a sa ’opo a toetoe foe a regtvaardiki soema foe Hem nanga bigi nem’ (Ps. 112:9). A regtfardikiwan fu Yehovah sa bari fu prisiri te a e si taki ala den feanti fu Yehovah e kisi pori.

18. Fa den lasti wortu fu Psalm 112 sa kon tru?

¹⁸ „Da takroe soema sa si disi, en a sa sari; a sa kaw hem tifi, en a sa smelti gowe; dem sa figi a wani foe da takroe soema poeroe” (Ps. 112:10). Ala den wan di e tan gens a pipel fu Gado, sa „smelti gowe” heri esi, makandra nanga a dyarusu nanga a bita-ati fu den. Den sma disi di e angri fu si taki a wroko fu wi e tapu, sa kisi pori te a „bigi banawtu” kon.​—Mat. 24:21.

19. Sortu overtoigi wi kan abi?

¹⁹ Yu sa de wan fu den koloku sma di o de na libi te den feanti fu Gado sa kisi pori? Ma a kan taki yu dede leki bakapisi fu siki noso owrudei, fosi a kaba fu a grontapu fu Satan doro. Efu dati pasa, dan yu sa de wan fu „den regtfardikiwan” di sa kisi wan opobaka? (Tori. 24:15). We, yu kan de wan fu den sma disi efu yu e tan sori bribi na ini a frulusu-ofrandi fu Yesus, èn efu yu e teki na eksempre fu Yehovah, neleki a regtfardiki „soema” di kari na ini Psalm 112, èn di e prenki den regtfardiki futuboi fu Gado. (Leisi Efeisesma 5:1, 2). Yehovah ala ten sa „membre” den sortu sma disi, èn a no sa frigiti den regtfardiki sani di den du. Yehovah sa tan memre den èn a sa tan lobi den fu têgo.​—Ps. 112:3, 6, 9.

[Futuwortu]

Denki dipi fu den aksi disi

• Sortu reide wi abi fu bari „Haleluya”?

• Sortu sani di e pasa na ini a ten disi e meki taki tru Kresten de so koloku?

• Fa Yehovah wani taki wi musu gi sani?

[Aksi fu a tori disi]

[Prenki na tapu bladzijde 25]

Efu wi wani taki Gado e tan si wi leki regtfardikisma, dan wi musu sori bribi na ini a brudu fu Yesus

[Prenki na tapu bladzijde 26]

A moni di sma e gi nanga den heri-ati, kan yepi sma di de na nowtu, èn a e yepi tu fu meki Bijbel publikâsi