Baluleme Bayoomutembaula Leza Kukabe Kutamani
Baluleme Bayoomutembaula Leza Kukabe Kutamani
“Uululeme . . . unooyeeyegwa lyoonse . . . Bululami bwakwe buliimvwi nji cakutamana.”—INT. 112:6, 9.
1. (a) Ino mbulangizi nzi bubotu mbobajisi bantu boonse baluleme mumeso aa Leza? (b) Ino eeci cipa kubuzya mubuzyo nzi?
ELO KAKA bantu baluleme mumeso aa Leza bajisi bulangizi bubotu kapati! Bayookkomana kwiiya zyintu zinji kujatikizya bube bwa Jehova butaliboteli. Balamutembaula Leza ciindi nobaiya makani manji aajatikizya milimo yakwe yakulenga. Comwe cazyeelelo ziyandika kapati kutegwa tukabe abuumi butamani ‘mbululami,’ bwalo bukankaizyidwe ku Intembauzyo 112. Pele ino mbuti Jehova, Leza uusalala alimwi uululeme, mbwakonzya kubona bantu basizibi kuti baliluleme? Notusoleka buti kucita zyintu ziluzi, tulalubizya, zimwi ziindi tucita zibi zipati.—Rom. 3:23; Jak. 3:2.
2. Ino maleele nzi obile ngaakacita Jehova akaambo kaluyando ndwajisi?
2 Akaambo kaluyando, Jehova wakabikka bubambe bubotu kutegwa bantu basizibi babonwe kuti baliluleme. Munzila nzi? Cakusaanguna, wakucita maleele aakulonzya buumi bwa Mwanaakwe uuyandwa wakujulu akububikka mwida lyanakalindu kutegwa akazyalwe kali muntu uulondokede. (Lk. 1:30-35) Mpoonya, Jesu naakajaigwa abasinkondonyina, Jehova wakacita maleele aambi mapati. Leza wakamubusya Jesu kuzwa kubafwu akuzooba cilenge cilemekwa kapati.—1 Pet. 3:18.
3. Ino nkaambo nzi Leza ncaakakkomana kupa Mwanaakwe bulumbu bwabuumi bwakujulu?
3 Jehova wakapa Jesu bulumbu bwacintu cimwi ncaatakajisi Mwanaakwe ooyu katanaboola anyika—buumi bwakujulu butakonzyi kunyonyooka. (Heb. 7:15-17, 28) Jehova wakakkomana kucita boobu nkaambo Jesu wakazumanana kusyomeka mumasunko mapati. Kwiinda mukusyomeka, Jesu wakapa Bausyi bwiinguzi butaliboteli, bukkwene, kukubeja kwa Saatani kuti bantu babelekela Leza akaambo kakuliyanda kutali akaambo kakuyanda Leza.—Tus. 27:11.
4. (a) Naakapiluka kujulu, ino ncinzi Jesu ncaakatucitila, alimwi ino ncinzi ncaakacita Jehova? (b) Ino nywebo kumugama mulimvwa buti kujatikizya nzyaamucitila Jehova alimwi a Jesu?
4 Naakapiluka kujulu, Jesu wakacita zyintu zinji. ‘Wakapompa kubusyu bwa Leza akaambo kandiswe’ kajisi muulo “[wa]bulowa bwakwe mwini.” Taateesu wakujulu siluyando wakacitambula cipaizyo ca Jesu “[ca]mulungo wazibi zyesu.” Aboobo, katujisi ‘meezeezo aasalazyidwe’ naa manjezeezya aasalala, tulakonzya kumumanina “milimo Leza muumi.” Eeci citupa kaambo kakuzumina majwi mataanzi aali kubbuku lya Intembauzyo 112, aakuti: “Amutembaule Jehova.”—Heb. 9:12-14, 24; 1 Joh. 2:2.
5. (a) Ino ncinzi ncotweelede kucita kutegwa tuzumanane kululama mumeso aa Leza? (b) Ino Intembauzyo 111 alimwi a Intembauzyo 112 zibambidwe buti?
5 Kutegwa tuzumanane kululama mumeso aa Leza, tweelede kuzumanana kuba alusyomo mucipaizyo cabulowa bwa Jesu ibwakatilwa. Tweelede kumulumba Jehova lyoonse akaambo kakuti ulatuyanda kapati. (Joh. 3:16) Alimwi tweelede kuzumanana kwiiya Jwi lya Leza akusoleka kupona kweelana ancolyaamba. Intembauzyo 112 ijisi lulayo lubotu kapati kuli boonse ibayanda kuzumanana kuba amanjezeezya aasalala mumeso aa Leza. Intembauzyo eeyi ileendelana kapati a Intembauzyo 111. Zyoonse zitalika aamajwi aakukankamana aakuti: “Amutembaule Jehova!” naa “Aleluya!” mpoonya kutobela mizila iili 22 yalo kweelana amboilembedwe mumwaambo wakusaanguna wa Chihebrayo, aumwi muzila utobela bbala lyomwe lyamabala aali 22 mumusemu wamabala aa Chihebrayo. *
Mbolujanwa Lukkomano
6. Ino mbuti “muntu” uuyoowa Leza iwaambidwe ku Intembauzyo 112 mbwalelekedwe?
6 “Amutembaule Jehova. Uli acoolwe [naa ulikkomene] muntu uulemeka Jehova, uuyandisya milazyo yakwe. Lunyungu lwakwe lulaba anguzu ansi; izyalani lyabaluleme lilaba acoolwe” naa kulelekwa. (Int. 112:1, 2) Amubone kuti sintembauzyo usaanguna kwaamba “muntu” omwe kumugama, mpoonya waamba bantu banji “baluleme” kumamanino kwakapango 2. Eeci caamba kuti Intembauzyo 112 ilakonzya kwaamba kakamu kabantu kubagama. Kujatikizya kaambo aaka, mwaapostolo Paulo wakasololelwa amuuya kubelesya Intembauzyo 112:9 kwaamba Banakristo bamumwaanda wamyaka wakusaanguna. (Amubale 2 Ba-Korinto 9:8, 9.) Intembauzyo eeyi ilatondezya kabotu-kabotu mbobakonzya kukkomana basikutobela Kristo ibali anyika mazuba aano.
7. Ino nkaambo nzi babelesi ba Leza ncobeelede kumuyoowa, alimwi ino mbuti mbotweelede kulimvwa kujatikizya milawo yakwe?
7 Kweelana ambokutondezyedwe ku Intembauzyo 112:1, Banakristo bakasimpe aaba balaba alukkomano ciindi ‘nobalemeka’ naa kuyoowa Jehova. Kuyoowa kumubisizya ooku kubagwasya kukaka muuya wanyika ya Saatani. ‘Bayandisya’ kwiiya Jwi lya Leza akutobela milawo yakwe. Eeci cibikkilizya malailile aakukambauka makani mabotu aa Bwami munyika yoonse. Basoleka kugwasya bantu bamisyobo yoonse kuba basikwiiya akucenjezya basizibi kujatikizya buzuba bwa Leza bwalubeta ibuboola.—Ezk. 3:17, 18; Mt. 28:19, 20.
8. (a) Ino mbuti bantu ba Leza balyaabide mbobapegwa bulumbu akaambo kabusungu bwabo? (b) Ino nzileleko nzi nzyobalangila bantu ibayoopona anyika?
8 Akaambo kakutobela milawo iili boobo, babelesi ba Leza ibali anyika mazuba aano babalilwa kutuulunzuma tuli ciloba. Ino nguni uukonzya kukazya kuti bantu ba Leza baba “anguzu ansi” naa anyika? (Joh. 10:16; Ciy. 7:9, 14) Elo bayoolelekwa kapati kaka ciindi Leza aakuzuzikizya makanze aakwe! Kabali kakamu, bantu ibalangila kuyoopona anyika bayoofwutulwa “kumapenzi ayo mapati” kutegwa bapange “nyika impya” mwalo “[imuyook]kala bululami.” Mukuya kwaciindi, bantu ibayoofwutuka Amagedoni bayoolelekwa kapati. Bayoolibambila kutambula tuulunzuma twabantu bayoobusyigwa. Elo kaka eeci ncoolwe cipati! Bucebuce, aabo ‘bayandisya’ milawo ya Leza bayoolondoka akuyooba alukkomano lutamani “[mu]bulubulo bulemu bwabana ba-Leza.”—2 Pet. 3:13; Rom. 8:21.
Kubelesya Lubono Munzila Yabusongo
9, 10. Ino mbuti Banakristo bakasimpe mbobabelesya lubono lwabo lwakumuuya, alimwi ino mbuti bululami bwabo mbobuyakwiima nji lyoonse?
9 “Imbono abuvubi zili muŋanda yakwe; bululami bwakwe buliimvwi nji lyoonse. Baluleme balabukilwa mumuni mukati kamudima; Jehova ngusiluzyalo, ngusibuuya, uliluleme.” (Int. 112:3, 4) Mumazuba aansiku, babelesi ba Leza bamwi bakalizizilwe alubono ndobakajisi. Kulubazu lumwi, aabo mbakkomanina Leza balavwuba ncobeni nokuba kuti tabuli buvwubi bwakumubili. Masimpe ngakuti, bunji bwabantu ibalibombya kuli Leza inga kabali bacete alimwi balasampaulwa mbubonya mbocakabede kuciindi ca Jesu. (Lk. 4:18; 7:22; Joh. 7:49) Pele nokuba kuti muntu ujisi zyintu zyakumubili zinji naa zisyoonto, ulakonzya kuba muvwubi kumuuya.—Mt. 6:20; 1 Tim. 6:18, 19; amubale Jakobo 2:5.
10 Banakristo bananike aantoomwe abeenzinyina, tabaliyobwedi buyo buvwubi bwakumuuya mbobajisi. Muciindi caboobo, ‘balamunika mumudima’ wanyika ya Saatani kabali ‘mumuni kubaluleme.’ Balacita oobu kwiinda mukugwasya bantu kujana mpindu mulubono lwakumuuya lwalo luli mbusongo aluzyibo lwa Leza. Basikukazya basola kukasya kuti mulimo wakukambauka kaucitwa, pele baalilwa. Muciindi caboobo, micelo yamulimo ooyu wabululami ‘iyakwiima nji lyoonse.’ Kwiinda mukuzumanana kululama mumasunko, babelesi ba Leza balakonzya kuba alusyomo lwakuti bayoopona kukabe kutamani, ‘kwiima nji lyoonse.’
11, 12. Ino bantu ba Leza balubelesya buti lubono ndobajisi?
11 Bantu ba Leza boonse, bananike ibaciinga camuzike abaabo ‘ibankamu mpati,’ mbaabi kujatikizya zyintu zyakumubili. Intembauzyo 112:9 yaamba kuti: “Ulaaba, ulapa bacete.” Banakristo bakasimpe mazuba aano kanji-kanji balasanga zyintu zyakumubili ku Banakristonyina alimwi akuli basimukobonyina ibabulide. Alimwi babelesya lubono lwabo kutegwa bagwasyilizye nokwacitika ntenda. Mbubwenya mbuli mbwaakaamba Jesu, bwaabi buletela lukkomano.—Amubale Incito 20:35; 2 Ba-Korinto 9:7.
12 Kuyungizya waawo, amuyeeye buyo mali aabelesyegwa mukusimba magazini eeyi mumyaambo iili 172, iminji akati kamyaambo eeyi ikananwa aabantu bacete. Alimwi amuyeeye kuti magazini eeyi ilasimbwa amumyaambo yakutambaika minji alimwi amumabala aaboofwu.
Sibuuya Alimwi Mululami
13. Ino mbaani ibakatondezya cikozyanyo cibotu mumakani aakupa cabuuya, alimwi ino mbuti mbotukonzya kwiiya cikozyanyo cabo?
13 “Kuli kabotu kumuntu sibuuya uukolotesya.” (Int. 112:5) Ambweni mwakabona kuti bantu ibagwasya bamwi kanji-kanji tabali basibuuya. Bamwi balapa kutegwa babonwe kuti bajisi zyintu zinji kwiinda bamwi alimwi bamwi balatongooka bamana kupa. Tacikkomanisyi kugwasyigwa abantu bali boobu. Mukwiimpana, cilakatalusya kapati kugwasyigwa amuntu sibuuya. Jehova ncikozyanyo cibotu kapati casikupa cabuuya alimwi calukkomano. (1 Tim. 1:11; Jak. 1:5, 17) Jesu Kristo wakatondezya munzila iilondokede cikozyanyo ca Bausyi cakuba muntu sibuuya. (Mk. 1:40-42) Aboobo, kutegwa tube bantu baluleme mumeso aa Leza, tupa cakukondwa alimwi cabuuya, kwaambisya mumulimo wakukambauka notugwasya bantu kumuzyiba Jehova.
14. Ino muunzila nzi zimwi motukonzya ‘kubamba makani eesu cakululama’?
14 “Uubamba makani aakwe cakululama.” (Int. 112:5) Mbubwenya mbokwakasinsimwa, baciinga camubanzi uusyomekede balanganya zyintu zya Simalelo kweelana abululami bwa Jehova. (Amubale Luka 12:42-44.) Eeci cilalibonya mubusolozi bwamu Magwalo bupegwa kubaalu, balo zimwi ziindi ibalanganya twaambo tujatikizya zibi zipati mumbungano. Bululami mukucita zyintu bulalibonya kwiinda mubusolozi buzwa mu Bbaibbele baciinga camuzike mbobapa kujatikizya mbozyeelede kweendelezyegwa mbungano, maanda aabamisyinali alimwi amaanda aa Bbeteli. Bululami bulayandika kutali buyo kubaalu, pele aku Banakristo boonse kujatikizya zyintu zyoonse nzyobacitila bantunyina, kubikkilizya amumakani aamakwebo.—Amubale Mika 6:8, 11.
Zilongezyo Kubantu Baluleme
15, 16. (a) Ino makani mabi abajatikizya buti bantu baluleme? (b) Ino ncinzi ncobakanzide kuzumanana kucita bantu ba Leza?
15 “Nkaambo uululeme takooyoososololwa, unooyeeyegwa lyoonse. Tayoowi makani mabi pe; moyo wakwe uliimvwi nji, nkaambo ulasyoma Jehova. Moyo wakwe ulikede, takonzyi kuyoowa, mane lumwi akabone kuzundwa kwabasinkondonyina.” (Int. 112:6-8) Taakwe nokwakali makani mabyaabi boobu munyika, kubikkilizya nkondo, zigwebenga, malwazi mapya alimwi aaciindi alo aazumanana kupenzya bantu, milandu, bucete alimwi abusofwaazi bwalo bunyonyoona nyika. Aabo baluleme mumeso aa Leza abalo balacitikilwa zyintu zibi, pele kunyina nobaayoowa makani mabi aaya. Muciindi caboobo, myoyo yabo “[i]liimvwi nji” alimwi “[i]likede” naa kukkalikana kabajisi bulangizi bwakuti nyika mpya ya Leza yabululami ilaafwaafwi. Ikuti kwacitika ntenda, balacikonzya kuliyumya akaambo kakuti basyoma Jehova kuti uyoobagwasya. Takazumizyi kuti bantu baluleme ‘basosololwe’—ulabagwasya alimwi akubapa nguzu zyakuti baliyumye.—Flp. 4:13.
16 Bantu ba Leza baluleme balasulwa akubejelezyegwa abasikukazya, pele eeci tacikapi Banakristo kuleka kukambauka. Muciindi caboobo, babelesi ba Leza balazumanana kubeleka mulimo ngwabapede Jehova—kukambauka makani mabotu aa Bwami alimwi akugwasya bantu ibazumina kuba basikwiiya. Cakutadooneka, baluleme bayookazyigwa kapati imamanino naayabuswena aafwaafwi. Lusulo oolu luyookomena kapati ciindi Saatani Diabolosi nayoolwana nyika yoonse kali Gogo wa Magogo. Mpoonya, kumamanino, ‘tuyoobona basinkondoma’ kabanyonyoonwa. Elo kaka ciyookkomanisya kubona zyina lya Jehova kalisalazyigwa cakumaninina!—Ezk. 38:18, 22, 23.
“[Ba]lisumpukide Cabulemu”
17. Ino mbuti bantu baluleme ‘mbobayoosumpulwa cabulemu’?
17 Elo kaka cinookkomanisya ikutembaula Jehova calukamantano kakunyina kukazyigwa a Diabolosi alimwi abantu bakwe! Boonse ibayoozumanana kululama mumeso aa Leza bayoomutembaula Jehova cakukondwa lyoonse. Tabakooyoozundwa, nkaambo Jehova alimwi usyomezya kuti “lwija” lwabululami bwakwe “lulisumpukide cabulemu.” (Int. 112:9) Muntu wa Jehova uululeme uyoosumpulwa mukubona mbobayoozundwa boonse aabo ibakazya bweendelezi bwa Jehova.
18. Ino mbuti majwi aamamanino aa Intembauzyo 112 mbwaayoozuzikizyigwa?
18 “Sizibi ulabona, lino ulausa, ulaluma ntwino, pele ulamaninina ntama! Kusukama kwabasizibi kulanyonyooka.” (Int. 112:10) Boonse ibazumanana kukazya bantu ba Leza ‘bayoomaninina’ abukali bwabo. Kusukama naa makanze aabo aakuyanda kubona kuti mulimo wesu wamana ayoonyonyooka aantoomwe ambabo lyamapenzi mapati’ aaboola.—Mt. 24:21.
19. Ino ncinzi ncotukonzya kuba masimpe?
19 Sena muyooba akati kabantu bakkomene ibayoofwutuka mukuzunda ooku kupati? Naa ikuti akaambo kakuciswa nokuba kucembaala mwafwa mamanino aanyika ya Saatani kaatana kusika, sena muyooba akati ‘kabaluleme’ ibayoobusyigwa? (Inc. 24:15) Mulakonzya kwiingula kuti inzya ikuti naa mwazumanana kusyoma mucinunuzyo cacipaizyo ca Jesu alimwi akwiiya Jehova, mbuli mbobacita aabo ibaimininwa ‘amuntu’ uululeme iwaambwa ku Intembauzyo 112. (Amubale Ba-Efeso 5:1, 2.) Jehova uyooba masimpe kuti bantu bali boobu tabakalubwi pe, alimwi abululami bwabo tabukalubwi. Jehova unoobayeeya akubayanda lyoonse kukabe kutamani.—Int. 112:3, 6, 9.
Bupanduluzi buyungizidwe
^ munc. 5 Kaambo kakuti intembauzyo zyobile eezyi zileendelana kalalibonya mububambe bwazyo alimwi amumajwi ngozijisi. Bube bwa Leza ibukankaizyigwa mu Intembauzyo 111 bulatobelwa ‘amuntu’ uuyoowa Leza iwaambwa mu Intembauzyo 112, kweelana ambotubala twakozyanisya Intembauzyo 111:3, 4 a Intembauzyo 112:3, 4.
Mibuzyo Yakuzinzibala Kuyeeya
• Ino ntwaambo nzi tumwi tutupa kwaamba kuti “Aleluya”?
• Ino nzyintu nzi zicitika mazuba aano zyalo izipa Banakristo bakasimpe kukkomana?
• Ino Jehova uyanda sikupa uuli buti?
[Mibuzyo yaciiyo]
[Cifwanikiso icili apeeji 25]
Kutegwa tuzumanane kululama mumeso aa Leza, tweelede kuba alusyomo mucipaizyo cabulowa bwa Jesu ibwakatilwa
[Zifwanikiso izili apeeji 26]
Zyakusanga izipegwa cakuliyandila zilagwasyilizya mumulimo wakugwasya bantu bacitikilwa ntenda amukumwaya mabbuku aamba zyamu Bbaibbele