Lavo Lulama Va Ta Dzunisa Xikwembu Hilaha Ku Nga Heriki
Lavo Lulama Va Ta Dzunisa Xikwembu Hilaha Ku Nga Heriki
“Lowo lulama u ta tsundzukiwa . . . Ku lulama kakwe ku tshama hi masiku.”—PS. 112:6, 9.
1. (a) Hi byihi vumundzuku lebyi tsakisaka lebyi nga ta kumiwa hi vanhu hinkwavo lava Xikwembu xi va tekaka va ri lava lulameke? (b) Hi xihi xivutiso lexi tlakukaka?
WA NGA vona vumundzuku lebyi lebyinene lebyi nga ta kumiwa hi vanhu hinkwavo lava Xikwembu xi va tekaka va lulamile! Va ta tiphina hi ku dyondza swo tala malunghana ni timfanelo ta Yehovha hilaha ku nga heriki. Timbilu ta vona ti tala ku dzunisa loko va dyondza swo tala hi ta mintirho ya Xikwembu yo tumbuluxa. Nchumu lowu lavekaka leswaku munhu a kuma vumundzuku byolebyo lebyi vangamaka i “ku lulama” loku ku vulavuriwaka ha kona ngopfu eka Pisalema 112. Kambe, xana Yehovha Xikwembu lexi kwetsimaka xi tlhela xi lulama xi nga teka vanhu lava nga ni xidyoho va ri lava lulameke hi ndlela yihi? Ku nga khathariseki leswaku hi ringeta ku fikela kwihi ku endla leswi lulameke, minkarhi yin’wana hi endla swihoxo leswikulu.—Rhom. 3:23; Yak. 3:2.
2. Hi wahi masingita mambirhi lawa Yehovha a ma endleke hikwalaho ka rirhandzu?
2 Hi rirhandzu Yehovha u lunghiselele ndlela yo teka vanhu lava nga ni xidyoho va ri lava lulameke. Njhani? U rhange hi ku hundzisela vutomi bya N’wana wakwe la rhandzekaka wa le tilweni hi singita embelekweni wa wanhwana leswaku a ta tswariwa a ri munhu la hetisekeke. (Luka 1:30-35) Kutani endzhaku ka loko valala va Yesu va n’wi dlayile, Yehovha u endle singita rin’wana leri hlamarisaka. Xikwembu xi pfuxe Yesu a ri xivumbiwa xa moya lexi vangamaka.—1 Pet. 3:18.
3. Ha yini Xikwembu xi tsakele ku hakela N’wana wa xona hi vutomi bya le tilweni?
3 Yehovha u hakele Yesu hi nchumu lowu N’wana wa yena a nga ri na wona loko a nga si ta laha misaveni, ku nga vutomi lebyi nga lovisekiki etilweni. (Hev. 7:15-17, 28) Yehovha u swi tsakerile ku endla leswi hikuva Yesu u tshame a tshembekile hambiloko a ringiwa hi miringo leyikulu. Hikwalaho Yesu u nyike Tata wa yena nhlamulo leyinene ngopfu, leyi hetisekeke eka mavunwa ya Sathana ya leswaku vanhu va tirhela Xikwembu hi swikongomelo swa vutianakanyi ku nga ri hikwalaho ka rirhandzu leri tiyeke.—Swiv. 27:11.
4. (a) Loko Yesu a fika etilweni u hi endlele yini, naswona Yehovha u endle yini? (b) Xana u titwa njhani hi leswi Yehovha na Yesu va ku endleleke swona?
4 Loko Yesu a fika etilweni u endle leswi engetelekeke. U “humelel[e] emahlweni ka Xikwembu hi xiviri hikwalaho ka hina” a ri ni ntikelo wa “ngati yakwe.” Tata wa hina wa rirhandzu loyi a nga le tilweni u amukele gandzelo ra Yesu ra risima hi musa tanihi “gandzelo ra ku vuyelelana ra swidyoho swa hina.” Hikwalaho, hi nga endlela “Xikwembu lexi hanyaka ntirho wo kwetsima” hi ri ni ‘mapfalo lama baseke.’ Sweswo swi hi nyika xivangelo xo pfumelelana ni marito yo sungula ya Pisalema 112 lama nge, “Dzunisani Yah!”—Hev. 9:12-14, 24; 1 Yoh. 2:2.
5. (a) Hi fanele hi endla yini leswaku hi tshama hi ri lava amukelekaka emahlweni ka Xikwembu? (b) Xana Pisalema 111 na Pisalema 112 ti hleriwe njhani?
5 Leswaku hi tshama hi ri lava amukelekaka eka Xikwembu, hi fanele hi ya emahlweni hi kombisa ripfumelo eka ngati ya Yesu leyi halatiweke. Hi fanele hi nkhensa Yehovha masiku hinkwawo hileswi a hi rhandzaka swonghasi. (Yoh. 3:16) Hi fanele hi tlhela hi tikarhatela ku tshama hi ri karhi hi hlaya Rito ra Xikwembu ni ku endla hinkwaswo leswi hi nga swi kotaka leswaku hi hanya hi ku pfumelelana ni leswi hi swi hlayaka eka rona. Pisalema 112 yi ni xitsundzuxo lexinene eka hinkwavo lava lavaka ku tshama va ri ni ripfalo leri baseke emahlweni ka Xikwembu. Pisalema leyi yi fambisana na Pisalema 111. Hatimbirhi ka tona ti sungula hi swiga leswi nge “Dzunisani Yah!” kumbe “Aleluya!” naswona swi landzeriwa hi mintila ya 22, laha ntila ha wun’we wu sungulaka hi rin’wana ra maletere ya 22 ya maletere ya Xiheveru. *
Xisekelo Xa Ntsako
6. “Munhu” la chavaka Xikwembu loyi ku vulavuriweke ha yena eka Pisalema 112 u katekisiwa njhani?
6 “Wa tsaka munhu la chavaka Yehovha, la tsakisiwaka swinene hi swileriso swakwe. Vana vakwe va ta va ni matimba emisaveni. Loko ku ri xitukulwana xa lavo lulama, xi ta katekisiwa.” (Ps. 112:1, 2) Xiya leswaku mupisalema u rhanga a vulavula hi “munhu” un’we ivi a cinca a vulavula hi “lavo lulama” eka xiyenge xo hetelela xa ndzimana 2. Leswi swi ringanyeta leswaku Pisalema 112 yi nga vulavula hi ntlawa wa vanhu vo tala. Lexi tsakisaka, muapostola Pawulo u huhuteriwe ku tirhisa Pisalema 112:9 eka Vakreste va lembe-xidzana ro sungula. (Hlaya 2 Vakorinto 9:8, 9.) Hakunene pisalema leyi yi yi hlamusela kahle ndlela leyi valandzeri va Kreste va nga tsakaka ha yona emisaveni namuntlha!
7. Ha yini malandza ya Xikwembu ma fanele ma xi chava hi ndlela leyinene, naswona u fanele u titwa njhani hi swileriso swa Xikwembu?
7 Hilaha swi kombisiweke hakona eka Pisalema 112:1, Vakreste lava va ntiyiso va tsaka swinene loko va ri karhi va famba ‘hi ku chava Yehovha.’ Ku chava koloko lokunene ka ku nga lavi ku n’wi hlundzukisa ku va pfuna leswaku va lwisana ni moya wa misava ya Sathana. Va “tsakisiw[a] swinene” hi ku dyondza Rito ra Xikwembu ni hi ku yingisa swileriso swa xona. Swileriso sweswo swi katsa ni lexa ku chumayela mahungu lamanene ya Mfumo emisaveni hinkwayo. Va tikarhatela ku endla vanhu va matiko hinkwawo leswaku va va vadyondzisiwa va ri karhi va lemuxa lavo homboloka malunghana ni siku leri taka ra ku avanyisa ra Xikwembu.—Ezek. 3:17, 18; Mat. 28:19, 20.
8. (a) Vanhu va Xikwembu lava tinyiketeleke va hakeriwe njhani hikwalaho ka ku hiseka ka vona namuntlha? (b) Hi yihi mikateko leyi nga ta kumiwa hi lava nga ni ntshembo wa ku hanya emisaveni?
8 Malandza ya Xikwembu emisaveni namuntlha ma fika kwalomu ka timiliyoni ta nkombo hikwalaho ka leswi ma yingisaka swileriso sweswo. I mani la nga kanetaka leswaku vanhu va xona va ve ni “matimba emisaveni”? (Yoh. 10:16; Nhlav. 7:9, 14) Naswona va ta “katekisiwa” loko Xikwembu xi hetisisa xikongomelo xa xona! Lava nga ni ntshembo wo hanya laha misaveni va ta sirheleriwa tanihi ntlawa “enhlomulweni lowukulu” lowu nga ta va kona, kutani va vumba “misava leyintshwa” laha ku nga “ta va ni ku lulama.” Hi ku famba ka nkarhi, lava nga ta pona Armagedoni va “ta katekisiwa” hilaha ku engetelekeke. Va ta va va swi lunghekerile ku amukela vanhu va timiliyoni lava nga ta pfuxiwa eku feni. Ntshembo wolowo wa tsakisa hakunene! Eku heteleleni, lava “tsakisiwaka swinene” hi swileriso swa Xikwembu va ta va lava hetisekeke naswona va ta tiphina hi “ntshunxeko lowu vangamaka wa vana va Xikwembu” hilaha ku nga heriki.—2 Pet. 3:13; Rhom. 8:21.
Ku Tirhisa Rifuwo Hi Vutlhari
9, 10. Vakreste va ntiyiso va ri tirhise njhani rifuwo ra vona ro fanekisela, ku nga vutlhari ni vutivi bya vona bya Xikwembu, naswona ku lulama ka vona ku ta tshama hi masiku hi ndlela yihi?
9 “Swilo swa nkoka ni rifuwo swi le ndlwini yakwe; naswona ku lulama kakwe ku tshama hi masiku. U voninge emunyameni kukota loko ku vonakala ku voningela lavo lulama. U ni nsovo ni tintswalo ni ku lulama.” (Ps. 112:3, 4) Eminkarhini ya ku tsariwa ka Bibele, a swi tiveka leswaku malandza man’wana ya Xikwembu a ma fuwile. Lava amukelekaka eka Xikwembu hakunene va va lava fuweke hi ndlela yin’wana, hambiloko va nga ri na swilo leswi vonakaka. Ntiyiso wa mhaka hileswaku, vo tala va vanhu lava hlawulaka ku titsongahata emahlweni ka Xikwembu va nga ha va va ri swisiwana naswona va languteriwa ehansi, hilaha a swi ri hakona enkarhini wa Yesu. (Luka 4:18; 7:22; Yoh. 7:49) Kambe ku nga khathariseki leswaku munhu u ni swilo swo tala leswi vonakaka kumbe i xisiwana, a nga swi kota ku fuwa hi ndlela yo fanekisela hi ku va ni vutlhari ni vutivi bya Xikwembu.—Mat. 6:20; 1 Tim. 6:18, 19; hlaya Yakobo 2:5.
10 Vakreste lava totiweke swin’we ni vanghana va vona a va tshami hi rona rifuwo ra vona ro fanekisela, ku nga vutlhari ni vutivi bya Xikwembu. Ku ri na sweswo, va “voninge” emisaveni leyi nga ni munyama ya Sathana “kukota loko ku vonakala ku voningela lavo lulama.” Sweswo va swi endla hi ku pfuna van’wana leswaku va vuyeriwa eka vutlhari ni vutivi bya Xikwembu lebyi nga bya nkoka. Vakaneti va ringetile ku yimisa ntirho wo chumayela hi Mfumo kambe va tsandzekile. Ku ri na sweswo, vuyelo bya ntirho lowu lowunene byi ta “tshama hi masiku.” Loko malandza ya Xikwembu ma tshama ma lulamile hambiloko ma ringiwa, ma nga tiyiseka leswaku ma ta hanya hilaha ku nga heriki, ma “tshama hi masiku.”
11, 12. Vanhu va Xikwembu va tirhisa swilo leswi vonakaka leswi va nga na swona hi tindlela tihi?
11 Vanhu va Xikwembu, ku nga ntlawa wa hlonga ro tshembeka ni lava vumbaka “ntshungu lowukulu,” va tikombise va ri lava hananaka malunghana ni swilo leswi vonakaka. Pisalema 112:9 yi ri: “U ave hinkwako-nkwako; u nyike lava nga swisiwana.” Hakanyingi Vakreste va ntiyiso namuntlha va nyikela hi swilo leswi vonakaka eka Vakreste-kulobye ni le ka vaakelani va vona lava pfumalaka. Nakambe va tirhisa swilo leswi vonakaka leswaku va seketela matsima yo phalala hi minkarhi ya makhombo. Sweswo na swona swi tisa ntsako hilaha Yesu a kombiseke hakona.—Hlaya Mintirho 20:35; 2 Vakorinto 9:7.
12 Ku engetela kwalaho, anakanya hi mali leyi tirhisiweke ku kandziyisa magazini lowu hi tindzimi ta 172, leti to tala ta tona ti vulavuriwaka hi vanhu lava nga swisiwana. Nakambe, xiya leswaku magazini lowu wu kumeka na hi ririmi ra mavoko leri tirhisiwaka hi vanhu lava nga twiki, wu tlhela wu kumeka na hi Braille leyi tirhisiwaka hi vanhu lava feke mahlo.
Yehovha U Ni Nsovo Naswona U Ni Vululami
13. I vamani lava vekeke xikombiso lexinene xo nyika hi nsovo, naswona hi xi tekelela njhani xikombiso xa vona?
13 “Munhu lonene u ni nsovo naswona wa lombisa.” (Ps. 112:5) A swi kanakanisi leswaku u swi xiyile leswaku vanhu lava pfunaka van’wana a hi minkarhi hinkwayo va nga ni nsovo. Van’wana va nyika hi xikongomelo xo kombisa leswaku va fuwile ku tlula van’wana kumbe va kombisa leswaku a va swi tsakeli ku nyika van’wana. A swi tsakisi ku pfuniwa hi munhu loyi a ku endlaka u titwa u nga ri nchumu kumbe loyi a ku endlaka u swi vona leswaku wa n’wi nyangatsa kumbe u ndzhwalo. Ku hambana ni sweswo, swa tsakisa ku pfuniwa hi munhu loyi a nga ni nsovo. Yehovha i xikombiso lexinene xa Munyiki la nga ni nsovo ni la tsakeke. (1 Tim. 1:11; Yak. 1:5, 17) Yesu Kreste u xi kombise hi ku hetiseka xikombiso xa Tata wakwe la nga ni nsovo. (Mar. 1:40-42) Hikwalaho, leswaku Xikwembu xi hi teka hi ri lava lulameke, hi fanele hi nyika hi tsakile naswona hi va ni nsovo ngopfu-ngopfu ensin’wini loko hi ri karhi hi pfuna vanhu leswaku va tiva Yehovha.
14. Hi tihi tindlela tin’wana leti hi nga ‘seketelaka timhaka ta hina hi vululami’ ha tona?
14 “U seketela timhaka takwe hi vululami.” (Ps. 112:5) Hilaha swi profetiweke hakona, ntlawa wa mulanguteri wo tshembeka wu khathalela swilo swa N’wini wa wona hi ku pfumelelana ni vululami bya Yehovha. (Hlaya Luka 12:42-44.) Sweswo swi kombisiwe eka nkongomiso wa le Matsalweni lowu nyikiweke vakulu, lava minkarhi yin’wana va faneleke va tenga milandzu leyikulu emavandlheni. Ndlela leyinene leyi ntlawa wa hlonga wu endlaka swilo ha yona yi tlhela yi vonaka eka nkongomiso lowu sekeriweke eBibeleni lowu ntlawa wa hlonga wu wu nyikelaka malunghana ni ndlela leyi mavandlha, makaya ya varhumiwa ni makaya ya Bethele ma faneleke ma fambisiwa ha yona. Vululami a byi fanelanga byi kombisiwa hi vakulu ntsena kambe ni hi Vakreste hinkwavo loko va ri karhi va tirhisana hi xivona niloko va tirhisana ni vanhu lava nga riki Vakreste ku katsa niloko va khathalela timhaka ta mabindzu.—Hlaya Mikiya 6:8, 11.
Mikateko Leyi Nga Ta Kumiwa Hi Lavo Lulama
15, 16. (a) Xana mahungu yo biha ya misava ma va khumba njhani vanhu lavo lulama? (b) Xana malandza ya Xikwembu ma tiyimisele ku ya emahlweni ma endla yini?
15 “Hikuva a nge tsekatsekisiwi nikatsongo. Lowo lulama u ta tsundzukiwa hilaha ku nga riki na makumu. A nge ma chavi ni mahungu yo biha. Mbilu yakwe yi yime yi tiya, yi endliwe leswaku yi tshembela eka Yehovha. Mbilu yakwe a yi tsekatseki; a nge chavi, ku fikela loko a languta swirha swakwe.” (Ps. 112:6-8) Ematin’wini hinkwawo a ku si tshama ku va ni mahungu yo tala yo biha ku fana ninamuntlha, lama katsaka swilo swo tanihi tinyimpi, vutherorisi, mavabyi lama ha ku tshuburiwaka ni mavabyi ya khale lama tlheleke ma vuya, vugevenga, vusweti ni nthyakiso lowu onhaka. Makhombo wolawo ma va khumba vanhu lava Xikwembu xi va tekaka va ri lava lulameke kambe a ma va endli va chava vumundzuku. Ematshan’weni ya sweswo, timbilu ta vona ‘ti yima ti tiya’ naswona ‘a ti tsekatseki’ tanihi leswi va languteleke vumundzuku hi ku tiyiseka, va ri karhi va swi tiva leswaku misava leyintshwa yo lulama ya Xikwembu yi kwala nyongeni. Loko va weriwa hi khombo va swi kota ku ri tiyisela hikuva va titshega hi Yehovha leswaku a va seketela. A nga si tshama a pfumela leswaku lavo lulama vakwe va ‘tsekatsekisiwa’—wa va pfuna a tlhela a va nyika matimba leswaku va tiyisela.—Filp. 4:13.
16 Vanhu lavo lulama va Xikwembu va fanele va tlhela va tiyiselela ku vengiwa swin’we ni mavunwa lama hangalasiwaka hi vakaneti, kambe leswi a swi nge va tshikisi Vakreste va ntiyiso ku chumayela. Ematshan’weni ya sweswo malandza ya Xikwembu ma ya emahlweni ma yima ma tiya ni ku nga tsekatsekisiwi entirhweni lowu Yehovha a ma nyikeke wona, wa ku chumayela mahungu lamanene ya Mfumo ni ku endla vanhu hinkwavo lava ma amukelaka leswaku va va vadyondzisiwa. A swi kanakanisi leswaku lavo lulama va ta kanetiwa swinene tanihi leswi makumu ma nga kwala nyongeni. Nkaneto wolowo wu ta va wukulu swinene loko Sathana Diyavulosi a hlasela Vakreste emisaveni hinkwayo a ri Gogo wa Magogo. Kutani eku heteleleni, hi ta ‘languta swirha swa hina’ loko swi ri karhi swi hluriwa hi ku helela. Kunene ku ta va nchumu lowu tsakisaka ku vona vito ra Yehovha ri kwetsimisiwa hi ku helela!—Ezek. 38:18, 22, 23.
Ku “Tlakusiwa Hi Ku Vangama”
17. Lowo lulama u ta ‘tlakusiwa njhani hi ku vangama’?
17 Hakunene swi ta tsakisa swinene loko hinkwerhu ka hina hi dzunisa Yehovha, handle ko kanetiwa hi Diyavulosi swin’we ni misava ya yena! Hinkwavo lava lulameke emahlweni ka Xikwembu va ta xi dzunisa va tsakile hilaha ku nga heriki. A va nge hluriwi hikuva Yehovha u tlhela a va tshembisa leswaku “nanga” ya lowo lulama wakwe yi “ta tlakusiwa hi ku vangama.” (Ps. 112:9) Lowo lulama wa Yehovha u ta khana loko a vona valala hinkwavo va vuhosi bya Yehovha va hluriwa.
18. Xana marito yo gimeta ya Pisalema 112 ma ta hetiseka njhani?
18 “Lowo homboloka u ta vona, a dyisiwa mbitsi hakunene. U ta getserisa meno ivi a n’oka hakunene. Ku navela ka lavo homboloka ku ta lova.” (Ps. 112:10) Hinkwavo lava yaka emahlweni va kaneta vanhu va Xikwembu ku nga ri khale va ta “n’oka” hikwalaho ka mavondzo ni rivengo ra vona. Ku navela ka vona ko vona ntirho wa hina wu yimisiwile ku ta lovisiwa na vona hi nkarhi wa “nhlomulo lowukulu” lowu taka.—Mat. 24:21.
19. Hi nga tiyiseka hi yini?
19 Xana u ta va un’wana wa vanhu lava tsakeke lava poneke eka ku hlula koloko lokukulu? Kumbe loko swi endleka leswaku u fa hikwalaho ka mavabyi kumbe ku dyuhala loko misava ya Sathana yi nga si herisiwa, xana u ta va un’wana wa “lava lulameke” lava nga ta pfuxiwa eku feni? (Mint. 24:15) Nhlamulo ya wena yi nga va ina, ntsena loko u ya emahlweni u kombisa ripfumelo eka gandzelo ra Yesu ra nkutsulo naswona u tekelela Yehovha hilaha lava yimeriwaka hi “munhu” wo lulama loyi ku vulavuriweke ha yena eka Pisalema 112 va endlaka hakona. (Hlaya Vaefesa 5:1, 2.) Yehovha u ta tiyiseka leswaku vanhu volavo va tshama va ri karhi va “tsundzukiwa” naswona swiendlo swa vona leswo lulama a swi honisiwi. Va ta tsundzukiwa ni ku rhandziwa hi Yehovha hi laha ku nga heriki.—Ps. 112:3, 6, 9.
[Nhlamuselo ya le hansi]
^ par. 5 Leswaku tipisalema leti timbirhi ta fambisana swi vonaka eka ndlela leyi ti hleriweke ha yona swin’we ni le ka marito ya tona. Timfanelo ta Xikwembu leti ku vulavuriwaka ngopfu ha tona eka Pisalema 111 ti tekeleriwa hi “munhu” la chavaka Xikwembu wa le ka Pisalema 112, hilaha swi nga voniwaka hakona loko ku ringanisiwa Pisalema 111:3, 4 na Pisalema 112:3, 4.
Swivutiso Swo Anakanyisisa Ha Swona
• Hi swihi swivangelo swin’wana leswi hi nga na swona swa ku vula hi ku “Aleluya”?
• Hi xihi xiendlakalo xa manguva lawa lexi endlaka Vakreste va ntiyiso va tsaka swinene?
• Yehovha u rhandza munyiki wa njhani?
[Swivutiso Swa Dyondzo]
[Xifaniso lexi nga eka tluka 25]
Leswaku hi tshama hi ri lava amukelekaka eka Xikwembu, hi fanele hi va ni ripfumelo eka ngati leyi halatiweke ya Yesu
[Xifaniso lexi nga eka tluka 26]
Minyikelo ya ku tirhandzela leyi nyikeriwaka yi nga pfuna entirhweni wo phalala, ni le ku hangalasiweni ka minkandziyiso leyi sekeriweke eBibeleni